အပိုင်း ၁၅၈ ( Mine Owner 7 )

သူ့အဖေ ပြန်ရောက်လာပြီလား? ရှဇီရှိူ့၏လက်က တုန်ယင်သွားပြီး သူသည် ဆက်သွယ်ကိရိယာကို မတော်တဆ ပိတ်မိသွားကာ အမြန်ပြန်ခေါ်လိုက်သည်။

ထို့နောက် သူ့မိခင်ထံမှ အသေးစိတ်အခြေအနေကို သိလိုက်ရသည်။

လွန်ခဲ့သော တစ်နှစ်ကျော်က သူ့ဖခင် ပျောက်ဆုံးသွားခြင်းမှာ သူက သေဆုံးသွားခြင်း မဟုတ်ဘဲ အန္တရာယ်ရှိသော ဂြိုဟ်တစ်ခုပေါ်တွင် သောင်တင်နေခဲ့ခြင်း ဖြစ်သည်။ မကြာသေးမီကမှသာ လူတစ်ဦးသည် အန္တရာယ်များသော ထိုဂြိုဟ်အနားမှ ဖြတ်သွားကာ သူ့ဖခင်ကို ကယ်တင်ခဲ့သည်။

သူ့ဖခင် ပျောက်ဆုံးသွားသောအခါ ၎င်းသည် ကြယ်တာရာ မဟာမိတ်၏ အဓိကအဖြစ်အပျက်တစ်ခု အမှန်ဖြစ်ခဲ့သည်။ အဘယ့်ကြောင့်ဆိုသော် ပျောက်ဆုံးသွားသည်မှာ သူ့ဖခင်တစ်ဦးတည်း မဟုတ်ဘဲ မဟာမိတ် စစ်သည်တော် ၃,၀၀၀ ကျော်လည်း ပါဝင်သောကြောင့်ပင်။

သို့သော် အကြောင်းတချို့ကြောင့် တပ်ကြီးရှစ်က သတင်းများကို ဖိနှိပ်ခဲ့သည်။ စုံစမ်းပြီးနောက် သူတို့က သူ့ဖခင်၏စစ်ယာဉ်မှာ အထူးစကြာဝဠာဖြစ်စဉ်တစ်ခုနှင့် ကြုံတွေ့ခဲ့ကာ ပျောက်ကွယ်သွားပြီး သူတို့ မရှာနိုင်ဟုသာ ဆိုသည်။

သူ့မိခင်သည် သူ့ဖခင်၏စိတ်စွမ်းအင်များနှင့် ချည်နှောင်ထားပုံရပြီး စိတ်အာရုံကြောင့် သူ(မ)သည် သူ့ဖခင်က အသက်ရှင်နေသေးသည်ဟု အမြဲယုံကြည်ခဲ့သည်။ ထို့ကြောင့် သူသည် လူများကို နေရာတိုင်း လိုက်ရှာခဲ့ပြီး သူ့ဖခင်ကို ဝိုင်းရှာပေးစေချင်ခဲ့၏။

ကံမကောင်းစွာဖြင့် ဘယ်သူကမှ သူ့ကို လုံးဝ မကူညီခဲ့ချေ။

တစ်နှစ်ကျော်ကြာပြီးနောက် သူသည်လည်း အခြားလူတိုင်းကဲ့သို့ပင် သူ့ဖခင်က တကယ်ပင် ဆုံးပါးသွားလောက်ပြီဟု ခံစားခဲ့ရသည်။ အစောက ယန်ကျင်းဇီနှင့် သူ့မိသားစုအကြောင်း ပြောပြသောအခါ သူသည် သူ့ဖခင်က ပျောက်ဆုံးနေသည်ဟုသာ ပြောခဲ့သည်။ သူ့ဖခင်က ဆုံးပါးသွားပြီဟု သူ မယုံကြည်ချင်သောကြောင့် ဖြစ်၏။

အခု သူ့အဖေ ပြန်လာပြီလား?

ရှဇီရှိူ့သည် အနည်းငယ် တွေဝေသွားပြီး ဆက်သွယ်ကိရိယာ၏ တစ်ဖက်ခြမ်းရှိ သူ့မိခင်မှာ မချုပ်တည်းနိုင်စွာ ငိုကြွေးနေပြီဖြစ်သည်။

သို့သော်လည်း သူ့မိခင်က ဇာတ်လမ်းတစ်ပုဒ်လုံးကို ရှင်းလင်းစွာ ပြောပြလျက်ရှိသည်။

သူ့ဖခင်သည် ကယ်တင်ခံရပြီးနောက် ကြယ်မြို့တော်အနီးသို့ ခေါ်ဆောင်သွားခံရသည်။ သူ့ဖခင်ကို ကယ်တင်ခဲ့သူကပင် သူ့ဖခင်အား အာကာသခရီးတိုများအတွက် အသုံးပြုသည့် ရွေ့လျားယာဉ်ငယ်တစ်ခု ပေးခဲ့သည်။ 

ထို့နောက် သူ့ဖခင်သည် မြို့တော်အနီးရှိ ဂြိုဟ်တစ်ခုပေါ်သို့ ဆင်းသက်ခဲ့၏။

ထိုအချိန်တွင် သူ့ဖခင်၏ ဆက်သွယ်ကိရိယာမှာ ဟိုးယခင်ကတည်းက ပျက်စီးသွားခဲ့သဖြင့် သူ့ဖခင်သည် အခြားသူတစ်ဦး၏ ဆက်သွယ်ကိရိယာကို ငှား၍ သူတို့ကို ဆက်သွယ်ရန် ကြိုးစားခဲ့သည်။

သို့ရာတွင် သူသည် ယခုနောက်ပိုင်း၌ မကြာခဏ နှောင့်ယှက်ခံရပြီး သူစိမ်းများထံမှ ဆက်သွယ်ခြင်းကို ပိတ်ထားသဖြင့် သူ့ဖခင်က သူ့ကို မဆက်သွယ်နိုင်ခဲ့ချေ။

သို့သော် သူ့မိခင်ကတော့ ကွဲပြားသည်။ သူ့မိခင်သည် သူ့ဖခင်ထံမှ သတင်းကို စောင့်မျှော်လျက်ရှိပြီး ဆက်သွယ်ကိရိယာကို အမြဲဖွင့်ထားသောကြောင့် သူ(မ)က အဆက်အသွယ်ရခဲ့သည်။

ရှဇီရှိူ့သည် အလွန်စိတ်လှုပ်ရှားပြီး ယန်ကျင်းဇီကို ချက်ချင်း လှည့်ကြည့်လိုက်သည် : “ ငါ မြို့တော်ကို သွားချင်တယ်။ ” 

ယန်ကျင်းဇီက ပြောသည် : “ ကိုယ် မင်းနဲ့လိုက်ခဲ့မယ်! ”

ရှဇီရှိူ့၏ခံစားချက်များကို သူနှင့် မျှဝေထားရာ သူသည် ယခုအချိန်တွင် ရှဇီရှိူ့ကဲ့သို့ပင် စိတ်လှုပ်ရှားနေသည်။

အမှန်ပင်၊ သူသည် ခပ်ရေးရေးလည်း စိတ်ပူနေသည် – အရင်တုန်းက သူ ရှဇီရှိူ့ရဲ့အဖေကို သိပ်ပြီး မယဉ်ကျေးခဲ့ဘူး!

ယန်ကျင်းဇီ၏ခံစားချက်များကို သေချာပေါက်ပင် ရှဇီရှိူ့သည်လည်း ခံစားမိသည်။ သို့သော်ငြား သူသည် ၎င်းမှာ ယန်ကျင်းဇီက သူ့ဖခင် လက်မခံမည်ကို စိုးရိမ်နေသည်ဟုသာ ထင်သောကြောင့် နှစ်သိမ့်လိုက်သည် : “ စိတ်မပူနဲ့။ ငါ့အဖေက အရမ်းမျှတတယ်... ” ကောင်းပြီ၊ ဤသည်ကို သူကိုယ်တိုင်ပင် မယုံကြည်ပေ – သူ့ဖခင်က သူ့အနားတွင် ပေါ်လာသည့် ငယ်ရွယ်သော စစ်သည်တော်များကို အလွန်မဖော်ရွေ‌ချေ။

“ အင်း ” ယန်ကျင်းဇီက ရှဇီရှိူ့ကို ပြုံးပြသည် : “ ကိုယ့်ကို စောင့်။ ယာဉ်ပြင်ဖို့ သွားလိုက်ဦးမယ်။ ပြီးရင် ကိုယ်တို့ မြို့တော်ကို ချက်ချင်း သွားကြမယ်။ ” 

ရှဇီရှိူ့သည် ခေါင်းညိတ်လိုက်ပြီး သူ့မိခင် ဖုန်းထပ်ဆက်နေသည်ကို တွေ့လိုက်ရသည်။

သူသည် အမြန်ဖုန်းကိုင်ပြီး သူ့မိခင်နှင့် စကားပြောကာ တစ်ဦးကိုတစ်ဦး နှစ်သိမ့်ပေးကြသည်။ ဤအချိန်တွင် ယန်ကျင်းဇီသည် အပြင်ထွက်ကာ Allen ကို တွေ့ရှိပြီးဖြစ်သည် : “ Allen, အာကာသယာဉ် ပြင်လိုက်။ ငါ မြို့တော်ကို သွားမယ်... အခု ဗိုလ်ချုပ်ရှ လုံခြုံဖို့ သေချာတာဝန်ယူထားရမယ်။ သူ ဘာဖြစ်ခဲ့တာလဲ ဆိုတာကိုလည်း ငါတို့ ရှာရမယ်။ ”

“ ဟုတ်ကဲ့ပါ! အရှင်! ” Allen က ဆက်ပြောသည် : “ အရှင်၊ ကျွန်တော့်မှာ အရှင့်ကို ပြောစရာရှိတယ်။ ”

“ ဘာလဲ? ” ယန်ကျင်းဇီက မေး၏။

“ အရှင်၊ အရင်တုန်းက ကျွန်တော် ရှာတွေ့ထားတဲ့ ရှသခင်လေးနဲ့ ပတ်သက်တဲ့ သတင်းတွေက မှားနေတယ်။ ” Allen က ဆိုသည် : “ ရှသခင်လေးက သန့်ရှင်းပြီး မြင့်မားတဲ့ ကိုယ်ကျင့်တရား ရှိပါတယ်။ သူက လူ့အလွှာပန်း လုံးဝ မဟုတ်ပါဘူး။ သူ့ကို မနာလိုတဲ့ လူတစ်ယောက်ယောက်က သူ့ကို ဖရိုဖရဲပုဂ္ဂိုလ်ရေးဘဝ ရှိတယ် ဆိုပြီး အသရေပျက်အောင် လုပ်ကြံပြောဆိုတာပါ။ ”

ရှဇီရှိူ့နှင့် ဆက်ဆံရေးရှိသည်ဟု ပြောခဲ့သော စစ်သည်တော်များက တကယ်တမ်း၌ ရှဇီရှိူ့နှင့် ဘာမှမဆိုင်ဘဲ အလွန်ဆုံးမှာ သူတို့က ရှဇီရှိူ့ကို လိုက်လံပိုးပန်းခဲ့သော်လည်း ဖမ်းမမိခဲ့ခြင်းသာ ဖြစ်သည်ဟု Allen ရှာတွေ့ခဲ့သည်။

ရှဇီရှိူ့၏ စစ်သည်တော်များစွာအတွက် စိတ်စွမ်းအင် လမ်းညွှန်ပေးမှုအတွက်မူ... သူသည် လုံးဝ ဂရုမစိုက်ပေ။

သူ့အရှင်တွင် အတိတ်၌ စိတ်စွမ်းအင် အထိန်းကွပ်မဲ့မှု ရှိခဲ့ပြီး ၎င်းကို ကူညီဖြီးသင်ရန် အကူဆရာတစ်ဦးအား ရှာဖွေရန် လိုအပ်ခဲ့၏။ သို့သော် အကူဆရာအချို့က ဤအကြောင်းအရင်းအတွက် ငြင်းဆိုခဲ့သည်... ဟင်း၊ သူသည် ထိုအချိန်တွင် တစ်စုံတစ်ဦး၏ စစ်သည်တော်ကို ရိုက်နှက်ခဲ့သည်။

ထို့အပြင် ရှဇီရှိူ့က သူ့အရှင်နှင့် နှောင်ကြိုးဖွဲ့ပြီးပြီဖြစ်သည်။ မတော်တဆမှု မရှိလျှင် သူတို့နှစ်ဦးသည် ပိုပိုပြီး ရင်းနှီးချစ်ခင်သွားကြလိမ့်မည်ပင်။ ဤသို့ဖြစ်ရာ အမှန်ပင် သူသည် ရှဇီရှိူ့နှင့်ပတ်သက်သော အကြောင်းအရာကောင်းများကို ပြောရပေမည် : “ အရှင်၊ ရှသခင်လေးက တပ်ကြီးရှစ် တပ်မှူး ရှာတွေ့ထားတဲ့ တရားမဝင်သား ဖုဖေးကိုတောင် ငြင်းခဲ့ပေမယ့် အရှင်ကို သဘောကျတယ်။ ဒါက သေချာပေါက် အချစ်စစ်ပါပဲ! ”

သူ့အရှင်သည် ယခုအချိန်တွင် ကျေးလက်မိုင်းပိုင်ရှင် ဖြစ်သည့်အပြင် ဤစူးရှရှပုံစံလည်း ရှိနေသည်။ သို့ရာတွင် ရှသခင်လေးက သူ့ကို သဘောကျနေဆဲဖြစ်ပြီး အလှရသခံစားမှု ပြဿနာ ရှိနေသည်မှာ သေချာသည်။

သို့သော် ၎င်းကို အချစ်စစ်ဟုလည်း ပြောနိုင်သည်။

“ ငါလည်း သူ့ကို တကယ် ချစ်တယ်။ ငါ သူ့ကို ပထမဆုံး တွေ့တဲ့အချိန်မှာကတည်းက ငါ သူ့ကို တကယ် သဘောကျတယ်။ ” ယန်ကျင်းဇီတွင် ချိုမြိန်မှုများ ပြည့်နှက်နေသည်။

ရှဇီရှိူ့တွင် သူ့မတိုင်မီ ရည်းစားဟောင်း မရှိခဲ့ချေ။ သူသည် အလွန်ပျော်သော်ငြား တကယ်၌ သိပ်ဂရုမစိုက်ပေ... အနာဂတ်မှာ ရှဇီရှိူ့က သူတစ်ယောက်တည်းရဲ့အပိုင် ဖြစ်သရွေ့ အဆင်ပြေတယ်!

သို့သော် မကြာမီ ယန်ကျင်းဇီ၏အမူအရာက အေးစက်သွားပြီး သူ့အသံက အနည်းငယ် နိမ့်သွားသည် : “ Allen, မင်း ငါ့ကို အဲ့လူတွေနဲ့ တွေ့ဖို့ချိန်းနိုင်တယ်။ ငါ့အရင်အခြေအနေကို အခွင့်ကောင်းယူပြီး လှုပ်ရှားတော့မယ့် ငတုံးကောင်တွေ အားလုံး... ဟင်း၊ ငါ သူတို့ကို ကြည့်ကောင်း‌စေချင်တယ်။ ”

ယန်ကျင်းဇီ၏အမူအရာမှာ အနည်းငယ် ခက်ထန်နေပြီး ၎င်းကို မြင်သောအခါ Allen အံ့အားသင့်သွားသည် : “ အရှင်၊ အရှင့်ရဲ့မှတ်ဉာဏ်တွေ ပြန်ကောင်းလာပြီလား? ”

“ အင်း။ ” ယန်ကျင်းဇီက ဆိုသည်။

Allen သည် ပို၍ပင် အလေးထားလာပြီး ရှဇီရှိူ့၏အဆင့်အတန်းကိုလည်း ပိုမိုမြင့်မားစွာ သတ်မှတ်လိုက်သည်။

သူတို့အရှင်၏ မှတ်ဉာဏ်များ ပြန်ရခြင်းမှာ ရှဇီရှိူ့နှင့် သေချာပေါက် သက်ဆိုင်သည်။

Allen နှင့် ယန်ကျင်းဇီတို့က ရှဇီရှိူ့အကြောင်း ပြောနေကြစဉ် ရှဇီရှိူ့ကလည်း ယန်ကျင်းဇီအကြောင်းကို သူ့မိခင်အား ပြောပြနေသည်။

ရှအမျိုးသမီး၏ ဤအကြိမ် ဖုန်းဆက်ရခြင်းမှာ ရှဝေချန် ပြန်ရောက်လာပြီဖြစ်ရာ ရှဇီရှိူ့က ယန်ကျင်းဇီကို ဆက်သွယ်ရန် မလိုတော့ဟု ရှဇီရှိူ့အား ပြောရန်ဖြစ်သည်။

ရှဇီရှိူ့က ပြောသည် : “ အမေ၊ ကျွန်တော် သူ့ကို အရမ်းသဘောကျတယ်။ ကျွန်တော်တို့ လက်ထပ်ပြီးပြီ။ ”

“ ဘာ? ” ရှအမျိုးသမီး အံ့အားသင့်သွားသည် : “ ငါတို့ အရင် အဆက်အသွယ် လုပ်ကြည့်ဦးမယ်လို့ ငါတို့ ပြောခဲ့ကြတာ မဟုတ်ဘူးလား? ”

“ ကျွန်တော် သူ့ကို အရမ်းသဘောကျလို့ လက်ထပ်လိုက်တယ်။ ” ရှဇီရှိူ့က အလေးအနက် ထပ်ပြောသည် : “ ကျွန်တော် သူ့ကို တကယ် ကြိုက်တယ်။ ”

ရှအမျိုးသမီးသည် သူ(မ)၏သားက အလွန်တွေးခေါ်တတ်သူ ဖြစ်ကြောင်း အမြဲသိခဲ့သည်။ ယခု ရှဇီရှိူ့က ဤသို့ပြောသောအခါ သူ(မ) သူ့ကို မဖျောင်းဖျတော့ပေ : “ ဒါ‌ဆိုလည်း မင်း သူ့ကို ခေါ်လာပြီး ငါတို့ကို ပြပေါ့။ ”

“ ဟုတ်ကဲ့။ ” ရှဇီရှိူ့က သဘောတူသည်။

ရှဇီရှိူ့နှင့် သူ့မိခင်တို့ ဖုန်းခေါ်ပြီးချိန်တွင် ယန်ကျင်းဇီ ဝင်လာသည် : “ ဇီရှိူ့၊ ယာဉ်အသင့်ဖြစ်ပြီ။ ကိုယ်တို့ မြို့တော်ကို အခု ပြန်လို့ရတယ်။ ”

ရှဇီရှိူ့သည် လျင်မြန်စွာ ထရပ်ပြီး ယန်ကျင်းဇီနောက်မှလိုက်၍ တံခါးမှထွက်လာသည်။

Allen သည် သူတို့နှင့်လိုက်ပါပြီး သူ့သားနှစ်ဦးသည် ကြယ်မြို့တော်သို့ အရင်ပြန်နှင့်ကြသည်။

ရှဝေချန်နှင့် အခြားသူတို့မှာ ယခင်က တိုက်ခိုက်ခံခဲ့ရပြီး ဤနေရာတွင် အတွင်းဇာတ်လမ်း ရှိနေကာ သူတို့သည် ရှဝေချန်ကို ကာကွယ်ရမည်ဖြစ်သည်။

အမှန်ပင်၊ သူတို့ အများကြီး လုပ်စရာမလိုပေ။

ရှဝေချန်က အလွန်ထက်မြက်ပြီး မြို့တော်သို့ ပြန်ရောက်ပြီးနောက် သူသည် လူအများအပြားကို ဆက်သွယ်ကာ လူများစွာက သူ၏ပြန်ရောက်ရှိလာမှုကို သတင်းကြားသိထားပြီးဖြစ်သည်။ ဤနည်းဖြင့် သူ၏လုံခြုံရေးကိုလည်း အာမခံနိုင်သွားသည်။

အသက်ရှင်လျက် မြို့တော်သို့ ရှဝေချန် ပြန်ရောက်လာခြင်းကို သိရှိသူများမှာ တကယ်ပင် များပြားပြီး ရှမိသားစုလည်း ပါဝင်သည်။

ရှမိသားစု၏ လက်ရှိအကြီးအကဲမှာ ရှဝေချန်၏အဘိုး ဖြစ်သည်။ သူသည် သတင်းကြားသောအခါ အံ့ဩသွားပြီးနောက် မေးမြန်းသည် : “ ချီချီ ဘယ်မှာလဲ? ”

ရှချီချီအတွက်နှင့် သူတို့သည် ရှဇီရှိူ့ကို မိုင်းပိုင်ရှင်နှင့် လက်ထပ်ခိုင်းထားသည်... ဤကိစ္စကို ရှဝေချန် သိလျှင် ရှဇီရှိူ့ကို အလွန်အလေးထားသော ရှဝေချန်က သေချာပေါက် အလွန်စိတ်ဆိုးလိမ့်မည်။

ကံကောင်းထောက်မစွာဖြင့် ရှချီချီ၏ချစ်သူမှာ ဖုဖေး ဖြစ်နေသည်။

တပ်ကြီးရှစ်၏တပ်မှူးဟာ ကလေးလိုချင်ကာ ဤနှစ်များတွင် မျိုးရိုးဗီဇမွေးမြူခြင်းကို ပြုလုပ်နေခဲ့သော်ငြား မအောင်မြင်ချေ။ ရုတ်တရက် ရှာတွေ့ခဲ့သော ဤဖုဖေးမှာ သူ၏ တစ်ဦးတည်းသော သား ဖြစ်သည်။ သူက ဖုဖေးကို အရမ်းအလေးထားတယ်! 

ဖုဖေးသည် အခြေခံအားဖြင့် သူ၏ တစ်ဦးတည်းသော အမွေဆက်ခံသူ ဖြစ်သည်။

ရှချီချီကိုလည်း အမြန်ရှာတွေ့ခဲ့သည်။

ရှအိမ်၏ မျိုးရိုးလေးဆက်မြောက်တွင် ရှချီချီဟာ ခုနစ်ယောက်မြောက် ဖြစ်ပြီး ဤနှစ်၌ ၁၉ နှစ်သာ ရှိသေးသည်။

သူ(မ)သည် ယခင်က စိတ်စွမ်းအင်အဆင့် နိမ့်ပါးပြီး သာမန်ရုပ်ရည်သာ ရှိခဲ့၏။ သူ(မ)ဟာ လုံးဝကို မထူးခြားပေ။ သို့သော် လွန်ခဲ့သော နှစ်နှစ်မှစ၍ သူ(မ)ဟာ ရုတ်တရက် နည်းနည်းချင်း ပြောင်းလဲလာသည်။

သူ(မ)၏စိတ်စွမ်းအင်က ပိုပိုအားကောင်းလာပြီး သူ(မ)၏အသွင်အပြင်ကလည်း ပိုပိုပြီး တောက်ပလာ၏။

ယခု အပြင်ဘက်မှ ရှချီချီ ဝင်လာသောအခါ တစ်ခန်းလုံးမှာ အနည်းငယ် လင်းလက်သွားပုံရသည်။

အဘိုးရှသည် သူ(မ)၏ ပြီးပြည့်စုံသော မျက်နှာကို မြင်လိုက်ရပြီး သူ့စိတ်နှလုံးထဲမှ လာသော ပျော်ရွှင်မှုခံစားချက်ကို ခံစားလိုက်ရကာ သူ့စိတ်စွမ်းအင်ကလည်း များစွာ ပိုမိုချောမွေ့လာသည်အား ခံစားလိုက်ရ၏။

ဒါက အဆင့် S အကူဆရာရဲ့ မှော်အစွမ်းလား?

အဘိုးရှသည် ရှချီချီကို ကြင်နာစွာ ကြည့်ပြီး ရှဝေချန်၏ ပြန်လည်ရောက်ရှိလာမှု အကြောင်းကို ပြောပြသည်။

ရှချီချီ အံ့ဩသွားသည် : “ ဒုတိယဦးလေး ပြန်‌လာတယ်? ဘယ်လိုလုပ် ဖြစ်နိုင်မှာလဲ?! ”

မည်သို့ပင်ဖြစ်စေ၊ ရှဝေချန်က အဘိုးရှ၏ တန်ဖိုးအထားရဆုံး မြေး ဖြစ်ပြီး ရှချီချီက အပြင်သို့ လက်ထပ်ချင်နေသူ ဖြစ်သည်။ ရှဝေချန်အား အသက်ရှင်မနေစေချင်သကဲ့သို့ ရှချီချီက ပြောသည်ကို ကြားလိုက်ရသော် အဘိုးရှသည် အနည်းငယ် မပျော်မရွှင် ဖြစ်သွားသည်။

သို့သော်လည်း သူသည် ၎င်းကို မပြသဘဲ ရှချီချီအား ဖုဖေးကို ကြိုတင်ပြောပြရန်နှင့် ရှဝေချန်ကိုလည်း ရှဇီရှိူ့နှင့်ယန်ကျင်းဇီတို့အကြောင်း ရှင်းပြရန်သာ မှာကြားလိုက်သည်။

တကယ်တော့ ရှဇီရှိူ့ကသာ ယန်ကျင်းဇီနှင့် လက်မထပ်ရသေးလျှင် သူသည် ရှဇီရှိူ့ကို ချက်ချင်း ပြန်ခေါ်ကာ အခြားလူတစ်ယောက်ကို ထပ်ပို့လိုက်မည်ဖြစ်သည်။ သို့ရာတွင် ရှဇီရှိူ့က ယန်ကျင်းဇီနှင့် လက်ထပ်ပြီးဖြစ်ရာ ဤကိစ္စကို ကိုင်တွယ်ရန် ခက်ခဲလိမ့်မည်ပင်။

သို့သော် ဤကိစ္စကို ဖုဖေး လုပ်ဆောင်ခဲ့ပြီး သူတို့ကိစ္စ မဟုတ်ပေ။

အဘိုးရှက တာဝန်ရှိမှုကို အရေးမစိုက်သော်လည်း ဤအချိန်တွင်မူ ရှချီချီက တွေးငေးနေဆဲဖြစ်သည်။

ရှချီချီသည် ရှဝေချန် မသေသေးဟု မထင်ထားပေ။ စာအုပ်နောက်ပိုင်းတွင် သူတို့က ရှဝေချန်၏အခြေအနေကို သွားရောက်စုံစမ်းကြသည်။ စာအုပ်ထဲမှာတော့ ရှဝေချန်ရဲ့ ပျောက်ဆုံးမှုက အရာရှိအပေါင်းအသင်းတစ်ယောက်ရဲ့ လျှို့ဝှက်ချက်ကို ရှာတွေ့မိလို့ အသတ်ခံလိုက်ရတာမလား? သူ သေသွားတာ အရမ်းကြာသင့်နေပြီ... 

အမှန်ပင်၊ စာအုပ်ထဲမှာ။

ရှချီချီသည် စာအုပ်တစ်အုပ်ထဲသို့ ကူးပြောင်းလာခဲ့သည်။

သူ(မ)သည် ယခင်ဘဝက သာမန်အထက်တန်းကျောင်းသူလေးတစ်ဦး ဖြစ်သည်။ ကောလိပ်ဝင်ခွင့်စာမေးပွဲပြီးသောအခါတွင် သူ(မ) စိတ်ကြိုက်နေခဲ့သည်။ မနက်အိပ်ရာနိုးပြီးနောက် သူ(မ)သည် နေ့စဉ်နေ့တိုင်း ဝတ္ထုများကို လောဘတကြီး ဖတ်ရှုခဲ့ကာ တစ်နေ့၌ သူ(မ) နိုးလာသောအခါ သူ(မ) ကူးပြောင်းလာသည်ကို တွေ့လိုက်ရသည်။

သူ(မ) ရောက်လာသည်မှာ မနေ့ညက သူ(မ) ဖတ်နေသော ဇနီးပိုးပန်းသည့် ဝတ္ထုတစ်ပုဒ် ဖြစ်နေသေးသည်။

ဤဝတ္ထု၏ ဇာတ်လိုက်များမှာ ရှဇီရှိူ့နှင့် ဖုဖေးတို့ ဖြစ်သည်။

ရှဇီရှိူ့သည် ဆန်ကုန်မြေလေးများစွာ ရှိသော အလွန်ရှုပ်ထွေးသည့် ရှမိသားစုတွင် မွေးဖွားခဲ့သော်ငြား သူ့မိဘများက သူ့ကို ချစ်မြတ်နိုးသဖြင့် ငယ်ငယ်ကတည်းက ရှအိမ်တွင် တစ်ခါမှ မနေခဲ့ရချေ။

ကလေးဘဝတွင် ပထမဆုံးအကြိမ် စမ်းသပ်စစ်ဆေးသောအခါ သူက အဆင့် B အကူဆရာတစ်ဦး ဖြစ်ကြောင်း တွေ့ရှိခဲ့သည်။ သူ၏ ပေါ်လွင်သော ရုပ်ရည်နှင့်ပါ ထပ်ပေါင်းလိုက်သော် သူဟာ သက်တူရွယ်တူ စစ်သည်တော်များထံမှ ပိုးပန်းခံရသည်။

သေချာတာပေါ့၊ သူက အလွန့်အလွန် အရမ်းလှပသဖြင့် စစ်သည်တော်အများအပြားက သူ့ကို ပိုးပန်းကြသကဲ့သို့ သူ့ကို မုန်းတီးသူများလည်း များစွာရှိ၏။

သို့သော် သူက တည်ငြိမ်ပြီး သူ့ပန်းတိုင်ကို အရောက်လှမ်းရန် အလုပ်ကြိုးစားနေခဲ့သည်။

ဤကာလအတွင်းတွင် သူ၏ အလယ်တန်းကျောင်း အတန်းဖော် ဖုဖေးက သူ့ကို ချစ်မိသွားပြီး တစ်ညမှာ လာတွေ့ရန် မေးထားသော ရည်းစားစာကို သူ့ထံသို့ ပေးပို့ရန် လူတစ်ဦးကို အကူအညီတောင်းခဲ့၏။ 

ထိုအချိန်၌ ဖုဖေးကို သူ့ဖခင် လာ‌မခေါ်သေးချေ။ သူသည် ထူးချွန်ထက်မြက်သော အရည်အချင်းရှိသည့် မိဘမဲ့ကလေးတစ်ဦးသာ ဖြစ်သည်။ သို့သော် သူ့ကို နှစ်သက်သူမှာ များစွာရှိနေဆဲပင်။ သူ့ကို ကူညီ၍ ရှဇီရှိူ့ထံသို့ ရည်းစားစာ ပို့ပေးသူမှာ သူ့ကို သဘောကျသောကြောင့် ၎င်းစာကို ရှဇီရှိူ့အား မပေးခဲ့ပေ။

ဖုဖေးသည် ရှဇီရှိူ့ကို ‌မတွေ့ရဘဲ တစ်ညလုံး စောင့်ဆိုင်းနေခဲ့ရပြီး ရှဇီရှိူ့ထံမှလည်း စကားတစ်ခွန်းပင် မရရှိခဲ့‌ချေ။

သူသည် ထိုအချိန်တွင် အလွန်သိမ်ငယ်တတ်ပြီး ရှဇီရှိူ့ကို မမေးရဲသော်လည်း သူ့ရည်းစားစာ ပို့ပေးသူကိုသာ မေးဝံ့ခဲ့သည်။ ရှဇီရှိူ့တွင် မြင့်မားသော အမြင် ရှိပြီး ဖုဖေးကဲ့သို့ မိဘမဲ့များကို အထင်သေး‌သည်ဟု ဆိုလျက် ထိုလူက ရှဇီရှိူ့နှင့်ပတ်သက်ပြီး မကောင်းပြောခဲ့၏။

ဖုဖေးသည် အလွန်နာကျင်သွားပြီး ရှဇီရှိူ့ကို ဘယ်တော့မှ ထပ်မဆက်သွယ်တော့ပေ။

ထို့နောက် တစ်နှစ်အကြာတွင် ဖုဖေးကို တပ်ကြီးရှစ်၏ တပ်မှူးက အသိအမှတ်ပြုခဲ့သည်။ တစ်ချိန်တည်းတွင် ရှဇီရှိူ့၏ဖခင်က မစ်ရှင်တစ်ခုအတွင်း ရုတ်တရက် ပျောက်ကွယ်သွားသည်။

ရှဇီရှိူ့၏မိခင်သည် ရှဇီရှိူ့၏ဖခင်က အသက်ရှင်နေသေးသည်ဟု ခံစားမိသဖြင့် သူ(မ)သည် ရှဇီရှိူ့အား အကူအညီတောင်းရန် လူရှာခိုင်းခဲ့သည်။ ရှဇီရှိူ့သည် ဖုဖေးကို အကူအညီတောင်းခဲ့သော်ငြား ဖုဖေးက နားလည်မှုလွဲခဲ့၏။

ဖုဖေး၏အတွေးမှာ သူက မိဘမဲ့ မဟုတ်တော့သည့်အပြင် ထင်ရှားသော မိသားစုနောက်ခံ ရှိနေသဖြင့် ရှဇီရှိူ့က သူနှင့် အတူရှိချင်ပြီး ဖခင်ကို ရှာဖွေရန် ဟူသော အကြောင်းပြချက်အောက်တွင် သူ့ကို လာဆက်သွယ်သည်ဟုပင်။

ဖုဖေးက ရှဇီရှိူ့ကို ရွှေကိုးကွယ်သည်ဟု ဒေါသတကြီး စွပ်စွဲပြောဆိုခဲ့သည်။

သူက တပ်ကြီးရှစ် တပ်မှူး၏ သား ဖြစ်ပြီး လူများစွာက ဝန်းရံထားသည်။ သူ့တွင် ရှဇီရှိူ့ထံသို့ ဆိုးရွားသော သဘောထား ရှိသည်ကို တွေ့သော် သူတို့အားလုံးက ရှဇီရှိူ့ကို ပစ်မှတ်ထားကြပြီး ရှဇီရှိူ့၏ဘဝက ရုတ်တရက် ခက်ခဲသွားသည်။

ဖုဖေး၏သဘောထားကြောင့်ပင် မူလက ရှဇီရှိူ့ကို ကူညီရန် စီစဉ်ထားသူတို့မှာ ကူညီရန် ကြောက်ရွံ့သွားကြသည်။

ရှဇီရှိူ့တွင် အကူအညီတောင်းစရာ မရှိတော့ဘဲ ငွေကိုလည်း ရှမိသားစုက လိမ်လည်သွားသည်။ သူ၏ နေမကောင်းသော ညီက ဆေးကုသမှုအတွက် ငွေများစွာ လိုအပ်နေသည်။ သူ့ညီအတွက် ငွေရှာရန် သူသည် စစ်သည်တော်များကို ကူညီသော အချိန်ပိုင်းအလုပ်သာ လုပ်ဆောင်နိုင်သည်။

ဖုဖေးသည် ရှဇီရှိူ့က အရှက်မဲ့ပြီး သူ့အာရုံကို ဆွဲဆောင်ရန် ထိုအရာများကို အသုံးပြုချင်သည်ဟု ထင်သည်။ သူသည် တကယ်ပင် အလွန်သဝန်တိုသဖြင့် ရှဇီရှိူ့ အလုပ်လုပ်သော နေရာသို့ သွားကာ ရှဇီရှိူ့ကို ဖမ်းဆွဲလိုက်သည်။ သူသည် ရှဇီရှိူ့ကို အကျဉ်းချရန်ပင် ကြိုးစားခဲ့ပြီး ရှဇီရှိူ့ကိုလည်း မကောင်းကြံခဲ့သည်။

သို့ရာတွင် ရှဇီရှိူ့က အသေအကြေ တိုက်ခိုက်ခဲ့ပြီး ဤဖြစ်စဉ်၌သာ ဖုဖေးသည် ရှဇီရှိူ့က သူ၏ လိုက်လံပိုးပန်းမှုကို လုံးဝ မသိဘဲ ထိုရည်းစားစာကိုလည်း လုံးဝ မရရှိခဲ့ကြောင်း သိလိုက်ရသည်။

ဖုဖေးသည် သူ့ကို လိမ်ခဲ့သူအား သင်ခန်းစာပေးခဲ့ပြီး ရှဇီရှိူ့ကို သူ လေးလေးနက်နက် ချစ်မိနေမှန်းလည်း တွေ့ရှိသွားသည်။ ရှဇီရှိူ့က လူအများကြီးအတွက် စိတ်စွမ်းအင်လမ်းညွှန်မှု လုပ်ပေးဖူးလျှင်တောင်မှ သူသည် ရှဇီရှိူ့ကို လက်မလွှတ်နိုင်ဘဲ ရှဇီရှိူ့ကို နောက်တစ်ကြိမ် စတင်ပိုးပန်းပြန်သည်...

နောက်ပိုင်းမှာ ဤစာအုပ်၏အနှစ်သာရ ဖြစ်သော ဇနီးပိုးပန်းမှုပင်။

စာအုပ်ထဲမှ ဖုဖေးဟာ အထူးစိတ်ဆင်းရဲစရာကောင်းသည်။ သူက ရှဇီရှိူ့အတွက် အများအပြား လုပ်ပေးခဲ့သော်လည်း ရှဇီရှိူ့က မတုန်လှုပ်ပေ။

သူက ရှဇီရှိူ့၏ညီအတွက် ‌ဆေးဖိုးပေးခဲ့ပြီး ရှဇီရှိူ့က သူ့ကို ပြန်ပေးခဲ့သည်။

သူက ရှဇီရှိူ့အတွက် အလုပ်ရှာပေးထားသော်ငြား ရှဇီရှိူ့က လုံးဝ မသွားပေ။

ဤကာလအတွင်းတွင် ဖုဖေးသည် ရှဇီရှိူ့၏ဖခင်အတွက်လည်း ကူညီလက်စားချေပေးခဲ့သည်။ ရှဇီရှိူ့၏ဖခင်ကို ဒုက္ခပေးခဲ့သူမှာ ထိုက်တန်သော ပြစ်ဒဏ်ကို ရရှိသွားခဲ့၏။ ရှဇီရှိူ့က သူ့ကို ကျေးဇူးတင်သော်လည်း သူနှင့်တွဲရန် ငြင်းနေဆဲပင်။

ဖုဖေးသည် အကူအညီမဲ့နေခဲ့သည်။ ဤအချိန်၌ နှစ်များစွာကြာအောင် ကြယ်တာရာ မဟာမိတ်တို့၏ လူသားများနှင့် တိုက်ခိုက်ခဲ့သည့် ကြောက်မက်ဖွယ် အာကာသသတ္တဝါများ ဖြစ်သော Zerg တို့သည် ကြယ်တာရာ မဟာမိတ်၏ နယ်ပယ်အတွင်းတွင် နောက်တစ်ကြိမ် ပြန်ပေါ်လာကြပြန်သည်။

ရှဇီရှိူ့နှင့်ဖုဖေးတို့က စစ်မြေပြင်သို့ အတူသွားခဲ့ကြသည်။ လူတိုင်း သိလိုက်ရတာက တပ်ကြီးရှစ်ရဲ့တပ်မှူး၊ ဖုဖေးရဲ့အဖေက ကြယ်တာရာ မဟာမိတ်ရဲ့ လျှို့ဝှက်အဆန်းကြယ်ဆုံး Marshal ဖြစ်နေတာကိုပဲ!

Marshal အရှင်သည် မရေမတွက်နိုင်သော လုပ်ငန်းများကို ပိုင်ဆိုင်ထားပြီး ကြယ်တာရာ မဟာမိတ်၏ စစ်တပ်တစ်ခုလုံးကို ထိန်းချုပ်ထားကာ မြင့်မားသော အဆင့်အတန်း ရှိသည်။ သူ၏အမွေဆက်ခံသူ ဖုဖေးသည်လည်း အနာဂတ်တွင် Marshal ဖြစ်လာလိမ့်မည်။ ကြယ်တာရာ မဟာမိတ် တစ်ခုလုံးမှာ အမြင့်မြတ်ဆုံးပုဂ္ဂိုလ်ပဲ!

သို့သော် ရှဇီရှိူ့က သူ့ကို ငြင်းဆိုနေဆဲ။

ဖုဖေးသည် စစ်မြေပြင်တွင် ဒဏ်ရာရခဲ့ပြီး သူ့စိတ်စွမ်းအင်က အထိန်းကွပ်မဲ့ခဲ့သည်။ ရှဇီရှိူ့သည် သူ့ကို ကူညီ၍ သူ့စိတ်စွမ်းအင်ကို ဖြီးသင်ပေးရန် လိုလားသော်လည်း သူနှင့်နှောင်ကြိုးဖွဲ့ရန် မလိုလားချေ။

ဇာတ်လမ်းသည် ဤနေရာတွင် မပြတ်သားသော အဆုံးသတ်ဖြင့် ပြီးဆုံးသွားသည်။

ရှချီချီသည် အစပိုင်းတွင် ရှဇီရှိူ့အတွက် စိတ်မကောင်းဖြစ်မိသော်ငြား နောက်ပိုင်းတွင်မူ သူ(မ)သည် ရှဇီရှိူ့အတွက် ပေးဆပ်နေသော ဖုဖေးအတွက်သာ စိတ်မကောင်းဖြစ်မိသည်။

သူ(မ) နားမလည်ပေ။ ဖုဖေးက အများကြီး လုပ်ပေးခဲ့သည်။ ဘာကြောင့် ရှဇီရှိူ့က ငြင်းဆိုနေရသေးသနည်း။

ဖုဖေးက မဟာမိတ်ရဲ့ အနာဂတ် Marshal လောင်းပဲ! ဇာတ်လမ်းအဆုံးမှာ သူက အဆင့် SS စစ်သည်တော် ဖြစ်နေပြီ။ ရှဇီရှိူ့ကရော? ရှဇီရှိူ့က စာအုပ်ထဲမှာ ပိုသန်မာလာပြီး အဆင့် S ဖြစ်လာသော်လည်း သူ့မိသားစုနောက်ခံက ဖုဖေးထက် များစွာနိမ့်ကျသည်။

သူက ဘာလို့ ဖုဖေးနဲ့ မတွဲရတာလဲ?

ဇာတ်သိမ်းတွင် ရှဇီရှိူ့က အခြားသူများ၏ စိတ်စွမ်းအင်ကို ကူညီဖြီးသင်ပေးပြီး ဖုဖေးက ဘေးနား၌ ကြည့်နေရုံသာ တတ်နိုင်ကာ သဝန်တိုစိတ်ဖြင့် ရူးသွပ်နေသည်ကို တွေ့ရသောအခါ... ရှချီချီ ဝမ်းနည်းစွာ ငိုကြွေးမိသည်။

စာအုပ်ဖတ်ပြီးချိန်တွင် သူ(မ) စိတ်ဆိုးလွန်းသောကြောင့် ဖြစ်နိုင်သည်။ ရှချီချီသည် ကူးပြောင်းလာပြီး ဤစာအုပ်၏ မထင်မရှား ဇာတ်ပို့ငယ်လေး ဖြစ်လာသည်။ သူ(မ)က အရွယ်ရောက်သောအခါ မိုင်းပိုင်ရှင်တစ်ဦးနှင့် လက်ထပ်ခဲ့ပြီး ရှအိမ်တော်၏ သခင်မလေးခုနစ်၊ ရှချီချီဟာ စာအုပ်ထဲတွင် တစ်ခါမှ ပေါ်မလာတော့ချေ။

ဒါပေမယ့် ကူးပြောင်းလာတဲ့ ရှချီချီမှာ ရွှေလက်ချောင်း ရှိတယ်! သူ(မ) ကူးပြောင်းပြီးနောက် သူ(မ)၏စိတ်စွမ်းအင်မှာ အဆင့် S ဖြစ်လာကာ သူ(မ)က ပိုပိုပြီး လှပလာသည်...

ဤစာအုပ်ထဲတွင် သူ(မ)၏အကြိုက်ဆုံးမှာ ဖုဖေး ဖြစ်ပြီး ကူးပြောင်းလာချိန်တွင် ရှဇီရှိူ့၏ဖခင်က မသေသေးဘဲ ဖုဖေးကလည်း ရှဇီရှိူ့ထံသို့ ရည်းစားစာ ပို့ပြီး ရှဇီရှိူ့ကို အထင်လွဲသွားပြီးဖြစ်သည်။

သူ(မ)သည် ဇာတ်ကြောင်းကို မဖျက်ဆီးဝံ့သဖြင့် ရှဝေချန်ကို သတိမပေးခဲ့သော်ငြား ဖုဖေးကို တိတ်တဆိတ် ဆက်သွယ်ကာ နောက်ဆုံးတွင် ဖုဖေးက သူ(မ)ကို နှစ်သက်သွားပြီး သူ(မ)နှင့် တွဲခဲ့သည်။

သူတို့သည် နှောင်ကြိုးမဖွဲ့ထားသော်လည်း လက်ထပ်ရန် ဆွေးနွေးနေပြီဖြစ်သည်။ ဤအချိန်တွင် သူ(မ)၏စေ့စပ်ထားသူ မိုင်းပိုင်ရှင်က ရုတ်တရက် ပေါ်လာသည်...

ထိုအချိန်တွင် သူ(မ)သည် ရှဇီရှိူ့ကို တွေးမိလိုက်သည်။

မိုင်းပိုင်ရှင်က ဖုဖေးထက် အများကြီး နိမ့်ကျပေမယ့် ချမ်းသာတယ်!

ရှဇီရှိူ့က လူများစွာ၏စိတ်စွမ်းအင်ကို ကူညီဖြေရှင်းပေး‌ခဲ့သောကြောင့် သူက မြို့တော်တွင် ကောင်းမွန်သည့် လက်တွဲဖော်ကို မရှာနိုင်တော့ချေ။ ဒီလိုဆိုမှတော့ မိုင်းပိုင်ရှင်ကို လက်ထပ်လိုက်တာ မကောင်းဘူးလား?

သူ(မ)ဆန္ဒအတိုင်း ရှဇီရှိူ့က မိုင်းပိုင်ရှင်နှင့် လက်ထပ်လိုက်သည်။ ဖုဖေးက အမှန်တရားကို မသိဘဲ ရှဇီရှိူ့ကို အလွန်မုန်းကာ သူတို့နှစ်ယောက်အတွက် တိုက်ရိုက်ပင် လက်ထပ်မှတ်ပုံတင်ပေးခဲ့သည်။

သူ(မ) ပျော်နေပေမယ့် ဒီအချိန်မှာ ရှဝေချန်က တကယ်ကြီး ပြန်လာတယ်လား?

သူက သေသင့်ပြီမဟုတ်လား? ဘာလို့ ပြန်လာတာလဲ?

ရှဇီရှိူ့၏ဖခင်က ဆုံးပါးသွားပြီဟု တွေးမိသောကြောင့် ရှချီချီသည် စာအုပ်ထဲတွင် ပျောက်ဆုံးနေသော ဖခင်ကို လိုက်ရှာနေသည့် ရှဇီရှိူ့က တုံးအသည်ဟု အမြဲ‌တွေးခဲ့သည်... သို့သော် ရှဇီရှိူ့၏ဖခင်က မသေသေးချေ။

စာအုပ်ထဲတွင် ရှဝေချန်၏ပျောက်ဆုံးချိန် တစ်နှစ်ကျော်၌ ရှဇီရှိူ့က ဖုဖေးထံမှ အကျဉ်းချခံရကာ လွတ်မြောက်ပြီးနောက် ရှဇီရှိူ့၏ဖခင် ဆုံးပြီဟု ပြောလျက် ရှဇီရှိူ့၏မိခင်က သူ့ဖခင်အား လိုက်မရှာတော့ရန် သူ့ကို ပြောခဲ့သည်... အဲ့အချိန်ကျမှ ရှဇီရှိူ့ရဲ့အဖေက တကယ် သေသွားတာများလား?

ဒါဆို အရင်တုန်းက ရှဇီရှိူ့ကို လူဝိုင်းရှာပေးဖို့ ငြင်းခဲ့တဲ့ ဖုဖေးက မှားခဲ့တာလား?

မဟုတ်ဘူး၊ အဲ့လိုပြောလို့မရဘူး။ ရှဇီရှိူ့ရဲ့အဖေ မသေသေးတာ ဖုဖေး မသိဘူး!

ရှချီချီသည် အလျင်အမြန် အသိပြန်ဝင်လာသည်။

မည်သို့ပင်ဖြစ်စေ သူ(မ)သည် ဖုဖေးနှင့် တွဲနေပြီးဖြစ်ရာ ဘယ်တော့မှ လက်လွှတ်နိုင်မည်မဟုတ်ပေ။

သူ(မ)က အဆင့် S အကူဆရာ ဖြစ်ပြီး အနာဂတ်တွင် ဖုဖေးက အဆင့် SS စစ်သည်တော် ဖြစ်လာလိမ့်မည်။ သူ(မ)တို့က နတ်ဖက်သည့်ဖူးစာ ဖြစ်သည်။

ပိုမိုအရေးကြီးသည်မှာ ဖုဖေးက အနာဂတ်တွင် ကြယ်တာရာ မဟာမိတ်၏ အစွမ်းအကြီးဆုံးနှင့် အဆန်းကြယ်ဆုံး Marshal ဖြစ်လာမည်ပင်။ အဲ့တော့ သူ(မ)ကလည်း Marshal ရဲ့ ဇနီး ဖြစ်လာမှာပဲ!

“ ချီချီ၊ ဒါမှမဟုတ် ဖုဖေးကို ဇီရှိူ့ရဲ့ အိမ်ထောင်ရေးမှတ်တမ်းကို ဖျက်ခိုင်းလိုက်ပါလား? ” အဘိုးရှက ထပ်ပြီး အဆိုပြုသည်။

ရှချီချီက ဆိုသည် : “ အဘိုး၊ ဝမ်းကွဲက လက်မထပ်ချင်ဘူးဆိုရင် ကွာရှင်းလို့ရတာပဲ‌လေ။ ”

Interst

ellar ခေတ်ကြီးမှာ ကွာရှင်းတာက အရမ်းလွယ်တယ်! ဖုဖေး ထိုသို့လုပ်ရန်မှာ မလိုအပ်ချေ။

တကယ်တော့ သူ(မ)သည် ဖုဖေးကို ရှဇီရှိူ့နှင့် မနီးကပ်စေချင်ပေ။ ဖုဖေး၏ ရှဇီရှိူ့အတွက် အချစ်ဟောင်းက ပြန်လည်ရှင်သန်လာမည်အား သူ(မ) ကြောက်သောကြောင့် ဖြစ်၏။

ရှဇီရှိူ့က... တကယ်ပဲ ကြည့်ကောင်းလွန်းတယ်!