MM Story Teller

Chapter 26

Viewers 2k

📽️Chapter 26

အခြေအနေ : ရိုက်ကူးရေးကို လာလည်ခြင်း

reality show ရိုက်ကူးရေးက တရားဝင် စတင်ခဲ့လေသည်။

ဤတစ်ခေါက် season၏ အပြင်အဆင်က ရှန်းယန်ကျွန်းမှ လွတ်မြောက်ခြင်း ဖြစ်သည်။

ရိုက်ကူးရေးအဖွဲ့က လုံလောက်သော ရန်ပုံငွေ ရှိနေသဖြင့် တစ်ဖွဲ့လုံးကို ယုံကြည်ချက် မြင့်မားနေစေခဲ့သည်။ ဤအပိုင်း၏ ရိုက်ကွင်းက အလုံပိတ်အခန်း မဟုတ်ဘဲ အစစ်အမှန်ဖြစ်သော ကျွန်းတစ်ခု ဖြစ်နေသည်။ ပြိုင်ပွဲဝင်များက ထိုကျွန်းမှ လွတ်မြောက်ရန် အမှန်ပင် လိုအပ်ပေသည်။

ရန်ရှူမှာ သူနှင့် အသင်းဖော်နှစ်ယောက်တို့ မဲကျခဲ့သည် အခြေပြုနေရာက အခြေအနေ အဆိုးဝါးဆုံး နေရာ ဖြစ်မည်ဟု ခံစားနေရသည်။

ရန်ရှူက reality show၏ ပထမဆုံးအပိုင်းမှာ သေချာပေါက် လှုပ်ခတ်မှုအကြီးကြီး ဖြစ်လာလိမ့်မည်ဟု တွေးခဲ့သေးသော်လည်း ထိုမျှလောက် ကြမ်းတမ်းလိမ့်မည်ဟု မထင်မှတ်ထားခဲ့ပေ။

သူက ထိုအခိုက်တွင် လက်ကောက်ဝတ်၌ သံချိန်းကြိုးတစ်ခု ရှိနေပြီး လှုပ်ရှားမှုများ ကန့်သတ်ခံထားရသည်။ ချိန်းကြိုးကို ပြန်ဖြည်လိုပါက ချိန်းကြိုး၏ အမျိုးမျိုး ပေါင်းစည်းထားသောသော့ကို ပြန်ဖြည်ပေးရန် လိုအပ်မည် ဖြစ်သည်။

သို့သော်ငြား ကုဒ်ဖြင့် ဝှက်ထားသော သော့ကို ဖွင့်ရန် အဖြေက ရေအောက် ကြမ်းပြင်တွင် ရှိနေပြီး ရန်ရှူနှင့် အခြားသူများက ပဟေဠိကို ကြည့်နိုင်ရန် ရေအောက်ကြမ်းပြင်သို့ ကူးခတ်ပြီးမှ သဲလွန်စရနိုင်မည် ဖြစ်သည်။

ရန်ရှူက လှည့်ပတ်ကြည့်ရှုလိုက်ရာ အကာအကွယ်ဂီယာက တစ်စုံတည်းသာ ရှိကြောင်း တွေ့လိုက်ရသဖြင့် အခြားလူနှစ်ယောက်ကိုသာ အကာအကွယ်ဂီယာ ပေးလိုက်သည်။

"ငါက ရေကူးတတ်တယ်... ငါအရင်အရင် သွားကြည့်လိုက်မယ်…"

ပြောပြီးနောက် ရေအောက်ထဲသို့ ခုန်ဆင်းသွားလေသည်။

သူက ရေငုပ်ဝတ်စုံ မဟုတ်ဘဲ ရိုးရိုးအဝတ်များကိုသာ ဝတ်ဆင်ထားခဲ့ပြီး ရေထဲသို့ ဝင်သွားသောအခါ ဂျယ်လီငါးလေးလိုပင် သက်တောင့်သက်သာ ရှိသော ပုံစံဖြင့် ချောချောမွေ့မွေ့ ကူးခတ်လေတော့သည်။

ထိုလှုပ်ရှားမှုတို့ဖြင့် ရေထဲသို့ ကူးခတ်သွားလေရာ ရှေ့သို့ ကူးခတ်လာလေသည်နှင့် အဝတ်အဖျားစလေးတို့က လှစ်ဟလာခဲ့လေသည်။

ခြေဖဝါးလေးက ရေထုကို ဖယ်ထုတ်လိုက်ပြီး သလင်းကျောက်ကဲ့သို့ ကြည်လင်နေသော ပူဖောင်းလေး အတန်းလိုက်ကို ချန်ထားရစ်ခဲ့ပြီး ဘေးနားပတ်လည်တွင် လှည့်ပတ်ကာ ပေါလောပေါ်စေခဲ့သည်။

ယင်းက ရေအောက်ကမ္ဘာကဲ့သို့ နေရာမျိုး ဖြစ်ပြီး ရေကူးနေသော ငါးလေးများဖြင့် ပတ်လည်ဝန်းရံနေကာ မြင်ကွင်းက သက်ဝင်နေဆဲ ဖြစ်သည်။ ရိုက်ကူးရေးအဖွဲ့က အပြင်ရှိ ဖောက်ထွင်းမြင်ရသော ကြည့်မှန်မှ သူ ရေကူးနေသည်ကို ရိုက်ယူနိုင်ပေမည်။

သူ့ကို ဖြတ်ကူးသွားသော ငါးလိပ်ကျောက်ကြီး တစ်ကောင်ကို တွေ့လိုက်ရသည်။ ရန်ရှူက ၎င်းနှင့် ပတ်သက်ပြီး တစ်စုံတစ်ခု ထူးခြားနေကြောင်း ခံစားလိုက်ရသဖြင့် အကြည့်များ လိုက်ပါသွားရသည်။

သူက ပရိုဂရမ်အဖွဲ့၏ ဥာဏ်နီဥာဏ်နက်များကို ရင်းနှီးနေပြီးသား ဖြစ်၍ ငါးလိပ်ကျောက်ကြီးကို တမင်သက်သက် လှည့်ပတ်ကြည့်လိုက်ရာ သဲလွန်စ တွေ့လိုက်ရသည်။

သူက ချက်ချင်း ရေပေါ် တက်လိုက်ပြီးနောက် အဖွဲ့သားများကို ပြောလိုက်သည်။

"ငါးလိပ်ကျောက်ကြီးပေါ်မှာ နံပါတ်အတန်းတစ်ခု ရှိနေပုံပဲ…"

ရိုက်ကူးရေးအဖွဲ့က မည်ကဲ့သို့ ပြုလုပ်ထားသည်ကို မည်သူမျှ မသိနိုင်ပေ။ သို့သော်ငြား သူတို့၏ နည်းလမ်းက အန္တရာယ် ရှိပုံမရပေ။ ထိုသို့ မဟုတ်ပါက ဘလက်ဖန်များမှ အထအနကောက်ကာ သေချာပေါက် ရဲတိုင်ကြပေတော့မည်။

"ဘာနံပါတ်လဲ…"

အော့စ်စီဟု ခေါ်သော ကပြားမော်ဒယ်လေးသည်လည်း ကမ်းပေါ်သို့ တက်လာကာစ ဖြစ်သည်။ သူက ခန္ဓာကိုယ်ကို ထောက်ထားရင်းဖြင် ရန်ရှူကို ခေါင်းစောင်းကြည့်လိုက်သည်။

ရန်ရှူက သူ့ကို တစ်ချက် ကြည့်လိုက်သည်။ ပထမတွင် ထိုသူ့ကို အာရုံမစိုက်မိခဲ့ပေ။ သို့သော်ငြား ရေငုပ်ထားရာမှ ပြန်သက်သာလာသောအခါထိုသူ့ကို မနေနိုင်ဘဲ စစ်ဆေးကြည့်လိုက်မိသည်။

အော့စ်စီက အသားဖြူလှပြီး ရေထဲသို့ ဆင်းသွားသောအခါ ပို၍ပင် ဖောက်ထွင်းမြင်လုနီးပါး ဖြစ်သွားသည်။ ထိုအခိုက် အညိုရင့်ရောင် ဆံနွယ်များက ပါးပြင်နှင် နဖူးထက်တွင် ကပ်နေခဲ့သည်။ ကြည်လင်နေသော ရေစက်ရေပေါက်များက ပါးပြင်ထက်၌ တွဲလွဲခိုနေသည့် အချက်ကိုကား ပြောစရာပင် မလိုတော့ပေ။

ထိုပုံရိပ်လေးမှာ... ရန်ရှူလို လူတစ်ယောက်အတွက် အကြိမ်အနည်းငယ် မကြည့်မိစေရန် ခက်ခဲပေမည်။

"အာ..."

ရန်ရှူ၏ ခေါင်းက တစ်ခဏမျှ ပတ်လမ်းပြတ်တောက်သွားလေပြီး မတိုင်မီက တွေ့ခဲ့သော အရာကို မေ့သွားပြီဖြစ်ကြောင်း သိလိုက်ရသည်။ သူ ချက်ချင်းပင် ခေါင်းလွှဲကာ ရေထဲသို့ ထပ်ခုန်ချပြီး ထပ်ဖတ်ရန် ရည်ရွယ်လိုက်သည်။

အော့စ်စီကလည်း ရန်ရှူက ပဟေဠိများ ဖြေရှင်းရာ၌ ညံ့ဖျင်းသည့်အကြောင်း သိထားပြီးသား ဖြစ်ပုံရသဖြင့် သူ့နောက်မှလိုက်ကာ ရေထဲသို့ ငုပ်ရှိုးလိုက်ပြီး ပဟေဠိကို သွားကြည့်ရန် ပြင်လိုက်သည်။

နှစ်ယောက်သားက ငါးလိပ်ကျောက်ကြီးကို ပတ်ကာ တစ်ခဏမျှ ကူးခတ်နေခဲ့ကြသည်။ ရန်ရှူက ပဟေဠိကို ကြည့်ရာ၌ အာရုံစိုက်ထားသဖြင့် အလှဆင်ထားသော ကျောက်တုံးကို ဝင်တိုက်လုနီးပါး ဖြစ်သွားပြီး အောစ့်စီက ထိန်းကူလိုက်ရသည်။

သို့သော်ငြား ထိန်းကိုင်ထားခံရသည့် ရန်ရှူက ရှောင်ရှားလိုက်သည်။ သူက မရင်းနှီးသူများ ခါးလာထိသည်ကို မနှစ်မြို့ပေ။ သူတို့ ပြီးလုနီးပါး ဖြစ်သွားကြောင်း တွေ့လိုက်ရသောအခါ နှစ်ယောက်သားက အတူတူ ရေပေါ် ပြန်တက်လာခဲ့ကြသည်။ ရန်ရှူ ရေရွတ်လိုက်စည်။

"မေးခွန်းထုတ်တာ လူလေးယောက် ရှိတယ်... ကြည့်ရတာ နံပါတ် ငါးဆယ့်နှစ်လုံး ရှိပြီး နံပါတ် တစ်နဲ့ လေးကတော့ မှန်လောက်တယ်…"

သူက ချရေးရန်အတွက် မည်သည့်အရာကိုမှ ရှာမတွေ့သဖြင့် သဲပေါ် ဆွဲကာ မှတ်ထားလိုက်သည်။ ထို့နောက် ထပ်ငုပ်ကာ အခြားသဲလွန်စများ ရှာဖွေလိုက်သည်။

ရန်ရှူ ပြန်ပေါ်လာသောအခါ နောက်ထပ် နံပါတ်များ မှတ်လိုက်ပြန်သည်။

"နှစ်ဆယ့် ခုနစ်ခုမြောက်နဲ့ နှစ်ဆယ့်ကိုးခုမြောက်လည်း မှန်တယ်…"

ရေကူးကိရိယာများ ဝတ်ထားသော အသင်းဖော်တစ်ယောက် ရောက်လာပြီး မေးလိုက်သည်။

"ပြဿနာက ဘာလဲ…"

သူ ရေထဲသို့ နှစ်ကြိမ်ဆင်းပြီးနောက် ဖယ်ထုတ်ထားသော အဖြေများကိုသာ တွေ့ခဲ့ရသည်။

ရန်ရှူ ပြန်ဖြေလိုက်သည်။

"ဂဏန်းနှစ်လုံး လိုနေတုန်းပဲ.... ရေထဲက ရခဲ့တဲ့ နံပါတ်အတွဲလိုက်က အဖြေပဲ... ပေါင်းစပ်သော့ကို ကြည့်လိုက်ပြီးပြီ... ဂဏန်းခြောက်လုံး ရှိနေတယ်…"

သုံးယောက်သားက အဖြေရှာရန် ရေထဲသို့ ဆက်ငုပ်နေရန်သာ ရှိပေတော့မည်။

အဖြေတစ်ခုကို သတ်မှတ်ပြီးသည်နှင့် ရိုက်ကူးရေးအဖွဲ့က အသုံးအဆောင်ပစ္စည်း ကြိုးတစ်ချောင်းကို ပေးလာသည်။

ထိုပစ္စည်းကို ကြည့်ရင်း ရန်ရှူတစ်ယောက် ရင်မတုန်ဘဲ မနေနိုင်တော့ပေ။

ပရိုဂရမ် အဖွဲ့က ဒီအပိုင်းမှာ PLAY ပုံစံမျိုး ကစားမလို့လား...

[T/N - BDSM playတာကို ပြောချင်တာပါ... ဟိုက ကြိုးတွေ ပေးလာတော့...]

ရိုက်ကူးရေး အဖွဲ့သားတစ်ယောက်က ကြေညာလာခဲ့သည်။

"တစ်စုံတစ်ယောက်က မင်းတို့အဖွဲ့ကို အသုံးအဆောင်ပစ္စည်းတစ်ခု အသုံးပြုလာပါတယ်... အခု မင်းတို့ထဲက နှစ်ယောက်က ခြေချင်းဝတ်ချင်း ချည်ထားဖို့ လိုတယ်…"

အကာအကွယ်ဂီယာများ ဝတ်ဆင်ထားသည့် အသင်းသားများက ရေကူးမကျွမ်းကြပေ။ ထို့အပြင် ထိုသူများကို ရေထဲသို့ ထပ်ကာထပ်ကာ ဆင်းခိုင်းရန်အတွက် အာဏာလိုသေးသည်။

ထိုစဥ် ရန်ရှူနှင့် အော့စ်တို့မှာ ရေကူးကျွမ်းကြပြီး ရေထဲတွင်လည်း ခန္ဓာကိုယ်ကို ကောင်းကောင်း ထိန်းချုပ်နိူင်သည်။ ထို့ကြောင့် ရန်ရှူနှင့် အောစ့်တို့သာ ခြေချင်းပူးချည်၍ ရေထဲသို့ ဆင်းသွားလိုက်ကြသည်။

ဤတစ်ကြိမ်၌ ရေအောက်ကြမ်းပြင်သို့ ရောက်ရှိနိုင်ရန် ရန်ရှူနှင့် အော့စ်တို့က တစ်သားတည်း ပူးပေါင်းဆောင်ရွက်ရန် လိုအပ်သည်။ ရန်ရှူက နေရာတစ်ခုကို လက်ညှိုးထိုးပြသောအခါ အောစ့်ကလည်း ထိုနေရာသို့ အတူတူ လိုက်ကူး၍ အတူတကွ သဲလွန်စ ရှာဖွေကြသည်။ ထိုကဲ့သို့ တစ်ခဏမျှ သွားလိုက်ပြန်လိုက် လုပ်ပြီးသွားသောအခါ ရန်ရှူတစ်ယောက် ခြေကုန်လက်ပန်းကျလာပြီး ကမ်းခြေတွင် လှဲလျောင်းလျက် သဲလွန်စများကို ရေရွတ်နေခဲ့သည်။

အောစ့်က သူအား ကူညီပေးရန် အနားကပ်လာချင်နေသော်လည်း သူက ငြင်းပယ်လိုက်သည်။

"ငါ အဆင်ပြေတယ်…"

ထိုအခိုက်တွင် လျို့ရွှမ်းနှင့် သူ၏ အသင်းဖော် နှစ်ယောက်က မှန်ပြတင်း၏အပြင်ဘက်တွင် ပေါ်လာသည်။ ရန်ရှူမှာ ပင်ပန်းလွန်း၍ ဟယ်လိုဟုပင် မပြောနိုင်ပေ။

လျို့ရွှမ်းက ချက်ချင်း ထွက်မသွားဘဲ ရန်ရှူနှင့် စကားပြောနိုင်သော နေရာကိုရှာ၍ မေးလိုက်သည်။

"အစ်ကိုရန်... အဆင်ပြေရဲ့လား…"

"ဟမ်…"

ရန်ရှူ ဖျော့တော့စွာ မေးလိုက်သည်။

"မြွေတွေကြားထဲ သဲလွန်စ ရှာရတာ နည်းနည်းတော့ လန့်စရာကောင်းတယ်... သူတို့ကို ထိရတာက နည်းနည်း... အင်း... ပြောစရာတောင် မလိုပါဘူး... ဒါပေမယ့် အစ်ကိုတို့ လုပ်နေရတာလောက်တော့ မပင်ပန်းဘူး…"

"ငါကတော့ အခု မြွေတွေကို အရမ်းချစ်စရာကောင်းတယ်လို့ တွေးနေမိပြီ... မြွေတွေက ဘာများလုပ်နိုင်မှာမို့လဲ... ဘာပဲဖြစ်ဖြစ်လေ... မင်း ဘာအကြံပေးမလို့လဲ…"

"အစ်ကိုတို့ ရထားတဲ့ သဲလွန်စတွေပြောပြလေ... ကျွန်တော် ကူညီနိုင်မလား ကြည့်ရအောင်…"

ရန်ရှူက သူတို့ ရရှိထားသော သဲလွန်စများကိုရေတွက်ပြလိုက်သောအခါ လျို့ရွှမ်းက တာအိုဘုန်းတော်ကြီးတစ်ယောက်ကဲ့သို့ လက်ချောင်းများကို ချိုးကာ ရေတွက်နေခဲ့သည်။ ထို့နောက် ပြောလိုက်သည်။

“အစ်ကိုရန် ရှာစရာ မလိုတော့ဘူး... ဖြစ်နိုင်ချေတွေက အများကြီး မကျန်တော့ဘူးလေ... ကျွန်တော် ပြောတဲ့ နံပါတ်တွေကို တစ်ခုချင်း ကြိုးစားကြည့်လိုက်…"

ရန်ရှူက ချက်ချင်းဆိုသလို ကမ်းပေါ်တက်လာသည်။ သူက ခြေထောက်များကိုကွေး၍ လျို့ရွှမ်း ပြောသည့် နံပါတ်များကို တစ်ခုချင်း ကြိုးစားကြည့်လိုက်သည်။ ခုနစ်ခုမြောက် နံပါတ်စဥ်သို့ ရောက်သောအခါ သော့ပွင့်သွားခဲ့သည်။

ရန်ရှူအဖွဲ့မှ အဖွဲ့သားသုံးယောက် ချက်ချင်းဆိုသလို အောင်ပွဲခံလိုက်ကြသည်။ လျို့ရွှမ်းက ကျယ်ကျယ်လောင်လောင်ရယ်နေရင်း ရန်ရှူ၏ ပုံစံကို ကြည့်လိုက်ပြီးနောက် ပြောလိုက်သည်။

"မြန်မြန် အဝတ်လဲလိုက်တော့လေ... အစ်ကိုက မျောက်တစ်ကောင်လို ပိန်ကပ်နေပြီ…"

ရန်ရှူက သူ့ကို ကျေးဇူးတင်စိတ်လေး ဖြစ်မိသေးသော်လည်း လျို့ရွှမ်း၏ ဆူပူသံကို ကြားသောအခါ ထိုစကားကိုသာ ပြန်ဖြေခဲ့၏။

"မင်းက ပြဿနာ ဖြေရှင်းတဲ့နေရာမှာ ကူညီပေးထားလို့ ဆယ်မိနစ်အတွင်း မင်းကို ပြိုင်မငြင်းဘူး... ဆယ်မိနစ်ပြီးရင်တော့ ငါနဲ့ လာမရှုပ်နဲ့…"

“အစ်ကိုရန်ရဲ့ ကြင်နာတဲ့ စကားလေးအတွက် ကျေးဇူးပါပဲနော်…"

လျို့ရွှမ်း ထွက်လာသောအခါ အောစ့်မှ ရန်ရှူအား ကူညီပေးရန် လက်လှမ်းလိုက်သည်ကို ရေးတေးတေး တွေ့လိုက်ရသည်။ သူ့နှုတ်ခမ်းပါးများက မျဥ်းတစ်ကြောင်းတည်း စေ့ပိတ်သွားခဲ့လေသည်။

ရန်ရှူက အောစ့်ကို လက်ခါပြလိုက်မှသာ ပြုံးနေသည် ပုံစံ ပြန်ရောက်သွားသည်။

အဖွဲ့များ တွေ့ကြသောအခါ ရန်ရှူ၏အဖွဲ့က နောက်ဆုံးမှ ရောက်လာကြသူများ ဖြစ်နေသည်။

အခြားအဖွဲ့သုံးဖွဲ့က သူတို့၏တာဝန်များကို ရွေးထားပြီးသား ဖြစ်၍ သူတို့ရွေးရန် နောက်ဆုံးတစ်ခုသာ ကျန်ခဲ့သည်။

ရန်ရှူက မေးခွန်းကိုထုတ်၍ ကြည့်လိုက်သည်။ ထို့နောက် မနီးမဝေးမှ ဘန်ဂျီ ခုန်သည့်နေရာကို ကြည့်ကာ မျက်နှာအမူအရာက တဖြည်းဖြည်း လေးနက်လာခဲ့သည်။

ဤတစ်ကြိမ်၌ သူ၏ အကြောက်တရားက ဟန်ဆောင်ထားခြင်း မဟုတ်ရပေ။ မှတ်ဥာဏ်များအတွင်း ဖခင်ဖြစ်သူက သူ့အား ဂျိုင်းမှ မြှောက်ကာ အထပ်မြင့်အဆောက်အဦးထိပ်သို့ ခေါ်သွားပြီး ဂယောင်ခြောက်ချားဖြင့် အော်ဟစ်ခဲ့သည်။

"မင်းအမေက တာဝန်မယူတတ်တဲ့သူ... မင်းကလည်း တစ်ခါမှ စကားနားမထောင်ခဲ့ဘူး... မင်းလည်း သေသွားသင့်တာ... ငါတို့အားလုံး သေလိုက်ကြမယ်... အတူတူ အဆုံးသတ်လိုက်ကြရအောင်…"

သူအား တုန်လှုပ်စေသည့် အကြောက်တရားက ချက်ချင်းဆိုသလို ရောက်ရှိလာသည်။

သူက အမြင့်တစ်နေရာတွင် ရပ်ကာ ငုံ့ကြည့်နိုင်ပြီး ယင်းနှင့် ပတ်သက်ပြီး မူမမှန်မှု မရှိပေ။ သို့သော်ငြား ပြုတ်ကျသွားမည်ဟု တွေးလိုက်လျှင် သူ့အား ကြောက်ရွံ့စေနိုင်ဆဲ ဖြစ်သည်။

အမှန်ပင် သေသွားရတော့မည့်အလားပင်...

သူ့မိသားစုက သူ့ကို သေစေချင်ခဲ့သည်။

လျို့ရွှမ်းကလည်း အနားရောက်လာကာ အခြေအနေ လာကြည့်သည်။ သူ ရယ်လိုက်ပြီးနောက် ပြောလိုက်သည်။

"ဘန်ဂျီ ခုန်တာလေးပဲလေ... အစ်ကိုရန် လုပ်နိုင်ပါတယ်…"

ဒါက များလွန်းသွားပြီ...

သို့သော်လည်း သူတို့က လှေပေါ်သို့ တက်ကာ နောက်ထပ်သဲလွန်စ ရှာရဦးမည်ဖြစ်၍ အခြားနည်း မရှိပေ။

ဘန်ဂျီကြိုးမှ ပြုတ်ကျလာသောအခါ သူတို့က လှေပေါ်သို့ ကိုယ့်ဘာသာ ခုန်တက်လိုက်ရုံသာ ဖြစ်သည်။

အောစ့်က ဂရုမစိုက်လှပေ။ ပထမဆုံး ကြိုးစားကြည့်မည်ဟု ဆိုကာ အကာအကွယ်ဂီယာများ ချွတ်လိုက်ပြီးနောက် သင်္ဘောပေါ်သို့ ရှောရှောရှုရှု ရောက်သွားပြီး သူတို့နှစ်ယောက်ကို ဆွဲခေါ်ပေးလိုက်သည်။

ရန်ရှူက အသင်းသားနှစ်ယောက်နောက်မှလိုက်ကာ ဘန်ဂျီကြိုးခုန်သည့်နေရာသို့ ရောက်သွားလေသည်။

ရန်ရှူက ကြိုးခုန်သည့် နေရာတွင် ရပ်ကာ အောက်သို့ ငုံ့ကြည့်ရန် ကြိုးစားလိုက်ပြီးနောက် ခြေလှမ်း အနည်းငယ် ပြန်ဆုတ်လိုက်သည်။

ငါ မခုန်ချင်ဘူးလို့...

သို့သော်ငြား အသင်းဖော် နှစ်ယောက်က တစ်ယောက်ပြီးတစ်ယောက် ခုန်ချပြီးသွားကြလေသည်။ သူသာ လိုက်မခုန်ပါက အသင်းဖော်များ၏ သဲလွန်စရှာရန် လှေလှော်ရမည့် ခရီးစဥ်ကို နှောင့်နှေးစေတော့မည်။

သူက ဝန်ထမ်းလေးကို သူ့အတွက် ကိရိယာများ တပ်ပေးရန် ပြောလိုက်ပြီးနောက် ငုံ့ကြည့်ကာ အချိန်အကြာကြီး တမင်တကာ တွန့်ဆုတ်နေခဲ့သည်။

ဤတစ်ကြိမ်၌ လျို့ရွှမ်းက မနီးမဝေးတွင် ရပ်နေရင်း မေးလိုက်သည်။

"အစ်ကိုရန်... ကျွန်တော် အစ်ကို့ကို လိုက်စီးခွင့်ပေးရမလား…"

ရန်ရှူက ဒေါသတကြီးဖြင့် အော်လိုက်သည်။

"မင်းကရော မစ်ရှင်လုပ်စရာ မလိုတော့လို့လား... မင်းအသင်းဖော်တွေကို ခေါ်ပြီး လစ်တော့... ပြီးရင် နေ့ကောင်းလေးတစ်ရက်ကို ကုန်ဆုံးလိုက်ကြပေါ့…"

"ကျွန်တော်ကဖြင့် ဒီနေရာက တာဝန်တွေ ပြီးလုနီးပါး ဖြစ်နေပြီ... အခု ဘယ်သူက ပုန်းနေတဲ့လူလဲ ဆိုတာ လိုက်ရှာနေတာ…"

ရန်ရှူက အသက်ပြင်းပြင်း ရှူကာ ကံကြမ္မာကို လက်ခံလိုက်သည်။ စိတ်မကောင်းစရာပင်။ မည်မျှပင် စိတ်ပိုင်းဆိုင်ရာပြင်ဆင်ထားသော်ငြား ပြုတ်ကျသွားသည့်အခိုက်တွင် နှလုံးသား၏ ခုခံမှုများ ပြိုလဲသွားပြီး အထိန်းအကွပ်မရှိ အော်ဟစ်လိုက်သည်။

"အား... ဖာခ့်... စန့်ရှန်းကို လိုချင်တယ်... အား... စန့်ရှန်းရေ…"

သူက ကျယ်ကျယ်လောင်လောင် အော်နေသဖြင့် အသံလည်းပြာနေကာ ဝူးတဝါး ဖြစ်နေသည်။

ကြည့်နေသည့် လျို့ရွှမ်းသည်သာမက သူ့အား စောင့်နေကြသည် အသင်းဖော်များပါ နားမလည်လိုက်ကြပေ။

လျို့ရွှမ်းက သူ့အသင်းဖော်များထံ ပြန်လျှောက်လာပြီးနောက် မေးလိုက်သည်။

"သူပြောတာ သေချာ ကြားလိုက်ကြလား... အွန်လိုင်းတက်မယ်လို့ ပြောသွားတာလား... သူက ဘယ်လိုင်းပေါ် တက်မလို့တဲ့လဲ…"

အသင်းဖော်က ပြန်ဖြေလိုက်သည်။

"ငါတို့ကို အပေါ်တက်ခဲ့လို့ ပြောတာများလား…"

"အိုး…"

လျို့ရွှမ်းက ထပ်ပြီး အာရုံမစိုက်တော့ဘဲ သူ၏ ကိုယ်ပိုင် အရံဇာတ်ကြောင်းကို ဆက်လိုက်နေခဲ့သည်။

အသင်းဖော်များ၏ အကူအညီကြောင့် ရန်ရှူတစ်ယောက် တွေဝေငေးမောစွာဖြင့် လှေပေါ် တက်လာနိုင်ခဲ့သည်။

📽️

Prev Next