အပိုင်း ၁၅၁ ( Rogue Champion 27 - Extra 3 )

ချန်ပီယံ

ခဏကြာအောင် ထင်းခွဲပြီးနောက် သူက ပူလာသဖြင့် သူ၏ ဝတ်ရုံရှည်နှင့် ချည်အင်္ကျီတို့ကို ချွတ်ထားသည်။ ယခုအခါ သူသည် ပါးပါးလျလျ အဖြူရောင် အဝတ်တစ်ထည်ကိုသာ ဝတ်ဆင်ထားသောကြောင့် သူ့လက်မောင်းပေါ်မှ ကြွက်သားများ၏ပုံစံကို လူတိုင်း ရှင်းရှင်းလင်းလင်း မြင်တွေ့နိုင်နေသည်။

သူ၏ အရပ်မြင့်မားသော ခန္ဓာကိုယ်နှင့် တွဲလိုက်သောအခါ... ဤလူဟာ အလုပ်ကြမ်း လုပ်သော အစေခံတစ်ဦးဟုသာ လူတိုင်းက ထင်ကြသည်။

ဒါပေမယ့် ဒါက ယန်ကျင်းဇီတဲ့လား?

ချိုက်ရှောင်ကျန်းထက် လုံးဝ မညံ့ဘူးလို့ ပြောကြတဲ့ အဲ့ယန်ကျင်းဇီလား?

ဝေ့လင်းရှိူ့ကလည်း ဤအချိန်တွင် စကားဝင်ပြောလာသည် : “ ငါ့မှာ ငါ့ဂုဏ်သတင်းနဲ့ မထိုက်တန်တာ ဘာရှိလဲ? ငါက Xiucai တစ်ယောက်ပဲ! ”

သူက ဒီလိုပန်းချီတွေ ‌ဆွဲနိုင်ပြီး ဒီလိုစကားလုံးတွေကို ရေးသားနိုင်တဲ့ Xiucai တစ်ယောက်ပဲ။ သူက အရမ်းတော်နေပြီးသား!

ချိုက်ရှောင်ကျန်းသည် အနည်းငယ် ရှက်သွားသော်ငြား မကြာမီ ပြန်လည်ကောင်းသွားကာ ယန်ကျင်းဇီကို ပြောသည် : “ ငါ မင်းနဲ့ ပြိုင်ချင်တယ်။ ”

“ လာလေ၊ နှစ်ပွဲကနေ သုံးပွဲအထိ ပြိုင်လို့ရတယ်။ ” ယန်ကျင်းဇီသည် သူ့လက်ထဲမှ ပုဆိန်ကို မြေပြင်ပေါ်သို့ ပစ်ချလိုက်သည်။

ချိုက်ရှောင်ကျန်းသည် အလိုအလျောက် ဘေးသို့ ရှောင်လိုက်မိပြီး သူ့နှလုံး ခုန်သွားသည် – သူ့ကို ယန်ကျင်းဇီ ပုဆိန်နဲ့ ခုတ်ပစ်လိုက်မှာကို သူ တကယ် ကြောက်တယ်!

ယန်ကျင်းဇီသည် သူက ကဗျာတွင် အနည်းငယ် ညံ့ကြောင်း ဝန်ခံသည်။ သူ့တွင် ခံစားချက်များ ကင်းမဲ့နေသည်ပင်။

သို့သော် ရိုးရိုးသားသား ပြောရလျှင် ခေတ်အဆက်ဆက် အကျော်ကြားဆုံး ကဗျာဆရာများကို စုပေါင်းလိုက်သောအခါ အံ့ဩဖွယ်ကဗျာများက ဒါဇင်ပေါင်းများစွာသာ ကျန်ရစ်သည်။ ၎င်းတို့ထဲမှ အများစုကို အထူးမြင်ကွင်းများတွင် ခံစားချက်များ ရှိမှသာ ရေးသားခဲ့ကြသည်။ သူတို့က စာမေးပွဲတွင် ကဗျာတစ်ပုဒ် တကယ် ရေးခဲ့လျှင်ပင် ၎င်းက ခေတ်အဆက်ဆက် လက်ဆင့်ကမ်းနိုင်သော ကဗျာတစ်ပုဒ် ချက်ချင်း ဖြစ်လာရန်မှာ မဖြစ်နိုင်လောက်ချေ။

ဤလူများနှင့် ယှဉ်လျှင် ချိုက်ရှောင်ကျန်းက အတော်ညံ့သည်။

ထို့ကြောင့် ကဗျာစာပေပိုင်း၌ ချိုက်ရှောင်ကျန်းဟာ နှစ်အနည်းငယ်စာ ဖတ်ရမည့် ကဗျာများကို ဖတ်ရှုထားသော ယန်ကျင်းဇီနှင့် မယှဉ်ပြိုင်နိုင်ချေ။

အခြားအရာများအတွက်မူ...

ယန်ကျင်းဇီက အခု လမ်းလျှောက်နေတဲ့ စာကြည့်တိုက်ပဲ! ဒီလမ်းလျှောက်နေတဲ့ စာကြည့်တိုက်က တော်တော်ဉာဏ်ကောင်းတယ်၊ ဖတ်သမျှစာအုပ်တိုင်းကို နားလည်တယ်!

ချိုက်ရှောင်ကျန်း တစ်ယောက်တည်းက ဘယ်လိုလုပ်ပြီး “စာကြည့်တိုက်” တစ်ခုထက် ပိုပြီး မှတ်သားနိုင်မှာလဲ?

ချိုက်ရှောင်ကျန်းသည် ကြမ်းကြမ်းတမ်းတမ်း ရောက်လာပြီး ယန်ကျင်းဇီနှင့် ယှဉ်ပြိုင်ခဲ့သော်ငြား နောက်ဆုံးတွင် စိတ်ပျက်လက်ပျက်ဖြင့် ထွက်ခွာသွားသည်။

ယန်ကျင်းဇီ တည်ရှိမှုကို မြို့တော်မှ လူများက ချက်ချင်းဆိုသလို သိသွားကြပြီး ပညာရှင်အများအပြားက လာရောက်လည်ပတ်ကြသည်။

ယန်ကျင်းဇီကို မမြင်ဖူးသူများက ဤလူများကို ယန်ကျင်းဇီ၏ အသွင်အပြင်ကို မေးမြန်းကြသည့်အခါတိုင်း ဤလူများ၏ အမူအရာများက အလွန်ထူးဆန်းသွားပေလိမ့်မည်။

ယန်ကျင်းဇီနှင့် ဝေ့လင်းရှိူ့တို့သည် မြို့တော်တွင် တစ်နှစ်နေခဲ့ကြသည်။

စကားမစပ်၊ ကျိုးစုန်က သူတို့ကို အလွန်ကြိုဆိုပြီး သူတို့အား ကျိုးအိမ်တော်တွင် လာနေရန် အကြိမ်ကြိမ် ဖိတ်ခေါ်ခဲ့သော်လည်း ကျိုးစုန်၏ဇနီးက သူတို့ကို ခပ်တန်းတန်း ဆက်ဆံလေရာ ယန်ကျင်းဇီနှင့် ဝေ့လင်းရှိူ့တို့သည် သူတို့ကိုယ်သူတို့ အရှက်မရစေရန် မသွားကြတော့ပေ။

နောက်နှစ် ဖေဖော်ဝါရီလတွင် နွေဦးစာမေးပွဲများ စတင်ကြသည်။

စာမေးပွဲချိန်အတွင်းတွင် စာဖြေဆိုသူများသည် အဝတ်တစ်ထည်ကိုသာ ဝတ်ဆင်နိုင်ပြီး စာဖြေဆိုသူ အများအပြားက အအေးဒဏ်ကြောင့် ခိုက်ခိုက်တုန်နေကြ၏။ စာဖြေဆိုသူများအနက် ယန်ကျင်းဇီဟာ လူအုပ်ထဲမှ ထင်းထွက်နေရုံသာမက အအေးဒဏ်ကိုလည်း လုံးဝ မခံစားရပေ။

သူ့ကိုသိသူတိုင်းက အားကျကြသည် — ဒီယန်ကျင်းဇီက စာပေပညာရှင်နဲ့ တကယ်ကြီး လုံးဝ မတူဘူး!

သို့သော်လည်း စာပေပညာရှင်နှင့် လုံးဝ မတူသော ဤလူဟာ စာမေးပွဲတွင် လူတိုင်းထက် ပိုမိုကောင်းမွန်စွာ ဆောင်ရွက်နိုင်ခဲ့သည်။

ဤနှစ် စာမေးပွဲ၏ မေးခွန်းများက ခက်သည်။ လူတော်တော်များများက အရင်းအမြစ်ကိုပင် မသိကြသော်ငြား ယန်ကျင်းဇီက ၎င်းတို့ကို အလွန်ကောင်းစွာ ဖြေကြားခဲ့၏။ ညီလာခံတွင် တွေ့ကြုံရသော ပြဿနာများနှင့် ပတ်သက်ပြီး မေးမြန်းသည့် မေးခွန်းတစ်ပုဒ်လည်း နောက်ဆုံးတွင် ပါရှိကာ သူသည် သမိုင်းစာအုပ်များကို ကိုးကားပြီး အရာအားလုံးကို ဖြေခဲ့သည်။

ပြီးတော့ သူ့လက်ရေးလှကလည်း အရမ်းကောင်းလွန်းတယ်!

Huiyuan သည် သမိုင်းတွင် အမှတ်အသား ချန်ရစ်နိုင်မည့်သူ ဖြစ်ပြီး သူ့ကို မရစေချင်သော လူများလည်း ညီလာခံတွင် ရှိသည်။ ဒါပေမယ့် ဒီစာရွက်တွေကို အရှင်မင်းကြီးကို တင်ပြရမှာလေ၊ ဘာကြောင့် သူက နံပါတ်တစ် မဖြစ်တာလဲလို့ အရှင်မင်းကြီးက မေးတဲ့အခါကျရင် သူတို့ ဘယ်လိုဖြေကြမလဲ?

အခြားတစ်ဖက်တွင်မူ ယန်ကျင်းဇီသည် Huiyuan အဆင့် ရရှိသည်ကို မအံ့ဩပေ။

စာရင်းတင်သည့်နေ့တွင် သူ့နာမည်က စာရင်း၏ ပထမဆုံးနေရာတွင် ရှိနေသည်။

“ Huiyuan က အိမ်ထောင်မပြုရသေးဘူး! ” ဘယ်သူ အော်လိုက်မှန်း မသိသော်လည်း စာရင်းထဲမှ သားမက်တစ်ဦး ဖမ်းရန် ကြံစည်နေသော လူများလည်း ရှိိနေသည်။ ယန်ကျင်းဇီကိုသာ မိလျှင်...

သို့သော် သူတို့ အတွေးလွန်သွားသည်။

ယန်ကျင်းဇီဟာ လူအယောက်တစ်သောင်းပင် မဖွင့်နိုင်သော ဂိတ်တံခါးကြီးနှင့် တူသည့် အမျိုးသားတစ်ဦး ဖြစ်သည်။ သူ့လက်ကို တစ်ခါဝှေ့ယမ်းလိုက်ရုံဖြင့် သူ့ကို “ဖမ်း” ချင်နေကြသော ထိုလူအားလုံးကို သူက အဝေးသို့ တွန်းထုတ်ပစ်လိုက်သည်။

သူက ဝေ့လင်းရှိူ့ရဲ့အပိုင်!

လူများ : “ ... ” မဖမ်းနိုင်ဘူး၊ ဒီတော့ သူတို့ လူအသစ်ပဲ ပြောင်းလိုက်တော့မယ်!

နိုင်ငံ့စာမေးပွဲ ပြီးဆုံးပြီးနောက် နန်းတော်စာမေးပွဲ ဆက်ရှိသည်။ အရှင်မင်းကြီးနှင့် မှူးမတ်တို့ရှေ့တွင် စာမေးပွဲ ထပ်ဖြေရပေမည်။

၎င်းကြောင့် ဤအချိန်၌ လူများသည် စာရေးခြင်းနှင့် အရာရာတွင် နှေး‌ကွေးသွားကြပြီး စာမေးပွဲကို အဆုံးသတ်ရန် အချိန်အတော်ကြာသည်။

ဧကရာဇ်မင်းရှေ့တွင် အခြားလူတိုင်းက လွန်စွာ စိတ်လှုပ်ရှားနေကြသော်ငြား ယန်ကျင်းဇီက လုံးဝ စိတ်လှုပ်ရှားမနေပေ။ ဧကရာဇ်မင်းက သူ့ရှေ့တွင် အချိန်အကြာကြီး မတ်တပ်ရပ်နေပြီး သူ့ကို ဆက်တိုက်စောင့်ကြည့်နေလျှင်တောင်မှ သူ့လက်များမှာ အလွန်တည်ငြိမ်နေဆဲ ဖြစ်သည်။

ဧကရာဇ် : “ ... ” သူ ယန်ကျင်းဇီကို မြင်တော့ ဒီလူက ပညာရှင်တစ်ဦးနဲ့ မတူဘူးလို့ ထင်မိတယ်။ အဲ့ဒါကြောင့် သူ တမင်သက်သက် အောက်ဆင်းပြီး ဒီလူ စာမေးပွဲ ဖြေတာကို လာကြည့်တော့ ရလဒ်က... ဒီလူက တကယ်ပဲ ပညာရှင်တစ်ယောက်!

အဲ့လက်ရေးက ပြောင်မြောက်လိုက်တာ! အဖြေလွှာကလည်း ထင်ရှားနေချက်!

ဒီလူကို Zhuangyuan ဖြစ်ခိုင်းရမှာ ကောင်းမွန်တဲ့ ကိစ္စပဲ! ယန်ကျင်းဇီရဲ့ အရည်အချင်းတွေနဲ့ သင်ယူမှုတွေဟာ လူတိုင်းရဲ့အထက်မှာ တကယ် ရှိတယ်... ယန်ကျင်းဇီကို ချက်ချင်းပင် Zhuangyuan အဖြစ် သတ်မှတ်ပေးခဲ့သည်။

ထို့နောက် ဘွဲ့ဂုဏ်ထူးရရှိသူ အသစ်များက မြင်းစီး၍ လမ်းမများပေါ်တွင် အခမ်းအနား စီတန်းလှည့်လှည်သောအခါ...

လူတစ်ဦးက မေးသည် : “ ရှေ့ကလူ ဘယ်သူလဲ? ”

နောက်တစ်ဦးက ဖြေသည် : “ အစောင့်တစ်ယောက်များလား? ”

တစ်စုံတစ်ဦးသည် ဤလူနှစ်ဦးကို ဆွံ့အစွာ ကြည့်မိလိုက်သည် : “ မင်းတို့တွေ တုံးလိုက်တာ! သူ့အဝတ်အစားတွေကို ကြည့်လိုက်! သူက ချန်ပီယံပဲ! ”

တကယ် ထူးဆန်း၏၊ ဤနှစ် ချန်ပီယံက စစ်သူကြီးတစ်ဦးနှင့် တကယ် တူနေသည်။

စာမေးပွဲတွင် အနိုင်ရပြီးနောက် ယန်ကျင်းဇီ၏ မင်းအရာရှိအလုပ်မှာ ဖြစ်ထွန်းစည်ပင်လှသည်။

သူသည် သူ လုပ်သမျှတွင် အလွန်တော်နေသည်။ သူသည် အခြားသူများ သူ့ကို ပြောသော စကားများ သို့မဟုတ် သူ မြင်တွေ့ဖူးသော လူတိုင်း အစရှိသည်တို့ကို အလုံးစုံ မှတ်မိနိုင်သည်... သူသာ မင်းအရာရှိလောကတွင် ဝေးဝေးမလှမ်းနိုင်လျှင် အခြားသူများကို ထည့်မပြောနိုင်တော့ချေ။

နှစ်များကြာပြီးနောက် သူသည် ဧကရာဇ်မင်း၏ အနီးကပ် မှူးမတ်တစ်ဦးပင် ဖြစ်လာပြီး လက်ရှိဧကရာဇ်မင်းကလည်း သူ့ကို အလွန်သဘောကျသည်။

ကိုယ် မေးသမျှ မေးခွန်းတိုင်းကို ဖြေနိုင်တဲ့ အမတ်တစ်ယောက်ကို ဘယ်သူက မကြိုက်ပဲနေမလဲ?

ထို့နောက် နောက်ပိုင်းတွင်မူ ဧကရာဇ်မင်း အိုမင်းလာသောအခါ ဧကရာဇ်ငယ်က နန်းတက်လာပြီး ယန်ကျင်းဇီသည်လည်း တိုင်းပြည်‌ပေါ်တွင် အာဏာရှိထားသည်။

အများအားဖြင့် မှူးမတ်ဟာ ညီလာခံကို လွှမ်းမိုးနိုင်သော အာဏာ ရရှိပြီးနောက် အဆုံးသတ်မှာ မရှောင်လွှဲနိုင်သာ ဆိုးရွားတတ်သည်။ အဘယ့်ကြောင့်ဆိုသော် သူတို့က မင်းအရာများ ဖြစ်လာသောအခါ သူတို့က မိသားစု အကျိုးဖြစ်ထွန်းစေမည့် ကိစ္စများကို သေချာပေါက် ဆောင်ရွက်တတ်ကြပြီး သူတို့တွင် ဆက်ဆံရေးများစွာဖြင့် ကြီးမားသော အသိုက်အဝန်းတစ်ခု ရှိလာသောကြောင့်ပင်။ ဤသို့ဖြင့် သူတို့တွင် တစ်ကိုယ်ကောင်းဆန်မှု ရှိလာမည်မှာ ‌သိသာပြီး တစ်ကိုယ်ကောင်းဆန်မှု ရှိလာသောအခါ နန်းပလ္လင်၏ ဆန့်ကျင်ဘက်တွင် မတ်တပ်ရပ်တည်ရန် လွယ်ကူလာသည်။

သို့သော်လည်း ယန်ကျင်းဇီအလှည့်တွင် ဤသို့မဟုတ်ချေ။

သူ့တွင် နောက်အိမ်ထောင် ပြုထားသော မိခင်တစ်ဦးသာ ရှိသည်။ သူက သူ့မိခင်နှင့် သွေးတစ်ဝက် မွေးချင်းများကို များစွာဂရုစိုက်သော်ငြား ထိုလူများက စာပေပညာရှင်များပင် မဟုတ်ပေ။ သူ၏ ထိုထိုသော ဂရုစိုက်မှုမှာ မြေကွက်များများ ဝယ်ကာ သူတို့ကို ချမ်းသာစေခြင်း ဖြစ်သည်။

သူ့တွင် ကိုးကွယ်ဆည်းကပ်သော ဆရာ မရှိဘဲ မည်သူတစ်ဦးတစ်ယောက်၏ အသင်အပြင်အောက်၌ မရှိပေ။

ပိုအရေးကြီးသည်မှာ... သူက အိမ်ထောင်မပြု။ သူ့မှာ ကလေးတစ်ယောက်တောင် မရှိဘူး!

သူ၏ ရုပ်ရည်အသွင်အပြင်နှင့် တွဲလိုက်သောအခါ ၎င်းက သူဟာ ဟုတ်တိုင်းမှန်ရာ ပြောသော စစ်သည်တော်တစ်ဦးဟု လူအများအား အမြဲတစေ တွေးထင်စေသည်။ ထို့အပြင် ယင်းကား တစ်နည်းနည်းဖြင့် ယုံကြည်ဖွယ်ကောင်းနေ၏။

အမှန်ပင်၊ ဧကရာဇ်မင်းက သူ့ကို ယုံကြည်သော အကြောင်းအရင်း နောက်တစ်ချက် ရှိသည်။

သူဟာ နောက်ပိုင်းတွင် မည်သည့်မင်းအရာရှိရာထူးကိုပဲ ရရှိပါစေ၊ ဝေ့လင်းရှိူ့ကို ဘယ်တော့မှ မစွန့်ခွာပေ။

ဤသို့သော အချစ်ကြီးသည့် အမျိုးသားတစ်ဦးဟာ သဘာဝအားဖြင့် ယုံကြည်ထိုက်၏။

နှစ်ရာပေါင်းများစွာကြာပြီးနောက် သုံ့ကူကောင်တီရှိ ယန်မိသားစု၏ အိမ်ဟောင်းတွင်။

ဧည့်လမ်းညွှန်တစ်ယောက်သည် ခရီးသွားအုပ်စုတစ်စုကို အိမ်တစ်အိမ်ထဲသို့ ခေါ်ဆောင်လာသည်။

“ အားလုံးပဲ၊ ဒီနေ့ လည်ပတ်မယ့် ယန်မိသားစုရဲ့ အိမ်ဟောင်းက အရမ်းနာမည်ကြီးတဲ့ အမတ်ချုပ်ကြီး ယန်ကျင်းဇီရဲ့ နေအိမ်ဟောင်းပါ! ရှေ့က အိမ်က ယန်ကျင်းဇီ မွေးဖွားတဲ့ နေရာ ဖြစ်ပြီး နောက်က အိမ်ကတော့ သူ အသက်ကြီးမှ သူ့မွေးရပ်မြေကို ပြန်လာတော့ သူ ဆောက်ခဲ့တဲ့ အိမ်ပဲ! ”

“ အားလုံးက ယန်ကျင်းဇီရဲ့ဘဝကို သိထားကြတယ်မလား? ဘာလို့ဆို အားလုံးက အလယ်တန်းကျောင်း သမိုင်းစာမေးပွဲကို ဖြေခဲ့ရမှာပဲလေ။ ကျွန်တော် ဒီနေ့ မင်းတို့ကို ပိုပြောပြမယ်။ ယန်ကျင်းဇီဟာ သမိုင်းထဲက နာမည်ကျော် လက်ရေးလှရေးဆရာ၊ အတွေးအခေါ်ပညာရှင်၊ စစ်ရေးကျွမ်းကျင်သူနဲ့ နိုင်ငံရေးသမား ဖြစ်တယ်။ ပညာရှင်တွေ အသိအမှတ်ပြုထားတဲ့ အကျယ်ပြန့်ဆုံး သမိုင်းစာအုပ်ကို သူ ရေးခဲ့တယ်။ ”

“ သူဟာ သူ့ဘဝတစ်လျှောက်လုံးမှာ စာအုပ်ပေါင်းများစွာကို စုစည်းပေးခဲ့ပြီး သေသေချာချာလည်း ထိန်းသိမ်းပေးခဲ့တယ်။ ကျွန်တော်တို့ကို အဖိုးတန် သမိုင်းဝင် အချက်အလက်တွေ ထားပေးခဲ့တယ်! ”

“ သူ့လက်ရေးလှက ပိုလို့တောင် ထူးချွန်တယ်။ သူဟာ လူများစွာရဲ့ လက်ရေးလှဟန်ပန်တွေကို ကွက်ကွက်ကွင်းကွင်း ကူးယူနိုင်ပြီး အမှားနဲ့ အမှန်ကို ခွဲခြားဖို့ ခက်ခဲစေခဲ့တယ်။ ဒါ့အပြင် တစ်ခါတစ်လေကျရင် သူက အရင်ဆရာတွေထက်တောင် ပိုကောင်းအောင် ရေးနိုင်သေးတယ်... သူ အသက်ကြီးလာတော့ သူက တစ်မူထူးခြားတဲ့ စာလုံးပုံစံတစ်ခုကို တီထွင်ခဲ့တယ်! ”

“ သူက တိုက်ပွဲတောင် ဝင်ဖူးတယ်။ အဲ့အချိန်တုန်းမှာ ဧကရာဇ်မင်းက သူ့ကို ကြီးကြပ်ရေးမှူးအဖြစ်နဲ့ပဲ သွားခိုင်းခဲ့တယ်။ ဒါပေမယ့် သူ မ‌ထင်ထားတာက သူ အဲ့နေရာကို ရောက်တော့ အစောင့်တပ်တွေက သူရဲဘောကြောင်ပြီး အရည်အချင်းမပြည့်မီတာကို သူ တကယ် တွေ့လိုက်ရမှာကိုပဲ။ သူက တပ်မှူးအလံကို ကိုင်ပြီး တိုက်ပွဲထဲကို ဝင်သွားတဲ့အပြင် တပ်သားတွေကိုလည်း ဦးဆောင်သွားတယ်။ အစက ရှုံးနေတဲ့ စစ်ပွဲက အောင်နိုင်ခဲ့တယ်! ”

…...

“ ဒါပေါ့၊ သူနဲ့ပတ်သက်ပြီး အပြောများဆုံးကတော့ သူ့အချစ်ရေးပါပဲ။ အားလုံး သိကြတယ်၊ သူက ယောက်ျားတွေကို သဘောကျပြီး သူ့ချစ်သူကို တစ်သက်လုံး သစ္စာရှိရှိချစ်သွားခဲ့တယ်! ”

“ ဒါပေမယ့် သူ့ချစ်သူကို သမိုင်းစာအုပ်တွေမှာ ဖော်ပြခဲပါတယ်။ ဒီနေ့ သူ့ချစ်သူကို အဓိကထားမှာပါ... ယန်ကျင်းဇီရဲ့ ချစ်သူက သမိုင်းမှတ်တမ်းတွေအရ ကျိုးလင်းရှိူ့လို့ ခေါ်တယ်၊ အရင်ကတော့ ဝေ့လင်းရှိူ့လို့ သိကြတယ်။ တကယ်တော့ သူကလည်း စာပေပညာရှင်တစ်ဦးပါပဲ။ ”

“ ယန်ကျင်းဇီက သူ့ဘဝတစ်လျှောက်လုံး ပြည်သူ့အကျိုးအတွက် ဆောင်ရွက်မှုများစွာ ပြုလုပ်ခဲ့တယ်။ ပြီးတော့ သူ့ကို ကမ္ဘာပေါ်ကို ဆင်းသက်လာတဲ့ စာပေကြယ်ပွင့်အဖြစ် လူသိများကြတယ်။ ဒါကြောင့် သူ သေသွားတဲ့နောက် သူ့နေအိမ်ဟောင်းကို ကောင်းကောင်းမွန်မွန် ထိန်းသိမ်းထားခဲ့တယ်။ မနှစ်တုန်းက အစိုးရက ရန်ပုံငွေတွေ ခွဲဝေပြီး နေအိမ်ဟောင်းကို ပြုပြင်တဲ့အခါမှာ အံ့ဩစရာကောင်းစွာနဲ့ပဲ လျှို့ဝှက်ခန်းတစ်ခန်းကို ‌ရှာတွေ့ခဲ့ပါတယ်။ လျှို့ဝှက်ခန်းထဲမှာ ယန်ကျင်းဇီနဲ့ သူ့ချစ်သူရဲ့ လက်ရေးစာ‌မူဟောင်းတွေ အများကြီး ရှိနေပြီး ဒီလက်ရေးစာမူဟောင်းတွေကပဲ တကယ့်လက်‌တွေ့ ယန်ကျင်းဇီနဲ့ပတ်သက်ပြီး ကျွန်တော်တို့ကို သိခွင့်ပေးခဲ့တယ်။ ”

ဧည့်လမ်းညွှန်သည် လူများကို အထဲသို့ ဖြည်းညှင်းစွာ ဦးဆောင်ကာ မကြာမီ အဖိုးတန် စာမူများစွာ ပြသထားသည့် ခန်းမတစ်ခုသို့ ရောက်လာသည်။

“ ကျွန်တော်တို့အားလုံး သိကြတဲ့အတိုင်း Juren စာမေးပွဲ အောင်ပြီးတဲ့နောက် ယန်ကျင်းဇီရဲ့ချစ်သူက Gongshi စာမေးပွဲကို ဆက်မဖြေတော့ဘူး။ သူက လုံလောက်အောင် မလေ့လာနိုင်လို့ဆိုပြီး လူအချို့က ထင်ကြတယ်။ တကယ်တော့ ဒီလိုမဟုတ်ဘူး။ သူ Gongshi စာမေးပွဲကို ဆက်မဖြေတာဟာ သူက အရာရှိဖြစ်လာရင် ယန်ကျင်းဇီနဲ့ ခွဲခွာရမှာကို မလိုချင်လို့ပါ။ ”

“ တကယ်တော့ သူက အရမ်းတော်တယ်။ လျှို့ဝှက်ခန်းထဲမှာ သူ ယန်ကျင်းဇီအတွက် ဆွဲပေးထားတဲ့ ပန်းချီကား 5,000 ကျော် ရှိတယ်။ သူ့နောက်ပိုင်းခေတ်မှာ သူ ဆွဲခဲ့တဲ့ ပန်းချီကားတွေက သမိုင်းထဲက နာမည်ကျော် ပန်းချီဆရာတွေထက် မနိမ့်ကျဘူး! ”

“ ဒါပေါ့၊ ဒီမှာ သူ့ရဲ့ အစောပိုင်း ပန်းချီကားအချို့ကိုပဲ မင်းတို့ တွေ့မြင်နိုင်တယ်။ သူ့ရဲ့ နှောင်းပိုင်း ပန်းချီကားတွေ အကုန်လုံးကို အမျိုးသားပြတိုက်က စုဆောင်းသွားပါပြီ။ ”

......

“ ဒါ့အပြင် သူ့မှာ ကျွန်တော်တို့ကို လက်ဆင့်ကမ်းပေးနိုင်တဲ့ ကဗျာတွေ အများကြီးလည်း ရှိပါတယ်။ ကျွန်တော်တို့ သူ့ကဗျာတွေကို ကြည့်ရင် သိနိုင်တယ်၊ သူက အရမ်းရိုမန့်တစ်ဆန်တဲ့ လူတစ်ယောက်ပဲ! ”

ဧည့်လမ်းညွှန်သည် ဝေ့လင်းရှိူ့အကြောင်းကို အသေးစိတ် မိတ်ဆက်ပေးပြီး ဝေ့လင်းရှိူ့၏ လက်ရေးမူကိုလည်း လူတိုင်းအား ပြသသည် — ဝေ့လင်းရှိူ့ရဲ့ လက်ရေးကလည်း တန်းတူရည်တူ ထူးချွန်တယ်!

ဤအချိန်တွင် ဧည့်လမ်းညွှန်က ပြောသည် : “ သမိုင်းမှာ ကောလာဟလတွေ အများကြီး ရှိပါတယ်။ အဲ့ထဲမှာမှ ယန်ကျင်းဇီဟာ ရွာမှာ လူမိုက်တစ်ယောက် ဖြစ်ဖူးတယ်... အရင်တုန်းကတော့ သမိုင်းသုတေသီတွေက ဒါကို အဓိပ္ပာယ်မရှိဘူးလို့ အမြဲထင်ခဲ့ကြပေမယ့် ယန်မိသားစုရဲ့ အိမ်အဟောင်းကို ရှာတွေ့ပြီးကတည်းက ဒါကို အတည်ပြုနိုင်ခဲ့တယ်! ငယ်ငယ်တုန်းက ယန်ကျင်းဇီဟာ တကယ်ပဲ စာမတတ်တဲ့လူ ဖြစ်ပြီး လောင်းကစားဝိုင်း လူမိုက်တစ်ယောက်လည်း ဖြစ်ခဲ့တယ်။ ” 

ခရီးသွားများ အံ့သြသွားကြသည်။

ဧည့်လမ်းညွှန်က ဆက်ပြောသည် : “ ပိုပြီးတုန်လှုပ်စရာကောင်းတာက ဝေ့လင်းရှိူ့ ချန်ခဲ့တဲ့ ကိုယ်တွေ့မှတ်တမ်းလို စာအုပ်တစ်အုပ်ရဲ့ အကြောင်းအရာအရ... အဲ့အချိန်မှာ ယန်ကျင်းဇီက မမျှော်လင့်ထားတဲ့ အရာတွေကို လုပ်ခဲ့တယ်။ ယန်ကျင်းဇီဟာ ငယ်ငယ်တုန်းက ဝေ့လင်းရှိူ့ကို ချစ်မိသွားတဲ့အတွက် သူများတွေကို ဝေ့လင်းရှိူ့နားမှာ သရုပ်ဆောင်ခိုင်းပြီး သူက / အလှလေးကို ကယ်တင်တဲ့ သူရဲကောင်း / အဖြစ် ဟန်ဆောင်ခဲ့တယ်... ”

ခရီးသွားများ : “ !!! ” အဲ့လိုကိစ္စ ရှိတာလား? ယန်ကျင်းဇီက ရင့်ကျက်တည်ငြိမ်တဲ့ အဘိုးတစ်ယောက် ဖြစ်သင့်တာ မဟုတ်ဘူးလား? ဘာလို့ သူက အဲ့လိုကိစ္စ လုပ်တာလဲ?

“ ဒါနဲ့ စကားမစပ် အရှေ့က ဝေ့လင်းရှိူ့ရဲ့ ပန်းချီကားတွေကို ပြသတဲ့ သီးသန့်နေရာပါ။ မင်းတို့ မဝင်ခင်မှာ ကိုယ့်ကိုကိုယ် ပြင်ဆင်ပြီး သမိုင်းစာအုပ်တွေထဲက တိုင်းပြည်ကို အရမ်းစိုးရိမ်ပုံပေါ်တဲ့ အမတ်ချုပ်ကြီးယန်ကို မေ့ထားလိုက်သင့်တယ်။ ” ဧည့်လမ်းညွှန်က ဆိုသည်။

ခရီးသွားများသည် သူတို့ကိုယ်သူတို့ အသင့်ပြင်လိုက်ကြသည်။

ပြီးနောက် သူတို့သည် ပန်းချီကားများစွာကို တွေ့လိုက်ကြရသည်။

အချို့တွင် ယန်ကျင်းဇီက ထင်းခုတ်နေပြီး အချို့တွင်မူ ချက်ပြုတ်နေကာ အချို့ဆိုလျှင် အိမ်ခေါင်မိုးပေါ်တွင်ပင် ရှိနေသည်။

ဤပန်းချီကားအချို့သည် ကဗျာများဖြင့် တွဲလျက်ရှိပြီး အချို့တွင် ရေးသားထားသော စာကြောင်းအနည်းငယ် ရှိကာ ၎င်းတို့က သူတို့ ရောက်ရှိနေသော တည်နေရာနှင့် ယန်ကျင်းဇီ ဘာလုပ်ဆောင်နေကြောင်းကို ဖော်ပြထားသည်။ ပန်းချီကားပင်ဖြစ်စေ၊ အပေါ်မှ စကားလုံးများမှပင်ဖြစ်စေ ပန်းချီဆရာ၏ ပန်းချီကားထဲမှလူအပေါ် ထားရှိသော ချစ်ခြင်းမေတ္တာကို တွေ့မြင်နိုင်သည်။

ပန်းချီကားထဲမှလူသည်လည်း ပန်းချီဆွဲသော လူနှင့် ချစ်ကျွမ်းဝင်နေကြောင်းမှာ သိသာထင်ရှားသည်။

မဟုတ်ရင် ဘယ်လိုလုပ် ယန်ကျင်းဇီလိုမျိုး ကြီးမြတ်တဲ့ ကွန်ဖြူးရှပ်အတွေးအခေါ်ပညာရှင်က စိတ်လိုလက်ရ ထင်းခုတ်ပြီး ချက်ပြုတ်နိုင်မှာလဲ? 

အမှန်ပင်၊ အခြားသော အရေးကြီးကိစ္စ ရှိသေးသည်... သမိုင်းစာအုပ်ထဲမှ ယန်ကျင်းဇီ၏ ပုံတူမှာ အခြားအမတ်များ၏ ပုံတူများနှင့် ဘာမှမကွဲပြားသော်ငြား ဤနေရာရှိ ပုံတူကမူ...

ဒီကြွက်သားတောင့်တောင့်နဲ့ ယောက်ျားက တကယ်ပဲ ယန်ကျင်းဇီလား?

သူက

လူမိုက်အဖြစ် အလုပ်လုပ်ခဲ့တယ် ဆိုတာကို သူတို့ အခု ယုံပြီ!

____

*Zhuangyuan - Jinshi စာမေးပွဲတွင် အလုံးစုံ အမြင့်ဆုံးအမှတ် ရရှိသူ

*Jinshi - နန်းတွင်းစာမေးပွဲကို အောင်မြင်သော ပညာရှင်များ