Chapter 43

🫶Chapter 43

မျှော်လင့်ထားသည့်အတိုင်းပင် ယွီသာ့ဟိုင်မှ သူ၏ရည်ရွယ်ချက်အစစ်ကို ခဏအကြာတွင် ထုတ်ပြောလာသည်။

“ ဟိုင်မြို့မှာ မင်းကိုချီးကျူးနေတဲ့ အိမ်ခြံမြေသူဌေးကြီးတစ်ယောက်ရှိတယ်…” 

ယွီသာ့ဟိုင်မှ ညှိနှိုင်းသယောင် မျက်နှာဖုံးစွပ်ထားသော အမိန့်ပေးသံဖြင့်ဆိုလာသည် “ မင်းလည်း ဖျော်ဖြေရေးနယ်ပယ်ထဲမှာ ရှိလာတာကြာလှပြီပဲဟာ… တောင်းဆိုချက်တစ်ခုလောက်ထပ်လုပ်ပေးလိုက်ရလို့ မနစ်နာသွားပါဘူး…”

ယွီစစ်ဟန် ခေါင်းကိုသာငုံ့ထားပြီး မတော်တဆပန်းကန်ကို ဓားဖြင့်ခြစ်လိုက်မိရာ အသံကျယ်ကြီးတစ်ခုထွက်ပေါ်လာသည်။

တကယ်ကြီး… အဖေတစ်ယောက်ဆီက ထွက်လာရမယ့် စကားတွေ‌တဲ့လား…

ယွီစစ်ဟန် အေးစက်စွာ မဲ့ပြုံးပြုံးလိုက်သည် “ ကောင်းပြီ ကျွန်တော်လုပ်မယ်…”

သူ့မော့ကြည့်လိုက်သောအခါ သူ၏ကြောက်မက်ဖွယ်အပြုံးသည် ယွီသာ့ဟိုင်ကို အံ့အားသင့်သွားစေသည်

 “ အပြန်အလှန်အနေနဲ့ ကျွန်တော် ကုမ္ပဏီရဲ့ရှယ်ယာဆယ်ရာခိုင်နှုန်းယူမယ်…အရမ်းမများဘူးမလား…”

“ နောက်ကျရင် အဖေတို့ဘာပဲတောင်းဆို တောင်းဆို ဘယ်သူဖြစ်နေနေလိုက်လုပ်ပေးမယ်…”

“ မဖြစ်နိုင်တာ…” ယွီစစ်ထန် ရုတ်တရက်ထရပ်လာသည်

 “ ယွီစစ်ဟန် မင်းရဲ့ကုမ္ပဏီက အဲ့သည့်နှာဘူးအဘိုးကြီးတွေနဲ့ မင်းအတူရှိနေတဲ့ပုံတွေကို ငါအရယူနိုင်တယ်နော်…တကယ်လို့သာ အပြင်ကို ပြန့်မသွားစေချင်ရင်တော့…”

ယွီစစ်ဟန် ယွီစစ်ထန်တွင် ထိုပုံများယူထားလိမ့်မည်ဟု မထင်ထားသောကြောင့် လက်သီးသာတင်းတင်းဆုပ်ထားမိသည်။

“ ဘာကိုပဲရွေးရွေး မင်းဒီဟာကို လုပ်ကိုလုပ်ရမှာပဲ… ကုမ္ပဏီသာ ဒုက္ခရောက်ခဲ့ရင် မင်းလည်း အနုပညာလောကမှာ ရှင်ကျန်ရစ်မယ်လို့ မထင်လေနဲ့နော်…” ယွီစစ်ထန် အပေါ်ထပ်သို့မတက်ခင် ယွီစစ်ဟန်ထံ မထီမဲ့မြင်ပြုသည့်အကြည့်ဖြင့် ကြည့်သွားသည်။

မိဘမဲ့ဂေဟာမှ ပြန်ခေါ်လာသော ညီလေးကို ယွီစစ်ထန် မည်သည့်အခါကမှ သဘောမကျခဲ့ချေ။ သူ၏ယခင်ဘဝတွင် ထိုသူကို အကြွေးတင်မိခဲ့သည်ဟုပင် သူထင်မိသည်။

“ မင်းဘာရှယ်ယာမှ ရမှာမဟုတ်ဘူး… အကုန်လုံးက မင်းအစ်ကိုကြီးရဲ့ဟာပဲ…” ယွီသာ့ဟိုင်မှ အတိအလင်းပြောလာသည် 

“ တစ်ခါပြီးသွားရင် ငါမင်းကိုဆယ်သန်းလွှဲပေးမယ်…ပြီးတော့ မင်းအစ်ကိုကိုလည်း အဲ့ပုံတွေဖျက်ပေးဖို့ သေချာခိုင်းလိုက်မှာပါ…”

ပြောပြီးသည်နှင့် ယီသာ့ဟိုင်ထရပ်ကာ သွားရန်ပြင်လိုက်သည်။

သို့သော်လည်း အပေါ်ထပ်သို့မတက်ခင် ယွီသာ့ဟိုင် ပြန်လှည့်ကာ သတိပေးလိုက်သည် 

“ ဒါပေမယ့် နောင်အနာဂတ်မှာ အဲ့သည့်လိုပုံတွေ အရိုက်ခံလာရရင် ဘယ်လိုဖြေရှင်းရမလဲက မင်းအပေါ်ပဲ မူတည်တယ်နော်… ဒီလိုအမူအကျင့်မျိုးတွေကိုတော့ တခြားသူတွေရှေ့မှာ ငါတို့ယွီမိသားစုနဲ့ မရောထွေးသွားစေနဲ့…”

ထမင်းစားခန်းမှာ ဗလာဖြစ်သွားပြီဖြစ်ပြီး တစ်ဝက်ကျန်သေးသော အသားကင်ကို လှီးဖြတ်နေစဉ် ယွီစစ်ဟန်၏လက်မှ သွေးကြောများမှာ ပေါက်ကွဲထွက်လာမတတ် ဖောင်းကားနေလေသည်။

****

နျန်ယွီယီ ဆိုဖာပေါ်တွင်လဲလျက် ယမန်နေ့မှ ကျန်းယန်အကြောင်း ဝေ့ပေါ်တွင်တက်နေသည့် အရည်တရွှမ်းရွှမ်းအတင်းအဖျင်းများကို လိုက်ကြည့်နေခဲ့သည်။

“ ထျန်ထျန် ငါ့အဝတ်တွေကိုတော့ မကိုက်လိုက်နဲ့နော်…” နျန်ယွီယီ ကြောင်ကို အသာအယာမကာ ဆိုဖာပေါ်တင်ပေးလိုက်ပြီး သူ၏ဘေးတွင် ခွေအိပ်စေလိုက်သည်။

ဝေ့ပေါ်မှ အချို့သောမန့်များကြောင့် နျန်ယွီယီ ဖိုရမ်အထိပင် ခရီးဆက်လာရာ ဖုံးကွယ်မထားသည့် ဇာတ်လမ်းဟောင်းအချို့ကို ရှာတွေ့ခဲ့သည်။

ဖန်ကျုံးချွမ်း ဝင်လာစဉ် နျန်ယွီယီမှာ ဆိုဖာပေါ်တွင်လဲလျက် ကြောင်လေးနှင့်ဆော့နေစဉ် ဖုန်းသုံးနေကိုတွေ့လိုက်ရပြီး အပေါ်သို့လိပ်တက်နေသော တီရှပ်အဖြူလေးမှ ဆွဲဆောင်မှုရှိသော ခါးလေးကိုထုတ်ပြနေသည်ကိုပါ မြင်လိုက်ရ၏။

တံခါးဖွင့်သံကြောင့် နျန်ယွီယီ အစပိုင်းတွင် ဈေးဝယ်သွားသည့် အိမ်အကူအဒေါ်ကြီးပြန်ရောက်လာသည်ဟု ထင်လိုက်မိသည်။ ဆိုဖာပေါ်မှထကာ သူမကို ဝယ်လာသည့်ပစ္စည်းများကူသယ်ပေးရန် မတ်တတ်ရပ်လိုက်သော်လည်း လှည့်လိုက်ချိန်တွင် လျှောက်လာသည့် ဖန်ကျုံးချွမ်းကိုသာ တွေ့လိုက်ရသည်။

“ အစ်ကို…” နျန်ယွီယီ မျက်တောင်ပုတ်ခတ်ပုတ်ခတ်လုပ်နေမိသည် 

“ ဒီနေ့အလုပ်မသွားဘူးလား…”

ဖန်ကျုံးချွမ်း ဆိုဖာပေါ်တွင် ထိုင်ချလိုက်ချိန်၌ နျန်ယွီယီ သူ့အတွက် လိမ္မော်သီးခွာပေးလိုက်သည်။

“ အဒေါ်ကြီးဝယ်လာပေးတာလေ.. သူတို့တကယ်ချိုတယ်…” နျန်ယွီယီ ခွာထားသည့် လိမ္မော်သီးတဝက်ကို ဖန်ကျုံးချွမ်းထံပေးလိုက်ပြီး တစ်ဝက်ကိုမူ သူ့ပါးစပ်ထဲထည့်လိုက်သည်။

ဖန်ကျုံးချွမ်း တကိုက်ကိုက်လိုက်သည်။

လိမ္မော်သီးမှာ ချိုသော်လည်း နျန်ယွီယီမှာ ပို၍ချိုသည်။

သူဝင်လာစဉ်အခါမှ နျန်ယွီယီ၏ခါးလေးကို ပြန်တွေးမိသွားသောကြောင့် ဖန်ကျုံးချွမ်း၏မျက်လုံးထဲတွင် အရိပ်တစ်ခု ဖြတ်ပြေးသွားလေသည်။

လတ်တလောတွင် ဖန်ကျုံးချွမ်းမှာ အလုပ်ရှုပ်နေသည်ဖြစ်ရာ သူအားသည့်အချိန်တိုင်းတွင် အချိန်လု၍ နျန်ယွီယီကို လာတွေ့လေ့ရှိသည်။

“ ကျွန်တော်က အခုလက်ရှိကျန်းယန်ရဲ့ ကောလာဟလကိုဖတ်နေတာလေ…” 

နျန်ယွီယီတစ်ယောက် ဝေ့ပေါ်မှ နောက်ဆုံးရအတင်းအဖျင်းကို မျှဝေလိုက်သည်

 “ တခြားသူတွေ နောက်ပြီးပြောကြတာတော့ ကျွန်တော်တို့လို အတင်းအဖျင်းစောင့်စားနေကြတဲ့သူတွေက တကယ့်အမှိုက်တွေပဲတဲ့…”

ဖန်ကျုံးချွမ်း လိုင်းပေါ်မှအတင်းပြောသည့် ဓလေ့အကြောင်းကို မရင်းနှီးသည့်တိုင် နျန်ယွီယီ၏စိတ်အားထက်သန်မှုမှာ ချစ်စဖွယ်ဖြစ်ကြောင်း သိလိုက်ရသည်။

ဖန်ကျုံးချွမ်းနှင့် ရင်းနှီးနေသည့် ထျန်ထျန်မှာ ဆိုဖာပေါ်မှခုန်ဆင်းသွားပြီး ပို၍သက်သောင့်သက်သာရှိသော ဖန်ကျုံးချွမ်း၏ပေါင်ပေါ်တက်အိပ်နေခဲ့သည်။

“ ထျန်ထျန်က ဒုတိယအစ်ကိုကို သဘောမကျပေမယ့် အစ်ကို့ကိုကျ အရမ်းချစ်တာကိုမြင်ရတာ တကယ်ထူးဆန်းတယ်..” 

နျန်ယွီယီ ရွှတ်နောက်နောက်ပြောလိုက်ပြီး ထျန်ထျန်၏မေးစေ့လေးကို ပွတ်ပေးလိုက်သည်

 “ အရင်တစ်ခါကဆိုရင် သူ့ကိုကုတ်တောင်ကုတ်မိတော့မလိုလေ… ကျွန်တော်အဆွဲမြန်လိုက်လို့…”

ထိုစကားကိုကြားချိန်၌ ဖန်ကျုံးချွမ်း လူယုတ်မာအပြုံးတချက် ပြုံးသွားပြီး ထျန်ထျန်၏အမြီးကို နူးညံ့စွာပွတ်သပ်ပေးလိုက်သည်။

နှစ်ယောက်စလုံးထံမှ အချစ်ခံရသောကြောင့် ထျန်ထျန် ကျေနပ်စွာအော်မြည်လိုက်ပြီး သူမ၏မျက်လုံးများ မှေးစင်းနေခဲ့သည်။

ထိုစဉ် နျန်ယွီယီ၏ဖုန်းမှ တုန်ခါသံတစ်ခု‌ထွက်လာကာ ဝမ်ကျစ်ရုန်ယောက်အတွက် အဆင့်မြင့်တင်ရန် အသိပေးစာပေးပို့လာသည်။

အကြံတစ်ခုပေါ်လာပြီး နျန်ယွီယီ ထျန်ထျန်ကိုချီလျက် ဖန်ကျုံးချွမ်းထံ မျှော်လင့်တကြီးလှမ်းကြည့်လိုက်သည်။

“ ဘာဖြစ်လို့လဲ…”

“ အစ်ကို…”

“ အင်း…”

နျန်ယွီယီမှ သူ၏ကောက်ကျစ်သောအကြံကို တီးတိုးပြောပြလာသည် 

“ အစ်ကို ဝမ်ကျစ်ရုန်ယောက် ဆော့ဖူးလား… ကျွန်တော် အစ်ကို့အကောင့်ကို အဆင့်မြှင့်ပေးလို့ရတယ်လေ…”

ဤသည်မှာ ဂိမ်းတစ်ခုသာဖြစ်သော်လည်း ဖန်ကျုံးချွမ်း၏အကောင့်ကို အဆင့်မြှင့်တင်ပေးရမည်မှာ အမှန်တကယ်ပင် ကြည်နူးစဖွယ်ရှိလှသည်။

နျန်ယွီယီ ဖန်ကျုံးချွမ်းနှင့်အတူ ဂိမ်းထဲတွင် ကြီးစိုးမည့်အကြောင်း တိတ်တခိုးစိတ်ကူးယဉ်နေမိပြီး တွေးကြည့်ရုံနှင့်ပင် စိတ်လှုပ်ရှားလာရသည်။

ဖန်ကျုံးချွမ်း မျက်ခုံးတဖက်ပင့်ကာ ကြည့်လာသော်လည်း သဘောတူလိုက်လေသည်။

ဂိမ်းကိုဒေါင်းလော့ဆွဲပြီးနောက် အလောကြီးနေသည့် နျန်ယွီယီမှ ကျိုးအာ့ဟယ်၏ အဆင့်မြင့်အကောင့်ကိုငှားကာ သုံးယောက်တွဲပြိုင်ပွဲထဲ ဝင်လိုက်သည်။

ပထမဆုံးဂိမ်းတွင် နျန်ယွီယီမှ စွင်းရှန့်ရှန်းကိုရွေးလိုက်ပြီး ဖန်ကျုံးချွမ်းမှာမူ နျန်ယွီယီ၏အကြံပေးချက်အရ ယောင်ကို ရွေးချယ်လိုက်သည်။

ခြောက်မိနစ်ကြာပြီးနောက် နျန်ယွီယီ အောက်လမ်းတွင် ရက်ရက်စက်စက်ဖိနှိပ်ခံလိုက်ရပြီး ပထမ၊ဒုတိယနှင့် တတိယတာဝါသုံးခုစလုံးမှာ သူတို့‌၏ကျဆုံးသွားသော ဇာတ်ကောင်နှစ်ခုနှင့်အတူ ဖျက်ဆီးခံလိုက်ရသည်။

ဒုတိယဂိမ်းအတွက်မူ နျန်ယွီယီ ပို၍ရှေးကျသော ကွမ်းယွီကိုရွေးလိုက်ပြီး ဖန်ကျုံးချွမ်း၏ကျန်းဖေးအနောက်တွင် ပုန်းနေခဲ့သည်။

ရှစ်မိနစ်အကြာတွင် သူတို့ဖက်မှ တောတိုးသူမှာ ကစားရာမှထွက်သွားပြီး စကားဝိုင်းထဲတွင် စတင်ဆဲဆိုတော့သည်။

သို့သော်လည်း နျန်ယွီယီမှ ဉာဏ်ရှိရှိဖြင့် သူနှင့်ဖန်ကျုံးချွမ်းအတွက် စာပို့သည့်နေရာကို ပိတ်ပေးထားခဲ့သည်။

ဂိမ်းဆော့ပြီးနောက် နျန်ယွီယီ အကောင့်ကိုကျိုးအာ့ဟယ်ထံ ပြန်ပေးလိုက်ပြီး စေတနာဖြင့် ဂိမ်းပိုက်ဆံ ၂၈၈လွှဲပေးလိုက်သည်။

လက်ဆောင်လက်ခံရရှိပြီးနောက် ကျိုးအာ့ဟယ် လုံးလုံးလျားလျားကြောင်သွားပြီး မေးခွန်းထုတ်နေသည့် အီမိုဂျီပြန်ပို့လိုက်သည်။

[ -_-? ]

နျန်ယွီယီ အလွန်အားနာမိသွားသည်။

[ အစ်ကိုသဘောကျတဲ့ မိုဇီအတွက် နဂါးသူရဲကောင်း Skinအသစ်လေ မှတ်မိလား ]

[ ဟိုလေ အစ်ကို့ အဆင့်ပွိုင့်နည်းနည်းကျသွားတာမလို့ရယ် ]

ပဟေဠိဖြစ်ဟန်မှာ ကျိုးအာ့ဟယ်၏မျက်နှာပေါ်တွင် ချက်ချင်းပေါ်လာသည်။

[ ဘယ်လောက်တောင် လျော့သွားတာလဲ ]

နျန်ယွီယီ တုန်လှုပ်သွားပြီး ချောင်းဆိုးလာသည်။ ခဏအကြာတွင် သူ့ထံရေခွက်တစ်ခွက် အရှေ့သို့ရောက်လာခဲ့သည်။

နျန်ယွီယီ ဖန်ကျုံးချွမ်းကို ကျေးဇူးတင်လိုက်သည်။

[ အများကြီးမဟုတ်ပါဘူး ]

[ မေဂျာအဆင့်တစ်ခုထဲပါ ]

နောက်ဆုံးစာကိုပို့ပြီးနောက် ကျိုးအာ့ဟယ်ဖက်မှ အချိန်အတန်ကြာတိတ်ဆိတ်နေသည်။

နျန်ယွီယီ လက်တွေ့ကိုလက်ခံလိုက်မည်ဟု တွေးနေသည့်အချိန်တွင်…

[ နျန်ယွီယီ မင်းသေချာပေါက်… &￥#&*@!&…… ]

ကျိုးအာ့ဟယ် ခြေကုန်လက်ပမ်းကျသွားရပြီး သူ၏ကျဆင်းသွားသည့် အဆင့်အပေါ် ညည်းတွားနေမိသည်။

သူ၏ထိပ်တန်းအဆင့်အကောင့်သို့ ပြန်ဝင်လိုက်ချိန်၌ စည်းကမ်းချိုးဖောက်ကြောင်း တိုင်စာတစ်ပုံကြီးပေါ်လာခဲ့သည်။

မျက်လုံးကိုမှိတ်ကာ ကျိုးအာ့ဟယ် ခံစားချက်များကို တည်ငြိမ်စေရန် ကြိုးစားလိုက်ရသည်။

ဘော့စ်ဖန်သည်သာ သူ့အကောင့်ကို သုံးခဲ့မည်ဖြစ်ကြောင်း သဘောပေါက်သွားပြီး လက်လျော့သည့်အနေဖြင့် သက်ပြင်းချလိုက်မိသည်။

သူ၏ကျဆင်းသွားသည့် ဂိမ်းအဆင့်အတွက် အသည်းကွဲနေခြင်းနှင့်အတူ ကျိုးအာ့ဟယ် သူ့အတွက် ရက်အနည်းငယ်ကြာ အဆင့်ပြန်တင်ပေးမည့်သူရှာရန် ဆုံးဖြတ်လိုက်သည်။

***

ဖန်ကျုံးချွမ်းနှင့်အတူ ညစာစားပြီးနောက် နျန်ယွီယီ ထျန်ထျန်ကို လည်ပတ်ကြိုးပတ်ကာ လမ်းလျှောက်ထွက်ရန်ပြင်လိုက်သည်။

ချင်အန်းဗီလာရပ်ကွက်အတွင်းရှိ အိမ်များမှာ တန်ဖိုးမြင့်မားသည့်တိုင် ထိပ်တန်းအဆင့် ငြိမ်းချမ်းသာယာမှုနှင့် ဝန်ဆောင်မှုများကို အာမခံပေးနိုင်သည်။

ညအချိန် တစ်ရပ်ကွက်လုံးရှိ လမ်းမီးတိုင်များမှ နေရာလပ်မရှိ ထွန်းလင်းနေပြီး အရိပ်ကျသည့်ထောင့်ဟူ၍ပင် မရှိချေ။

ဘေးချင်းကပ်လျက် လမ်းလျှောက်နေကြပြီး နျန်ယွီယီ ထျန်ထျန်ကိုဦးဆောင်ကာ ကြောင်လေးကိုဂရုစိုက်နေရသောကြောင့် ဖြည်းဖြည်းသာလျှောက်လိုက်သည်။

ယွီစစ်ဟန် စံအိမ်အတွင်းမှ ထွက်လာချိန်တွင် ချက်ချင်းဆိုသလို နျန်ယွီယီ၏ကိုယ်ဟန်ကို မှတ်မိလိုက်သည်။

စံအိမ်ထဲတွင်အိပ်ခဲ့သော အဘိုးကြီးနှင့်အတူ ယွီစစ်ဟန် ဖုန်းထုတ်ကာ ဓာတ်ပုံအနည်းငယ် ကပျာကယာရိုက်လိုက်သည်။

ပုံများကိုပြန်ကြည့်နေရင်း ယွီစစ်ဟန်၏စိတ်ထဲတွင် အကြံအစည်တစ်ခုပေါ်လာသည်။

အိမ်သို့ရောက်သည်နှင့် ဖန်ကျုံးချွမ်း၏ပုံရိပ်ကိုဝါးလိုက်ပြီး ယွီစစ်ဟန် ထိုပုံကို ထိပ်တန်းအဆင့် လွှမ်းမိုးနိုင်စွမ်းရှိသော အကောင့်အချို့ထံပို့ပေးလိုက်သည်။

ယွီစစ်ဟန်မမျှော်လင့်ထားသည်မှာ ပုံထဲရှိလူမှာ နျန်ယွီယီဖြစ်ကြောင်းသိသွားသည်နှင့် ထိုအကောင့်များမှာ စီးပွားရေးလုပ်ရန် ငြင်းဆိုလာမည်ကိုပင်။

သူတို့ပေးချင်သည့် သဘောတရားမှာမူ ရိုးရှင်းသည် : များများစားစားမရနိုင်ဘဲ သူတို့အနေဖြင့် ဖုန့်ဟွာကုမ္ပဏီ၏လမ်းကြောင်းကို သွားမရှုပ်ရဲပေ…

စိတ်ပျက်သွားသည့် ယွီစစ်ဟန်မှ ထိုသူများကို ဘလော့လိုက်ပြီး သူ၏အာရုံစိုက်မှုကို အကောင့်သေးများထံပြောင်းလိုက်သည်။

မထင်မရှား မားကတ်တင်းအကောင့်တစ်ခုမှာ ဈေးကွက်ကိုပြောင်းပြန်လှန်ချင်နေသည်ဖြစ်ရာ သတ္တိစုစည်း၍ ထိုပုံကိုထုတ်ချလိုက်သည်။

မားကတ်တင်းအကောင့်၏ပို့စ်ကို မြင်ပြီးနောက် ယွီစစ်ဟန် ချက်ချင်းဆိုသလို အပျော်လွန်သွားပြီး ချက်ချင်းလက်ငင်း ရေပန်းစားမှုစာရင်းတွင် ၎င်းသတင်းအတွက်တစ်နေရာဝယ်ပေးလိုက်သည်။

ယခုမှအိမ်သို့ပြန်ရောက်သည့် နျန်ယွီယီမှာမူ ကျိုးအာ့ဟယ်ထံမှ အရေးပေါ်ဖုန်းခေါ်ဆိုမှုကို လက်ခံရလိုက်သည်။

ဖန်ကျုံးချွမ်းကို နှုတ်ဆက်စကားဆိုပြီးနောက် ထျန်ထျန်ကို ကြောင်အခန်းထဲပြန်ပို့ကာ ဖုန်းကိုင်လိုက်ချိန်တွင် နျန်ယွီယီ အနည်းငယ်မပျော်မရွှင်ဖြစ်နေခဲ့သည်။

“ ရေပန်းစားမှုစာရင်းကိုကြည့်လိုက်…” ကျိုးအာ့ဟယ် ကော်ရစ်ဒါရှိ အရေးပေါ်ထွက်ပေါက်အပြင်ကို လှမ်းကြည့်ကာ ပြောလိုက်သည် 

“ မင်းချင်အန်းမှာ တစ်စုံတစ်ယောက်နဲ့ လမ်းလျှောက်ထွက်နေတာကို ပုံတင်လိုက်တဲ့သူရှိတယ်…”

အခြေအနေကို ဆုပ်ကိုင်မိရန် နျန်ယွီယီ အချိန်အနည်းငယ်ယူလိုက်ရသည် “ မဖြစ်နိုင်တာကြီး ချင်အန်းရဲ့လုံခြုံရေးက ထိပ်တန်းအဆင့်ပဲလေ…”

“ အတွင်းလူလုပ်တာဖြစ်မှာပေါ့… သည်ရက်ပိုင်းအတွင်း လူစိမ်းအဝင်အထွက်ရှိလားဆိုတာ မင်းစစ်ကြည့်ချင်လား…” 

ဤရက်ပိုင်းအတွင်း ကပ်ဘေးမျိုးစုံကို ရင်ဆိုင်ဖြေရှင်းလာသော ကျိုးအာ့ဟယ်မှာ ယခုအချိန်၌ တည်ငြိမ်နေနိုင်ပြီဖြစ်သည် 

“ အခုချိန်မှာ ပြဿနာကိုဖြေရှင်းဖို့က အဲ့သည့်ဟာကို ဖိချပစ်တာဖြစ်ဖြစ် တရားဝင်စာထုတ်လိုက်တာဖြစ်ဖြစ် တစ်ခုခုလုပ်လိုက်ဖို့ပဲ…”

“ ငါ လူကြီးမင်းရှဲ့ဆီဖုန်းဆက်လိုက်ပေမယ့် သူကအစည်းအဝေးထိုင်နေတယ်ထင်တယ် ဖုန်းမကိုင်ဘူး…” 

ကျိုးအာ့ဟယ် တည်တည်ငြိမ်ငြိမ်ဖြင့် ရှင်းပြလာသည် 

“ အခုချိန်တော့ ဝေ့ပေါ်မှာ အဲ့သည့်လိုပို့စ်တွေကို ရှာကြည့်တာ ရှောင်ထားလိုက်ဦး…”

“ အယ်…”

“ မင်းကိုအထင်ကြီး‌ကြတဲ့သူများတယ်လေ… လူတွေအများကြီးက မင်းရဲ့ရုပ်ရည် အဆက်အသွယ်နဲ့ သရုပ်ဆောင်စွမ်းကြောင့် မနာလိုဖြစ်နေကြတာ…မင်းအောက်ရောက်တဲ့အချိန် အများကြီးက ကန်ထုတ်လာမယ်ဆိုတာ ငါလောင်းတောင်လောင်းရဲတယ်…”

နျန်ယွီယီမှာ ဝေ့ပေါ်တွင် လျောက်ကြည့်နေပြီးပြီဖြစ်ကာ လျှို့ဝှက်ရိုက်ယူထားသော ဓာတ်ပုံများကို စစ်ကြည့်လိုက်စဉ် ဖန်ကျုံးချွမ်းအား ဝါးပေးထားသည်ကို မြင်လိုက်ရသည်။

“ နျန်ယွီယီ မင်းငါပြောတာ နားကောထောင်နေရဲ့လား…”

“ ထောင်ပါတယ် ထောင်ပါတယ်…” နျန်ယွီယီ ပုံကိုအကျယ်ချဲ့ကြည့်လိုက်သည်

 “ ဘာလို့ဖန်ကျုံးချွမ်းက အဝါးခံထားရတာလဲ…သူကတော့ သည်အခြေအနေမှာ နာမည်တပ်ခံရဖို့ မထိုက်တန်ဘူးလား…”

****

စာရေးသူ၏မှတ်စု - ဖန်ကျုံးချွမ်း : ငါက နာမည်နဲ့ဖော်ပြခံရလောက်အောင် မထိုက်တန်ဘူးလားဟင်…

🫶