Chapter 28

💙Chapter 28 : လောကျုံးယုံ

နှစ်သစ်ကူးနေ့ နီးကပ်လာသည်နှင့်အမျှ ရှောင်ကျန်းကျွင်း ညတိုင်း စတိုးဆိုင်သို့ လာသည်။ စက်ရုံအများအပြား၏ ကုန်ပစ္စည်းများကို မှာယူထားပြီးဖြစ်သည်။ ရှောင်ကျန်းကျွင်း၏ ကြိုးစားအားထုတ်မှုကြောင့် စက်ရုံတစ်ခုစီသို့ ပေးပို့ချိန်သည် အနည်းငယ်သာကွဲပြားသွားသည်။

 ဤအချိန်သည် ကုန်စည်များစွာရှိ၍ ဆီးနှင်းကြောင့် လမ်းပိတ်ဆို့ကာ ပို့ဆောင်ချိန်အလွန်ကြာသောကြောင့် ဝမ်လီချမ်လည်း ကူညီရသည်။ ကုန်ပစ္စည်းများ ပေးပို့ရန် တစ်ပတ်လုံး အချိန်ယူခဲ့ရသောကြောင့် ဝမ်လီချမ်သည် ရက်အတော်ကြာ အလုပ်မှ အနားယူခဲ့၍ ဒါရိုက်တာ၏ ဝေဖန်မှုကို ခံခဲ့ရသည်။

သူကတော့ ရာထူးမှ နုတ်ထွက်ခြင်း မရှိသေးဘဲ လာမည့်နှစ်တွင် ၁၄ ကြိမ်မြောက် အမျိုးသား ကွန်ဂရက် ကျင်းပချိန်ကို စောင့်ဆိုင်းနေသည်။ အလုပ်မှထုတ်ခံရပါက စက်ရုံက လျော်ကြေးပေးမည်ဖြစ်သော်လည်း သူ့မိခင်က နုတ်ထွက်မည်ကို သဘောတူမည်မဟုတ်ပေ။

 နှစ်သစ်ကူးနေ့မတိုင်ခင် တစ်ရက်မှာ ဝမ်လီချမ်က အကြီးဆုံးအစ်ကိုဖြစ်သူ ရှောင်ကျန်းကျွင်းကို ကတိပေးထားသည့်အတိုင်း ပစ္စည်းတန်ဖိုး၏ 1% ကို ပေးချေခဲ့သည်။တန်ဖိုးငွေက ယွမ် 100,000 ဖြစ်၍ ရှောင်ကျန်းကျွင်းအား ယွမ် 1,000 ပေးခဲ့သည်။ 

ယခုတစ်ကြိမ်၊ စတိုးဆိုင်သည် ယွမ် 8,000 ကျော် အမြတ်ငွေရနေပြီဖြစ်၍ တီဗီအသစ်များနှင့် အဝတ်လျှော်စက်များ ဝယ်ယူရန် လုံလောက်ပြီး ကျန်ငွေများကိုလည်း နောက်နှစ်အတွက် စုထားနိုင်သည်။

ရှောင်ကျန်းကျွင်းသည် ဝမ်လီချမ် ပေးသော ယွမ် 100 ကြောင့် အလွန်ပျော်နေခဲ့သည်။သူသည် ဧည့်သည်များကို ညစာ၊ စီးကရက်နှင့် အရက်များ လိုက်လံကျွေးမွေးခဲ့ရာ မုန့်ဖိုး ယွမ် 800 ကျော် ရရှိခဲ့သည်။

သူ၏လစာမှာ တစ်လလျှင် ယွမ် 150 ဖြစ်သည်။ခဲအိုကို စီးပွားရေးလုပ်ရန် ကူညီပေးသည်မှာ တစ်လခွဲသာရှိသေးပြီး သူ၏ နှစ်ဝက်စာ လစာစုစုပေါင်းနီးပါး ရရှိခဲ့သည်။

သူ၏ယောက်ဖသာဆို များများရမည်ဟု သိသော်လည်း၊ သူတို့လည်း အများကြီး ရင်းနှီးမြုပ်နှံထားကြသည်။ ယခုလည်း အိမ်နှစ်လုံးပဲ ဆောက်ပြီးဖြစ်လေသည်။သူ၏ယောက်ဖသည် ချမ်းသာပြီး အရည်အချင်းရှိသလို၊ သူ့ညီမကလည်း အမြင်ရှိသည်။

 နှစ်သစ်ကူးနေ့မှာ ဝမ်လီချမ်နှင့် သူ့အမေ လျှိုဖုန်းကျန်းတို့ မင်္ဂလာပွဲအကြောင်း ဆွေးနွေးခဲ့ကြသည်။ ဝမ်လီချမ်သည် ဖေဖော်ဝါရီ 14 ရက်အတွက် ရက်စွဲကို သတ်မှတ်လိုပြီး လျှိုဖုန်းကျန်းက ပြက္ခဒိန်ကို ကြည့်လိုက်ရာ ဖေဖော်ဝါရီလ 14ရက်နေ့သည် နှစ်သစ်၏ ဆဋ္ဌမမြောက်နေ့ဖြစ်သည်။ အိမ်ထောင်ပြုဖို့ မသင့်တော်ပေ။ ရှေ့ကို တစ်ရက်တိုးပြီး ဖေဖော်ဝါရီလ 13 ရက်နေ့ဟု သားအမိနှစ်ယောက် သဘောတူခဲ့ကြသည်။

ထို့နောက် ဝမ်လီချမ်နှင့် သူ့မိခင်သည် အားလပ်ရက်ကြည့်ကာ ရက်သတ်မှတ်ရန် ရှောင်ဟုန်ယန်၏ အိမ်သို့ သွားခဲ့သည်။

လျှိုဖုန်းကျန်းက ယွမ် 2000 ယူလာခဲ့သည်။ ဝမ်လီချမ်သည် ရှောင်တရှင်းကို ကတိပေးထားသော ရွှေလက်ကောက်နှစ်ကွင်း၊ ရွှေလည်ဆွဲနှင့် ရွှေနားတောင်းတစ်ရံတို့ကို ယူဆောင်လာခဲ့သည်။

ရှောင်တရှင်းသည် လျှိုဖုန်းကျန်းနှင့်အတူ စကားစမြည်ပြောပြီး မိသားစုနှစ်စုသည် မင်္ဂလာ နေ့ရက်နှင့် တည်နေရာကို အတည်ပြုခဲ့သည်။ စားပွဲအရေအတွက်ကိုလည်း အချေအတင် ဆွေးနွေးရန် လိုနေသေးသည်။ 

ရှောင်တရှင်းသည် ရွှေအဆင်တန်ဆာများနှင့် ငွေများကို လက်ခံခဲ့သည်။ယခင်က လက်ဖွဲ့ ကြေးငွေ မပေးရဟု ကတိပေးခဲ့ဖူးသည်။ နောက်ပိုင်းတွင် ဝမ်လီချမ်တို့မိသားစုသည် ချမ်းသာသည်ဟု သားအကြီးဆုံးထံမှ ကြားသိရပြီးနောက် သူက ပိုက်ဆံကိုလည်း ယူခဲ့သည်။ 

သူ့စုဆောင်းငွေအားလုံးက ယွမ် 3500 သာရှိသည်။ ယခင်က စုဆောင်းငွေများကို သားထွေးအတွက် အိမ်ဝယ်ရန် အသုံးပြုခဲ့သည်။ ဤငွေများကို သူ့သမီးအငယ်ဆုံးအတွက် ခန်းဝင်ပစ္စည်းအဖြစ် မကြာသေးမီနှစ်များအတွင်းက သိမ်းဆည်းခဲ့ခြင်းဖြစ်၏။ 

ဝမ်လီချမ်သည် ယခုနှစ် စတိုးဆိုင်ဖွင့်ခြင်းမှ ရရှိသော ငွေဖြင့် အိမ်ဆောက်ရာ ယွမ် 10,000 ကျော်ကုန်ကျခဲ့သည်။ လျှိုဖုန်းကျန်းသည် သူမလက်ထဲမှ ပိုက်ဆံကို ဘယ်တော့မှမထုတ်ဘဲ တင်တောင်းငွေအတွက် ပြင်ဆင်ထားကြောင်း သူ့သားကိုပင် ကြိုမပြောခဲ့ပေ။

သူမသည် ရှောင်ဟုန်ယန်အား ချွေးမတော်ရသည်ကို အလွန်ကျေနပ်သည်။ ဖြစ်နိုင်လျှင် သူမကပင် နောက်ထပ်လက်ဆောင်များ ပေးလိုက်ချင်သည်။ နောက်ပြီး သူမ၏သားက အခု ပိုက်ဆံရှာနိုင်နေပြီဖြစ်ကာ ယွမ် 2000 က သူမတို့မိသားစုအတွက် အများကြီး မဟုတ်တော့။

 ဧည့်ခံမည့်ရက်ကို သတ်မှတ်ပြီးနောက် ရှောင်တရှင်းသည် ရှောင်ဟုန်ယန်ကို လုံးဝလျစ်လျူရှုခဲ့သည်။ယခုဆို ရာသီဥတုက ပိုအေးလာ၍ ရှောင်ဟုန်ယန် မပြန်ချင်ဘူးဆိုလျှင် တညတလေ တည်းနေမည်ဖြစ်သည်။ ညဘက်တွင် ဝမ်လီချမ်သည် သူမကို ပုံမှန်အတိုင်း ပွေ့ဖက်ကာ အိပ်ပျော်သွားခဲ့သည်။ နှစ်ယောက်သား နွေးနွေးထွေးထွေး ပွေ့ဖက်ကာ အိပ်ကြသည်။

ဝမ်လီချမ်သည်လည်း သူမကို မထိခဲ့သလို၊ ရှောင်ဟုန်ယန်ကလည်း အစမဖော်တာကြောင့် မင်္ဂလာမဆောင်မီ နေ့ရက်များကို ငြိမ်းချမ်းစွာနေထိုင်ခဲ့သည်။

ရှောင်ကျန်းကျွင်းသည် နွေဦးပွဲတော် လက်ဆောင်များအတွက် စက်ရုံများစွာကို ဆက်သွယ်ခဲ့သည်။နှစ်သစ်ကူးပွဲတော်သည် တစ်နှစ်အတွင်း ကျင်းပသည့် ပွဲတော်အားလုံးမှာ အကုန်အကျအများဆုံး ပွဲတော်ဖြစ်ကာ အကြီးကျယ်ဆုံးလည်း ဖြစ်သည်။ကျန်းချမ်မှ ဝမ်လီချမ် အသစ် တင်သွင်းသော ပစ္စည်းများ၏ တန်ဖိုးသည် ယွမ် 300,000 အထိမြင့်မားပေသည်။

နှစ်သစ်ကူးအတွက် လက်ဆောင်ပစ္စည်းများကို ကြိုတင်မှာထားသင့်ပြီး အချိန်နှောင်းသွားပါက မရရှိနိုင်တော့ပေ။ စီးပွားရေးလုပ်ငန်းများလည်း တံခါးပိတ်ကာ နှစ်သစ်ကူးအတွက် အိမ်ပြန်ကြမည်ဖြစ်သည်။ ရှောင်ကျန်းကျွင်း ပစ္စည်းစာရင်းလာတင်ပြီး နောက်ထပ်ပစ္စည်းများ လာယူသည့်နေ့မှစ၍ သူတို့သုံးယောက် အလုပ်ရှုပ်နေပြန်သည်။ရှောင်ဟုန်ယန်၏မွေးနေ့မှာတောင် အလုပ်ရှုပ်နေခဲ့သည်။

ရှောင်ဟုန်ယန်၏ မွေးနေ့သည် ဇန်နဝါရီ 20 ရက်ဖြစ်သည်။ 19 ရက် တနင်္ဂနွေနေ့တွင် ဝမ်လီချမ် သည် ကျန်းချမ်သို့ အော်ဒါထပ်တင်ရသည်။ စကားမစပ်၊ ရှောင်ဟုန်ယန်သည် အင်္ကျီတစ်ထည်နှင့် မွေးနေ့ကိတ်တစ်လုံးကို ဝယ်ခဲ့သည်။

သူမသည် ရာသီလာပြီးသည်မှာ မကြာသေး၍ ထိုညက နှစ်ယောက်သား တစ်ကြိမ် အတူနေဖြစ်ခဲ့သည်။

ဖူချမ်ရှိ အကောင်းဆုံးဟိုတယ်ဖြစ်သည့် ဖူချမ်ဟိုတယ်တွင် မင်္ဂလာပွဲကျင်းပရန် လျှိုဖုန်းကျန်း ကိုယ်တိုင် အမိန့်ပေးခဲ့သည်။ စားပွဲဆယ့်ငါးလုံးကို ကြိုတင်မှာယူထားပြီး နှစ်ဘက်စလုံးမှ ဆွေမျိုးများအတွက်ဖြစ်သည်။ဟင်းလျာများကို ဝမ်လီချမ်နှင့် ရှောင်ဟုန်ယန်တို့ အတူတူ မှာယူခဲ့ကြသည်။စားပွဲတစ်လုံးလျှင် 35 ယွမ် ကုန်ကျမည်ဖြစ်သည်။ယင်းငွေက အစားအသောက်အတွက်ဖြစ်ကာ ဆေးလိပ်၊ အရက်၊ သကြားလုံးနှင့် လက်ဖက်ရည်တို့ မပါဝင်ပေ။

နွေဦးပွဲတော် နီးကပ်လာပြီ ဖြစ်သော်လည်း လက်ဆောင်ပစ္စည်းများကို ယခုထိ တွင်တွင်ကျယ်ကျယ် ပို့ဆောင်ပေးရရုံသာမက အော်ဒါမှာယူသော ဆိုင်များစွာ ရှိနေပါသည်။ ချန်သဲရုံနှင့် မာကျစ် တို့သည် ပို့ဆောင်ပေးနေရ၍ အလုပ်များလွန်းလျက်ရှိသည်။ ဝမ်လီချမ်က သူ့ညီအကို သုံးယောက်ကို အကူအညီတောင်းထားပြီး ရှောင်ဟုန်ယန်မှ တတိယအစ်ကိုဖြစ်သူ ရှောင်ကျန်းတန့်ကိုလည်း ခေါ်ထားသည်။

သို့သော် အလကားတော့မဟုတ်ပေ။ ဝမ်လီချမ်က သူတို့မိသားစုလေးယောက်အတွက် နှစ်သစ်ကူးပစ္စည်းများကို ကြိုတင်ပြင်ဆင်ထားပြီး စီးကရက်ကောင်းကောင်းအနည်းငယ်နှင့် အကောင်းစားဝိုင်ပုလင်းအနည်းငယ်ကိုလည်း လက်ဆောင်ထည့်ပေးခဲ့သည်။

ချန်သဲရုံ နှင့် မာကျစ်တို့၏ အခြေခံလစာကိုလည်း တစ်လလျှင် ယွမ် 100 အထိ တိုးမြှင့်ခဲ့သည်။ သူတို့နှစ်ဦးသည် တစ်လလုံး အချိန်ပိုလုပ်ကြပြီး ညတိုင်း 9 နာရီမှာသာ အလုပ်ဆင်းကြသည်။ ဝမ်လီချမ်နှင့် ရှောင်ဟုန်ယန်တို့ကတော့ စတိုးဆိုင်မပိတ်မီ ဆယ့်တစ်နာရီအထိ အလုပ်များနေခဲ့ခြင်းဖြစ်သည်။

လွန်ခဲ့သည့် ရက်အနည်းငယ်က ဖြစ်ပျက်ခဲ့သော နောက်အဖြစ်အပျက်တစ်ခုက လောကျုံးယုံ ရောက်လာခြင်းဖြစ်သည်။ ရှောင်ဟုန်ယန်၏ မွေးနေ့ရက်သတ္တပတ်တွင် ဝမ်လီချမ်သည် ကျောင်းတံခါးတွင် ရှောင်ဟုန်ယန်ကို စောင့်နေခဲ့ရင်း လောကျုံးယုံနှင့် တွေ့ခဲ့သည်။ ထိုလူသည် လောကျုံးယုံ ဖြစ်သည်မှာ သေချာလှသည်။

 "ဝမ်လီချမ် ဘယ်သူ့ကိုကြည့်နေတာလဲ"  

ရှောင်ဟုန်ယန်က မေးလိုက်သည်။ သူမက အလုပ်ဆင်းလာသော်လည်း သင်္ချာအဖွဲ့မှ လျန့်လီရွှယ်သည် အထဲမှာ ရှိနေသေးသည်။လျန့်လီရွှယ်ကလွဲလျှင် ဝမ်လီချမ် ဤမျှ အလေးအနက်ထား၍ သူစိမ်းတစ်ယောက်ကို မကြည့်ဖူးချေ။

လျန့်လီရွှယ်သည် အနည်းငယ်ထူးဆန်းသည်။ သူမက တစ်ခဏလောက် ဝမ်လီချမ်ကို စိုက်ကြည့်နေသော်လည်း၊နောက်မကြာမီ သူစိမ်းတစ်ယောက်လို ဖြစ်သွားကာ နှစ်ယောက်သား မျက်လုံးချင်းမဆုံဖြစ်တော့။

 "ခဏနေမှ သွားရအောင်၊ ဟုတ်ပြီလား အဲဒီလူက လောကျုံးယုံလေ၊ သူ လျန့်လီရွှယ်ကို စောင့်နေတာလား ကိုယ် ကြည့်ချင်တယ်"  

လောကျုံးယုံနှင့် သူ သူငယ်ချင်းဖြစ်ချင်ပြီး သူ့ဘဝထဲသို့ ရင်းနှီးဝင်ရောက်ရန် ဤအခွင့်အရေးကို ဆုပ်ကိုင်ထားဖို့ လိုအပ်သည်။ .

 "သူက လျန့်လီရွှယ် ရဲ့ချစ်သူလား"

 အရပ်ရှည်ရှည် ပိန်ပိန်ပါးပါးနှင့် မျက်မှန်တပ်ထားပုံက အားနည်းသည့် ကျောင်းသားစာဂျပိုးတစ်ယောက်လို ဖြစ်နေသည်။

 "အင်း၊ ဖြစ်နိုင်ပါတယ်"

 ယခု သူတို့နှစ်ယောက် တွဲနေသလား မသိပေ။ လောကျုံးယုံသည် ယခုအချိန် ဖူချမ်တွင်ပေါ်လာပြီဖြစ်၍ လျန့်လီရွှယ်က လောရွှယ်၏ မိခင်ဖြစ်နိုင်သည်။

 "လောကျုံးယုံ ရှင် ဘာလို့ဒီကိုရောက်နေတာလဲ"  

 "ဦးလေးလျန့်က မင်းကို ကျန်းချမ်ကို ပြန်လာခိုင်းတယ်"  

မနေ့ကမှ လောကျုံးယုံ ကျန်းချမ် ကိုပြန်ရောက်သည်။ လျန့်လီရွှယ်သည် ဆောင်းရာသီ အားလပ်ရက် အပန်းဖြေခရီး သွားနေကြောင်း ကြားသိရသဖြင့် ဖူချမ် သူမကို လာခေါ်ရန် ဖူချမ်အထိ လာခြင်းဖြစ်သည်။

"သူက လာကြိုခိုင်းတာနဲ့ ရှင်က လာကြိုစရာလား၊လာသင့်၊မလာသင့် စဉ်းစားဦးလေ"   

လူကြီးစကားကို ဘယ်လိုတွန်းလှန်ရမှန်း မသိဘူး၊ အခု သူ့အသက်က ဘယ်လောက်ရှိပြီလဲ၊ သူက ကောလိပ်ကျောင်းသား ဖြစ်နေတုန်းပဲ၊ သူမကရော သူ့လိုလူနဲ့ စီစဉ်တဲ့ အိမ်ထောင်ရေးကို ဘယ်လိုလုပ် သည်းခံနိုင်မှာလဲ။

 "မင်းက ကိုယ့်ရဲ့ ဇနီးလောင်းပါ၊ မင်းကို လာခေါ်ဖို့က ကိုယ့်တာဝန်ပါပဲ"

အလယ်တန်းကျောင်းတက်တုန်းက အိမ်နီးနားချင်းကောင်မလေးကို လောကျုံးယုံ သဘောကျခဲ့သည်။နောက်ပိုင်းတွင် သူ့အဖေက အလုပ်ပြောင်း၍ သူတို့ တစ်နေရာကို ပြောင်းရတော့သည်။သူကတော့ လျန့်လီရွှယ် နှင့်ဝေးကွာရန် ဆန္ဒမရှိခဲ့ပေ။သူ့မိဘများနှင့် အချေအတင်စကားများရာမှ သူက လျန့်လီရွှယ်ကို ကြိုက်မှန်း သူတို့သိသွားကြ၏။  

လွန်ခဲ့သည့်တစ်နှစ်လောက်က သူ နိုင်ငံခြားမှာ ကျောင်းတက်နေတုန်း သူ့အဖေက သူ့အတွက် စေ့စပ်ကြောင်းလမ်းခြင်းကိစ္စအား ပြောလာခဲ့သည်။သူ့အဖေက လျန့်လီရွှယ်နှင့် စေ့စပ်ကြောင်းလမ်းထားကြောင်း ပြောပြသော် သူ အံ့အားသင့်သွားရ၏။

"ဘယ်က ဇနီးလောင်းလဲ၊ကျွန်မ လက်မခံဘူး" 

သူမကတော့ ဒီကိစ္စကို အဆုံးထိတိုက်ခိုက်မှာသေချာတယ်။

 "ဒါဆို ကိုယ် မင်းကို သေသေချာချာ ချစ်ခွင့်ပန်မယ်လေ ဟုတ်လား၊ကိုယ်ကလည်း မကြာခင် ဘွဲ့ရတော့မှာ...ကိုယ် ကျောင်းဆရာလည်း လုပ်လို့ရတယ်"  

သူကိုယ်တိုင်လည်း မိဘများစီစဉ်ပေး၍ လက်ထပ်ထိမ်းမြားရသည်ကို မကြိုက်သော်လည်း လျန့်လီရွှယ် ဖြစ်နေ၍ သဘောတူခြင်းပင်။သူမက သူ့ထက်ပင် ပြင်းထန်စွာငြင်းဆိုနေတော့သည်။ 

လျန့်လီရွှယ်သည် လောကျုံးယုံ ၏စကားကို လုံးဝလျစ်လျူရှုလိုက်သည်။

 "လောကျုံးယုံ ရှင်တကယ် ရူးနေတာပဲ" 

လောကျုံးယုံသည် မြို့တော်ရှိ တက္ကသိုလ်တွင် ပညာသင်ကြားနေပြီး တစ်နှစ်အတွင်း သူ ဖြေဆိုရမည့် စာမေးပွဲကလည်း များပြားတာကြောင့် ကျန်းချမ်းသို့ မလာနိုင်ဟု သူမ၏ အဖေက ပြောခဲ့သည်။ သို့သော် ထိုစကားကမမှန်ပေ။သူ ယခု ဖူချမ်ကိုတောင်ရောက်လာပြီဖြစ်သည်။ ကျောင်းဆရာလုပ်မည်ဟုလည်း ပြောနေသေးသည်။သူ တကယ် ဦးနှောက်မကောင်းတော့ဘူးဆိုလျှင် သူမ သူ့ကို ပို၍ပင် လက်မထပ်ချင်တော့ပေ။

 "လောရွှယ်၊ ကိုယ်တို့အတူတူကြီးပြင်းလာတာလေ၊ မင်း ကိုယ့်ကို မသိဘူးလား၊ မသိတဲ့သူနဲ့ လက်ထပ်ရတယ်ဆိုလည်း ထားပါတော့၊ ဒါပေမယ့် အခုက မတူဘူးလေ၊ မင်းကို ကိုယ် သိတယ်၊ မင်းက ဇနီးကောင်းတစ်ယောက် ဖြစ်မယ်ဆိုတာလည်း သိနေတယ်၊ကိုယ် မင်းကို ပျော်ရွှင်အောင် လုပ်ပေးမယ်၊ မင်း ကိုယ့်ကို ဒီအခွင့်အရေး ပေးမယ်လို့ မျှော်လင့်တယ်"  

ဒီမိုက်မဲတဲ့ မိန်းကလေးက နားမလည်သေးပါလား။ သူသာ သူမကို လက်မခံရင် သူ့ကိုယ်သူ ပိုမုန်းလာမိလိမ့်မယ်။

 "လောကျုံးယုံ၊ ကျွန်မက အသက် ဆယ့်ရှစ်နှစ်ပဲရှိသေးတာ" 

သူမသည် လွတ်လပ်ပြီး ရိုမန့်တစ်ဆန်သော အချစ်မျိုးကို လိုချင်သေးသည်။သူမ စိတ်ကူးယဉ်မှုကို လောကျုံးယုံကြောင့် ပျက်စီးမခံနိုင်ပေ။

 "ကိုယ် စောင့်နေနိုင်တယ်လေ၊ကိုယ်လည်း ဘွဲ့မရသေးဘူး"  

 သူမက ငယ်ရွယ်သေးသောကြောင့်၊ သူလည်း လက်မထပ်ရဲပေ။ အကြောင်းမှာ သူမ စိတ်က သူ့ဘက်ကို လုံးလုံးလျားလျား မရှိနေသေးတာကြောင့်ပင်။လက်ထပ်ပြီးမှ သူမ ဖောက်ပြန်သွားရင် ဘယ်လိုလုပ်မလဲ။

သူ့အိမ်ထောင်ဖက်က လျန့်လီရွှယ် ဆိုသည်ကို သိပြီးနောက်၊ သူမဆီသို့ အပတ်တိုင်း စာတစ်စောင်ရေးခဲ့ပေမယ့် သူမက စာမပြန်တာ တစ်နှစ်ရှိပီဖြစ်သည်။

"ကျွန်မ နောက်ကို မလိုက်နဲ့နော်၊ မဟုတ်ရင် ရှင့်ကို ဘယ်တော့မှ ပြန်မတွေ့တော့ဘူး" 

အစ်ကိုလောသည် ယခင်က ဤကဲ့သို့မဟုတ်ခဲ့ပေ။ သူမနှင့် အတူကစားပြီး အိမ်စာလုပ်တတ်အောင် သင်ပေးသူဖြစ်သည်။ အခု သူက ဘယ်လိုဖြစ်သွားတာလဲ။

လျန့်လီရွှယ် ထွက်သွားပြီးနောက် ဝမ်လီချမ်နှင့် ရှောင်ဟုန်ယန်တို့သည် လောကျုံးယုံကို နှုတ်ဆက်လိုက်ကြသည်။

 "ခင်ဗျားတို့က ဘယ်သူပါလဲ" 

လောကျုံးယုံမှာ ဖူချမ်တွင် အသိအကျွမ်းမရှိ။ လျန့်လီရွှယ် တစ်ဦးတည်းသာရှိသည်။

"ကျွန်တော့်မိန်းမက လျန့်လီရွှယ်ရဲ့ လုပ်ဖော်ကိုင်ဖက်ဖြစ်ပြီး လျန့်လီရွှယ်ကိုလည်း သိပါတယ်"  

ရှောင်ဟုန်ယန်ရှေ့မှာ ဝမ်လီချမ်က လောကျုံးယုံ နှင့် သိခွင့်ရသည်ကို သက်သေပြဖို့ ဝမ်လီချမ် ပြောလိုက်သည်။

 "မင်္ဂလာပါ" 

သူက ဝမ်လီချမ်နှင့် လက်ဆွဲနှုတ်ဆက်လိုက်သည်။ လျန့်လီရွှယ်နှင့် သူ၏ ဆက်ဆံရေးအကြောင်း တခြားလူများ သိသွားမှာကို သူ ဂရုမစိုက်။ သူ့လုပ်ဖော်ကိုင်ဖက်များအား မိတ်ဆက်စေပြီး လူသိရှင်ကြား အသိပေးခြင်းက ပိုကောင်းသည်။

ဝမ်လီချမ်သည် လောကျုံးယုံအား စောစောက ရေးထားသည့် ဖုန်းနံပါတ်ကို ပေးလိုက်၏။

 "ဒါက ကျွန်တော့်ဖုန်းနံပါတ်ပါ၊ကျွန်တော်နာမည်က ဝမ်လီချမ်ပါ၊ ကူညီစရာရှိရင် ကျွန်တော် ကူညီပေးပါ့မယ်" နောက်ဆုံးတွင် လောကျုံးယုံ၏ အနီးကိုကပ်၍ "ကျွန်တော် သွားလိုက်ပါဦးမယ်"

 "ဝမ်လီချမ် နောက်ဆုံးတော့ လျန့်လီရွှယ်ရဲ့ ချစ်သူနဲ့ စကားပြောခဲ့ပြီပဲ၊ ဘာကိစ္စရှိလို့လဲ"

 "ဘာမှမဟုတ်ပါဘူး၊ သူ့ကို အားပေးတာပါ"

 "ဝမ်လီချမ်၊ ကျွန်မကိုရှင်းပြသင့်တယ်မလား"  

ဘာလို့ သူမကို လိမ်ညာခဲ့တာလဲ။ သူမ အနည်းငယ် စိတ်မသက်မသာ ခံစားခဲ့ရသည်။ လျန့်လီရွှယ်၏လက်တွဲဖော်ကို သိကြောင်း သူ အစက ရှင်းရှင်းလင်းလင်းပြောခဲ့သော်လည်း ယခုမူ သူစိမ်းတစ်ယောက်သာ ဖြစ်သည်။ဝမ်လီချမ်က သူမကို လိမ်ခဲ့တာလား။ သူ အမှန်အတိုင်းပြောတာရော ရှိသေးလား။

 "ကိုယ် လောကျုံးယုံနဲ့ ခင်မင်ချင်တယ်"  

သူသည် လောကျုံးယုံ၏ အတိတ်ဘဝကြောင့်သာမက သူ၏ နောက်ခံကြောင့်လည်း အမှန်တကယ် သိချင်ခဲ့သည်။

 "ဒါဆို ကျွန်မကို လိမ်ခဲ့တာလား"

 "မဟုတ်ဘူး၊ ကိုယ်က လောကျုံးယုံနဲ့ လျန့်လီချမ်ကို တကယ်သိတယ်၊ ဒါပေမယ့် သူတို့က ကိုယ့်ကိုမသိဘူး၊ ကိုယ် လောကျုံးယုံနဲ့ သူငယ်ချင်းဖွဲ့ရမယ်၊ မင်းကို ရည်ရွယ်ပြီး လိမ်ခဲ့တာမဟုတ်ပါဘူး"

ပြောရင်း သူက ရှောင်ဟုန်ယန်ကို ညင်သာစွာ ဖက်ထားလိုက်သည်။

"ကိုယ် လောကျုံးယုံကို တကယ်သိတယ်၊ မင်းကို မညာပါဘူး"

 "ဒါဆို ကျွန်မကို တမင်တကာလိမ်တာ မဟုတ်ဘူးပေါ့"

 "ကိုယ့်မှာ ဖုံးကွယ်စရာတွေ ရှိတယ်၊ဒါပေမယ့် ကိုယ် မင်းကို အခုလိုခံစားရစေဖို့ တမင်မလိမ်ခဲ့တာ သေချာတယ်"

 "ဝမ်လီချမ် ကျေးဇူးပြုပြီး ကျွန်မကို နောက်ဆို မလိမ်ပါနဲ့"  

မည်သို့ပင်ဆိုစေ၊သူမကတော့ ဝမ်လီချမ် အဖြူဆိုလျှင်၊ဖြူလိုက်မည်၊အမည်းဆိုလျှင် မည်းလိုက်မည်။သူ့စကားတစ်ခွန်းကသာ သူမ ကမ္ဘာကြီးဖြစ်နေပေသည်။

xxxxxx💙