MM Story Teller

Chapter 69

Viewers 3k

💫 Chapter 69

သူမက သူမအခန်းကို အမြန်ပြန်ပြေးသွားပြီး သိုလှောင်လက်ပတ်ကို မွှေနှောက်ရှာကာ ပစ္စည်းမျိုးစုံကို ဆွဲထုတ်ပြီး ရွှီယီ၏ အခန်းတံခါးကို သွားခေါက်လိုက်သည်။

" ဆရာ...ဆာ့ဆာ့ပါ..."

ခဏအကြာမှ တံခါးကပွင့်လာ၏။ ရွှီယီက ပုံမှန်အမူအရာ နှင့်သာ သူမကိုမေးလိုက်သည်။

" ဆာ့ဆာ့ ဘာဖြစ်လို့လဲ..."

ဆာ့ဆာ့က ပစ္စည်းမျိုးစုံကို ထိုးပေးကာ ပြောလာ၏။

" ဆရာ...ဒါတွေအားလုံးက ကျွန်မရဲ့ အဖိုးတန်ရတနာတွေပဲ...ဒါက ဝိညာဥ်စင်ကြယ်စေတဲ့ခရင်မ် ၊ ပြီးတော့ ဒါက စိတ်ကိုကြည်လင်စေတဲ့ အမွှေးနံ့သာ...ပြီးတော့ ဒါက..."

ထိုပစ္စည်းများအားလုံးက ဝိညာဥ်ကို သန့်စင်ပေးသည့်ဆေးများပင်။

ရွှီယီ၏ အမူအရာက အနည်းငယ် ထူးဆန်းသွား၏။

" မင်းသိနေတယ်လား..."

ဆာ့ဆာ့က ' သိသားပဲ' ဟူသည့် ပုံစံဖြင့် အဓိပ္ပါယ်ပါပါပြုံးနေ၏။

" ဆရာ...ကျွန်မရဲ့ စူးစမ်းနိုင်စွမ်းကလည်း အရမ်းကောင်းပါတယ်နော်..."

အမှန်တွင် ရွှီယီက သူ၏ အမတအရှိန်အဝါ၊ ပြုမူကျင့်ကြံပုံ၊ လောကီကိစ္စရပ်များအား စက်ဆုပ်ကာ စင်ကြယ်မှုကို စွဲလမ်းသူဖြစ်၏။ ထို့ကြောင့်လည်း သူက ဂြိုဟ်သားရဲများကို ကိုင်တွယ်ရာ၌ သူ့ဓားအစွန်အဖျားလေးကိုသာ သုံးသွားခြင်းဖြစ်သည်။ ဓားဖြင့် ပစ်မှတ်ထားပြီး ဓားမှထုတ်လွှတ်လိုက်သောချီစွမ်းအင်ကြောင့် ထိုဂြိုဟ်သားရဲကောင်များကို သူ့လက်ဖြင့်ပင် တိုက်ရိုက် သုတ်သင်စရာမလိုခဲ့ပေ။ သို့သော် မကြာမီမှာပင် ပိုးကောင်ဘုရင်မကြောင့် စေးကပ်သောလက်များကို ထိတွေ့ခဲ့ရပြီး ဦးချိုမှ စင်ထွက်လာသော အစိမ်းပုပ်ရောင်အရည်များက သူ့ကို အော့အန်မိမတတ်ဖြစ်စေ၏။

အမှန်တွင် သူ့ဝိညာဉ်ကို ဂါထာများဖြင့် ကာရံထားပြီး ထိုမသန့်စင်သောအရာများက သူ့ကို ထိပင်မထိနိုင်ချေ။သို့သော် ရွှီယီ၏ စိတ်ပိုင်းဆိုင်ရာအဆင့်အရ ရွံရှာမှုကို ခံစားနေရဆဲပင်။

ဆာ့ဆာ့ယူလာသော ပစ္စည်းများက သာမန်လူများအတွက် အသုံးဝင်သော်လည်း ရွှီယီအတွက်ဆိုလျှင် အသုံးမဝင်လှချေ။ ရွှီယီ၏ ကိုယ်ပိုင်ဂါထာများဖြင့် ယှဥ်လျှင် ၎င်းတို့က စိတ်ပိုင်းဆိုင်ရာအရ သက်သာသွားစေရုံသာ ရှိလိမ့်မည်။ သို့သော် ဆာ့ဆာ့က သူ့အကြောင်းကို သိနေသောကြောင့် ထိုစိတ်ပိုင်းဆိုင်ရာအရ သက်သာသွားစေသည့်ပစ္စည်းများကလည်း အရေးကြီးသည့်ကဏ္ဍ၌ ရှိနေ၏။

ရွှီယီ၏ ထိုထူးခြားသောစရိုက်ကို လူများ မသိကြပေ။ သူက အခြားသူများရှေ့၌ သူ့အကြောင်းကို ထုတ်မပြတတ်ပေ။ သူ၏ ပထမဆုံးတပည့် စုန့်နင်ဖုန်းပင်လျှင် လုံးဝသတိမထားခဲ့၍ ဆာ့ဆာ့သိသွားသည့်အချိန်၌ သူ အံ့အားသင့်ခဲ့ရသည်။

ဆာ့ဆာ့က အမှန်တွင် စူးစမ်းပြီး ခန့်မှန်းကြည့်လိုက်ရုံသာ ဖြစ်၏။ ရွှီယီက အညစ်အကြေးအမှုန်အမွှားများကိုဆိုလျှင် တိကျသော အကွာအဝေးမှ ရှောင်ရှားတတ်သည်။ ဂြိုဟ်သားရဲများနှင့် တိုက်ခိုက်ရချိန်တွင် သူက အကွာအဝေးတစ်ခုခြားပြီးသာ တိုက်ခိုက်တတ်သည်။ သူ့စိတ်ခံစားချက်များကို မျက်နှာတွင် မည်သည့်အခါကမှ ထုတ်မပြသော်လည်း ဆာ့ဆာ့က သေချာရှာတွေ့ခဲ့သည်။

သူက သူ မနှစ်မြို့သည့်အရာနှင့် ကြုံတွေ့ရလျှင် သူ့နှုတ်ခမ်းထောင့်စွန်းများက မသိမသာဆိုရုံမျှ ညွှတ်ကျသွားတတ်သည်။ ထိုအညစ်အပတ်များက သူ မနှစ်မြို့သော အရာများပင်။

သူတို့ဆရာက အမြဲတမ်း အဖြူရောင်ကို ဝတ်ဆင်နေသည်က အံ့သြစရာမရှိတော့ချေ။ သူ့အသန့်ကြိုက်မှုကို စိတ်ကျေနပ်စေသော အရာမှာ အဖြူရောင်မှလွဲ၍ အခြားအရာ နတ္ထိပင်။

၎င်းကို အစောပိုင်းလေးတင် သိလိုက်ရသော ဆာ့ဆာ့က သူမ ဆရာဆီကို တန်းပြေးသွားပြီး 'အသန့်ကြိုက်ရောဂါရှိနေတာလား'ဟု တိုက်ရိုက်ကြီး သွားမေးရန် မသင့်ပေ။ ထိုသို့ညစ်ပတ်နေသည်ကို သူ သည်းမခံနိုင်ကြောင်း တွေ့ရသောအခါမှသာ သူမက အရေးပေါ်ဆေးများကို သွားထုတ်ပေးလိုက်သည်။ သူမ မမေးဘဲ မနေနိုင်တော့ချေ။

" ဆရာ... ကျွန်မ အဲ့ဒီအချိန်တုန်းက အရမ်းညစ်ပတ်နေတာကိုတော့ ဆရာဘာဖြစ်လို့ မနှစ်မြို့တာမျိုး မဖြစ်တာလဲ..."

၎င်းက သူမအမြဲမေးချင်နေခဲ့သည့် မေးခွန်းပင်။

ဆရာ သူမကိုခေါ်လာစဥ် သူမက ရွာထဲတွင် ကလေးများထံမှ အမြဲအနိုင်ကျင့်ခံရသော ဆင်းရဲနွမ်းပါးသည့်ကလေးမလေးသာ ဖြစ်သည်။ သူမ မည်မျှ ကြိုးစားထားပါစေ သန့်ရှင်းနေလိမ့်မည်မဟုတ်သော်လည်း ဆရာက သူမကို ရွံရှာသည်ဟု သူမ တစ်ခါမှ မခံစားရဖူးပေ။ နောက်ပိုင်း ဆရာ အသန့်ကြိုက်ရောဂါရှိသည်ကို သူမသိသွားပြီးနောက် သူမအထင်မှားနေသလားဟု တွေးမိခဲ့သေးသည်။

" ဘာလို့လဲဆိုတော့ ငါမြင်နိုင်တယ်လေ..."

ရွှီယီက ဆာ့ဆာ့ကို နက်နဲစွာကြည့်လာ၏။

" မင်းရဲ့ စိတ်က တခြားသူတွေထက် သန့်ရှင်းပြီး ကြည်လင်တယ်ဆိုတာ ငါမြင်နိုင်လို့ပဲ... တချို့အရာတွေက အပေါ်ယံမှာ ညစ်ပတ်ပြီး တချို့အရာတွေက စိတ်ဝိညာဥ်မှာ ထင်ဟပ်နေတယ်..."

ထို့ကြောင့်ပင် ထိုက်ယီဂိုဏ်းက လူနည်းစုသာရှိပြီး သူတပည့်သုံးယောက်က အတော်လေးအမှီအခိုကင်းသော်လည်း ဆာ့ဆာ့ကို ဖယ်ကြဥ်မထားဘဲ ညီမလေးတစ်ယောက်သဖွယ်သာ စောင့်ရှောက်ကြသည်။ ၎င်းက ရွှီယီ အထူးတလည် ညွှန်ကြားပေးထားရခြင်းမျိုးမဟုတ်ဘဲ သူတို့အသိစိတ်နှင့်သူတို့ လုပ်ကြခြင်းသာ။

" ဒါနဲ့ မင်းသိထားတာ ရှိသေးလား..."

ရွှီယီ ဆာ့ဆာ့ကို လျှော့မတွက်ရဲတော့ပေ။

' တစ်ခါတစ်ရံ ဒီကလေးက နုံအတယ်ဆိုပေမဲ့ တစ်ခါတစ်လေကျပြန်တော့လည်း တော်တော်လေး ပါးနပ်သွားပြန်ရော...'

ဆာ့ဆာ့က မေးလိုက်သည်။

" ဆရာ ဘာကိုမေးတာလဲ... ဆရာဒဏ်ရာရပြီး အကြီးဆုံးစီနီယာအစ်ကိုကပါ ကျွန်မတို့မသိအောင် ဖုံးပေးထားတဲ့အကြောင်း မေးတာလား..."

ရွှီယီ : "...."

' တော်သင့်ပြီ...သူက အားလုံးသိနေတာပဲ...'

" အိုး...ဆရာ စိတ်မပူပါနဲ့...ကျွန်မကို အကြီးဆုံးစီနီယာအစ်ကို ပြောပြတာမဟုတ်ပါဘူး...ဆရာ မမှတ်မိဘူးလား...အဲ့ဒီနေ့တုန်းက ဆရာ့ကို ဆာ့ဆာ့ပဲ အရင်ရှာတွေ့ခဲ့တာလေ...ဆရာထိခိုက်ထားတယ်ဆိုတာကို မသိဘဲနေပါ့မလား...ပြီးတော့ ဆရာက ကျွန်မတို့ကို စိတ်မပူစေချင်ဘူးဆိုတာလည်း သိပါတယ်...ဆရာက ကိုင်တွယ်နိုင်လိမ့်မယ်လို့ ယုံကြည်ပြီးသားပါ...အကြီးဆုံးစီနီယာအစ်ကိုရဲ့ သရုပ်ဆောင်စွမ်းရည်ကတော့ ဆိုးလွန်းပါတယ်...သူ တတိယစီနီယာအစ်ကိုဆီကနေ သင်ယူသင့်တယ်..."

ရှင်းပြချင်သော်လည်း ရှင်းပြ၍ မရနိုင်သည့် ခံစားချက်ကသိသာလွန်းသည်။ " လိပ်ပြာမလုံသောစိတ်" ဟူသည့်စကားလုံးအား အကြီးစီနီယာအစ်ကိုက သူ့မျက်နှာထက်တွင် ရေးထားမတတ်ပင်။

ရွှီယီက ဆာ့ဆာ့ကို တိတ်တဆိတ် အကဲခတ်လိုက်ပြန်၏။

' မင်းက သူ့နောက်ကွယ်မှာ သူ့ကိုဆန့်ကျင်ဖို့လုပ်နေတယ်ဆိုတာ စုန့်နင်ဖုန်းရောသိရဲ့လား...'

ရွှီယီက ဆာ့ဆာ့အပေါ် သူ့ယခင် ဝေဖန်ပိုင်းခြားမှုများအား ပြန်ရုတ်သိမ်းလိုက်သည်။

' ဒီမိန်းကလေးက ပြဿနာရှာတဲ့နေရာမှာ ပါရမီပါတာပဲ...'

ဆာ့ဆာ့က ပုံမှန်ပြုံးနေကျအတိုင်းသာ ပြုံးလိုက်သည်။

" ဒါပေမဲ့ ဆရာ...နောက်တစ်ခါ တစ်ခုခုဖြစ်တယ်ဆိုရင် ကျွန်မကိုတော့ ပြောပြပါ..."

" ကောင်းပြီ...ကောင်းပြီ..."

ရွှီယီလည်း အနည်းငယ်လိပ်ပြာမလုံသလို ခံစားရပြီး သဘောတူပေးလိုက်၏။ သူ မတုံ့ပြန်ဘဲ မနေရဲပေ။ တစ်ခုခုဖုံးထားပြီး ပေါ်သွားသည်ထက် သူကိုယ်တိုင်ထုတ်ပြောလိုက်သည်က ပိုကောင်းလိမ့်မည်။

ဆာ့ဆာ့ ပြန်ထွက်သွားတော့မည်အချိန်၌ ရွှီယီက သူမကို ပြန်ခေါ်ကာ ချောင်းဟန့်လိုက်သည်။

" မင်းရဲ့ နောက်လိုက်တပည့်တွေကို ငါ့အခြေအနေအကြောင်း မပြောပြလိုက်နဲ့‌ဦး..."

ဆာ့ဆာ့က ပါးစပ်ကို ဇစ်ဖြင့်ပိတ်သလိုမျိုး လုပ်ပြလာ၏။

" စိတ်မပူပါနဲ့ ဆရာ...ကျွန်မ ကိုင်တွယ်လိုက်ပါ့မယ်...ကျွန်မကိုပဲ ယုံကြည်ထားလိုက်ပါ..."

ပတ်ဝန်းကျင်က ထပ်မံတိတ်ဆိတ်သွားပြန်၏ ။ ရွှီယီသက်ပြင်းချမိသည်။ နောက်ဆုံးတွင် ဤဝန်ထုပ်ဝန်ပိုးကြီးကို သူလွှတ်ချနိုင်သွားချေပြီ ။

သို့သော်လည်း သူ့ဘေးနားရှိပစ္စည်းများကို တွေ့သောအခါ သူ မပြုံးဘဲမနေနိုင်တော့ချေ။

...

ဆာ့ဆာ့ ဆရာ့အခန်းထဲမှထွက်လာသည်ကို ချန်ကျီကကြည့်နေပြီး သူမက အလွန်ပျော်နေပုံပေါက်သည်။ ချန်ကျီလည်း ပြုံးကာ မေးလိုက်၏။

" ဆာ့ဆာ့ ဘာတွေဒီလောက်ပျော်နေတာလဲ...ငါ့ကိုလည်း မျှဝေစမ်းပါဦး..."

ဆာ့ဆာ့က ပြုံးဖြဲဖြဲနှင့် ပြောလိုက်သည်။

" ဆရာကပြောတယ်...ကျွန်မမှာ ကြည်လင်သန့်ရှင်းတဲ့ စိတ်ဝိညာဥ်ရှိတယ်တဲ့..."

ချန်ကျီ တစ်ခဏခန့် မှင်သက်သွား၏။ ဆရာ့၏ ပုံစံအရဆိုလျှင် ထိုသို့ပြောရန်က အလွန်ခက်ခဲပေလိမ့်မည်။ သို့သော် သူတို့ဆရာက ဆာ့ဆာ့ကို မည်မျှမျက်နှာသာပေးသည်ကို ပြန်တွေးကြည့်လျှင် အံ့သြစရာမရှိတော့ချေ။ ချန်ကျီကပြုံးကာ ပြောလိုက်သည်။

" ဆရာက အဲ့ဒီလိုပြောလိုက်တယ်ဆိုမှတော့ တကယ်

မို့လို့ပဲပေါ့..."

ရွှီယီက အခန်းထဲမှ အားလုံးကြားနေရပြီး သူ့ဘာသာတွေးလိုက်မိသည် ။

' ငါပြောလိုက်တာ အဲ့လိုမဟုတ်ပါဘူးနော်...'

ဆာ့ဆာ့က မည်သည့်လျှို့ဝှက်ချက်ကိုမှ ထုတ်မပြောလိုက်သော်လည်း သူ့ဂုဏ်သတင်းက နောက်တစ်ခါ ထိပါးခံလိုက်ရပြန်၏။

ဆာ့ဆာ့နှင့် စကားခဏပြောနေပြီးနောက် စုန့်နင်ဖုန်းက ယခုထိ ချန်သာ့ယိုနှင့်အတူရှိနေဆဲပဲဆိုသည်ကို ချန်ကျီသတိရသွား၏။

" အရင်ဆုံး အကြီးဆုံးစီနီယာအစ်ကိုကို ပြန်ခေါ်လိုက်ဦးမယ်..."

သူ့ဆက်သွယ်ရေးစက်ကို ဖွင့်လိုက်သည်နှင့်တစ်ပြိုင်နက် ထိပ်စီးသတင်းများက ဆက်တိုက်တက်လာ၏။ ချန်ကျီက ထိုသတင်းများ အားလုံးကို ပိတ်ရန်လုပ်လိုက်သော်လည်း အသေးစိတ်ဖတ်လိုက်မိသောကြောင့် လက်ကရပ်သွားသည်။

" ဆာ့ဆာ့...နင့်ရဲ့ တတိယစီနီယာအစ်ကိုကတော့ နာမည်ကြီးနေပြန်ပြီ..."

ဆာ့ဆာ့ အမြန်မေးလိုက်သည်။

" ဘာလို့လဲ...သူက အခု Dဂြိုဟ်မှာ မဟုတ်ဘူးလား..."

.....

အမှန်တွင် ရှဲ့ရုန်က သူ့ကိုယ်ပိုင်အရည်အချင်းဖြင့် ထိပ်စီးသတင်းများ၌ ရပ်တည်နေခြင်းဖြစ်သည်။

အရေးအခင်းနယ်မြေကိုရောက်ပြီးနောက်ပိုင်း သူ့တိုက်ရိုက်ထုတ်လွှင့်မှုမှန်သမျှကို ရပ်နားထားရသည်။ ရှဲ့ရုန်က ထူးခြားသောတိုက်ရိုက်ထုတ်လွှင့်တင်ဆက်သူဖြစ်သော၍ သူ့ရုပ်ရည်ကြောင့် နာမည်ကြီးလျှင်ပင် သူ့ကို အမြဲစောင့်ကြည့်နေကြသည့် သစ္စာရှိဖန်များရှိကြသည်။

[တင်ဆက်သူ အဆင်မှပြေရဲ့လား...သူပြန်ပြီး တိုက်ရိုက်ထုတ်လွှင့်မှု လုပ်ဦးမှာလား...]

[ သူ့ပါးစပ်က အရမ်းအဆိပ်ပြင်းလွန်းလို့ သူ့ဖန်တွေက ပြန်ပေးဆွဲသွားတာရော မဖြစ်နိုင်ဘူးလား...]

[ သူက မိန်းကလေးတွေနဲ့ အီစီကလီလုပ်လွန်းလို့ နောက်ဆုံးတော့ မီးမြှိုက်ခံနေရပြီလား...]

[ အပိုင်း Xက မိန်းမလှလေးရေ ထွက်လာပြီး တစ်ခုခုလာပြောပါဦးလား...]

သေချာပေါက် ထူးဆန်းသောကောမန့်များက စိတ်ပူနေတာကို ဖော်ပြနေကြခြင်းပင်။

ရှဲ့ရုန်က ပိုနာမည်ကြီးရန်အတွက် အိုက်ဇယ်၏ နာမည်ကို အသုံးချရန်လိုသော်လည်း အိုက်ဇယ်က သူ့ကို စောင့်ကြည်နေသည်ကို သူသိသည်။ သူက ဆာ့ဆာ့နှင့် အခြားသူများကို မဆက်သွယ်ခဲ့သော်လည်း တိုက်ရိုက်ထုတ်လွှင့်မှု လုပ်နိုင်ဆဲပင်။

သို့သော်လည်း သူတိုက်ရိုက်ထုတ်လွှင့်မှုမလုပ်မီ အိုက်ဇယ်က သူ့ကို တားဆီးလာ၏။

" မင်း အရေးအခင်းနယ်မြေထဲမှာ ရောက်နေတယ်ဆိုတာ မင်းရဲ့ဖန်တွေကို သိစေချင်လို့လား... ဖက်ဒရေးရှင်းမှာ ငါ့ရဲ့လက်ရှိဂုဏ်သတင်းကိုပဲ စဥ်းစားကြည့်လိုက်ဦး...မင်းအဆဲမခံချင်ဘူးဆိုရင် တိုက်ရိုက်ထုတ်လွှင့်တာ မလုပ်ဖို့ ငါအကြံပေးလိုက်မယ်..."

တစ်ချိန်က အနာဂတ်၏ကြယ်ပွင့်ဖြစ်ခဲ့သော အိုက်ဇယ်မှာ နာမည်ပျက်ဖြင့် ကျဆင်းသွားချေပြီ။ တိုက်ရိုက်ထုတ်လွှင့်ရုံမျှကို မဆိုထားနှင့် ၊ သူ့သစ္စာဖောက်ဟူသော သရုပ်ကပင် anti fanများကို ပိုပြီးဒေါသထွက်စေလိမ့်မည်။

ရှဲ့ရုန်လည်း ၎င်းကို တွေးကြည့်ပြီး နောက်ဆုံးတွင် ထိုအန္တရာယ်များသောလုပ်ရပ်ကို ပယ်ချရန် ဆုံးဖြတ်ခဲ့သည်။

သို့သော် ဤတစ်ကြိမ်က ကွာခြား၏။ D252ဂြိုဟ်မှ ပြန်လာပြီးနောက် အိုက်ဇယ်နှင့် သူ့အုပ်စုက စိုးရိမ်နေကြသည် ။

' လူသားတွေထဲက တစ်ယောက်ယောက်ကတော့ ဂြိုဟ်သားရဲတွေနဲ့ ပူးပေါင်းဖို့ ရွေးချယ်ထားတာပဲ...ပြီးတော့ ကြောက်ဖို့ကောင်းတဲ့ ပိုးကောင်ဘုရင်မက အကောင်းဆုံးသက်သေပဲလေ...'

' အဲ့ဒီလူရော ဘာဖြစ်သွားပြီလဲ... သူ နိုင်ရော နိုင်သွားရဲ့လား...တကယ်လို့ ပိုးကောင်ဘုရင်မသာထွက်လာရင် သက်ရောက်မှုအခံရဆုံးက Dဂြိုဟ်ပဲဖြစ်မှာ...'

' ဒီထက် အရေးကြီးတာက ပိုးကောင်ဘုရင်မအပြင် အဲ့ဒီလို သန္ဓေပြောင်းသွားတဲ့ တခြားဂြိုဟ်သားရဲတွေရော ရှိနိုင်သေးလားဆိုတာပဲ...'

' အဲ့ဒီလိုသာဆိုရင် လူသားတွေက ဂြိုဟ်သားရဲလှိုင်းကြီးကို ဘယ်လိုလုပ် ခုခံနိုင်မှာလဲ...အဲ့ဒါက မကြာခင် လာတော့မှာပဲ...'

ဤအချိန်တွင် ရှဲ့ရုန်က ရုတ်တရက် အကြံပေးလာ၏။

" သူတို့ မဟာမိတ်ဖွဲ့ပူးပေါင်းတာကို ကျွန်တော်တို့ဖော်ထုတ်လိုက်မယ်ဆိုရင်ရော...'

" ဘယ်လိုဖော်ထုတ်မှာလဲ...သူတို့ရဲ့အမြင်မှာ ငါတို့က သူပုန်တွေပဲလေ..."

ဥပမာအားဖြင့် ချန်မိသားစုက ဖက်ဒရေးရှင်းတွင် ရာထူးအာဏာရှိသည်။ သူပုန်များ စွပ်စွဲပြောဆိုသည်က ဖက်ဒရေးရှင်းကို ပြိုကွဲအောင် တမင်လုပ်နေသည်ဟုထင်သွားပြီး အားလုံးက ချန်မိသားစုကို အားကိုးရသည်ဟုသာ ပိုထင်သွားကြလိမ့်မည်။

ရှဲ့ရုန်က အသာလေးပြုံးလိုက်၏။

" ကျွန်တော် အားလုံးပြင်ဆင်ထားပြီးသားပါ... D252မှာ ဖြစ်ခဲ့တာတွေကို ကျွန်တော် မှတ်တမ်းတင်ထားတယ်... အဲ့ဒါကို တင်လိုက်လို့ရတယ်လေ...ဘာကအမှားလဲ ဘာကအမှန်လဲဆိုတာ အားလုံးက သူတို့ဘာသာ ဝေဖန်ကြပါလိမ့်မယ်..."

အိုက်ဇယ်က သူ့ကို တိုက်ရိုက်ထုတ်လွှင့်ရန် ခွင့်မပြုထားသော်လည်း သူက နောက်ပိုင်းတွင် ပြန်တင်၍ရအောင် သက်သေများကို ရိုက်ကူးထား၏။ ဤအခွင့်အရေးက မကြာမီမှာပင် သူ့ဆီရောက်လာလိမ့်မည်ဟု မထင်ထားခဲ့ပေ။

အိုက်ဇယ်က ပြောလိုက်သည်။

" ကောင်းပြီ...ငါဒါကို မင်းနဲ့လွှဲထားလိုက်မယ်..."

ရှဲ့ရုန်က D252၌ ရိုက်ကူးမှတ်တမ်းတင်ထားရုံသာမက Dဂြိုဟ်ပေါ်ရှိ အခြေအနေများကိုလည်း မှတ်တမ်းတင်ထားခဲ့သည်။ သို့သော် ဤအကြောင်းကို အိုက်ဇယ်နှင့် သူ့လူများအား ထုတ်ပြောရန် မလိုအပ်ပေ။ အရေးကြီးဆုံးမှာ အဆုံးသတ်၌ သူလိုချင်သည့်ပန်းတိုင်ကို ရောက်ရှိရန်ပင်။

ဂြိုဟ်သားရဲများ၏ ဆင့်ကဲပြောင်းလဲသည့် အကြောင်းကို ထုတ်ဖော်ရန်က သူ့မူလပန်းတိုင်မဟုတ်ပေ။ အိုက်ဇယ် နှင့်သူ့လူများက မသိသော်လည်း သူက သိသည်။ သူနှင့် ဆာ့ဆာ့အပါအဝင် လူအများက ဆရာ့နောက်ကိုသာလိုက်ကြပြီး သူတို့ပြန်ရောက်လျှင် သေချာပေါက် ပူးပေါင်းမှုကိုဖော်ထုတ်ကြလိမ့်မည်။ ရှဲ့ရုန်၏ မူလရည်ရွယ်ချက်က အရေးအခင်းနယ်မြေ၌ သူ၏အံ့အားသင့်စရာကောင်းသောဘဝကို ကြွားလုံးထုတ်ရန်နှင့် သူ့ဖန်များ စိတ်ပူနေသည်အား ပြေပျောက်အောင် သူ့ချောမောသောရုပ်ရည်ကို ထုတ်ပြရန်သာ ဖြစ်သည်။

' ငါ့ပုံကို အရင်ဆုံးကြည့်ကောင်းနေအောင် ပြင်ရဦးမယ်...'

' ဝင်လာတဲ့ပုံစံကိုက အလန်းဆုံးဖြစ်နေမှရမယ်...အဓိကဇာတ်ကောင်ပုံစံမျိုးလည်း ဖြစ်အောင်လုပ်ရမယ်...'

' ငိုယိုပြီး ဆရာ့ကို တောင်းပန်နေတဲ့အခန်းတွေကိုတော့ ဖြတ်ထုတ်လိုက်မယ်...'

ထို့နောက် အိုက်ဇယ်က အခန်းထဲဝင်လာ၏။

" မင်းဗီဒီယိုကို တင်ပြီးပြီလား..."

သူ့အဓိကဇာတ်လိုက်ပုံစံကို အသားပေးရန်အတွက် ရှဲ့ရုန်က အိုက်ဇယ်ကိုပါ ဇာတ်ပို့ပုံစံမျိုးပေါက်အောင် ပြုပြင်ပေးလိုက်သည်။ အိုက်ဇယ်အား ထိုမြင်ကွင်းကို မမြင်စေချင်သောကြောင့် ချက်ချင်း စက္ခုကွန်ရက်ကို ပိတ်ပစ်ကာ စောဒကတက်လိုက်သည်။

" ဒါက ကျွန်တော့်အခန်းလေ...ခင်ဗျား ကျွန်တော့်ရဲ့ ကိုယ်ရေးကိုယ်တာကို လေးစားပေးရမှာပေါ့...ကျွန်တော့် ခွင့်ပြုချက်မရှိဘဲ ခင်ဗျား ဝင်လာလို့မရဘူး..."

ရှဲ့ရုန်မှာ သူဖြတ်ထုတ်ရန်လုပ်နေသည့်အပိုင်းက မထင်မှတ်ဘဲ ပြန်ရောက်သွားသည်ကို မသိဘဲ မတော်တဆ တင်လိုက်မိသည်။

'သူရဲကောင်းတွေက အမြဲတမ်း နောက်ဆုံးမှပေါ်လာတယ်' ဟူသောခေါင်းစဥ်နှင့် ဗီဒီယိုက ကြယ်တာရာတစ်ခွင်လုံး ပေါက်သွား၏။

အစပိုင်းတွင် ရှဲ့ရုန်က သူ့ပုံရိပ်မှာ အလွန်အထင်ကြီးစရာကောင်းပြီး သူ့ဉာဏ်ပညာနှင့် ရဲရင့်မှုတို့က အိုက်ဇယ်နှင့်အခြားသူများကိုကျော်ကာ ပိုတောက်ပနေလိမ့်မည်ဟု ထင်ထားခဲ့သည်။

[ သူက တော်တော်လေးချောပါတယ်...ဒါနဲ့ တင်ဆက်သူက ဘာလို့Dဂြိုဟ်ကို ပြေးရတာလဲ...]

[ တင်ဆက်သူကလည်း ဖက်ဒရေးရှင်းကို စွန့်ခွာသွားတာပဲလား...အဲ့လိုဆိုရင်တော့ ငါသူ့ကို unfollowလုပ်တော့မယ်...]

[ အားလုံးအဆုံးထိပြီးအောင် ကြည့်ကြစမ်းပါ...အဲ့ဒါက အရမ်းတုန်လှုပ်စရာကောင်းတာပဲ...]

[ တင်ဆက်သူက ဖက်ဒရေးရှင်းကို စွန့်ခွာသွားတာ မဟုတ်ဘူးထင်တယ်... အဲ့ဒီလူတွေကို သူ တစ်ပတ်ရိုက်နေတယ်ဆိုတာ သိသာတယ်...]

ထို့နောက် ဗီဒီယိုထဲ၌ ရွှီယီ ပေါ်လာသည့်အခါကျမှသာ အားလုံးက ပြောင်းလဲသွား၏ ။

[ ငါက ဒီတင်ဆက်သူကို အဓိကဇာတ်ကောင်ဖြစ်မယ်လို့ထင်ထားတာ...ဒါပေမဲ့ ဒီလောက်အထိ ပုံရိပ်ကိုတည်ဆောက်ထားတာက တခြားတစ်ယောက်ကို ပိုထင်ပေါ်စေဖို့ဖြစ်နေတာလား...]

[ ဟားဟား...ဒီဗီဒီယိုကို တင်ဆက်သူရဲ့ ဖုံးကွယ်ထားတဲ့ တစ်ဖက်ခြမ်းလို့ ခေါင်းစဥ်တပ်သင့်တယ်...]

[ တင်ဆက်သူက မတော်တဆမှားနှိပ်ပြီးတင်လိုက်မိတာများလား...ဒါမှမဟုတ် သူ့အကောင့်ပဲ ဟက်ခံလိုက်ရတာများလား...]

ထိတ်လန့်ဖွယ်ရာကောင်းသည့် ပိုး‌ကောင်များ မြေကြီးထဲမှ ထွက်လာသည့်အပိုင်းရောက်သောအခါ ကောမန့်များက အထွတ်အထိပ်ရောက်နေပြီး အားလုံးက တစ်ညီတစ်ညွတ်တည်းဖြစ်သွား၏။

[ ဘာကြီးတုန်းဟ...]

💫💫💫

Prev Next