MM Story Teller

Chapter 46

Viewers 3k

💫 Chapter 46

"ကျေးဇူးပါပဲ... ခင်ဗျားက လူကောင်းတစ်ယောက်ပါ..."

ရွှီယီနှင့် ချန်ကျီက ဒူကန်းကို ယုံကြည်အားကိုးသော အကြည့်နှင့် ကြည့်လိုက်ကြပြီး အမှန်ပင် ကျေးဇူးတင်ကြောင်း အမူအရာဖြင့် ပြသလိုက်ကြသည်။

ဒူကန်းမှာ စိတ်ဓာတ်တက်ကြွမလာသည့်အပြင် ' သူတို့ကတကယ်ကို ဦးနှောက်မရှိကြဘူး' ဟုသာ တွေးမိတော့သည်။

'လူတကာက လိုချင်လွန်းလို့ ရူးမတတ်ဖြစ်နေရတဲ့ ငါ့ရဲ့ စိတ်ဝိညာဉ်ပင်လယ်အဆင့်မြှင့်ဆေးဝါးကိုကျ ဂရုမစိုက်ကြဘူး... အခု ဘာမဟုတ်ကိစ္စလေးကို လွယ်ကူသွားအောင် ပြောပေးရုံလေး ပြောပေးရတာကိုကျ ဇွတ်အထင်ကြီးနေကြတယ်... ဒါက တကယ်ကို အရမ်းယုတ္တိရှိတာလား...'

ဒူကန်းကိုယ်တိုင် ပေါ်ထွက်လာခြင်းကပင်လျှင် ပထမစစ်တပ်၏ သံသယများကို လွင့်ပြယ်သွားစေရန် မစွမ်းနိုင်ခဲ့ပေ။ ပထမစစ်တပ်မှ ဗိုလ်မှူးဂျိမ်းစ်က ဒူကန်းရှေ့တွင် ရပ်လိုက်ပြီး ဖြစ်ပျက်သမျှကို မေးမြန်းလိုက်သည်။

"ဒူ... ငါသာ မင်းကို မမှတ်မိခဲ့ဘူးဆိုရင် ပြီးတော့ မင်းက ဖက်ဒရေးရှင်းအပေါ်မှာ ဘယ်တော့မှ သစ္စာမဖောက်ဘူးဆိုတာကိုသာ မသိခဲ့ဖူးဆိုရင် မင်းကို သူလျှိုတစ်ယောက်လို့ပဲ တွေးမိမှာ... အဲ့မှာ ဘာတွေများ ဖြစ်ခဲ့ကြတာလဲကွာ..."

ထိုသို့ မေးပြီးသည်နှင့် သူက ဒူကန်း၏ အမူအရာကို စေ့စပ်သေချာစွာ စောင့်ကြည့်နေခဲ့သည်။ သူက ဒူကန်းကို လိမ်ညာပြောမည်ထက် တစ်စုံတစ်ဦးက နောက်ကွယ်မှ ခြိမ်းခြောက်ပြီး ထိန်းချုပ်ထားမည်ကို စိုးရိမ်နေခဲ့သည်။ ထိန်းချုပ်ခံထားရသော အခြေအနေများ ပေါ်ပေါက်လ။မလားဟု တွေးရင်း ဒူကန်း၏ အပြုအမူကို တစ်စမကျန် သေချာစွာ လေ့လာကြည့်ရှုနေလေသည်။

'ဒီလူနှစ်ယောက်က ဘယ်သူတွေလဲ... တကယ်လို့သာ ရိုးရိုးသားသား ပတ်သက်တာမျိုးဆိုရင် ဒူကန်းက ကြားဝင်ပြီး သူတို့ကို အာမခံပေးနေမှာ မဟုတ်ဘူး...'

သူတို့ ဒူကန်းအနီးသို့ မသိစိတ်ဖြင့် ချဥ်းကပ်မိခြင်းက သံသယများကို ပို၍ တိုးပွားစေကြောင်း ရွှီယီနှင့်ချန်ကျီကိုယ်တိုင်ပင် မသိလိုက်ကြချေ။

"ဒီလိုမျိုး ငါက မင်းကိုတောင် သံသယဝင်တယ်လို့ မထင်လိုက်ပါနဲ့... အခု ဖက်ဒရေးရှင်းရဲ့ ခက်ခဲတဲ့အချိန်တွေ ဖြစ်နေလို့ပါ... သူပုန်တွေက မြို့တော်ဂြိုဟ်ပေါ်အထိ ဝင်ရောက်လာပြီးတော့ လူနေရပ်ကွက်ဧရိယာတွေကို တိုက်ခိုက်ခံရလုနီးပါး ဖြစ်သွားတယ်လေ... တကယ်ပဲ မင်း အဲ့လူတွေ လက်ထဲက လွတ်မြောက်ခဲ့တာလား..."

ဒူကန်း၏ အမူအရာမှာ အလွန်အမင်း ရှက်ရွံ့သွားပုံပေါ်သည်။ သူ့ကိုယ်သူ အရာအားလုံးကို နှံ့စပ်သိမြင်သည်ဟု ထင်ခဲ့သော်လည်း လက်တွေ့တွင် ယနေ့ဖြစ်နေသော အခြေအနေများက သူ့စွမ်းဆောင်ရည်နှင့် အလှမ်းကွာသော နေရာအထိ ရောက်ရှိသွားပြီ ဖြစ်သည်။ ထပ်ပြောရလျှင် ရွှီယီနှင့် ချန်ကျီက မည်သူမည်ဝါဟူသော အချက်ကိုပင် သူ ယခုထိ မသိသေးပေ။

"ငါ မင်းကို ဘယ်လိုရှင်းပြရမလဲ မသိဘူး... ဒါပေမဲ့ မင်းသာ ယာဥ်ပေါ်တက်ကြည့်မယ်ဆိုရင် အကုန်တွေ့ရမှာပါ..."

ဒူကန်း၏ စကားများက ဂျိမ်းစ်၏ သိချင်စိတ်ကို လှုံ့ဆော်ပေးလိုက်သည်။ အာကာသယာဥ်ပေါ်သို့ တက်ရောက်လျှင် အန္တရာယ်ကြုံတွေ့မည်ကို ကြောက်ရွံ့ကြသော ကျန်သူများကလည်း ဂျိမ်းစ်ကို ယာဥ်ပေါ်မတက်ရန် ဖျောင်းဖျကြသည်။ သို့သော် ဂျိမ်းစ်က သူတို့ကို ရပ်တန့်စေလိုက်သည်။ ယာဥ်ပေါ်တွင် အန္တရာယ်ရှိပါက ဒူကန်းက သူ့ကို ယာဥ်ပေါ်သို့ တက်ရောက်ခွင့်ပြုမည် မဟုတ်ပေ။

ယာဥ်ပေါ်သို့ ရောက်လာသည်နှင့် တစ်ပြိုင်နက် ဂျိမ်းစ်မှာ အမူအရာကင်းမဲ့သွားသည်။ နေရာတစ်ခုလုံးမှာ ဖမ်းဆီးခံထားရသော လူစုကို စုပြုံထားပြီး ထိုသူများတွင် သွေးများပေကျံနေသူများပါသလို အချို့မှာလည်း ခြေလက်များကို ပိုင်းဖြတ်ခံထားရသည်။ တူညီသောအချက်မှာ အားလုံး၏ အမူအရာများက ခံစားချက်ကင်းမဲ့ကာ စိတ်ပျက်ငေးငိုင်နေကြခြင်းပင် ဖြစ်သည်။ သူတို့က လူစိမ်းတစ်ယောက် ရောက်လာသည်ကို မြင်လိုက်ရချိန်တွင် သူတို့၏ နာကျင်မှုများကို အော်ဟစ်ငိုကြွေးရန် အခွင့်အရေး ရသွားကြသည်။

အကျဥ်းသားများက နောက်ဆုံး၌ စကားပြောနိုင်သွားပြီဖြစ်ရာ ထိုအချိန်တွင် စတင်၍ ငိုကြွေးမြည်တမ်းကြတော့သည်။ လူတစ်ယောက်က ဂျိမ်းစ်၏ ဘောင်းဘီစကို ဆွဲကိုင်ရင်း ပြောလိုက်သည်။

"မကောင်းဆိုးဝါးတွေ... အဲ့လူနှစ်ယောက်က မကောင်းဆိုးဝါးတွေ..."

သူတို့အားလုံးက ဂျိမ်းစ်မှာ ဖက်ဒရေးရှင်းမှ အရာရှိမှန်း သိကြသည်။ သို့သော်လည်း ယခုအချိန်တွင် ရွှီယီ၊ ချန်ကျီတို့နှင့် နှိုင်းယှဥ်လိုက်ပါက ဂျိမ်းစ်က အပြစ်ကင်း၍ ချစ်စဖွယ်ကောင်းနေပေသည်။

အကယ်၍ သူတို့ကို သတ်လိုက်လျှင်ပင် သူတို့က ရွှီယီနှင့် ချန်ကျီတို့၏ အေးစက်ပြီး သူတို့ကို လူသားအဖြစ် မမြင်သော အကြည့်ကြောင့် ခြောက်ခြားနေရဦးမည်ပင်။ ဓားက တစ်ချက်တည်းနှင့် သူတို့၏ စိတ်ဓာတ်ကိုပါ ဖြိုလှဲခဲ့ပြီး သူတို့ လုံးဝမသိနားမလည်သော နည်းလမ်းကိုသုံးကာ သူတို့ကို စကားမပြောနိုင်အောင် လုပ်ခဲ့သည်။ ထိုသို့ မသိခြင်းကို ကြောက်ရွံ့မှုက သူတို့၏ သေခြင်းကို ကြောက်ရွံ့မှုထက်ပင် ကျော်လွန်နေခဲ့သည်။

အနည်းဆုံးအနေဖြင့် ဂျိမ်းစ်ဘေးတွင် ရှိနေခြင်းက သူတို့မှာ ပုံမှန်ကောင်းမွန်သော ကမ္ဘာကြီးတွင် ရှိနေခြင်းဖြစ်သည်ဟုသော ခံစားချက်ရရှိစေသည်။

ဂျိမ်းစ်-"..."

လက်ကို အရင်းမှ ဖြတ်ခံထားရသော လူတစ်ယောက်က သူပုန်စစ်တပ်မှ ဗိုလ်မှူးတစ်ဦးဖြစ်ပြီး ဖက်ဒရေးရှင်းဘက်မှ အလိုရှိနေသူတစ်ဦးဖြစ်ကြောင်း သူသတိထားမိသွားသည်။

အမှန်မှာ သူပုန်များတွင် ကိုယ်ပိုင်ရာထူးအဆင့်နည်းစနစ် ရှိကြသည်။ ထိုသူမှာ ယခင်က သူ့ကိုယ်သူ သတ္တမတပ်မကြီး၏ ဗိုလ်မှူးဟု ပြောလေ့ရှိပြီး ရာထူးအဆင့်နှင့် ပတ်သက်၍ ထိုသူက လိမ်ညာနေခဲ့ခြင်း မဟုတ်ပေ။

'အို...'

ထို့နောက် မျက်စိတစ်ဖက်လပ်နေသော ကွေ့ရှိုးဆိုသော ဓားပြတစ်ယောက်ကို တွေ့လိုက်ရသည်။ ထိုသူသည်လည်း အလိုရှိစာရင်းဝင်တစ်ဦးဖြစ်ပြီး ဂျိမ်းစ်က သူ့ကို သေချာမှတ်မိနေသည်။ ရက်စက်ကြမ်းကြုတ်လှပါသည်ဟူသော အာကာသဓားပြများက ယခုထက်ပိုကောင်းအောင် မတိုက်ခိုက်နိုင်တော့ဟု ထင်ရလေသည်။

"ကဲ... အဲတော့ ဒီလူတွေ ဘာတွေဖြစ်ခဲ့တာတဲ့လဲ...'

ဒူကန်းက ယာဥ်ပေါ်သို့တက်လာပြီး စစ်ဆေးကြည့်ရှုရန် အဘယ်ကြောင့် ဖိတိခေါ်ခဲ့သည်ကို ဂျိမ်းစ် နားလည်သည်။ ထို့ကြောင့်ပင် ထိုလူဆိုးကောင်တို့၏ ကံဆိုးမိုးမှောင်ကျနေမှုကြီးကို မြင်လိုက်ရသောအခါ ဤအာကာသယာဥ်ကို ပုန်ကန်သူများက နှစ်ကြိမ်တိုင်တိုင် စီးနင်းရန် ကြိုးစားခဲ့ခြင်းကို ယုံကြည်ရန် ခက်ခဲနေလေသည်။

အကယ်၍ သူပြောခဲ့သလို ကံဆိုးမိုးမှောင်ကျနေမှုကြီးဟု ပြောခဲ့လျှင် -

'တန်ရာတန်ကြေးကို အကြီးကြီးပေးလိုက်ရတာပဲလေ ဟုတ်လား...'

အထူးသဖြင့် သူတို့က သူပုန်တပ်သားများဖြစ်ပြီး ခံယူချက်ပြင်းပြ၍ စိတ်ဓာတိကြံ့ခိုင်ကြကြောင်း၊ မည်မျှပင် နှိပ်စက်ညှင်းပန်းသတ်ဖြတ်စေကာမူ သူတို့၏ စိတ်ဓာတ်ကို မဖျက်ဆီးနိုင်ကြောင်း အခိုင်အမာ ပြောဆိုလေ့ရှိကြသည်။ ယခုမူ သူတို့က ကြောက်ရွံ့မှုဖြင့် တီကောင်များသဖွယ် ကြမ်းပြင်ဝယ် တွန့်လိမ်နေကြသည်။

ဒူကန်းက လေသံလေးဖြင့် ဂျိမ်းစ်ကို ရှင်းပြသည်။

"ခုချိန်ထိ ငါလည်း သူတို့နှစ်ယောက်အကြောင်းကို ဂဃနဏ ဘာမှမသိရသေးဘူး... ဒါပေမဲ့လည်း ဒါတွေ အားလုံးက သူတို့လုပ်ထားတာတွေပဲမို့လို့ သူတို့ကို စိတ်ဆိုးအောင် အနှောင့်အယှက် ပေးတာက ပညာရှိတဲ့ ရွေးချယ်မှုလို့ ငါတော့ မထင်မိဘူး..."

"အာ ဒါက..."

ဂျိမ်းစ် ခဏမျှ တွန့်ဆုတ်တွေဝေနေသည်။ ထို့နောက် သူက ရွှီယီဆီသို့ လျှောက်သွားပြီး သူ၏စည်းကမ်းကို စိတ်အားထက်သန်စွာ ရှင်းပြလိုက်သည်။

"ခင်ဗျားတို့နှစ်ယောက် အရေးတကြီးသွားစရာ ရှိနေတယ် ကြားတယ်… ဘယ်နေရာကို သွားမယ်လို့ ကျွန်တော်တို့ဆီ စာရင်းသွင်းပေးရင် အဲ့နေရာထိရောက်အောင် လိုက်ပို့ပေးမယ့် အထူးကား စီစဥ်ပေးလို့ရပါတယ်... တပ်ဘက်က အထူးကားဆိုရင် မြို့တော်ရဲ့ ဘယ်လမ်းကိုပဲ ဖြစ်ဖြစ် သွားလို့ရတယ်..."

ရွှီယီနှင့်ချန်ကျီကလည်း သူတို့နှစ်ဦးကို ထိုသူများက အချိန်ကြန့်ကြာအောင် မလုပ်သရွေ့ ရွှေ့နေသော ဇယားကွက်များကို ဂရုမစိုက်ကြချေ။

"ခင်ဗျားတော့ ဒုက္ခများသွားပါပြီ..."

ထိုသူနှစ်ဦးက ပထမအကယ်ဒမီကျောင်းရှိ မက်ခါဌာနတွင် ပညာသင်ယူနေသော ကျောင်းသူတစ်ဦးဆီသို့ အလည်လာခြင်းဖြစ်ကြောင်း ဂျိမ်းစ် သိလိုက်ရသည်။ ကျန်ရှိနေသေးသော သူ၏ စိုးရိမ်ပူပန်မှုမှာ ထိုအကြောင်းနှင့်အတူ လျော့ပါးသွားခဲ့သည်။ ပထမအကယ်ဒမီကျောင်းမှ ကျောင်းသားအားလုံးနီးပါးက နောင်တစ်ချိန်တွင် ဖက်ဒရေးရှင်းပြည်ထောင်စု၏ သစ္စာရှိ အမာခံကျောရိုးများ ဖြစ်လာကြမည် ဖြစ်ရာ ထိုကျောင်းသားမျိုး၏ မိဘအုပ်ထိန်းသူဖြစ်ခြင်းကြောင့် အချို့အချို့သော ပြဿနာများမှာ လျော့နည်းပျောက်ကွယ်သွားမည်သာ ဖြစ်သည်။

ထိုသူနှစ်ဦးကို မည်သို့မည်ပုံ စီမံသင့်သည်ကို အတိအကျ မသိသော်လည်း ဤသည်က သူတို့နှစ်ဦးနှင် အဖွဲ့ကျမှုမှ ဂျိမ်းစ်ကို တားဆီးမထားနိုင်ပေ။ အထူးတလည် ခင်မင်သော အပြုအမူအဖြစ် ဂျိမ်းစ်က Hoverကားကို ကိုယ်တိုင်ကိုယ်ကျ မောင်းနှင်ကာ သူတို့နှစ်ဦးကို ပထမအကယ်ဒမီကျောင်းသို့ လိုက်ပို့လေသည်။

"ဒါပေမဲ့ ခင်ဗျားတို့ အခု အဲ့ကျောင်းကို သွားလဲ ကျောင်းသူကျောင်းသားတွေက အဲ့မှာ မရှိလောက်ဘူး... အခုအချိန်က မြို့တော်ဂြိုဟ်မှာ စစ်အုပ်ချုပ်ရေးအမိန့်ထုတ်ပြန်ထားတာဆိုတော့ မက်ခါမောင်းနှင်ထိန်းချုပ်ရေးဌာနက ကျောင်းသူကျောင်းသားတွေကိုလည်း ဆွဲခေါ်ထားလောက်တယ်..."

ရွှီယီက မျက်မှောင်ကြုံ့လိုက်သည်။

" ဒီမှာက လုပ်ကိုလုပ်ရမယ်လို့ စည်းကမ်းထုတ်ထားတာလား..."

ထိုကဲ့သို့သာဆိုလျှင် ဆာ့ဆာ့ကို ကျောင်းတက်ခွင့်ပြုမိခြင်းအတွက် သူအနည်းငယ် နောင်တရမိပေမည်။

"မဟုတ်ဘူး... မဟုတ်ဘူး... မဟုပ်ရပါဘူး... စစ်ဘက်ဆိုင်ရာကျောင်းတွေမှာပဲ အရေးပေါ် လူသစ်စုဆောင်းမှုတွေရှိတာပါ... စစ်ဘက်ဆိုင်ရာမဟုတ်တဲ့ ကျောင်းတွေက မလုပ်ရဘူးလေ... ဒါပေမဲ့ မက်ခါစစ်သားတွေဆိုတာ အခြေခံ စိတ်သဘောထားမှာကိုက တာဝန်ယူစိတ်နဲ့ ကာကွယ်လိုစိတ် ရှိကြတယ်လေ... မက်ခါအမောင်းသင်နေကြတဲ့ လူငယ်တွေကလည်း အခြေခံအားဖြင့် စိတ်အားတက်ကြွနေကြတာကို... ပြီးတော့ ဖက်ဒရေးရှင်းမှာ အကျပ်အတည်း ကျရောက်နေတဲ့ အချိန်ဖြစ်နေတော့ သူတို့တွေလည်း တာဝန်ထမ်းဆောင်ဖို့ အချိန်ရောက်လာတာပေါ့..."

ရွှီယီက အတန်ကြာအောင် စဥ်းစားနေပြီး စိတ်သက်သာရာရသွားဟန်ဖြင့် ပြောလိုက်သည်။

"အိုး...ဒါဆိုရင်တော့ သူ(မ) မလုပ်လောက်ပါဘူး..."

ဆာ့ဆာ့ ဤနေရာသို့ ရောက်ရှိလာသည့်အချိန်မှာ မကြာမြင့်သေးကြောင့် ရွှီယီကဲ့သို့ပင် ဖက်ဒရေးရှင်းနှင့် ပတ်သက်၍ လေးနက်သော ခံစားချက်များ မရှိနိုင်ပေ။ အာကာသဓားပြများ၊ ဖက်ဒရေးရှင်းအဖွဲ့ကြီးသာမက သူပုန်များကပင် သူ့ကို စိတ်ရှုပ်အောင် မလုပ်နိုင်ချေ။ သူမက လမ်းဘေးမှ သာမာန်မြက်တစ်ပင်မဟုတ်ပေ။

ဂျိမ်းစ်-"..."

'ဘာမို့လို့ ဒီလိုစိတ်အေးလက်အေး လေသံနဲ့ပြောနိုင်တာလဲ... ငါ့လို ဖက်ဒရေးရှင်းပြည်ထောင်စုရဲ့ အရာရှိတစ်ယောက်ရှေ့မှာ အဲ့လိုပြောတာ အဆင်ပြေနေတယ်ထင်လား...'

Hoverကားက ပထမအကယ်ဒမီကျောင်းအနီးတွင် ရပ်လိုက်သည်။

ထိုအခိုက်တွင် စစ်မှုထမ်းရန် သတင်းပို့ထားသော ကျောင်းသားတစ်စုက ပထမအကယ်ဒမီကျောင်းထဲမှ ထွက်လာကြသည်။ ထိုအထဲမှ ပြုံးရွှင်နေသော ကလေးမျက်နှာနှင့် မိန်းကလေးတစ်ယောက်မှာ စိတ်လှုပ်ရှားစွာဖြင့် ရွှီယီကို လက်ဝှေ့ယမ်းပြနေသည်။

ရွှီယီ-"..."

ရွှီယီ သူ့မျက်နှာကို ဖြတ်ရိုက်ခံလိုက်ရသည့်နှယ် ခံစားလိုက်ရသည်။

*****

အာကာသဓားပြများ နှင့် ပုန်ကန်သူများ အင်အားစုပေါင်းလိုက်သည့်သတင်းကို မကြေညာရသေးသော်လည်း ဖက်ဒရေးရှင်းပြည်ထောင်စု၏ စစ်တပ်ကင်းလှည့်ဧရိယာများကို အင်အားထပ်တိုးလိုက်သည်။ ယခုချိန်သူတို့ လုပ်နိုင်သည်က အကယ်ဒမီကျောင်းရှိလူများကို စစ်တိုက်ရန် စုရုံးလိုက်ခြင်းသာရှိသည်။

စစ်တပ်အကယ်ဒမီကျောင်းရှိ ကျောင်းသားများက အတင်းဆွဲသွင်းခံရသည့်အပြင် သာမန်အကယ်ဒမီကျောင်းရှိ မက်ခါတိုက်ရေးသမားများနှင့် မက်ခါပညာရှင်များကိုမူ ကူညီပေးရန် တောင်းဆိုသည့်စာများ ပေးပို့ထားပြီး သူတို့စိတ်တိုင်းကျလုပ်အားပေးရန် စာရင်းသွင်းနိုင်သည်။ သူတို့ကို မဖြစ်မနေဥပဒေပြဌာန်းကာ ဖိအားပေးမည်မဟုတ်ပေ။

သို့သော် မက်ခါတိုက်ရေးသမားများက ဖက်ဒရေးရှင်း၏ ရင်းနှီးမြှုပ်နှံမှုအကြီးစားကို သဘောကျပြီး သာမန်လူတစ်ယောက်ထက်ပိုသည့် တာဝန်ယူလိုစိတ်ရှိကြသည်။ သူတို့က မက်ခါစတင်ပေါ်ပေါက်လာကတည်းကပင် လူသားများကို ကာကွယ်ရန်ဖြစ်လာခြင်းပင်။ သူတို့ အနာဂတ်တွင် စစ်တပ်ထဲမဝင်ဖြစ်ဘူးဆိုလျှင်ပင် သာမန်နိုင်ငံသားများကို ကာကွယ်ပေးရမည်ဟူသော အသိရှိကြသည်။

ကူညီပေးရန် တောင်းဆိုသည့်စာက ဆာ့ဆာ့၏ စက္ခုကွန်ရက်သို့လည်း ဝင်လာ၏။ ဆာ့ဆာ့က ချက်ချင်း စာရင်းသွင်းလိုက်သည်။ သူမက အားစိုက်ပါဝင်ပေးမည်ပင်။

ကျင့်ကြံရေးကမ္ဘာ၌ စစ်မှန်သောအင်အားက သေရေးရှင်ရေးကိစ္စများတွင်သာ တိုးတက်လာနိုင်သည်။ ဆာ့ဆာ့၏ စီနီယာအစ်ကိုများက ပင်ပန်းသောလေ့ကျင့်ရေးများဆင်းကာ အရေးကြုံသည်နှင့် ပါဝင်ရသည်။ တစ်ယောက်တည်းသန်မာနေခြင်းက အမှန်တကယ်အထင်ကြီးစရာကောင်းသူဟု မသတ်မှတ်နိုင်ပေ။

ယခုတွင် သူမလည်း တိုက်ပွဲအစစ်အမှန်မှတစ်ဆင့် သန်မာရန် လိုအပ်လာပြီဟု တွေးမိသည် ။

စုန့်နင်ဖုန်းနှင့် ရှဲ့ရုန်က သဘောမတူကြပေ။ သူတို့၏ အတွေးကလည်း ရွှီယီနှင့် အတူတူပင် ဖြစ်၏။ ဖက်ဒရေးရှင်း၌ ဖြစ်လာသည့်ကိစ္စများက သူတို့အတွက် အနည်းငယ်သာ စိတ်ပူစရာရှိသည် ။

' သစ္စာတရားနဲ့ တာဝန်ကို ဗန်းပြပြီးတော့ ဆာ့ဆာ့ကို သူ့ရဲ့ကိုယ်ပိုင်ဘဝပါ စတေးအောင်လုပ်နေတာပဲ...ဒီဖက်ဒရေးရှင်းကတော့ တကယ်လုပ်ရဲကိုင်ရဲနေတာပဲ...'

စုန့်နင်ဖုန်းက ပြောလိုက်သည် ။

" ဆာ့ဆာ့...မင်းအပိုင်းအတွက် မင်းလုပ်ချင်တယ်ဆိုရင်လည်း ငါတို့ကိုယ်စားလုပ်ပေးပါမယ်..."

' ဒါက ကျူးကျော်လာသူတွေကို မောင်းထုတ်ပေးရုံလေးပဲ မဟုတ်ဘူးလား...ငါက မက်ခါတိုက်ခိုက်ရေးသမားမဟုတ်ပေမဲ့ ငါလည်း လုပ်နိုင်တာပဲ...'

ဆာ့ဆာ့ မည်မျှမျက်နှာသာပေးခံရသည်ကို တွေ့သွားသော လီချန်ယွီက တွေးလိုက်သည်။

' သာ့ရှန်က အလိုလိုက်ခံရပြီး ကြီးပျင်းလာရတာ...သူ့အတွက် ဒီအခြေအနေက မလွယ်လောက်ဘူး...'

ဆာ့ဆာ့မှာ အကယ်ဒမီက ပထမသင်ခန်းစာ၌ ဝ

ဖက်ဒရေးရှင်းပြည်ထောင်စုကြီး တည်ထောင်ပုံ၏ နောက်ခံသမိုင်းကို သင်ယူခဲ့ရပြီး စွမ်းစွမ်းတမံဆောင်ရွက်ခဲ့ကြပုံမှတ်တမ်းများကို တွေ့မြင်ခဲ့ရသည်။ သူမ၏ အတွေးများက အစ်ကိုနှစ်ယောက်၏ အတွေးနှင့် ကွာခြားသည်။ ၎င်းက နိုင်ငံရေး ၊ အစိုးရပြဿနာများနှင့် မသက်ဆိုင်ပေ။ သူမက ဖက်ဒရေးရှင်း၏ ဥပဒေစည်းမျဥ်းများကို ထောက်ခံအားပေးခြင်း ၊ အားမပေးခြင်းနှင့်မသက်ဆိုင်ဘဲ လူသားများအတွက် လမ်းခင်းပေးခဲ့သော သူရဲကောင်းများကို သူမ လေးစားအားကျသောကြောင့်သာ။ သူမက မက်ခါတိုက်ခိုက်ရေးသမားများ၏ အတွေးအခေါ်ကို သဘောကျသည်။ သူတို့က ကြီးမားသောတာဝန်ယူမှုဖြင့် ကြီးမားသော လုပ်ဆောင်နိုင်စွမ်းများ ရှိကြသည် ။

ကမ္ဘာကြီးမြင်နိုင်ရန် အပြင်ထွက်လာရခြင်းထက် သူမ၏ အပိုင်းကို သူမကိုယ်တိုင်သာ လုပ်ဆောင်ချင်သည်။ သူမက ပထမဆုံးဘက်စုံအကယ်ဒမီကျောင်းသို့ လာရောက်ခဲ့ပြီး ဖက်ဒရေးရှင်းနိုင်ငံသားများ၏ အခွန်ငွေများဖြင့် ပေးအပ်သော အထောက်အပံ့တို့ကို ရယူခဲ့သည်။

ငါသာ အခုစစ်ပွဲကို ရှောင်လိုက်မယ်ဆိုရင် ဘယ်လိုလူမျိုး ဖြစ်သွားမလဲ...

သူမကိုယ်တိုင် လုပ်နေမည်ထက် သူမအစ်ကိုများကို တောင်းဆိုလိုက်ခြင်းက ပိုလွယ်ကူမည်ကို ဆာ့ဆာ့သိသည်။ သို့မဟုတ် သူမ၏ ဆရာကို အကူအညီတောင်းလိုက်လျှင်လည်း မည်သူကမှ ၎င်းကို လုပ်စရာလိုတော့မည် မဟုတ်ပေ။

သို့သော် အကြောင်းတစ်ခုခုရှိလာတိုင်း သူမက သူမ၏ဂိုဏ်းကိုသာ အကူအညီတောင်းနေ၍ မရပေ။ သူတို့က ငြင်းဆိုမည်မဟုတ်ကြောင်းကို သူမ သိသော်လည်း ကွာခြားချက်ကို ဆာ့ဆာ့က သိသည်။ သာမန်ပြည်သူများကို ကာကွယ်ပေးရန် တာဝန်က သူမ၏ ဆန္ဒသာဖြစ်သည်။ သူမကသာ သူတို့ကို တောင်းဆိုလိုက်လျှင် သူတို့က သူမ၏ ဆန္ဒကြောင့်သာ ဖြည့်ဆည်းပေးရခြင်း ဖြစ်လိမ့်မည်။

ထို့နောက် ဆာ့ဆာ့က ပြောလိုက်သည် ။

" စိတ်မပူပါနဲ့...စီနီယာအစ်ကိုကြီး...အစ်ကိုပေးထားတဲ့ အဆောင်စာရွက်နဲ့ ဂါထာတွေအားလုံး ဒီမှာရှိပါသေးတယ်...ပြီးတော့ ကျွန်မရဲ့ အင်အားနဲ့ဆိုရင် အန္တရာယ်ကြုံရမှာ မဟုတ်ပါဘူး...ပြီးတော့ ဒါက ကျွန်မ ကိုယ်တိုင်လုပ်ချင်တာပါ...ကျွန်မအတွက် လုပ်ပေးဖို့ အစ်ကိုတို့ကို တောင်းဆိုတယ်ဆိုတာ မသင့်တော်ပါဘူး..."

ဘေး၌ရပ်နေသော လီချန်ယွီက သူ့ရင်ဘက်ကို ပုတ်ကာ အာမခံလိုက်သည်။

" စီနီယာဦးလေး...ကျွန်တော်လည်း ဒီတစ်ကြိမ်ကူညီပေးဖို့ စာရင်းသွင်းထားတယ်...သာ့ရှန်ကို ကျွန်တော် ကာကွယ်မှာပါ..."

စုန့်နင်ဖုန်းက စိတ်ရှည်သည်းခံတတ်သောသူဖြစ်ပြီး လီချန်ယွီကို ညင်သာစွာကြည့်လိုက်သည်။

" မင်းမှာ ဒီလိုစိတ်မျိုးရှိတဲ့အတွက် ကောင်းပါတယ်..."

ရှဲ့ရုန်က အနည်းငယ်ပွင့်ပွင့်လင်းလင်းရှိပြီး ကရားရေလွှတ်ပြောလာ၏ ။

" ဆာ့ဆာ့ နားကနေ မခွာနဲ့နော်... သူ့မှာ မင်းလို တပည့်တစ်ယောက်ပဲရှိတာ..."

ဆာ့ဆာ့က အဆောင်စာရွက်များစွာကို ထုတ်ကာ လီချန်ယွီကို ပေးလိုက်သည်။

" ဒီမှာ...အခုဆို ရှင်အများကြီး ပိုလုံခြုံသွားပြီ..."

လီချန်ယွီ : ' ကျေးဇူးပါပဲ...အရမ်းအန္တရာယ်ကင်းသွယးပြီ... ငါက အမျိုးသမီးတစ်ယောက်ဆီကနေ ကာကွယ်ပေးခံနေရတာပဲ....'

မက်ခါမေဂျာအဖွဲ့တွင် ပထမနှစ်လုပ်အားပေးသူများကို ချန်ရှန်းက ဦးဆောင်သည်။ ၎င်းက လုပ်အားပေးဖြစ်သော်လည်း မက်ခါတိုက်ခိုက်ရေးမေဂျာရှိလူတိုင်းလိုလို စာရင်းသွင်းကြသည်။ ဆာ့ဆာ့ကဲ့သို့ အပြင်လူပင် တာဝန်ယူလိုစိတ်ရှိလျှင် သူတို့ကို ပြောစရာပင်မလိုတော့ချေ။ အကယ်၍ အန္တရာယ်ကို ကြောက်နေလျှင် သူတို့ အစကတည်းက မက်ခါတိုက်ခိုက်ရေးသမားဖြစ်လာရန်ကို မရွေးချယ်သင့်ပေ။

💫💫💫

Prev Next