အပိုင်း ၁၅၉ ( Mine Owner 8 )

Kamil ဂြိုဟ်သည် ကြယ်မြို့တော်နှင့် အလွန်နီးကပ်ပြီး Allen က သေးငယ်သော်ငြား မြန်ဆန်သည့် ယာဉ်တစ်စင်းကို ပြင်ဆင်ထားသောကြောင့် နေ့တစ်ဝက်အတွင်းတွင် သူတို့သည် မြို့တော်သို့ ရောက်ရှိခဲ့သည်။

အာကာသယာဉ်ပေါ်တွင် ရှိနေစဉ် ရှဇီရှိူ့သည် အလွန်စိတ်လှုပ်ရှားနေခဲ့ပြီး ယန်ကျင်းဇီတောင်မှ သူနှင့်ထပ်တူထပ်မျှ စိတ်လှုပ်ရှားနေသည်။ ရှဇီရှိူ့၏ခံစားချက်များ သက်သာစေရန်အတွက် ယန်ကျင်းဇီသည် ရှဇီရှိူ့နှင့် သူ့ဖခင်အကြောင်းကို စကားပြောခဲ့ကြသည်။

ရှဇီရှိူ့၏ဖော်ပြချက်အရ ရှဝေချန်သည် သူ့ကို အလွန်ကောင်းမွန်စွာ ဆက်ဆံပြီး သူ့ကို အလွန်လည်း ချစ်ခင်သည်။ ရှဝေချန် ရှိနေခဲ့သော အချိန်များ၌ ရှဇီရှိူ့သည် မည်သည့်နစ်နာမှုကိုမျှ မခံစားခဲ့ရသော်လည်း ရှဝေချန် ပျောက်ဆုံးသွားချိန်မှစ၍ ရှဇီရှိူ့သည် ကြီးမားသော ဖိအားကို တစ်နှစ်တာ ခံစားခဲ့ရသည်။ 

ယခုအချိန်တွင် အားကိုးစရာလူတစ်ဦး ရှိနေသောကြောင့် ဖြစ်နိုင်သည်၊ ယခင်က ဘယ်သူ့ကိုမှ မတိုင်တန်းခဲ့ဖူးသော ရှဇီရှိူ့သည် မနေနိုင်ဘဲ ထုတ်ပြောမိသည် : “ ဟိုလူယုတ်မာ ဖုဖေး၊ သူ ဘာဖြစ်မှန်း ငါ မသိဘူး။ ငါ့ကို အမြဲတမ်း ဒုက္ခပေးတယ်! ”

ရှဇီရှိူ့သည် တကယ်ပင် ကျိန်ဆဲချင်သော်လည်း ယန်ကျင်းဇီတွင် ကောင်းမွန်သော အမြင်ကို ချန်ရစ်ရန်အတွက် စကားပြန်ထိန်းခဲ့သည်။

သို့ရာတွင် သူ့စိတ်စွမ်းအင်ကမူ ဖုဖေးအတွက် ရွံရှာမှုကို ရှင်းရှင်းလင်းလင်း ဖော်ပြနေဆဲ ဖြစ်သည်။

တကယ်တော့ သူ၏ ယခုတလော နာမည်ဆိုးဖြင့် ကျော်ကြားမှုမှာ ဖုဖေးကြောင့်ပင် လုံးလုံးနီးပါး ဖြစ်၏။

ဖုဖေးက အဆင့် S စစ်သည်တော် ဖြစ်ပြီး တပ်ကြီးရှစ် တပ်မှူး၏ တစ်ဦးတည်းသော သား ဖြစ်သည်။ ဖုဖေးကို ဖော်လံဖားချင်သူ မည်မျှရှိကြောင်း မသိနိုင်ချေ။

ဖုဖေးက သူ့ကို မုန်းတီးပြီး သူက ငွေကိုးကွယ်ကာ မျက်နှာများသူဟု ဆိုသည်။ အခြားသူများက ဖုဖေး၏စကားများကို သံယောင်လိုက်ကြသည်။ ဖုဖေးက သူ့ကို မုန်းတီးကြောင်း ရှာတွေ့ပြီးနောက် အခြားသူများက ဖုဖေး စိတ်ကျေနပ်စေရန်အတွက် သူ့ကို တမင်တကာ ပစ်မှတ်ထားကြ၏။

ထိခိုက်သူမှာ သူတင်မဟုတ်ဘဲ သူ့မိခင်နှင့် သူ့ညီတို့ကိုလည်း သက်ရောက်ကာ ရှဇီရှိူ့သည် ဖုဖေးကို အသေမုန်းသည်။

ကံမကောင်းသည်မှာ ဖုဖေး၏အဆင့်အတန်းက မြင့်မားလွန်းနေသဖြင့် ဖုဖေးကို သူ ဘာမှမလုပ်နိုင်ပေ။ ယခင်က ရှမိသားစုတွင် ဖုဖေးကို တွေ့ခဲ့ရသည့်အချိန်၌ပင် သူသည် ဖုဖေးကို ပြုံးပြခဲ့ရရာ သူ့အတွက် တကယ်ပင် ရွံရှာစရာကောင်းလွန်းသည်။

သူ့ကို ရွံမုန်းစေသည်မှာ သူက လူအများအား သွေးဆောင်ဖြားယောင်းနေသည်ဟု ဖုဖေး၏ ပြောဆိုမှုနှင့် စစ်သည်တော်များကို စိတ်စွမ်းအင်လမ်းညွှန်မှု လုပ်ပေးခြင်းကြောင့် “မသန့်ရှင်း” ဟု သူ့ကို အပြစ်တင်စွပ်စွဲခြင်းတို့ကြောင့် ဖြစ်သည်။

ဖုဖေးက ဒီကမ္ဘာပေါ်မှာ ကျန်ရှိတဲ့ တစ်ယောက်တည်းသော စစ်သည်တော် ဖြစ်ရင်တောင်မှ ဖုဖေးလိုလူမျိုးကို သူ မဆွဲဆောင်ဘူး!

“ စိတ်ချ၊ ကိုယ် မင်းအတွက် လက်စားချေပေးမယ်! ” ယန်ကျင်းဇီက ပြောသည်။

သူ့လက်အောက်ရှိ တပ်ကြီးရှစ်တပ်၏ တပ်မှူးများအနက် အနည်းငယ်က အလွန်ရိုးသားဆဲ ဖြစ်သော်ငြား တပ်ကြီးရှစ်၏ တပ်မှူး Cossack က ရည်မှန်းချက်ကြီးပြီး သေးငယ်သော လုပ်ဆောင်ချက်များစွာ ရှိသည်။

အမှန်ပင်၊ ဤသည်မှာလည်း Cossack ကိုယ်တိုင်က အနည်းငယ် အရည်အချင်းရှိသောကြောင့် ဖြစ်သည်။ သူ တစ်ခုခုဖြစ်လျှင် ဤလူက Marshal ဖြစ်လာနိုင်စွမ်းမှာ အလွန်မြင့်မားသည်။

မူလဇာတ်ကြောင်းမှာ ဒီလူက မူလပိုင်ရှင်ကို သတ်ဖို့ သူ့သားကို ခေါ်လာခဲ့တာပဲမလား? ထိုအချိန်တွင် မူလပိုင်ရှင်က သေဆုံးခဲ့သည်။ နောက်ဆုံးရလဒ်မှာ အားလုံး အတူတကွ သေဆုံးသွားခြင်း ဖြစ်၏။ အဓိကအကြောင်းအရင်းမှာ အဆင့် S အကူဆရာ ရှချီချီက သူ၏ စိတ်စွမ်းအင် အထိန်းကွပ်မဲ့မှုကို လုံးဝ မကုသပေးနိုင်မှန်း သိရှိပြီးနောက် မူလပိုင်ရှင်က ရူးသွပ်သွားပြီး သူ၏ စစ်နတ်ဘုရား mecha (မက်ခါစက်ရုပ်) ကို ဖောက်ခွဲပစ်လိုက်သောကြောင့် ဖြစ်၏။

ဤမက်ခါစက်ရုပ်တွင် အစုလိုက်အပြုံလိုက် ဖျက်ဆီးနိုင်သော လက်နက်များ ရှိပြီး ဂြိုဟ်တစ်လုံးကို သတ်ရန်ပင် ပြဿနာမရှိချေ။ သဘာဝကျစွာပင် Cossack နှင့် အခြားသူများလည်း အသက်မရှင်နိုင်ဘဲ မူလပိုင်ရှင်ဘက်မှ လူများသည်လည်း ရှင်းလင်းစွာ သေဆုံးသွားကြသည်။

သေချာတာပေါ့၊ ယခုမူ အရာအားလုံး ပြောင်းလဲသွားချေပြီ။

ရာသီဥတုအေးလာပြီ၊ တပ်ကြီးရှစ်ရဲ့တပ်မှူးကို ပြောင်းဖို့ အချိန်ကျပြီ!

“ မလုပ်နဲ့။ အနာဂတ်မှာ ဖုဖေးနဲ့ မပတ်သက်ပဲနေရအောင်။ ” ရှဇီရှိူ့က ဆက်ပြောသည် : “ သူက အရူးတစ်ယောက်ပဲ။ သူ့ကို သွားရှုပ်တဲ့သူတိုင်း ကံမကောင်းဖြစ်လိမ့်မယ်။ ” 

“ မင်းသဘောပါပဲ ” ယန်ကျင်းဇီ ပြုံးလိုက်သည်။ သူက ဖုဖေးနှင့် မရင်ဆိုင်နိုင်မည်ကို ရှဇီရှိူ့ ကြောက်ရွံ့သဖြင့် ဤသို့ပြောကြောင်း သူ သိသည်... အခြားဘာမှမပြောမီ ဖုဖေး၏ဖခင်ကို သူ ဖြေရှင်းပြီးသည့်အထိ စောင့်ဆိုင်းရုံပင်။

“ ငါ မင်းနဲ့ စကားပြောပြီးနောက် ပိုပျော်သွားတယ်။ ” ရှဇီရှိူ့က ပြုံးရယ်သည် : “ သူ လုပ်တာတွေက အကုန်လုံးတော့ မဆိုးပါဘူး... ငါတို့ လက်ထပ်ဖြစ်တာက သူ လုပ်တာ ဖြစ်လောက်တယ်။ အဲ့ဒါက ငါတို့ ဆက်သွယ်ဖြစ်ဖို့ကို အကူအညီပေးလိုက်သလိုပဲလေ။ ”

“ ဟုတ်တယ် ” ယန်ကျင်းဇီသည် သူ၏လူသတ်ချင်စိတ်ကို တိတ်တဆိတ် ဖိနှိပ်လိုက်သည် – သူသာ မကူးပြောင်းလာရင် ဖုဖေးရဲ့အပြုအမူတွေက ရှဇီရှိူ့ကို သတ်မိမှာ!

သူ့စိတ်စွမ်းအင်က ရှဇီရှိူ့ထက် များစွာသန်မာသောကြောင့် ဖြစ်နိုင်သည်၊ အချို့သော သူ့စိတ်စွမ်းအင်နှင့် စိတ်ခံစားချက်တို့ကို ဖုံးကွယ်ထားနိုင်ကြောင်း ယန်ကျင်းဇီ ရှာတွေ့ထားသည်။

သေချာတာပေါ့၊ သူသည် ရှဇီရှိူ့အပေါ်ရှိ သူ့ခံစားချက်များကို မဖုံးကွယ်ထားနိုင်ပေ။ သို့သော် သူ၏ အခြားသူများအပေါ် ခံစားချက်များကိုတော့ ဖုံးကွယ်ထားနိုင်သည်။ 

၎င်းက အတော်လေး အဆင်ပြေ၏။

ဒါ့အပြင်... သူနဲ့ နှောင်ကြိုးဖွဲ့ပြီးတဲ့နောက် ရှဇီရှိူ့ရဲ့ စိတ်စွမ်းအင်က ပိုသန်မာလာတယ်!

ယခင်က ရှဇီရှိူ့၏စိတ်စွမ်းအင်အဆင့်မှာ B+ ဖြစ်ပြီး ၎င်းက အဆင့် A နှင့် တကယ်ပင် အလွန်နီးစပ်ကာ အဆင့်တက်ရန် အခွင့်အရေးရှိနေခဲ့သည်။ သူနှင့် နှောင်ကြိုးဖွဲ့ပြီးနောက်တွင်မူ ရှဇီရှိူ့၏စိတ်စွမ်းအင်က B+ မှ A+ သို့ တိုက်ရိုက်တိုးတက်သွားကာ အဆင့် S သို့ ရောက်ရန် အခွင့်အရေးပင် ရှိနေသေးသည်။

သို့သော်လည်း ရှဇီရှိူ့ကိုယ်တိုင်ကမူ သတိမပြုမိသေးချေ။

၎င်းက ကြီးကြီးမားမား ကိစ္စမဟုတ်ဟု ယန်ကျင်းဇီ ထင်မိသဖြင့် မပြောပြတော့ပေ – သူတို့သည် ကြယ်မြို့တော်ဂြိုဟ်သို့ ရောက်ရှိပြီးဖြစ်ကာ အာကာသယာဉ်ပေါ်မှ ဆင်းကြတော့မည်ဖြစ်သည်။

ယာဉ်ပေါ်မှမဆင်းမီ ရှဇီရှိူ့သည် ယန်ကျင်းဇီ၏လက်ကို ဆုပ်ကိုင်လိုက်သည် : “ ခဏလေး! ”

“ ဘာဖြစ်လို့လဲ? ” ယန်ကျင်းဇီက မေးသည်။

“ ငါ့အမေက ယောက်ျားလေးတွေရဲ့ ကိုယ်ပေါ်မှာ ပစ္စည်းတွေ အများကြီး ရှိနေတာ မကြိုက်ဘူး... မင်း မင်းကိုယ်ပေါ်က ပစ္စည်းတွေကို ချွတ်ပြီး အိတ်ကိုလည်း မဝတ်နဲ့။ ” ရှဇီရှိူ့ ပြောလိုက်သည်။

ယန်ကျင်းဇီ၏ အဝတ်အစားများကို သူက များများတွေ့မြင်ရပြီး ကျင့်သားရသွားသော်ငြား သူ့မိခင်ကမူ ၎င်းကို သည်းမခံနိုင်လောက်ချေ...

နည်းနည်းပြင်သွားတာ ပိုကောင်းတယ်!

ယန်ကျင်းဇီမှာလည်း လုံးဝ ထင်မြင်ချက်မရှိဘူး!

သူသည် ချမ်းသာသော အမျိုးသားတစ်ဦး ဖြစ်ရန်အတွက် ဝတ်ဆင်ရမည့် လက်ပတ်နာရီများနှင့် လည်ဆွဲများ မပြတ်လပ်သော်လည်း ရိုးရိုးသားသားပြောရလျှင် ၎င်းတို့ကို ဝတ်ဆင်ရခြင်းအား မနှစ်သက်ပေ။

ဤအရာများကို ယခု ချွတ်ကာ ရွှေရောင်အိတ်ကို ဖယ်ရှားပြီးနောက် သူ့ပုံရိပ်က များစွာပိုကောင်းသွားသည် – ပြီးတော့ သူ့အဝတ်အစားတွေက တံဆိပ်ကြီးကြီးတွေ ရှိနေတဲ့ အမျိုးအစားဆိုရင်တောင်မှ ဒါတွေကို ဘယ်သူကမှ မဝတ်တာမျိုး မဟုတ်ဘူးလေ၊ ဟုတ်တယ်မလား?

ရှဇီရှိူ့သည် ယန်ကျင်းဇီကို ကားပျံထဲသို့ ခေါ်သွားကာ စဉ်းစားပြီးနောက် ယန်ကျင်းဇီ၏ဆံပင်ပုံစံကို သူ့လက်ဖြင့် ပြင်ဆင်လိုက်သည်။

ယန်ကျင်းဇီရဲ့ ပထမဆံပင်ပုံစံက တကယ် မကောင်းဘူး...

ယခုအခါတွင် ရှုပ်ပွနေသော အသုံးအဆောင်များ မရှိတော့ဘဲ ဆံပင်ပုံစံကိုလည်း ပြင်ဆင်ပြီးဖြစ်ကာ ယန်ကျင်းဇီက မျက်စိအမြင်အတွက် ပိုမိုသင့်တော်လာသည်။ အမှန်ပင်၊ ယန်ကျင်းဇီက အနည်းငယ်တော့ တောသူဌေးဆန်နေသေး၏။

ဒါပေမယ့် ဘာမှမဖြစ်ဘူး၊ သူ ကြိုက်တယ်!

ရှဇီရှိူ့သည် ယန်ကျင်းဇီကို ကြည့်မိလေလေ၊ ပိုပိုသဘောကျမိလေလေ ဖြစ်လာကာ မနေနိုင်တော့ဘဲ ရှေ့တိုး၍ ယန်ကျင်းဇီကို နမ်းလိုက်သည်။

နမ်းပြီးနောက် ရှဇီရှိူ့သည် သူ့အပြုအမူကို သတိပြုမိကာ မျက်နှာနီမြန်းသွားရှာသည်။ ထို့နောက် ယန်ကျင်းဇီ၏စိတ်စွမ်းအင်များ ထွက်လာကာ သူ့ကို လွှမ်းခြုံသွားသည်။

ဤစိတ်စွမ်းအင်များကလည်း အဓိပ္ပာယ်တစ်ခုကို ဖော်ပြနေ‌သည် – နောက်တစ်ခေါက်နမ်း။

ရှဇီရှိူ့သည် ရှေ့တိုးကာ ယန်ကျင်းဇီကို ထပ်နမ်းလိုက်ပြီး တစ်ချိန်တည်းတွင် အနည်းငယ် မကျေမနပ်ဖြစ်သွားသည် – ဘာလို့ သူက ယန်ကျင်းဇီကို အရင်နမ်းရတာလဲ? ဘာလို့ ယန်ကျင်းဇီက သူ့ကို လာမနမ်းတာလဲ?

ယန်ကျင်းဇီသည် ရှဇီရှိူ့၏စိတ်ခံစားချက်များကို ချက်ချင်း ခံစားမိပြီး ချက်ချင်း ရှေ့တိုး၍ ရှဇီရှိူ့ကို နမ်းလိုက်သည်။

သူတို့နှစ်ဦး၏ စိတ်စွမ်းအင်များက အတူတကွ ရောထွေးနေပြီး သူတို့က စကားမပြောလေရာ “မင်းက ငါ့ကို နမ်း၊ ငါက မင်းကို နမ်းမယ်” ဖြစ်နေကြသည်။

ကားရှေ့တန်းတွင် ထိုင်နေသော အိမ်တော်ထိန်း Allen : “ ... ” အသက်ငယ်တာ အရမ်းကောင်းတယ်!

ဤသခင်လေးရှဇီရှိူ့က သေချာပေါက် အချစ်ရူးပင်။ သူက သူတို့ရဲ့အရှင်ကို ဘယ်‌လောက်သက်ရောက်လဲ ကြည့်ပါလား? 

ယာဉ်ပျံသည် လျင်မြန်စွာ ရွေ့လျားပြီး ရှဇီရှိူ့၏အိမ်တံခါးရှေ့သို့ ရောက်ရှိရန် သိပ်မကြာလိုက်ချေ။

ဤအိမ်ဟာ ရှမိသားစု၏အိမ် သေချာပေါက် မဟုတ်ဘဲ ရှဝေချန် ဝယ်ထားသော အိမ် ဖြစ်သည်။

ရှဇီရှိူ့သည် ဤနှစ်များအတွင်းတွင် ဤနေရာ၌ နေထိုင်ခဲ့ပြီး ရောင်းချရန် မလိုလားသောကြောင့် သိမ်းဆည်းထားခဲ့ကြသည်။

တကယ်တော့ သူ အိမ်မရောင်းသော နောက်ထပ်အကြောင်းအရင်းလည်း ရှိ၏။

သူတို့ကသာ အိမ်ကို ရောင်းလိုက်လျှင် ရှမိသားစုက ဂုဏ်သိက္ခာမျက်နှာကြောင့် အပြင်တွင် အိမ်ငှား၍ နေထိုင်သော သူတို့ကို လုံးဝဥဿုံ ကန့်ကွက်လိမ့်မည်ဖြစ်ကာ သူတို့အား ရှမိသားစုသို့ ပြန်လာရန် ဖိအားပေးလိမ့်မည်ပင်... အမှန်တော့ ရှမိသားစုက သူတို့ကို ပြန်လာနေရန် အမြဲမျှော်လင့်နေခဲ့သည်။

သို့သော် သူသည် လုံးဝ မပြန်ချင်ပေ။

ရင်းနှီးကျွမ်းဝင်သော အိမ်ကို ယခု မြင်လိုက်ရသောအခါ ရှဇီရှိူ့၏စိတ်နှလုံးသည် ရုတ်တရက် သက်သာရာရသွားသကဲ့သို့ ခံစားလိုက်ရသည်။

“ ဒါက ငါ့အိမ်။ ” ရှဇီရှိူ့က အိမ်ကိုညွှန်ပြလျက် ဆိုသည်။

“ ပန်းခြံက လှတယ်။ ” ယန်ကျင်းဇီ ပြောလိုက်သည်။ မူလပိုင်ရှင်၏မှတ်ဉာဏ်များ ရှိနေသော သူ့အမြင်ထဲတွင် ဤအိမ်က အနည်းငယ် သေးငယ်သော်ငြား ဥယျာဉ်က နှစ်လို့ဖွယ်အလွန်ကောင်းသည်။

“ အင်း၊ ငါ့အမေက ပန်းစိုက်ရတာ ကြိုက်တယ်! ” ရှဇီရှိူ့က ထပ်ပြုံးလိုက်ပြန်ကာ သူ့မျက်ဝန်းများမှာ တလက်လက် တောက်ပနေ၏။

မနေ့တနေ့က သူ့မိခင်သည် တကယ်ပင် အလွန်အဆင်မပြေဖြစ်နေခဲ့သည်။

သူ့လိုပင် သူ့မိခင်သည်လည်း စစ်သည်တော်များအား စိတ်စွမ်းအင် ကူညီဖြေရှင်းပေးသော အလုပ်ကို လုပ်ဆောင်ခြင်းဖြင့် ငွေရှာနေသည်။ သူ(မ)သည် သူ့ညီကိုလည်း ပြုစုစောင့်ရှောက်ရကာ သူ့ဖခင်ကို ပိုမိုလွမ်းဆွတ်နေခဲ့၏။

သူ(မ) ပြိုလဲလုနီးပါးပင်။

သို့သော်ငြား အနာဂတ်တွင်မူ သူ(မ) ထပ်မံပျော်ရွှင်ရမည်မှာ သေချာ၏။

ရှဇီရှိူ့သည် ထိုသို့တွေးမိပြီး သူ့စိတ်စွမ်းအင်က ယန်ကျင်းဇီ၏စိတ်စွမ်းအင်နှင့် ရောထွေးနေလျက်ရှိသည်ကို ရုတ်တရက် တွေ့လိုက်ရသည်။

ဤအပြုအမူဟာ လူမြင်ကွင်းတွင် နမ်းခြင်းနှင့် အမှန်တကယ် ဆင်တူသည်။ သူ့မိခင် မြင်သွားလျှင်...

ရှဇီရှိူ့သည် သူ့စိတ်စွမ်းအင်ကို ပြန်ရုတ်သိမ်းပြီး ယန်ကျင်းဇီ၏လက်ကို ကိုင်လိုက်သည် : “ အထဲဝင်ရအောင်။ ”

သူ့အမေရှေ့မှာ မ“နမ်း”နဲ့၊ လက်တွဲထားကြမယ်!

ရှဇီရှိူ့၏စိတ်စွမ်းအင် ပြန်သိမ်းသွားပြီးနောက် ယန်ကျင်းဇီသည် ဝမ်းနည်းသကဲ့သို့ ခံစားလိုက်ရကာ သူ့စိတ်စွမ်းအင်ကို အားငယ်စွာဖြင့်သာ ပြန်ရုတ်သိမ်းလိုက်ရသည်။

မထင်မှတ်ဘဲ ရှဇီရှိူ့က သူ့လက်ကို အမြန်လာတွဲပြန်သည်။

ဒါလည်း အရမ်းကောင်းတယ်!

ရှဇီရှိူ့၏လက်က နူးညံ့သည်။ သူ လက်ကိုင်ပြီးတော့ မလွှတ်ချင်တော့ဘူး!

ယန်ကျင်းဇီသည် ရှဇီရှိူ့၏လက်ကို စိတ်စွမ်းအင်နှင့် စူးစမ်းကာ ၎င်းတစ်ခုလုံးဖြင့် ရစ်ပတ်ထားလိုက်သည်။

ရှဇီရှိူ့ : “ ... ” ယန်ကျင်းဇီက စိတ်စွမ်းအင်သုံးပြီး သူ့ကို အသားယူနေတာလား?

သူတို့နောက်မှ လိုက်လာသော Allen : “ ... ” သူ့ရှေ့မှ လူနှစ်ဦးက သူ့ကို လုံးလုံးမေ့လျော့သွားပြီဟု သူ ခံစားရသည်။

မထင်ထားစရာက သူ့အရှင်မှာ အခြားသူတွေနဲ့ လက်တွဲပြီး အချိန်မရွေး နေရာမရွေး အချစ်တွေ ပြသတဲ့ နေ့ရက် ရှိလာတာပဲ!

ယန်ကျင်းဇီနှင့် ရှဇီရှိူ့တို့သည် အိမ်ထဲသို့ ချိုမြိန်စွာ ဝင်ရောက်သွားသော်လည်း သူတို့ အထဲရောက်လာသောအခါ သူတို့၏မျက်ခုံးများ တွန့်ချိုးသွားရသည်။

ရှမိသားစုအိမ်သည် ဥယျာဉ်ငယ်တစ်ခု ပါရှိသော နှစ်ထပ်တိုက်ငယ် ဖြစ်သည်။ အိမ်က မကြီးသော်ငြား လှပပြီး အတွင်းပိုင်းကလည်း အလွန်နွေးထွေးသည်။ သို့သော် ဤအခိုက်အတန့်တွင်မူ နွေးထွေးစွာ အလှဆင်‌ထားသော ဧည့်ခန်းထဲ၌ ရှဇီရှိူ့ ရွံရှာသည့် လူအနည်းငယ် ရှိနေသည်။

ရှမိသားစု၏ မိသားစုဝင်များစွာက ဖုဖေးနှင့်အတူ အိမ်ဧည့်ခန်းထဲတွင် ရှိနေကြသည်။

ရှမိသားစုမှ ရှဇီရှိူ့၏ အဘိုးအဘွားများ၊ သူ့ဖခင်နှင့် မျိုးဆက်တူ လူအများအပြားတို့အပြင် ဖုဖေးကို မှီလျက် သူ့ကို သတိနှင့် ကြည့်ရှုနေသော ရှချီချီပင် ရှိနေ၏။

ရှဇီရှိူ့သည် ယခုအချိန်၌ ရှချီချီကို မုန်းတီးသည်။

ရှချီချီက ရုတ်တရက် လှပလာပြီး သူ(မ)၏စိတ်စွမ်းအင်က တိုးတက်လာသောအခါ သူသည် အလွန်ပျော်ရွှင်ခဲ့သည်။ သူသည် ရှချီချီကို လက်ဆောင်လည်း ပေးခဲ့ပြီး အခြားသော အဆင့်မြင့်အကူဆရာများနှင့် တွေ့ဆုံရန်ပင် ရှချီချီကို ခေါ်သွားချင်ခဲ့၏ — ထိုအချိန်တွင် သူ့ဖခင် ရှိသေးရာ သူ့တွင် အားလပ်ချိန်များစွာ ရှိ၏။

သို့ရာတွင် ရှချီချီက သူ့ကို မဆက်သွယ်ချင်သဖြင့် သူသည် မေ့ထားလိုက်တော့သည်။

အမှန်ပင်၊ သူသည် ထိုအချိန်၌ ရှချီချီကို မမုန်းပေ။ ယခုတလောမှသာ သူသည် ရှချီချီကို မုန်းတီးမိသည်။

ယခင်က သူသည် ရှချီချီအား ‌ဖုဖေးထံ၌ သူ့ဖခင်၏အခြေအနေကို မေးမြန်းစေချင်ခဲ့သည်။ ရှချီချီက မမေးမြန်းပေးသည့်အပြင် သူ့ကိုလည်း မသွားစေချင်ဘဲ သူ့တွင် ဖုဖေးအတွက် ကွယ်ဝှက်ထားသော ရည်ရွယ်ချက် ရှိသကဲ့သို့ သူ့ကို သတိကြီးစွာဖြင့် အမြဲကြည့်သည်... ရွံစရာကောင်းလွန်းတယ်!

ရှဇီရှိူ့က ဤလူများကို မြင်သကဲ့သို့ သဘာဝကျစွာပင် ဤလူများကလည်း သူ့ကို မြင်ကာ သူ လက်တွဲထားသော လူကိုလည်း မြင်ကြသည်။

ပျော်ရွှင်သော မျက်နှာဖြင့် သူစိမ်းတစ်ဦးနှင့် လက်တွဲထားသည့် ရှဇီရှိူ့အား တွေ့လိုက်ရသောအခါ ဖုဖေး၏မျက်နှာမှာ အရုပ်ဆိုးသွားသည်။

ရှဇီရှိူ့က... တကယ်ကို အရမ်းအရှက်မဲ့နေတုန်းပဲ!