MM Story Teller

Chapter 63

Viewers 3k

💫 Chapter 63

စတားကွန်ရက်စနစ်က ချို့ယွင်းနေပြီး ယခုအချိန်တွင် အရေးပေါ်ပြင်ဆင်မှုများပြုလုပ်နေ၍ အားလုံးစိတ်အေးအေးထားပေးရန် ဖက်ဒရေးရှင်းဘက်မှ အရေးကြီးသတင်းအဖြစ် အသိပေးလာ၏။

သို့သော် ဤဖြေရှင်းချက်က မလုံလောက်သေးသည်မှာ သိသာ၏။

ဖက်ဒရေးရှင်းက ဤတစ်ကြိမ်လည်း အရေးပေါ်အခြေအနေထဲတွင် ကျရောက်နေပြီး ယခုတစ်ခေါက်တွင် ရန်သူက မည်သူလဲဆိုသည်ကိုပင် မသိရသေးပေ။ ၎င်းက ပို၍ ထိတ်လန့်စရာကောင်း၏။

မာရှယ်လီမင်က ချန်မိသားစုကိုပါ တိတ်တဆိတ်ထောက်လှမ်းနေပြီး မူမမှန်သည့် တစ်စုံတစ်ရာတွေ့ရှိပါက သူ့ကိုချက်ချင်းပြန်တင်ပြရန် သူ့လက်အောက်ငယ်သားကို အမိန့်ပေးလိုက်သည်။

ဟယ့်ဝိန်က မပြောဘဲမနေနိုင်တော့ပေ ။

" မင်းက အခု ချန်သာ့ယိုကို သံသယဝင်နေတာလား...ချန်မိသားစုက တစ်ကိုယ်ကောင်းဆန်တတ်တယ်ဆိုပေမဲ့ ဒီလိုကိစ္စမျိုးကိုတော့ လုပ်လောက်မှာ မဟုတ်ပါဘူး..."

" မဟုတ်ဘူး...ကျုပ်က လူတိုင်းအပေါ်ကို သံသယရှိနေတာ...ပြီးတော့ ချန်မိသားစုက စတားကွန်ရက်နဲ့ သက်ဆိုင်နေတဲ့အတွက် သံသယဝင်ဖို့အကောင်းဆုံးပဲ..."

ဤအချိန်တွင် ဆာ့ဆာ့ မူးဝေဝေဖြစ်နေရာမှ သတိရလာပြီး သူမ၏ ပတ်ဝန်းကျင် ဘေးပတ်ပတ်လည်က ပြောင်းလဲသွားသည်ကို တွေ့လိုက်ရသည်။ သူမရောက်နေသော နေရာက အာကာသမြေပုံမှ လူနေကင်းမဲ့ပြီး ယိုယွင်းပျက်စီးနေသော ဂြိုဟ်ကြီးတစ်ခု ဖြစ်နေ၏။ ယခုက သုံးဖက်မြင်စနစ်ထဲ၌သာ ရှိနေသေးသည်ကို သူမ သတိထားမိသည်။ ဤသို့ဆိုလျှင် သူမ၏ စိတ်ဝိညာဥ်ကသာ ဤနေရာသို့ ရောက်ရှိနေခြင်းဖြစ်သည်။ သို့သော် ပြိုင်ပွဲကွင်းမှ ရုတ်တရက်ကြီး ဤနေရာသို့ မည်သို့များ ပို့ဆောင်ခံလိုက်ရသည်ကို သူမ နားမလည်နိုင်ပေ။

ကောင်းကင်တစ်ခုလုံးကလည်း မှောင်ရိပ်သန်းနေပြီး အပြင်ဘက်ကို သူမ လုံးဝ မမြင်ရပေ။ ဆာ့ဆာ့ မက်ခါဖြင့် ပျံထွက်ကြည့်ရန် လုပ်လိုက်သော်လည်း မမြင်ရနိုင်သော အကာအရံဖြင့် တိုက်မိသွား၏။ သူမ ထိုအကာအရံကို စိတ်ဝိညာဥ်အာရုံဖြင့် ထိုးဖောက်ရန်ကြိုးစားကြည့်သော်လည်း သူမ၏ စိတ်ဝိညာဥ်အာရုံတစ်ပိုင်းတစ်စကို ထိုအကာအရံက ဆွဲငင်သွားပြီး ချက်ချင်းပျောက်သွားသည်။

ဆာ့ဆာ့၏ နှလုံးသားမှာ ချောက်ထဲသို့ပြုတ်ကျသွားသည့်အလား ထပ်စမ်းကြည့်ရန်ကိုပင် ကြောက်သွား၏။ သူမက ဖြည်းဖြည်းနိမ့်နိမ့်သာ ပျံနေရင်း ပတ်ဝန်းကျင်ကို စူးစမ်းရှာဖွေကြည့်လိုက်သည်။ သူမ ဤနေရာသို့ရောက်မလာမီ သူမ၏ အသင်းသားများနှင့် အတူတူရှိနေခဲ့ခြင်း ဖြစ်သည်။

သူတို့၏ အခြေအနေ ဘယ်လိုရှိသည်ကိုလည်း သူမ မသိရပေ။

' သူတို့လည်း ငါ့လိုပဲ ဒီနေရာကို ရောက်နေမလား...'

ထိုသို့ သာဆိုလျှင် သူတို့ကို သူမချက်ချင်း ရှာမှဖြစ်မည်။

ထို့နောက် မက်ခါဝတ်ထားသောသူများ မြေပြင်ပေါ်၌ ဟိုတစ်နေရာ သည်တစ်နေရာ လဲကျနေသည်ကို ဆာ့ဆာ့တွေ့လိုက်ရသည်။

ထိုလူများက သူမ၏ အသင်းတစ်သင်းတည်းမဟုတ်ပေ။

' ပြိုင်ပွဲထဲမှာပါတဲ့ အဖွဲ့တွေအားလုံးကို ဒီကိုရောက်လာတာလား...'

အခြေအနေက သိသိသာသာပင် ပိုဆိုးရွားနေ၏။

တစ်ယောက်ပြီး တစ်ယောက် သတိပြန်လည်လာသည်ကို ဆာ့ဆာ့တွေ့လိုက်ရပြီး လူများကို အတူတူရှာရန် သူတို့ကို တောင်းဆိုလိုက်သည်။ ဤနေရာက မည်မျှကျယ်ပြန့်သည်ကို သူမ မသိသလို လူများကလည်း ပြန့်ကျဲနေ၏။ သူမ၏ စိတ်ဝိညာဥ်အာရုံကိုလည်း ဆာ့ဆာ့ အသုံးမပြုရဲတော့ပေ။ သူမတစ်ယောက်တည်း လူများကို လိုက်ရှာနေပါက အချိန်တော်တော်ကြာသွားလိမ့်မည်။

စစ်တပ်အကယ်ဒမီရှိ ကျန်းဖုန့်မှာ ကံကောင်းပြီး ဆာ့ဆာ့ ဒုတိမြောက်ရှာတွေ့သည့်သူ ဖြစ်သည်။ သူ့မျက်လုံးဖွင့်ဖွင့်ချင်း ဆာ့ဆာ့ကိုမြင်လိုက်ရသည်နှင့် တိုက်ခိုက်ရန်ပြင်တော့သည်။

" မင်းတို့ ပထမဘက်စုံအကယ်ဒမီကျောင်းက လူတွေက သစ္စဖောက်တွေပဲ...လှည့်ကွက်တွေတောင် သုံးဖို့လုပ်လိုက်သေးတယ်...ငါတို့က ဘယ်တော့မှ အညံ့ခံမှာမဟုတ်ဘူး..."

ကျန်းဖုန့် သူ့ဘက် ခုန်အုပ်မလာမီ ဆာ့ဆာ့က သူ့ကို မာကျောသောကျောက်စိုင်ပေါ်၌ ဖိထားလိုက်သည်။

" နင် သေချာသတိမလည်သေးရင်လည်း ဆက်ပြီးလှဲနေလိုက်တော့..."

နောက်ဆုံး၌ တစ်ခုခုမှားနေကြောင်းကို ကျန်းဖုန့်သတိပြုမိသွား၏။ ပြိုင်ပွဲ၏ မြေပုံက အာကာသထဲတွင် ဖြစ်သင့်သော်လည်း သူတို့က လက်ရှိတွင်မြေပြင်တစ်ခုပေါ်၌ ရောက်နေကြောင်း ထင်ရှား၏ ။

" ငါ့ကို အရင်ဆုံးလွှတ်ပေးပါဦး...အေးဆေးပြောလို့မရဘူးလား..."

ကျန်းဖုန့်က ရုန်းလေလေ ဆာ့ဆာ့က သူ့မှာပုန်ကန်ချင်စိတ်ရှိသည်ဟု တွေးမိလေလေပင်။ ထို့ကြောင့် သူ့ကို သူမ လွှတ်မပေးပေ။ ကျန်းဖုန့် ရုန်းကန်နေခြင်းရပ်သွားမှ သူ့ကို လွှတ်ပေးလေ၏။ ကျန်းဖုန့် ဒေါသထွက်နေသော်လည်း ဘာပြော၍ပြောရမှန်း မသိချေ။ ဆာ့ဆာ့ သူ့ကို တမင်ချုပ်ထားသည်ဟု သံသယဝင်မိပြီး သက်သေပြစရာများလည်း သူ့မှာရှိသည်။

သို့သော် ဆာ့ဆာ့ နှင့်စာရင်းရှင်းရန် လက်ရှိတွင် အချိန်မရသေးပေ။ သူ့စိတ်ထဲ မေးခွန်းပေါင်းမြောက်များစွာ ရှိနေ၏။

" ဘာတွေဖြစ်နေတာလဲ...ငါတို့ကရော အခုဘယ်နေရာကို ရောက်နေတာလဲ...ငါ့ရဲ့ အသင်းသားတွေကရော..."

ဆာ့ဆာ့ ပုခုံးသာလှုပ်လိုက်သည်။

" ငါသိသလောက် ပြိုင်ပွဲအတွင်း မတော်တဆမှုတစ်ခုခုဖြစ်သွားတာပဲ...ပြိုင်ပွဲဝင်တွေအားလုံး ဒီလူသူမဲ့ဂြိုဟ်ပေါ်ကို အပို့ခံလိုက်ရတာ ဖြစ်နိုင်တယ်...ဘာပဲဖြစ်ဖြစ် အရင်ဆုံး လူတွေကို လိုက်ရှာရအောင်...ပြီးရင် ငါအနီရောင်အမှတ်အသားလုပ်ထားတဲ့ နေရာမှာ ပြန်ဆုံကြမယ်...နားလည်လား..."

ပုံမှန်အခြေအနေသာဆိုလျှင် ကျန်းဖုန်းက ဆာ့ဆာ့ကို ဤသို့ ပြန်ထေ့ငေါ့ပြောမိလောက်သည်။

' နင်က ဘယ်သူမို့လို့ ငါ့ကို အမိန့်လာပေးနေရတာလဲ...နင်က ဘာအဆင့်များရှိနေလို့လဲ...'

သို့သော် ယခုချိန်တွင် ကျန်းဖုန့်က အလေးအနက်ထားရမည်ကို သိနေ၏။

" ကောင်းပြီ..."

ဤအခြေအနေမျိုးကို သူ ယခင်က ကြားလည်းမကြားဖူးသလို ကြုံလည်းမကြုံဘူးပေ။ မည်သည့်အချိန်၌ ကယ်ဆယ်ရေးများလွှတ်ပေးမည်ကိုပင် သူ မသိချေ။ ယခုလက်ရှိ သူတို့လွတ်မြောက်နိုင်ရန်အတွက် သူတို့ကိုယ်သူတို့ ကယ်တင်ရန်သာ ရှိသည်။

ခဏမျှ လမ်းလျှောက်လာပြီးနောက် တစ်ခုခုမှားနေသည်ကို ကျန်းဖုန့်သိလိုက်ရသည်။

' ငါက ဘာမှမဟုတ်တာအတွက် အရိုက်ခံလိုက်ရတာလား...'

၎င်းက သူ့ကို ကျောက်စိုင်ပေါ်တွင် ဆာ့ဆာ့ ဖိထားသောကြောင့်လား မပြောတတ်ပေ။ သူ့ခေါင်းက နာနေပြီး အနည်းငယ်မူးဝေနေ၏။

မကြာမီတွင် လုချန်းမင် ၊ ကျန်းချန် နှင့် အခြားလူများ တစ်ယောက်ပြီးတစ်ယောက်ကို ဆာ့ဆာ့ရှာတွေ့ခဲ့သည်။ သူတို့အတူတကွသွားရန် ဆုံးဖြတ်လိုက်၏။ သူတို့ ဝေးဝေးသွားပြီးနောက် အချို့လူများက သူတို့ဘာသာသတိလည်နှင့်နေကြောင်း ဆာ့ဆာ့ သိလိုက်ရသည်။ သူမ ဟယ့်ချောင်ယွမ်ကို ရှာတွေ့စဥ်ကဆိုလျှင် သူက လူများကိုပင် လိုက်ရှာနေ၏။ လူတစ်ယောက်၏ စိတ်ဝိညာဥ်စွမ်းအားက အားကောင်းလေလေ နိုးထလာရန် ပိုမြန်လေလေပင်။

ဆာ့ဆာ့နှင့် အခြားသူများကိုပါ တွေ့လိုက်ရမှ ဟယ့်ချောင်ယွမ် စိတ်အေးသွား၏။

" ငါအခုပဲ နင်တို့ကို လိုက်ရှာတော့မလို့..."

ဆာ့ဆာ့က လက်ရှိအခြေအနေကို အကြမ်းဖျင်းရှင်းပြလိုက်သည်။

ဟယ့်ချောင်ယွမ်က သက်ပြင်းချလာ၏။

" ဒါ မကောင်းဘူးနော်... ဒီလို အခြေအနေမျိုး ငါတစ်ခါမှ မကြားဖူးဘူး..."

ဟယ့်မိသားစုကဲ့သို့ မိသားစုကြီးကပင် ဤအခြေအနေကို ကြားဖူးနားဝမရှိလျှင် သာဓကပြစရာလည်း မရှိသည့်အတွက် သူတို့ ဘာလုပ်၍လုပ်ရမှန်း မသိကြတော့ချေ။

ကျန်းချန်က ကြိမ်းမောင်းလာ၏။

" ငါတို့ဒီကနေ ထွက်လို့ရတာနဲ့ စတားကွန်ရက်ကို အမှုဖွင့်ရမယ်...ဒီတစ်ကြိမ်တော့ ချန်မိသားစုကျရှုံးပြီပဲ..."

ထိုသို့ပြောပြီးနောက် သူကိုယ်တိုင်ပင်လျှင် တိတ်ဆိတ်သွား၏။ ဤနေရာမှ မည်သို့ထွက်ရမည်ကို သူတို့တစ်ယောက်မှ စဥ်းစားမရသေးချေ။

အစောပိုင်းက မမြင်ရသောအကာအရံကို ကျန်းချန်က သူ့စွမ်းအင်အမြောက်ဆံ၏ အမြင့်ဆုံးမီးစွမ်းအားနှင့် စမ်းသပ်ကြည့်ခဲ့သော်လည်း အကာအရံက အစင်းရာပင် ထင်မသွားပေ။

ထို့နောက် ဆာ့ဆာ့ပြောလာ၏။

" ငါတို့အရပ်မှာဆိုရင် ဒီလိုနေရာကို ဝိညာဥ်သန့်စင်တဲ့မြေပြင်လို့ ခေါ်တယ်..."

ဆာ့ဆာ့က အမှန်တွင် ဤနေရာအကြောင်း လုံးဝမသိထားခြင်း မဟုတ်ပေ။ သူမက ကျန်းဖုန့်ကဲ့သို့ သူစိမ်းရှေ့တွင် သူမ၏ လျှို့ဝှက်ချက်ကို ထုတ်ဖော်မပြချင်ခဲ့ရုံသာ။ သူတို့အတွက် သိထားသည့်အရာများလေလေ ပိုဆိုးလေလေပင်။

သို့သော် ဆာ့ဆာ့က သူမ၏ အသင်းသားသုံးယောက်ကို ယုံကြည်၏။ သူမက အားလုံးစဥ်းစားကြည့်၍ရအောင် ယခုအခြေအနေတွင် အကျိုးရှိစေမည့် သူမ သိထားသမျှအကြောင်းအရာများကို ပြောပြလိုက်သည်။

ကျင့်ကြံရေးကမ္ဘာတွင် စိတ်ဝိညာဥ်အသိကို ထုတ်ကာ ခန္ဓာကိုယ်မှ ခွဲထွက်၍ရသည်။ သို့သော် ၎င်းက အကြွင်းမဲ့လုံခြုံမှုမရှိပေ။ နတ်ဘုရားအသိအာရုံက ကျင့်ကြံသူအားလုံးအတွက် အရေးပါပြီး အလွန်ဆန်းကြယ်၏။ အကယ်၍ ကျင့်ကြံဆင့်နိမ့်သောသူတစ်ယောက်ကသာ စူးစမ်းလိုစိတ်ဖြင့် သူ့စိတ်ဝိညာဥ်ကို ခွဲထုတ်ကြည့်လိုက်လျှင် ၎င်းက မူလခန္ဓာကိုယ်နှင့် အဆက်ပြတ်သွားပြီး ဝိညာဥ်ပျောက်ဆုံးသွားလိမ့်မည်။

ထိုသို့ ပျောက်ဆုံးပြီး မြောလွင့်နေသော ဝိညာဥ်များက ဝိညာဥ်မြှင့်တင်သည့်နေရာတွင် စုဝေးသွားပြီး မလွတ်မြောက်နိုင်တော့ပေ။ အချို့ ဝိညာဥ်သန့်စင်ရာနေရာများက သဘာဝအတိုင်းတည်ရှိနေသော်လည်း အချို့နတ်ဆိုးဆန်သောကျင့်ကြံရေးသမားများက မြောလွင့်နေသောဝိညာဥ်များကို အသုံးချပြီး သူတို့၏ စိတ်ဝိညာဥ်ကို မြှင့်တင်နိုင်ရန်အတွက် ဝိညာဥ်ကျင့်ကြံရေးနေရာကို ဖန်တီးထားခြင်း ဖြစ်သည်။

ဆာ့ဆာ့မှာ သူမ၏ အသိအာရုံက သမုဒ္ဒရာထဲသို့ နစ်မြုပ်သွားပြီး အပြင်ဘက်ကမ္ဘာနှင့်ဆက်နွယ်ကြည့်၍ မရသည်ကို သိလိုက်ရချိန်၌ တစ်ခုခုမှားနေကြောင်း သံသယဝင်နေမိသည်။ ထို့အပြင် သူမ မြင်နေရသည်များက သူမ၏ အတန်းဖော်များ မြင်နေရသည်နှင့် ကွာခြားနိုင်၏။ မြောလွင့်နေသောစိတ်ဝိညာဥ်ကြိုးမျှင်များအား အကာအရံက စုပ်ယူနေသည်ကို သူမ မြင်တွေ့နေရသည်။

သူမ သိချင်နေသည့် တစ်ခုတည်းသော မေးခွန်းမှာ စတားကွန်ရက်က မြေပုံစနစ်မှ ဤနေရာသို့ သူတို့ကိုအဘယ့်ကြောင့် တိုက်ရိုက်ပို့ဆောင်လိုက်ရသည်ကိုပင်။

ဒီနေရာက သဘာဝအလျောက်ဖြစ်နေတဲ့နေရာလား… ဖန်တီးထားတာမျိုးပဲလား…

ဤဝိညာဥ်သန့်စင်သည့်မြေပြင်တွင် သူတို့၏အသိအာရုံက မလွတ်မြောက်နိုင်လျှင်ပင် အကာအရံက သူတို့၏ စိတ်အသိအာရုံကို တဖြည်းဖြည်းစုပ်ယူနေသောကြောင့် သူတို့အားလုံး ခေါင်းကိုက်မူးဝေခြင်းကို ခံစားနေရခြင်း ဖြစ်သည်။

ဆာ့ဆာ့ကသာ သူမ၏ အသိအာရုံကို စွဲကပ်ထားသရွေ့ ဤနေရာက သူမကို ဒုက္ခမပေးနိုင်ပေ။ သူမ တစ်ယောက်တည်းသာဆိုပါက ဘာမှပင်လုပ်စရာမလိုဘဲ သူမ၏ဆရာလာကယ်မည်ကိုသာ ထိုင်စောင့်နေ၍ရသည်။

သူမ ဤဝိညာဥ်သန့်စင်သည့်မြေပြင်ကို မကိုင်တွယ်နိုင်သော်လည်း သူမဆရာက ကိုင်တွယ်နိုင်လောက်ပေသည်။

သို့သော် ပြဿနာမှာ ဆာ့ဆာ့က မစောင့်နိုင်သလို ၊ အခြားသူများကလည်း မစောင့်နိုင်ပေ။ သူမ၏ ဆရာက သူတို့ရှိသည့်နေရာကို ရှာတွေ့ပါ့မလားဆိုသည်က်ိုပင် မသေချာပေ။ သူ့ဆရာရောက်မလာမီ တစ်ယောက်ယောက်၏ စိတ်အာရုံက ကုန်ခမ်းသွားလျှင် ဘာလုပ်ရမည်မသိတော့ပေ။သို့မဟုတ် သူတို့၏ စိတ်အာရုံထိခိုက်မှုက ပြန်ကောင်းရန်မလွယ်လျှင် ကုသရန်လည်း ခက်ခဲသွားလိမ့်မည်။

အကယ်၍ ဆာ့ဆာ့၏ မူလစိတ်အာရုံနှင့်ခန္ဓာကိုယ်ကသာ ဤနေရာ၌ ရှိနေလျှင် သိုလှောင်အိတ်ထဲ၌ သူမအသုံးချ၍ရသည့် ပစ္စည်းတစ်ခုခုရှိနိုင်ပြီး ယခုကဲ့သို့ ကူကယ်ရာမဲ့နေမည်မဟုတ်ချေ။

ဆာ့ဆာ့မှာ ကျင့်ကြံရေးနှင့် နတ်ဆိုးကျင့်ကြံရေးအကြောင်း သူတို့ကို ရှင်းပြရန် ခက်ခဲနေ၏။ သူမက ဝိညာဥ်သန့်စင်သည့်မြေပြင်အကြောင်း သူတို့နားလည်အောင် အကြမ်းဖျင်းသာ ရှင်းပြလိုက်ရသည်။ ၎င်းက အမည်မသိသည့်အရာကို သူတို့၏ စိတ်အာရုံအား အစာအဖြစ် ကျွေးနေရခြင်းမျိုးပင်။

ထို့နောက် ကျန်းချန်၏ မျက်နှာက ဖြူဖျော့သွားပြီး သူက ပြောလာ၏။

" ဒီနေရာကြီးကို ရင်းနှီးနေတယ်လို့ မင်းတို့မခံစားရဘူးလား..."

ဟယ့်ချောင်ယွမ်၏ မျက်နှာမှာလည်း တည်ကြည်သွား၏။

" နည်းနည်းတော့ ရင်းနှီနေသလိုပဲ..."

ဆာ့ဆာ့က အလျင်စလို မေးလာ၏။

" နင်တို့ ဒီနေရာကို သိလို့လား..."

သူမတွင် မည်သည့်ထင်မြင်ချက်မှ မရှိပေ။

" ငါတို့ ဒီနေရာကို တစ်ခါမှမရောက်ဖူးဘူး...ဒါပေမဲ့ သမိုင်းအတန်းရဲ့ ဗီဒီယိုသင်ခန်းစာထဲမှာ တွေ့ဖူးတယ်...ဒီနေရာက D252ဂြိုဟ်... ဒဏ္ဍာရီလာ ဂြိုဟ်ပိုးကောင်တွေရဲ့ အခြေစိုက်စခန်းပဲ... ငါတို့ရဲ့ ဘိုးဘေးတွေက ဒီနေရာကို ရှာတွေ့ခဲ့ပြီး ပိုးကောင်ဘုရင်မကို ဒီနေရာမှာပဲ ခြေမှုန်းခဲ့တာ... အဲ့ဒါက သမိုင်းမှာ မှတ်ကျောက်တင်နိုင်တဲ့ စစ်ပွဲလို့လည်း ပြောလို့ရတယ်...နောက်ဆုံးကျတော့လည်း ပိုးကောင်တွေက တကယ်ရွံဖို့ကောင်းတဲ့ မျိုးစိတ်တွေပဲ...သူတို့က လူတွေကိုတင်မကဘူး...ငါတို့ရဲ့ ဂြိုဟ်တွေကိုပါ ဖျက်ဆီးပစ်တာ...သူတို့ကိုသာ ဆက်ပြီးရှင်သန်မျိုးပွားခွင့်ပေးလိုက်ရင် လူသားတွေဆက်ပြီး ရှင်သန်နေနိုင်မှာ မဟုတ်ဘူး..."

[ T/N - ဒီက ဂြိုဟ်ပိုးကောင်ဆိုတာက ဇာ့ဂ်မဟုတ်ပါဘူးနော် E tranမှာက Insectoidလို့ရေးထားလို့ အရှေ့က အင်းဆက်တွေနဲ့ မှားမှာစိုးလို့ ဂြိုဟ်ပိုးကောင်လို့ ပြန်ထားတာပါ💙]

" ဒါပေမဲ့ D252က ပိုးကောင်တွေရဲ့ အခြေစိုက်စခန်းဖြစ်ခဲ့တဲ့အတွက် စွန့်ပစ်ခံထားရတာ တော်တော်ကြာပြီ...ဒီမှာ ဘာအရင်းအမြစ်မှအရှိသလို ..အရေးအခင်းဖြစ်နေတဲ့နယ်မြေကလူတွေတောင် ဒီနေရာကို လာမှာ မဟုတ်ဘူး..."

ထိုက်ယီဂိုဏ်းရှိနေသော B111ဂြိုဟ်မှာ နေထိုင်သူနည်းပါးပြီး ဖွံ့ဖြိုးတိုးတက်မှုနောက်ကျသောကြောင့်သာ စွန့်ပစ်ဂြိုဟ်(ကျတ်တီးဂြိုဟ်)ဟု ခေါ်ဆိုရခြင်းဖြစ်သည်။ ၎င်းက လုံးဝစွန့်ပစ်ထားသော D252ဂြိုဟ်နှင့် အကွာကြီးပင်။

ကျန်းချန်၏ ဘိုးဘေးများက ပိုးကောင်ဘုရင်မကို တိုက်ခိုက်ခဲ့သည့် ရှေ့ဆောင်သူများထဲမှ တစ်ယောက်ဖြစ်သောကြောင့် ဤသမိုင်းကြောင်းကို သူအလွန်ကျွမ်းဝင်နေ၏။ ၎င်းက ကျန်းမိသားစု၏ ဘယ်တော့မှ မမေ့နိုင်မည့် ဂုဏ်သိက္ခာအရှိဆုံးသမိုင်းကြောင်းပင်။ ကျန်းမိသားစုက ပိုးကောင်မျိုးစိတ်များထံမှ အမုန်းခံရဆုံး မိသားစုတစ်စုလည်း ဖြစ်ပေ၏။

ကြယ်တာရာခေတ်၌ ထိုပိုးကောင်မျိုးစိတ်များက ဘုံအာရုံဖြင့် စုစည်းလိုက်လျှင် ဆင့်ကဲပြောင်းလဲနိုင်လိမ့်မည်။

ဒါဆို သူတို့က ဒီနေရာကို ပိုးကောင်တွေရဲ့ အာဟာရဖြည့်ခံရဖို့ ရောက်ရှိလာတာလား…

ပိုပြီး စဥ်းစားရမည်က ဤအခြေအနေကို တစ်ယောက်ယောက်ကသာ ရည်ရွယ်ချက်ရှိရှိ ဖန်တီးထားခြင်းဆိုလျှင် တစ်စုံတစ်ယောက်က သူတို့ကို တမင်စွန့်စားခိုင်းနေခြင်းပင် ဖြစ်ရမည်။

၎င်း၏ ဖြစ်နိုင်ချေကို ထည့်မစဥ်းစားလျှင်ပင် အခြေအနေက အားလုံးအတွက် မလွယ်ကူစေတော့ပေ။

ဤအကြောင်းအရာကို အခြားသူများအား သူမ ပေးသိ၍မဖြစ်သေးပေ။ မဟုတ်ပါက အားလုံးကို ပိုထိတ်လန့်သွားစေရုံသာ ရှိလိမ့်မည်။

ဆာ့ဆာ့က ပြောလိုက်သည်။

" ကောင်းပြီ မကြောက်ကြပါနဲ့...ဆုံမှတ်နေရာကို အရင်ဆုံး ပြန်ကြရအောင်...အားလုံးအဲ့ဒီကို ရောက်နေလောက်ပြီ...နင်တို့ရဲ့ အသိအာရုံကို စပြီးကျင့်ကြံမှရလိမ့်မယ်...မဟုတ်ရင် နင်တို့ရဲ့အသိအာရုံမှာ ထိခိုက်မှုရှိလာလိမ့်မယ်..."

" ဟမ်... စိတ်အသိအာရုံကို ကျင့်ကြံရမှာလား...အဲ့ဒါက ဘယ်လိုမျိုးလဲ..."

အသင်းထဲရှိ အခြားလူများမှာ စိတ်ရှုပ်ထွေးသွား၏။

" အဲ့ဒီလိုမှမဟုတ်ရင် ငါတို့ရဲ့ အသိအာရုံမှာ ထိခိုက်မှုရှိလာလိမ့်မယ်ဆိုတာကရော ဘာအဓိပ္ပါယ်လဲ...အသိအာရုံက အကောင်းပကတိအတိုင်းရော ရှိနိုင်သေးရဲ့လား..."

ဆာ့ဆာ့က ပြောလိုက်သည်။

" ဟမ်...ငါ ခုဏတုန်းက မပြောလိုက်မိဘူးလား...သေချာပေါက် နည်းလမ်းရှိတယ်လေ...မဟုတ်ရင် အားလုံးတစ်စုတည်းဖြစ်ဖို့ ငါက ဘာလို့ လောနေရဦးမှာလဲ..."

သူတို့ရှိနေသောနေရာက သူတို့၏အသိအာရုံများကို စုပ်ယူရန် လုပ်နေသော်လည်း သူတို့သာ သူတို့၏ အသိအာရုံကို အားဖြည့်ကာမြှင့်တင်လိုက်လျှင် သူတို့ဆီကိုပြန်ပြီး စုပ်ယူထား၍ ရနိုင်သည်။

ကျင့်ကြံခြင်းက လက်တွေ့တွင် အသိအာရုံကို မြှင့်တင်ရန် အကောင်းဆုံးနည်းလမ်းဖြစ်၏။

ကျန်းချန်နှင့် အခြားသူများအားလုံး အာခေါင်ခြောက်လာသလိုပင် ခံစားလိုက်ရသည်။

" အဲ့ဒီနည်းလမ်းနဲ့ ငါတို့ရဲ့ စိတ်ဝိညာဥ်ပင်လယ်ကို မြှင့်တင်နိုင်တယ်လို့ နင်ဆိုလိုချင်တာလား..."

ဤအခြေအနေတွင် ဤနေရာသို့ကျရောက်လာပြီး ပိုးကောင်များ၏ အစာဖြစ်သွားခြင်းက အိပ်မက်ပေလား သို့မဟုတ် ဆာ့ဆာ့၏ စကားများက အိပ်မက်ပေလားဆိုသည်ကို သူတို့ ဝေခွဲမရတော့ပေ။

' ငါတို့က မသိရင် ကမ္ဘာကြီးကို မမြင်ဖူးတဲ့အတိုင်းပဲ ...နင်အဲ့ဒီလို ကြောက်စရာကောင်းတဲ့စကားတွေ မပြောလို့မရဘူးလား...စိတ်ဝိညာဥ်ပင်လယ်ကို မြှင့်တင်ဖို့ ကျင့်ကြံတယ်ဆိုတာ ယေဘုယျဗဟုသုတမျိုး လုံးဝဟုတ်မနေဘူးလို့...'

' ပြီးတော့ အဲဒီလို အရေးကြီးတဲ့သတင်းကို အချိန်တိုင်းလျှောက်ပြောမနေနဲ့လေ...နင်မပြောရင် ငါတို့သိမှာ မဟုတ်ဘူး...'

သူတို့၏ အမူအရာမှာ ပြိုလဲတော့မလိုပင်။

" ဒီလိုအရာမျိုးကို ငါတို့ကို ဒီတိုင်းလေးသင်ပေးလိုက်လို့ရော ရရဲ့လား..."

သူတို့မတတ်သာတော့ဘဲ ဆာ့ဆာ့ကို သတိပေးလိုက်ရသည်။

ဆာ့ဆာ့ကပြောလာ၏ ။

" အိုး...အဲ့ဒါက ဘာမှမဟုတ်ပါဘူး...ဒါက ကမ္ဘာကြီးကို ငါတို့ထိုက်ယီဂိုဏ်းက မိတ်ဆက်ပေးဖို့လုပ်ထားတဲ့ ကျင့်ကြံရေးနည်းလမ်းပဲ...ငါတို့အခုတလော ပြိုင်ပွဲတွေနဲ့ အလုပ်များပြီး ဘယ်သူမှအချိန်မရလို့ ဒီကိစ္စကို ယာယီဘေးဖယ်ထားတာ..."

စိတ်ဝိညာဥ်အာရုံကို ဤနည်းဖြင့် ကျင့်ကြံခြင်းက ဆေးသောက်သည်ထက်ပင် ပိုအားကောင်းသေးသည်။ စိတ်ဝိညာဥ်စွမ်းအားနှင့် ကျင့်ကြံရေးကို မိတ်ဆက်ပေးရန်က ထိုက်ယီဂိုဏ်း၏ အစီအစဥ်များထဲမှ တစ်စိတ်တစ်ပိုင်းဖြစ်သော်လည်း ယခုထိ အကောင်အထည်မဖော်ရသေးပေ။ဆာ့ဆာ့၏ ပြိုင်ပွဲအပြီးမှသာ စတင်မိတ်ဆက်ပေးရန် ထိုက်ယီဂိုဏ်းက အစီအစဥ်ချထားခြင်းဖြစ်သည်။

သို့သော် အစီအစဥ်က ပြောင်းသွားပြီး ယခု ဆာ့ဆာ့က သူတို့ကို 'ဘယ်လိုကျင့်ကြံရမလဲ'ဆိုသည်ကို သင်ပေးရန် အဆင်သင့်ဖြစ်နေ၏ ။

ကျန်းချန်နှင့် အခြားသူများ : "...."

'တကယ်ကြီးလား... ပြိုင်ပွဲက ဒီကိစ္စထက်အရေးကြီးတယ်ပေါ့လေ...အဲ့ဒါက လုံးဝကို ယှဥ်ကြည့်လို့တောင် မရနိုင်တာကို...'

💫💫💫

Prev Next