Chapter 3

📽️Chapter 3

ပြန်တွေ့ကြပြီ

ဤအဖြစ်အပျက် ထပ်မံ၍ ပျံ့နှံ့သွားရခြင်းမှာ စုတျန့်တျန့်မှ ဝေ့ပေါ်တွင် ပို့စ်တင်လိုက်ခြင်းကြောင့်ပင်။

စုတျန့်တျန့် : [ စီနီယာက ရှိုးမှာမို့လို့နောက်ပြောင်နေတာပါ… ဒီကိစ္စကို အပြင်ထိမယူလာကြနဲ့တော့နော်… လူတိုင်း ဒီကိစ္စကို အေးအေးဆေးဆေးလက်ခံနိုင်မယ်လို့ ကျွန်တော်မျှော်လင့်ပါတယ်...]

ပို့စ်အောက်မှ မန့်များမှာ သူ့အား စောဒကတက်ရန် ကူညီပေးနေကြပြီး ရေပန်းအစားဆုံးမန့်များကိုမူ သူ၏ဖန်အကြီးစားကြီးများမှ သိမ်းပိုက်ထားကြသည်။

[ ဝူးဝူးဝူး တျန့်တျန့်လေးက အနိုင်ကျင့်ခံလာရ‌တာတောင် စီနီယာတွေအပေါ်လေးစားမှုကို ဒီအတိုင်းဆက်ထိန်းထားသေးတယ်… မင်းက အရမ်းကြင်နာတတ်တာပဲ…]

[ တျန့်တျန့်ရေ အဲ့ဒီလူလိမ်ကောင်အတွက် ပြောပေးမနေပါနဲ့တော့… သူနဲ့မတန်ပါဘူးဟယ်….]

[ ငါတို့က တရားလွန်အုံကြွနေတာမဟုတ်ဘူး… ရန်ရှူကိုက အရမ်းဒေါသထွက်ချင်စရာကောင်းနေတာ… ဒီလိုလူကသာ တကယ်ကြီးသက်တမ်းကြာနေတဲ့ စီနီယာတစ်ယောက်ဆိုရင် ကမ္ဘာကြီးအတွက်တော့ ရင်လေးစရာပဲ…]

[ ကျေးဇူးပြုပြီး ဧပြီလ ၂၇ရက်မှာထွက်ရှိမယ့် တျန့်တျန့်ရဲ့ တောင်တန်းနဲ့ပင်လယ်တွေကိုဖြတ်ကျော်၍ ဆိုတဲ့အယ်ဘမ်လေးကို ကြည့်ပေးကြပါ… မင်းတို့ကို ကမ္ဘာမြေပေါ်က နတ်ဘုံစီရောက်အောင် ပို့ဆောင်ပေးပါလိမ့်မယ်…]

ရန်ရှူ ပို့စ်ကို ခဏကြာ ကြည့်နေမိပြီးနောက် သူ၏နှုတ်ခမ်းထောင့်များမှာ ကော့တက်သွားခဲ့သည်။ သူ အချိန်အတော်ကြာသည်အထိ ပြုံးနေမိသည်။

ဒီကလေးက… တကယ်ကြီးကြာပန်းဖြူလို ဟန်ဆောင်တဲ့နေရာမှာ တော်တာပဲ…

ရန်ရှူ အဖြူနှင့်အမည်းဆွယ်တာတစ်ထည်ကို ဝတ်ကာအခန်းထဲမှ ထွက်လာလိုက်သည်။ ဓာတ်လှေကားစီသို့ လမ်းလျှောက်လာနေစဉ်အတွင်း သူ၏ဖုန်းရှိ WeChatမှ အသံမက်ဆေ့ကိုပေးပို့လိုက်သည်။

“ မင်းအိမ်ကိုလာမလို့…ဓာတ်လှေကားကို င့ါအတွက်နှိပ်ထားပေးပါ…”

ပြီးသည်နှင့် ဓာတ်လှေကားအတွင်းသို့ဝင်ကာ နံပါတ်များကိုကြည့်နေခဲ့ပြီး ၂၅ထပ်အထိတက်လာချိန်၌ ရပ်တန့်လိုက်သည်။

သူ၏တိုက်ခန်းမှာ အိမ်သို့တိုက်ရိုက်ဝင်ရောက်နိုင်သည့် ဓာတ်လှေကားတပ်ဆင်ထားသောကြောင့် တံခါးပွင့်လာသည်နှင့် သူငယ်ချင်း၏အိမ်သို့ ရောက်သွားသည်။

ချောင်းချွမ်ကွေ့ တံခါးဘောင်ကိုကိုက်ကာ တစ်ချက်ကြည့်လိုက်သည်။ သူ့အခန်းဆီသို့မပြန်မီ ရောက်သည်မှာအသေအချာဖြစ်ကြောင်း စစ်‌ကြည့်လိုက်ပြီး တစ်ချိန်တည်းမှာပင် အသံကျယ်ကျယ်နှင့်အော်ပြောလိုက်သည်။

“ ငါတိုက်ရိုက်ထုတ်လွှင့်နေတာနော်…”

ချောင်းချွမ်ကွေ့မှာ လူသိများသော အလှအပရေးရာ တင်ဆက်သူတစ်ယောက်ဖြစ်သည်။

ဖျော်ဖြေရေးနယ်ပယ်ထဲတွင် လေ့ကျင့်ရေးဆင်ခဲ့ဖူးသောတစ်ဦးဖြစ်သော်လည်း ကံမကောင်းစွာဖြင့် သူ၏ပွဲဦးထွက်မှာမူ မချောမွေ့ခဲ့ချေ။ ထို့ကြောင့် ချောင်းချွမ်ကွေ့ အလှအပရေးရာတင်ဆက်သူလမ်းကြောင်းကို ရွေးချယ်လိုက်ပြီးနောက် ၎င်းတွင် တစ်ခဏအတွင်း ကျော်ကြားလာခဲ့သည်။

လက်ရှိအချိန်တွင် ချောင်းချွမ်ကွေ့၏မျက်နှာကို မိတ်ကပ်တစ်ဝက်ဖြင့်ဖုံးအုပ်ထားခဲ့သည်။ သူ၏မျက်နှာ ဘယ်ဘက်ခြမ်းနှင့်ညာဘက်ခြမ်းတို့မှာ တညီတည်းဖြစ်မနေခဲ့ဘဲ သိသိသာသာပင် သူ၏မျက်နှာကို သရုပ်ဖော်ပုံအနေနှင့် အသုံးပြုနေခြင်းဖြစ်သည်။ တစ်ဖက်မှာ မှန်ကန်သောနည်းလမ်းဖြစ်ကာ တစ်ဖက်မှာမူ မှားယွင်းသောသရုပ်ဖော်ပုံဖြစ်သည်။

ရန်ရှူက ချောင်းချွမ်ကွေ့၏ တိုက်ရိုက်ထုတ်လွှင့်မှုအခန်းဆီသို့ လျှောက်သွားလိုက်ပြီး ဘေးတွင်ထိုင်နေလိုက်၍ သူ၏ပုခုံးသားများသည်သာ တိုက်ရိုက်ထုတ်လွှင့်မှုမျက်နှာပြင်တွင် ပေါ်နေခဲ့သည်။

မန့်များမှာ တခဏအတွင်း ပေါက်ကွဲသွားခဲ့သည်။

[ အဲ့ဒါဘယ်သူလဲ…]

[ ရန်ရှူမဟုတ်ဘူးလား …]

ချောင်းချွမ်ကွေ့ မျက်ခုံးမွှေးဆွဲတံကို ပြန်လည်ကောက်ယူလိုက်ပြီး ကင်မရာဆိီသို့ ပြောင်းလိုက်သည်။

“ ဟုတ်တယ်လေ မင်းတို့ရဲ့ရန်ရှူပဲ…”

[ ရန်ရှူကို ကင်မရာထဲပေးဝင်လိုက်ပါဦး…]

[ ဦးလေးးးး(ရှူရှူ) အား အား … မင်းတို့နှစ်ယောက် ကောင်းကောင်းပျော်နေတာကိုမြင်ရတာ ငါအရမ်းဝမ်းသာတာပဲ…]

ချောင်းချွမ်ကွေ့ ကင်မရာကိုကြည့်လျက် မျက်ခုံးမွှေးဆက်ဆွဲနေရင်းမှ တချိန်တည်းမှာပင် ဆက်ပြောလိုက်သည်။

“ ဟုတ်တယ် အဖွဲ့ကဖျက်လိုက်ပြီဆိုပေမယ့် သူငယ်ချင်းတွေကတော့ ဖြစ်နေကြတုန်းပဲလေ…”

[ ချွမ်ကွေ့ သူက သူ့ကုမ္ပဏီကဂျူနီယာကို တိုက်ခိုက်ခဲ့တာသိပြီးပြီးပြီလား… သူနဲ့ဝေးဝေးနေနော်… ပြေးတော့ ပြေးတော့…]

ချောင်းချွမ်ကွေ့မှာ ညဘက်တွင်သာ ရှိတတ်သူဖြစ်သည်။ နိုးလာလာချင်းမှာပင် တိုက်ရိုက်ထုတ်လွှင့်မှုကို ချက်ချင်းစတင်လိုက်သည့်အတွက် ရန်ရှူ၏အငြင်းပွားဖွယ်ရာကိစ္စများအကြောင်းကို သူ မသိနေသေးပေ။ ထို့ကြောင့် အသံကိုနှိမ့်ကာ မေးလိုက်ရသည်။

“ မင်း ဘာသတင်းတွေ ထပ်ပြီးလုပ်ထားပြန်တာလဲ…”

ရန်ရှူမှ ပေါ့ပေါ့ပါးပါးပင် ပြန်ဖြေလိုက်သည်။

“ ဘာမှမဟုတ်ဘူး ပူမနေနဲ့… ငါဘယ်လိုမှမနေဘူး…”

“ အင်းပေါ့ အဲဒီလူကသာ မင်းကိုအရင်စမစော်ကားခဲ့ဖူးဆိုရင် မင်းသူတို့ကိုအကြည့်တစ်ချက်တောင် ပေးမှာမှမဟုတ်တာ…”

ချောင်းချွမ်ကွေ့ တီးတိုးရေရွတ်လိုက်ပြီးနောက် ကင်မရာကိုကြည့်ကာ ပြောလိုက်သည်။

“ စိတ်မပူကြပါနဲ့… ကျွန်တော် ရန်ရှူကို လူတစ်ယောက်အနေနဲ့ ယုံကြည်နိုင်ပါသေးတယ်…သူက တခြားသူတွေကို အရမ်းဂရုစိုက်ပေးတတ်တဲ့သူပါ… ကျွန်တော် ဒီနယ်ပယ်ထဲက ထွက်မလိုလုပ်တုန်းကဆိုရင် သူပဲကူညီပြီး လူတိုင်းကိုအရင်းအမြစ်တွေရနိုင်ဖို့ လိုက်မေးပေးတာလေ… ကံမကောင်းတာကတော့ ကျွန်တော်က နောက်ဆုံးကျ အရမ်းမတော်နေခဲ့တော့ ပြန်မထနိုင်ခဲ့ဘူး… ဒါပေမယ့်လည်း သူ့စေတနာကို အမြဲတမ်းအမှတ်ရနေတာပါ…”

[ ရန်ရှူက ဘာလို့ ကင်မရာထဲ ဝင်မလာရတာလဲ…]

[ သူ ဘယ်သူ့ကို စာပို့နေတာလဲမသိဘူးနော်…]

ချောင်းချွမ်ကွေ့က ကွန်းမန့်များကိုကြည့်ကာ ပြောလိုက်သည်။

“ မင်းက ငါ့တိုက်ရိုက်ထုတ်လွှင့်မှုအခန်းထဲလာပြီးတော့ ငါ့ပရိသတ်တွေကိုတောင် မနှုတ်ဆက်တော့ဘူးလား…”

“ ငါ ဝေ့ပေါ်လျှို့ဝှက်နံပါတ်ပြန်ယူနေတာ…”

အဆုံး၌ ရန်ရှူ သူ၏အကောင့်ကို ပြန်မယူခဲ့ပေ။ ဖုန်းကိုဘေးတွင်သာချထားလိုက်ရပြီး ချောင်းချွမ်ကွေ့နှင့်အတူ မနက်နှစ်နာရီထိုးသည်အထိ တိုက်ရိုက်ထုတ်လွှင့်ရာတွင် အဖော်ပြုပေးလိုက်ရသည်။

ရန်ရှူမှာ ထိပ်ဆုံးခေါင်းစီးများထဲသို့ ရောက်နေနှင့်ပြီးပြီဖြစ်သည်။ သို့သော်လည်း ပုန်းရှောင်နေရမည့်အစား တိုက်ရိုက်ထုတ်လွှင့်ရာတွင် ပါဝင်လာသောကြောင့် သဘာဝကျစွာပင် သူ၏ကိုယ်ပိုင်ကျော်ကြားမှုနှင့်အတူ လူအများအပြားမှ ဝင်ရောက်ကြည့်ရှူလာကြသည်။

ထိုအချိန်အတွင်း လက်ဆောင်များကိုကျေးဇူးတင်သည့်စာရင်းကိုပါ ကူညီဖတ်ပြပေးခဲ့သောကြောင့် ချောင်းချွမ်ကွေ့၏လက်ဆောင်ရရှိမှုမှာ ပုံမှန်အချိန်များထက် ပိုမိုမြင့်မားသွားရသည်။

တိုက်ရိုက်ထုတ်လွှင့်မှုအပြီး ပစ္စည်းကိရိယာများကို ပိတ်လိုက်သည်နှင့် ချောင်းချွမ်ကွေ့မှ အပျင်းဆန့်ကာ သက်ပြင်းချလိုက်သည်။

“ မင်း ငါ့တိုက်ရိုက်ထုတ်လွှင့်မှုအခန်းကိုသုံးပြီး သက်သေပြရတဲ့အနေအထားထိတောင် ကျသွားရတာလား…”

“ ဒီဟာက ကြာပန်းဖြူလုပ်တာပဲမဟုတ်ဘူးလား… သူတောင်လုပ်နိုင်သေးရင် ငါလည်းလုပ်နိုင်တာပေါ့…”

ရန်ရှူ ပြုံးကာ ထိုဖြစ်ရပ်ကြောင့် မည်သို့မျှသက်ရောက်မခံရသည့်ပုံဖြင့် ပုခုံးချင်းတိုက်လိုက်သည်။

“ ငါကောင်းကောင်းပူးပေါင်းပေးတယ်မလား…လုပ်ဆောင်မှုအမှတ်တွေက သက်သေပဲနော်…”

“ မင်းရဲ့သရုပ်ဆောင်မှုက အချိန်လေးပဲ တစ်ဘဝစာလုံးရဲ့ ထိပ်ဆုံးအဆင့်ရောက်သွားတာလေ…”

ချောင်းချွမ်ကွေ့ ဓာတ်လှေကားတံခါးဆီသို့ လျှောက်လာစဉ် တစ်စုံတစ်ခုကိုမှတ်မိသွားသောကြောင့် ပြန်လှည့်ပြောလိုက်သည်။

“ မင်းနဲ့မင်းရည်းစားဟောင်းက…”

“ ငါတို့အဆက်အသွယ်မရတာနှစ်နှစ်ရှိပြီပဲဟာ… ဒီလောက်ဆို လုံးဝပြတ်ပြီလို့ ပြောလို့ရနေပါပြီကွာ…”

“ နှမြောစရာပဲ…”

“ ကိစ္စမရှိပါဘူး…”

ရန်ရှူ ဓာတ်လှေကားတွင်းသို့ဝင်လိုက်ပြီး ချောင်း‌ချွမ်ကွေ့ထံ မျက်ခုံးပင့်ပြလိုက်သည်။

“ လက်ဆောင်ရတာတွေ ပြန်မျှပေးဖို့ သတိရဦးနော်…”

ချောင်းချွမ်ကွေ့ ဓာတ်လှေကားတံခါးများ အတူပြန်ပိတ်သွားသည်ကိုသာ ကြည့်နေမိပြီး ရန်ရှူအား မည်သို့ပြောရမည်ကို မသိနေတော့ချေ။

အဆုံး၌ သူ ဝိုးတဝါးရေရွတ်လိုက်မိသည်။

“ သေစေနိုင်တဲ့ ဘောစိဖန်တွေ…”

ဘယ်သူကများ ပိုက်ဆံအများကြီးရှိတာကို မကြိုက်မှာမို့လို့လဲ…

ဤဖြစ်ရပ်အပြီးတွင် မရပ်မနားလေ့ကျင့်ရေးဆင်းရာတွင် အမြဲလိုခေါင်းမာမာနှင့် ရှိနေတတ်သောရန်ရှူမှာ ကုမ္ပဏီ၏ပါတီတွင် ပထမဦးဆုံးအကြိမ်အဖြစ် ပြန်ပေါ်လာခဲ့သည်။

ယခင်ကိစ္စတွင် ရန်ရှူ ဝေ့ပေါ်သို့ဝင်ရန် ကျရှုံးခဲ့သော်လည်း တိုက်ရိုက်ထုတ်လွှင့်မှုအတွင်း ရိုးရှင်းသောစကားအနည်းငယ်ဖြင့် သူ၏ဘက်မှအခြေအနေကို ရှင်းပြနိုင်ခဲ့သည်။

သူ များများစားစား ပြောရန်မရှိသည့်တိုင် လှိုင်းလုံးကြီးကို ပြန်လှည့်နိုင်ခဲ့သည်ဟု ဆိုနိုင်ပေမည်။

ပထမဆုံးအနေဖြင့် ကိစ္စများကိုစတင်ခဲ့သူမှာ သူ မဟုတ်ချေ။

ဒုတိယအနေဖြင့် ကုမ္ပဏီမှ သူ၏ဝေ့ပေါ်လျှို့ဝှက်နံပါတ်ကို ပြောင်းပစ်ခဲ့သောကြောင့် သူ့ကိုဖိနှိပ်ကာ စုတျန့်တျန့်ကိုကာကွယ်ပေးနေသည်မှာ သိသာလှသည်။

တတိယအနေဖြင့် ရန်ရှူမှာ လူသစ်များကို ဖိနှိပ်တတ်သူမျိုးမဟုတ်ချေ။ ရန်ရှူကူညီပေးခဲ့သည့် အနုပညာရှင်များစွာရှိပြီး ၎င်းတို့ထဲမှအချို့မှာ လက်ရှိတွင် ကျော်ကြားမှုမရှိတော့သည့်တိုင် ဆက်လက်ခင်မင်နေဆဲပင်ဖြစ်သည်။

ထိုအရာကြောင့် စုတျန့်တျန့်ကို လူထု၏အာရုံစိုက်မှုအတွင်းသို့ ထပ်မံကျရောက်သွားစေသည်။

နောက်ပိုင်းတွင် ကုမ္ပဏီမှ ဤအရေးနှင့်ပတ်သက်၍ ကြိုးကြိုးစားစားကိုင်တွယ်ခဲ့သည့်တိုင် သူတို့ပိုမိုကြိုးစားလေလေ လူအများမှ ပိုမိုဖမ်းမိလေလေ ဖြစ်နေခဲ့သည်။

လုံလောက်သွားလေပြီ။ ရန်ရှူ နာမည်ကိုပြန်လည်ဆေးကြောရာတွင် ကူညီရန်မလိုတော့ချေ။ အရာအားလုံးမှာ စုတျန့်တျန့်ကို ထိန်းသိမ်းထားရန်သာဖြစ်ပြီး ပုံမှန်လိုပင် လူသစ်များ၏ရယ်သံများကိုသာ မြင်နိုင်ကာ လူဟောင်းများ၏ငိုကြွေးသံများကို မကြားကြခြင်းမျိုးပင်။

ထိုဖြစ်ရပ်ပြီးနောက် ရန်ရှူပျောက်ကွယ်သွားသော်လည်း လူအများ၏စာနာမှုကို ရယူနိုင်ခဲ့သည်။

ဤအတွက်ကြောင့် ရန်ရှူ ကုမ္ပဏီတွင် ပေါ်လာလာချင်းမှာပင် နားနေခန်းထဲတွင် တားဆီးခံလိုက်ရသည်။

ကုမ္ပဏီမှသူ့ကို ဖိအားပေးရန်အတွက် ခေါင်းဆောင်တစ်ဦးလွှတ်ပေးခဲ့သည်။

ရန်ရှူမှာမူ ပုံမှန်အခြေအနေတွင် ရှိနေဆဲပင်။ တစ်ဖက်လူမှ တစ်ခွန်းပြောသည်နှင့် ကျည်ပြန်လဲရန်မလိုသည့် စက်သေနတ်တစ်လက်သဖွယ် ဆယ်ခွန်းပြန်ပက်ခဲ့သည်။

အဆုံး၌ တစ်အုပ်လုံးကို သူကြိမ်းမောင်းနိုင်ခဲ့ပြီး ထိုသူများမှာ ရှက်ရွံ့စွာတပ်ပြန်ခေါက်သွားစေသည်။

ရန်ရှူ အပြုံးတစ်ပွင့်နှင့်ပင် လိုက်လာကာ နှုတ်ဆက်စကားဆိုလိုက်သည်။

“ အစ်ကိုကောင်း လမ်းဖြည်းဖြည်းလျှောက်နော်…. နောက်ကျရင် ဒီလိုဝတ်စုံမျိုးတွေ မဝတ်ပါနဲ့… အစ်ကိုက ဝနေပြီလေ… ကိုယ်နဲ့လိုက်ဖက်တဲ့ အိတ်ကြီးကြီးကိုပဲ ဆက်လွယ်ထားသင့်တယ်… မဟုတ်ရင် အဝေးကကြည့်ရတာ ကိုယ်ဝန်ဆောင်ကြီးကျနေတာပဲ…”

အစ်ကိုကောင်းမှာ ‌အလွန်ဒေါသထွက်ရလွန်းသဖြင့် သွေးဆောင့်တက်သွားပြီး မျက်လုံးကြီးမည်းလျက် ကြမ်းပြင်ပေါ်သို့လဲကျသွားခဲ့သည်။

လူအချို့မှ လာရောက်ကူညီပေးကြကာ ရန်ရှူကို ကြိမ်းမောင်းလိုက်သည်။

“ ဘယ်လိုလုပ်ပြီး သူ့ကို ဒီလိုလုပ်ရတာလဲ…”

“ မင်းသာ ဘာမှမလုပ်ခဲ့ဘူးဆိုရင် သူဒေါသထွက်နေတယ်ဆိုတာ ပြောနိုင်မှာမဟုတ်ဘူးနော်…”

ပြောပြီးသည်နှင့် ရန်ရှူ ဘေးဘက်သို့ကြည့်ကာ တမင်အသံမြှင့်ပြောလိုက်သည်။

“ အိုး ပိုင်ရှင်အသစ်က ဒီမှာပဲ…”

ကြမ်းပြင်ပေါ်တွင်ရှိနေသည့်အစ်ကိုကောင်းမှာ တစ်ခဏတွင်းလန်းဆန်းသွားကာ ထရပ်လိုက်ပြီး ယခင်သူမူးလဲသွားသည်ကို မည်သူမျှမမြင်လိုက်သည့်နှယ် ဘေးဘီဝဲယာသို့ ကြည့်နေခဲ့သည်။

အစ်ကိုကောင်း ဒေါသကြောင့် တုန်ယင်နေရသော်လည်း တစ်ခွန်းမျှပြန်မပြောနိုင်ခဲ့ဘဲ လူအကူအညီဖြင့် ပြန်ထပြီး ထွက်သွားလိုက်ရသည်။

နှုတ်ခမ်းပေါ်မှအပြုံးတစ်ပွင့်နှင့် ရန်ရှက လက်ထောက်၏အနောက်မှ ပွဲကျင်းပရာနေရာသို့ လိုက်လာလိုက်သည်။ ထောင့်တစ်နေရာစီသို့ သူ လျှောက်လာလိုက်ပြီး မျက်နှာပြင်၏အခြားတစ်ဖက်တွင် လူအချို့ရပ်နေသည်ကို မြင်လိုက်ရသည်။

၎င်းတို့ထဲမှ အထင်ရှားဆုံးဖြစ်သူထံသို့ ရန်ရှူလှမ်းကြည့်လိုက်မိသည်။ ဖောက်ထွင်းမြင်နိုင်သည့်မျက်နှာပြင်မှတဆင့် အနောက်တိုင်းဝတ်စုံပြည့်ဝတ်ဆင်ထားသူတစ်ယောက်မှာ သိသာထင်ရှားသောကိုယ်ဟန်ဖြင့် မတ်မတ်ရပ်နေသည်ကို ဝိုးတဝါးမြင်နိုင်ခဲ့သည်။

ထိုသူ၏အနက်ရောင်ဘောင်းဘီရှည်နှင့် လည်သာဖိနပ်မျာဆီသို့ ရန်ရှူ၏မျက်လုံးများ ရောက်ရှိသွားခဲ့ပြီး မျက်ခုံးကိုအနည်းငယ်ပင့်လိုက်မိသည်။

ဤနေရာမှာ ထိုသူ၏ကိုယ်ပိုင်နယ်မြေတစ်ခုနှယ် ဖြစ်နေခဲ့သည်။

ရန်ရှူ စစ်ဆေးကြည့်ပြီးသည်နောက် မနေနိုင်ဘဲ တီးတိုးရေရွတ်လိုက်မိသည်။

“ ဘယ်သူလဲ… လူသစ်လား…”

အဆုံး၌ ရန်ရှူက အသံနိမ့်နိမ့်ဖြင့်ပင် အတိအကျပေါင်းထည့်ပြောလိုက်သေးသည်။

“ သူက ငါ့ရဲ့အရူးလိုရည်းစားဟောင်းဆီကလိုမျိုး ခံစားချက်မျိုးရနေတယ်…. ဖျော်ဖြေရေးနယ်ပယ်က ဒီလိုမျိုးလူ လိုအပ်နေတာ…”

ဒုတိယစကားကိုပြောပြီးသည်နှင့် ရန်ရှူ ထိုသူရှိရာသို့ တစ်ဖန်ပြန်၍လှည့်ကြည့်မိလိုက်သည်။

အရပ်ရှည်ပြီး ချောမောခန့်ညားသောအမျိုးသားတစ်ဦးကို အမှန်တကယ်ပင် အနုပညာရှင်တစ်ယောက်ဟု ‌ပြောဆိုနိုင်သည်။

ဖြစ်နိုင်သည်မှာ ထိုသူပေါ်လာနေသရွေ့ လူအများ၏အာရုံစိုက်မှုကို ရနေနိုင်မည်ဖြစ်သော်လည်း ၎င်း၏အရှိန်အဝါမှာမူ အေးစက်လှကာ အနားမကပ်နိုင် လက်လှမ်းမမီနိုင်သည့် ရေခဲဇုန်တစ်ခုထဲသို့ ကျရောက်နေသည့်ပုံနှယ် ဖြစ်နေသည်။

ထိုအချိန်၌ ရန်ရှူ ရုတ်တရက်သတိပြန်ဝင်လာသည်ကို မြင်လိုက်သောကြောင့် သူ၏လက်ထောက်မှ ခြေလှမ်းများကိုရပ်တန့်လိုက်သည်။

ရန်ရှူသည်လည်း ရပ်သွားခဲ့သည်။

ရန်ရှူ၏နေရာမှာ မျက်နှာပြင်တစ်ဖက်စီသို့ ကူးသွားမည့်သယောင် ရှိနေခဲ့ပြီး သူ့ကိုယ်သူမျက်နှာပြင်ကြီး၏အနောက်တွင် မြင်နိုင်သည်။

ရန်ရှူ ခေါင်းစောင်းလိုက်ရာ ကျောက်မြက်မီးဆိုင်းကြီး၏ တောက်ပသောအလင်းရောင်အောက်၌ သူရှိရာဘက်သို့ကြည့်နေသည့် အရပ်ရှည်ရှည်နှင့်လူကိုမြင်လိုက်ရပြီး သူတို့နှစ်ဦး၏အကြည့်များမှာ ချောမွေ့စွာ ဆုံတွေ့သွားခဲ့သည်။

“ သောက်ကျိုးနည်း…”

ရန်ရှူ မပီမသရေရွတ်လိုက်မိသည်။

ဒီဟာက ငါ့ရည်းစားဟောင်းကြီး မဟုတ်ဘူးလား…

စန့်ရှန်းက မီးရောင်အောက်တွင် ပုခုံးပေါ်၌ နေမင်းကဲ့သို့ မီးရောင်အဝိုင်းများဖြင့် ရှိနေခဲ့သည်။

စန့်ရှန်းမှာ အမြဲလိုပင် တည်ငြိမ်သည့်အမူအရာရှိခြင်းကြောင့် ရန်ရှူကိုတွေ့လိုက်ရသည့်တိုင် အံ့ဩနေသည့်ပုံမရပေ။ သူက ဤအတိုင်း ရန်ရှူဆီသို့ မျက်နှာသေဖြင့် စိုက်ကြည့်နေခဲ့သည်။

စန့်ရှန်း၏ကိုယ်ဟန်မှာ လွန်စွာအဆင့်အတန်းမြင့်မားပုံရသည်။ အရပ်ရှည်ပြီး အစောပိုင်းနေ့ရက်များတွင် အားကစားကျောင်းသားတစ်ယောက်ဖြစ်ခဲ့‌ခြင်းကြောင့် သန်မာသောကိုယ်လုံးကိုယ်ပေါက်ရှိကာ အနောက်တိုင်းဝတ်စုံဝတ်ဆင်ထားခြင်းမှ သူ၏မောက်မာမှုကို ထိန်းချုပ်ထားဟန်ရှိသော်လည်း အေးစက်မှုများကိုမူ ပိုမိုမြင့်တက်သွားစေသည်။

စန့်ရှန်းတွင် ဖီးနစ်သဏ္ဍာန်မျက်လုံးများရှိပြီး မျက်ရစ်တစ်ထပ်တည်းဖြစ်ကာ နှာခေါင်းမြင့်မြင့်နှင့် နှုတ်ခမ်းပါးများရှိသည်။

လက်ရှိအချိန်တွင် စန့်ရှန်းမှ သူ၏နှုတ်ခမ်းပါးများကို ခပ်တင်းတင်းဖိကိုက်ထားသော်လည်း သူ၏အမူအရာမှာ ဒေါသထွက်နေခြင်းမျိုးမဟုတ်ပေ။

သူ၏အကြည့်မှာ ရန်ရှူ၏ကိုယ်ပေါ်သို့ ကျရောက်လာပြီး အလွယ်တကူပင် ပြန်လည်ဆုတ်ခွာသွားခဲ့သည်။

ရန်ရှူ စန့်ရှန်းထံကြည့်နေမိပြီး သူ၏ကုမ္ပဏီမှ ပိုင်ရှင်အသစ်ဖြစ်မည်လားဆိုသည်ကို မမေးဘဲ ခန့်မှန်းနေခဲ့သည်။

အထက်တန်းစားမိသားစု၏ အကြီးဆုံးသခင်လေးမှာဖျော်ဖြေရေးနယ်ပယ်တွင်လည်း ကံကြမ္မာကောင်းအချို့ကို ဖန်တီးချင်သောကြောင့် ယခင်ရှိနေသည့်လူများနှင့်အတူ ကုမ္ပဏီတစ်ခုကို ဝယ်ယူခဲ့သည်။ ၎င်းမှာ ယနေ့တွင် ဖြစ်ပျက်ခဲ့ပြီး သူတို့ပြန်လည်ဆုံတွေ့ခဲ့ကြသည်။

ဖူးးး…

ဘယ်လိုအကြောင်းပြချက်ကြီးလဲ…

စန့်ရှန်းက သေချာပေါက် ငါ့နောက်လိုက်လာတာပဲ…

ရန်ရှူ ဖိနပ်များကိုချွတ်ကာ ထိုသူ့ထံ ပစ်ပေါက်လိုက်ချင်မိသည်။

—————

စာရေးသူမှာ ပြောစရာရှိပါတယ် :

ရန်ရှူ : ခွေးကောင် ငါ့ကိုတကယ်ကြီး လက်မလွှတ်ပေးသေးဘူး…

📽️