Chapter 46

💙 Chapter 46- ထရပ်ကား     

ယောက်ဖဖြစ်သူက စက်ရုံကို စောင့်ကြည့်နေသော်လည်း ဝမ်လီချမ် သည်လည်း အခါအားလျော်စွာ လာရောက်လည်ပတ်လေ့ရှိသည်။ကုန်စုံဆိုင်ကို စောင့်ကြည့်ရခြင်းက မလွယ်ကူပေ။  

သူသည် ချန်သဲရုံနှင့် မာကျစ်တို့အား အပိုစားသောက်ကုန်ပစ္စည်းဆိုင်ကို စောင့်ကြည့်ရန် လွှဲပြောင်းပေးမည်ဖြစ်သည်။ ရှောင်ဟုန်ယန်သည်လည်း နိုင်ငံရေးလမ်းကြောင်းကို လိုက်စားချင်မည်ဖြစ်သည်။သူမ တစ်ယောက်တည်း အပိုစားသောက်ကုန်ပစ္စည်းဆိုင်ကို တစ်ချိန်လုံး ဂရုစိုက်ရန် မဖြစ်နိုင်ပေ။ စတိုးဆိုင်သည်လည်း ဂရုစိုက်ရန် လူတစ်ယောက် အမြဲလိုအပ်သည်။ 

ဝမ်လီချမ်သည် ချန်သဲရုံနှင့် မာကျစ် အား အပိုစားသောက်ကုန်ပစ္စည်းဆိုင်၏ စီမံခန့်ခွဲမှုအကြောင်း ပြောပြထား၏။ ထိုအချိန်မှာပင် ရှောင်ကျန်းတန့် ရုတ်တရက် အလုပ်မှ ထုတ်ပယ်ခံခဲ့ရသည်။ ရိုးရိုးသားသား ပြောရလျှင် လူရင်းများကိုသာ ဆိုင်စောင့်စေခြင်းက ပို၍ စိတ်ချရသည်။ ရှောင်ကျန်းတန့်သည် သူ့ယောက်ဖသာမက သူငယ်ချင်းအဖြစ်လည်း နှစ်ပေါင်းများစွာကြာအောင် ရင်းနှီးခဲ့သူဖြစ်သည်။ သူသည် နောက်ဆုံး ရှောင်ကျန်းတန့်ဆီမှာသာ ကိစ္စမှန်သမျှ အပ်ထားခဲ့သည်။ 

ချန်သဲရုံနှင့် မာကျစ်တို့ကို တစ်ဦးလျှင် လစာ ယွမ် ၅၀ တိုးပေးခဲ့သည်။ သို့ဖြစ်၍ သူတို့၏ လစာက ယွမ် ၁၅၀ နှင့် ကော်မရှင်ခလည်း ရသေးသည်။ ထို့ကြောင့် ပြောရလျှင် ဖူချမ် မှာ လစာအမြင့်မားဆုံးဟု ယူဆနိုင်‌ေသာပမာဏကိုရရှိသွားတော့သည်။  

ဝမ်လီချမ်သည် အပိုစားသောက်ကုန်ပစ္စည်းဆိုင်ကို သူတို့လက်ထဲသို့ လုံးလုံးလျားလျား လွှဲပြောင်းပေးမည်မှန်း သိသောအခါ၊ တစ်ယာက်နှင့် တစ်ယောက် စဉ်းစားပုံခြင်း မတူညီတော့ပေ။ ချန်သဲရုံက အခွင့်အရေးကောင်းတစ်ခုဟု တွေးတောပြီး မာကျစ်ကမူ သူ ကောင်းကောင်းမလုပ်နိုင်မည်ကို ကြောက်ရွံ့နေ၏။ အပိုစားသောက်ကုန်ပစ္စည်းဆိုင်သည် မရှုပ်ထွေးသော်လည်း စိတ်ရှည်ရန် လိုအပ်သည်။ 

ဝမ်လီချမ်၏ အမြင်တွင် ရှောင်ကျန်းတန့်သည် ဂရုတစိုက် စောင့်ရှောက်မည့်သူမဟုတ်ပေ။ထို့ကြောင့် ရှောင်ကျန်းတန့်အား ကုန်ပစ္စည်းများ အဝင်အထွက်ကိုသာ အဓိက အသားပေး၍ စောင့်ကြည့်ခိုင်းထား၏။ 

ရှောင်ဟုန်ယန် မမွေးဖွားခင်မှာ ဝူလျန့်သည် ထရပ်ကား အကြောင်း သတင်းရလာခဲ့သည်။ ယွမ် 15,000 ဖြင့် ချက်ချင်း အရောင်းအဝယ်ဖြစ်မည်။တစ်ဖက်ကလည်း အလျင်လိုနေသည်။သို့သော် ဝမ်လီချမ်သည် ထိုနေ့က စက်ရုံသို့ မလာပေ။ 

ရှောင်ဟုန်ယန် ကလေးမွေးပြီးနောက် ထရပ်ကားပိုင်ရှင်နှင့် ညှိနှိုင်း၍ ဝူလျန့်သည် ယောက္ခမအိမ်သို့ တန်းတန်းမတ်မတ်သွားခဲ့သည်။ ဝမ်လီချမ်က သမီးဖြစ်သူကို ချော့သိပ်နေ၍ သူ့အား အောက်ထပ်မှာ စောင့်ဖို့ ယောက္ခမက ပြောသည်။ 

သူက အခု အလျင်လိုနေတာ။ ကလေးတွေကို ချော့သိပ်ဖို့က မိန်းမအလုပ်မဟုတ်ဘူးလား။ ဝမ်လီချမ်က တကယ် အလုပ်ကိုမလာဘဲ အိမ်မှာ ကလေး ထိန်းနေတာလား။

လျှိုဖုန်းကျန်းသည် သားမက်အကြီးဆုံး အလျင်လိုနေသည်ကို မြင်နေရသော်လည်း၊သူ့မြေးကို ချော့သိပ်နေစဉ် စကားကျယ်ကျယ်မပြောဖို့ ဝမ်လီချမ်က မှာသွားခဲ့သည်။ ထို့အပြင် ဘယ်သူပဲလာလာ အပေါ်ကိုမတက်လာစေရဘဲ အောက်ထပ်မှာသာ စောင့်နေခိုင်းသည်။သူ့သမီး အိပ်နေသည်ကို မနှောင့်ယှက်ဖို့လည်း အတိအကျပြောခဲ့သည်။

သားဖြစ်သူက မိသားစုကို ဂရုစိုက်တတ်ပြီး ကလေးကို တုန်နေအောင်ချစ်သည်ကို ပျော်မိသော်လည်း၊သူမတို့ မိသားစု၏ ကြီးလေးသည့် လုပ်ငန်းအား နှောင့်နှေးသွားမှာကို ကြောက်မိ၏။ ဝမ်လီချမ်သည် အိမ်ပြန်လာတိုင်း သူ့မိန်းမ အကြောင်း အရင်မေးသည်၊ ပြီးမှ မြေးဖြစ်သူ နေကောင်းရဲ့လားဆိုသည်ကို မေးပြီးမှ အပေါ်ထပ် တက်သွားတတ်သည်။

ဝမ်လီချမ် ဆင်းလာသောအခါ လျှိုဖုန်းကျန်း ညစာ အဆင်သင့်ဖြစ်နေပေပြီ။ ထရပ်ကားကိစ္စ ပြေလည်သွားကြောင်းကြားသော်၊ သူက ဘဏ်စာအုပ်ယူကာ ဝူလျန့်နှင့်အတူ ဘဏ်သို့သွားကြသည်။သို့သော် ဘဏ်က ယခုလေးတင် ပိတ်သွားခြင်းဖြစ်၏။

 "သွားရအောင်၊ ကားပိုင်ရှင်နဲ့ စကားပြောရအောင်"  

ထရပ်ကား ပိုင်ရှင်ကပင် လာ၍ ကမ်းလှမ်းသည်ဟု ယောက်ဖက ပြောပြသည်။ပိုင်ရှင်က မနက်ဖြန်ကျလျှင် ဖူချမ်မှ ခရီးထွက်ခွာမည်ဖြစ်ပြီး အချိန်တစ်ခု ကြာမည်ဟုဆိုသည်။ ထို့ကြောင့် ဝူလျန့်က ထရပ်ကားကိုဝယ်ပြီး ယနေ့ပင် ငွေပေးချေလိုက်ချင်သည်။

ဝမ်လီချမ်နှင့် ဝူလျန့်တို့သည် ပိုင်ရှင်၏အိမ်သို့ အမြန်သွားကြသည်။

"ဟုတ်ကဲ့၊ ကျွန်တော် သိတာနည်းနည်းနောက်ကျသွားတော့ ဘဏ်ပိတ်သွားလို့ပါ၊ မနက်ဖြန်ကျမှ အရောင်းအဝယ်လုပ်လို့ရလား"

 "မရဘူး၊ ဒီနေ့ပဲ အရောင်းအဝယ်လုပ်မှဖြစ်မယ်၊ ငွေက ဒီနေ့ကို လိုနေတာ"

ပိုင်ရှင်သည် မနက်ဖြန် နေ့လည်အတွက် ရထားလက်မှတ်ဖြတ်ထားပြီး မနက်စောစော ကျန်းချမ်ကို သွားမည်ဖြစ်သည်။

 "မနက်ဖြန်ကျမှ ထရပ်ကားအတွက် နာမည်အပြောင်းအရွှေ့လုပ်ထုံးလုပ်နည်းတွေ လုပ်ရင်ရော ဘယ်လိုလဲ၊ မနက်ဖြန်ကျမှဘဲ ငွေကလည်းအဆင်ပြေမှာ...."  

"ကျွန်တော် ခင်ဗျားကို ကားမောင်းလိုင်စင် ထုတ်ပေးမယ်၊ ပြေစာ ထုတ်ပေးမယ်၊ ကျွန်တော် ပြန်လာရင် ခင်ဗျားအိမ်ကို လာပြီး ကားလာပို့ပေးမယ်လေ၊ကျွန်တော့် သူငယ်ချင်းက အမြတ်အစွန်းရစရာရှိတဲ့ လုပ်ငန်းတစ်ခုရှိထားလို့ ကျွန်တော် လက်မှတ်ထိုးဖို့ စောင့်နေရတာကြောင့်ပါ"

"ခင်ဗျားရဲ့ မိသားစုဝင် တစ်ယောက်ယောက်ကို မှာထားလို့ရော မရဘူးလား၊ ကျွန်တော်က ပိုက်ဆံရတာနဲ့ ရှေ့နေနဲ့ တိုင်ပင်ပြီး ခင်ဗျားရဲ့မိသားစုဝင်ကို အပ်လိုက်မယ်"  

လွန်ခဲ့သည့် နှစ်ရက်လုံးလုံး ဆိုင်များမှ ငွေများအား မရေတွက်ရသေးပေ။ 

"ခင်ဗျားတို့ကလည်း မယုံတတ်ရန်ကော၊ ဒါဆို ငွေကို နောက်နေ့ချိန်းမနေဘဲ ဒီနေ့ ဖြစ်အောင်လုပ်ပေးလို့မရဘူးလား၊ကျွန်တော်က ကတိတည်ပါတယ်ဗျ" 

ကားပိုင်ရှင်သည် ကားကို မသမာသောနည်းတစ်ခုခုဖြင့် လိုင်စင်များအတုလုပ်ထားကာ လိမ်နေသူဖြစ်၏။ ယခုမူ အရေးတကြီး နေရာပြောင်းရွှေ့ဖို့လိုလာတာကြောင့် ကားကို ဈေးနည်းနည်းဖြင့် ရောင်းမည်ဟု တွေးလိုက်ခြင်းပင်။  

 "ယောက်ဖ သွားကြစို့"  

ကားပိုင်ရှင်က မရိုးသားဘူးဟု ဝမ်လီချမ် ခံစားရသည်။ ယွမ် 20,000 တုန်းက ညှိမရသော်လည်း ရုတ်တရက် အိမ်အထိရောက်လာပြီး ယွမ် 15,000 နှင့် ရောင်းနေသည်။ 

ဝမ်လီချမ်က ထွက်သွားမည်ဟု ပြောလာသောအခါ ပိုင်ရှင်သည် နောက်ထပ် ယွမ် 500 လျော့ပေးလိုက်၏။ သို့သော် ဝမ်လီချမ်သည် ကားပိုင်ရှင် စျေးလျှော့ပေးခြင်းကို လျစ်လျူရှုကာ သူ့ယောက်ဖကိုခေါ်ကာ ထွက်သွားခဲ့သည်။

 "လီချမ် မင်း ဒီကားကို တကယ်မဝယ်ချင်ဘူးလား" 

ယခုလို စျေးသက်သက်သာသာနှင့် ပေးနေသည်ကိုမှ မဝယ်လျှင် နောက်ဘယ်တော့မှ ဤဈေးမျိုး ရမှာမဟုတ်ပေ။

"မဝယ်နဲ့၊ ကားပိုင်ရှင်က တစ်ခုခုမူမမှန်နေသလို ခံစားရတယ်"

သူတို့ကို ဝယ်ဖို့ အတင်းလာခေါ်ပြီး ဈေးကလည်း အလိုလို လျော့ပေးသည်။ ပြဿနာရှိနေသည်ဟု သူခံစားရသည့်အတွက် မဝယ်သင့်ပေ။

ဝမ်လီချမ်သည် ပိုင်ရှင်၏အိမ်မှ ထွက်လာပြီးနောက် အိမ်သို့ တန်းပြန်သွားခဲ့သည်။ သူ ညစာစားနေခိုက်၊ ရှောင်ဟုန်ယန်၏ ဒုတိအစ်မသည် အိမ်ပေါ်မှာ ရောက်နေသည်ဟု သူ့အမေဆီက ကြားရသည်။

ညဘက် အိပ်ရာဝင်ချိန်မှာ၊ ရှောင်ဟုန်ယန်က သူမ၏ ဒုတိအစ်မကိုလည်း အလုပ်ကထုတ်လိုက်ပြီဟု ပြောခဲ့သည်။

 "ဒုတိအစ်မ ဒီနေ့ အလုပ်ထုတ်ခံရလို့ သူ့ယောက္ခမနဲ့ စကားများ ရန်ဖြစ်တယ်တဲ့"  

ဒုတိယအစ်မသည် သမီးတစ်ယောက် မွေးထားသောကြောင့် ယောက္ခမအိမ်တွင် များစွာ အနစ်နာခံခဲ့ရသည်။ယခုလည်း အလုပ်ထုတ်ခံရပြန်ပြီဖြစ်သည်။ မကြာသေးမီက အလုပ်မှ ထုတ်ပယ်ခံခဲ့ရသူ အများအပြားရှိသည်။

 "အစ်ကိုလီချမ်၊ ဒုတိယအစ်မအတွက် အလုပ်တစ်ခု စီစဉ်ပေးနိုင်မလား"  

ဒုတိယအစ်မသည် အလုပ်ထုတ်ခံရခြင်းကြောင့် ယောက္ခမနှင့် စကားများရန်ဖြစ်ခဲ့သည်။ ဒုတိယအစ်မမှာ အလုပ်ရှိလျှင် ယောက္ခမကလည်း ပြဿနာမရှာနိုင်ပေ။

 "ဒုတိယအစ်မကို ကိုယ်တို့စက်ရုံမှာ လုပ်ခိုင်းစေချင်ပါတယ်၊ ဒါပေမယ့် အလုပ်သမားလစာက တစ်လ ယွမ် 100 ပဲရတာ၊ပြီးတော့ စက်ရုံက နည်းနည်းဝေးတယ်၊ ဒါကြောင့် သူမ လုပ်ချင်သလားတော့ မသိဘူး"  

ဝမ်လီချမ်သည် ရှောင်ဟုန်ယန်၏ ဒုတိယအစ်မနှင့် စကား သိပ်မပြောဖြစ်ပေ။ သူမကိုလည်း သိပ်မသိသဖြင့် လုပ်အားခနည်းပြီး စက်ရုံက ဝေး၍ အဆင်မပြေမှာသာ စိုးရိမ်မိသည်။

 "သူမ လုပ်ချင်နေတာ သေချာတယ်၊ညီမ ဖုန်းဆက်ပြီးပြောလိုက်မယ်"

"ခဏစောင့်၊ မင်း မဆင်းနဲ့၊ မနက်ဖြန်ကျရင် အဖေ့ကိုဖုန်းဆက်ပြီး ဒုတိယအစ်မကိုပြောခိုင်းလိုက်မယ်"

ရှောင်ဟုန်ယန် ဖုန်းသွားဆက်လျှင် လေတိုးမှာစိုးမိသလို၊သူကိုယ်တိုင်ကလည်း သူ့ခယ်မအား မပြောလိုပေ။ ရှောင်ဟုန်ယန် သည် ဝမ်လီချမ် ၏ လည်ပင်းကို သိုင်းဖက်ကာ နမ်းလိုက်သည်။  

"အစ်ကိုက အရမ်းကြင်နာတတ်တာပဲ"

 "သတိထားနော်၊ သမီးကို မနှောင့်ယှက်နဲ့"

 သမီးလေးက နေ့ခင်းဘက်ဆိုလျှင် အိပ်ယာထဲမှာ အိပ်သည်။ညဘက်ဆိုပါက အိပ်မပျော်မချင်း ပုခက်ထဲ မထည့်ပေ။

သမီးလေးသည် ရှောင်ဟုန်ယန်၏ ဘေးမှာ အိပ်နေခြင်းဖြစ်သည်။ ရှောင်ဟုန်ယန် ထထိုင်လိုက်ပြီး သူ့လည်ပင်းကို ဖက်ထားရာမှ လွှတ်ချလိုက်သည်။သူမလည်း ကလေးကို ဖိမိမှာစိုး၍ အမြဲတမ်း ကုတင်ဘေးအစပ်မှာသာ ထိုင်ရတာပင်။ 

 "ဝမ်လီချမ်၊ ကျွန်မက ရှင့်မျက်လုံးထဲမှာရော ရှိရဲ့လား"  

 "မိန်းမကလည်း၊ ကိုယ့် မျက်လုံးထဲမှာ မင်းပဲရှိတာပါ" သူက ရှောင်ဟုန်ယန်ကို ချစ်ခင်မြတ်နိုးစွာ မျက်ဝန်းရွှဲကြီးများဖြင့် ကြည့်နေသည် ။

ရှောင်ဟုန်ယန် ပြန်မပြောနိုင်ခင်မှာ သူ၏ နောက်ထပ်စကားက လေထုကို ဖျက်ဆီးပစ်လိုက်သည်။

"ကိုယ့်သမီးကို နာကျင်စေတယ်ဆိုရင်တော့ ကိုယ် ဘယ်သူ့ကိုမှ ခွင့်ပြုမှာမဟုတ်ဘူး"  

ရှောင်ဟုန်ယန်သည် သမီးဖြစ်သူအပေါ် ပို၍ပင် မနာလိုဖြစ်လာသည်။ 

ကလေးက သူမထက်ပိုပြီးတော့ သိသိသာသာ အရေးပေးခံနေရတာ မဟုတ်လား. 

မည်သို့ဆိုစေကာမူ၊ ဝမ်လီချမ်၏ ချစ်ခြင်းမေတ္တာစကားများသည် ရှောင်ဟုန်ယန်၏ ဒေါသကို ပြေပျောက်သွားစေလေသည်။ 

"မရသေးဘူး၊ထပ်ပြီး ချော့ပြဦး၊ရှင့်မျက်လုံးထဲမှာ သမီးလေးပဲရှိတာ သိသာတယ်" 

နေ့တိုင်း သမီးလေး အကြာင်းသာ ပြောသည်၊သူ့သမီးကိုသာ အရိပ်တကြည့်ကြည့်ရှိပေ၏။ 

ဒုတိယအစ်မ၏ ခင်ပွန်းမိသားစုက သမီးကို သဘောမကျဘဲ၊သားကိုသာ ပိုသဘောကျသည်ဟုဆို၍ ဝမ်လီချမ်လို သမီးကိုပိုချစ်နေသော ခင်ပွန်းအား ပိုင်ဆိုင်ထားရသောကြောင့် သူမ ဝမ်းသာမိပေသည်။   

"မင်းပဲ ကိုယ့်မျက်လုံးထဲမှာ ရှိတာနော်၊ ရှီရှီက မင်း မွေးထားတာလေ၊ ကိုယ်က တခြားမိန်းမက မွေးတဲ့ ကလေးကို ချစ်နေတာမဟုတ်ဘူး"

သူ့စိတ်ထဲမှာ သူ့မိန်းမနှင့် သမီး နှစ်ယောက်လုံးက အရေးကြီးသည်။ သမီးလေးသည် အရင်ဘဝတုန်းက သူနှင့်တူနေသောကြောင့် အချစ်ပိုမိကာ ကမ္ဘာပေါ်မှ အကောင်းဆုံးအရာများကို ပေးချင်မိသည်။ သူ့မိန်းမက ဤကမ္ဘာမှ ချစ်ရသူဖြစ်ပြီး သူမကိုလည်း အရာအားလုံး ဖြည့်ဆည်းပေးချင်မိသည်။

"အစ်ကိုက တကယ် ကလေးအရမ်းချစ်တတ်တာပဲ" 

တရုတ်နှစ်သစ်ကူးအပြီးတွင် ဝမ်လီချမ်သည် ကလေးများအား နှစ်သစ်ကူး မုန့်ဖိုးငွေအဖြစ် ယွမ် 100 ပေးခဲ့ပြီး စားစရာများစွာလည်း ဝယ်ပေးကာ အရုပ်များစွာဝယ်ပေးခဲ့၏။

အဲဒါ ကလေးတွေကို ချစ်တတ်တာ မဟုတ်ဘူးလား? အဲဒီကလေးတွေက သူ့ဆွေမျိုးပဲ အဆင့်ရှိတာ၊ ရှီရှီကိုဆိုရင် ကောင်းကင်ထက်က ကြယ်တွေနဲ့ လကိုတောင် ချူပေးမယ့် အဖေမျိုး မဟုတ်လား။ 

 "စိတ်မဆိုးလိုက်ပါနဲ့၊ မင်း အခုထိ မီးမထွက်ရသေးဘူးနော်၊ နောက်ပြီး ကိုယ်က မင်းကို အချစ်ဆုံးပါပဲ"

 သူသည် ရှောင်ဟုန်ယန်၏ နားကိုကပ်၍ ပြောပြီး နားရွက်ကို လေဖြင့် ဖူးကနဲမှုတ်လိုက်သည်။ 

"သွား၊ မုန်းတယ် မြန်မြန်အိပ်တော့" 

ရှောင်ဟုန်ယန်သည် စားပွဲတင်မီးအိမ်လေးကို ယူဆောင်လာခဲ့သည်။ တကယ်တော့ ရှောင်တရှင်း ပို့ခဲ့ခြင်းဖြစ်သည်။ယခုဆို မီးအိမ်လေးနှင့် သမီးကို ညဘက် နို့တိုက်၍ရသည်။ 

ဆေးရုံမှပြန်လာပြီးနောက် ဝမ်လီချမ် က သူမအား သေချာဂရုစိုက်သည်။ သမီးလေး နို့သောက်ဖို့ သူက အကုန် ပြင်ဆင်ပေးသည်။သူမက အိပ်ယာပေါ်မှာသာ အိပ်နေရုံပင်။ 

သို့သော် ညသန်းခေါင်အချိန် သမီးလေး နို့ဆာ၍နိုးလာသောအခါ ဝမ်လီချမ် တစ်စက်မှ နိုးမလာပေ။ ရှောင်ဟုန်ယန်ကလည်း သူ့ကို မနှိုးရက်တာကြောင့် သူမဘာသာ ထပြီးနို့တိုက်ရလေ၏။ 

 နှစ်ရက်အကြာတွင် ဝူလျန့်သည် ထရပ်ကားပိုင်ရှင်၏အကြောင်းကို ကြားသိရပြီး၊ ဝမ်လီချမ် စက်ရုံသို့လာမည့်အချိန်ကို စောင့်ဆိုင်းနေခဲ့သည်။

 "လီချမ်၊ ထရပ်ကားပိုင်ရှင်အကြောင်း ငါ ကြားထားတယ်၊ အဲဒီလူက မြို့တောင်ဘက်မှာရှိတဲ့ နာမည်ကြီး လူဆိုးဂိုဏ်းကတဲ့၊ ကားကို သူ ဘယ်ကရလဲတော့ မသိဘူး"  

လိုင်စင်နံပါတ်ပြားက ပြည်တွင်းမှာ လုပ်ထား၍ လိုင်စင်အတုလုပ်ထားခြင်းဖြစ်နိုင်၏။ 

 ကံကောင်းထောက်မစွာ၊ သူတို့မဝယ်ဖြစ်ခဲ့ပေ။ အထောက်အထားများ ရေးထားလျှင်တောင်မှ ဒေသခံ တာဝန်ရှိသူများကတော့ အတုမှန်းသိနိုင်သည်။ဘယ်သူမှ သက်ညှာပေးမည်မဟုတ်ချေ။ 

 "ဒီအဖြစ်က အထူးသဖြင့် မရင်းနှီးတဲ့သူတွေနဲ့ ဆက်ဆံတဲ့အခါ ပိုအာရုံစိုက်ရမယ်ဆိုတာကို သတိပေးလိုက်တဲ့သဘောပဲ"  

သူ့အဖွားက ရောင်းမှား ဆိုသည်က မရှိ၊ ဝယ်မှားဆိုတာသာ ရှိသည်ဟု ပြောခဲ့ဖူး၏။

လောကကြီးမှာ လောဘကြီးပြီး အချောင်လိုချင်တာကြောင့် ပြဿနာဖြစ်နိုင်ပေသည်။

လပြည့်ညတွင် ဝမ်လီချမ်သည် ဆွေမျိုးများနှင့် သူငယ်ချင်းများကို ထမင်းစား ဖိတ်ခေါ်ပြီး အားလုံးကို ဝမ်ရှီနှင့် တွေ့ခွင့်ပေးလိုက်သည်။

ဝမ်လီချမ်သည် အရက်သောက်ရသည်ကို ငြီးငွေ့လာပြီဖြစ်သည်။ ရှောင်ဟုန်ယန်ကတော့ မတူပေ။သူမသည် ယခုမှ ကလေးမွေးထားခြင်းဖြစ်ပြီး ယခင်လို ခန္ဓာကိုယ်မျိုး ပြန်မဖြစ်သေးပေ။ ထို့ကြောင့် လူအများကြီး ရှေ့မှာ ယုံကြည်မှုပျောက်ဆုံးကာ အနေကြပ်နေလေသည်။

ဝမ်လီချမ်က သူမ မလုံမလဲနှင့် ယုံကြည်မှုပျောက်ဆုံးနေသည်ကို မသိခဲ့ပေ။သူ အရက်သောက်မည်ကို မလိုလားဘူးဟုထင်‌နေရှာ၏။

 သမီးလေး မွေးကတည်းက သူ ကောင်းကောင်းအိပ်မပျော်ပေ။ သမီးက နေ့တိုင်း နောက်ကျမှအိပ်ပြီး စောစောထတတ်သည်။ အိပ်ရာက နိုးလာသည့်အခါ နို့သောက်၊ အနှီးလဲပြီး ဆက်အိပ်သည်။မနက်အစောကြီး ထရ၍ တော်တော်နှင့် အိပ်မပျော်တတ်တော့။ကံကောင်းထောက်မစွာ၊ သမီးလေးသည် သူ့အမေနှင့် အခြားသူများပြောသလိုမျိုး တစ်ညမှာ အကြိမ်များစွာ နိုးသူမဟုတ်။ 

သူ့သမီး နိုးလာပါက၊ သူကသာ ကလေးကို ကြည့်မည်ဟု ရှောင်ဟုန်ယန်အား ပြောထားပြီးဖြစ်သည်။ သူမ ထရန်မလိုအပ်ဘဲ အိပ်ယာပေါ်တွင်သာ လှဲလျောင်းပြီး နို့တိုက်ရမည်ဖြစ်၏။ 

 သမီးလေးက ညတိုင်း နည်းနည်းနောက်ကျမှ အိပ်ပြီး မနက်စောစောထတတ်သည်။ မနက်ခင်း ငါးနာရီ ဝန်းကျင်မှသာ ဗိုက်ဆာ၍ နိုးလာတတ်၏။ ဝမ်လီချမ်သည် မနက်ငါးနာရီဆို ထကာ ရှောင်ဟုန်ယန်ကို နှိုး၍ သမီးဖြစ်သူအား နို့တိုက်စေသည်။ပြီးလျှင် ကလေးကို ချီပိုးကာ ကျောကို မိနစ်အနည်းငယ်ကြာ ပွတ်သပ်ပေးပြီး ချော့သိပ်ရ၏။ 

သမီးလေးသည် ညကြီးသန်းခေါင်အချိန်မျိုးမှာ ဗိုက်လည်းမဆာတတ်သလို၊ဆီးလည်း မသွားတတ်ပေ။ထို့ကြောင့် ဝမ်လီချမ်သည် ညဘက်တွင် အေးချမ်းစွာအိပ်စက်ရပေ၏။ သမီးလေးသည် အကျင့်စာရိတ္တကောင်းမွန်ပြီး မိဘကို ညှာတတ်သည်ဟုပင် သူ ထင်မိ၏။ထို့ကြောင့် ပင်ပန်းနေသော သူ့မှာ သမီးဖြစ်သူ၏ ငိုသံကြောင့် မနိုးလာဖူးပေ။

ဤကဲ့သို့ နားလည်မှုလွဲမှားခြင်းသည် ဝမ်လီချမ်အတွက် ညဘက်တွင် ငြိမ်းချမ်းစွာ အိပ်စက်နိုင်စေခဲ့သည်။မည်သို့ပင်ဆိုစေ၊သူကတော့ သမီးလေးမွေးပြီးကတည်းက တစ်ခါမှ အိပ်ရေးဝပြီး လန်းဆန်းသည်ဟူ၍ မခံစားဖူးချေ။

သူသည် နေ့ဘက်တွင် ပင်ပန်းလွန်းသဖြင့် ညဘက်ကျလျှင် ခြောက်နာရီအပြည့် မအိပ်စက်ရပါက အိပ်မပျော်သလိုမျိုး အမြဲ ခံစားရပြီး ဘယ်လိုမှ စိတ်မကြည်လင်တော့ပေ။

xxxxxxx💙