MM Story Teller

Chapter 41

Viewers 2k

📽️ Chapter 41

"ငါတို့ သူ့ဆီကနေ သဲလွန်စရပြီးသွားပြီ...အများကြီးသိလိုက်ရတယ်လေ ..အဲ့ကြောင့် 'အိုးထဲကလိပ်' ဖမ်းဖို့ ဒီမှာစောင့်နေတာ..."

သူ အနိုင်ရသွားသည့်အလား ထိုအကြောင်းပြောနေချိန်တွင် စိတ်လှုပ်ရှားမှုနှင့် ကလိုက်သေးသည်။

ဆွေ့ဟို့ယွီက အခြားသဲလွန်စများကို တိတ်တိတ်လေးရှာဖွေခဲ့ပြီး သူတို့နှစ်ယောက်ကသာ သူ့ပါးစပ်ထဲက လိပ်များ ဖြစ်သည့်အကြောင်းကို သူ့အား အမှတ်မရစေချင်ပေ။

ဤနေရာ၌ မည်သည့် သဲလွန်စမှ မကျန်တော့သည်ကို ရန်ရှူ သေချာအောင်လုပ်ပြီးနောက်တွင် သူ့လှုပ်ရှားမှုများက များစွာပို၍ ပေါ့ပါးသွက်လက်လာခဲ့သည်။ သဲလွန်စများ ရှာရန်အတွက် သေတ္တာများဆင့်ထားသော သေတ္တာပုံးကြီးပေါ်ပင် တက်လိုက်သေးသည်။

လျို့ရွှမ်းက လိုက်တက်လာပြီး သူ့အားကူညီကာ သေတ္တာတစ်ခုကိုပင် ကူကိုင်လိုက်သေးသည်။

" ကျွန်တော်ဒီတစ်လုံး ကိုင်ထားလိုက်မယ် အစ်ကိုရန်ဝင်သွားလိုက်..."

မဝဝေးလှသောသောနေရာတွင် ရှာဖွေနေသည့် ဆွေ့ဟို့ယွီက အနီးအနားမှ အသံတစ်သံ ကြားလိုက်ရသည်။ သူခြေလှမ်းအနည်းငယ် ပြန်ဆုတ်လိုက်ပြီးနောက် ချက်ချင်းပင် ရန်ရှူအား အော်ခေါ်လိုက်သည်။

"ရန်ရှူ..."

"အာ..."

ရန်ရှူက ရှာနေသည်ကို ရပ်ကာ ဆွေ့ဟို့ယွီအား လှည့်ကြည့်လိုက်သည်။

"ငါ့ကို လက်တစ်ဖက်ကမ်းလိုက်.."

"ကျွန်တော်လာပြီ..."

တွယ်တက်ရာတွင် ကျွမ်းကျင်သည့် မျောက်တစ်ကောင်အလား ရန်ရှူက ပျော့ပြောင်းသွက်လက်စွာပင် ခုန်ဆင်းလိုက်သည်။

လျို့ရွှမ်းက တစ်ချက်ကြည့်လိုက်ပြီး ထိုနေရာမှာပင် တစ်ယောက်တည်း ဆက်နေကာ ဆက်လက်ရှာဖွေလိုက်သည်။

ရန်ရှူ ခုန်ဆင်းလိုက်ပြီးနောက် ဆွေ့ဟို့ယွီက ဂိုဒေါင်၏ ထောင့်တစ်နေရာကနေ တိပ်ကြိုးတစ်လိပ်ကို ရှာတွေ့သွားသည်ကို မြင်လိုက်ရသည်။ သူက တိပ်ကြိုးကို ဖြဲကာ လျို့ရွှမ်းထံလျှောက်သွားပြီး အချက်ပြလိုက်သည်။

"ဒီကိုလာ..."

လျို့ရွှမ်းက ချက်ချင်းနားလည်လိုက်သည်။ သူ ပူးပေါင်းပေးရန် လျှောက်သွားကာ သူ့အင်္ကျီ၏ပေါက်ပြဲနေသည့် နေရာများကို ဆွေ့ဟို့ယွီအား တိပ်ဖြင့်ကပ်ခွင့် ပြုလိုက်သည်။

ဒုတိယနနေရမှ ထွက်လာပြီးနောက် ပစ္စည်းကိရိယာများကို ပြင်ဆင်ချိန်ညှိရန် ရန်ရှူနှင့် ဆွေ့ဟို့ယွီက ဘေးဘက်သို့ သွားလိုက်သည်။

ဤအခိုက်အတန့်ကို မှတ်တမ်းယူနေသည့် မည်သည့်ကိရိယာမှ မရှိသည်ကို အတည်ပြုပြီးနောက် ရန်ရှူကအသံနိမ့်နိမ့်ဖြင့် မေးလိုက်သည်။

"အစ်ကိုယွီ...အစ်ကိုရော လျို့ရွှမ်းကို သဘောမကျဘူးလား..."

"မင်းယောကျ်ားသာ ဒါကိုမြင်သွားရင် မင်းနောက်ထပ် IV တစ်ပုလင်းချိတ်ရဖို့ လိုမှာကို ငါကြောက်သား..."

ရန်ရှူ တုန်လှုပ်ချောက်ချားသွားကာ မြန်မြန်ဆန်ဆန် မေးလိုက်သည်။

"စန့်ရှန်းက လျို့ရွှမ်းကို မကြိုက်မှန်း အစ်ကို ဘယ်လိုသိတာလဲ..."

"မင်းကို စိတ်ဝင်စားနေတဲ့ ယောကျ်ားတစ်ယောက်ကို သူက ဘယ်လိုလုပ်ပြီး သဘောကျပါ့မလဲ..."

"ဟမ်...လျို့ရွှမ်းက ကျွန်တော့်ကို စိတ်ဝင်စားနေတာလား..."

"..."

ဆွေ့ဟို့ယွီ ရန်ရှူကို ပြောစရာစကားမဲ့စွာ တခဏမျှ ကြည့်နေလိုက်သည်။

"လွန်ခဲ့တဲ့ ရက်ပိုင်းလောက်ကပဲ မင်းရဲ့ ပထမဆုံး အပိုင်းနှစ်ခုကို သူဖန်တီးခဲ့တာလေ..."

"အဲ့လိုဆို မဖြစ်သင့်ဘူးလေ...တည်းဖြတ်ပြီးသွားတဲ့ ပိုစိတ်ဝင်စားဖို့ ကောင်းတဲ့ အပိုင်းလေးတွေကိုပဲ အစ်ကိုကြည့်သင့်တာ...ကျွန်တော်က အဖြစ်အပျက်တစ်လျှောက်လုံးပါထားခဲ့တာ...အဲဒါက ဘာမှမဟုတ်ပါဘူး..."

ရန်ရှူက ပဟေဠိဖြစ်နေပုံပေါ်သည်။

ဆွေ့ဟို့ယွီက ပစ္စည်းကိရိယာများကို ဆက်လက် ပြင်ဆင်ချိန်ညှိနေလိုက်ပြီး မည်သည်ကိုမှ ထပ်မံ မပြောချင်တော့ပေ။

ရန်ရှူက လက်မလျှော့ဘဲ ဆက်လက်မေးမြန်းလိုက်သည်။

"အစ်ကိုယွီ...အစ်ကို CP ပရိသတ်တွေ သီချင်းတွေနဲ့

တည်းဖြတ်ထားတဲ့ အနှေးပြကွက်လို ဗီဒီယိုတွေ ကြည့်ဖူးလား...သူတို့က ဘယ်ဟာမဆို ဖြတ်ညှပ်ကပ်လုပ်နိုင်တယ်ရယ်...ကျွန်တော်တို့က သေချာပေါက် လုံးဝ မတူတဲ့ ဘရန်းနှစ်ခုကို ဝတ်ခဲ့တာ ဒါပေမဲ့အရောင်လေးပဲ နည်းနည်းတူတာ ..အဲ့တာကို သူတို့က စုံတွဲဝတ်စုံတဲ့လေ..."

"ရန်ရှူ..."

ဆွေ့ဟို့ယွီက ပဟေဠိဖြစ်စွာ မေးလိုက်သည်။

"စန့်ရှန်းက မင်းကိုကြိုက်နေတာမှန်း မင်းဘယ်လိုသိသွားတာလဲ..."

"သူကျွန်တော့်ကို နမ်းခဲ့တာ..."

"အဲ့အရင်ကရော မင်းဘယ်လိုထင်လဲ...သူမင်းကို ကြိုက်တယ်လို့ ထင်လား..."

ရန်ရှူ ဂရုတစိုက် တွေးကြည့်လိုက်သည်။ သူတို့ ရုတ်ရက်ကြီး မနမ်းလိုက်မီကအထိ ဤအကြောင်းကို သူ မတွေးဖူးခဲ့ချေ။ စန့်ရှန်းက အလွန်နှစ်လိုဖွယ်ကောင်းသည့် လူတစ်ယောက်ဖြစ်ပြီး ယခင်ကခန့် စိတ်အနှောင့်အယှက် ဖြစ်စရာမကောင်းတော့ဟုသာ သူတွေးခဲ့သည်။

ရန်ရှူ ဤမေးခွန်းကြောင့် အံ့အားသင့်သွားပြီး ဤနေရာ၌ သူ မတော်ကြောင်းကို အဆုံးတွင် သူ နားလည်သွားသည်။

သူ ကြိုးကြိုးစားစား ဆက်လက်စဥ်းစားလိုက်ပြီးနောက် ဤကဲ့သို့ အဖြေရလိုက်သည်။

"ဒါဆို သေချာပေါက် လျို့ရွှမ်းက အရူးတစ်ယောက်ပဲ....သူက ကျွန်တော့်ကို ကြိုက်နေပြီး ကျွန်တော် သူ့ကို ဒီလိုမျိုးမုန်းသွားအောင် သူ လုပ်နိုင်တယ်လေ...သူ ပါရမီရှင်တစ်ယောက်ဖြစ်နေတာကိုတော့ ထည့်မပြောနဲ့ဦး..."

ဆွေ့ဟို့ယွီက ရန်ရှူနှင့်စန့်ရှန်း၏ကိစ္စရပ်များနှင့် ပတ်သတ်ပြီး အမှန်တကယ် ဂရုစိုက်သည်မှာ ရှားလှပေ၏။

ဤတစ်ကြိမ်က အမှန်တကယ်ရှားပါးလှသည့် အံ့သြစရာတစ်ခုပင် ဖြစ်ပေ၏။

သူ ဖျောင်းဖျလိုက်သည်။

"စန့်ရှန်းက အခုမင်းရဲ့သူဌေးဖြစ်နေပြီလေ...သူသာ မနာလို သဝန်တိုပြီး မင်းကို ဒီရှိုးကနေထွက်အောင်လုပ်ပြီး မင်းရဲ့အသက်မွေးဝမ်းကြောင်းလုပ်ငန်းကို နှောင့်ယှက်လိုက်ရင် အရေးမပါတာလေးကြောင့် လမ်းခွဲရသလို ဖြစ်သွားလိမ့်မယ်...အဲ့ကြောင့် စိတ်ပိုင်းဆိုင်ရာ ပြဿနာရှိနေတဲ့ အဲ့လူကို သွားရန်စမနေနဲ့ နားလည်ပြီလား..."

စန့်ရှန်းက အဆင်ပြေနေပုံ ပေါ်သော်ငြား အဆုံးတွင်မူ သူက စိတ်ပိုင်းဆိုင်ရာပြဿနာရှိနေသည့် လူတစ်ယောက်ပင် ဖြစ်ပေသည်။

ထိုအချိန်က မိုးရွာသောနေ့တွင် ခွင့်မပြုဘဲ ပင်လယ်ပြင်သို့ထွက်ခဲ့ပြီး ဟို့မော့၏အဖေသေဆုံးမှုကို သွယ်ဝိုက်၍ ဖြစ်စေခဲ့သည့် စန့်ရှန်းက အပြစ်ရှိစိတ်ကြောင့် စိတ်ပိုင်းဆိုင်ရာပြဿနာများအထိ ဖြစ်ပေါ်လာခဲ့သည်။

အထက်တန်းကျောင်းတွင် စန့်ရှန်းက ဟို့မော့နှင့် အတန်းတူရန် ရည်ရွယ်ချက်ရှိရှိနှင့် အတန်းတစ်နှစ် အကျခံခဲ့ပေသည်။ ထိုမှသာ သူ့အပြစ်ရှိစိတ်ကို လျော့ချနိုင်ရန် ဟို့မော့ အပေါ်မျက်လုံးဒေါက်ထောက်ကြည့်ပြီး ဟို့မော့ အကူအညီ လိုအပ်လာလျှင်လည်း အကူအညီ ပေးအပ်နိုင်မည်ဖြစ်သည်။

အမှန်တကယ်တွင် ဟို့မော့က ၎င်းကို လုံးဝ မလိုအပ်ချေ။

စန့်ရှန်းက အပြစ်ရှိစိတ်ကို ဖြေဖျောက်ချင်သည်ကို ဟို့မော့ သိပေသည်။ အရာအားလုံးမှာ ကြင်နာမှုကိုပြသရန်ပင်ဖြစ်၏။ သို့သော် ထိုအစား ဤအတိုင်းအတာထိ သူတစ်ပါးအပေါ် သံသယလွန်ကဲလာမှုက ဟို့မော့အား ဝန်ထုတ်ဝန်ပိုး ဖြစ်စေခဲ့သည်။

သို့သော် ဟို့မော့က ကင်းကင်းနေရန် အမူအရာပြသလိုက်ပါက စန့်ရှန်း၏ရောဂါအား ပြန်ထလာစေပြီး ကိုယ့်ကိုကိုယ် နာကျင်အောင်လုပ်ခြင်း၊ သတ်သေသွားစေနိုင်သည်အထိ လှုံ့ဆော်မိသွားပေလိမ့်မည်ဖြစ်သည်။

ကျောင်းနှစ်ကျောင်းအား ပေါင်းပေးလိုက်၍သာမဟုတ်ပါက ရန်ရှူက စန့်ရှန်း၏အာရုံအား ပြောင်းသွားစေလိမ့်မည် မဟုတ်ချေ။ စန့်ရှန်းက ဆက်လက်ပြီး သံသယလွန်ကဲနေလိမ့်မည်သာ ဖြစ်သည်။

စန့်ရှန်း ယခင်ကလုပ်ခဲ့သည့် အပြုအမူများကြောင့် သူက အလွန်အမင်း ခက်ခဲသည့် လူတစ်ယောက် ဟူသည်ကို သက်သေပြနေလေသည်။

သူ၏စိတ်ပိုင်းဆိုင်ရာက အလွန်ဆတ်ဆတ်ထိမခံပေ။ ဒုက္ခရောက်နေသောအခြားသူများ၏ ခံစားချက်ကို ဂရုမစိုက်ဘဲ သူ့ကိုယ်ပိုင် ခေါင်းမာသော အတွေးအခေါ်များကိုသာ စွဲမြဲနေပေလိမ့်မည်။

ထို့ကြောင့် ထိုအချိန်က စန့်ရှန်းမှာ ဟို့မော့၏ အကြီးမားဆုံး ဝန်ထုပ်ဝန်ပိုးတစ်ခု ဖြစ်လာခဲ့သည်။

ရန်ရှူသာ သေသေချာချာ မကိုင်တွယ်နိုင်ပါက သူသည်လည်း စန့်ရှန်းထံကနေ ယုံမှားသံသယလွန်ကဲစွာ ဆက်ဆံခံရပေလိမ့်မည်။

ရန်ရှူ နောက်ဆုံးတွင် ဆွေဟို့ယွီ ဆိုလိုသည်ကိုနားလည်လိုက်ပြီး လေးလေးနက်နက်နှင့် ခေါင်းညိတ်ပြလိုက်သည်။

ကိရိယာများကို ပြင်ဆင်ပြီးနောက် ရန်ရှူ လေးလေးနက်နက် စဥ်းစားရင်းဖြင့် ဆွေ့ဟို့ယွီနောက်မှနေ၍ နောက်တစ်နေရာကို လိုက်သွားလိုက်သည်။

လမ်းတွင် လျို့ရွှမ်းတို့အသင်းက သူတို့နောက်လိုက်လာသည်ကို မြင်ကာ အရှိန်ပိုမြှင့်လိုက်သည်။

ရန်ရှူနှင့် ဆွေ့ဟို့ယွီက အချင်းချင်း မဆက်သွယ်ခဲ့ကြဘဲ ဖွင့်ဟပြောစရာမလိုသည့် အပြန်အလှန်နားလည်မှုဖြင့် အရှိန်ကို အတူတူမြှင့်လိုက်ကာ တဟုန်ထိုး ပြေးလွှားလိုက်သည်။

သူတို့သဘောထားကိုမြင်ပြီးနောက် လျို့ရွှမ်းနှင့်သူ့အသင်းသားများက ကမန်းကတန်း သူတို့နောက်နောက်ယောင်ခံလိုက်လာကြသည်။

မယုံနိုင်စရာကောင်းလောက်အောင်ပင် တာဝေးပြေးသမားများက လမ်းတွင် သူတို့နှစ်ယောက်အား အမှီလိုက်ရန် ကျရှုံးခဲ့လေသည်။

လေးယောက်က ဓာတ်လှေကားအတွင်းသို့ တစ်ယောက်ပြီးတစ်ယောက် ဝင်လာကာ ဆွေ့ဟို့ယွီက တိတ်တိတ်လေး ထွက်ရန် ရန်ရှူကို ဆွဲလိုက်သည်။

ဓါတ်လှေကားတံခါး ပိတ်တော့မည့်အချိန်မှာပင် သူတို့အမြန်ထွက်လိုက်ပြီး ခလုတ်ကို နှိပ်ချလိုက်သည်။

လျို့ရွှမ်းနှင့် သူ့အသင်းသားများက ဖောက်မြင်နေရသည့် ဓာတ်လှေကားအတွင်း ရပ်ကျန်နေခဲ့ကာ ရန်ရှူနှင့်ဆွေ့ဟို့ယွီတို့ ဓါတ်လှေကားကို ရှောင်ကွင်းပြီး ရိုးရိုးလှေကားထံ လျှောက်သွားနေသည်ကို အံ့သြမှင်တက်စွာ ကြည့်နေကြသည်။

ဓာတ်လှေကားတံခါးက မပွင့်သည့်အတွက် သူတို့အပြင်သို့ ထွက်မရဘဲ ဤနေရာတွင် ပိတ်မိနေကြပေသည်။

"ဒီမှာ စက်ပြင်ဆရာ တစ်ယောက် ရှိနေတာလား..."

တာဝေးပြေးသမားတစ်ယောက်က အံ့သြတကြီး မေးလိုက်သည်။

"ကြည့်ရတာ အဲဒါက ပြီးခဲ့တဲ့နေရာတုန်းက ဆွေ့ဟို့ယွီ ရှာတွေ့ခဲ့တဲ့ သဲလွန်စပဲ ဖြစ်လောက်တယ်..."

လျို့ရွှမ်း သက်ပြင်းမှုတ်ထုတ်လိုက်သည်။

"နောက်အဖွဲ့က သနားပြီး ငါတို့ကိုကယ်ပေးတာကိုစောင့်ရုံပဲ တတ်နိုင်တာပေါ့..."

လျို့ရွှမ်းက ဖောက်မြင်နေရသည့် မှန်ဓာတ်လှေကားတွင်းတွင်ရပ်ပြီး ဆွေ့ဟို့ယွီက ရန်ရှူအား သူနှင့်ဝေးရာခေါ်သွားသည်ကို ကြည့်နေသည်။

သူ့သူငယ်ချင်းတောင် မြင်နေတာကို ရန်ရှူ့ကိုယ်တိုင်က ဘာကြောင့် ငါ့ကိုလုံးဝနားမလည်ရတာလဲ...

(T/N - ဆွေ့ဟို့ယွီကတော့ လျို့ရွှမ်း ရန်ရှူကို ကြိုက်နေတာ သတိထားမိပေမယ့် ရန်ရှူကတော့ သူကြိုက်နေတာကို သတိမထားမိဘူးလို့ ပြောချင်တာပါ )

*****

တတိယနေရာတွင် ရန်ရှူနှင့်ဆွေ့ဟို့ယွီက သဲလွန်စအပိုင်းအစများကို စုဆောင်းပြီးသွားခဲ့သည်။ စတုတ္ထမြောက်နေရာသို့ သူတို့ရောက်သောအခါ ထိုနေရာတွင်စုဝေးနေကြသော မငြိမ်မသက်နှင့် ထကြွသောင်းကျန်းနေကြသည့် လူအုပ်စုကို မြင်လိုက်ရသည်။

တတိယနေရာအား ဆွေ့ဟို့ယွီနှင့်ရန်ရှူက ရှာဖွေစုဆောင်းပြီး သူတို့ ရောက်သည့်အခါတွင် မည်သည့်အရာမှ ရလိမ့်မည်မဟုတ်သည်ကို သူတို့သိကြသည်။ ထို့ကြောင့် ရိုးရိုးရှင်းရှင်းပင် ထိုနေရာအား ဖြတ်ကျော်ကာ နောက်တစ်နေရာသို့ တိုက်ရိုက်သွားလိုက်ကြသည်။

သူတို့က လက်ဝှေ့ထိုးသည့်စက်တစ်ခုရှေ့တွင် စုဝေးနေကြပြီး တာဝေးပြေးသမားတစ်ယောက်က လောလောလတ်လတ်ပင် တစ်ကြိမ်ထိုးထားကာ ဂဏန်းက 2100 ဟုပြသထားသည်။

ရန်ရှူနှင့်ဆွေ့ဟို့ယွီက လက်ဝှေ့စက်ရှေ့တွင် မတ်တတ်ရပ်ကာ ၎င်းတို့အား ကြည့်လိုက်သည်။

သူတို့က ဤနေရာတွင် တခဏမျှကြာအောင် ကြိုးစားထားကြ၍ သတိပေးစာအား ဖွက်ထားသင့်ပြီး ၎င်းအား ထိုအတွဲကို မပြရန် ကြံစည်ထားကြသည်။ သို့မှသာ သူတို့နှစ်ယောက်က ဤလူခြောက်ယောက်၏ လှုပ်ရှားမှုများကို အခြေခံပြီး စက်ယန္တာရား၏ လျှို့ဝှက်ဆန်းကြယ်မှုကို ခန့်မှန်းရုံသာတတ်နိုင်ပေလိမ့်မည်။

ဆွေ့ဟို့ယွီ တစ်ခဏမျှကြာအောင် ကြည့်ပြီး ပြောလိုက်သည်။

"ဒါကခွန်အားကန့်သတ်တဲ့ ပြိုင်ပွဲမဟုတ်ဘူး...ဒီစက်ယန္တာရားကိုဖွင့်ဖို့ဆိုရင် ကိန်းဂဏန်းသုံးလုံးကို ပေါင်းပြီး နံပါတ်တစ်ခု ထွက်လာတာပဲ ဖြစ်လောက်တယ်...ဒါပေမဲ့ နံပါတ်တစ်ခုထွက်လာဖို့က ခွန်အားကို ထိန်းချုပ်ရမှာ...အဲဒါက တော်တော် ခက်တယ်...အဲ့ကြောင့် သူတို့ အခု အကြာကြီး ဆက်တိုက် ကြိုးစားနေရတာလေ..."

ဆွေ့ဟ်ို့ယွီ တစ်ချက်ကြည့်ရုံနှင့် ခန့်မှန်းနိုင်သည်ကို သူတို့မကြောက်ပေ။ မည်သို့ပင်ဖြစ်စေ နံပါတ်က အဓိက သဲလွန်စဖြစ်ပြီး နံပါတ်ကိုမသိဘဲ ဤအဆင့်ကို သူတို့မဖြတ်ကျော်နိုင်ချေ။

လျို့ရွှမ်း ရန်ရှူအား ပြုံးပြလိုက်သည်။

"သတင်း ဖလှယ်ရအောင်လေ..."

ရန်ရှူ ပြန်မဖြေဘဲ ဆွေ့ဟို့ယွီကို ကြည့်လိုက်သည်။

ဆွေ့ဟို့ယွီ တွန့်ဆုတ်စွာဖြင့် ပြောလိုက်သည်။

"မင်းရဲ့ စက်ပိုင်းဆိုင်ရာ မူဝါဒတွေက ငါတို့အတွက်တကယ် အသုံးမဝင်ဘူး...ဖလှယ်ဖို့ကို တန်ဖိုးမရှိတာ..."

"မင်းတို့မှာ အချိန်ဇယားရှိတယ်မဟုတ်ဘူးလား...စက်ထဲက သဲလွန်စတွေက မှားနေတဲ့အချိန်တွေကို ဖယ်ထုတ်ဖို့ သဲလွန်စပဲ..ဖလှယ်ပြီးလို့ရှိရင် ငါတို့ မင်းကို နံပါတ်တွေ ပြောပြမယ်.."

"ကောင်းပြီလေ..."

ဆွေ့ဟို့ယွီ သတင်းအချို့ဖလှယ်ရန် သဘောတူလိုက်သည်။

သူတို့ ပျော်ရွှင်စွာ လဲလှယ်လိုက်ကြသည်။

ထို့နောက် သူတို့ တစ်ခဏမျှ ကြိုးစားလိုက်ကြသေးသည်။ စက်ယန္တရားအတွက် မှန်ကန်သည့် ကိန်းဂဏန်းကို ဖော်ထုတ်ရန်မှာ အမှန်တကယ် ခက်ခဲလှသည်။ သူတို့ နောက်ဆုံးအဖြေကို သိလျှင်ပင် ၎င်းကို ဖွင့်နိုင်မည် မဟုတ်ချေ။

နံပါတ် 6523 ကိုရပြီးနောက် ဆွေ့ဟို့ယွီ သူ့လက်သီးနှင့် ထိုးလိုက်ရာ နံပါတ် 1720 ကိုရလိုက်သည်။

ရန်ရှူ ၎င်းကို ကြည့်ပြီး မမေးဘဲ မနေနိုင်ပေ။

"ဒီနံပါတ်အတွက် အခြေခံကရော ဘာကြီးလဲ..."

သူ့နှလုံးသားထဲတွင် လေ့လာချိန်ဆလိုက်ပြီးနောက် ဆွေ့ဟို့ယွီ စက်ကို အစကနေ ပြန်ထိုးလိုက်သည်။

ပထမတစ်ကြိမ် 2310...

ဒုတိယအကြိမ် 2310...

တူညီသည့်နံပါတ်ကို နှစ်ကြိမ်ရလိုက်ခြင်းက ရှိနေသည့်လူတိုင်းကို အံ့သြမှုဖြင့် ပင့်သက်ရှိုက်အောင် ပြုလုပ်နိုင်လိုက်သည်။ ဆွေ့ဟို့ယွီ၏ ခွန်အားထိန်းချုပ်မှုက တိကျလှပြီး ခွန်အားက အကြိမ်တိုင်း တူညီနေဆဲ ဖြစ်သည်။

နောက်ဆုံးအကြိမ်က အခရာပင်ဖြစ်သည်။

ဆွေ့ဟို့ယွီ သူ့ခြေထောက်ကို အားအနည်းငယ် ထည့်ကာ ကန်ထည့်လိုက်၏။

ထိုအခိုက် အစောပိုင်းနှစ်များတွင် 'စန်ဒါ' ကို လေ့လာခဲ့သည့် အခြေခံက ပေါ်လွင်လာခဲ့သည်။ ကန်ချက်တစ်ချက်တည်းနှင့် လှုပ်ရှားမှုက သေသပ်ရှင်းလင်းလှပြီး တားဆီးမရနိုင်သော အားမာန်အဟုန်များပါဝင်နေသည်။

(T/N- 'Sanda - စန်ဒါ' က လက်ရော ခြေထောက်ပါ အသုံးပြုရတဲ့ တရုတ်လက်ဝှေ့ပညာတစ်ခုပါ...)

နံပါတ်များက စတင်ခုန်တက်သွားပြီး အဆုံး၌ 1903 တွင် ရပ်တန့်သွားသည်။

တိကျသေချာသည့် တန်ဖိုးတစ်ခုကို စက်က စုဆောင်းပြီးနောက် 'ဘိ့ခ်' ဟူသည့် အသံတစ်ချက်မြည်သွားသည်။ အလင်းရောင် တဖျတ်ဖျတ်လင်းလက်သွားပြီး သစ်သားတံခါးလေးက ပွင့်သွားခဲ့သည်။ စက်က အပြည့်အဝ မပွင့်သေးမီမှာပင် ရန်ရှူက လျင်မြန်စွာနှင့် တဟုန်ထိုးပြေးသွားကာ အဟကြားမှ သဲလွန်စကို ဆွဲထုတ်လိုက်သည်။

ယူပြီးသည်နှင့် ချက်ချင်း ဆွေဟို့ယွီထံ သဲလွန်စကိုလွှဲပေးလိုက်သည်။

တစ်ချိန်တည်းမှာပင် စွန့်ပစ်ကစားကွင်း၏အလင်းရောင်အားလုံးက ကွယ်ပျောက်သွားပြီး ခေါင်းလောင်းသံ ချက်ချင်းမြည်လာခဲ့သည်။ သူတို့လက်ကိုပင် မမြင်နိုင်အောင် မှောင်မည်းနေသည့် အမှောင်

ထုထဲသို့ ကျရောက်သွားခဲ့သည်။

ကံမကောင်းစွာပင် ပရိုဂရမ်အဖွဲက မည်သည့် အလင်းရောင်မှ ထွန်းမပေးလာခဲ့ပေ။ ခေါင်းလောင်းသံ မြည်လာပြီးနောက် အဝေးတစ်နေရာမှ အနီရင့်ရောင်အလင်းတန်းတစ်ခုက ထွန်းလင်းလာပြီး ရှည်လျားသည့် ဝရန်တာတစ်ခုကို မပီမပြင် ဝိုးတိုးဝါးတား မြင်လိုက်ရသည်။

📽️

Prev Next