MM Story Teller

Chapter 4

Viewers 759

💫Chapter-4

ပိုက်ဆံရှာသည့်နေရာ၌ တပည့်လေးယောက်လုံးက တက်ကြွလွန်းလှသည်။

ရှဲ့ရုန်က စက္ခုကွန်ရက်ကို လက်ညှိုးထိုးပြရင်း ဦးဆုံး မှတ်ချက်ပေးလာ၏ ။

" ဒီကမ္ဘာတကယ်ကောင်းတယ်… ရုပ်ရည်နဲ့တောင် လုပ်စားလို့ရတယ်… ကျွန်တော့်အထင်တော့ ဒါက ကျွန်တော်နဲ့ဆို တကယ်ကိုက်တယ်…"

ရှဲ့ရုန်၏ ကျင့်ကြံရေးစွမ်းရည်က ထူးချွန်သော်လည်း ဂိုဏ်းတစ်ခုလုံးတွင် သူက ဘာမှလုပ်ချင်ကိုင်ချင်စိတ်မရှိသူ ဖြစ်သည်။ သူက ဂမ္ဘီရဉာဏ်ကို အထူးပြုယူထားရခြင်းမှာ ၎င်းက ရှင်သန်ရန်အတွက် ကောင်းကင်ဘုံကိုသာ မှီခိုထားရသောကြောင့် ဖြစ်သည်။ ထို့အပြင်က သူက တစ်နေ့လုံးဘာမှမလေ့လာသည့်အခါတွင်လည်း ကောင်းကင်ဘုံတာအိုကို နားလည်ပြီးသားဟု ပြောလေ့ရှိသည်။ ပုံမှန်အားဖြင့် သူခရီးထွက်လျှင် သူက ဘုရားသခင်၏သတ္တဝါအပေါင်းအားစောင့်ရှောက်ပုံကို ဖွေရှာနေခြင်းသာဖြစ်ကြောင်း ပြောလေ့ရှိသည် ။

ရှဲ့ရုန် သဘောအကျဆုံးအရာက စားသောက်ခြင်းနှင့် ဟေးလားဝါးလားနေရခြင်းသာဖြစ်သည်။ သို့သော်လည်း သူက အလွန်ဝင့်ကြွားသောရုပ်ရည်ပြီး စကားပြောကောင်းသောကြောင့် အပြင်ဘက်ရှိ အထူးသဖြင့် ကျင့်ကြံသူမိန်းကလေးများက သူ့ကိုအတော်လေး သဘောကျကျသည် ။

၎င်းက သေချာပေါက် ရွှီယီ သဘောမတွေ့ဆုံးအချက်ဖြစ်ပြီး သူ့ကို အကြိမ်ပေါင်းများစွာ သီးသန့်ခန်းတွင် ပြန်သုံးသပ်ခိုင်းလေ့ရှိသည်။ ထို့အပြင် သူ့ကို သတ်မှတ်ထားသောအဆင့်သို့မရောက်မချင်း အပြင်သို့ပြန်မထွက်ခိုင်းပေ။ ၎င်းမှာ သူ ရွှေဗဟိုချက်အဆင့်သို့ရောက်သည်အထိပင်။

ဆာ့ဆာ့လည်း သူ့ကို အပြစ်တင်လိုက်မိသည်။

' တကယ်ပဲ ဒီလောက်အထိ လုပ်ဖို့ လိုလို့လား…'

အတိတ်တွင် တတိယစီနီယာအစ်ကိုက ကျင့်ကြံသူညီအစ်မများအားလုံးကို ဆွဲဆောင်နိုင်သည့်အတွက် သူမ ဂုဏ်ယူမိသည်။ ပုံမှန်အားဖြင့် သူက သူ့ရုပ်ရည်နှင့် လှည့်ပတ်နေလျှင် သူမ သူနှင့်အပြင်ထွက်ရန်ပင် မပျော်တော့ပေ ။ ၎င်းက ရှက်စရာကောင်းလွန်းသည် ။

ယခုတွင် တတိယစီနီယာအစ်ကိုက အောက်ခြေစည်းကိုပင်ဖောက်ဖျက်ကာ သူ့ခန္ဓာကိုယ်ကို ရောင်းရန်အသင့်ဖြစ်နေ၏။

တတိယစီနီယာအစ်ကိုရေ... အရမ်းအလွန်အကျွံမလုပ်ပါနဲ့…

ရွှီယီက စည်းကမ်းတင်းကြပ်ပြီး လေးနက်မှုရှိသောသူဖြစ်သည်။ တစ်ယောက်ယောက်ပြောလိုက်သော စကားတစ်ခွန်းကပင် သူ့ကို အဖြစ်သည်းစေ၏။ သူက ပုံမှန်အားဖြင့် စုန့်နင်ဖုန်းနှင့် အခြားနှစ်ယောက်ကို တင်းကျပ်လေ့ရှိသည်။ စိတ်ဝိညာဥ်ရင်းမြစ်မရှိသော ဆာ့ဆာ့တစ်ယောက်တည်းကိုသာလျှင် အနည်းငယ်မျက်နှာသာလိုက်ပေး၏။ ရွှီယီက တပည့်များထဲတွင် အသေးအဖွဲလုပ်ရမည်ကိုပင် ပျင်းရိနေတတ်သောရှဲ့ရုန်ကို စည်းကမ်းအတင်းကျပ်ဆုံးဖြစ်သည် ။

ရလဒ်အားဖြင့် ကမ္ဘာပြောင်းသွားပြီးသည်နှင့် ရှဲ့ရုန်က အခြေအနေပိုဆိုးလာ၍ ရွှီယီ၏ မျက်နှာကချက်ခြင်းမဲမှောင်သွား၏ ။

" ရှဲ့ရုန် ငါ့အထင်တော့ မင်းသီးသန့်အခန်းကို မဝင်ရတာတော်တော်ကြာနေပြီထင်တယ်… ဒီတစ်ခေါက် ရှေးဦးဝိညာဥ်အဆင့်ကို မရောက်မချင်းပြန်မထွက်ရဘူး… "

ရှဲ့ရုန်က ချီတုံချတုံဖြင့်ပြောလာ၏ ။

" ဆရာ အဲ့ဒါက ဆရာတွေးနေသလိုမဟုတ်ဘူး…"

ရှဲ့ရုန်က သူ့ရုပ်ရည်နှင့် ငွေရှာမည့်အကြောင်းကို စပြောလာ၏။ စတားကွန်ရက် (star network) တွင် တိုက်ရိုက်ထုတ်လွှင့်ခြင်းက အလွန်ရေပန်းစားပြီး လူများက တိုက်ရိုက်ထုတ်လွှင့်ပြီး လုပ်ပြသည့်အရာမှန်သမျှကို ရှူစားကြသည်။ အချို့ထုတ်လွှင့်သူများက ကြည့်ရှူသူများနှင့် စကားစမြည်ပြောသည်ကို ရှဲ့ရုန် ကြည့်ထားပြီး ဆုများစွာလည်း ပြန်ရသည် ။

ဒါက ငါ့ရဲ့ ရည်မှန်းချက်အလုပ်ပဲ မဟုတ်ဘူးလား… ပိုက်ဆံရဖို့ မမတွေ ညီမလေးတွေနဲ့ စကားပြောရတာလေ ၊ အဲ့ဒါက မကောင်းဘူးလား…

၎င်းက ဘာမှမည်မည်ရရ မလုပ်ချင်သောသူအတွက် ဥပဒေနှင့်ညီပြီး ကျိုးကြောင်းသင့်သော အလုပ်ဖြစ်သည် ။ ရှဲ့ရုန်က သူ၏ဆွဲဆောင်မှုနှင့် ပပကတ်သက်၍လည်း အတော်လေး ယုံကြည်မှုရှိ၏ ။

ရွှီယီ အနည်းငယ်စိတ်သက်သာရာရသွားသော်လည်း သုန်မှုန်သောမျက်နှာဖြင့်သာ ဆက်ပြောလိုက်သည် ။

" ဘာမှမလုပ်ဘဲ တစ်ခုခုကို ရယူနိုင်ဖို့ အမြဲမစဥ်းစားနေနဲ့… ဒါကြောင့်လည်း ကျန်ခဲ့တဲ့နှစ်တွေတစ်လျှောက်လုံး မင်းရဲ့ကျင့်ကြံရေးက တစ်လက်မလေးတောင် တက်မလာတာ… ငါတို့ ထိုက်ယီဂိုဏ်းက ငွေပြတ်လပ်နေရင်တောင် မင်းရဲ့ ဆွဲဆောင်ရည်ကိုတော့ ရောင်းချစရာမလိုပါဘူး…"

ရှဲ့ရုန်၏စွမ်းရည်က ထူးချွန်ပြီး သူ့ကျင့်ကြံရေးအရှိန်ကလည်း ပုံမှန်အားဖြင့် မြန်သည့်အထဲပါသည်။ ပုံမှန်အားဖြင့် သူက ကချော်ကချွတ်လုပ်တတ်သော်လည်း လွန်ခဲ့သောနှစ်များအတွင်း သူ့ကျင့်ကြံရေးက နှစ်ဆင့်တက်လာ၏ ။ သို့သော်လည်း ရွှီယီက ဆုံးမလာချိန်တွင် ရှဲ့ရုန် တိတ်တဆိတ်နောက်ဆုတ်သွားပြီး ဘာမှထပ်မပြောတော့ပေ။ နှစ်ပေါင်း၂၀၀အထိ အဆင့်မြင့်လာသော ဆရာသခင်နှင့် ယှဥ်လျှင် အဆင့်နှစ်ဆင့်တက်လာခြင်းက ဘာမှပြောပစရာမဟုတ်ဟု ဆိုရမည် ။

အကြီးဆုံးစီနီယာအစ်ကို စုန့်နင်ဖုန်းက သူ့အောက်မှ ညီငယ်၊ ညီမငယ်တို့ကို ပိုပြီးဂရုစိုက်ပေးလေ့ရှိသည်။ သူက ရွှီယီထက် စိတ်အနည်းငယ်ပိုပွင့်လင်းပြီး ရှဲ့ရုန်ကို အနည်းငယ် စိတ်ပင်ပန်းသလိုကြည့်လာသော်လည်း သူ့ကိုယ်စားပြောပေးလာ၏။

" ဆရာ ကျွန်တော်တို့ဂိုဏ်းရဲ့ အခုလက်ရှိ ပထမရည်ရွယ်ချက်က ပိုက်ဆံရှာဖို့ပဲ ဖြစ်သင့်ပါတယ်… ဂျုနီယာညီလေးက သူ့ကျင်ကြံရေးကို မနှောင့်နှေးစေဘဲ တိုက်ရိုက်ထုတ်လွှင့်မယ်ဆို ကောင်းတာပါပဲ…"

ရှဲ့ရုန်က ချက်ချင်း ကတိပေးလာ၏ ။

" ဆရာ ကျွန်တော် ကျင့်ကြံရေးကို လုံးဝ မနှောင့်နှေးစေရပါဘူး…"

'တကယ် မဟုတ်ဘူး…'

ရွှီယီ စဥ်းစားနေချိန်တွင် စုန့်နင်ဖုန်းက သံပူတုန်း ထုရိုက်လိုက်သည် ။

" စိတ်မပူနဲ့ ဆရာ… ကျွန်တော် သူ့ကိုစောင့်ကြည့်ပေးထားပါမယ်… ကျွန်တော်နဲ့ ဒုတိယဂျူနီယာညီလေးလည်း ဒီကမ္ဘာနဲ့ သင့်တော်မယ့်အရာတွေကို ဖန်တီးလိုက်ပါမယ်… ဒါဆို ကျွန်တော်တို့ တာအိုလမ်းစဥ်ကိုလည်း ပိုဝေးဝေးရောက်စေမှာပါ… "

ရွှီယီက စုန့်နင်ဖုန်းအပေါ် အများကြီးအားကိုးထားပြီး သူက ဤသို့ပြောလာသောအခါ ရွှီယီလည်း ပြောလိုက်သည် ။

" ကောင်းပြီ ဒါဆို မင်းနဲ့ပဲ လွှဲထားလိုက်မယ်… ဂိုဏ်းက မြေကိုပြန်ဝယ်ဖို့ ကိစ္စက မင်းအတွက် စမ်းသပ်ချက်ပဲ… "

စုန့်နင်ဖုန်းနှင့် အခြားသူများလည်း လေးနက်စွာ လက်ခံလိုက်ကြသည် ။

သို့သော် ဆာ့ဆာ့ကမူ အနည်းငယ်စိုးရိမ်နေ၏။ ယခင်ကျင့်ကြံရေးကမ္ဘာတွင် သူမက အရှုံးသမားသာဖြစ်ပြီး အကြီးဆုံးစီနီယာအစ်ကိုနှင့် အခြားသူများကဲ့သို့ ကျင့်ကြံနိုင်စွမ်းမရှိပေ။ ယခု ကမ္ဘာအသစ်၌လည်း သူမ လုပ်နိုင်သည့်အရာ ဘာမှမရှိ ဖြစ်နေ၏ ။

ဆရာသခင်၊ စီနီယာအစ်ကိုများနှင့် အခြားသူများက သူမအပေါ် အလွန်ကောင်းကြသော်လည်း သူမ အသုံးမဝင်သည့်သူ မဖြစ်ချင်ပေ ။

စုန့်နင်ဖုန်းက ဆာ့ဆာ့၏ ခံစားချက်များကို နားလည်ပြီး သူမ၏ ဆံပင်လေးကိုဆွဲဖွကာ ပြောလိုက်သည်။

" မင်းနဲ့ ရွှေတွေ၊ ငွေတွေကို ယူလာလို့တော်သေးတာပေါ့ ဆာ့ဆာ့… မဟုတ်ရင် ငါတို့တွေ တကယ် တစ်ပြားတစ်ချပ်မှ မရှိဖြစ်နေမှာ…"

ရှဲ့ရုန်ကလည်း ချက်ချင်း နောက်မှလိုက်ပြောသည် ။

" ဆာ့ဆာ့ မစိုးရိမ်ပါနဲ့… ဒီကမ္ဘာက မကျင့်ကြံနိုင်တဲ့သူတွေအပြည့်ပဲ… ဒါပေမဲ့ မင်းကြည့်လေ သူတို့မှာ စိတ်ဝင်စားစရာတွေအများကြီးပဲ… ဒါက မင်းနဲ့သင့်တော်တဲ့ကမ္ဘာပဲ… ပြီးတော့ မင်းရဲ့လမ်းကြောင်းကို သေချာပေါက် ရှာတွေ့မှာပါ…"

ချန်ကျီလည်း ဆာ့ဆာ့ကို ပြုံးပြကာ အားပေးလိုက်သည် ။

ဆာ့ဆာ့က ဘာမှထုတ်မပြောဘဲ အမြဲတမ်းပျော်ရွှင်တက်ကြွပုံပေါ်သော်လည်း အမှန်တွင် သူမ၏ မကျင့်ကြံနိုင်သောစွမ်းရည်ကြောင့် မကျေနပ်ချက်များခိုအောင်းနေကြောင်း သူတို့ရိပ်မိကြသည်။ သူမကို တိတ်တဆိတ်စောင့်ရှောက်ပေးရုံမှတစ်ပါး ဘာလုပ်ပေးရမည်ကို သူတို့မသိပေ ။ ယခု ဂိုဏ်းတစ်ခုလုံးက အခြားကမ္ဘာသို့ရောက်လာပြီး ထိုကမ္ဘာက ကျင့်ကြံသူများမရှိသောကြောင့် ဆာ့ဆာ့အတွက် အခွင့်အရေးဖြစ်နိုင်သည် ။

' ငါ့အတွက် လမ်းကြောင်းကို ရှာရမှာလား…'

အားလုံးက သူမကို ယုံကြည်ထားချိန်တွင် သူမက စိတ်အားလျော့နေစရာ ဘာအကြောင်းမှ မရှိပေ။ ထို့အပြင် တတိယစီနီယာအစ်ကိုပြောသည်ကလည်း မှန်သည်။ ဤကမ္ဘာတွင် ရေတွက်၍မရသောအခွင့်အရေးများရှိနေပြီး မကျင့်ကြံနိုင်သောသူပင် ပေါက်မြောက်နိုင်သည်။ ကိုယ့်ကိုယ်ကိုယ်စိတ်ပျက်ပြီး အခွင်အရေးအသစ်များကို မရှာဖွေခြင်းက သူမ၏ပုံစံ မဟုတ်ပေ။

မောင်နှမလေးယောက်က စတားကွန်ရက်နှင့် စက္ခုကွန်ရက်ကို လေ့လာနေစဥ်တွင် လော့ကျန်းလည်း အိမ်ပြန်ရောက်သွားပြီး ဖန်ပုလင်းနှစ်ပုလင်းကို စားပွဲပေါ်ချကာ ရေဝင်ချိုးလိုက်သည် ။

၇နှစ်သာရှိသေးသော အငယ်ဆုံးညီလေး လော့ပေါင်က စားပွဲပေါ်ရှိ လှပသောကြွေထည်ဖန်ပုလင်းကို ကြည့်နေ၏။ ထိုအရွယ်က စူးစမ်းတတ်သောအရွယ်ဖြစ်သည်။ လော့ပေါင်က ဘယ်ကြည့်လိုက် ညာကြည့်လိုက်နှင့် ဖန်ပုလင်းကို ဖွင့်ကာ အနံ့ခံကြည့်လိုက်သည်။ ၎င်းက အနည်းငယ်အနံ့ရှိပြီး ဂျယ်လီစေ့လေးများလိုပင်။

" ဟမ်း..ကိုကြီးက ဂျယ်လီစေ့တွေကို တိတ်တိတ်လေးဖွက်ထားတာ ငါမိပြီ…"

လော့ပေါင်က သူ့လက်ဖောင်းဖောင်းကလေး ဆန့်ထုတ်ကာ ဆေးကိုပါးစပ်ထဲထည့်လိုက်သည် ။

'အရသာရှိတယ်…'

အနည်းငယ်ထပ်စားပြီးနောက် သူပုလင်းကို လှုပ်ကြည့်လိုက်သောအခါ ဘာမှမကျန်တော့ပေ ။

လော့ကျန်း ရေချိုးခန်းထဲမှ ထွက်လာသောအခါ လော့ပေါင်က နောက်ထပ်တစ်ပုလင်းကို လက်ဆန့်ကာ ယူရန် လုပ်နေသည်။ လော့ပေါင် ချက်ချင်း သူ့လက်ကိုနောက်ပစ်ကာဖွက်လိုက်ပြီး လူကောင်းလို ဟန်ဆောင်နေ၏။ သို့သော်လည်း သူ့ပါးစပ်ကတော့ ဆေးများကို ဝါးမပြီးသေး၍ ပါးကလှုပ်ကာ ဝါးနေသည့်အသံများထွက်နေသည်။

လော့ကျန်းက တစ်ခုခုမှားနေသည်ကို သတိပြုမိလိုက်ပြီး ချက်ချင်းတိုးသွားကာ သူ့ပါးကို ပုတ်လိုက်သည်။

" လော့ပေါင် ၊ မင်းဘာတွေ စားနေတာလဲ… "

သူလျှောက်လာသောအခါ ကြွေထည်ပုလင်းက ပြောင်သလင်းခါနေသည်ကို တွေ့လိုက်ရသည် ။ လော့ကျန်း ချက်ချင်း မျက်မှောင်ကျုံ့သွား၏ ။

" မြန်မြန်ထွေးထုတ်လိုက်… ဒါတွေ စားလို့ရတယ်လို့ မင်းကို ဘယ်သူပြောလို့လဲ… "

၎င်းကသူ စုန့်နင်ဖုန်းထံမှ တွေ့ဆုံခြင်းလက်ဆောင်အဖြစ် ရထားခြင်းဖြစ်သည် ။

ဘယ်ကရမှန်းမသိတဲ့ ကျန်းမာရေးထုတ်ကုန်က ဘယ်လိုလုပ်ကောင်းကျိုးရှိနိုင်မှာလဲ…

ထိုအရာကို စားပြီး ဘာမှမဖြစ်လျှင်ပင် တော်တော်ကောင်းနေပြီဟု ပြောရဦးမည်။ သူတို့၏ လော့မိသားစုက ငွေကြေးချို့တဲ့နေခြင်းလည်း မဟုတ်ပေ။ သူတို့သာ ခန္ဓာကိုယ်ကို အမှန်တကယ်ကြံ့ခိုင်အောင်လုပ်ချင်လျှင် ဗီဇတိုးမြှင့်ဆေးဝါးထုတ်လုပ်ရေးကို ငွေအပုံလိုက်ပစ်ပေးလိုက်လို့ရသည်။

လော့ကျန်းက စုန့်နင်ဖုန်းနှင့် အခြားသူများက သူ့ကို ဒုက္ခဖြစ်စေလိမ့်မည်ဟု တွေးနေခြင်းမဟုတ်ပေ။ ထို့ကြောင့်လည်း သက်စောင့်ဆေးကို သူ မလွှင့်ပစ်ခဲခြင်းဖြစ်သည်။ ၎င်းက သူ့ဘာသာသောက်လျှင် ပြဿနာရှိလိမ့်မည်ဟု သူ မထင်ပေ။ သို့သော်လည်း လော့ပေါင်က အလွန်ငယ်သေးပြီး ဖွံ့ဖြိုးဆဲကာလမှာသာ ရှိသေးသည် ။ သူက ဆေး၏ပါဝင်ပစ္စည်းများကို ပိုတုံ့ပြန်နိုင်ချေရှိသည်။

ဒါက သူရဲ့ ဗီဇကို သက်ရောက်မှုရှိရင် ဘယ်လိုလုပ်မလဲ…

မေးစေ့ကို တင်းတင်းကိုင်ထားခံရသော လော့ပေါင်က သူ့ပါးစပ်ထဲတွင် ကျန်သေးသော သက်စောင့်ဆေးကိုသာ ထွေးထုတ်ပြီး ငိုကြွေးလာ၏။

" ဝူးဝူးဝူး...ကိုကြီးက သားကို သဘောမကျတော့ဘူး… ကိုကြီးက အရသာရှိတဲ့ သကြားလုံးကို ဖွက်ထားပြီး သားကိုလည်း မပေးဘူး… ကိုကြီးက သားအပေါ် အကျင့်ပုတ်တာပဲ… သား အမေနဲ့အဖေကို သွားပြောမယ်...."

လော့ကျန်းက အရူးလေးကြောင့် ရယ်မိမတတ်ပင်။

" မင်းဒါကိုစားပြီးတော့ တစ်နေရာရာက မသက်မသာခံစားရသေးလား… မင်းသိချင်တယ်ဆိုလည်း ဘာလို့ ငါ့ကိုမမေးရတာလဲ… အဲ့ဒါက မင်းစားလို့ရတဲ့ဟာလား… စား ၊ စား ၊ စား...မင်းသိတာဆိုလို့ စားဖို့ပဲ… မင်းက အိမ်မှာ ဗိုက်အဆာကို မခံဘူး…"

လော့ပေါင်က တရှုံ့ရှုံ့ဖြင့် ပြောလာ၏ ။

" ဒါပေမဲ့ အဲ့ဒါက အရသာရှိတယ်… ဘယ်နေရာမှ မသက်မသာမဖြစ်တဲ့အပြင် နွေးပြီး နေလို့ကောင်းတယ်…"

လော့ကျန်း ၎င်းကို ကြားပြီးနောက် ပိုပြီး စိတ်မသက်မသာဖြစ်လာ၏ ။

" ဘယ်လိုအရာမျိုးက စားပြီး ခန္ဓာကိုယ်ကို နွေးသွားစေတာလဲ… ဒါနဲ့ ပတ်သက်ပြီး တစ်ခုခုမှားနေတာပဲ ဖြစ်ရမယ်…"

လော့ပေါင်က ဤနှစ်ရက်တွင် B111ဂြိုဟ်ပေါ်၌ သူနှင့်လိုက်နေချင်ကြောင်း ပြောခဲ့သည်။

တကယ်လို့ တစ်ခုခုသာဖြစ်သွားရင်....

သူက လော့ပေါင်ကို ခြေထောက်မှ ပွေ့ချီလိုက်သည်။

" သွားမယ် ဆေးသွားစစ်ရအောင်…"

လော့မိသားစုက ချမ်းသာပြီး အိမ်တွင် ဆေးစစ်သည့်စက်များတပ်ဆင်ထားသည်။ တစ်နာရီအတွင်း လော့ပေါင်၏ ရလဒ် ထွက်လာလိမ့်မည်။

ရလဒ်ကိုကြည့်ပြီးနောက် လော့ကျန်း နားမလည်နိုင်ဖြစ်သွား၏။ သူက မယုံကြည်နိုင်သလို ရလဒ်ကို နှစ်ခါပြန်ကြည့်လိုက်သော်လည်း အဖြေက အတူတူပင်ဖြစ်သည် ။ ထို့နောက် သူက လော့ပေါင်၏ ယခင်ကစစ်ဆေးချက်များကို ပြန်လှန်ကြည့်လိုက်သည်။

'ငါဖတ်တာ မှန်ပါတယ်… ဘာတွေဖြစ်နေတာလဲ…'

လော့ကျန်းက ဆောင့်ကြောင့်ထိုင်ကာ လော့ပေါင်ကို သေချာ ကြည့်လိုက်သည် ။

" လော့ပေါင် မင်းခန္ဓာကိုယ်ထဲမှာ တစ်ခုခုမသက်သာတာ ဖြစ်သေးလား… မင်းငါ့ကို အမှန်တိုင်းပြောရမယ်နော်…"

လော့ပေါင်က မျက်တောင်လေးပုတ်ခတ်ပုတ်ခတ်ဖြင့် နားမလည်နိုင်ဖြစ်နေ၏ ။

" ဟင့်အင်း သားအဆင်ပြေပါတယ် ရရဲ့လား ကိုကြီး … "

လော့ကျန်းက ပြောလိုက်သည် ။

" ရပါတယ် စစ်ဆေးစက်က ပျက်နေပြီ… B1 ဂြိုဟ်ကိုသွားပြီး ထပ်စစ်ကြည့်တာပေါ့… "

စစ်ဆေးစက်ပျက်ခြင်းက တစ်သန်းမှ တစ်ပုံသာဖြစ်လေ့ရှိပြီး လော့ကျန်းသာ ထိုအံ့အားသင့်စရာကောင်းသောရလဒ်ကို ယုံရမည်ထက် စက်ပျက်သည်ဟု ပိုယုံချင်နေသည် ။ သို့သော်လည်း B1ဂြိုဟ်မှပြန်လာသောအခါ လော့ကျန်းက သူ့ကိုချောင်းထိုးထားသော မိဘများကို ခေါ်လိုက်သည် ။

" အဖေတို့အမေတို့ လော့ပေါင်ကို ဗီဇဖွံ့ဖြိုးဆေးတိုက်ထားတာလား… ဒါမှမဟုတ် စိတ်ဝိညာဥ်ပင်လယ်တိုးမြှင့်တဲ့ဆေးတိုက်ထားတာလား… "

လော့စုံတွဲလည်း နားမလည်နိုင်ဖြစ်သွား၏ ။

" လော့ပေါင်က ငယ်ငယ်လေးပဲရှိသေးတယ်… ငါတို့က ဘာလို့ သူ့ကို အဲ့လိုမျိုးတိုက်ရမှာလဲ… ကလေးရဲ့ဗီဇကို အတည်တကျမရှိသေးလို့ အဲ့ဒါမျိုးတွေ တိုက်လို့မရသေးဘူးလို့ ပညာရှင်တွေကပြောတယ်လေ…ပြီးတော့ ဘာတဲ့ စိတ်ဝိညာဥ်ပင်လယ်တိုးမြှင့်တဲ့ဆေး ဟုတ်လား …ဟား...ဟား...ဟား… အဲ့လိုမျိုးသာရှိရင် ငါ့ဘာသာပဲသောက်နေမှာမဟုတ်ဘူးလား…"

စုံတွဲက ပြုံးလိုက်သော်လည်း လော့ကျန်းက အလေးအနက်ဖြစ်နေသေးသည်ကို တွေ့လိုက်ရသောအခါ တစ်ခုခုမှားနေသည်ကို သတိပြုမိလိုက်သည် ။

" ဘာဖြစ်လို့လဲ လော့ပေါင် တစ်ခုခုဖြစ်လို့လား…"

လော့ကျန်းက အရုပ်များဖြင့် စိတ်လွတ်ကိုယ်လွတ် ဆော့နေသော လော့ပေါင်ကိုကြည့်ကာ ပြောလိုက်သည် ။

" အခုတော့ ဘာမှမဖြစ်သေးပါဘူး… B111ဂြိုဟ်က ဆေးစစ်စက်က တစ်ခုခုမှားနေတာပဲဖြစ်မယ်… ပြီးတော့ ကျွန်တော်တို့ အခု B1ဂြိုဟ်ပေါ်က ပြန်လာတဲ့လမ်းမှာ… ပြန်လာမှ ရလဒ်ကို စောင့်ကြည့်ကြတာပေါ့…"

လော့ကျန်းက လောမိသားစုပိုင် starshipဖြင့် ခရီးထွက်နေပြီး ဤကဲ့သို့ အရေးပေါ်အခြေအနေဖြစ်သောအခါ အမြင့်ဆုံးနှုန်းဖြင့် ပြန်မောင်းလာရတော့သည်။

လော့ပေါင်ကို တစ်ကိုယ်လုံး စစ်ဆေးရချိန်၌ လော့မိသားစုက သူတို့အိမ်၏ အငယ်ဆုံးသားလေးတစ်ခုခုဖြစ်မည်ကို ကြောက်ရွံ့နေမိသည် ။

စစ်ဆေးချက်ရလဒ်ပြန်ရောက်လာသောအခါ မိဘနှစ်ယောက်လည်း တစ်ပြိုင်တည်း အာမေဍိတ်ပြုမိသွား၏ ။

" ဒါက ဘယ်လိုလုပ်ဖြစ်နိုင်မှာလဲ…"

လော့ကျန်းလည်း စစ်ဆေးချက်ကို မြင်ပြီး စိတ်ရှုပ်ထွေးနေ၏။ ပထမတစ်ခါစစ်သည်ကို စက်ချို့ယွင်းသည်ဟု ပြော၍ရသော်လည်း အမြဲတမ်း ထိုကဲ့သို့ ဖြစ်နေနိုင်မည်မဟုတ်ပေ ။

၎င်းက ထူးဆန်းနေသော်လည်း အချက်အလက်ကတော့ ဤအတိုင်းပင် ။

လော့ပေါင်၏ ဗီဇအဆင့်က တိုးတက်လာ၏။ ထို့အပြင် သူ့စိတ်ဝိညာဥ်ပင်လယ်၏အားကလည်း အနည်းငယ်လေးတက်လာသည် ။

ယခင်က လော့ပေါင်၏ ဗီဇစံနှုန်းက Aအဆင့်ဖြစ်ပြီး ယခုတွင် S အဆင့်ဖြစ်သည် ။ စိတ်ဝိညာဥ်ပင်လယ်၏ယခင်စံနှုန်းက Aဖြစ်ပြီး ယခုတွင် A+ ဖြစ်သည် ။

ကြယ်တာရာခေတ်လူများတွင် ဗီဇအဆင့်နှင့် စိတ်ဝိညာဥ်ပင်လယ်၏စံနှုန်းတို့က အတက်အကျရှိသည်။ သို့သော်လည်း တက်ရန်ကခက်ပြီး ကျသွားရန်က လွယ်သည်။ အကယ်၍ တစ်ယောက်ယောက်ကသာ ဗီဇအဆင့်နှင့် စိတ်ဝိညာဥ်ပင်လယ်၏စံနှုန်းတို့ ပြင်ပသက်ရောက်မှုမပါဘဲ တိုးတက်သွားမည်ဆိုလျှင် ထိုလူက လူတစ်သန်းမှ တစ်ယောက် ပါရမီရှင်ဖြစ်သည်။ နောက်ဆုံး ထိုသို့ဖြစ်ခဲ့သောသူမှာ နောက်ဆုံးအစိုးရမာရှယ်ဖြစ်သည် ။

ဗီဇဆေးဝါးနှင့် စိတ်ဝိညာဥ်ပင်လယ်တိုးမြှင့်ဆေးတို့က စျေးကြီးလျှင်ပင် အမြဲလိုအပ်ချက်ရှိနေပြီး ခန္ဓာကိုယ်ကို ထိခိုက်စေတတ်သည်။ ဘေးထွက်ဆိုးကျိုးသက်ရောက်မှုနည်းလေလေ ၊ ဆေး၏စျေးက မြင့်လေလေပင်။

အချက်အလက်များအရ စိတ်ဝိညာဥ်တိုးမြှင့်ရေးဆေးများက လူသားများ၏ဦးနှောက်အတွက် ဆန်းကြယ်ပြီး စိတ်ဝိညာဥ်စွမ်းအားအပေါ် သုတေသနလုပ်ငန်းစဥ်များကလည်း ယခုတိုင် ပြီးမြောက်မှုမရှိသေးပေ။ လော့မိသားစုက ဗီဇတိုးမြှင့်ရေးဆေးများကို ဝယ်နိုင်သော်လည်း စိတ်ဝိညာဥ်စွမ်းအားကိုသုတေသနလုပ်ခြင်းတွင်မူ သူတို့လည်း ကိုင်တွယ်နိုင်ခြင်းမရှိပေ။

လော့မိသားစုက တစ်ခဏခန့် နားမလည်နိုင်ဖြစ်သွား၏ ။

" ဒီရလဒ်သာအမှန်ဆိုရင် ငါတို့လော့ပေါင်လေးက ဉာဏ်ကြီးရှင်များ ဖြစ်နေမလား… နောက်ထပ်ဖက်ဒရယ်မာရှယ်များလား…"

လော့ကျန်း : "အမေတို့ မူးနေတာလား… အမေတို့ကသူ့အပေါ်မှာ အဲ့လောက်ယုံကြည်မှုရှိတယ်ပေါ့…"

💫💫💫

Prev Next