အပိုင်း ၂၆

Chapter 26

ဆရာထန်ပြောသည့် ပုံပြင်ကို နားထောင်ပြီးနောက်တွင် ကျန်းရှောင်မန်လေး၏ စိတ်အခြေအနေ တိုးတက်သွားပြီး မနက်ဖြန်ကျောင်းဆက်လာမည်ဟု ဆုံးဖြတ်ချက်ချလိုက်တော့သည်။

ဆရာထန်က သူမတွင်ပြဿနာအချို့ရှိလျှင်လည်း အဆင်ပြေသည်ဟု ပြောခဲ့သည်။ သူမ နားမလည်တာမှန်သမျှ မေးနိုင်သည်ဟု ပြောခဲ့သည်။ တစ်လှမ်းချင်း၊ တစ်ဆင့်ချင်းသွားလျှင်လည်း အဆင်ပြေပါသည်ဟုဆိုပြီး အရေးအကြီးဆုံးက ပျော်ရွှင်စရာ သင်ကြားမှု အတွေ့အကြုံလေး ရရန်သာဖြစ်သည်။

အစပိုင်းတွင် ကျန်းရှောင်မန်လေးက သူ့ကို စာဖတ်နည်းသင်ပေးခိုင်း၍ စနစ်ခင်ဗျာအတော်လေး စိတ်ရှုပ်ပြီး စိတ်မပါလက်မပါဖြစ်ခဲ့ရသည်။ သူက ဗီလိန်စနစ်ဖြစ်ပြီးကလေးထိန်း စနစ်မဟုတ်ပေ။

ငါလေး အဲ့လိုတွေလုပ်ရတာ မကြိုက်ပါဘူးနော်...

စနစ်က ပြောသည်။

"ပိုင်ရှင်... ငါတို့စနစ်တွေမှာ အရာရာတိုင်းကို အသေအချာခွဲခြမ်းစိတ်ဖြာနိုင်ပြီး အထူးတာဝန်တွေကိုလည်း လုပ်ဆောင်နိုင်ကြတယ်... ဒါပေမဲ့ ငါတို့ရဲ့ လမ်းစဉ်က ဗီလိန်ရဲ့ ကြီးထွားမှုလမ်းကြောင်းအပေါ်ပဲမူတည်တာ... ဘေဂျင်းနဲ့ ချင်းဟွာတက္ကသိုလ်တက်ခွင့်ရအောင် လုပ်ပေးရမှာမဟုတ်ဘူး..."

စနစ်၏ ငြင်းပယ်ခြင်းကို ခံလိုက်ရသောအခါ ကျန်းရှောင်မန်လေးက အတော်လေး နားလည်ပေးနိုင်ပါသည်ဟူသော အမူအယာဖြင့် ပြန်ပြောလိုက်သည်။

"ဒီတော့... ဦးဦးစနစ်လည်း စာမဖတ်နိုင်ဘူးပေါ့နော်... အဆင်ပြေပါတယ်... လူတိုင်းလူတိုင်းမှာ သူတို့မတော်တဲ့နေရာဆိုတာ ရှိတာပဲလေ... ဦးဦးလည်း မသိဘူးဆိုမှတော့ သမီး ဆရာထန်ကိုပဲ သွားမေးလိုက်မယ်လေ... ဆရာထန်က အရမ်းတော်တော့ သူသိမှာသေချာတယ်..."

မည်သို့ပင်ဆိုစေ သူမက အလွန်ဉာဏ်ကောင်းပြီး ထောက်ထားငဲ့ညှာတတ်သည့် ကလေးတစ်ယောက်ပင်။ ထို့ကြောင့် သူမက စနစ်ကိုနားလည်ပေးနိုင်သည်။ စနစ် မလုပ်နိုင်သည့်အရာကို သူမက အတင်းအကြပ်တိုက်တွန်းမည် မဟုတ်ချေ။

စနစ်အတွက်မူ ကျန်းရှောင်မန်၏ နားလည်ပေးတတ်ကာ ထောက်ထားငဲ့ညှာပေးတတ်မှုဆိုသည်မှာ... လှောင်ထေ့လုံးတစ်ခုဖြစ်ပြီး သူ့ဘက်ကလှုပ်ရှားလာစေရန် တွန်းအားပေးနေခြင်းဖြစ်သည်။ ကျန်းရှောင်မန်လေးက ထိုသို့ဆိုလိုသည်မဟုတ်ကြောင်း သူသိသော်လည်း စနစ်တွင်လည်း ခံစားချက်များရှိပါသည်။

အချိန်အတော့်အတော် အကြာကြီးကို တိတ်ဆိတ်သွားပြီးနောက်တွင် စနစ်ကပြောလိုက်သည်။

"အဲ့ဒီ့စကားလုံးတွေကို 'လယ်သမားများကို သနားခြင်း'လို့ ဖတ်ရတယ်... အဲ့တာက ကဗျာတစ်ပုဒ်လေ... အဲ့ကဗျာရဲ့ အဓိပ္ပါယ်က... ဘလာ ဘလာ ဘလာ ..."

၎င်းက အရာရာတိုင်းကို စေ့စေ့စပ်စပ်ရှင်းပြလိုက်သည်။

ဒီလောက်လွယ်တဲ့မေးခွန်းလေးကို သူ့လိုဉာဏ်ကောင်းတဲ့ စနစ်တစ်ခု မသိဘဲနေစရာလား... သူက စနစ်တွေရဲ့ သိက္ခာတွေကို ချမဲ့အထဲမှာ မပါပါဘူးနော်...

ကျန်းရှောင်မန်လေးက မျက်လုံးများ တောက်ပသွားကာ စနစ်ကိုချီးကျူးလိုက်သည်။

"ဦးဦးစနစ်က အရမ်းတော်တာပဲ...."

"အင်း.. ကျေးဇူးပဲ.."

ကျန်းရှောင်မန်က ထိုကဗျာကိုသင်ယူပြီးနောက်တွင် သူမကိုယ်သူမ ပိုပြီးဉာဏ်ကောင်းလာသည်ဟု ခံစားမိလိုက်၍ မနက်ဖြန် ကျောင်းသွားရန် ဆုံးဖြတ်ချက်ချလိုက်သည်။ ကျန်းရှောင်မန်က ကိုယ့်ကိုယ်ကိုယ် စိတ်အားတက်ကြွစေရန် စိတ်ပိုင်းဆိုင်ရာပြင်ဆင်ပြီး ပြောလိုက်သည်။

"ဦးဦးစနစ်... သမီးကို မနက်ဖြန်မနက် ခြောက်နာရီကြရင်နှိုးပေးပါနော်..."

စနစ်လေးခင်ဗျာမှာ ကျန်းရှောင်မန်ကို စာဖတ်နည်းသင်ပေးရရုံမျှမက ယခုတွင်သူမ၏ နှိုးစက်နာရီပင် ထပ်လုပ်ပေးလိုက်ရတော့သည်။

နောက်တစ်နေ့တွင် ကျန်းရှောင်မန်လေးက မီးဖိုထဲမှ မီးသွေးအနည်းငယ်ယူကာ ကျောင်းသို့ ယူသွားလိုက်ပြီး သူမ စာကောင်းကောင်းမရေးနိုင်သေးသ၍ မှတ်စုစာအုပ်တွင်မရေးသေးပဲ မြေကြီးပေါ်တွင်သာ အရေးကျင့်ရန် အစီအစဉ်ဆွဲထားလေသည်။

မူလက သူမက ဆရာထန်ပေးထားသော မှတ်စုစာအုပ်တွင် ဖားလောင်းပုံလေးများဆွဲချင်ခဲ့သည်။ သို့သော် အနည်းငယ် တွန့်ဆုတ်သလို ခံစားလိုက်ရပြီး ၎င်းတို့ကို စာရေးရန်သာ သုံးမည်ဟု ဆုံးဖြတ်ချက်ချခဲ့သည်။

သို့သော် လက်ရှိတွင် သူမ၏လက်ရေးမှာ ဆိုးဝါးလွန်းလှပြီး ဖားလောင်းပုံများဆွဲထားသည်နှင့်ပင် သိပ်မကွာခြားလှပေ။

ကျန်းဟွေ့မိန်က မီးသွေးများကို သစ်ရွက်နှင့်ပတ်ပြီး ကျန်းရှောင်မန်လေး သုံး၍ရစေရန် ကူညီပေးလိုက်သည်။ သူမ မနေ့ညက တစ်ညလုံးမအိပ်ခဲ့ဘဲ အဝတ်စ အစုတ်လေးများစွာကိုသုံးကာ ကျန်းရှောင်မန်လေးအတွက် လွယ်အိတ်ကလေး ချုပ်ပေးခဲ့သည်။ ယနေ့တွင် ကျန်းရှောင်မန်က ထိုလွယ်အိတ်ကလေးလွယ်ကာ ကျောင်းသို့ သွားလေသည်။

ရာသီဥတုက အလွန်ပူသော်လည်း သူမက ကျားပုံဦးထုတ်လေးကို မချွတ်ပဲ တစ်ချိန်လုံးဆောင်းထားခဲ့သည်။ 

မနက်ခင်းပိုင်းတွင် လေအေးအနည်းငယ်တိုက်၍ ဆောင်းထားရသည်မှာ အဆင်ပြေမည်ဖြစ်သော်လည်း နေ့လည်ပိုင်းတွင် နေလုံးကြီးက အရှိန်အလျံတညီးညီးတောက်လောင်နေလေသည်။ 

အရမ်းပူတယ်မဟုတ်ဘူးလား.. 

ကျန်းဟွေ့မိန်က ပြောလိုက်သည်။

"အပူရှပ်လိမ့်မယ်...အဲ့ဦးထုတ်မဆောင်းနဲ့တော့... ချွတ်လိုက်တော့..."

ကျန်းရှောင်မန်လေးက သူမ၏ဦးထုတ်လေးကို ကာကွယ်ကာ ပြင်းပြင်းထန်ထန်ခေါင်းခါရင်း သူမအသတ်ဆုံးရင် ဆုံးပါစေဟု လုံးဝမချွတ်ဟု စိတ်ပိုင်းဖြတ်ထားသည်။

အညှပ်ခံလိုက်ရသော သူမ၏ဆံပင်နေရာက အစူးလေးလိုထောင်နေကာ ယခုအထိ ပြန်ရှည်မလာသေးပေ။ ဆံပင်စည်းနေကြ နေရာမှအညှပ်ခံထားရ၍ တစ်ယောက်ယောက်က သူမခေါင်းပေါ် ဇလုံအုပ်ပြီး ညှပ်ထားပေးသလို ရုပ်ဆိုးလှသည်။

ကျန်းရှောင်မန်လေးက အလှအပသိပ်ကြိုက်ပြီး ဆံပင်စည်းရသည်ကို အလွန်ကြိုက်ပေသည်။ထို့ကြောင့် ယခုလက်ရှိ သူမ၏ချစ်ဖို့မကောင်းသော ပုံသဏ္ဌာန်ကို မည်သူ့ကိုမှ မပြချင်ပေ။