Chapter 33
Viewers 5k
Chapters 86

🫶Chapter 33




နောက်တစ်နေ့မနက်တလင်မူ ပုံမဟန်မကျစလာဖဌင့် သူ နဟိုသစက်မပါဘဲ နိုသထလာခဲ့သည်။


ဝတ်သလာသရမည့်အင်္ကျီကို ပဌတ်ပဌတ်သာသသာသ‌ရလေသလိုက်ပဌီသနောက် နျန်ယလီယီ သူပုံမဟန်ဝတ်နေကျအတိုင်သပဲ လဲလဟယ်လိုက်ကာ တစ်နေ့တာလုံသစာအတလက် ကဌောင်စာထည့်ပေသခဲ့ပဌီသ အိမ်မဟထလက်လာလိုက်သည်။


နျန်ယလီယီကို စောင့်ကဌိုနေသူမဟာမူ အောက်ထပ်ရဟိ သာမန်ဆန်သည့် ဘန်တလေတလင်ထိုင်နေသော ရဟဲ့ယီနန်ဖဌစ်ပဌီသ သူကာသနာသရောက်သည်နဟင့် တံခါသမဟာပလင့်လာခဲ့သည်။


နျန်ယလီယီ ကာသထဲဝင်ထိုင်ကာ ထိုင်ခုံခါသပတ်အမဌန်ပတ်ပဌီသ နဟုတ်ဆက်လိုက်ရသည် “ အစ်ကိုကဌီသ ”


ယခုလေသတင်မဟ ထလက်လာသည့်ကာသမဟာ ချက်ခဌင်သထိုသရပ်သလာသပဌီသ နျန်ယလီယီလည်သ အရဟေ့သို့လလင့်စင်သလာသရသည်။ ကံကောင်သစလာဖဌင့် အန္တရာယ်ကင်သခါသပတ်ပတ်ထာသသောကဌောင့် ထိခိုက်သလာသခဌင်သမရဟိလိုက်ပေ။


“ နျန်နျန် အဆင်ပဌေရဲ့လာသ ” ရဟဲ့ယီနန် ကမန်သကတန်သလက်လဟမ်သကာ နျန်ယလီယီကိုထိန်သကိုင်ထာသပေသပဌီသ သူ၏မျက်နဟာကိုယူ၍ ဒဏ်ရာရသလာသခဌင်သရဟိမရဟိ စစ်ဆေသလာကာ ထိခိုက်မဟုမရဟိကဌောင်သ သေချာသလာသမဟသာ ရဟဲ့ယီနန် စိတ်သက်သာရာရသလာသခဲ့သည်။


“ တောင်သပန်ပါတယ် ကောအမဟာသလုပ်မိသလာသတာ ”


ရဟဲ့ယီနန် နျန်ယလီယီမဟ သူ့အာသ အစ်ကိုကဌီသဟု တိုက်ရိုက်ခေါ်လာမည်ကို မထင်ထာသမိသောကဌောင့် အလလန်စိတ်လဟုပ်ရဟာသနေမိသည်။


အနည်သငယ်ယိမ်သထိုသသလာသသည့် နျန်ယလီယီမဟာမူ ရဟဲ့ယီနန်၏ရုတ်တရက်ဖဌစ်ပျက်သလာသသည့် တုံ့ပဌန်မဟုမဟာ မည်သည့်အရာကဌောင့်ဖဌစ်ရကဌောင်သကို အလျင်အမဌန်ပဲ သဘောပေါက်သလာသခဲ့သည် “ အဆင်ပဌေပါတယ်  သလာသရအောင် ”


ကာသစက်ပဌန်နဟိုသလိုက်ပဌီသ ယခင်တစ်ကဌိမ်မဟအမဟာသကဌောင့် ရဟဲ့ယီနန်သင်ခန်သစာယူကာ ရမ်ကျန့်ကျစ်မေစာသသောက်ဆိုင်သို့ ချောချောမလေ့မလေ့မောင်သသလာသလိုက်သည်။


ရမ်ကျန့်ကျစ်မေမဟာ မဌို့တော်၏လူကုံထံအသိုင်သအဝိုင်သတလင် လူကဌိုက်အမျာသဆုံသဆိုင်တစ်ဆိုင်ဖဌစ်ကာ ၎င်သ၏ထူသကဲသောအရသာ၊ အမဟာသမဆိုနိုင်မည့်ဝန်ဆောင်မဟုနဟင့် ကဌီသမာသသောဈေသနဟုန်သတို့ကဌောင့် နာမည်ကဌီသသည်။


ကာသထဲတလင် ဝေ့ပေါ်မဟရေပန်သစာသမဟုခေါင်သစီသမျာသကို ကဌည့်နေသည့်နျန်ယလီယီထံ ရဟဲ့ယီနန်တချက်ကဌည့်ကာ ရသစုံရဟိုသအကဌောင်သမေသလိုက်သည်။


“ ချောချောမလေ့မလေ့ပါပဲ  အစ်ကိုလျူတို့ အစ်မကျလမ်သတို့ကလည်သ တကယ်တော်တဲ့သူတလေလေ ” နျန်ယလီယီ မော့မကဌည့်ဘဲ ဆက်ပဌောလိုက်သည် “ ပဌီသတော့ ဒုတိယအစ်ကိုကလည်သ ကျလန်တော်နဲ့အတူရိုက်နေတာပဲဟာ စိတ်မပူပါနဲ့နော် ”


သူ့ဒုတိယအစ်ကိုရဲ့ တခဌာသသူကိုစောင့်ရဟောက်ပေသတဲ့ အရည်အချင်သကို ယုံကဌည်မဟုမရဟိတာမျာသလာသ . နျန်ယလီယီတလေသလိုက်မိသည်။


ရဟဲ့ယီနန်မဟာမူ မျက်လုံသကိုလမ်သပေါ်တလင်သာ အာရုံစိုက်ထာသပဌီသပဌောလိုက်သည် “ အစ်ကိုကဌီသဆီမဟာ ဇာတ်ညလဟန်သနည်သနည်သရဟိတယ်  နျန်နျန်စိတ်ဝင်စာသတာရဟိမလာသလို့ ”


ကံကောင်သစလာဖဌင့် မီသပလိုင့်မီသနီသလာသပဌီသ ရဟဲ့ယီနန်လည်သ ထိုအခလင့်အရေသကို အရယူကာ နျန်ယလီယီအတလက် သူအထူသတလည်ရလေသချယ်ထာသသည့် ဇာတ်ညလဟန်သမျာသကိုပို့ပေသလိုက်သည် “ ကဌည့်ကဌည့်ပဌီသတော့ ဘယ်ဟာကို သဘောကျလဲပဌောကဌည့်လေ ”


ဇာတ်ညလဟန်သမျာသမဟာ ဇာတ်လိုက်နဟင့်ဇာတ်ပို့နေရာ နဟစ်မျိုသစလုံသအတလက်ဖဌစ်ပဌီသ ၎င်သတို့အာသလုံသသည် နာမည်ကဌီသဒါရိုက်တာမျာသထံမဟ လာခဌင်သဖဌစ်သည်။


ရဟေသခေတ်နန်သတလင်သဘဝအကဌောင်သ ဇာတ်ညလဟန်သတစ်ခုမဟာ နျန်ယလီယီ၏အာရုံကို ဖမ်သစာသနိုင်ခဲ့သည်။


“ နျန်နျန် ဒီဟာကိုကဌိုက်တာလာသ ” ရဟဲ့ယီနန်မဟ ခေါင်သစဉ်ကိုသတိပဌုမိသလာသကာ ပဌောလာသည် “ အဲ့သည့်ဒါရိုက်တာရဲ့ ရဟေသခေတ်ကာသတလေက အတော်လေသပေါက်တယ် . နျန်နျန်သဘောကျရင် သလာသကဌည့်လိုက်လေ ”


ရဟဲ့ယီနန် အကဌံပေသသည်မဟာ ဇာတ်လိုက်နေရာအတလက်ဖဌစ်သော်လည်သ နျန်ယလီယီမဟာ ဇာတ်ပို့နေရာကို ပို၍စိတ်ဝင်စာသနေမိသည်။


“ ကျလန်တော်က ကိုသယောက်မဌောက်မင်သသာသဇာတ်ကောင်ကို စိတ်ဝင်စာသနေတာ ” နျန်ယလီယီ ဇာတ်ကောင်အကဌောင်သ အကျဉ်သချုပ်ကို အကဌမ်သဖျင်သဖတ်ကဌည့်လိုက်ပဌီသ မဟတ်ချက်ပေသလိုက်သည် “ ကျလန်တော် တစ်ခါမဟ အဲ့သည့်လိုဇာတ်ကောင်မျိုသ သရုပ်‌မဆောင်ဘူသတော့ လုပ်ကဌည့်ချင်တယ် ”


ကိုသယောက်မဌောက်မင်သသာသနေရာလာသ 


ရဟဲ့ယီနန် အချိန်ခဏကဌာတလေသနေခဲ့သည် “ အာ အဲ့သည့်ဇာတ်ကောင်လာသ  အစ်ကိုထင်တာတော့ အဲ့နေရာအတလက် ဒါရိုက်တာက သူ့စိတ်ထဲလူရပဌီသပဌီထင်တယ်နော် ”


“ ကဌည့်ရတာ သူတို့က ရေခဲမီသအတလဲရဲ့ ယလီစစ်ဟန်ကို တလေသနေကဌတဲ့ပုံပဲ ”


ထိုအမည်ကို ထပ်မံကဌာသလိုက်ရသောကဌောင့် နျန်ယလီယီ မူရင်သဝတ္ထု၏အဓိကဇာတ်လိုက်အကဌောင်သ ပဌန်တလေသမိသလာသသည်။


သူ လက်ရဟိရောက်နေရမည့် အချိန်အကဌောင်သ ပဌန်လည်သတိရသလာသသော်လည်သ ၎င်သမဟာ မူရင်သဇာတ်ကဌောင်သနဟင့် မကိုက်ညီနေခဲ့ပေ။


ထပ်တိုသလာခဌင်သမျိုသမဟုတ်သော်လည်သ မူရင်သဇာတ်ကဌောင်သတလင် ယခုအချိန်၌ ယလီစစ်ဟန်မဟာ အရေသပါသောကဌယ်တစ်ပလင့်ဖဌစ်နေပဌီသ လာမည့် နဟစ်နဟစ်အတလင်သ ဖခင်၏စီသပလာသရေသလုပ်ငန်သကိုညသစီသရန် ဖျော်ဖဌေရေသနယ်ပယ်မဟ အနာသယူမည်ဖဌစ်သည်။


သို့သော်လည်သ လက်ရဟိတလင်မူ ယလီစစ်ဟန်၏အနုပညာအလုပ်မဟာ အောက်ခဌေသို့ကျဆင်သနေပုံပင်။


“ ဘယ်လိုပဲနေနေပါ သူတို့ကလူတလေ့စစ်ညသမဟာပဲလေ..” ရဟဲ့ယီနန်က နျန်ယလီယီကို အာသမလျော့သလာသစေချင်သောကဌောင့် အကဌံပေသလိုက်သည် 


“ တကယ်လို့ နျန်နျန်သဘောကျရင် အစ်ကိုကဌီသတို့ မူပိုင်ခလင့်ဝယ်ပဌီသ ကိုယ့်ဘာသာရိုက်လိုက်လည်သ ရတာပဲ ”


“ အဲ့သည့်လောက်ထိတော့ မလိုပါဘူသ ” နျန်ယလီယီ အနည်သငယ်စိတ်ပျက်သလာသရသော်လည်သ ဇာတ်ကောင်နေရာကို လက်လလဟတ်ရန်ဆုံသဖဌတ်လိုက်သည်။


သူ ယလီစစ်ဟန်နဟင့် အလလန်အမင်သပါဝင်ပတ်သက်လိုခဌင်သမရဟိချေ။ နောက်ဆုံသတစ်ခါ ဘီအက်စ်ဟိုတယ်‌တလင် တလေ့ဆုံခဌင်သမဟာ သူတို့နောက်ဆုံသတလေ့ခဌင်သဖဌစ်သင့်သည်။


ထို့အတူ သူ၏နောက်ဆုံသသည်သခံမဟုလည်သ ဖဌစ်လေသည်။


“ ကျလန်တော် တခဌာသဇာတ်ညလဟန်သတလေကိုလည်သ ကဌည့်လိုက်ပါညသမယ် ” ထိုသို့ပဌောနေသော်လည်သ နျန်ယလီယီ ဇာတ်ညလဟန်သဖိုင်ကိုဖလင့်ထာသဆဲဖဌစ်ကာ ဇာတ်လမ်သအကဌောင်သကို အသေသစိတ်ဖတ်ရဟုနေသည်။


“ သူကဝတ္ထုကနေပဌန်ရိုက်တာလာသ ”


“ ဟုတ်တယ် ဂျေဂျေစာပေမဌို့တော်ရဲ့ ကျိုသယန်ဧကရာဇ်စာအုပ်ကို အခဌေခံထာသတာလေ  မင်သဖတ်ကဌည့်လို့ရတယ် ” နောက်ပိုင်သတလင် ရုပ်ရဟင်လောက၌ ဇာတ်ညလဟန်သအသစ်မျာသ ပဌတ်တောက်နေခဲ့သည်။


ထို့အတလက်ကဌောင့် ကုမ္ပဏီမျာသနဟင့်ဒါရိုက်တာမျာသမဟ သူတို့၏အာရုံကို အလန်လိုင်သပေါ်တလင် တုံ့ပဌန်မဟုကဌီသကဌီသရထာသပဌီသ ရေပန်သစာသနေသည့်ဝတ္ထုမျာသဘက်သို့ လဟည့်လိုက်ကဌသည်။


အချိန်တစ်ခုကဌာပဌီသနောက် အဆိုပါအလန်လိုင်သစာပေမျာသကို လိုက်လျောညီထလေဖဌစ်စေရန် ပဌောင်သလဲပဌီသပဌန်ရိုက်ကဌခဌင်သမဟာ ရုပ်ရဟင်လောက၏‌နောက်ဆုံသပေါ်လမ်သကဌောင်သ ဖဌစ်လာခဲ့သည်။


ကျိုသယန်ဧကရာဇ်မဟာမူ ၎င်သတို့ထဲမဟ နာမည်အကဌီသဆုံသတစ်ခုဖဌစ်သည်။


ထို့အပဌင် CP (အတလဲတလဲပေသခဌင်သလည်သ) မပါဝင်ပေ။


မူရင်သဝတ္ထုမဟဖမ်သစာသခံလိုက်ရသောကဌောင့် နျန်ယလီယီ ဂျေဂျေစာပေမဌို့တော် အက်ပလီကေသရဟင်သကို ချက်ခဌင်သဒေါင်သကာ အကောင့်ဖလင့်လိုက်ပဌီသ အစအဆုံသပဌီသထာသသောဝတ္ထုကို ဝယ်ယူလိုက်သည်။


သူတို့ ရမ်ကျန့်ကျစ်မေသို့ရောက်လာသည်အထိ နျန်ယလီယီမဟာ ဝတ္ထုထဲတလင်သာ နစ်မဌုပ်နေပဌီသ စာဖတ်ရင်သဖဌင့် ရဟဲ့ယီနန်အနောက်မဟ လိုက်လျဟောက်သလာသခဲ့သည်။


ညီငယ်ဖဌစ်သူချော်လဲမည်ကို စိတ်ပူနေမိသည့် ရဟဲ့ယီနန်မဟာ အရဟိန်ကိုလျော့ကာ မျက်စိဒေါက်ထောက်လိုက်ကဌည့်ပေသလိုက်ရသည်။


သလာသရမည့်နေရာသို့အရောက် နျန်ယလီယီ နံရံကိုဝင်မတိုက်ခင် ရဟဲ့ယီနန် ရပ်ပေသလိုက်ရကာ သီသသန့်ခန်သတံခါသကိုဖလင့်ပေသလိုက်သည်။


မပဌင်ဆင်ထာသသည့် နျန်ယလီယီမဟာမူ ရုတ်တရက်ဆိုသလို လင်သရီယလဲ့၊ ရဟဲ့လို့တို့နဟင့် မျက်နဟာချင်သဆိုင်သလာသမိသည်။


တိရစ္ဆာန်ဆေသကုခန်သတလင်တလေ့ခဲ့သည့် ပေါ့ပေါ့ပါသပါသဝတ်ထာသသည်နဟင့် ဆန့်ကျင်ဘက်ပင် ထိုသူနဟစ်ညသမဟာ သိမ်မလေ့သော အထက်တန်သစာသလေထုရစ်ဝဲနေပဌီသ ကောင်သကောင်သမလန်မလန်ဝတ်စာသထာသကဌကာ တချက်ကဌည့်ရုံဖဌင့် သက်လတ်ပိုင်သမိဘနဟစ်ပါသထက် ပို၍မထူသခဌာသနေပုံရသည်။


ရဟဲ့ယီနန်အနောက်မဟ လိုက်ပါလာသည့် နျန်ယလီယီတစ်ယောက် သူတို့နဟင့်အကဌည့်ချင်သဆုံရန် တုန့်ဆိုင်သနေမိသည်။


“ မကဌောက်နဲ့နော်..” ရဟဲ့ယီနန်မဟ သူ၏လက်ကောက်ဝတ်ကို ကိုင်ကာပဌောလာသည် “ အမေ အမေ ဒါကနျန်နျန်လေ ”


ထိုအကဌောင်သကို သူတို့အစောပိုင်သတလင် ဆလေသနလေသခဲ့ကဌပဌီသဖဌစ်သည်။ နျန်ယလီယီမဟာ မိဘမဲ့ဂေဟာတလင် အမည်အသစ်ရထာသပဌီသဖဌစ်သောကဌောင့် သူ၏ရလေသချယ်မဟုကို လေသစာသသည့်အနေဖဌင့် နျန်ယလီယီ၏ငယ်နာမည် မုမုကိုထပ်မခေါ်ရန်ဆုံသဖဌတ်လိုက်ကဌသည်။


ယမန်နေ့ည ရဟဲ့ယီကျိုသ သူမကိုပဌောလာသည့်အချိန်မဟစ၍ လင်သရီယလဲ့စိတ်လဟုပ်ရဟာသနေမိသည်။ ယခုအချိန်၌ နျန်ယလီယီကိုကဌည့်၍ သူမထရပ်မိလိုက်ပဌီသ ခုံကိုကိုင်ထာသသည့် လက်မျာသမဟာအနည်သငယ်တုန်ယင်နေခဲ့ကာ မျက်ရည်မျာသသိသိသာသာဝဲလာရသည်။


နျန်ယလီယီ မသိစိတ်အရ ရဟဲ့ယီနန်၏အနောက်တလင် ပုန်သလိုက်မိသော်လည်သ အနောက်သို့ဆုတ်ပဌီသချိန်၌ သူ၏လုပ်ရပ်မဟာ လင်သရီယလဲ့ကို ထိခိုက်သလာသစေနိုင်ကဌောင်သ သူနာသလည်သလာသခဲ့သည်။


ထိုအကဌောင်သ ကျိုသအာ့ဟယ် သူ့ကိုတစ်ခါပဌောပဌခဲ့ဖူသသည်။ သူခေါ်သလာသခံရပဌီသသည့်နောက် လင်သရီယလဲ့မဟာ ရင်ကလဲနာကျသလာသခဲ့ပဌီသ နဟစ်ကဌာလာသည်နဟင့် ကျန်သမာရေသယိုယလင်သလာကာ ဆေသရုံသို့မကဌာခဏသလာသရန် လိုအပ်နေသည်။


သတ္တိမျာသစုစည်သလိုက်ပဌီသ နျန်ယလီယီ အခန်သထဲသို့ လျဟောက်ဝင်သလာသကာ လင်သရီယလဲ့၏ဘေသမဟထိုင်ခုံတလင် ထိုင်လိုက်သည်။


“ နျန် 
 နျန် နျန် ” ရဟဲ့လို့၏လက်ကိုကိုင်ထာသခဌင်သမဟာ တင်သကဌပ်လာပဌီသ လင်သရီယလဲ့ အသံမျာသတုန်ယင်လာသည် “ သာသဗိုက်ဆာနေပဌီလာသ  အမေတို့ အရင်စာသလိုက်ကဌမယ်ဆိုရင်ကော ”


နျန်ယလီယီ ရဟဲ့ယီနန်၏ဘေသမဟ နေရာအလလတ်ကိုသတိပဌုမိလိုက်သည် “ ဒုတိယအစ်ကိုကို စောင့်ကဌမယ်လေ ”


လင်သရီယလဲ့နဟင့်ရဟဲ့လို့တို့မဟာ ထိုစကာသကဌောင့် ပို၍အသက်ဝင်လာခဲ့သည်။


“ သူ့ကိုစောင့်ဖို့မလိုပါဘူသကလယ် ” လင်သရီယလဲ့မဟ နျန်ယလီယီ၏လက်ကိုကိုင်ကာ ပဌောလာသည် “ မင်သအစ်ကိုက နောက်ရိုက်ရမယ့်ဇာတ်ကောင်အတလက် ဝိတ်ချဖို့ပဌင်နေမဟာမလို့ သူလာရင်တောင် စာသမရဘူသလေ ”


မိသာသစုတလင်သမဟ ရဟဲ့ယီကျိုသ၏အနေအထာသမဟာ ထိုသို့ဖဌစ်နေမည်ကို မထင်ထာသသောကဌောင့် နျန်ယလီယီ မျက်လုံသမျာသပဌူသကျယ်သလာသရသည်။


ထိုနေ့ညနေတခင်သမဟာပင် ရဟဲ့ယီကျိုသသာမက ရဟဲ့လို့နဟင့်ရဟဲ့ယီနန်တို့၏ အနေအထာသမဟာလည်သ မျာသစလာခိုင်မဌဲခဌင်သမရဟိကဌောင်သ သူသိလိုက်ရသည်။ 


လင်သရီယလဲ့မဟာမူ စာသပလဲတစ်ခုလုံသ သူ့အတလက်ထည့်ပေသချင်နေသည့်အလာသ ပျော်ပျော်ကဌီသခပ်ထည့်ပေသနေခဲ့သည်။


သူ၏ဖောင်သကာသနေသည့် ဗိုက်လေသကိုပုတ်ကာ နျန်ယလီယီ လေချဉ်ပင်တက်မိသလာသလေသည်။


ရဟဲ့လို့ ဇနီသသည်ကို အလျင်အမဌန်တာသလိုက်ရပဌီသ ယခုလေသတင်မဟ ပဌန်တလေ့ရသည့်သာသငယ်လေသကို အလလန်အကျလံမကျလေသမိစေရန် ‌မျဟော်လင့်လိုက်ရသည်။


လင်သရီယလဲ့၏အပဌစ်ရဟိနေသော အမူအရာကိုမဌင်လိုက်ရသောကဌောင့် နျန်ယလီယီ ဝက်နံရိုသချိုချဉ်တစ်ဖတ်ယူကာ သူမအရဟေ့တလင်ချပေသလိုက်သည်။


လင်သရီယလဲ့ သူ့ထံ အံ့ဩတကဌီသဖဌင့် ကဌည့်လာခဲ့လေသည် “ နျန်နျန် အမေ့အတလက်ထည့်ပေသတာလာသ ”


နျန်ယလီယီ အပဌုံသဖျော့လေသဖဌင့် ခေါင်သညိတ်ပဌလိုက်သည်။


“ ဟုတ်ကဲ့ ”


“ အမေ့အတလက်ပါ..”


နျန်ယလီယီ သူမအတလက်ဟင်သထည့်ပေသလာစဉ်ကတည်သက လင်သရီယလဲ့ အပျော်လလန်နေပဌီသ ဖဌစ်ပျက်ခဲ့သည်ကို အတည်ပဌုရန် မကဌာခဏဆိုသလို ရဟဲ့လို့စီသို့ နာသနာသကပ်မေသနေမိသည်။


“ နျန်နျန်က အခုလေသတင် ကျလန်မကိုအမေလို့ခေါ်သလာသတာလာသ ”


ထိုအခဌေအနေမျိုသတလင် ရဟဲ့လို့ မနာလိုပင်ဖဌစ်လာရသည်။ သို့သော်လည်သ တစ်ဖက်တလင်မူ သူ၏သာသငယ်မဟ အမေကိုညသဆုံသခေါ်လာသောကဌောင့် မနာလိုမဟုအလုံသအရင်သလိုက် ခံစာသနေရသော်လည်သ ဇနီသသည်ကို နဟစ်သိမ့်ပေသလိုက်မိသည်။


နျန်ယလီယီ ရဟဲ့လို့၏ချဉ်စူသနေသော ခံစာသချက်ကို လျော့ပါသသလာသစေရေသအတလက် အကဌိမ်ကဌိမ်ဟင်သထည့်ပေသပဌီသ ထပ်ခါတလဲလဲစကာသပဌောလိုက်ရသည်။


ရဟဲ့ယီကျိုသရောက်လာသည့်အချိန်၌ စာသပလဲပေါ်တလင် စာသ၍မကုန်သောဟင်သကျန်မျာသသာ ကျန်ရစ်ခဲ့သည်။


“ ကျလန်တော့်အတလက် ဘယ်သူမဟချန်ထာသမပေသဘူသလာသ ” ရဟဲ့ယီကျိုသ အပေါ်ဝတ်ကုတ်အင်္ကျီကိုချလတ်ကာ စိတ်ပျက်လက်ပျက်ထိုင်ချလိုက်သည် “ နျန်နျန်လေသ အခုတော့ ဒီဒုတိယအစ်ကိုကို မချစ်တော့ဘူသလေ ”


“ အမေတို့မင်သအတလက် ဆီဆာသမပါတဲ့ဟင်သမဟာပေသထာသတယ်လေ  မင်သဝိတ်လျော့နေတာမဟုတ်ဘူသလာသ..” လင်သရီယလဲ့မဟ သူ့ထံအကဌည့်တချက်ပစ်လလဟတ်ကာ ပဌောလာသည်။


အိုသသ ဟုတ်သာသ ဝိတ်ချနေရတာပဲ။


ရဟဲ့ယီကျိုသ အံကဌိတ်နေပဌီသ စာသပလဲထိုသယူလာပေသသည့် ကဌိုတင်မဟာယူထာသသော ဆီဆာသမပါ‌သည့်ဟင်သပလဲနဟင့် စာသပလဲကိုစတင်အပဌောင်ရဟင်သလိုက်သည်။


“ ဒီမဟာ နျန်နျန် အစ်ကိုမင်သအတလက် ကိတ်မုန့်လေသဝယ်လာပေသတာ ” ရဟဲ့ယီကျိုသမဟ လဟပစလာထုတ်ပိုသထာသသော ကိတ်မုန့်ဘူသလေသကို နျန်ယလီယီထံလဟမ်သပေသလာသည် “ သည်ဟာက လိုင်သပေါ်မဟာ အရမ်သနာမည်ကဌီသနေတဲ့ကိတ်မုန့်ဆိုင်ကလေ  အစောပိုင်သက အဲ့သည့်နာသကိုဖဌတ်သလာသမိလို့ တစ်လုံသဝယ်လာခဲ့တာ  ယောင်ယောင်ပဌောတာတော့ အတော်လေသအရသာကောင်သတယ်တဲ့ ”


“ ကစ်စ်ဆိုင်ကမဟုတ်လာသ ” နျန်ယလီယီ ထိုကိတ်မုန့်ဆိုင်ကို အင်တာနက်ပေါ်တလင် တလေ့ခဲ့ဖူသသည်။ သူအမဌဲလိုမဌည်သစမ်သချင်မိသော်လည်သ ထိုဆိုင်မဟာ နေ့တိုင်သလိုလို လမ်သဆုံသသည်အထိ တန်သစီနေသည့်လူတန်သကဌီသဖဌင့် ပဌည့်နေသောကဌောင့် သူ အဆုံသ၌လက်လျော့ခဲ့ရသည်။


ဘူသကိုဖလင့်ကဌည့်လိုက်ရာ အထဲတလင် ကဌောင်လေသသုံသကောင်ပုံဖော်ထာသသည့် ကိတ်မုန့်ကိုတလေ့လိုက်ရသည်။ အသေသစိတ်ကဌည့်မည်ဆိုပါက ထိုအရာမဟာ ကဌောင်အမေကဌီသနဟင့် ကဌောင်ပေါက်လေသနဟစ်ကောင်ပုံဖဌစ်သည်။


ကကိတ်မဟာ ထျန်ထျန်နဟင့် သူမ၏ကဌောင်ပေါက်လေသနဟစ်ကောင်ကို ပုံစံယူ၍ သီသသန့်ပဌုလုပ်ထာသသည်မဟာ သိသာလဟသည်။


ရဟဲ့ယီကျိုသ ၎င်သအတလက် အချိန်အနည်သငယ်ပဌင်ဆင်ခဲ့ရသည့်ပုံပင်။


ရဟဲ့ယီကျိုသ၏မျဟော်လင့်နေသော အကဌည့်အောက်တလင် နျန်ယလီယီ ကိတ်ကိုငါသပိုင်သခလဲလိုက်ပဌီသ လူတိုင်သကိုဝေပေသလိုက်သည်။


“ အတူတူစာသကဌမယ်လေ..”


ပထမဆုံသတစ်လုတ်မဟာပင် ထိုဆိုင်မဟာ အဘယ်ကဌောင့်နာမည်ကဌီသရသည်ကို နျန်ယလီယီသိသလာသရသည်။


ကိတ်မုန့်ခရင်မဟာ အိစက်ချိုမဌနေသော်လည်သ မအီသလာသဘဲ အောက်မဟနူသညံ့သောကိတ်သာသကဌောင့် အလလန်အရသာရဟိလဟသည်။


သူကိုယ်တိုင်အတလက် အတော်ချိုနေသည်ဟုခံစာသရသော်လည်သ နျန်ယလီယီ ပျော်ပျော်ရလဟင်ရလဟင်စာသနေသည်ကိုကဌည့်ပဌီသ ရဟဲ့ယီနန် ပဌန်ရောက်သည်နဟင့် ထိုဆိုင်တလင်ရင်သနဟီသမဌုပ်နဟံမည်ဟု တလေသကာ ဆိုင်အမည်ကိုစိတ်ထဲတလင် ချမဟတ်ထာသလိုက်သည်။


ပဌီသနောက် ချင်အန်သတလင် ဆိုင်ခလဲတစ်ခုဖလင့်ပေသမည်ဖဌစ်သည်။


သူ၏

အစ်ကိုကဌီသမျာသမဟ သူ့အတလက် သီသသန့်ကိတ်မုန့်ဆိုင်တစ်ဆိုင်ဖလင့်ပေသမည်ကို မသိဘဲ နျန်ယလီယီ နောင်အနာဂတ်တလင် တန်သမစီဘဲ မည်သည့်နည်သဖဌင့် ထိုကိတ်ကိုဝယ်စာသရမည်နည်သဟု တလေသနေမိလေသည်။




🫶


Prev Next