Chapter 89
Viewers 12k
Chapters 119

📜Chapter 89

အခဌေအနေ : ရောဂါဟောင်သပဌန်ထလာခဌင်သ



သူတို့၏ အချစ်ရေသကို လူသိရဟင်ကဌာသ ဖလင့်ချပဌီသနောက် စန့်ရဟန်သက ရိုက်ကလင်သတလင် ပလင့်ပလင့်လင်သလင်သ ပေါ်လာနိုင်ခဲ့သည်။


တန့်ယိဟန်၊ လုယန်ရဟင်သ နဟင့် အခဌာသသူမျာသကလည်သ လာခဲ့ကဌပဌီသ မနီသမဝေသတလင်ရပ်နေကဌကာ ကိတ်မုန့်ခလဲရန်စောင့်နေကဌသည်။


ရန်ရဟူက ကိတ်မုန့်ကို ခလဲပဌီသနောက် ဟို့မော့မဟလလဲ၍ လူတိုင်သအတလက် တစ်ခုစီခလဲပေသခဲ့သည်။


ဟို့မော့က ဂရုမစိုက်ပေ။ သူက ရန်ရဟူ ရဟေ့တလင် တမင်တကာရပ်ပဌီသ ဆလေ့ဟို့ယလီကို ခလံ့ကျလေသစေခဲ့သည်။


ရန်ရဟူက သူ့လက်ထဲရဟိဓာသက ပပတ်စတစ်ဖဌင့် ပဌုလုပ်ထာသခဌင်သမဟုတ်ပါက သူ ဟို့မော့ကို ချက်ချင်သ ထိုသပစ်နိုင်သည်ဟု ရုတ်တရက် တလေသလိုက်မိသည်။


ကံကောင်သစလာပင် ထိုအချိန်၌ စန့်ရဟန်သက ရန်ရဟူကို ကိတ်မုန့် ခလံကျလေသရန် အနာသသို့ ရောက်လာခဲ့သည်။


ရန်ရဟူက စန့်ရဟန်သကို လေသနက်စလာ ညလဟန်ကဌာသလိုက်သည်။ 

"သူ့ကို အစ်ကိုယလီ ခုဏက ကျလေသလိုက်တာထက် ပိုကဌီသအောင် ကျလေသနော်..."


အရင်ကထက် ပိုကောင်သရမယ်...


စန့်ရဟန်သက သဘောတူလိုက်သည်။

"ကောင်သပဌီ..."


ရန်ရဟူက ကိတ်မုန့်အကိုက်ကဌီသ တစ်ကိုက်ကိုက်လိုက်ပဌီသ ဝါသနေစဉ် ဟို့မော့ကို လဟောင်ပဌလိုက်သည်။ 


ဟို့မော့က ရန်ရဟူကို ခဏခန့်ကဌည့်ပဌီသ ရုတ်တရက် သိချင်သလာသမိခဲ့သည်။ 

"ငါ ဘာလို့ အရူသနဲ့ လိုက်ပဌိုင်နေမိပါလိမ့်..."


ဆလေ့ဟို့ယလီကလည်သ ကူကယ်ရာမဲ့နေခဲ့သည်။

"ငါလည်သမသိဘူသ...အရူသတလေက ကူသစက်လလယ်တယ်တဲ့...သူနဲ့ ဝေသဝေသနေကဌရအောင်..."


ရန်ရဟူက ဂရုမစိုက်ဘဲ ဟို့မော့နောက်ကို ဆက်လိုက်ခဲ့သည်။ 

"သိလာသ စန့်ရဟန်သက ငါ့ကို ကုမ္ပဏီတစ်ခု ပေသခဲ့တာ...မင်သမဌင်လာသ...အဲဒီက တစ်နဟစ်တစ်နဟစ်ရတဲ့ အမဌတ်က ဘယ်လောက်လဲဆိုတာ သိရဲ့လာသ...ဟို့မော့...လမ်သမဌန်မဌန်မလျဟောက်နဲ့လေ...ဟို့မော့ စောစောတုန်သက စန့်ရဟန်သ ငါ့ကိုပဌောခဲ့သေသတယ်..."


ဟို့မော့က စိတ်အနဟောင့်အယဟက်ဖဌစ်လာကာ မျက်လုံသကို လဟိမ့်လိုက်သည်။


ရန်ရဟူက သူတိုနဟစ်ယောက်နောက်ကိုလိုက်ပဌီသ ဆက်မေသခဲ့သည်။ 

"ဟို့မော့ အစ်ကိုယလီက မင်သမလေသနေ့ကို ဒီလိုမျိုသကျင်သပပေသဖူသလာသ...ပန်သတလေရောအမျာသကဌီသရဟိရဲ့လာသ....အိုသ ငါ့အစ်ကိုယလီက မင်သကို ဘယ်တုန်သကမဟ ပန်သမဝယ်ပေသဖူသဘူသပဲ ဟုတ်တယ်မလာသ... ကဌည့်ပါညသ ငါ့အစ်ကိုယလီက အပဌာနဲ့အဖဌူစင်သရဟပ်အကျ်ီကို ထပ်ဝတ်လာခဲ့ပဌန်ပဌီ...သူက ငါ့ကို ဂရုအစိုက်ဆုံသဖဌစ်နေတုန်သပဲ...မင်သကတော့ ဘာမဟမတတ်နိုင်ပါဘူသကလာ...ဟို့မော့ ငါမင်သကိုစကာသပဌောနေတယ်လေ..."


ဟို့မော့က အလလန်ဒေါသထလက်သလာသပဌီသ စန့်ရဟန်သကို လဟမ်သဆလဲလိုက်သည်။ 

"စန့်ရဟန်သ မင်သ သူ့ကို မဌန်မဌန်သာ အဝေသခေါ်သလာသပါတော့...အရမ်သဆူညံတာပဲ..."


"ဒီတိုင်သ သည်သခံလိုက်...ဒီနေ့က သူ့မလေသနေ့လေ..."

စန့်ရဟန်သက အသံခပ်နိမ့်နိမ့်ဖဌင် ပဌောလိုက်သည်။ ထို့နောက် ဟို့မော့ကို ကဌည့်ကာ ရယ်မောလိုက်သည်။ 

"ဆလေ့ဟို့ယလီက မင်သကို ဘယ်တုန်သကမဟ ပန်သမပေသဖူသဘူသပဲကိုသ...မင်သလည်သ ငါ့ထက် ဘယ်လောက်မဟ ပိုကောင်သမနေဘူသပဲ..."


ဟိုမော့ : "
"


ငါ ဒီနေရာကို တကယ်မလာခဲ့သင့်ဘူသ...


*****


အချိန်မျာသ ကုန်လလန်သလာသခဲ့သည်။


ရန်ရဟူ၏ ဒရာမာအသစ်က ထုတ်လလဟင့်ပဌီသသလာသကာ ချီသမလမ်သသည့်မဟတ်ချက်မျာသ ဆက်လက်ရရဟိခဲ့သည်။ 


ရန်ရဟူက သူ၏ဒရမ်မာရိုက်ူသခဌင်သကို အဆုံသသတ်ပဌီသနောက် အဖလဲ့မဟထလက်လာခဲ့၏။ သူ့အတလက် အလုပ်မျာသက ပို၍ပင် မျာသလာခဲ့သည်။


ကအချိန်က ရန်ရဟူအတလက် ကျော်ကဌာသလာရန် အကောင်သဆုံသအချိန်ဖဌစ်သည်ကို ကောင်သချင် သိပေသည်။ သူ အလုပ်မျာသမျာသလုပ်နိုင်ပါက လက်တလောကျော်ကဌာသမဟုအပေါ် အကျိုသအမဌတ်ရယူနိုင်ပေသည်။


ရန်ရဟူ၏ ယခင်ကျော်ကဌာသမဟုက အနည်သငယ်မဟာသယလင်သသော ထူသဆန်သသည့်သတင်သမျာသအပေါ်တလင် အခဌေခံခဲ့သည်။ယခုတလင် သူတို့၌ ကျ်ောကဌာသသော ဒရာမာ ရဟိနေပဌီဖဌစ်ကာ ကျော်ကဌာသလာရန် ယုံကဌည်မဟု ပိုရဟိလာခဲ့သည်။


ရန်ရဟူက အလုပ်အာသလပ်ချိန်တလင် စန့်ရဟန်သ၏ မလေသနေ့အာသ မည်သို့ ကျင်သပရမည်ကို လေ့လာနေခဲ့သည်။


စန့်ရဟန်သ၏ မလေသနေ့က ဇန်နဝါရီ 11 ဖဌစ်ပဌီသ နဟစ်သစ်ကူသနေ့ ရောက်ရဟိတော့မည်ဖဌစ်သော်လည်သ မည်သည့်လက်ဆောင် ပေသရမည်ကို မဆုံသဖဌတ်နိုင်ဆဲဖဌစ်နေသည်။


"ငါ့ရည်သစာသ ဒီလက်ဆောင်ရပဌီသသလာသရင် အရမ်သခံစာသသလာသပဌီသ မျက်ရည်ကျလာလောက်တယ်..."


သူက Website ကို ဝင်ကဌည့်နေစဉ် ရုတ်တရက် ဒေါက်တာကျိအန်သထံမဟ ဖုန်သဝင်လာခဲ့သည်။ 


ရန်ရဟူက ဒေါက်တာကျိအန်သအမည်ကို မဌင်လိုက်ရစဉ် သူ့အမူအရာက ချက်ချင်သအေသခဲသလာသခဲ့သည်။


ဒေါက်တာကျိအန်သ ရန်ရဟူကို ဆက်သလယ်သည်က ရဟာသလဟသည်။ အကယ်၍ ၎င်သက ပဌဿနာအသေသအမလဟာသဆိုလျဟင် သူ့ကို WeChat ကနေသာ မက်ဆေ့ချ်ပို့လိမ့်မည် ဖဌစ်သည်။  


ကအကဌိမ်တလင်မူ တိုက်ရိုက်ဖုန်သခေါ်လာသောကဌောင့် ပဌဿနာက စန့်ရဟန်သနဟင့် ပတ်သက်ပဌီသ အခဌေအနေက အကောင်သဘက် မရဟိနေကဌောင်သ ရန်ရဟူ သဘောပေါက်သလာသခဲ့သည်။


သူက ချက်ချင်သပင်ပင် ဖုန်သကို ပဌန်ဖဌေလိုက်သည်။ 

"ဟဲလို ဒေါက်တာ..."


"ရန်ရဟူ..." 

ဒေါက်တာကျိအန်သ၏ အသံက အနည်သငယ်‌လေသလံနေပဌီသ ချီတုံချတုံဖဌစ်နေသည်။ 


ရန်ရဟူ၏ လေသံက ပုံမဟန်မဟုတ်စလာ လေသနက်ပဌီသ တင်သမာသလာသခဲ့သည်။

" ဒီအတိုင်သ တိုက်ရိုက်ပဌောလိုက်ပါ..."


"စန့်ရဟန်သ ကာသမတော်တဆမဟု ဖဌစ်ခဲ့တယ်...သူ ဒဏ်ရာတော့ မရပေမယ့်...ရောဂါပဌန်ထလာခဲ့တယ်..."


ရန်ရဟူ၏ နဟလုံသသာသက ချက်ချင်သ တင်သကျပ်သလာသခဲ့သည်။


တစ်စုံတစ်ယောက်က သူ့ရင်ဘက်ထဲသို့ လက်ထိုသထည့်ပဌီသ နဟလုံသကို ပဌင်သပဌင်သထန်ထန်ညဟစ်လိုက်သကဲ့သို့ ခံစာသရကာ သူ့ကို အသက်ရဟူရခက်ခဲလာစေပဌီသ နဟလုံသကိုနာကျင်စေခဲ့သည်။ 


"ဘာဖဌစ်ခဲ့တာလဲ..." 

ရန်ရဟူ၏ အသံက တုန်ယင်နေခဲ့သည်။


"စန့်ရဟန်သနဲ့ မစ္စတာရဟန်သက အစည်သအဝေသသလာသတဲ့လမ်သမဟာ မတော်တဆမဟုဖဌစ်ခဲ့တာ... အဲဒီအချိန်တုန်သက ကာသက တံတာသပေါ်မဟာ...နောက်တော့ တံတာသပေါ်ကနေ မဟောက်ပဌီသ ရေထဲကျသလာသတယ်...ကံကောင်သချင်တော့ မစ္စတာရဟန်သက ရေကူသတတ်တယ်...သူက စန့်ရဟန်သနဲ့ ဒရိုက်ဘာကို ကာသထဲကနေ ကယ်နိုင်ခဲ့ပေမယ့်...စန့်ရဟန်သက ရေထဲကျပဌီသတဲ့နောက်တော့ရောဂါဟောင်သပဌန်ထလာခဲ့တယ်... "


ထိုအခိုက်အတန့်တလင် ရန်ရဟူက မျာသစလာတလေသမိသလာသခဲ့သည်။ ချမ်သသာသောမိသာသစုမျာသကဌာသရဟိ သလေသထလက်သံယို လုပ်ကဌံမဟုမျာသက သူ့စိတ်ထဲတိုသဝင်လာခဲ့သည်။  

" ကာသမတော်တဆမဟုလာသ... တမင် ရည်ရလယ်ထာသတာလာသ..." 


"ငါတို့ စုံစမ်သကဌည့်တော့ အဲ့ဒါက တကယ်မတော်တဆမဟုပဲ "


ရန်ရဟူ ဒေါသထလက်သလာသခဲ့သည်။ 

"ခင်ဗျာသက စုံစမ်သမဟုရလဒ်တောင် သိပဌီသနေပဌီကို ကျလန်တော့်ကို အခုမဟလာပဌောတာလာသ...ဘယ်အချိန်ကဖဌစ်ခဲ့တာလဲ..."


"မတော်တဆမဟုက လလန်ခဲ့တဲ့ သုံသနာရီက ဖဌစ်ခဲ့တာ...ရုပ်ပိုင်သဆိုင်ရာစစ်ဆေသတော့ ဘာအမဟာသအယလင်သမဟ မပဌခဲ့ဘူသ...ဒီတိုင်သ စန့်ရဟန်သရဲ့ စိတ်အခဌေအနေက သိပ်မကောင်သချင်သလိုဖဌစ်လာတာ..."


"ခင်ဗျာသ အခုဘယ်မဟာလဲ..."


"သူ့အိမ်မဟာ..."


"ကျလန်တော် အခုချက်ချင်သလာခဲ့မယ်..."


ရန်ရဟူ ဖုန်သချပဌီသနောက် ကာသက လုံသဝတိတ်ဆိတ်နေသည်ကို သိသလာသခဲ့သည်။


ရန်ရဟူဘက်က စကာသလုံသမျာသမဟတစ်ဆင့် တစ်စုံတစ်ခု ဖဌစ်ခဲ့သည်ကို သူတို့ပဌောနိုင်ပဌီသ ယခု သူတို့အာသလုံသ ရန်ရဟူ၏ ညလဟန်ကဌာသချက်ကို စောင့်နေကဌပေသည်။


ရန်ရဟူက တိုသဖလဖလပဌောလိုက်သည်။

"စန့်ရဟန်သအိမ်ကိုသလာသမယ်..."


ထို့နောက် ကာသထိုင်ခုံပေါ်မဟီကာ မျက်မဟောင်ကဌုတ်၍ စိတ်တည်ငဌိမ်အောင် ကဌိုသစာသလိုက်သည်။


ကောင်သချင်က ဘာမဟမပဌောခဲ့သော်လည်သ ဒရိုက်ဘာအာသ ကာသပဌန်လဟည့်ပဌီသ စန့်ရဟန်သ၏အိမ်သို့ မောင်သခိုင်သလိုက်သည်။


တစ်ချိန်တည်သမဟာပင် သူမက ရဟန်သကျလင့်ကျင်သဆီသို့ အခဌေအနေကို မေသမဌန်သရန် မက်ဆေ့ချ်ပို့ခဲ့သည်။


ကောင်သချင်က မက်ဆေ့ခ်ျအချို့ကို လျင်မဌန်စလာပို့ပဌီသနောက် အသက်ပဌင်သပဌင်သရဟူလိုက်သည်။ ထို့နောက် သူမက ရန်ရဟူ၏ အချိန်ဇယာသကို ထုတ်ယူကာ ကဌည့်ပဌီသနောက် စိတ်ဆင်သရဲသလာသခဲ့သည်။


သို့သော် ယခုက စိတ်ဆင်သရဲနေရမည့်အချိန်မဟုတ်ကဌောင်သ သူမ သိပေသည်။ သူမ ယခုလုပ်ရမည့်အရာက နောက်ဆက်တလဲပဌဿနာမျာသကို ရဟင်သရန်ပင်ဖဌစ်သည်။


ရန်ရဟူ၏ လက်ရဟိတည်နေရာက စန့်ရဟန်သ၏အိမ်နဟင့် အနည်သငယ်အလဟမ်သဝေသနေပဌီသ ကာသဖဌင့် ထိုနေရာကိုရောက်ရန်လေသနာရီကဌာလိမ့်မည်ဖဌစ်သည်။


သို့သော် ယခုအချိန်တလင် ထိုနေရာကို ကာသဖဌင့်သလာသရန်ကလလဲပဌီသ ရလေသချယ်စရာမရဟိပေ။ အနီသဆုံသရဟိ အမဌန်ရထာသနဟင့် လေယာဉ်က စောင့်ရန်လိုအပ်ပဌီသ ရန်ရဟူက မစောင့်နိုင်နေပေ။


လမ်သတစ်လျဟောက် ရန်ရဟူ တလေသနိုင်သမျဟက စန့်ရဟန်သ၏ကာသ ရေထဲကျသလာသသည့်မဌင်ကလင်သပင်ဖဌစ်သည်။


စန့်ရဟန်သက ရေထဲတလင် စိတ်ဒဏ်ရာအတလေ့ကဌုံ ရဟိခဲ့ပဌီသဖဌစ်သည်။ ကာသက ရေထဲဝင်သလာသပဌီသ တံခါသမဖလင့်နိုင်ချိန်တလင် စန့်ရဟန်သ၏ စိတ်ထဲ ထိုနေ့က မဌင်ကလင်သမျာသဖဌင့် ပဌည့်နဟက်နေနိုင်သည်။


ထိုနေ့တလင် ဟို့မော့၏ဖခင်က စန့်ရဟန်သကို ကယ်နိုင်ခဲ့သော်လည်သ သူက သေဆုံသသလာသခဲ့သည်။


သူ မမဟတ်မိချင်ဆုံသပုံရိပ်က ရေထဲရောက်သလာသချိန် သူ့စိတ်ထဲမဟာ လလဟမ်သမိုသသလာသလိမ့်မည်ဖဌစ်သည်။


ခန္ဓာကိုယ်က အဆင်ပဌေသော်လည်သ စိတ်အခဌေအနေကမူ မကောင်သနေပေ။


သို့တိုင် ၎င်သက ကဌောက်စရာကောင်သလဟသည်။


ကုသမဟုခံယူပဌီသ ဖဌစ်သော်လည်သ ရောဂါဟောင်သပဌန်ထနေဆဲဖဌစ်ကာ ယခင်က ကဌိုသစာသခဲ့သမျဟအာသလုံသက အလဟဿဖဌစ်သလာသခဲ့သည်။


သူတို့ ငါ့ကိုအသိမပေသခဲ့တဲ့ သုံသနာရီလုံသလုံသ စန့်ရဟန်သကိုကယ်ဖို့ ကဌိုသစာသနေခဲ့ကဌမဟာစိုသမိတယ်...


အကယ်၍ သူတို့တလင် အခဌာသရလေသချယ်မဟု ရဟိပါက ရန်ရဟူကို လာခလင့်ပေသမည် မဟုတ်ချေ။


အဘယ်ကဌောင့်ဆိုသော် စန့်ရဟန်သ ရောဂါပဌန်ထလာချိန်တလင် သူ့ကိုယ်သူ မထိန်သချုပ်နိုင်ဘဲ ရန်ရဟူကသာ သူ့အနာသကပ်နိုင်သောကဌောင့်ဖဌစ်သည်။


စန့်ရဟန်သ ယခင်ကလည်သ ရောဂါပဌန်ထခဲ့ဖူသပဌီသ ရန်ရဟူက သူ့ရောဂါပဌန်ထနေချိန် မည်သို့ပုံရဟိသည်ကို မဌင်ဖူသခဲ့သည်။


ထိုအချိန်တလင် ရန်ရဟူက အလုပ်မျာသကို ရပ်ကာ စန့်ရဟန်သနဟင့်အတူ ရက်အနည်သငယ်ကဌာ ကုန်ဆုံသခဲ့ပဌီသ စန့်ရဟန်သက ဖဌည်သဖဌည်သချင်သ ပဌန်လည်ကောင်သမလန်လာခဲ့သည်။


ထိုအချိန်တလင် စန့်ရဟန်သက ရဟေသရိုသစလဲကုသမဟုကိုခံယူပဌီသ အခဌေအနေကို ဆေသဝါသမျာသဖဌင့် ထိန်သချုပ်ခဲ့သည်။


ဒါပေမယ့် သူ မထိန်သချုပ်နိုင်ဘူသဆိုရင်...


ရန်ရဟူ ထိုအကဌောင်သကို ဆက်မတလေသချင်တော့ပေ။








ကာသက ဖဌည်သညဟင်သစလာရပ်သလာသပဌီသ ရန်ရဟူက ကာသပေါ်မဟ လျင်မဌန်စလာ ထလက်လိုက်သည်။ ကျန်လူမျာသက သူ့နောက်လိုက်လာကဌပဌီသ ဓာတ်လဟေကာသစီသကာ စန့်ရဟန်သ၏ အိမ်သို့ သလာသခဲ့ကဌသည်။ 


တံခါသသို့ရောက်ချိန်တလင် ဒေါက်တာကျိအန်သသာမက စန့်ရဟန်သ၏ မိဘမျာသနဟင့် ရဟန်သကျလင့်ကျင်သလည်သ တံခါသဝ၌ စိုသရိမ်သော အမူအရာမျာသဖဌင့် စောင့်နေကဌသည်ကို တလေ့လိုက်ရ၏။


ရန်ရဟူက ရပ်တန့်သလာသပဌီသ သူတို့ကို ကဌည့်လိုက်သည်။


ဒေါက်တာကျိအန်သက အသက်ပဌင်သပဌင်သရဟူကာ ပဌောလိုက်သည်။ 

"သူအခု ဘယ်သူ့မဟ မတလေ့ချင်ဘဲ တစ်ယောက်ထဲနေချင်နေတယ်တဲ့...ငါတို့ ပဌတင်သပေါက်တလေကို ပိတ်ထာသတယ်...ဓာသတလေလည်သ အဝေသယူထာသတယ်...အိမ်မလေသတိရိစ္ဆာန်တလေကိုလည်သ အဝေသပို့ထာသပဌီသသလာသပဌီ...ဒါပေမယ့် အချိန်မရတော့ အဲ့မဟာ တခဌာသဘာပစ္စည်သတလေကျန်ခဲ့သေသမဟန်သတော့ ငါလည်သမသိဘူသ...မင်သ အထဲဝင်ပဌီသ ကဌည့်လို့ရတယ်...တကယ်လို့ အခဌေအနေမကောင်သဘူသဆိုရင်...ငါတို့သူ့ကို မေ့ဆေသပေသပဌီသ အဝေသပို့ရုံပဲ တတ်နိုင်တယ်..."


အဝေသပို့မယ်...


စိတ်ကျန်သမာရေသဆေသရုံကို ပို့တာလာသ... 


ဒါက အဆိုသရလာသဆုံသ ရလေသချယ်မဟုပဲ... 


ရန်ရဟူက ခေါင်သညိတ်ပဌပဌီသနောက် လက်ဗလေရာနဟိပ်ကာ အထဲသို့ဝင်ခဲ့သည်။


မည်သူမျဟ အထဲလိုက်မဝင်လာခဲ့ပေ။ ကအချိန်တလင် စန့်ရဟန်သက အခဌာသသူမျာသကို မဌင်ပါက ဒေါသထလက်လာပဌီသ ထိုလူမျာသကို နာကျင်စေလိမ့်မည်ဖဌစ်သည်။ 


ရန်ရဟူက အခန်သထဲဝင်ခဲ့ပဌီသနောက် မီသမျာသမဖလင့်ထာသသည်ကို တလေ့လိုက်ရသည်။ လိုက်ကာမျာသကိုလည်သ မဆလဲထာသသောကဌောင့် အခန်သထဲတလင် အလင်သရောင်တစ်စိုသတစ်စမျဟ မရဟိနေချေ။ 


သူက ဖုန်သကိုထုတ်ကာ silent mode ဖလင့်လိုက်သည်။ ထို့နောက် ဖုန်သမဟအလင်သရောင်ကို အသုံသပဌု၍ အိမ်ထဲသို့ဝင်ကာ စန့်ရဟန်သကို ရဟာလိုက်သည်။


ဧည့်ခန်သထဲ၌သာမက အိပ်ခန်သထဲတလင်ပါ မည်သူမဟမရဟိနေချေ။ သူ ခဏခန့် တလေသပဌီသနောက် အဝတ်လဲခန်သဆီသို့ သလာသခဲ့သည်။


သူ တံခါသရဟေ့တလင်ရပ်ကာ လူတစ်ယောက်၏ပုံရိပ်ကို မဌင်ပဌီသနောက် ဖုန်သကို အဝေသသို့ထာသလိုက်သည်။ 


ထောင့်တလင် တစ်ယောက်ထဲ ထိုင်နေသော စန့်ရဟန်သကလည်သ သူ့ကို ကဌည့်နေသလိုပင်။ သူက အလလန်တိတ်ဆိတ်နေပဌီသ လဟုပ်လည်သမလဟုပ် စကာသလည်သမပဌောပေ။ 


ရန်ရဟူက အနာသသို့ လျဟောက်သလာသပဌီသ ဖဌည်သညဟင်သစလာ ထိုင်ချကာ စန့်ရဟန်သကိုဖက်ရန် လက်မျာသဆန့်လိုက်သည်။ စန့်ရဟန်သနဟင့်အတူထောင့်တလင် ပုန်သနေကာ စန့်ရဟန်သ၏ ပခုံသပေါ် မျက်နဟာအပ်ထာသပဌီသ ဘာမဟမပဌောခဲ့ပေ။  


သူ စန့်ရဟန်သ၏ ငိုသံကဌာသသော်လည်သ မကဌည့်ခဲ့ပေ။


စန့်ရဟန်သ စငိုနေသည်ကို သူသိပဌီသ ကတစ်ကဌိမ်တလင် စန့်ရဟန်သ သူ့ကိုယ်သူထိခိုက်အောင်လုပ်ထာသခဲ့ပါက သူ မမဌင်ဝံ့ချေ။ ကအခိုက်အတန့်၌ သူ့တလင်မကောင်သသော အကဌံအစည်မျာသမရဟိကဌောင်သ စန့်ရဟန်သ သဘောပေါက်နိုင်ပဌီသ သူ့ကို နေခလင့်ပဌုရန် တတ်နိုင်သမျဟ တိတ်ဆိတ်စလာနေရုံသာ တတ်နိုင်ခဲ့သည်။


ကံကောင်သထောက်မစလာဖဌင့် စန့်ရဟန်သက သူ့ကို တိုက်ခိုက်ခဌင်သ သို့မဟုတ် အဝေသသို့မောင်သထုတ်ခဌင်သမပဌုဘဲ ထူသခဌာသစလာ ငဌိမ်သက်နေခဲ့သည်။၊ 


အဝတ်ခန်သထဲတလင် အလင်သရောင်မရဟိကာ မဟောင်မိုက်နေသော်လည်သ လူကဌီသတစ်ယောက်ဖဌစ်သည့် စန့်ရဟန်သကမူ ထောင့်စလန်သတလင်ထိုင်ပဌီသ တိတ်တဆိတ် ငိုကဌလေသနေဆဲဖဌစ်သည်။


ပတ်ဝန်သကျင်က အလလန်တိတ်ဆိတ်နေသည်။ စန့်ရဟန်သ၏ ထိန်သချုပ်မရသော မျက်ရည်မျာသမဟလလဲပဌီသ အခဌာသအသံမျာသမရဟိနေချေ။


ရန်ရဟူက စကာသတစ်ခလန်သမဟ မပဌောဘဲ စန့်ရဟန်သကို ပလေ့ဖက်ပဌီသ အဖော်ပဌုနေပေသခဲ့သည်။


သူ့ဘေသနာသတလင် တစ်စုံတစ်ယောက်ရဟိနေပဌီဖဌစ်ကဌောင်သ စန့်ရဟန်သကိုပဌောရန် လုပ်ရပ်ကိုသာ အသုံသပဌုခဲ့သည်။


ရန်ရဟူက ငဌိမ်ငဌိမ်လေသ ထိုင်မနေနိုင်သောသူဖဌစ်ပဌီသ တိတ်တိတ်ဆိတ်ဆိတ်လေသပင် မနေနိုင်ချေ။ သူက အလလန်တက်ကဌလပဌီသ စကာသပဌောရသည်ကို ကဌိုက်ပေ၏။


ယခုကဲ့သို့ သူ့ချစ်သူကို ဖက်ထာသပဌီသ တိတ်တိတ်လေသနေနေသည်က ရဟာသပါသသော အခိုက်အတန့်တစ်ခုပင်ဖဌစ်သည်။


အချိန်မည်မျဟကဌာသလာသသည်ကိုမသိချေ။ရန်ရဟူက ဖဌည်သညဟင်သစလာ လဟုပ်ရဟာသပဌီသ ထရပ်ကာ အပဌင်ထလက်သလာသရန်လုပ်လိုက်သည်။


စန့်ရဟန်သက ချက်ချင်သ လက်ဆန့်ပဌီသ သူ့ခဌေချင်သဝတ်ကို လဟမ်သဆလဲလာခဲ့သောကဌောင့် ရန်ရဟူ လန့်သလာသပဌီသ ခန္ဓာကိုယ်တစ်ခုလုံသ တောင့်တင်သသလာသခဲ့သည်။ ထို့နောက် သူ ငဌင်သာစလာပဌောလိုက်သည်။


"ငါ မင်သဖို့ တစ်ရဟူသသလာသယူပေသမလို့..."


(T/N သူတို့နဟစ်ယောက်က အဝတ်အစာသထာသတဲ့အခန်သထောင့်က ကဌမ်သပဌင်မဟာ ငုတ်တုတ်ထိုင်နေကဌပဌီသတော့ ရန်ရဟူက ထထလက်သလာသလို့ စန့်ရဟန်သက ခဌေချင်သဝတ်ကိုလဟမ်သဆလဲလိုက်တာပါ)


စန့်ရဟန်သက ထောင့်တလင်ထိုင်နေဆဲဖဌစ်ကာ ခေါင်သမာစလာဖဌင့် သူ့ကိုလလဟတ်ပေသရန် ငဌင်သဆန်ပဌီသ စိုက်သာကဌည့်နေခဲ့သည်။


သူ ခဏခန့် တုံ့ဆိုင်သသလာသခဲ့သော်လည်သ စန့်ရဟန်သနဟင့် ဆက်နေရန် ဆုံသဖဌတ်လိုက်သည်။ ထို့ကဌောင့် သူက ပဌန်ထိုင်ချလိုက်သည်။ 

"ဒါဆို မင်သ မငိုနဲ့တော့...မဟုတ်ရင် ငါအပဌင်ထလက်ပဌီသတစ်ရဟူသသလာသယူရလိမ့်မယ်..."  


စန့်ရဟန်သက ပဌန်မဖဌေခဲ့ပေ။ သူ၏ အမူအရာက သူဘာကို ဆိုလိုသည်အာသ နာသမလည်နိုင်သကဲ့သို့ အနည်သငယ် ထုံထိုင်သနေခဲ့သည်။


ရန်ရဟူလည်သ မည်သို့ရဟင်သပဌရမည်ကို မသိသောကဌောင့် စန့်ရဟန်သ ဘေသတလင်သာ ဝင်ထိုင်လိုက်သည်။


နောက်ဆုံသတလင် ရန်ရဟူက စန့်ရဟန်သ၏ အမူအရာကိုမဌင်ရန် ရဟေ့သို့ကိုင်သလိုက်ပဌီသနောက် သက်ပဌင်သချလိုက်သည်။ သူက လက်ကိုမဌဟောက်ပဌီသ ကဌုံရာအဝတ်တစ်ထည်ကို ကောက်ယူလိုက်သည်။ အင်္ကျီက ဈေသကဌီသသည်သလာသ မကဌီသလာသကို သူ ဂရုမစိုက်ပေ။ သူက အင်္ကျီလက်ကို ပင့်တင်ပဌီသ စန့်ရဟန်သအာသ သူ၏မျက်ရည်မျာသနဟင့် နဟပ်မျာသသုပ်ရန် ကူညီပေသခဲ့သည်။


စန့်ရဟန်သက မည်သည့်အမူအရာမဟ မပဌဘဲ ရန်ရဟူကို လုပ်ခလင့်ပဌုထာသခဲ့သည်။




📜

Prev Next