အပိုင်း ၉

Chapter 9

"ဦးဦးက သမီးကို အမြဲတမ်း ပန်းကန်တွေခွဲစေချင်နေတာ.... သမီး အဲ့လိုထပ်လုပ်မှာ မဟုတ်တော့ဘူး..."

ကျန်းရှောင်မန် ဆုံးဖြတ်ချက်ချလိုက်သည်။

"..."

စနစ်ကလေးခင်ဗျာ တိတ်ဆိတ်သွားရရှာသည်။

အဲ့တာလေးကပဲ သူ့နှလုံးသားလေးရဲ့ ဖြေသိမ့်ရာလေးတစ်ခုလေးဖြစ်၍ ထိုသည်ကို ဆုံးရှုံးရ၍ ဝမ်းနည်းရမည်လား သူ့ပိုက်ဆံအိတ်လေး လုံခြုံသွား၍ စိတ်သက်သာရာရရမည်လား မသိတော့ပေ။

သို့သော် သေချာတွေးကြည့်သောအခါတွင်လည်း မှန်မနေသလို ခံစားနေရပြန်သည်။

သူ ဗီလိန်လေးကို သေချာပျိုးထောင်ပေးရန် ဆုံးဖြတ်လိုက်တော့သည်။

စနစ်က ကြုံခဲ့ရသည့် ခါးသီးလှသော အတွေ့အကြုံများမှ သင်ယူခဲ့လိုက်ရသည်မှာ အခုကစပြီးသူ ခက်ခဲတော့မည်ဖြစ်ပြီး ကျန်းရှောင်မန်ကို လမ်းလွဲစေရန် ပြုလုပ်ရသည်မှာ မလွယ်တော့မည် ဖြစ်ကြောင်း သိလိုက်ရသည်။

သို့သော် အရာအားလုံးတွင် သတ်မှတ်ချက်ရှိနေသည်။ ထိုသည်ကား ကျန်းရှောင်မန် အမှတ်အကြွေးများ အကုန်ပြန်ပေးသည်အထိ စောင့်ရန်ဖြစ်သည်။

_

စနစ်က ကျန်းရှောင်မန်ကို ဘွားဘွားနှင့် ဦးလေးတို့ ပြန်လာမည့် နေ့ကို သတိပေးလိုက်သည်။ နှစ်ရက်အကြာတွင် ကျန်းရှောင်မန်က လမ်းဘေးတွင် ထိုင်ခုံသေးသေးလေးချ၍ သူတို့ပြန်အလာကို ထိုင်စောင့်နေသည်။

ဤနည်းဖြင့် ဘွားဘွားနှင့်ဦးလေးတို့ ပြန်ရောက်ရောက်ချင်း သူမကို မြင်နိုင်မည်ဖြစ်သည်။

သူမလက်ထဲတွင် ချိုချဉ်များပါသော သံသေတ္တာလေးကို ကိုင်ထားသည်။ အထဲတွင် သူမ သေသေချာချာစုဆောင်းထားသော ချိုချဉ်ကိုးခု ကျန်သေးပေသည်။

အတိတ်တုန်းက ဦးလေး အိမ်သို့ ပြန်လာသည့်အချိန်တိုင်း သူမအတွက် အရသာရှိသည့်အရာမျိုးစုံကို ယူလာသည်နှင့် သူမဒေါသပြေသွားလေ့ရှိသည်။ သူမ ဦးလေးဘက်မှနေ၍ ခုခံကာကွယ်ပေးကာ ဘွားဘွားထံမှ အရိုက်မခံရအောင် ကူညီပေးလေ့ရှိသည်။

စနစ်က ၎င်းကို 'တစ်စုံတစ်ယောက်ရဲ့ အစားအသောက်ကိုယူရင် မင်းရဲ့ပါးစပ်က နူးညံ့သွားတတ်တယ်'(1) နှင့် 'တစ်စုံတစ်ယောက်ဆီက လက်ဆောင်ယူရင် မင်းရဲ့လက် တိုသွားတတ်တယ်'(1)ဟု ခေါ်ကြောင်း ပြောပြခဲ့သည်။ သူမ ဦးလေးဆီမျှ ပစ္စည်းများကိုယူလျှင် သူမက သူ့ကို ပြန်ကူညီပေးရမည်ဖြစ်သည်။

သူမ၏ဦးလေးကို သူမ၏ ရတနာလေးများကို ပေးလျှင် သူကလည်း သူမပြောသည်ကို နားထောင်ပေလိမ့်မည်။

ကျန်းရှောင်မန်က သံသေတ္တာလေးကို ဖွင့်ပြီး အထဲတွင် ချိုချဉ်ကိုးခုအတိအကျရှိသလား ထပ်ကာ ထပ်ကာ ရေတွက်ကြည့်လေသည်။ 

ကိုးခု... ဒါဆိုရင် ဦးလေးကို ကိုးရက်လောက် စကားနားထောင်အောင် လုပ်လို့ရလောက်တယ်မလား....

ထိုကိုးရက်တွင် သူမက နောက်ထပ် ဖြေရှင်းနည်းတစ်ခုကို တွေးမည်ဖြစ်သည်။

ကျန်းရှောင်မန် စိတ်ကျေနပ်စွာဖြင့် သေတ္တာလေးကို ပိတ်တော့မည့် အချိန်တွင် သူမ၏ ဆံပင်နှစ်ဖက်ကို အနောက်မှ ဆောင့်ဆွဲခံရ၍ နာကျင်သွားပေသည်။

လည်ပင်ကိုချိုး၍ရသလို သွေးကိုဖောက်ထုတ်၍ရသော်လည်း သူမ၏ ကြက်တောင်စည်းနှစ်ဖက်ကသာ မထိရမည့် တစ်ခုတည်းသော အရာဖြစ်သည်။

အဘွားမှလွဲ၍ သူမ၏ခေါင်းကို မည်သူ့ကိုမှ ထိခွင့်မပေးထားပေ။ ဦးလေးကိုတောင် ထိခွင့်မပေးပေ။ သူမ၏ဦးလေးက သူမ၏ ကြက်တောင်စည်းနှစ်ဖက်ကို ဖွလျှင် သူမစိတ်ဆိုးပြီး သူ့ကို တစ်နေကုန်စကားမပြောတော့ပေ။

ယခုတွင် သူမ၏ ကြက်တောင်စည်းနှစ်ဖက်ကို ဆွဲနေသည့် လူမှာ အားအများကြီးထည့်ထား၍ သူမနာကျင်နေလေသည်။

ကျန်းရှောင်မန်၏ စပျစ်သီးကဲ့သို့ ဝန်းဝိုင်းလှသည့် မျက်လုံးလေးများက ဒေါသကြောင့် ပြူးကျယ်လာသည်။ သူမဒေါသထွက်ထွက်ဖြင့် လှည့်ကြည့်လိုက်သောအခါ ခပ်ဝဝကောင်ကလေးက သူမ၏ ကြက်တောင်စည်းလေးများကို ဆွဲနေကြောင်း တွေ့လိုက်ရသည်။

"လွှတ်ပေး...."

ကျန်းရှောင်မန် သူမ၏ ကြက်တောင်စည်းလေးများကို လက်တစ်ဖက်ဖြင့် ကာပြီး ဒေါသတကြီးအော်လိုက်သည်။

"နင်ငါ့ကို အနိုင်ကျင့်ရင့် အဘွားနဲ့ တိုင်ပြောမှာနော်...."

သူက ကလေးများထဲတွင် ဘုရင်ဖြစ်ပြီး သူတို့ထဲတွင် အသန်မာဆုံးဖြစ်သည်။ သူက နေ့တိုင်း လျှောက်ပတ်သွားပြီး ဗရုတ်သုတ်ခများ လုပ်လေ့ရှိသည်။ ကျန်းရှောင်မန်က သူနှင့် ကစားရတာမကြိုက်သလို သူတို့နှစ်ယောက်လုံးက ဆီနှင်ရေလို ပေါင်းစပ်၍မရပေ။ သူတို့နှစ်ယောက်ဆုံတိုင်း သူက သူမကို ဝက်နှာခေါင်းလို ပုံစံလုပ်ပြပြီး သူမကလည်း သူ့ကို လျှာထုတ်ပြောင်လေ့ရှိသည်။ သူတို့နှစ်ယောက်လုံးက တစ်ယောက်နှင့်တစ်ယောက် မကြိုက်ကြပေ။

ကျိုးဟိုင်ယန်က အမှတ်သညာမရှိသေးသော အရွယ်ဖြစ်သည်။ သူ သူ၏မိဘများပြောသည်ကို ကြားဖူးသော်လည်း အဓိပ္ပါယ်ကို တစ်ဝက်တစ်ပျက်မျှသာ နားလည်သော စကားလုံးများဖြင့် ကျန်းရှောင်မန်ကို လှောင်ပြောင်လေသည်။

"ငါ့အမေကပြောတယ် နင့်ဦးလေးက ပြန်မလာတော့ဘူးတဲ့... နင်က အခုကစပြီး ဘယ်သူမှ မလိုချင်တဲ့ ကလေးတစ်ယောက် ဖြစ်လာတော့မှာ...."

"မဟုတ်ဘူး... နင်လိမ်ပြောနေတာ... ဘွားဘွားက သူဒီနေ့ ပြန်လာမှာလို့ ပြောတယ်...."

ကျန်းရှောင်မန် ဒေါသထွက်သွားရသည်။

"သူက နင့်ကိုညာပြောနေတာ...."

ကျိုးဟိုင်ယန် ဆက်ပြောလေသည်။

"ငါ့အမေကပြောတယ် နင်က တံမြက်စည်းကြယ်(2)တဲ့ ပြီးတော့ နင်က ငွေကုန်စေတဲ့ ပစ္စည်းတစ်ခုပဲတဲ့(3)... နင့်အဘွားက နင့်ကို ထပ်မလိုချင်တော့ဘူးလေ....."

တံမြက်စည်းကြယ်ဆိုသည်ပဲဖြစ်ဖြစ် ငွေကုန်စေတဲ့ ပစ္စည်းဆိုသည်ပဲ ဖြစ်ဖြစ် အကုန်လုံးက ဆဲရေးသည့် စကားလုံးပင်ဖြစ်သည်။ ကျန်းရှောင်မန်က မဆဲတတ်သော်လည်း ထိုစကားလုံးတိုင်းကို ကြားဖူးလေသည်။ ထိုစကားများက ဘာကိုဆိုလိုသလဲ မသိသော်လည်း ကောင်းသည့်အရာ မဟုတ်ကြောင်းတော့ သိပေသည်။

သူမ မျက်လုံးများ နီရဲလာပြီး အတော်လေး မတရားခံရသလို ခံစားနေရသည်။

ထိုအချိန်တွင် စနစ်၏ အသံက ရုတ်တရက်ထွက်ပေါ်လာသည်။ ၎င်း၏ အသံက ရွေ့လျားနေသည့် ရတနာတုံးကြီးကို တွေ့လိုက်ရသလို စိတ်လှုပ်ရှားနေပေသည်။

"ပိုင်ရှင် သူ့ကို သင်ခန်းစာ ပေးပစ်လိုက်....."

[တာဝန် : ကျိုးဟယ့်ယန်ကို ငိုသည်အထိအနိုင် ကျင့်ပါ... ဆုလဒ် : ဆယ်မှတ်]

ကျန်းရှောင်မန်က မလှုပ်ရှားသေးပေ။  ထို့ကြောင့် စနစ်က သူမကို ဆက်တိုက် တိုက်တွန်းနေသည်။

"မြင်းကောင်းတစ်ကောင်က အခြားလူတွေ အစီးခံရသလို လူကောင်းတစ်ယောက်ကလည်း အနိုင်ကျင့်ခံရတယ်(4)... မင်း စိတ်မတိုဘူးလား... သူ့ကို မရိုက်ပစ်ချင်ဘူးလား... မင်းက အနာဂတ်မှာ ဗီလိန်အကြီးစားဖြစ်လာမှာနော်... သူက ဗီလိန်လေးပဲရှိသေးတာ... ဗီလိန်ကြီးက ဗီလိန်လေးကို သင်ခန်းစာပေးတာမျိုးက လုပ်သင့်တဲ့ အရာပဲလေ...."

T/N -

1. 'တစ်စုံတစ်ယောက်ရဲ့ အစားအသောက်ကိုယူရင် မင်းရဲ့ပါးစပ်က နူးညံ့သွားတတ်တယ်' နဲ့ 'တစ်စုံတစ်ယောက်ဆီက လက်ဆောင်ယူရင် မင်းရဲ့လက် တိုသွားတတ်တယ်' ဆိုတာက တစ်ယောက်ယောက်ဆီက ပစ္စည်းတစ်ခုခုယူရင် သူတို့အပေါ် ပြန်ကောင်းပေးရတာ ကူညီပေးရတာကို ဆိုလိုတာပါ

2. တံမြက်စည်းကြယ်ဆိုတာက ကံမကောင်းတဲ့ကြယ်ကို ပြောတာပါ

3. ငွေကုန်စေတဲ့ ပစ္စည်းဆိုတာက မိန်းကလေးတစ်ယောက်ကို နှိမ့်ချပြီးပြောတာပါ.. ရှေးခတ်တုန်းက သမီးတစ်ယောက်က အဝေးကို လက်ထပ်ပြီး ပြောင်းသွားခဲ့ရင် သတို့သမီးဘက်က အသွင်းပစ္စည်းပေးရတာကြောင့် ငွေကုန်စေတဲ့ပစ္စည်းဆိုပြီး နှိမ်ချပြောဆိုတာမျိုးပါ

4. တရုတ်ဘာသာစကားမှာဆိုရင် အစီးခံရတာနဲ့ အနိုင်ကျင့်ခံရတာဟာ သံတူကြောင်းကွဲတွေမလို့ပါ..

T/N တွေအကုန်လုံးက E tranထဲကအတိုင်း တိုက်ရိုက်ပြန်ထားတာပါ တကယ့် အဓိပ္ပါယ်အစစ်တွေကို ထိခိုက်လိုခြင်း မရှိပါ..

 မှားယွင်းနေသည်ကို တွေ့ပါက ပြောပေးပါ ပြင်ပေးပါ့မယ်