အပိုင်း ၁၄၈ ( Rogue Champion 24 )

ကျိုးစုန်သည် လုံလောက်စွာ စားသောက်ပြီးနောက် ကောင်တီရုံးသို့ သွား၍ ဝေ့မိသားစုကို ပြဿနာသွားရှာရန် ဆုံးဖြတ်လိုက်သည်။ 

သူ့ဗိုက်ထဲတွင် မီးဒေါသအပြည့် ရှိနေပြီး ဤမီးဒေါသကို ဖွင့်ချရမည့်နေရာ တစ်နေရာ ရှိရမည်ဖြစ်ကာ ဝေ့မိသားစုက အလွန်ကောင်းသော ပစ်မှတ် ဖြစ်သည်။

အမှန်ပင်၊ ထိုသို့မလုပ်မီ သူသည် ဝေ့လင်းရှိူ့ကို သက်သက်ခေါ်ပြီး မေးမြန်းသည် : “ လင်းရှိူ့၊ မင်းကို ငါ မွေးစားမယ်ဆိုရင် အဆင်ပြေမလား? ”

ဝေ့လင်းရှိူ့ အံ့အားသင့်သွားသည်။

ကျိုးစုန်က ပြောပြသည် : “ မင်း ဝေ့မိသားစုမှာ ဆက်ရှိနေမယ်ဆိုရင် ဝေ့မိသားစုက မင်းကို ဒုက္ခပေးနိုင်လိမ့်မယ်။ အကယ်၍ မင်းကို ငါ မွေးစားလိုက်မယ်ဆိုရင် စိတ်ပူစရာ မလိုတော့ဘူး။ ”  

ဝေ့လင်းရှိူ့သာ ဝေ့မိသားစုတွင် ဆက်ရှိနေလျှင် သူဟာ ဝေ့မိသားစု၏လက်ထဲတွင် အမြဲရှိနေပေလိမ့်မည်။

ဥပမာအားဖြင့် အနာဂတ်၌ ဝေ့လင်းရှိူ့က စီရင်စုစာမေးပွဲကို သွားရောက်ဖြေဆိုမည် ဖြစ်သော်ငြား ဝေ့သခင်မအိုကြီးက သူ(မ)ဟာ အပြင်းအထန် နာမကျန်းဖြစ်နေပြီး သူက သူ(မ)ကို ပြုစုပေးရမည်ဟု ပြောလာလျှင် ဝေ့လင်းရှိူ့က မဖြစ်မနေ သဘောတူရပေမည် — သူက သဘောမတူခဲ့ဘဲ စာမေးပွဲကို ဖြေဆိုအောင်မြင်ခဲ့လျှင်တောင်မှ ထိုကဲ့သို့သော ဝတ္တရားမကျေပွန်သူဟာ နာမည်ဖယ်ရှားခံရမည်ဖြစ်၏။

အခြားဥပမာမှာမူ ဇနီးသည်ကို လက်ထပ်ထိမ်းမြားခြင်းဟာ အောင်သွယ်တော်၏ စကားများနှင့် မိဘများ၏ အမိန့်များ ဖြစ်သည်။ ဝေ့မိသားစုက ယခုအချိန်တွင် ဝေ့လင်းရှိူ့၏ လက်ထပ်ထိမ်းမြားမှုကို ဆုံးဖြတ်လိုက်လျှင် ဝေ့လင်းရှိူ့က ၎င်းကို အသိအမှတ်ပြုရုံမှလွဲ၍ ဘာမှမလုပ်နိုင်ချေ။

မင်းဆက်က တိုင်းပြည်ကို တာဝန်ဝတ္တရားကျေပွန်မှုနှင့် အုပ်စိုးသည်။ အကယ်၍များ ဖခင်ဖြစ်သူက သူ့သားကို သတ်လိုက်လျှင်တောင်မှ မင်းအစိုးရက ၎င်းကို ဂရုမစိုက်ပေ။

“ ကျိုးမိသားစုက သဘောတူလား? ” ယန်ကျင်းဇီကဘမေးသည်။ သူသည် ကျိုးစုန်၏ အခြေအနေကို အမြဲသိခဲ့သည်။ ကျိုးစုန်၏ လက်ရှိအဆင့်အတန်းအရ ဝေ့မိသားစု လက်လွှတ်အောင် လုပ်ရန်မှာ မခက်ခဲချေ။ သို့သော်ငြား ဝေ့မိသားစု၏သဘောတူညီချက်ကို ရရှိခြင်းအပြင် မွေးစားရန်မှာ ကျိုးမိသားစု၏ သဘောတူညီချက်ကိုလည်း လိုအပ်သည်။

အဘယ့်ကြောင့်ဆိုသော် ဤခေတ်တွင် မွေးစားသားကိုလည်း သားအရင်းကဲ့သို့ ဆက်ဆံရမည်ဖြစ်သည်။

“ ငါ အခု ကျိုးမိသားစုကို တာဝန်ယူထားတယ်။ ” ကျိုးစုန်က ဆိုကာ ကျိုးမိသားစု၏ အခြေအနေကို အတိုချုံး ပြောပြသည်။

ယခင်က ကျိုးစုန်၏ဖခင် ထိုနေရာတွင် ရှိနေစဉ်၌ သူသည် ကျိုးမိသားစုမှ ကိစ္စကြီးငယ် အားလုံးကို ဆုံးဖြတ်ခဲ့သည်။

သူ့တွင် မိန်းမများစွာနှင့် ကလေးများစွာ ရှိသည်။ ထိုအချိန်တွင် ကျိုးမိသားစု၌ အနည်းငယ် ရှုပ်ထွေးနေခဲ့ပြီး ကျိုးစုန်နှင့် သူ့အစ်မတို့၏ လက်ထပ်ထိမ်းမြားမှုတို့မှာလည်း ဖြစ်သင့်သလောက် မကောင်းခဲ့ချေ။

သို့သော် ယမန်နှစ်တွင် ကျိုးစုန်၏ဖခင်ဟာ မလုပ်သင့်သော တစ်စုံတစ်ရာကို ပြုလုပ်ခဲ့သည်ဟု အပြစ်တင်ခံရပြီး ထို့နောက်တွင် သူက အကျဉ်းထောင်ထဲ၌ ဖျားနာကာ ကိုယ်တစ်ခြမ်း သေသွားသည်။ ယခု သူက ဘာကိုမှ မထိန်းချုပ်နိုင်တော့။

ကျိုးစုန်၏ဇနီးကမူ... ကျိုးစုန်နှင့် သူ့ဇနီးတို့သည် အဆင်မပြေကြချေ။ သူသည် အပြင်သွားသောအခါ သူ့ဇနီးကို မခေါ်သွားပေ။ နှစ်များစွာကြာပြီးနောက် သူတို့နှစ်ဦးတွင် သမီးနှစ်ယောက်သာ ရှိပြီး သား လုံးဝ မရှိချေ။

မကြာသေးမီနှစ်များအတွင်း သူ့ဇနီးက များစွာရင့်ကျက်လာပြီး သူနှင့် ထပ်မံပြီး စကားများရန်မဖြစ်တော့ဘဲ ကလေးတစ်ယောက် မွေးစားရန်ကိုလည်း စဉ်းစားလျက်ရှိသည်။ မူလက သူ့ရွေးချယ်မှုမှာ မိဘမရှိသော ကျိုးမိသားစုမှ ကလေးငယ်များ ဖြစ်ခဲ့ပြီး ဝေ့လင်းရှိူ့ကို မတွေးခဲ့သော်လည်း ယခုမူ သူသည် ဝေ့လင်းရှိူ့ကသာ အသင့်တော်ဆုံးဟု ခံစားမိသည်။

“ မင်းက ဝေ့မိသားစုရဲ့ သခင် ဖြစ်လာလိမ့်မယ်လို့ ငါ ထင်ခဲ့တယ်။ ဒါပေမယ့် မင်းအဖေပဲဖြစ်ဖြစ်၊ မင်းပဲဖြစ်ဖြစ် ဝန်လေးတဲ့ ‌ခံစားချက် ရှိတယ်။ ဒီလိုဆို အခု အတားအဆီး မရှိတော့ဘူး။ ” ကျိုးစုန်က ပြောသည်။

“ ဝေ့မိသားစုဘက်က... ” ဝေ့လင်းရှိူ့ တုန့်ဆိုင်းနေသည်။

“ သူတို့ မလုပ်ချင်ရင်တောင်မှ သဘောတူရမှာပဲ! ” ကျိုးစုန်က ဆိုသည်။ ကျိုးစုန်သည် အသက်နှစ်ဆယ်ကျော်တွင် Jinshi အဖြစ် အသိအမှတ်ပြုခံခဲ့ရပြီး သူ့အဆင့်က သာမန်သာ ဖြစ်သည်။ ၎င်းနောက်ပိုင်းတွင်တော့ သူသည် မြို့တော်တွင် အချိန်နှစ်နှစ် ဖြုန်းခဲ့သည်။ လစ်လပ်နေရာရှိသောအခါ သူက ကောင်တီအောက်ရုံးတရားသူကြီးတစ်ဦး ဖြစ်လာခဲ့၏။

သူသည် တိုင်းတစ်ပါးရေးရာ ကိစ္စရပ်များတွင် ထူးချွန်စွာ လုပ်ဆောင်ခဲ့သည်။ အကြောင်းတိုက်ဆိုင်စွာဖြင့် သူသည် လက်ရှိမင်းဧကရာဇ်၏ လူယုံတော်နှင့်ပင် ပေါင်းမိခဲ့ပြီး အရှင်မင်းကြီးကို ခစားနိုင်ခဲ့ကာ မြို့တော်သို့ ပြန်ရောက်သွားခဲ့၏။ သို့သော်လည်း အချိန်အကြာကြီးအထိ သူသည် သားတစ်ယောက်အနေဖြင့် သူ့ဖခင်ထက် မကျော်လွန်နိုင်သောကြောင့် မင်းအရာရှိလောကတွင် တစ်လက်မပင် မယူနိုင်ခဲ့ပေ။

သူ့ဖခင်ဟာ Jinshi တစ်ဦးပင် မရှိသော ဝေ့မိသားစုကဲ့သို့ မိသားစုတစ်စုအတွက်မူ မစော်ကားနိုင်သော လူတစ်ဦး ဖြစ်သော်လည်း တကယ်တမ်း၌ သူက အဆင့်ငါး အရာရှိတစ်ဦး အစစ် ဖြစ်သည်။ 

ကျိုးစုန်သည် သူ့မိသားစုထံမှ နှစ်ပေါင်းများစွာ ချုပ်ချယ်ခံခဲ့ရသောကြောင့် သဘာဝကျစွာပင် သူသည် အရေးကြီးဆုံးအလုပ်မှာ ဝေ့လင်းရှိူ့အတွက် ဝေ့မိသားစုကို ကူညီဖြေရှင်းပေးခြင်းသာ ဖြစ်ကြောင်း သိရှိသည်။ 

“ နောင်ကျရင် ကျွန်တော်က အစ်ကိုယန်နဲ့ အတူရှိနေမှာပါ။ ကျွန်တော် အိမ်ထောင်ပြုမှာ မဟုတ်ဘူး။ ” ဝေ့လင်းရှိူ့က ပြောသည်။

“ အဆင်ပြေတယ်။ အနာဂတ်မှာ ငါ ကလေးထပ်ရှိလာလောက်တယ်။ ” ကျိုးစုန် ပြောလိုက်သည်။ သူသည် ဤနှစ်တွင် သုံးဆယ့်ခြောက်နှစ်သာ ရှိသေးပြီး သူ့ဇနီးက သုံးဆယ့်နှစ်နှစ်သာ ရှိသေးသည်။ သို့ဖြစ်ရာ ကလေးရှိဖို့ရန်မှာ မဖြစ်နိုင်ခြင်း မဟုတ်လောက်ချေ။

ယန်ကျင်းဇီနှင့် ဝေ့လင်းရှိူ့တို့၏ ကိစ္စအတွက်မူ သူသည် လုံးဝ သဘောမတူသော်ငြား ယန်ကျင်းဇီက ဝေ့လင်းရှိူ့ကို ကြင်နာပြီး သူ့တွင် ဘာမှပြောပိုင်ခွင့်မရှိပေ။

အနာဂတ်တွင် ဤလူနှစ်ဦးသည် ကလေးအနည်းငယ်ကို မွေးစားနိုင်သည် သို့မဟုတ်... သူတို့သည် တပည့်အနည်းငယ် ပိုလက်ခံနိုင်သည်။ ထိုသို့ဆိုလျှင် သူတို့ အသက်အိုမင်းချိန်တွင် ဂရုစိုက်မည့်သူ တစ်စုံတစ်ဦး ရှိလာလိမ့်မည်။

ဝေ့လင်းရှိူ့နှင့် ယန်ကျင်းဇီတို့သည် နောက်ဆုံးတွင် သဘောတူလိုက်ကြသည်။

သူတို့သည် ဝေ့မိသားစုအကြောင်း ဟိုးအရင်ကတည်းက ဆွေးနွေးခဲ့ကြ၏။ ဝေ့မိသားစုက လက်မလျှော့သည်မှာ အဖြစ်နိုင်ဆုံးဟု သူတို့ တွေးထားသည်... ယခင်က သူတို့သည် ချက်ချင်းပင် လေ့လာရေးခရီး ထွက်၍ အချိန်တစ်ခုအထိ သုံ့ကူကောင်တီမှ ထွက်နေရန် စီစဉ်ခဲ့ကြသည် — ဒီလိုဆိုရင် ဝေ့မိသားစုက သူတို့ကို မရှာနိုင်တော့ဘူး!

သို့သော် အပြင်ထွက်၍ စာလေ့လာခြင်းက မလွယ်ချေ။ ဤနှစ်များအတွင်း အပြင်ထွက်ပြီးနောက် ပြန်မလာနိုင်ကြသူ များစွာရှိသည်။ သူတို့သည် အနှေးနှင့်အမြန်ပင် စီရင်စုစာမေးပွဲတွင် ဖြေဆိုရန် ပြန်လာကြရလိမ့်မည်ဖြစ်သည်။ ဝေ့မိသားစုက သူ့ကို တားမြစ်ရန် တစ်စုံတစ်ရာ ပြုလုပ်ရန် တကယ်ပင် ကြိုးစားခဲ့လျှင် ဝေ့လင်းရှိူ့က စီရင်စုစာမေးပွဲကို တကယ် မဖြေရခြင်းမှာ ဖြစ်နိုင်လာလောက်သည်။

‌ယန်ကျင်းဇီသည် ဝေ့လင်းရှိူ့အား အခြားသူများ၏ နှိမ့်ချခြင်းကို မခံရစေလိုပေ။

ကျိုးစုန်အတွက်မူ... သူတို့သည် ကျိုးစုန်ကို ယခင်က မသိခဲ့သော်လည်း သိကျွမ်းလာပြီးနောက် ကျိုးစုန်က ဝေ့လင်းရှိူ့အပေါ်တွင် မလိုမုန်းထားသော ခံစားချက် မရှိကြောင်း သူတို့ ခံစားနိုင်သည်။

ကျိုးစုန်က ဝေ့မိသားစုထံသို့ ပြဿနာသွားရှာတော့မည်။ ဤကိစ္စတွင် ဝေ့လင်းရှိူ့က သေချာပေါက် အတူမသွားနိုင် သို့မဟုတ် ရုပ်လုံးပင် ထွက်မပြသင့်ချေ။ မဟုတ်လျှင် ဝတ္တရားမကျေပွန်သူ ဟူ၍ ဂုဏ်သတင်း ဆုံးရှုံးနိုင်သည်။ နောက်ဆုံးတွင် ယန်ကျင်းဇီကသာ ကျိုးစုန်ကို အဖော်ပြု၍ ဝေ့မိသားစုထံသို့ အတူလိုက်ပါသွားသည်။

ကျိုးစုန်သည် သူ့လူနှစ်ယောက်ကို ထားခဲ့ပြီး သူ့အိမ်ထိန်းနှင့် ကျန်နှစ်ယောက်၊ ယန်ကျင်းဇီတို့ကို ကောင်တီရုံးသို့ ခေါ်သွားသည်။ 

ရှင်းအန်းကျေးရွာရှိ လူအများစုဟာ မနေ့ညတွင် ကျိုးစုန်၏ ရွာသို့ ရောက်ရှိလာမှုကို မသိကြသော်ငြား ယနေ့တွင် သူတို့က ရွာ၌ စားစရာများ ဝယ်ခဲ့ကြရာ ၎င်းက ရွာသူရွာသားများအား ကျိုးစုန်နှင့် အခြားသူများ၏ တည်ရှိမှုကို သတိပြုမိစေခဲ့သည် – ယန်တအိမ်မှာ ချမ်းသာတဲ့ လူကြီးမင်း နောက်တစ်ယောက် ရောက်နေပြန်ပြီ!

ယန်တက အခု တကယ် အလားအလာကောင်းနေတာ!

ဤအခိုက်အတန့်တွင် ရှင်းအန်းကျေးရွာရှိ လူတိုင်းသည် ယန်ကျင်းဇီကို အဝေးမှ ကြည့်နေကြသည်။

မနှစ်က ဤအချိန်၌ ဤယန်တဟာ သူတို့က ဆုံတွေ့ရမည်ကို ကြောက်ရွံ့သော လူမိုက်တစ်ဦးသာ ဖြစ်ခဲ့သော်လည်း ယခု တစ်နှစ်ကုန်လွန်ပြီးနောက်...

“ ယန်တက အရမ်းထက်မြက်လိမ့်မယ်လို့ ငါ မထင်ထားခဲ့ဘူး! ”

“ ကောင်တီတရားသူကြီးက သူ့ကို ချီးမွမ်းခဲ့တယ်! ”

“ မင်းအစိုးရကတောင် သူ့ကို ချီးကျူးတယ်လို့ ငါ ကြားဖူးတယ်! ”

“ လောင်ယန်ရဲ့မိသားစုက ဘိုးဘေးအုတ်ဂူတွေမှာ အမွှေးတိုင်အနံ့တွေနဲ့ ပြည့်နေပြီ! ”

…...

“ ယန်တက ငယ်ငယ်ကတည်းက အမြဲတမ်း ကောင်းကောင်းအလုပ်လုပ်တတ်တယ်! ”

“ အဲ့လိုမျိုး အရမ်းဆိုးရွားတဲ့ အဖေ ရှိတာတောင် သူက တော်တော် အရည်အချင်းရှိတယ်။ သူ ငတ်သေသွားမယ်လို့ ငါ ထင်ခဲ့ပေမယ့် သူက ကောင်းကောင်းကြီး ကြီးပြင်းလာခဲ့တယ်။ ”

“ သူက ငါတို့ရွာက လူတွေနဲ့ ဘယ်တော့မှ ရန်မဖြစ်ဘူး! တကယ်တော့ သူက တော်တော်လေး ကောင်းတယ်။ ”

…

သေချာတာပေါ့၊ သူတို့က ဝေ့လင်းရှိူ့အကြောင်းလည်း ပြောကြသည် : “ ‌ဝေ့သခင်လေးက ဝေ့အိမ်မှာ ဆိုးဆိုးရွားရွား နေခဲ့ရပြီး မိထွေးက သူ့ကို မတွေ့ချင်ဘူးလို့ ငါ ကြားတယ်။ အခု နောက်ဆုံးမှာတော့ သူက ကောင်းကောင်း နေနေရပြီ! ”

“ ယန်ကျင်းဇီကြောင့် သူက Xiucai တောင် ဖြစ်လာတယ်၊ ဘယ်လောက်ကောင်းလဲ။ ”

“ ယန်ကျင်းဇီက သူ့အပေါ် တကယ် ကောင်းတယ်။ သူ့ကို စာလေ့လာဖို့ ကျောင်းတောင် ပို့ပေးတယ်! ”

…

ယန်ကျင်းဇီက ဝေ့လင်းရှိူ့ကို ရိုက်နှက်မည်ကို ယခင်က စိုးရိမ်ခဲ့ကြပြီး ဝေ့လင်းရှိူ့က သနားစရာကောင်းသည်ဟု ခံစားခဲ့ကြရသော ရွာသားများသည် ယခုအခါတွင် ဝေ့လင်းရှိူ့ကို အားကျနေကြသည်။

စကားစမြည်ပြောနေစဉ်တွင် လူတစ်ယောက်သည် သူ့ကလေးက ရွှံ့ပေမျောက်ကဲ့သို့ ဖြတ်ပြေးသွားသည်ကို တွေ့လိုက်ကာ ကလေးကို လှမ်းဆွဲလိုက်သည် : “ ကောင်စုတ်လေး၊ မင်း ဘာလို့ ကျောင်းမသွားတာလဲ? ”

“ ဖေဖေ၊ သား ဒီနေ့ ကျောင်းမသွားဘူး! ” ကောင်လေးက ပြောသည်။

“ မင်း ကျောင်းမတက်ရင်တောင် အိမ်မှာ စာကျက်လို့ရတယ်! မင်း ယန်တလိုမျိုး သေသေချာချာ စာကြိုးစားပြီး သင်ယူရမယ်! ” 

Xiucai ဖြစ်လာသော ယန်ကျင်းဇီကြောင့် ကလေးကို သူ့အဖေက ကျောင်းပို့ခဲ့သည်။ သူ ငိုချင်လာသည် — ယန်တက တကယ် အရမ်းဆိုးတယ်!

ယန်ကျင်းဇီနှင့် ကျိုးစုန်တို့ ကောင်တီရုံးသို့ သွားနေကြစဉ်တွင် ဝေ့မျိုးနွယ်စုမှ လူအများအပြားလည်း ရောက်နေကြသည်။

ဝေ့လင်းရှိူ့က Xiucai ဖြစ်သွားပြီး ဝေ့လင်းယွမ်က စာမေးပွဲကျလာကတည်းက ဝေ့မိသားစု၏ လေထုအခြေအနေမှာ အလွန်ဆိုးရွားလာသည်။

ဝေ့လင်းယွမ်ဟာ အလွန်မာနကြီးရာ သူ့ထက် အမြဲနိမ့်ကျခဲ့သော သူ့အစ်ကိုနှင့် နှိုင်းယှဉ်ခံရခြင်းကို မခံနိုင်ချေ။ သူက နှစ်ရက်ဆက်တိုက် အစာမစားခဲ့ဘဲ နေမကောင်းဖြစ်နေသည်။

ဝေ့သခင်မအိုကြီးနှင့် ဝေ့သခင်မတို့က စိတ်ဆင်းရဲကြသော်ငြား ဝေ့လင်းယွမ်ကို ကောင်းစွာ အစာစားရန် သူတို့ မချော့ရသေးမီတွင် ဝေ့မိသားစု၏ မျိုးနွယ်စုမှ အကြီးအကဲများက တံခါးဝသို့ ရောက်လာကြသည်။

ဝေ့မိသားစုသည်လည်း သုံ့ကူကောင်တီရှိ မိသားစုကြီးတစ်စု ဖြစ်သည်။

ဝေ့ကျီယွမ်၏ မိသားစုအခွဲသည် မျိုးနွယ်စုတွင် အတိုးတက်ဆုံး ဖြစ်သော်လည်း ဝေ့မိသားစု၏ ကျန်မိသားစုအခွဲများမှာ ဆိုးရွားနေသည်ဟု မပြောနိုင်ဘဲ မျိုးနွယ်အတွင်းရှိ အကြီးအကဲများတွင် ဂုဏ်သိက္ခာများစွာ ရှိသည်။

“ အရင်က မင်းတို့ ပြောတော့ ဝေ့လင်းရှိူ့က ပညာကောင်းကောင်း မတတ်ဘဲ စာလည်း မလေ့လာသလို ဘယ်လိုသင်ယူရမလဲတောင် မသိဘူးဆို။ အခု ဒါက ဘာလဲ? ” ဝေ့မိသားစုမှ အဘိုးကြီးတစ်ဦးက ဝေ့သခင်မကြီးကို စိုက်ကြည့်သည် : “ ဝေ့လင်းယွမ်က စာမေးပွဲမအောင်ဘူး! သူက စာမေးပွဲအောင်တယ်! ” ဤလူသည် ဝေ့သခင်မအိုကြီးထက် ဝါစဉ်အရ မျိုးဆက်တစ်ဆက် ပိုကြီးသောကြောင့် သူက ဝေ့သခင်မအိုကြီးအပေါ်တွင် ယဉ်ကျေးစရာမလိုပေ။

ဝေ့သခင်မနှင့် မျိုးဆက်တူသူများလည်း ရှိသည်။ ဝေ့သခင်မအိုကြီးကို အပြစ်တင်ဖို့ရန်မှာ မလွယ်ကူသဖြင့် သူတို့သည် ဝေ့သခင်မကို အပြစ်ဝိုင်းတင်ကြသည် : “ သေချာပါတယ်၊ မင်းက မိထွေးဆိုတော့ သူများကလေးကို ဂရုမစိုက်ဘူး။ လင်းရှိူ့က ဒီလောက်ထက်မြက်တာ၊ သူ့ကို သေသေချာချာသာ သင်ပေးမယ်ဆိုရင် Jinshi တောင် ဖြစ်နေလောက်ပြီ! ဒီအမြင်ကျဉ်းတဲ့မိန်းမက တကယ်ပဲ လူတွေကို နှင်ထုတ်လိုက်တယ်! ”

ဝေ့မိသားစု၏ မျိုးနွယ်စုမှ လူကြီးများသည် ဝေ့သခင်မအိုကြီးနှင့် ဝေ့သခင်မတို့နှစ်ဦးစလုံးက မကောင်းမွန်ကြကြောင်းကို ယခုမှသာ ခံစားမိကြသည်။

မိသားစုတစ်ခုမှာ Xiucai များလေ၊ ပိုကောင်းလေပဲ! အခု သုံ့ကူကောင်တီမှာ လီမိသားစုက ဝေ့မိသားစုကို နေရာတိုင်းမှာ ဖိနှိပ်ထားနိုင်တယ်။ အဲ့ဒါက လီမိသားစုမှာ စာပေထူးချွန်သူတွေ အရမ်းများနေတာကြောင့်ပဲ မဟုတ်လား?

သူတို့ဝေ့မိသားစုက မျိုးနွယ်စုကျောင်း လည်ပတ်ဖို့ ကြိုးစားနေတယ်။ ဒါက မျိုးနွယ်စုထဲမှာ ပါရမီရှင်တွေ နည်းနည်းထပ်ပေါ်လာဖို့ သူတို့ မျှော်လင့်ထားတာကြောင့်ပဲမလား?

သို့သော် ဤမိသားစုအခွဲကို သူတို့ မည်သို့တွေးရမည်မှန်းပင် မသိပေ။ ထိုမျှထူးချွန်သော ကလေးကို နှင်ထုတ်လိုက်ကြသည်။ လွန်ခဲ့သော ရက်အနည်းငယ်က သူတို့သည် ဤမိသားစုအား ဝေ့လင်းရှိူ့ကို ပြန်ခေါ်ခိုင်းခဲ့သော်လည်း ဤမိသားစုက ပြန်လည်ငြင်းဆန်ဆဲဖြစ်သည်။

ဝေ့လင်းရှိူ့က ဆော့ကစားခြင်းနှင့် ပျော်စရာကိစ္စများကို လုပ်ဆောင်ရခြင်းတို့အား နှစ်သက်သည်ဟု လူအများ ပြောလေ့ရှိသည်ကို သူတို့ ကြားဖူးခဲ့ကြသည်။ ၎င်းနှင့်ပတ်သက်ပြီး ယခု‌ တွေးကြည့်လျှင် ဝေ့လင်းရှိူ့က တကယ်ပင် ပြဿနာရှိသော ကိစ္စများကို လုံးဝ မလုပ်ခဲ့ချေ။ သူက စားသောက်ခြင်းနှင့် လောင်းကစားလုပ်ခြင်းတို့ကို မနှစ်သက်ဘဲ ၎င်းက သူဟာ အနည်းငယ် ဆော့ကစားတတ်သော သာမန်လူငယ်တစ်ဦးသာ ဖြစ်သည်ဟု ဆိုလိုသည်။

သူက ထိုယန်တနှင့် တကယ် တွဲနေလျှင်ပင် လုံးဝ အရေးမကြီးချေ။ အလွန်ဆုံးမှာ အိမ်ထောင်ပြုလျှင် မိသားစုက အရမ်းမမြင့်ဘဲ ဝေ့မိသားစုလောက် မကောင်းသော မိသားစုတစ်ခုမှသာ ရွေးချယ်နိုင်သည်။

ဝေ့သခင်မအိုကြီး၏ မျက်နှာအမူအရာမှာ အရုပ်ဆိုးလှသည်။ ဝေ့သခင်မအတွက်မူ သူ(မ)က စကားဝင်ပြောရန် နေရာမရှိဘဲ ဘေးတွင်သာ နားထောင်နိုင်သည်။

“ လင်းရှိူ့က သုံ့ကူကောင်တီကို ပြန်ရောက်နေပြီ။ ကျီယွမ်မိသားစု၊ မင်းတို့က မနက်ဖြန်ကျရင် လက်ဆောင်အချို့ ပြင်ဆင်ပြီး လူကိုယ်တိုင် သွားပြီးတော့ သူ့ကို ပြန်ခေါ်လာရမယ်။ ” နောက်ဆုံးတွင် အဘိုးအိုတစ်ဦးက ဝေ့သခင်မကို ပြောသည်။

“ သူ မလိုက်ချင်ရင်ရော ဘယ်လိုလုပ်မလဲ? ” ဝေ့သခင်မအိုကြီးက မျက်မှောင်ကြုံ့သည် : “ သူက အမြဲတမ်း သူ့သဘောကျပဲ လုပ်တာ! ”

“ အမေက ကိုယ်တိုင်ကိုယ်ကျ လာတာတောင် သူက မလိုလားဘဲ နေနိုင်သေးလား? ” ဝေ့မိသားစု အကြီးအကဲက ဆိုသည်။

ဝေ့လင်းရှိူ့က ပညာရှင်တစ်ယောက် ဖြစ်ပြီး ဝေ့သခင်မက သူ့ဆီကို လူကိုယ်တိုင် သွားသောအခါ သူက အိမ်ပြန်ရန် ငြင်းဆန်မည်... သူက သူ့ဂုဏ်သိက္ခာကို လိုချင်သေးရဲ့လား?

ဝေ့သခင်မအိုကြီးနှင့် ဝေ့သခင်မတို့သည် တစ်ယောက်ကို တစ်ယောက် ကြည့်လိုက်ကြသော်ငြား နောက်ဆုံးတွင် သူတို့က သူတို့၏ မပျော်ရွှင်မှုကို ဖိနှိပ်ပြီး သဘောတူလိုက်ရသည်။

“ မင်းတို့ သူ့ကို အိမ်တစ်လုံး ပေးပြီး ဇနီးတစ်ယောက် ယူခိုင်းလိုက်ပါ။ အဲ့ဒီ့ယန်တက အခု ပြောင်းလဲသွားပြီး Xiucai စာမေးပွဲတွေ ဖြေပြီးတော့ Linshi တစ်ယောက် ဖြစ်လာပေမယ့် ယောက်ျားကြီးနှစ်ယောက် အတူရှိနေတာ မကောင်းဘူး။ လင်းရှိူ့က မကြာခင် လက်ထပ်ရမယ်! ” အခြားအကြီးအကဲတစ်ဦးက ပြောသည်။ 

ဤသည်ကို ကြားသော် ဝေ့သခင်မသည် အနည်းငယ် မပျော်မရွှင် ဖြစ်မိသည်။

ဝေ့မိသားစုတွင် မြေအချို့ ရှိသော်လည်း မိသားစုထဲတွင် ဘယ်သူကမှ Jinshi စာမေးပွဲကို မအောင်မြင်သေးသဖြင့် မိသားစုပိုင်ဆိုင်မှုတွင် သိပ်မရှိတော့ချေ။

အစောပိုင်းနှစ်များတွင် ဝေ့ကျီယွမ်က Jinshi ဖြစ်‌ချင်ခဲ့သောကြောင့် သူက မြို့တော်သို့ နှစ်နှစ် သို့မဟုတ် သုံးနှစ် တစ်ကြိမ် သွားလေ့ရှိခဲ့သည်... ဒီခရီးရဲ့ ကုန်ကျစရိတ်နဲ့ မြို့တော်မှာ ကုန်ကျစရိတ်တွေက တော်တော်လေး အရမ်းများတယ်!

ဝေ့လင်းရှိူ့၏မိခင် ချန်ရစ်သော ခန်းဝင်ပစ္စည်းများနှင့် နှစ်တိုင်း နှစ်သစ်ကူးလက်ဆောင်များ ပို့ပေးနေသော ဝေ့လင်းရှိူ့၏ဦးလေးတို့ကြောင့်သာ မဟုတ်လျှင် သူတို့က မြေရောင်းနေရလောက်ပြီ ဖြစ်၏။ အဲ့အခါကျရင် တကယ်ပဲ... ရှက်စရာဖြစ်လိမ့်မယ်!

အခု ဝေ့လင်းရှိူ့က အိမ်ထောင်ပြုချင်တယ်ဆိုရင် ဘယ်လောက်တောင် ကုန်ကျလိမ့်မလဲ? မိသားစုဘက်က သူ့ခြံဝန်းကို ပြင်ဆင်ပေးရမည်... သူ(မ)သည် ငွေအားလုံးကို သူ(မ)၏သားအတွက်သာ ချန်ထားချင်သည်။

‌ဝေ့သခင်မက စိတ်ညစ်သွားသော်လည်း စကားမပြောရဲပေ။ ‌သို့သော် ဝေ့သခင်မအိုကြီးက ပြောနိုင်သည် : “ ပြီးခဲ့တဲ့နှစ်တွေမှာ မိသားစုက ခက်ခဲနေတာကို နင်တို့လည်း သိတာပဲ... ”

“ ဒါဆို ကုန်သည်အိမ်က မိန်းကလေးတစ်ယောက်ကို ရွေးလိုက်ပါ။ ” ဝေ့မိသားစု အကြီးအကဲက ပြောသည် : “ လင်းရှိူ့က ငယ်သေးတော့ တစ်ယောက်ယောက်က သေချာပေါက် ဆန္ဒရှိလိမ့်မယ်! ”

ကုန်သည်များဟာ အဆင့်အတန်းနိမ့်ကျသည်။ သူတို့က အရာရှိတစ်ဦးကိုသာ အားမကိုးနိုင်လျှင် သတိမထားမိချိန်၌ သူတို့၏ ပိုင်ဆိုင်မှုများကို တစ်စုံတစ်ဦးက ဝါးမျိုသွားလိမ့်မည်ဖြစ်သည်။

သို့သော်လည်း သာမန်ကုန်သည်များသည် အားကိုးရမည့်လူကို မရှာနိုင်ကြချေ။

သူတို့သည် သူတို့၏ သမီးများကို ခန်းဝင်ပစ္စည်းများစွာကို ယူဆောင်စေ၍ အရာရှိများ၏ ကိုယ်လုပ်တော်များ ဖြစ်စေခြင်း သို့မဟုတ် သူတို့၏ သမီးများကို စာပေပညာရှင်များနှင့် လက်ထပ်ပေးခြင်းတို့ကဲ့သို့ အခြားကိစ္စများကို တွေးမိကြသည် — ဤပညာရှင်က အနာဂတ်တွင် တစ်ခုခု အောင်မြင်နိုင်လျှင် သူတို့၏မိသားစုတွင်လည်း အကျိုးအမြတ်များစွာ ရရှိနိုင်သည်။ 

ဤအချိန်တွင် ဝေ့သခင်မအိုကြီး စိတ်ပြောင်းသွားသည်။

သေချာစဉ်းစားကြည့်လျှင် ၎င်းက မဆိုးချေ။

ထိုဝေ့လင်းရှိူ့ ဝေ့အိမ်သို့ ပြန်ရောက်သောအခါ အလိုအလျောက်ပင် သူက သူ(မ) ပြုသကဲ့သို့ နုရမည်ဖြစ်၏။ ဝေ့လင်းရှိူ့၏ဇနီးအတွက်မူ... ချွေးမတစ်ဦးဟာ ယောက္ခမနှင့် အဘွားယောက္ခမတို့၏ စကားကိုသာ အမြဲနားထောင်ရမည်။

‌ဝေ့လင်းရှိူ့ရဲ့အမေလို လူတွေက ဒီကမ္ဘာမှာ အများကြီး မရှိဘူး!

ဝေ့သခင်မအိုကြီးသည် ခဏတာ ဂုဏ်ယူမိသွားသည်။

သူတို့ စကားပြောနေကြစဉ် လူတစ်ယောက်က အပြင်မှ ရုတ်တရက် ဝင်လာသည် : “ သခင်မကြီး၊ ကောင်တီတရားသူကြီး ဒီကိုရောက်လာတယ်! ”

ကောင်တီတရားသူကြီးက သေးငယ်သော အရာရှိတစ်ဦးသာ ဖြစ်သော်ငြား ဝေ့မိသားစုရှိ ဘယ်သူကမှ သူ့ကို အထင်မသေးရဲဘဲ အပြင်ထွက်၍ သူ့ကို နှုတ်ဆက်ကြသည်။ ရလဒ်ကမူ သူတို့သည် ကောင်တီတရားသူကြီးကျူး၏ အရှေ့တွင် လမ်းလျှောက်လာနေသော လူတစ်ဦးကို တွေ့လိုက်ကြရသည်။ 

ထိုလူသည် အသက်သုံးဆယ်ကျော် ရှိပြီး အလွန်ကြင်နာတတ်ပုံ ပေါ်သော်လည်း ဝေ့မိသားစုက သူ့ကို တွေ့လိုက်ရသောအခါ သူတို့ နှလုံးခုန်မြန်သွားကြသည်။ မူလက ပြုံးနေသော ဝေ့သခင်မအိုကြီးပင် အသက်ရှူရပ်လုမတတ် ဖြစ်သွားသည်။

ဤလူသည် လွန်ခဲ့သော ဆယ်နှစ်ကျော်က ဤနေရာသို့ ရောက်လာဖူးပြီး အကြီးအကျယ် ပြဿနာရှာသွားခဲ့သည်။ ဝေ့သခင်မအိုကြီးသည် ဤအမုန်းတရားများကို အမြဲအမှတ်ရနေသည်။ သူ ထပ်လာလိမ့်မယ်လို့ တစ်ခါမှ မတွေးဖူးဘူး!

ထို့အပြင် ဤလူသည် လွန်ခဲ့သော ဆယ်နှစ်ကျော်၌ စေလွှတ်ခံရခါစသာ ဖြစ်သော်လည်း ကောင်တီအောက်ရုံးတရားသူကြီးတစ်ဦး ဖြစ်လာသည်။ ယခုမူ...

ကောင်တီတရားသူကြီးကျူးက ဒီလူနောက်မှာ တကယ်ကြီး ကျန်ခဲ့တယ်!

သူတို့... ပြောတော့ ဒီလူက အရာရှိရာထူးကနေ အဖယ်ခံလိုက်ရပြီလို့မလား? ဒါဆို ဘာလို့ သူက ဒီမှာ ပေါ်လာတာလဲ?

ဝေ့သခင်မအိုကြီးသည် မျက်နှာဖြူသွားပြီး လွန်ခဲ့သော ရက်အနည်းငယ်က ဤလူထံမှ စာတစ်စောင် ရောက်လာကြောင်း ရုတ်တရက် သတိရသွားသည်။

သူ(မ)သည် စာမဖတ်တတ်ဘဲ ဤလူနှင့်လည်း စကားမပြောချင်သဖြင့် စာကို မီးရှို့ပစ်လိုက်သည်။ ယခု...

ဝေ့သခင်မသည် ကျိုးစုန်ကို မြင်သောအခါ သူ(မ)၏မျက်နှာကလည်း ဖြူဖျော့သွား၏။

ကျိုးစုန်သည် ဝေ့သခင်မအိုကြီးကို ကြည့်ပြီး ခပ်တိုးတိုး နှာမှုတ်လိူက်သည်။

ယန်ကျင်းဇီသည် ဝေ့သခင်မ၏မျက်နှာဟာ စိမ်းသွားရုံတင်မကဘဲ တိုက်ရိုက်ပင် မည်းသွားသေးသည်ကို ဆက်တိုက်တွေ့လိုက်ရသည်။ ယင်းကား ထူးထူးဆန်းဆန်း စိတ်ဝင်စားစရာကောင်းသည်။

ပိုစိတ်ဝင်စားဖို့ကောင်းသည်မှာ ကျိုးစုန်က သူ၏ ကိုယ်ပိုင်အထောက်အထားကို ရှင်းပြသောအခါ ဝေ့မိသားစု၏ အကြီးအကဲတို့အပြင် အဘွားကြီးကပါ သူကို ပြုံးလျက် ကြိုဆိုရခြင်းဖြစ်သည်။

သေချာတာပေါ့၊ ဝေ့သခင်မ၏ အပြုံးမျက်နှာက... ရွဲ့စောင်းလုမတတ်ပင်။

ဝေ့သခင်မအိုကြီး စိုးရိမ်ပူ‌ပန်နေစဉ် လူတစ်ယောက် ထပ်ရောက်လာပြန်ပြီး ဤတစ်ကြိမ်မှာ ရောက်လာသူက ဝေ့ကျီယွမ် ဖြစ်သည်။

ဝေ့ကျီယွမ်သည် ဖူချန်တွင် စာသင်ကြားနေသည်။ သူသည် လှေဖြင့် အိမ်ပြန်လျှင်ပင် အချိန်အတော်ကြာပြီး အသွားအပြန်လုပ်လျှင် ပို၍အချိန်ကြာသည်။ ထို့ကြောင့် သူ အသွားအပြန် ပြန်လာရန်မှာ အလွန်ပင် အဆင်မပြေဖြစ်ပြီး သူက သိပ်မပြန်လာတော့ပေ။

ဤအချိန်တွင် သူသည် ကျိုးစုန်၏ကိစ္စကြောင့် ပြန်လာခဲ့သည်။

ဝေ့လင်းရှိူ့ စာမေးပွဲအောင်မြင်ခဲ့ချိန်တွင် သူ့ပတ်ဝန်းကျင်မှ လူတိုင်းက သူ့ကို ဂုဏ်ပြုကြသည်။ ဝေ့လင်းရှိူ့နှင့် ယန်ကျင်းဇီတို့က မိတ်ဆွေကောင်းများ ဖြစ်ကြသည်ကို လူအချို့က ကြားလာပြီး သူ့အား ယန်ကျင်းဇီ၏ လက်ရေးလှ တောင်းပေးရန်လည်း မေးကြသည်...

သူသည် ဤလူများကြောင့် စိတ်ဆိုးရပြီး အိမ်ပြန်ချင်ခဲ့သည်။ မတော်တဆ သတင်းတစ်ခု သိလိုက်ရပြီးနောက် သူသည် ပို၍ပင် တုန်လှုပ်သွားရကာ အိမ်သို့ ချက်ချင်း အမြန်ပြန်လာသည် – ကျိုးစုန်က အနီးအနားရှိ နန်ကျိုးစီရင်စု၏ အကယ်ဒမီ အထူးတာဝန်ရှိသူ ဖြစ်ကြောင်း သူ သိလိုက်ရသည်။

လက်ရှိမင်းဧကရာဇ်သည် အကယ်ဒမီ၏ အထူးတာဝန်ရှိသူများကို ဇူလိုင်လနှင့် ဩဂုတ်လများတွင် မကြာခဏ ခန့်အပ်လေ့ရှိသည်။ ထို့နောက် အကယ်ဒမီ၏ အထူးတာဝန်ရှိသူက သက်ဆိုင်ရာစီရင်စုသို့ ချက်ချင်း သွားပြီး ကျောင်းစာမေးပွဲများကို ဦးစီးသည်။

သူသည် သူတို့စီရင်စု၏ အကယ်ဒမီ အထူးတာဝန်ရှိသူက မည်သူဖြစ်ကြောင်း သိရှိပြီးဖြစ်သော်ငြား ဘေးစီရင်စု၏ အကယ်ဒမီ အထူးတာဝန်ရှိသူကိုတော့ မသိသေးပေ။ ထိုအကယ်ဒမီ အထူးတာဝန်ရှိသူများက သူ့ကို မအုပ်ချုပ်သောကြောင့် သူ သိစရာ မလိုခဲ့ချေ။

ဒါပေမယ့် နန်ကျိုးစီရင်စုရဲ့ အကယ်ဒမီ အထူးတာဝန်ရှိသူက တကယ်ပဲ ကျိုးစုန်တဲ့လား?

ကျိုးမိသားစု တစ်ခုခုဖြစ်သွားပြီမလား? ဘယ်လိုလုပ်ပြီး ကျိုးစုန်က အကယ်ဒမီ အထူးတာဝန်ရှိသူ ဖြစ်လာတာလဲ? သူက မြို့တော်ကနေတောင် ထွက်လာနိုင်တာလား?

ဝေ့ကျီယွမ်သည် အံ့အားသင့်နေပြီး အိမ်အမြန်ပြန်သွားသည်။ အိမ်ပြန်ရောက်ရောက်ချင်း သူသည် ကျိုးစုန်ကို တွေ့လိုက်ရပြီး ချက်ချင်းပင် ရပ်ဆိုင်းသွားကာ တုန်ယင်နေသည်။

အိုကေ၊ လူတိုင်း ငါတို့အကုန်လုံး ဒီမှာ ရောက်နေကြပြီ။

ယန်ကျင်းဇီသည် ယခင်က အရာရှိများစွာနှင့် အဆက်အသွယ်လုပ်ဖူးခဲ့သော်ငြား သူတို့နှင့် စာပေလေ့လာခြင်း၊ လက်ရေးလှရေးသားခြင်းတို့ အကြောင်းများကိုသာ ဆွေးနွေးဖူးပြီး အခြားအရာများအကြောင်းကို တစ်ခါမှ မပြောဖူးခဲ့ပေ။ ယနေ့ ကျိုးစုန်၏နောက်သို့ လိုက်ပါခြင်းအားဖြင့် သူသည် အရာရှိတစ်ဦး ဖြစ်ရခြင်းမှာ တကယ် မလွယ်ကြောင်း သိလိုက်ရသည်။

ဒါပေါ့၊ သူ့အတွက် မခက်ပါဘူး။

ထို့အပြင် သူသည် အာဏာရှိနေသော ဤခံစားချက်မျိုးကို သဘောကျသည်။

ယန်ကျင်းဇီနှင့် ဝေ့လင်းရှိူ့တို့ နှစ်ဦးစလုံးဟာ Xiucai များသာ ဖြစ်ကြပြီး ဝေ့မိသားစုကို လုံးဝ မဖိနှိပ်နိုင်သော်ငြား ကျိုးစုန်ကမူ ကွဲပြားသည်။ သူသည် တိုက်ပွဲကိုပင် နှိမ်နင်းခဲ့ပြီး ဝေ့မိသားစုကို လုံးဝဥဿုံ ဖိနှိပ်ပစ်လိုက်သည်။ ဝေ့လင်းရှိူ့၏မွေးစားခြင်းကိစ္စကို အလျင်အမြန် ညှိနှိုင်းလိုက်နိုင်သည်။

ဤကာလတွင် အမျိုးသမီး၏ ခန်းဝင်ပစ္စည်းသည် အမျိုးသမီးနှင့် သက်ဆိုင်သည် ဟူသော စည်းမျဉ်းများ ရှိနေပြီး ခင်ပွန်းဖြစ်သူ၏ မိသားစုသည် အမျိုးသမီး၏ သဘောတူညီချက် မရှိဘဲ အသုံးမပြုနိုင်ချေ။ သူတို့ ကွဲကွာလျှင်လည်း ခန်းဝင်ပစ္စည်းကို အမျိုးသမီးကသာ ပိုင်ဆိုင်သည်။

သို့သော် အမျိုးသမီး သေဆုံးသွားလျှင်မူ သူ(မ)၏ မူလမိသားစုက ခန်းဝင်ပစ္စည်းကို ပြန်မတောင်းနိုင်ချေ။ ဇနီးဖြစ်သူ ဆုံးပါးသွားလျှင်ပင် အားလုံးသော ပိုင်ဆိုင်မှုများနှင့် အစေခံများကို ဇနီးဖြစ်သူ၏ မူလမိသားစုက ပြန်လည်မရရှိနိုင်ကြောင်း ဥပဒေက ရှင်းရှင်းလင်းလင်း ပြဋ္ဌာန်းထားသည်။

ဤသို့ဆိုလျှင်တောင်မှ စည်းမျဉ်းများ ရှိနေသေးပြီး ၎င်းမှာ အမျိုးသမီးတစ်ဦး၏ ခန်းဝင်ပစ္စည်းကို သူ(မ)၏ သားသမီးများ သို့မဟုတ် သူ(မ) ရွေးချယ်ထားသော အမွေဆက်ခံသူများကသာ အမွေဆက်ခံရမည် ဟူ၍ ဖြစ်သည်။

ဝေ့မိသားစုက ဝေ့လင်းရှိူ့မိခင်၏ ခန်းဝင်ပစ္စည်းများကို သုံးစွဲထားရာ ကျိုးစုန်က ၎င်းကိုလည်း လက်ကိုင်ထားခဲ့သည်။

အမှန်ပင်၊ အရေးကြီးဆုံးမှာ ကျိုးစုန်၏ အင်အားနှင့်

လုပ်ပိုင်ခွင့်အာဏာတို့ ဖြစ်၏။

ယန်ကျင်းဇီသည် ဝေ့မိသားစုအတွက် အရမ်းသက်သာလွန်းသည်ဟု အမှန်တကယ်ပင် ခံစားမိသော်ငြား ဤအခိုက်အတန့်တွင် သူသည် အလွန်အကျွံ မလုပ်နိုင်ပေ... ဝေ့မိသားစု ကံဆိုးအောင် သူ လုပ်ချင်လျှင် သူကိုယ်တိုင် ပိုမိုသန်မာလာခြင်းကသာ ပိုကောင်းသည်။