Chapter 41

🫶Chapter 41

နောက်လာမည့်ရက်အနည်းငယ်အတွင်း နျန်ယွီယီ အမြဲတစေ အလုပ်များနေလေသည်။ ကိုယ်ဟန်အမူအရာနှင့် စကားပြောဆိုပုံတို့အတွက် သင်ခန်းစာများသင်ယူရန် ကျိုးအာ့ဟယ်မှ ကုမ္ပဏီသို့ပို့လွှတ်ခြင်းကို ဆက်တိုက်ဆိုသလို ခံနေရကာ မနက်စောစောအိမ်မှထွက်၍ ညခင်းနောက်ကျချိန်မှသာ အိမ်ပြန်ရောက်ခဲ့သည်။

အဆုံး၌ တစ်ပတ်စာအတန်းများပြီးစီးသွားပြီး 'မင်္ဂလာပါ သရုပ်ဆောင်ရေ' ကိုလည်း စတင်ထုတ်လွှင့်ပြီဖြစ်သည်။

မင်္ဂလာပါ သရုပ်ဆောင်ရေ အစီအစဉ်မှာ မကြာသေးမီနှစ်များအတွင်း ရေပန်းစားကျော်ကြားလာပြီး မှေးမှိန်လာသော ဝါရင့်သရုပ်ဆောင်များနှင့် တက်သစ်စကြယ်ပွင့်များအတွက် အခွင့်အလမ်းများစွာ ပေးစွမ်းနိုင်သောနေရာဖြစ်သည်။

ဝါရင့်သရုပ်ဆောင်များမှ သူတို့၏သရုပ်ဆောင်ကျွမ်းကျင်မှုများကို ယူဆောင်လာကြကာ တက်သစ်စများက ပရိသတ်များယူဆောင်လာပေးသောကြောင့် ရှိုး၏ဖော်မြူလာမှာ အမြဲလိုအလုပ်ဖြစ်ခဲ့သည်။

မင်္ဂလာပါ သရုပ်ဆောင်ရေ ရှိုး၏ယခုအပိုင်းတွင် ထုတ်လွှင့်ချိန်၌ ရှဲ့ယီကျိုး၏ ဝေ့ပေါ်တွင် အထူးပံ့ပိုးပေးမှုနှင့်အတူ #နျန်ယွီယီ၏သရုပ်ဆောင်စကေး ဟူသော ခေါင်းစီးမှာ လျှင်မြန်စွာ ကျော်ကြားသွားခဲ့သည်။

၎င်း၏ကျော်ကြားမှုမှာ တရိပ်ရိပ်ထိုးတက်လာပြီး အဆုံး၌ ရေပန်းစားမှုစာရင်း၏ တတိယနေရာအထိ ရောက်သွားခဲ့သည်။

[ ဘုရားရေ သူကအရမ်းကြည့်ကောင်းတဲ့အပြင် သရုပ်‌ပါဆောင်နိုင်တာလား…သူ့ကို ကောင်းကင်‌ဘုံကများ ပို့ပေးလိုက်တာမလို့လားဟင် ]

[ ငါသူ့ကိုမှတ်မိတယ်… သူ့နာမည်က နျန်ယွီယီလေ… ဖန်အဖွဲ့က သူ့ကို Followလုပ်လိုက်တုန်းကတောင် အတော်လေး လှုပ်လှုပ်ခတ်ခတ်ဖြစ်သွားသေးတယ်…ငါ ဒရာမာမှာ အရမ်းပျော်ဝင်နေတော့ အလုပ်ကိုတောင် မေ့သွားတော့မလို့ ]

[ ငါလည်းမှတ်မိတယ်… သူက အရမ်းရုပ်ချောပြီး အကျင့်ကောင်းတာလေ… ငါဆိုရင် သူ့ကိုသရုပ်ဆောင်မကောင်းလောက်ဘူးလို့တောင် ထင်မိခဲ့သေးတာ…ဒါပေမယ့် ငါမှားသွားတာပဲ ]

[ ဓားလမ်းမရဲ့ ဖန်တစ်ယောက်အနေနဲ့ ပျော်လွန်းလို့ငိုမိပြီ… ငါ့ရဲ့ချစ်ရတဲ့ရှိုးလေးက ကယ်တင်ခံလိုက်ရပြီပဲ ]

[ ဖန်+၁ ငါ အံ့ဩသွားရတယ်… ငါ သူ့ကိုများများမမှန်းထားမိဘဲ ဆန့်ကျင်တဲ့သူဖြစ်ဖို့တောင် တွေးနေတာလေ…ဒါပေမယ့် ဒီနေ့တော့ ငါလုံးဝကြွေဆင်းသွားရပြီ ]

ဖုန့်ဟွာမှ မီး‌ထဲသို့လောင်စာပေါင်းထည့်ပေးခြင်းနှင့်အတူ ကွန်မန့်ထဲရှိ အာရုံစိုက်မှုမှာ အလျင်အမြန် ဓားလမ်းမဆီသို့ ရောက်ရှိသွားခဲ့သည်။

သူငယ်ချင်းဟောင်းများ ရသစုံရှိုး၏ ဒါရိုက်တာသည်လည်း အဆိုပါ ရေပန်းစားနေသောခေါင်းစီးကို သတိပြုမိခဲ့ပြီး နောက်တစ်နေ့တွင် လူတိုင်းဝင်ကြည့်နေကြစဉ် ဖုံးကာမထားသည့် အစမ်းထုတ်လွှင့်မှုကို တင်ပေးလိုက်သည်။ ရှဲ့ယီကျိုးနှင့် နျန်ယွီယီတို့နှစ်ဦးစလုံးကိုပင် တရားဝင် Tag လုပ်ကာ သူငယ်ချင်းဟောင်းများရှိုး ရိုက်ကူးရာတွင် ဖိတ်ခေါ်လိုက်လေသည်။

အကယ်၍ မင်္ဂလာပါသရုပ်ဆောင်ရေ' သည် ယ‌မန်နေ့အတွက် သွေးပူရုံမျှဖြစ်ခဲ့ပါလျှင် ယနေ့၏ သူငယ်ချင်းဟောင်းများ ' မှာမူ နျန်ယွီယီ၏ကျော်ကြားမှုအတွက် အပြည့်အဝခိုင်မာသွားစေသည်။

အာရုံစိုက်မှုရယူရန်အတွက် ဒါရိုက်တာမှ ယခင်အစမ်းထုတ်လွှင့်မှုတွင် ရှဲ့ယီကျိုးနှင့် နျန်ယွီယီတို့ကို ဝါးပေးထားခဲ့ပြီး ကြည့်ရှုသူများ၏ သိလိုစိတ်ကို မှန်းဆခြင်းမှတဆင့် မြင့်တက်စေခဲ့သည်။

သို့သော်လည်း ဤသည်မှာ အချို့သောပရိသတ်များအတွက် သူတို့၏အိုင်ဒေါဖြစ်ရန် မျှော်လင့်ချက်များဖြစ်ပေါ်သွားစေကာ ယခုအချိန်တွင်မူ ထိုမျှော်လင့်ချက်များမှာ ရိုက်ချိုးခံရပြီဖြစ်သည်။

ရုတ်တရက်ဆိုသလို ဒေါသပေါက်ကွဲနေသော အခြားကြယ်ပွင့်များ၏ ပရိသတ်များမှ သူတို့၏ဒေါသကို နျန်ယွီယီထံဖွင့်ထုတ်လာကြသည်။

ကျိုးအာ့ဟယ်တစ်ယောက် ပီအာဌာနတွင် ပြဿနာများကိုဖြေရှင်းရန် တစ်နေကုန်နေလိုက်ရပြီး အပျက်သဘောဆောင်သည့်မန့်များကို ထိန်းသိမ်းရန်နှင့် ဖိနှိပ်ရန်ကြိုးစားလိုက်ရသည်။

ကံကောင်းစွာဖြင့် ယမန်နေ့မှ နျန်ယွီယီ စုဆောင်းရရှိထားသော ချစ်ခင်မှုများကို ဖုန့်ဟွာ၏ပရိုမိုးရှင်းအကောင့်များနှင့် ပေါင်းစပ်လိုက်ချိန်၌ ဇာတ်ကြောင်းကို သူတို့သဘောအတိုင်း အနည်းငယ်ပြောင်းလဲလိုက်နိုင်သည်။

ပီအာဌာန‌ခေါင်းဆောင်မှာ ထိုင်ခုံတွင်ထိုင်လျက် သူ၏ အမြဲသပ်ရပ်နေသောဆံပင်သည်ကား ရှားရှားပါးပါးရှုပ်ပွနေခဲ့သည်။

“ ဒီဟာပြီးရင်တော့ မင်းကိုယ့်အပေါ် အကြွေးအကြီးကြီးတင်သွားပြီနော်…” 

ရင်းကျင်း သူ၏ဆံပင်ကိုသပ်တင်လိုက်သည် “ ကိုယ်တောက်လျောက်အလုပ်လုပ်နေရတာ မင်းကြောင့်ပဲလေ…”

“ ပါးစပ်ကိုပိတ်ပြီး နည်းနည်းဖြစ်ဖြစ် နားလိုက်စမ်းပါကွာ…” 

ကျိုးအာ့ဟယ် ကွန်ပြူတာပေါ်မှ မျက်လုံးကိုခွာမလာခဲ့ပေ 

“ အခုလက်ရှိအခြေအနေက တည်ငြိမ်သွားပြီဆိုပေမယ့် ရုတ်တရက်ဖြစ်လာမှာတွေအတွက် ငါတို့အသင့်ပြင်ထားဖို့လိုတယ်လေ…”

“ ဟုတ်တယ် တချို့ဖန်အဖွဲ့တွေက မလှုပ်ရှားလာသေးဘူး…လက်ရှိမှာ အဖျက်သမားတွေရဲ့ အဓိကအင်အားစုက ကျန်းယန်ရဲ့ဖန်တွေပဲလေ…သူတို့က နျန်ယွီယီကိုဆွဲချပြီး ကျန်းယန်ကိုပစ်တင်ပေးချင်နေတာ ဖြစ်နိုင်တယ်…” 

ရင်းကျင်း နားထင်ကိုပွတ်လျက် ပြောလာသည်။ လွန်ခဲ့သောရက်များအတွင်း သူကျိုးအာ့ဟယ်နှင့် အချိန်ပိုဆင်းခဲ့ရပြီး နှစ်ရက်သာနားရသေးသော်လည်း လက်ရှိအရှုပ်တော်ပုံမှာ ထပ်မံပေါ်ပေါက်လာသည်။

“ ဒီလိုဆိုရင် ဘယ်လိုလုပ်ကြမလဲ…” ကျိုးအာ့ဟယ် ထိုင်မရထမရဖြစ်လာသည် 

“ ဒီတိုင်း လိုင်းပေါ်ကဟာတွေကိုပဲ ဆက်တိုက်ကြည့်နေလို့မရဘူးလေ…”

“ ငါတို့ခေါင်းဆောင်တွေကို အရင်ဆုံးပစ်မှတ်ထားပြီးရင် လူထုရဲ့အမြင်ကို လွှဲပစ်တာပေါ့…”

“ အစီအစဉ်ကဘာလဲ…” ကျိုးအာ့ဟယ်မှ မေးလာသည်။

“ အင်းးးး …” ရင်းကျင်း၏နှုတ်ခမ်းထောင့်တစ်ဖက် ကော့တက်သွားသည် “ ကိုယ့်ကိုနမ်းရင် ပြောပြမယ်လေ…”

ကျိုးအာ့ဟယ်မှ လှောင်ပြောင်လိုက်သည် “ မင်း ဒီဟာကိုမကိုင်တွယ်နိုင်ဘူးဆိုရင် လူကြီးမင်းရှဲ့က သူ့လက်တွေနဲ့ ကိုယ်တိုင်ကိုင်တွယ်ပေးသွားလိမ့်မယ်….”

ရင်းကျင်းမှ စိတ်ပျက်လက်ပျက်ဖြင့် နှာခေါင်းကိုတို့ထိလိုက်သည် “ မင်းရဲ့အနုပညာရှင် နျန်ယွီယီက အလားအလာရှိတယ်ဆိုပေမယ့် လူကြီးမင်းရှဲ့က အရမ်းစိတ်ပူလွန်းတယ်လို့ မထင်ဘူးလား… ဖြစ်နိုင်တာက…”

ကျိုးအာ့ဟယ် ထက်ရှသော အကြည့်တချက်ပစ်လွှတ်လိုက်သည်။

“ လူကြီးမင်းရှဲ့က မင်းရဲ့ကြယ်ပွင့်ငယ်လေးကို သဘောကျနေတာများလား…”

“ သတ္တိရှိရင် ဒီစကားကို လူကြီးမင်းရှဲ့အရှေ့မှာ ပြောကြည့်လိုက်လေ…” ကျိုးအာ့ဟယ် ထရပ်လိုက်သည်

 “ ငါသန့်စင်ခန်းသွားလိုက်ဦးမယ်…”

ရင်းကျင်း ကျိုးအာ့ဟယ်အား အနမ်းပေးရန်စနောက်ခဲ့သော်လည်း ကျိုးအာ့ဟယ်တစ်ယောက် သန့်စင်ခန်းမှ ပြန်ရောက်လာချိန်တွင် အရာအားလုံးမှာ အခြေကျပြီးဖြစ်သည်။

“ မင်းဘာကိုထုတ်ချလိုက်တာလဲ…” ရင်းကျင်း၏ ခန့်မှန်းပြီးသားဖြစ်ပုံရသည့် အပြုံးကိုကြည့်ကာ ကျိုးအာ့ဟယ် သိချင်စိတ်များ ကြီးထွားလာသည်။

“ ကျန်းယန်အကြောင်းပဲပေါ့…ငါတို့က အာရုံစိုက်မှုကိုပိုင်းခြားပြီး ကျန်းယန်ရဲ့ဖန်တွေကို ခွဲထုတ်ပစ်ရမှာဆိုတော့ သူ့အပေါ် ရေဆိုးလောင်းချတာက အဆင်ပြေဆုံးရွေးချယ်မှုပဲလေ…” ရင်းကျင်း အနောက်သို့မှီထားပြီး မျက်လုံးတစ်ဝက်ပိတ်ကာ အနားယူရန် အသင့်ဖြစ်နေခဲ့သည်။

ကျိုးအာ့ဟယ် ကွန်ပြူတာအနားသို့ ကပ်သွားလိုက်ပြီးနောက် ရင်းကျင်းဆိုလိုသည့် လွှဲပြောင်းပေးသည်ဟူသော စကားကိုနားလည်သွားခဲ့သည်။

နယ်ပယ်အတွင်းမှ ဖျော်ဖြေရေးကုမ္ပဏီအများစုတွင် သူတို့ထံမှမဟုတ်သော အနုပညာရှင်များ၏ အပုပ်အပွများရှိတတ်ပြီး ပုံမှန်အားဖြင့် သိမ်းဆည်းထားတတ်ကြသည်။ သို့သော်လည်း သူတို့ထံမှ အနုပညာရှင်များနှင့်ပတ်သက်၍ မကောင်းသောအမြင်များ သို့မဟုတ် ဖိနှိပ်မှုများဖြစ်ပေါ်လာပါက အာရုံလွှဲရန်အတွက် ၎င်းတို့ဖွင့်ချပစ်တတ်သည်။

ဖျော်ဖြေရေးနယ်ပယ်၏ အကြီးဆုံးကုမ္ပဏီတစ်ခုအနေဖြင့် ဖုန့်ဟွာတွင်လည်း ထိုကဲ့သို့သောအရာများစွာကို သဘာဝအတိုင်း သိမ်းဆည်းထားခဲ့သည်။

ရင်းကျင်းထုတ်ပြလိုက်သည့်အရာမှာ သက်လတ်ပိုင်းအမျိုးသမီးတစ်ယောက်ကို ဖက်ထားသော ကျန်းယန်၏ဝါးနေသော ဓာတ်ပုံတစ်ပုံပင်ဖြစ်ကာ အရည်အသွေးညံ့ဖျင်းသော်လည်း ကျန်းယန်ကိုမူ ရှင်းရှင်းလင်းလင်းမြင်တွေ့နိုင်သည်။

ထိုပုံကိုထုတ်ပြလိုက်သည်နှင့် ၎င်းမှာ ကျယ်ပြန့်စွာ ပျံ့နှံ့သွားပြီး ရေပန်းစားမှုစာရင်းမှ နျန်ယွီယီအကြောင်းခေါင်းစီးကို အလျင်အမြန်ဖိနှိပ်နိုင်ခဲ့သည်။

[ ဝိုးးး ဒါက သေချာပေါက်ကျန်းယန်ပဲ… သူအင်တာဗျူးအတွက် အဲ့အင်္ကျီကို ဝတ်ခဲ့တာလေ…ပြီးတာနဲ့ ချက်ချင်းသွားချိန်းတွေ့နေတာလား ]

[ ချိန်းတွေ့တာလား… သူမက ကျယ်ချန်ကုမ္ပဏီရဲ့ အကြီးဆုံးသမီးဆိုတာကို ဘယ်သူမှမမှတ်မိဘူးလို့တော့ ငါ့ကို‌မပြောနဲ့နော်…သူက အသက်လေးဆယ်ကျော်နေပြီး လက်ထပ်ထားတုန်းပဲလေ ]

[ ငါမှတ်မိတာတော့ သူကွာရှင်းလိုက်တယ်တဲ့… ဒါပေမယ့် ကျန်းယန်က သကြားဘေဘီလေးအဖြစ် သိမ်းခံထားရတာလား ]

[ ဒါက ရိုမန့်နဲ့မတူသလိုပဲ… စဉ်းစားကြည့်လေ နင်တို့ဆိုရင်ကော နင်တို့ထက် အသက်နှစ်ဆယ်ကျော်ကြီးပြီး သာမန်ရုပ်ရည်ပဲရှိတဲ့လူကို ဒိတ်မှာလား…အထူးသဖြင့် မင်းကကျန်းယန်လို နာမည်ကြီးကြယ်ပွင့်ဖြစ်နေတဲ့အခါမျိုးမှာပေါ့ ]

[ အသက်ပြည့်ပြီးတဲ့လူအားလုံးကတော့ ဒီမှာ ဘာတွေဖြစ်နေလဲဆိုတာကို သိထားပြီးသား…ကျန်းယန်ရဲ့ဖန်တွေ အသံတိတ်နေကြတာတော့ အံ့ဩစရာပဲနော်… ပုံမှန်ဆိုရင် သူတို့ကတအားဆူကြတာလေ ]

[ ပွင့်ပွင့်လင်းလင်းပြောရမယ်ဆိုရင် မပြင်ထားတဲ့ပုံတွေမှာ ကျန်းယန်က သကြားဘေဘီလေးလို့ကော ခေါ်လို့ရသေးရဲ့လားဟင်… သူဌေးမကြီးက သူ့အပေါ်ဘာကြွေနေလဲဆိုတာတော့ ငါသိချင်မိသား ]

[ တကယ်လို့ ငါသာချမ်းသာခဲ့ရင် ရှဲ့ယီကျိုးကိုလိုချင်တယ်… ဟားဟား… အာ မဟုတ်သေးဘူး…ရှဲ့ယီကျိုးကော နျန်ယွီယီကိုပါလိုချင်တာ…အရိုင်းလေးနဲ့ အယဉ်လေးရဲ့တွဲစပ်မှုက လုံးဝကိုပြီးပြည့်စုံနေမှာပဲနော် ]

[ ကျန်းယန်ရဲ့ သဘာဝအတိုင်းရုပ်ရည်နဲ့ဆိုရင် သူ့ကိုထိန်းကျောင်းခံရတယ်လို့တောင် ထည့်စဉ်းစားလို့ရသေးလို့လား…သူမ သူ့အပေါ်ဘာကြည့်ကြိုက်နေလဲဆိုတာတော့ စိတ်ကူးကြည့်ဖို့တောင် ခက်တယ် ]

[ မင်းက‌အရမ်းလောဘကြီးတာပဲ … ငါ့အတွက် တစ်ယောက်တော့ ချန်ထားပေးပါဦး ]

[ ဘာတွေအိပ်မက်လာမက်နေတာလဲ… ငွေနဲ့ဆိုရင်တောင်မှ ရှဲ့ကော်ပိုရေးရှင်းရဲ့ ဒုတိယသားဖြစ်တဲ့ ရှဲ့ယီကျိုးကို နင်မရနိုင်ဘူးနော် ]

[ ကောင်းပြီ…ဒီလိုဆိုရင် ငါ နျန်ယွီယီကိုပဲ စိတ်ကူးယဉ်တော့မယ်…ဒီလောက်တောင် ချိုမြိန်တဲ့ကလေးလေးကို အနားမှာထားပြီး အလှထိုင်ကြည့်နေရင်တောင် မျက်စိပဒသာဖြစ်နေမှာပဲဟယ် ]

[ ငါ့ကိုလည်း အိပ်မက်ပေးမက်ပါဦး… ငွေရှိတဲ့မိန်းမတစ်ယောက်ရဲ့ဘဝက အရမ်းကိုကြည်နူးဖို့ကောင်းတာပဲနော်…လူရွေးတဲ့နေရာမှာ ကန်းသွားခဲ့တာကတော့ ‌ခြွင်းချက်ပေါ့လေ ]

ယခင် နျန်ယွီယီကို ဆဲဆိုနေကြသော ကျန်းယန်၏ပရိသတ်များမှာ ယခုအချိန်၌ ကျန်းယန်၏သတင်းကြောင့် အငိုက်မိသွားပြီး မန့်ထဲမှ တိတ်တဆိတ်ထွက်ခွာသွားကြသည်။

ပုံမှန်အချိန်များ၌ ဆက်တိုက်မနားတမ်းစာဝင်နေတတ်သော စကားဝိုင်းသည်ပင် ယခု မိနစ်အနည်းငယ်ကြာမှ စာတစ်စောင်ဝင်တော့သည်။

နာမည်ကြီးပရိသတ်အချို့သည်သာ ထိုသတင်းမှာအမှားဖြစ်ပြီး မတရားစွပ်စွဲခံရကာ အတုအယောင်ဖြစ်သည်ဟူ၍ ခေါင်းမာမာနှင့်ဆက်ငြင်းနေကြသည်။

သို့သော်လည်း ဓာတ်ပုံသက်သေမှာ လူထုကိုအလွန်စိတ်ဝင်စားသွားစေပြီး ပရိသတ်များသည်လည်း မျက်လုံးမပါသူများမဟုတ်ကြချေ။

အဆုံး၌ တစ်စုံတစ်ယောက်မှ စာတစ်စောင်တင်လာခဲ့သည်။

[ ငါအရမ်းပင်ပန်းနေပြီ… အဲ့သည်ဟာက တအားရွံဖို့ကောင်းတာပဲ… ငါတော့အဖွဲ့ကထွက်တော့မယ်… သူ့အတွက်ထုတ်ထားတဲ့ပစ္စည်းတွေကိုလည်း အကုန်ရောင်းပစ်ပြီနော်… ရှန်းယွီမှာဈေးလျော့ပေးထားတယ် ]

ထိုစာမှာ အလှည့်အပြောင်းတစ်ခုကဲ့သို့ဖြစ်သွားပြီး အဖွဲ့ဝင်များ စတင်နည်းပါးလာကာ ကျန်းယန်၏ပစ္စည်းများကို ရှန်းယွီ၌ပြန်လည်ရောင်းချမှုများမှာ မြင့်တက်လာသည်။

အချိန်တစ်ခုအထိ ကျန်းယန်နှင့် သူ၏အေးဂျင့်တို့မှာ အခြားအရာတွင် လွန်စွာအာရုံစိုက်နေကြရသောကြောင့် နျန်ယွီယီကို ပစ်မှတ်မထားနိုင်ကြပေ။

အဆိုပါ ဖုန့်ဟွာ၏ဖော်ထုတ်မှုမှာ အခြားသောအနုပညာရှင်များအတွက်လည်း သတိပေးပြီးရာရောက်သွားသည် : မင်းတို့ဖော်ထုတ်ခံချင်တယ်ဆိုရင် ငါတို့ဆီက အနုပညာရှင်တွေကို လာထိကြည့်လေ ဟု ပြောနေသကဲ့သို့ပင်။

ကျန်းယန်မှာ စတေးခံနမူနာဖြစ်သွားပြီးနောက် လူတိုင်းသည်လည်း ကောင်းမွန်စွာပြုမူသွားကြသည်။

နျန်ယွီယီမှာ လိုင်းပေါ်တွင်ရှိနေခြင်းထက် အတင်းအဖျင်းပြောခြင်းတွင်သာ ပို၍စိတ်ဝင်စားနေသောကြောင့် ဝေ့ပေါ်မှ ကောင်းကင်ယံတိုက်ပွဲကို သတိမထားမိလိုက်ချေ။ သူ၏နေ့ရက်များကို အိမ်တွင်သာအချိန်ကုန်စေပြီး ကြောင်လေးများနှင့်ကစားခြင်း၊ ဂိမ်းဆော့ခြင်းနှင့် ဟင်းချက်ခြင်းတို့သာ လုပ်နေခဲ့သည်။

အမှန်စင်စစ်အားဖြင့် ဖန်ကျုံးချွမ်း၏နေရာမှ ဂိမ်းအခန်းသို့ နျန်ယွီယီသွားလည်ကြောင်း သိပြီးသည်နှင့် ရှဲ့ယီကျိုးသည်လည်း နျန်ယွီယီ၏ဗီလာတွင် နောက်ဆုံးပေါ်ဂိမ်းအခန်းတစ်ခု ဆင်ပေးခဲ့သည်။

ဖန်ကျုံးချွမ်းအိမ်မှတစ်ခုနှင့်ယှဉ်မည်ဆိုပါက ၎င်းမှာပို၍ပင် အံ့ဩဖွယ်ရာရှိသည်။

နျန်ယွီယီ နေ့တိုင်းလိုလို ဂိမ်းအခန်းတွင်သာ အချိန်ကုန်နေပြီး ထျန်ထျန်မှာလည်း လိမ္မာကာ သူ၏ဘေးတွင်‌လဲလျက် မကြာခဏဆိုသလို သူမ၏ခန္ဓာကိုယ်လေးဖြင့် လာလာပွတ်သပ်နေသည်။

ကောင်လေးတစ်ယောက်နှင့် ကြောင်သုံးကောင်တို့မှာ သက်သောင့်သက်သာရှိသော ဘဝတွင်နေထိုင်နေကြလေသည်။

ဤသည်မှာ ကျိုးအာ့ဟယ် နျန်ယွီယီ၏အိမ်သို့လာပြီး သူ့ကိုဂိမ်းအခန်းထဲမှ လာဆွဲထုတ်သည်အထိပင်။

ကျိုးအာ့ဟယ် နျန်ယွီယီကို ကုမ္ပဏီသို့တိုက်ရိုက်ခေါ်သွားပြီး ဓာတ်ပုံစတူဒီယိုတစ်ခုစီသို့ ဦးတည်လိုက်သည်။

“ ဘာအင်တာဗျူးလဲ…” နျန်ယွီယီတစ်ယောက် အတင်းအကြပ် အဝတ်သစ်လဲခံလိုက်ရကာ သူ၏ကြောင်များကိုထား၍ ကုမ္ပဏီသို့ဆွဲခေါ်ခံလိုက်ရသည်။

“ ဝေ့ပေါ်မှာ လူတော်တော်များများ Follow ထားတဲ့ မဂ္ဂဇင်းတစ်ခုပဲ… နာမည်ကောင်းလည်းရှိတယ်…” ကျိုးအာ့ဟယ် နျန်ယွီယီကို စတူဒီယိုခန်းထဲသို့ခေါ်သွားပြီး တံခါးခေါက်လိုက်သည်။

“ သူရောက်လာပြီ …” ကျိုးအာ့ဟယ် အနည်းငယ်ဝဖိုင့်ဖိုင့်ဟန်ရှိသည့် အမျိုးသားတစ်ခုရှေ့တွင်ရပ်ကာ ကြေငြာလိုက်သည်။

အနည်းငယ်ဝသောအမျိုးသားမှာ အပြုံးတစ်ပွင့်မြင့်တက်လာပြီး နျန်ယွီယီနှင့်လက်ဆွဲနှုတ်ဆက်လာသည်။

“ မေးခွန်းတွေက တဲ့တိုးပဲမေးတာဆိုတော့ စိတ်ပူနေဖို့မလိုဘူးနော်…” နျန်ယွီယီ၏စိတ်လှုပ်ရှားနေမှုကို သတိထားမိသောကြောင့် ထိုသူမှနှစ်သိမ့်ပေးလာသည်။

တဲ့တိုးဆန်သောမေးခွန်းများ ဟူသည့်စကားလုံးတွင် နျန်ယွီယီ အသံဖွဖွဖြင့်ရယ်မိသွားပြီး ခုံတွင်နေရာယူကာ ကင်မရာပြင်ပြီးသည်ကို စောင့်နေလိုက်သည်။

ဓာတ်ပုံဆရာမှ အိုကေ ဟူ၍ လက်ပြလာသည်နှင့် အင်တာဗျူးကို တရားဝင်စတင်လိုက်ကြလေသည်။

အင်တာဗျူးကို တစ်နာရီကျော်ကြာ ရိုက်ကူးခဲ့ရသောကြောင့် အလုပ်ပြီးသွားချိန်၌ နျန်ယွီယီ၏မျက်နှာမှာ ပြုံးရလွန်းသောကြောင့် တောင့်‌တင်းနေခဲ့သည်။

သူ၏ မျက်နှာပေါ်ရှိ ကြွက်သားများကို နှိပ်နယ်ပေးလိုက်ပြီး ဝန်ထမ်းမှ သူ့အတွက်ပြင်ပေးထားသော ရေပုလင်းကိုလှမ်းယူလိုက်သည်။

စတူဒီယိုတံခါးမှာ ထပ်မံခေါက်ခံလိုက်ရပြီး အံ့အားသင့်နေသည့်အသံများအကြား နျန်ယွီယီ လှည့်ကြည့်လိုက်ရာ ဝင်ပေါက်တွင်ရှဲ့ယီကျိုးကို မြင်လိုက်ရသည်။

“ ပြီးသွားပြီလား…” ရှဲ့ယီကျိုးမှ အနားသို့ရောက်လာပြီး တုန့်ဆိုင်းနေခြင်းပင်မရှိဘဲ ရေသောက်လိုက်သောကြောင့် အနည်းငယ်ပွသွားသည့် နျန်ယွီယီ၏ဆံပင်ကို ပွတ်သပ်ပေးလာသည်။

“ ဟုတ်ကဲ့ ပြီးပါပြီ…” နျန်ယွီယီ ခေါင်းညိတ်ပြလိုက်သည် 

“ ဒုတိယအစ်ကို ဘယ်လိုဖြစ်လို့ သည်ကိုရောက်လာတာလဲ…”

သူ၏အင်တာဗျူးမှ မှတ်စုတိုများဖြင့် အလုပ်ရှုပ်နေသော မေးမြန်းသူမှာ အံ့ဩတုန်လှုပ်သွားရပြီး သူ၏လုံးဝိုင်းသော မျက်နှာသည်ပင် တဆတ်ဆတ်တုန်လာခဲ့သည်။

ဘုရားရေ သူတော့ မိုးမြေတုန်သွားစေမယ့် သတင်းတချို့ကို သိလိုက်ရပြီထင်တယ်…

လူသစ်လေးက ရှဲ့ယီကျိုးကို အခုလေးတင် ဒုတိယအစ်ကိုလို့ခေါ်ချလိုက်တယ်…

ဖုန့်ဟွာဖျော်ဖြေရေးကုမ္ပဏီတွင် အင်တာဗျူးရန် အကြိမ်ပေါင်းများစွာ ဖိတ်ခေါ်ခံရဖူးသောကြောင့် မေးမြန်းသူမှာ အရူးတစ်ယောက်မဟုတ်ချေ။ အစက်လေးများကို ဆက်သွယ်ကြည့်ပြီးသည့်နောက် သူ့ထံတွင် အဆိုပါဆက်ဆံရေးနှင့်ပတ်သက်၍ အရိပ်အယောင်ပေါ်လာခဲ့သည်။ တင်ဆက်သူတစ်ဦးအနေဖြင့် သူအတင်းအဖျင်းများစွာကို ဖုံးကွယ်ပေးထားဖူးပြီး မဒမ်ရှဲ့၏ဓာတ်ပုံများကိုလည်း မြင်ခဲ့ဖူးသည်။

လွန်ခဲ့သောနှစ်များစွာက ရှဲ့မိသားစုသည် သူတို့၏အငယ်ဆုံးသားလေးကို ဆုံးရှုံးခဲ့ရပြီး နျန်ယွီယီ၏အသက်မှာလည်း ကွက်တိကျနေကာ သူသည် မဒမ်ရှဲ့နှင့်လွန်စွာ ဆင်တူလှသည်။ ၎င်းသဲလွန်စများကို ဆက်စပ်ကြည့်လိုက်ခြင်းအားဖြင့် အဖြေမှာထွက်လာလုနီးပါးပင် ဖြစ်သွားလေပြီ။

ဒါက သတင်းကြီးပဲ…

ဖြစ်ချင်တေ

ာ့ သူ့ကိုယ်သူအတွက်သာ သိမ်းဆည်းထားရမည့် အရာဖြစ်နေခဲ့သည်။

မေးမြန်းသူမှ သူထုတ်ပြောမိလုမတတ်ဖြစ်နေသော ရှော့ရမှုကို မြိုချပြီး မကြားချင်ယောင်ဆောင်ကာ သူ၏အဖွဲ့သားများနှင့် ပြန်သွားလိုက်ရလေသည်။

🫶