အပိုင်း ၁၅၇ ( Mine Owner 6 )

ရှကျီရှိူ့နှင့် နှောင်ကြိုးသွယ်ပြီးသည်ကို ရှာဖွေတွေ့ရှိပြီးနောက် ယန်ကျင်းဇီသည် အလွန်ပျော်ရွှင်သွားသည်။ သူ့စိတ်စွမ်းအင်က ပန်းအကကဲ့သို့ လျင်လျင်မြန်မြန် ကခုန်သွား၏။ အမှန်ပင်၊ သူသည် သူ၏ ပျော်ရွှင်မှုများနှင့် ချစ်ခြင်းတို့အားလုံးကိုလည်း ရှကျီရှိူ့ထံသို့ ပေးပို့ခဲ့သည်။ 

သူ၏ စိတ်စွမ်းအင်အမျှင်တိုင်းဟာ ရှကျီရှိူ့ထံသို့ “မင်းကို သဘောကျတယ်” နှင့် “မင်းကို ချစ်တယ်” ဟူသော ခံစားချက်များကို ဖော်ပြလျက်ရှိသည်။

ရှကျီရှိူ့၏မျက်နှာသည် နီမြန်းနေပြီဖြစ်သည်။

သူ အမြဲတွေးခဲ့သည်မှာ သူသည် နှောင်ကြိုးဖွဲ့ချင်လျှင် အလွန်သတိထားကာ ပထမဦးစွာဖြင့် အချင်းချင်း ဆယ်နှစ်ကြာအောင် သိကျွမ်းရမည်ဟုပင်။ တခဏတာ စိတ်အားထက်သန်ချိန်အတွင်း၌ ရိုးရှင်းလွယ်ကူစွာ နှောင်ကြိုးဖွဲ့မိလိမ့်မည်ဟု သူ တစ်ခါမှ မတွေးခဲ့ဖူးပေ...

သူသည် ဘာဖြစ်နေမှန်းပင် မသိချေ။ နှောင်ကြိုးဖွဲ့ဖို့ အရမ်းလွယ်လို့လား? သူ ထင်ခဲ့တာက လူတွေက အထူးအကြံပေးတာကို အရင်လက်ခံပြီးမှ အကူဆရာများ အဖွဲ့အစည်းမှာ နှောင်ကြိုးဖွဲ့ရတာလားလို့?

သံသယများ ပြည့်နှက်နေသော်လည်း ရှကျီရှိူ့သည် အလွန်ပျော်ရွှင်နေဆဲ ဖြစ်သည်။

သူသည် ပြင်းထန်သော ထိုချစ်ခြင်းကြောင့်ပင် နစ်မျောသွားခဲ့ရသည်။

တစ်ချိန်တည်း၌ ထာဝရနှောင်ကြိုးကြောင့် သူ့ခံစားချက်များကို မဖုံးကွယ်နိုင်ချေ။ စိတ်စွမ်းအင်အမျှင်များမှာ ယန်ကျင်းဇီ၏စိတ်စွမ်းအင်နှင့် လွန်စွာရောထွေးနေပြီး / သေသည့်တိုင်အောင် လက်မလွှတ်ပေး / ဟူသော အခြေအနေဖြင့် ရှိနေကာ သူသည်လည်း ယန်ကျင်းဇီထံသို့ ထပ်တူကျသော ခံစားချက်များကို ပေးပို့‌လျက်ရှိသည်။

သူတို့နှစ်ဦးသည် အချင်းချင်း ထိုသို့ကြည့်နေကြပြီး သူတို့၏မျက်နှာများ နီမြန်းသွားကြသည်။

Allen : “ ... ”

အိမ်တော်ထိန်း Allen သည် ဆွံ့အနေပြီဖြစ်သည်။ မဟုတ်သေး၊ ဆွံ့အသည်ဟု သူ့ကို ဖော်ပြရန် မလုံလောက်ချေ။ သူသည် ယခုအခါ လုံးဝ ကြက်သေသေနေသည်။

သူ့အရှင်က ကွာရှင်းဖို့ လာဆွေးနွေးတာ မဟုတ်ဘူးလား? ဘာလို့ သူက သူတို့ တွေ့တွေ့ချင်းမှာတင် ‌နှောင်ကြိုးဖွဲ့လိုက်တာလဲ?

နှောင်ကြိုးဖွဲ့ဖို့ အဲ့လောက်လွယ်နေပြီလား?

စစ်သည်တော်များနှင့် အကူဆရာများသည် အောင်မြင်စွာ နှောင်ကြိုးဖွဲ့နိုင်ရန်အတွက် တစ်ဦးကိုတစ်ဦး အပြည့်အဝ ယုံကြည်ပြီး သူတို့၏စိတ်စွမ်းအင်များကို လက်လွှတ်လိုက်ရမည်ဖြစ်သည်။

ပြတ်ပြတ်သားသား ပြောရလျှင် ၎င်း၏ဆိုလိုရင်းမှာ ဆက်ဆံရေးဟာ နှောင်ကြိုးသွယ်ရန်အတွက် လုံလောက်စွာ နက်ရှိုင်းရမည်ဟု ဖြစ်သည်။ ပုံမှန်အားဖြင့် မတော်တဆမှု မဖြစ်စေရန် အခြားအကူဆရာများကို ဘေးတွင် အနည်းငယ် စောင့်ကြည့်ခိုင်းရမည်ဖြစ်၏။

နှောင်ကြိုးဖွဲ့ပြီးသည်နှင့်တပြိုင်နက် စစ်သည်တော်နှင့် အကူဆရာတို့ကြားရှိ ခံစားချက်အားလုံးကို မျှဝေရမည်ဖြစ်ပြီး ထိုသို့သော မျှဝေထားသည့် စိတ်ခံစားချက်များက သူတို့အချင်းချင်း ကြီးကြီးမားမား သက်ရောက်စေနေလျက် သူတို့ကို အလွန်နီးကပ်စေကာ အထူးသဖြင့် သူတို့ အတူရှိနေချိန်တွင် ဖြစ်၏။

ဥပမာအားဖြင့် ခံစားချက်ကင်းမဲ့သော စစ်သည်တော်နှင့် စိတ်ခံစားချက်ဆိုင်ရာ ကြွယ်ဝသော အကူဆရာတို့က နှောင်ကြိုးဖွဲ့ထားပြီး ခွဲခွာချိန်တွင် စစ်သည်တော်က ခံစားချက်ကင်းမဲ့နေသေးသော်ငြား အတူရှိနေချိန်တွင်မူ စစ်သည်တော်၏ စိတ်ခံစားချက်များမှာ မလွဲမသွေ သက်ရောက်ခံရကာ သူ့အကူဆရာကဲ့သို့ပင် စိတ်ကူးယဉ်ဆန်တတ်လာသည်။ 

ထို့ကြောင့် နှောင်ကြိုးသွယ်ပြီးနောက်တွင် စစ်သည်တော်များနှင့် အကူဆရာများသည် ယေဘူယျအားဖြင့် ပိုပိုပြီး ရင်းနှီးလာကာ တစ်ဦးတည်းသော လက်တွဲဖော် ဖြစ်လာလိမ့်မည်ဖြစ်ရာ တရားဝင်အရ နှောင်ကြိုးဟာ လက်ထပ်ခြင်းက မြင့်မားသည်။

လက်ထပ်ပြီးသား စစ်သည်တော် သို့မဟုတ် အကူဆရာက အခြားသူတစ်ဦးနှင့် နှောင်ကြိုးဖွဲ့လျှင် သူတို့၏ မူလက လက်ထပ်မှုသည် အလို‌အလျောက် ပျက်ပြယ်သွားကာ သူတို့ နှောင်ကြိုးသွယ်ထားသော လူနှင့် အလိုအလျောက် လက်ထပ်သွားမည်ပင်။

သူတို့က စိတ်စွမ်းအင်ဆိုင်ရာ မရုတ်သိမ်းသရွေ့ သူတို့တွင် ကွာရှင်းဖို့ရန် နည်းမရှိချေ။

ထာဝရနှောင်ကြိုးကို ဖယ်ရှားဖို့လား? စိတ်မှန်တဲ့သူဆိုရင် အဲ့လိုမလုပ်ဘူး၊ ဘာကြောင့်လဲ‌ဆိုတော့ အဲ့တာက သူတို့နှစ်ယောက်စလုံးရဲ့ စိတ်စွမ်းအင်တွေကို အများကြီးထိခိုက်စေလို့ပဲ၊ အနည်းဆုံး အဆင့်တစ်ဆင့်တော့ ကျသွားမှာ!

ဤအကြောင်းအရင်းကြောင့် အမှန်တကယ်ပင် စစ်သည်တော်များနှင့် အကူဆရာများ အများအပြားတို့သည် အကြိမ်ပေါင်းများစွာ လက်ထပ်ပြီး ကွာရှင်းခဲ့ကြသော်လည်း တစ်စုံတစ်ဦးနှင့် တစ်သက်တာ ထာဝရနှောင်ကြိုးကို ဖွဲ့လိမ့်မည်မဟုတ်ချေ။

ဒါပေမယ့် အခု ယန်ကျင်းဇီနဲ့ ရှကျီရှိူ့က အချင်းချင်း နှောင်ကြိုးသွယ်လိုက်ပြီ!

ယန်ကျင်းဇီနှင့် ရှကျီရှိူ့တို့သည် စိတ်စွမ်းအင်ဖြင့် အချင်းချင်း ပြောဆိုဆက်ဆံခြင်းကို စွဲလမ်းနေကြပြီး Allen ကို လုံးဝ ဂရုမစိုက်ကြပေ။ Allen သည် သူတို့ကို မနှောင့်ယှက်ဝံ့ဘဲ အခန်းထဲမှ တိတ်တဆိတ် ထွက်လာသည်။

သို့သော် အခန်းထဲမှ ထွက်လာလာချင်း ဤအိမ်တော်ထိန်းသည် သူ့ပုံရိပ်ကိုပင် ဂရုမစိုက်ဘဲ သူ့သားနှစ်ယောက်ကို သူ့လက်များနှင့် ချက်ချင်း ဖမ်းဆွဲလိုက်သည် : “ ဒီရှကျီရှိူ့ရဲ့ဇာစ်မြစ်က ဘာလဲ? ဘာလို့ အရှင်က သူနဲ့တွေ့တွေ့ချင်း စာချုပ်ချုပ်လိုက်တာလဲ? ”

Allen ၏ သားနှစ်ယောက် : “ ... ” သူတို့လည်း မသိဘူး!

နှောင်ကြိးဖွဲ့သော လူနှစ်ဦးတို့ကြားတွင် ထူးခြားသော သံလိုက်စက်ကွင်းတစ်ခု ရှိမည်ဖြစ်သည်။ သူတို့၏စိတ်စွမ်းအင်များက အတူတကွ ပေါင်းစပ်နေကြမည်ဖြစ်ရာ တမင်တကာ ဖုံးကွယ်ထားခြင်း မရှိသရွေ့ ပတ်ဝန်းကျင်ရှိ စစ်သည်တော်များနှင့် အကူဆရာများက ၎င်းကို ခံစားနိုင်ကြသည်။

ယန်ကျင်းဇီနှင့် ရှကျီရှိူ့တို့က လုံးဝ မဖုံးကွယ်ထားရာ သဘာဝကျစွာပင် သူတို့သည် ၎င်းကို ခံစားရပြီး ၎င်းကို သိရှိပြီးနောက်... သူတို့သုံးဦးဟာ ယခုအခါ အတူတကွ ကြောင်အနေကြသည်။

နောက်ဆုံး၌မူ ကြီးမားသော မုန်တိုင်းတို့ကို တွေ့ကြုံခံစားခဲ့ဖူးသူ Allen က ပထမဦးဆုံး အသိပြန်ဝင်လာပြီး သူ့သားများကို လွှတ်လိုက်သည် : “ မင်း ရှကျီရှိူ့အကြောင်း ပြန်စုံစမ်းဖို့ လူလွှတ်လိုက်။ ဘယ်အသေးစိတ်ကိုမှ မလွတ်စေနဲ့... ပြီးတော့ စိတ်စွမ်းအင် လိုက်ဖက်နှုန်း စစ်ဆေးဖို့ စစ်ဆေးစက်တစ်ခုပါ ယူလာခဲ့။ ”

Allen ၏ သားနှစ်ဦးသည် အမိန့်နာခံပြီး မကြာမီတွင် စိတ်စွမ်းအင်လိုက်ဖက်နှုန်း စစ်ဆေးသော စက်ကိရိယာတစ်ခုကို ပို့လာသည်။

ကြယ်တာရာ မဟာမိတ်၏ စစ်သည်တော်များနှင့် အကူဆရာများက သူတို့၏လက်တွဲဖော်များနှင့် စိတ်စွမ်းအင်လိုက်ဖက်နှုန်းကို စစ်ဆေးချင်လျှင် သူတို့သည် မြို့ကြီးများရှိ အကူဆရာများအဖွဲ့အစည်းသို့ သွားရမည်ဖြစ်သည်။ စစ်ဆေးစက်များက ဈေးကြီးပြီး လူကြိုက်မများသဖြင့် မြို့ကြီးများရှိ အကူဆရာများအဖွဲ့အစည်းကသာ ၎င်းတို့ကို ပိုင်ဆိုင်သည်။

သို့ရာတွင် Allen အတွက်မူ သူသည် စစ်ဆေးစက်တစ်ခုကို အချိန်မရွေး နေရာမရွေး ရရှိနိုင်သည်။ အဆုံး၌မူ အမှန်တကယ်ပင် ဤစစ်ဆေးစက်ကို ယန်ကျင်းဇီလက်အောက်မှ ကုမ္ပဏီက ထုတ်လုပ်ထားခြင်းဖြစ်သည်။

ယန်ကျင်းဇီနှင့် ရှကျီရှိူ့တို့၏ စိတ်စွမ်းအင်များက အထိန်းအကွပ်မဲ့စွာ ဖြာထွက်နေသောကြောင့် Allen သည် ၎င်းကို တိုက်ရိုက်စစ်ဆေးလိုက်သည်။

၉၉.၉၉%!

၉၉.၉၉% တဲ့!

ဒီလိုက်ဖက်နှုန်းက တကယ်ကို မကြုံစဖူးပဲ!

ဤစက်ကိရိယာက အမြင့်ဆုံး လိုက်ဖက်နှုန်းကို ဤနံပါတ်နှင့် သတ်မှတ်ထားခြင်းကြောင့်သာ မဟုတ်လျှင် ၎င်းက ၁၀၀% ဖြစ်နိုင်ဆဲဟု ခန့်မှန်းရသည်။

Allen : “ ........ ” စစ်သည်တော်တစ်ဦးနှင့် အကူဆရာတစ်ဦးတို့၏ စိတ်စွမ်းအင်များက ၁၀၀ ရာခိုင်နှုန်းအထိ လိုက်ဖက်ရန်မှာ မဖြစ်နိုင်ဟု သူ အမြဲတွေးခဲ့သည်။ ယခုမူ သူ မသေချာတော့ပေ...

စကားမစပ် ဆိုရလျှင် အကူဆရာများနှင့် စစ်သည်တော်များ အများစုတို့၏ အများဆုံး လိုက်ဖက်နှုန်းမှာ ၇၀% သို့မဟုတ် ၈၀% ဖြစ်ပြီး ၎င်းက အလွန်မြင့်မားသည်။ ၉၀% လိုက်ဖက်နှုန်းအတွက်မူ... ခေတ်ကာလများတလျှောက်တွင်ပင် အများအပြား မရှိချေ။

Allen ချက်ချင်း စိတ်လှုပ်ရှားသွားသည်။

အဆင့်နိမ့် အကူဆရာတစ်ဦးက အဆင့်မြင့် စစ်သည်တော်တစ်ဦးကို စိတ်စွမ်းအင်လမ်းညွှန်ခြင်း လုပ်ပေးမှုဟာ မကြာခဏ အကျိုးမဲ့တတ်သည်။ ၎င်းကြောင့် သူသည် ရှကျီရှိူ့၏ ယန်ကျင်းဇီကို စိတ်စွမ်းအင်လမ်းညွှန်ခြင်း လုပ်ပေးမှုအား မူလက ငြင်းဆိုခဲ့သည်။

ဒါပေမယ့် လူနှစ်ယောက်ရဲ့ စိတ်စွမ်းအင်လိုက်ဖက်နှုန်းက မြင့်မားရင်တော့ မတူတော့ဘူး!

လိုက်ဖက်နှုန်းက လုံလုံလောက်လောက် မြင့်မားသရွေ့ အကူဆရာရဲ့ စိတ်စွမ်းအင်အဆင့်က ပြဿနာမဟုတ်တော့ဘူး။ အလွန်ဆုံး စိတ်စွမ်းအင်ဖြီးသင်တဲ့ အရှိန်နှုန်းက နည်းနည်းနှေးရုံလောက်ပဲ!

သူ့အရှင်က ဤမျှမြင့်မားသော လိုက်ဖက်နှုန်း ရှိသည့် အကူဆရာတစ်ဦးကို ရှာတွေ့နိုင်ရာ အနာဂတ်မှာ သူ စိတ်စွမ်းအင် အထိန်းကွပ်မဲ့မှုတွေကို စိုးရိမ်စရာမလိုတော့ဘူး!

ယခင်က ရှကျီရှိူ့ကို ထင်မြင်ချက်ရှိခဲ့သော Allen ၌ ရှကျီရှိူ့အတွက် ကောင်းမွန်သော အမြင်များနှင့် ပြည့်နှက်နေပြီဖြစ်သည်။

“ ရှကျီရှိူ့ရဲ့အခြေအနေကို စုံစမ်းပြီးပြီလား? မေ့လိုက်တော့၊ ငါကိုယ်တိုင်ပဲ သွားစစ်တော့မယ်! ” Allen က ဆိုသည်။

သူ့အရှင်နှင့် ရှကျီရှိူ့တို့သည် နှောင်ကြိုးသွယ်ထားခါစ ဖြစ်ပြီး စိတ်စွမ်းအင် ပေါင်းစပ်ပြီးနောက် သူတို့က တစ်စုံတစ်ရာ လုပ်ဆောင်ချင်လောက်မည် ဖြစ်ကာ သူသည် သွားနှောင့်ယှက်မည်မဟုတ်ပေ။ ပထမဆုံးအနေဖြင့် သူသည် ရှကျီရှိူ့၏အခြေအနေကို ရှင်းရှင်းလင်းလင်း စစ်ဆေးရန် လိုအပ်သည် – ယခင်က သူသည် ရှကျီရှိူ့ကို စိတ်မရှိခဲ့ဘဲ အကျဉ်းချုပ်သာ စုံစမ်းခိုင်းခဲ့သည်။

Allen က တိတ်တဆိတ် ထွက်သွားပြီး ယန်ကျင်းဇီနှင့် ရှကျီရှိူ့တို့သည် နီးသထက် နီးကပ်လာကြကာ နောက်ဆုံးတွင် ဆိုဖာပေါ်၌ ထိုင်၍ မသိလိုက်ပါပဲနှင့် လက်ကိုင်ထားကြသည်။

ဤအခိုက်အတန့်၌ ရှကျီရှိူ့က ရှက်သွေးဖြာကာ ဆိုသည် : “ ဟယ်လို၊ ငါက ရှကျီရှိူ့ပါ။ ”

“ ဟယ်လို၊ ကိုယ်က ယန်ကျင်းဇီပါ။ ” ယန်ကျင်းဇီက ချက်ချင်း ပြန်ပြောသည်။

ရှကျီရှိူ့က ခြောက်ကပ်စွာ နှစ်ခါချောင်းဟန့်သည် : “ ဘာလို့ ရုတ်တရက်ကြီး နှောင်ကြိုးဖွဲ့ပြီးသွားတာလဲ ငါ မသိဘူး... မင်း ငါ့ကို ဘာကြောင့် သဘောကျတာလဲ? ”

“ ကိုယ် မင်းကို မြင်မြင်ချင်း ချစ်မိသွားတယ်။ မင်းက ကိုယ်မြင်ဖူးသမျှထဲ ကြည့်အကောင်းဆုံးလူပဲ။ ” ယန်ကျင်းဇီက ပြောသည်။ စကားပြောပြီးနောက် သူသည် ရှကျီရှိူ့၏အသွင်အပြင်ကိုသာ ပြောခြင်းက သိပ်မကောင်းမှန်း သဘောပေါက်သွားသည်။ ထို့ကြောင့် သူက ဆက်ပြောလိုက်သည် : “ ဒါပေါ့၊ ကိုယ် မင်းရဲ့အတွင်းစိတ်ကိုလည်း သဘောကျပါတယ်။ ”

ရှကျီရှိူ့ : “ ... ” နောက်ဆုံးစာကြောင်းကို ထည့်မပြောတာ ပိုကောင်းတယ်။ သူတို့က ယခုမှ တွေ့ခါစဖြစ်ပြီး တစ်ဖက်လူ၏အတွင်းစိတ်ကို လုံးဝ နားမလည်ကြပေ။

သို့သော်ငြား ယန်ကျင်းဇီ၏စကားကို ကြားရပြီးနောက် သူသည် သူ့ကို ဤရုပ်ရည် ပေးထားသည့်အတွက် ပထမဆုံးအကြိမ် ဘုရားသခင်အား ကျေးဇူးတင်မိသည်။

ယခင်က ဤရုပ်ရည်သည် သူ့အား ကောင်းကျိုးထက် ပြဿနာကိုသာ ပိုမိုယူဆောင်လာခဲ့သည်။ သူ့ရုပ်ရည်ကို မြင်ပြီး သူ့ကို မုန်းတီးသူများ သို့မဟုတ် သူနှင့် ဆက်ဆံရေးရှိလိုသူများ အမြဲရှိခဲ့၏။ သူ့ရုပ်ရည်ကိုသာ စိတ်ဝင်စားသော ပိုးပန်းသူများက သူ့ကို အမြဲဝိုင်းရံနေခြင်းဟာ သူ့ကို စိတ်အနှောင့်အယှက်ဖြစ်စေသည်။

သူသည် သူရုပ်ရည်ကြောင့် သူ့ကို ကြိုက်သူများအား မုန်းခဲ့ဖူးသော်ငြား ယခုမူ... သူ့ရှေ့မှလူကို သူ မမုန်းပေ။

ယန်ကျင်းဇီ၏ခံစားချက်များက စစ်မှန်လွန်းသောကြောင့် ဖြစ်နိုင်သည်။

ဤလူက သူ့ကို တကယ်ပင် အရိုးထဲအထိ အလွန်ချစ်သည်ဟု သူ ခံစားနေရသည်။

ဒီအချစ်က ရုပ်ရည်နဲ့ အစပြုတယ်ဆိုရင်တောင် ဘာဖြစ်လဲ?

သူသည်လည်း ဤလူကို မြင်မြင်ချင်း ချစ်မိခဲ့ပြီး ၎င်းကလည်း သူ့အသွင်အပြင်နှင့် စတင်ခဲ့သည်။

ရှကျီရှိူ့က စကားမပြောသော်လည်း ရှကျီရှိူ့၏စိတ်စွမ်းအင်က မပျော်ရွှင်သော ခံစားချက်များကို မဖော်ပြဘဲ အတော်လေး ပျော်ရွှင်လျက်ရှိသည်။ ယန်ကျင်းဇီက မေးလိုက်သည် : “ မင်း ဘာလို့ ကိုယ့်ကို သဘောကျတာလဲ? ”

ရှကျီရှိူ့သည် ယန်ကျင်းဇီထံမှ စိုးရိမ်ကြောင့်ကြမှုအချို့နှင့် သတိထားမှုအချို့တို့ကို ခံစားလိုက်ရသည်...

ရှကျီရှိူ့က ပြုံးကာ ပြောလိုက်သည် : “ ငါလည်း မင်းကို မြင်မြင်ချင်း ချစ်မိသွားတယ်။ မင်းက ငါတွေ့ဖူးသမျှထဲ အကြည့်ကောင်းဆုံးလူပဲ။ ”

ယန်ကျင်းဇီရဲ့ အဝတ်အစားတွေက နည်းနည်းစူးရှပြီး အသားအရည်က နည်းနည်းကြမ်းလွန်းကာ အရမ်းညိုနေပေမယ့် သူ့ရုပ်လက္ခဏာတွေကတော့ တကယ်ပဲ ကြည့်ကောင်းတယ်!

ရှကျီရှိူ့ သူ့ကို ကြည့်မိလေလေ၊ သူ့ကို ပိုပိုကြိုက်မိလေလေပင်။

ရှကျီရှိူ့က ဤစကားပြောချိန်တွင် အလွန်စိတ်ရင်းမှန်ကြောင်းကို ယန်ကျင်းဇီ ခံစားမိသည်။

ဒါဆို... ရှကျီရှိူ့က သူ့ကို ဒီပုံစံနဲ့ ကြိုက်တာလား? ယန်ကျင်းဇီ ချောင်းဆိုးလိုက်သည် : “ ငါ ဝတ်စားတာကို မကြိုက်တဲ့လူတွေ အများကြီး ရှိတယ်... ”

ရှကျီရှိူ့သည် ယန်ကျင်းဇီက အနည်းငယ် စိတ်ဓာတ်ကျနေပြီး စိတ်ထိခိုက်နေသည်ဟု ခံစားမိကာ ချက်ချင်း နှစ်သိမ့်လိုက်သည် : “ မင်း သူများတွေကို ဂရုစိုက်စရာ မလိုပါဘူး။ မင်းက အရမ်ချောတယ်လို့ ငါ ထင်တယ်! ဒီကမ္ဘာက လူတွေရဲ့ အလှတရားခံစားမှုတွေက ကွဲပြားတယ်။ မင်းကိုယ်တိုင် ပျော်ဖို့ပဲလိုတယ်။ သူများတွေ စိတ်ကျေနပ်စရာ မလိုဘူး။ ”

ယန်ကျင်းဇီသည် ရှကျီရှိူ့က အမှန်အတိုင်း ပြောနေမှန်း သိသည်။ ဆိုတော့... တကယ်ကြီး ရှကျီရှိူ့ရဲ့ အလှခံစားမှုက သာမန်လူတွေနဲ့ ကွဲပြားတာလား?

သူ့အဝတ်အစားက အမှန်ပင် အနည်းငယ် ရုပ်ဆိုးသည်ဟု သူ ယခင်က ထင်ခဲ့သည်။ ဒါပေမယ့် ရှကျီရှိူ့က ကြိုက်မှတော့ ဒါက အကောင်းဆုံးဝတ်စုံပဲ!

ဒါနဲ့ စကားမစပ် သူ့ဝတ်ဆင်ပုံက ရှကျီရှိူ့ရဲ့ ထူးဆန်းတဲ့ အလှခံစားမှုနဲ့ ကိုက်ညီလို့များ ရှကျီရှိူ့က သူ့ကို သဘောကျတာလား?

ဤသို့သာဆိုလျှင်... ဤကမ္ဘာတွင် ရှကျီရှိူ့ထက် ပိုအရေးကြီးသူ မရှိချေ။ အဝတ်အစားက ဘာမှမဟုတ်ဘဲ ခန္ဓာကိုယ်ပြင်ပမှ တစ်စုံတစ်ရာသာ ဖြစ်သည်။ ရှကျီရှိူ့ ကြိုက်သမျှ သူ ဝတ်နိုင်တယ်!

ဤအတွေးနှင့် ယန်ကျင်းဇီသည် စိတ်သက်သာရာရပြီး ပျော်ရွှင်သွားပြန်သည်။

ရှကျီရှိူ့သည် ယန်ကျင်းဇီက ပြန်လည်ပျော်ရွှင်သွားကြောင်း ခံစားမိပြီး သူ့နှစ်သိမ့်မှုက မှန်ကန်သည်ဟု ခံစားလိုက်ရသည်။

ယန်ကျင်းဇီ၏ ဝတ်စားဆင်ယင်ပုံက အနည်းငယ် စူးရှပြီး သူ့မျက်လုံးများ အနည်းငယ် ကျိန်းစပ်လျှင်တောင်မှ ဘာမှမဖြစ်ချေ။ ယန်ကျင်းဇီက ကြိုက်တယ်! ယန်ကျင်းဇီရဲ့အကြိုက်တွေကို သူ ထောက်ခံပေးသင့်တယ်!

ထို့အပြင် သူ၏ အလှရသခံစားမှုကလည်း သိပ်မမှန်လောက်ပေ...

သူတို့သည် ယခင်က လက်ကိုင်ထားရုံသာ ဖြစ်ခဲ့သော်လည်း ယခုမူ အချင်းချင်း ပွေ့ဖက်ထားကြသည်။

ရှကျီရှိူ့က ဆိုသည် : “ တစ်ယောက်နဲ့တစ်ယောက် သိထားကြရအောင်... မင်းမိသားစုမှာ ဘယ်သူရှိလဲ? ”

ယန်ကျင်းဇီက ဖြေသည် : “ ကိုယ်က အိမ်မှာ တစ်ယောက်တည်း။ မင်းမိသားစုကရော? ”

ရှကျီရှိူ့က ပြောသည် : “ ငါ့အဖေက ပျောက်နေတယ်။ ငါ့အမေနဲ့ ညီလေးက ကြယ်မြို့တော်မှာ ရှိတယ်... ”

ရှကျီရှိူ့သည် သူ့မိသားစု၏ အခြေအနေကို မိတ်ဆက်ပေးသော်လည်း အစပိုင်းပြောပြပြီးနောက်တွင်မူ သူသည် ယန်ကျင်းဇီ၏ ခံစားချက်များက သိပ်မမှန်ကြောင်း ခံစားမိလိုက်သည်။

ရှကျီရှိူ့က မေးသည် : “ မင်း ဘာဖြစ်လို့လဲ? ”

ယန်ကျင်းဇီက ဘာမှမပြောပေ။ သူသည် အနည်းငယ် စိတ်ပူနေသည်။

သူ ရုတ်တရက် အမှတ်ရလာသည်၊ သူ၏ ဤအထောက်အထားက အတုအယောင် ဖြစ်ပြီး ထိုမျှတင်မက သူသည် ယခင်က ရှကျီရှိူ့၏ဖခင်ကို အလွန်ရိုင်းစိုင်းစွာ ဆက်ဆံခဲ့သည်...

ရှကျီရှိူ့၏ဖခင်က သူ့ကို ဒူးတောင်ထောက်ခဲ့၏...

သူ အခု ဝန်ခံသင့်လား?

ယန်ကျင်းဇီသည် ဝန်ခံချင်သော်ငြား ဤဝန်ခံချက်က... မဟာမိတ်၏ Marshal ဖြစ်သော သူက ရှချီချီကို လက်ထပ်ရန်အတွက် မိုင်းပိုင်ရှင်တစ်ဦးနှင့် လူစားလဲခဲ့သည်။ ရှကျီရှိူ့သာ ဒီအကြောင်း သိရင် စိတ်ဆိုးလိမ့်မယ် ဟုတ်တယ်မလား?

ရှကျီရှိူ့က ထပ်မေးသည် : “ မင်း အရမ်းစိတ်ပူနေတာလား? ” ယန်ကျင်းဇီက အလွန်အလွန် စိတ်ပူနေကြောင်း ရှကျီရှိူ့ ခံစားနေရသည်။

“ မင်းမိသားစုက ကိုယ့်ကို မကြိုက်မှာ ကြောက်တယ်။ ကိုယ်က မိုင်းပိုင်ရှင်တစ်ယောက်ပဲ။ မင်းက အဆင့်အတန်းမြင့်တဲ့ အထက်တန်းလွှာတစ်ယောက်နဲ့ လက်ထပ်ဖို့ ပြည့်စုံတယ်... ” ယန်ကျင်းဇီသည် သူ၏ ယခင်က ရှချီချီကို လက်ထပ်ရန် ကြိုးပမ်းခဲ့မှုများကို ရှင်းပြဖို့ နည်းလမ်းအား စတင်‌စဉ်းစားကြည့်သည်။ 

“ ငါ့အမေက မင်းကို သဘောကျမှာပါ။ အမေက ငါ့ကို အထက်တန်းလွှာတွေနဲ့ လက်မထပ်ဖို့ အမြဲမျှော်လင့်ခဲ့တယ်။ ပြီးတော့ ငါလည်း သူတို့တွေကို မကြိုက်ဘူး။ သာမန်မိသားစုက လူကိုပဲ ငါ ရှာချင်ခဲ့တယ်။ ” ရှဇီရှိူ့က ဖြေသည်။

ရှမိသားစုသည် ဖရိုဖရဲဖြစ်လွန်းလှသည်။ သူ့မိခင်က သူ့ဖခင်နှင့် လက်ထပ်ပြီးခါစတွင် ရှမိသားစု၌ နစ်နာမှုများစွာကို ခံစားခဲ့ရသည်။

ထို့အတွက်ကြောင့် သူ့မိဘများသည် အနာဂတ်တွင် သူ လက်ထပ်သောအခါ ရိုးရှင်းသော မိသားစုမှ လက်တွဲဖော်ကို ရှာဖွေနိုင်လျှင် အကောင်းဆုံးဖြစ်မည်ဟု မျှော်လင့်ကြပြီး မိသားစုနောက်ခံအပေါ် တောင်းဆိုမှုများ မလုပ်‌ကြချေ။

ရှဇီရှိူ့က ယခု အမှန်အတိုင်း ပြောနေကြောင်းကို ယန်ကျင်းဇီ ခံစားမိနိုင်သည်။

ဒါဆို သူက တကယ်တော့ အကြီးဆုံး အထက်တန်းလွှာပါလို့ သူ ပြောသင့်သလား?

“ ငါ သဘောကျတာက မင်းကိုပါ။ မင်းမိသားစုနဲ့ ဘာမှမဆိုင်ဘူး။ ” ရှဇီရှိူ့က ဆက်ပြောသည် : “ တကယ်တော့ မင်း ငါ့မိသားစုအပေါ် အမြင်ရှိမှာကို ငါ စိုး‌ရိမ်နေတုန်းပဲ... ငါ့အဖေ ပျောက်သွားပြီး ငါ့မိသားစုက အခုတလော ငွေအရမ်းပြတ်လပ်နေတယ်။ ” လူများစွာသည် ဘဝတစ်လျှောက်လုံး အထက်တန်းလွှာ အဆင့်အတန်းအတွက် ရုန်းကန်ခဲ့ရသည်။ သို့ရာတွင် သူ့အတွက်မူ ဤအဆင့်အတန်းက သိပ်အသုံးမဝင်ပေ။ 

ရှဇီရှိူ့ ကြိုက်တာက သူတစ်ယောက်တည်းကိုပဲ! ယန်ကျင်းဇီသည် ချက်ချင်းပင် ထပ်မံပျော်ရွှင်သွားပြီး တခဏတာ အခြားအရာများကို လုံးဝ မေ့လျော့သွားသည်။

ရှဇီရှိူ့ အနည်းငယ် အဆင်မပြေဖြစ်နေသည်ကို တွေ့သောအခါ သူသည် ရှဇီရှိူ့ကို စတင်ပြန်နှစ်သိမ့်လိုက်သည် : “ စိတ်မပူပါနဲ့။ ကိုယ့်မှာ ငွေရှိတယ်။ အနာဂတ်မှာ မင်း ငွေမပြတ်တော့ဘူး။ ”

ရှဇီရှိူ့သည် ယန်ကျင်းဇီ၏စိတ်ရင်းကို ခံစားမိပြီး ရယ်မောသည် : “ ငါ မင်းရဲ့ပိုက်ဆံကိုလည်း အချိန်တိုင်း မဖြုန်းနိုင်ဘူး... တကယ်တော့ ငါ့မှာ အခြားသူတွေကို စိတ်စွမ်းအင် ကူညီပေးတဲ့ အလုပ် ရှိတယ်။ ”

ရှဇီရှိူ့သည် သူ့အလုပ်တွင် ရွံရှာဖွယ်ကောင်းသော စစ်သည်တော်အချို့ကို ကြုံတွေ့ခဲ့ရကြောင်း ဝန်ခံသော်လည်း အမှန်တကယ်ပင် အကူအညီလိုအပ်သူအချို့လည်း ရှိ၏။

ပြေလျော့ဆေးရည်သည် အဖိုးတန်ကုန်ကြမ်းများစွာကို လိုအပ်ပြီး ဈေးနှုန်းက အလွန်ဈေးများသည်။ အဆင့်နိမ့် စစ်သည်တော် အများအပြားက ၎င်းကို မတတ်နိုင်သည့်အပြင် ပြေလျော့ဆေးရည်၏ အကျိုးသက်ရောက်မှုကလည်း အထူးလမ်းညွှန်ပေးသော အကူဆရာတစ်ဦးကို ရှာဖွေခြင်းကဲ့သို့ မကောင်းမွန်ချေ။

ယခင်က အလုပ်လုပ်နေစဉ်၌ သူသည် စိတ်စွမ်းအင် အထိန်းကွပ်မဲ့မှုများကို ပြင်းပြင်းထန်ထန် ခံစားနေရသည့် အချို့သော စစ်သည်တော်အိုများနှင့် တွေ့ခဲ့ရသည်။ သူက သူတို့ကို ကူညီလမ်းညွှန်ပေးပြီးနောက် သူတို့က သူ့ကို အရမ်းကျေးဇူးတင်ကြပြီး ထပ်ခါတလဲလဲ ကျေးဇူးတင်ခဲ့ကြသည်... သူသည် ထိုသို့သော လူများကို ကူညီ၍ သူတို့၏စိတ်စွမ်းအင်များကို လမ်းညွှန်ပေးရန် ဆန္ဒရှိသည်။

အမှန်ပင်၊ သူ၏ ဤကိစ္စကို ပြောရသော အဓိက အကြောင်းအရင်းမှာ ယန်ကျင်းဇီ၏ ဤကိစ္စအပေါ် သဘောထားကို သူ မြင်ချင်သောကြောင့်လည်း ဖြစ်သည်။

မြို့တော်ရှိ အထက်တန်းလွှာများက သူတို့၏ အကူဆရာများကို ထိုအလုပ်မျိုး လုပ်ဆောင်ရန် ခွင့်မပြုကြချေ။

“ မင်း ဒီအလုပ်ကို ကြိုက်ရင် ဆက်ပြီးလုပ်လို့ရတယ်။ မင်း မကြိုက်ရင်လည်း အခြားအလုပ် ပြောင်းလုပ်နိုင်တယ်၊ မဟုတ်လည်း မင်း အလုပ်မလုပ်နဲ့တော့။ ကိုယ့်မှာ ပိုက်ဆံရှိတယ်! ” ယန်ကျင်းဇီက ပြောသည်။ သူ့တွင် မူလပိုင်ရှင်၏ မှတ်ဉာဏ်များ ရှိပြီး လူအချို့က သူတို့၏အကူဆရာများကို သူတို့ မဟုတ်သော စစ်သည်တော်များအပေါ် စိတ်စွမ်းအင် လမ်းညွှန်မှု လုပ်ပေးခြင်းအား တားမြစ်ထားကြောင်း သိရှိသည်။ သို့သော် မူလပိုင်ရှင်သည် ထိုလူများက ရူးနေသည်ဟု ထင်ပြီး ထိုလူများ၏ အတွေးများကို နားမလည်နိုင်ခဲ့ပေ။

ရှဇီရှိူ့သည် ယန်ကျင်းဇီ၏စကားကို ကြားလိုက်ရသောအခါ ပိုမိုပျော်ရွှင်သွားသည်။ သူ့စိတ်စွမ်းအင်က ယန်ကျင်းဇီ၏စိတ်စွမ်းအင်အပေါ်တွင် ခုန်ပေါက်သွားသော်ငြား သူ့မျက်နှာတွင် ခပ်ဖျော့ဖျော့ အပြုံးသာ ရှိနေသည် : “ ငါ ဒီအလုပ်ကို တကယ် ကြိုက်တယ်။ ”

“ ဒါဆို မင်း ဆက်လုပ်ပါ! ကိုယ် မင်းကို အဖော်ပြုပေးမယ်။ ” ယန်ကျင်းဇီက ‌ဆိုသည်။

“ ကောင်းပြီ။ ” ရှဇီရှိူ့သည် ပြုံးမိလိုက်ပြန်သည်။ သူက အလှရသခံစားမှုပိုင်းမှာ ပုံမှန်မဟုတ်ပေမယ့် သူ့မှာ လူရှာဖို့ တကယ် ကောင်းတဲ့ အမြင် ရှိတယ်!

သူတို့နှစ်ဦးသည် ဆက်လက်စကားပြောကြပြီး သူတို့၏စိတ်စွမ်းအင်များမှာ ရောထွေးနေပြီး သေသည့်တိုင်အောင် မခွဲမခွာနိုင်ဖြစ်နေကြသည်။ သူတို့သည် စကားများများ ပြောလေလေ၊ ပိုပိုပြီး ပျော်ရွှင်မိလေလေ ဖြစ်လာကာ အချင်းချင်းလည်း ပိုမိုသိကျွမ်းလာကြသည်။

သူတို့ရဲ့ကံက တကယ် ကောင်းလွန်းတယ်! မှားပြီးတော့ သူတို့က ဒီလိုမျိုး ပြီးပြည့်စုံတဲ့ လက်တွဲဖော်ကို ရှာတွေ့တာ အံ့ဩစရာပဲ!

ယခုအခါတွင် သူတို့သည် အချင်းချင်း ပွေ့ဖက်ထားရုံတင် မဟုတ်တော့ဘဲ နမ်းလုနီးပါး ဖြစ်နေပြီဖြစ်၏။

သို့သော်ငြား

ထိုအခိုက်အတန့်၌ ရှဇီရှိူ့၏ ဆက်သွယ်ကိရိယာမှ ရုတ်တရက် မြည်လာသည်။

ဖုန်းခေါ်သူမှာ ရှဇီရှိူ့၏မိခင် ဖြစ်ပြီး သူ(မ)၏လေသံက ငိုကြွေးနေသော အသံဖြင့် အထူးစိတ်လှုပ်ရှားနေသည် : “ ဇီရှိူ့! ဇီရှိူ့! နင့်အဖေ ပြန်လာပြီ! သူ ပြန်လာပြီ! ”