အပိုင်း ၁၆၀ ( Mine Owner 9 )

ဖုဖေးသည် သူ ဘာကြောင့် ဤနေရာသို့ လာမိမှန်း မသိပေ။

အတိတ်၌ သူသည် ရှဇီရှိူ့ကို တစ်ညလုံး စောင့်ဆိုင်းခဲ့ဖူးသော်ငြား ရှဇီရှိူ့က ရောက်မလာခဲ့သည့်အပြင် သူ့ကို နောက်ပြောင်နေသကဲ့သို့ စကားတစ်ခွန်းကိုပင် မပြောခဲ့ချေ။ နောက်ပိုင်းတွင် သူသည် တစ်နေ့နေ့၌ ရှဇီရှိူ့ ၎င်းကို နောင်တရစေရမည်ဟု ဆက်တိုက်တွေးနေခဲ့သည်။

ထိုအတိုင်း သူ တကယ် လုပ်ခဲ့၏။

သူ့ဖခင်အရင်းမှာ တပ်ကြီးရှစ်၏ တပ်မှူး Cossack ဖြစ်သည်။ မူလက သူသည် အရည်အချင်းရှိသော မိဘမဲ့တစ်ဦးသာ ဖြစ်ပြီး ယခုမူ ကြယ်တာရာ မဟာမိတ်ရှိ မျိုးဆက်လူငယ်များ၏ ကဏ္ဍပေါင်းစုံတွင် ထိပ်ဆုံးတည်ရှိမှုအဖြစ် ရုတ်တရက် ဖြစ်လာခဲ့သည်။

ထိုမျှတင်မက သူ့ကို သဘောကျသော အဆင့် S အကူဆရာများလည်း ရှိသည်။

သူသည် သူ့ကိုယ်သူ အလွန်ဂုဏ်ယူမိပြီး ရှဇီရှိူ့ နောင်တရသည်ကိုလည်း အမှန်တကယ် တွေ့မြင်လိုက်ရသည်။

ယခင်က သူ့ကို ဆက်သွယ်ရန် တစ်ခါမှ အစမပျိုးဖူးသော ရှဇီရှိူ့က ဖခင်ကို ရှာဖွေရန် ဟူသော အကြောင်းပြချက်ဖြင့် သူ့ကို စတင်ဆက်သွယ်လာသည်။

သူသည် ယခင်က သူ မျက်စိကန်းနေသဖြင့် ဆင်းရဲသူကို မုန်းတီး၍ ချမ်းသာသူကို နှစ်သက်သော ရှဇီရှိူ့ကဲ့သို့ လူမျိုးအား ချစ်မိသည်ဟု ခံစားရသည်... 

သူသည် ရှဇီရှိူ့ကို ရယ်မောခဲ့ပြီး သူ့အနားမှ လူများကို ရှဇီရှိူ့အား ဒုက္ခပေးရန် ခွင့်ပြုလိုက်သည်။ သူနှင့်ရှချီချီကမှ စစ်မှန်သော စုံတွဲ ဖြစ်သည်... ရှဇီရှိူ့ကို မေ့လျော့သွားလိမ့်မည်ဟု သူ ထင်ခဲ့သည်။

သို့သော် ရှဇီရှိူ့က သူ့အာရုံကို ရရှိမည့် နည်းလမ်းကို အမြဲရှာတွေ့နိုင်ခဲ့၏။

ရှဇီရှိူ့က စစ်သည်တော်များ၏ စိတ်စွမ်းအင်ကို လမ်းညွှန်ပေးသော အလုပ်ကို သွားရောက်လုပ်ကိုင်သည်၊ ရှမိသားစုတွင် သူနှင့် အမှတ်မထင် တွေ့ဆုံသည်၊ ရှချီချီကို သီးသန့်ရှာဖွေသည်...

ရှဇီရှိူ့ဟာ ခွေးအရေပလာစတာမျှသာ ဖြစ်ပြီး သူ့ကို နောက်ယောင်ခံလိုက်နေသည်ဟု သူ ထင်ခဲ့သည်။

ထို့ကြောင့် ရှဇီရှိူ့အား ရှချီချီနှင့် လက်ထပ်စာချုပ် ချုပ်ဆို‌ထားသော ဝေးလံခေါင်သီသည့် ကြယ်စင်စု၏ မိုင်းပိုင်ရှင်ဖြင့် လက်ထပ်ပေးမည် ဟူသော ရှအိမ်၏ အစီအစဉ်ကို ကြားသိရပြီးနောက် သူသည် သူတို့နှစ်ဦးကို လက်ထပ်မှတ်ပုံတင်ရန် တိုက်ရိုက်ကူညီပေးလိုက်သည်။

ရှဇီရှိူ့က အစွမ်းထက်တဲ့လူနဲ့ အမြဲလက်ထပ်ချင်နေတာမလား? အခု သူ့ကို ကျေးလက်က မိုင်းပိုင်ရှင်တစ်ယောက်နဲ့ လက်ထပ်ခိုင်းလိုက်ပြီ။ သူ သေချာပေါက် သနားစရာကောင်းသွားမှာပဲ!

သူသည် ရှဇီရှိူ့၏တုံ့ပြန်မှုကို အထူးမျှော်လင့်နေမိပြီး သူ့ကို တွေ့ချင်နေမိသည် – ကွာရှင်းချင်လို့ ငိုနေတဲ့ ရှဇီရှိူ့ကို သူ တွေ့ရနိုင်လောက်တယ်မလား?

သို့သော်ငြား ထိုမိုင်းပိုင်ရှင်က မကွာရှင်းချင်လောက်ချေ။

အဆုံး၌မူ ရှဇီရှိူ့ဟာ ချောမောလှပပြီး အထက်တန်းလွှာမျိုးရိုး အကူဆရာတစ်ဦး ဖြစ်သည်ပင်။

သူသည် တွေးမိရုံဖြင့်ပင် စိတ်လှုပ်ရှားနေသော်လည်း တစ်ရက်တာ စောင့်ဆိုင်းပြီးနောက်တွင်မူ ရှဇီရှိူ့၏ဖခင် ပြန်ရောက်လာကြောင်းကို အံ့အားသင့်စွာ ကြားသိလိုက်ရသည်။

ရှဇီရှိူ့၏ဖခင် မတော်တဆဖြစ်ပြီးနောက် သူသည် လိုက်လံစုံစမ်းခဲ့ပြီး ရှဇီရှိူ့၏ဖခင် ဆုံးပါးသွားလောက်ပြီဖြစ်ကြောင်း သိခဲ့ရ၏။

အမှန်တကယ်တော့ နှစ်စဉ်နှစ်တိုင်းတွင် လူများစွာမှာ စကြဝဠာထဲ၌ ပျောက်ဆုံးနေကြသည်။ သူတို့ကို ရှာမတွေ့နိုင်ဘဲ ဘယ်သူကမှလည်း သူတို့ကို မရှာဖွေကြချေ။ ၎င်းကြောင့်သာ သူသည် ရှဇီရှိူ့က လူရှာရန် အကြောင်းပြချက်နှင့် သူ့ကို တမင်သက်သက် နှောင့်ယှက်နေသည်ဟု ခံစားရခြင်းပင်။

မဟုတ်ဘူးလား?

သူ့စိတ်မှာ အလွန့်အလွန် ရှုပ်ထွေးနေပြီး ထိုရှုပ်ထွေးသော စိတ်အခြေအနေဖြင့် သူသည် ရှဇီရှိူ့၏အိမ်သို့ ရှမိသားစုနှင့် လိုက်သွားသည်။

သူ့စိတ်နှလုံးမှာ ဝရုန်းသုန်းကားဖြစ်နေပြီး ယောက်ျားတစ်ဦးကို လက်တွဲလျက် အပြင်ဘက်မှ ဝင်လာသော ရှဇီရှိူ့ကို တွေ့လိုက်ရမှသာ အသိပြန်ဝင်လာကာ ထို့နောက် သူ့စိတ်တစ်ခုလုံးတွင် ဒေါသလွှမ်းမိုးသွားသည်။

ဒီလူက ဘယ်သူလဲ? ဘာလို့ ရှဇီရှိူ့က သူနဲ့ လက်တွဲထားတာလဲ?

“ ဇီရှိူ့၊ သူက... ယန်ကျင်းဇီလား? ” ရှဇီရှိူ့၏မိခင်က မေးမြန်းသည်။

ရှအမျိုးသမီးသည် ရှဇီရှိူ့နှင့် ခပ်ဆင်ဆင် တူပြီး ထပ်တူထပ်မျှ လှပသော်ငြား သူ(မ)က အနည်းငယ် အသက်ပိုကြီးပြီး ကလေးနှစ်ယောက်ကိုပင် ပျိုးထောင်ပြီးဖြစ်သည်။ မိခင်မေတ္တာ၏ နူးညံ့သိမ်မွေ့မှုက ဤအလှကို ပျက်ပြယ်စေပြီး ရှဇီရှိူ့၏ ချောမောလှပမှုကဲ့သို့ မထင်ရှားချေ။

ဤအခိုက်အတန့်တွင် သူ(မ)သည် ယန်ကျင်းဇီကို ကြည့်နေပြီး သူ(မ)၏မျက်ဝန်းများမှာလည်း သိမ်မွေ့နေသည်။

ရှဇီရှိူ့သည် ဝင်လာလာချင်း ရှမိသားစုကို တွေ့မြင်ရသောကြောင့် အနည်းငယ် မပျော်မရွှင်ဖြစ်သွားသည်။ ယခု သူ့မိခင်ကို တွေ့ရသောအခါ သူသည် ပျော်ရွှင်သွားပြီး သူ့မျက်ဝန်းများမှာလည်း တောက်ပနေသည် : “ အမေ၊ သူက ကျွန်တော့်လက်တွဲ‌ဖော် ယန်ကျင်းဇီပါ။ ”

“ အမေ၊ ဟယ်လို၊ ကျွန်တော့်နာမည်က ယန်ကျင်းဇီပါ! ” ယန်ကျင်းဇီသည် ရင်းနှီးစွာ ‌နှုတ်ဆက်လိုက်သည်။ ရှဇီရှိူ့က သူ့ကို လက်တွဲဖော်အဖြစ် မိတ်ဆက်ပေးတယ်! တကယ် အရမ်းကောင်းတယ်!

ရှအမျိုးသမီးသည် ယခင်က သားဖြစ်သူနှင့် ဆက်သွယ်ခဲ့ချိန်၌ သားဖြစ်သူ၏လက်ထပ်မှုအကြောင်း သိထားပြီးဖြစ်ကာ ယန်ကျင်းဇီ ရောက်လာမည့်ကိစ္စကိုလည်း သားဖြစ်သူထံမှ သိရှိထား၏။

သားဖြစ်သူ၏ ရုတ်တရက် လက်ထပ်မှုက သူ(မ)ကို အံ့အားသင့်စေသော်ငြား သူ(မ)သည် သားဖြစ်သူ၏အမြင်ကို ယုံကြည်ပြီး ယန်ကျင်းဇီအတွက် သူ(မ)၏အမြင်မှာ မဆိုးရွားပေ။

သို့သော်လည်း... ဤယန်ကျင်းဇီက ဝေးလံခေါင်သီသော ကြယ်စင်စုမှ လာသောကြောင့် ဖြစ်နိုင်သည်၊ သူ ဝတ်ဆင်ထားသော အဝတ်အစားများမှာ အလွန်ဈေးကြီးမှန်း သိသာသော်ငြား အလွန်တောဆန်နေ၏။

ရှအမျိုးသမီးသည် ယန်ကျင်းဇီကို ကြည့်ကာ ပြုံးလိုက်သည် : “ ဟယ်လို၊ မင်း တစ်ခုခုသောက်ချင်လား? ”

ရှမိသားစု၏ ရှချီချီမှလွဲ၍ သူတို့အားလုံးမှာ ရှဇီရှိူ့၏ လူကြီးသူမများ ဖြစ်သည်။ ယခုအခါ သူတို့အားလုံး ထိုင်နေကြပြီး ရှဇီရှိူ့ သူတို့ကို နှုတ်ဆက်မည်အား စောင့်နေကြသည်။

ရလဒ်ကမူ ရှဇီရှိူ့က စကားတစ်လုံးကိုပင် မပြောချေ။

သူတို့ အနည်းငယ် မပျော်မရွှင် ဖြစ်သွားကြသည်။ ယခုအချိန်၌ ရှဇီရှိူ့က ယန်ကျင်းဇီကို ခေါ်ပြီး ရောက်လာလေရာ ရှဇီရှိူ့၏အဘိုးက မနေနိုင်ဘဲ ဆိုသည် : “ ဘာလို့ မင်း သူ့ကို ဒီကိုခေါ်လာတာလဲ? ”

ယခုမူ သူ့သား ရှဝေချန် ပြန်ရောက်လာပြီဖြစ်သဖြင့် သူ့မြေး ရှဇီရှိူ့ဟာ ဂုဏ်သတင်းဆိုး ရှိလျှင်ပင် ပိုမိုကောင်းမွန်သော လက်တွဲဖော်ကို ရှာတွေ့နိုင်သေးသည်။ ဤယန်ကျင်းဇီနှင့် အတူရှိနေရန် မလိုတော့ချေ။

“ သူက ကျွန်တော့်လက်တွဲဖော်။ ” ရှဇီရှိူ့က ဆိုသည်။

ဖုဖေးသည် ခုနကအထိ ယန်ကျင်းဇီက ဘယ်သူမှန်း မသိသော်ငြား ယခုအချိန်တွင်တော့ သူသည် ဤသည်မှာ ရှဇီရှိူ့နှင့် “လက်ထပ်”ထားခါစ လူ ဖြစ်မှန်း သဘောပေါက်သွားသည်။ သူ့ကို ဒေါသထွက်အောင် လုပ်ဖို့ ရှဇီရှိူ့က ဒီလူကို တမင်တကာ ခေါ်လာတာလား?

ရှဇီရှိူ့၏အဘိုးသည် ယန်ကျင်းဇီကို မကြိုက်သောကြောင့် ကွာရှင်းနိုင်သည်ဟု ပြောချင်သော်လည်း သူ စကားမပြောရသေးခင်တွင် ယန်ကျင်းဇီက ဦးစွာပြောသည် : “ မင်းတို့က ရှမိသားစုကလား? ဒီနှစ်တွေမှာ မင်းတို့ ငါ့ဆီက ပိုက်ဆံအများကြီး ချေးထားကြတယ်။ မင်းတို့ ဘယ်အချိန် ပြန်ဆပ်ဖို့ စီစဉ်ထားလဲ? ”

အဘိုးရှ : “ ... ” သူ ယန်ကျင်းဇီကို တကယ် မကြိုက်ဘူး။ ဘာလို့လဲဆိုတော့ သူ့သားက ဗိုလ်ချုပ်၊ သူ့မြေးမက ဖုဖေးနဲ့ လက်ထပ်တော့မှာလေ!

သို့သော် ယန်ကျင်းဇီက ဤစကားများကို ပြောသောအခါ...

ယန်ကျင်းဇီကမူ မလွှတ်ပေးသေးပေ : “ ငါက ဇီရှိူ့နဲ့ လက်ထပ်ထားတယ် ဆိုရင်တောင်မှ မင်းတို့က ငွေချေးပြီး ပြန်မဆပ်လို့ မရဘူး။ ပြီးတော့ ငါ့အိမ်ထောင်ဖက်က ဇီရှိူ့၊ ငါ အရင်တုန်းက မင်းတို့ကို ပေးခဲ့တဲ့ တင်တောင်းငွေကိုလည်း ဇီရှိူ့ကိုပဲ မပေးသင့်ဘူးလား? အဲ့ဒါက ငါ ငါ့လက်တွဲဖော်ကို ပေးတဲ့ လက်ဆောင်၊ မင်းတို့ကို မဟုတ်ဘူး! မင်းတို့က ငါနဲ့ လက်မထပ်ထားဘူး! ”

အဘိုးရှသည် စိတ်ဆိုးလွန်းသဖြင့် သူ့မျက်နှာမှာ နီမြန်းသွားသော်ငြား ရှဇီရှိူ့ကမူ မထိန်းနိုင်ဘဲ “pfft” ဟုပင် ရယ်မောလိုက်သည်။

ဖုဖေး အံ့အားသင့်သွားသည်။

ရှချီချီသည် ကြီးကျယ်ခမ်းနားသော အလှတရား ဖြစ်ပြီး ထူးခြားသော သံလိုက်စက်ကွင်းဖြင့် လူစုလူဝေး၏ အာရုံစူးစိုက်မှု အမြဲဖြစ်နိုင်သော်ငြား ရှဇီရှိူ့ ရှိနေလျှင်မူ လူတိုင်း၏အာရုံမှာ သူ(မ)အပေါ်တွင် မရှိကြတော့ချေ။

လူအများဟာ ရှဇီရှိူ့ကိုသာ အမြဲအာရုံစိုက်ကြသည်။

ရှချီချီသည် ရှဇီရှိူ့ကို ကြည့်ပြီး နှုတ်ခမ်းကိုက်လိုက်မိသည် – ဒါက ဇာတ်လိုက်ရောင်ဝါလား?

“ မစ္စတာယန်၊ လက်ထပ်စာချုပ်ကိစ္စ... တကယ် တောင်းပန်ပါတယ်။ ” ရှချီချီက ယန်ကျင်းဇီကို ပြောသည်။

“ မင်းက ဘယ်သူလဲ? ” ယန်ကျင်းဇီက မေး၏။

ရှချီချီက ပြန်ဖြေသည် : “ ရှချီချီပါ။ ”

“ ဒါဆို မင်းက ရှချီချီပေါ့... ကံကောင်းလို့ ငါ မင်းကို လက်မထပ်မိတာ။ မင်း ကြည့်ရတာ... ” ရှချီချီက ရုပ်ဆိုးသကဲ့သို့ ယန်ကျင်းဇီသည် သက်ပြင်းချပြီး ခေါင်းခါလိုက်သည်။

ရှချီချီ : “ ... ”

ရှချီချီ၏မျက်နှာမှာ အဘိုးရှကဲ့သို့ ရုပ်ဆိုးသွားရှာသည်။

ရှချီချီ စိတ်ထိခိုက်သွားသည်ကို ဖုဖေး မြင်လိုက်ရသောအခါ သူသည်လည်း အနည်းငယ် မကျေမနပ် ဖြစ်သွားသည် : “ ယန်ကျင်းဇီ၊ ငါ့ကောင်မလေးက မင်း ဝေဖန်လို့ရတဲ့လူ မဟုတ်ဘူး! ” သူ စကားပြောပြီးနောက် သူ့စိတ်စွမ်းအင်ကလည်း ယန်ကျင်းဇီကို တိုက်ခိုက်ချင်ကာ ယန်ကျင်းဇီထံသို့ တိုက်ရိုက်ဖိနှိပ်လိုက်သည်။

သူသည် အဆင့် S စစ်သည်တော် ဖြစ်ပြီး ယန်ကျင်းဇီဟာ အချက်အလက်များအရ အဆင့် A သာ ဖြစ်သည်။

အဆင့် A ဟူသော အရည်အချင်းမှာ မဆိုးသော်လည်း ကြယ်မြို့တော်ဂြိုဟ်တွင်တော့ ၎င်းက ဘာမှမဟုတ်ချေ။ မြို့တော်တွင် အဆင့် A+ စစ်သည်တော်များမှာ ထောင်ပေါင်းများစွာ ရှိ၏။

ယခု သူသည် ဤမျက်စိစပါးမွေးစူးစရာ ယန်ကျင်းဇီကို အရှက်ရစေချင်ပြီး သူ့စိတ်စွမ်းအင်ဖြင့် ဖိနှိပ်ချင်သည်။

ဖုဖေး လှုပ်ရှားသည်နှင့်တပြိုင်နက် ယန်ကျင်းဇီသည် ချက်ချင်း သိရှိသည်။

ဖုဖေးကို ရိုက်နှက်ပြီးနောက် သူ မည်သို့ဖြေရှင်းရမည်ကိုပင် သူ စတင်တွေးလိုက်သည်...

သို့သော် သူ ဖုဖေးကို မရိုက်နှက်ရသေးခင် ရှဇီရှိူ့က သူ့ရှေ့တွင် မတ်တပ်ရပ်ပြီး သူ့ကို စိတ်စွမ်းအင်ဖြင့် ကာကွယ်ပေးလာသည်။

ယန်ကျင်းဇီသည် ခဏတာ အံ့အားသင့်သွားကာ သူ့စိတ်စွမ်းအင်ကို ချက်ချင်း အသုံးပြုလိုက်သည်။ ထို့နောက် သူတို့နှစ်ဦး၏ စိတ်စွမ်းအင်များသည် သဘာဝအလျောက် အတူတကွ ရောထွေးသွားကြသည်။

ရှဇီရှိူ့၏ စိတ်စွမ်းအင်သည် အဆင့် A+ သို့ ရောက်ရှိနေပြီးဖြစ်သည်။ ဖုဖေး၏ အဆင့် S လောက် မကောင်းမွန်သော်လည်း သူသည် အကူဆရာ ဖြစ်ပြီး ခုခံကာကွယ်ရေးကို အထူးပြုရာ ဖုဖေးကို ဟန့်တားနိုင်စွမ်းရှိ၏။

ယန်ကျင်းဇီ၏စိတ်စွမ်းအင် ထွက်လာပြီးနောက်... ယန်ကျင်းဇီက အဆင့် A+ စိတ်စွမ်းအင်ကိုသာ ထုတ်သုံးလျှင်တောင်မှ သူနှင့်ရှဇီရှိူ့တို့ဟာ နှောင်ကြိုးသွယ်ပြီးဖြစ်ကာ သူတို့၏စိတ်စွမ်းအင်များကလည်း ကောင်းစွာ လိုက်ဖက်ညီသည်။ သူတို့၏စိတ်စွမ်းအင်များမှာ လူတစ်ဦးတည်းကဲ့သို့ပင်...

ဖုဖေး၏စိတ်စွမ်းအင်က သူတို့ကို ထိမှန်ပြီး ပြန်လည်တွန်းလှန်ခံလိုက်ရသည်။

သို့သော်ငြား ဖုဖေးသည် ဆက်လက်၍ မတိုက်ခိုက်ပေ။ သူသည် သူ့စိတ်စွမ်းအင်ကို ပြန်ရုတ်သိမ်းပြီး ရှဇီရှိူ့ကို ထိတ်လန့်စွာ ကြည့်နေသည် : “ မင်း သူနဲ့ နှောင်ကြိုးဖွဲ့ထားတာလား!? ”

“ မင်းနဲ့ မဆိုင်ဘူး။ ” ရှဇီရှိူ့က ဖုဖေးကို ရွံရှာ၏ : “ ဖုဖေး၊ မင်းအဖေက တပ်မှူးဆိုရင်တောင်မှ မင်း မဆင်မခြင် လုပ်လို့မရဘူး! ” ဒီလူက ယန်ကျင်းဇီကို တိုက်ခိုက်ဖို့ တကယ်လုပ်တယ်! သူ့စိတ်စွမ်းအင်သာ နည်းနည်းပိုသန်မာမယ်ဆိုရင် သူ ဒီလူကို အသေပြာချပစ်လိုက်မှာ!

ရှဇီရှိူ့၏အတွေးများကို ခံစားလိုက်ရသော ယန်ကျင်းဇီ : “ ... ” ကာကွယ်ခံရတဲ့ ခံစားချက်က... တော်တော်ကောင်းတယ်။

ဒါပေမယ့် ဒီဖုဖေးက...

ယန်ကျင်းဇီသည် ဖုဖေးကို ကြည့်ပြီး ယခင်က Allen ပြောခဲ့သော စကားကို ရုတ်တရက် သတိရသွားသည်။

Allen ပြောတဲ့ပုံအရ ဖုဖေးကိုတောင် ရှဇီရှိူ့က ငြင်းခဲ့တယ်ဆိုလား?

နောက်ပိုင်းတွင် ရှဇီရှိူ့က ဖုဖေးအကြောင်း ပြောသောအခါ ၎င်းနှင့်ပတ်သက်ပြီး ဘာမှမပြောခဲ့သောကြောင့် သူသည် Allen အမှားလုပ်မိသည်ဟု ထင်ခဲ့သည်။ အမှားမလုပ်ခဲ့ဘူးလား?

“ ရှဇီရှိူ့၊ ငါ မင်းကို အဲ့လိုလူမျိုးနဲ့ နှောင်ကြိုးဖွဲ့လိမ့်မယ်လို့ မထင်ထားဘူး... ” ဖုဖေးသည် ရှဇီရှိူ့ကို မယုံနိုင်သော မျက်နှာထားဖြင့် ကြည့်သည် : “ မင်းက ကြီးမြတ်တဲ့ အထက်တန်းလွှာကိုပဲ အမြဲတမ်း ရှာချင်ခဲ့တာမဟုတ်လား? ”

ရှချီချီသည် ဖုဖေး၏မေးခွန်းကို ကြားသောအခါ သူ(မ)၏နှလုံး ‘ဒိတ်ခနဲ’ ဖြစ်သွားသည်။ အဆုံး၌မူ မူလစာအုပ်ထဲတွင် ရှဇီရှိူ့က ဆင်းရဲသူကို မုန်းတီးပြီး ချမ်းသာသူကို နှစ်သက်သည့် လူ မဟုတ်ကြောင်းကို ဖုဖေး သိရှိပြီးနောက် သူက ရှဇီရှိူ့ကို ပြန်ကြိုက်သွား၏။

ဤအခိုက်၌ သူ(မ)သည် ရှဇီရှိူ့ စကားမပြောနိုင်အောင် သူ(မ)၏စိတ်စွမ်းအင်ကိုပင် အသုံးချချင်ခဲ့သည်။

သို့ရာတွင် သူ(မ)သည် စိတ်စွမ်းအင် အသုံးပြုခြင်းတွင် လုံလုံလောက်လောက် မကျွမ်းကျင်ဘဲ သူ(မ) ထိတ်လန့်တုန်လှုပ်သည်နှင့်တပြိုင်နက် ၎င်းကို အသုံးမပြုနိုင်တော့ပေ။

ရှဇီရှိူ့က စကားပြန်ပြောနေပြီးဖြစ်၏ : “ ဘယ်တုန်းက ငါက ကြီးမြတ်တဲ့ အထက်တန်းလွှာကို လိုချင်ခဲ့လို့လဲ? ”

ဖုဖေးသည် ချက်ချင်းပင် ထုတ်ပြောလိုက်ချင်သည် : မင်းက ကြီးမြတ်တဲ့ အထက်တန်းလွှာကို မရှာချင်ဘူး၊ ဒါဆို ဘာလို့ ငါ့ကို ငြင်းခဲ့တာလဲ?

သို့သော်လည်း ရှဇီရှိူ့၏ငြင်းပယ်ခြင်းကို ခံရခြင်းမှာ သူ့အတွက် အလွန်ရှက်စရာကောင်းပြီး သူ့အား ရှဇီရှိူ့ရှေ့တွင် နိမ့်ကျနေသကဲ့သို့ပင် ခံစားရစေရာ သူသည် ၎င်းကို မပြောချင်ပေ။

ဖုဖေး၏အသံက ပိုကျယ်လာသည် : “ မင်း ဘာလို့ သူနဲ့ နှောင်ကြိုးဖွဲ့ခဲ့တာလဲ? ” သူသည် ယန်ကျင်းဇီကို နောက်တစ်ကြိမ် ကြည့်လိုက်သည်။

ဤဝေးလံခေါင်သီသော ကြယ်စင်စုမှ မိုင်းပိုင်ရှင်တွင် နက်မှောင်ကြမ်းတမ်းသော အသားအရေ ရှိပြီး အများနှင့်အလွန်မတူသော... အဝတ်အစားများကို ကိုယ်ပေါ်၌ ဝတ်ဆင်ထားသည်။ သူနဲ့ ဘယ်နေရာမှာ နှိုင်းယှဉ်နိုင်လို့လဲ?

သူက တစ်ချိန်၌ မိဘမဲ့ ဖြစ်ခဲ့ဖူးလျှင်တောင်မှ ဤလူထက် ပိုဆိုးမည်မဟုတ်ဟု သူ ခံစားရသည်။

ထိုအချိန်တွင် သူ၏စိတ်စွမ်းအင်သည် A+ ဖြစ်နေပြီဖြစ်ပြီး အချိန်မရွေး အဆင့် S သို့ တိုးသွားနိုင်သည်။ သူ့တွင် ကောင်းမွန်သော အမှတ်များလည်း ရှိပြီး အကောင်းဆုံး စစ်တက္ကသိုလ်များသို့ ဝင်ရောက်နိုင်ကာ စစ်တပ်ထဲတွင် တောက်ပသော အနာဂတ်ပင် ရှိနိုင်၏...

“ ဒါပေါ့၊ ငါ သူ့ကို ကြိုက်လို့လေ။ ” ရှဇီရှိူ့၏စိတ်စွမ်းအင်နှင့် ယန်ကျင်းဇီ၏စိတ်စွမ်းအင်တို့ ရောထွေး‌ပြီးနောက် သူသည် ယန်ကျင်းဇီ၏ ပြည့်လျှံနေသော အချစ်များဖြင့် ဝန်းရံခံလိုက်ရသည်။

သူ့မျက်နှာမှာ မလွှဲမရှောင်သာ နီမြန်းလာပြီး ပိုပို၍ တောက်ပလာသည်။

ယန်ကျင်းဇီကမူ ဤအချိန်တွင် ဖုဖေးကို ကရုဏာသက်စွာ ကြည့်နေသည်။ သူ သဘောပေါက်သွားသည်၊ ဤဖုဖေးက... ရှဇီရှိူ့ကို သဘောကျသည်။

ဒီလူက အရမ်းတုံးလွန်းတော့ ကိုယ်ကြိုက်တဲ့လူကိုတောင် နာကျင်စေတယ်။ ဒါပေမယ့် ကံကောင်းတာက ဖုဖေးက တုံးတော့ ရှဇီရှိူ့က သူ့အပိုင် ဖြစ်လာပြီ!

နောက်ကျမှ သူ ဖုဖေးကို ထည့်ရိုက်ဖို့ အိတ်တစ်လုံး သွားရှာဦးမယ်။ ကျေးဇူးတင်တဲ့အနေနဲ့ပေါ့!

ဖုဖေးသည် ပျော်ရွှင်မှုများ ပြည့်နှက်နေသော ရှဇီရှိူ့ကို ကြည့်ပြီး ချက်ချင်း မနေနိုင်တော့ဘဲ လှည့်ထွက်သွားသည်။

သူသည် ရှဇီရှိူ့က လက်ထပ်ပွဲအကြောင်း သိပြီးနောက် ‌ဒေါသထွက်နေမည်ဟု ထင်ခဲ့သည်။ ရှဇီရှိူ့က ဒေါသထွက်ကာ ကွာရှင်းချင်သည်၊ သူသည် ပြက်လုံးကြည့်ရန် အသင့်ဖြစ်နေခဲ့၏။

သို့သော် ရှဇီရှိူ့က ယန်ကျင်းဇီကို ချစ်မိသွားလိမ့်မည်ဟုတော့ သူ တစ်ခါမှ မတွေးမိခဲ့ပေ။

ရှဇီရှိူ့လိုလူမျိုးက ကျေးလက်က မိုင်းပိုင်ရှင်ကို ဘယ်လိုချစ်မိနိုင်တာလဲ?

ရှဇီရှိူ့က ကျေးလက်က မိုင်းပိုင်ရှင်တစ်ယောက်နဲ့ ချစ်မိနိုင်မှတော့ ဒါဆို ရှဇီရှိူ့က သူ တွေးထားသလို လူမျိုး မဟုတ်ဘူးလား?

ရှဇီရှိူ့က သူ့ဖခင်ကို ရှာနေသည်မှာ အကြောင်းပြချက်တစ်ခုသာဟု သူ အမြဲတွေးနေသကဲ့သို့ပင်။ အမှန်တကယ်တွင်မူ ရှဇီရှိူ့၏ဖခင်က မသေသေးချေ။

ဖုဖေးက စိတ်ရှုပ်ပြီး အမြန်လျှောက်သွားသည်။ ရှချီချီသည် ၎င်းကိုမြင်ပြီးနောက် ကမန်းကတန်း လိုက်သွား၏။

ရှချီချီသည် ယခုအခါ စိတ်ရှုပ်ထွေးနေသေးသော်ငြား ကိစ္စတစ်ခုအတွက်မူ ဝမ်းမြောက်ဝမ်းသာ ဖြစ်နေသည် – ရှဇီရှိူ့က အခြားတစ်ယောက်နဲ့ နှောင်ကြိုးဖွဲ့ပြီးပြီ!

ရှဇီရှိူ့က အခြားသူများနှင့် နှောင်ကြိုးသွယ်ထားပြီးဖြစ်ရာ ဖုဖေးဟာ အနှေးနှင့်အမြန် သူ(မ)အပိုင် ဖြစ်လာလိမ့်မည်။

ဖုဖေးနှင့်ရှချီချီတို့ ထွက်သွားသောအခါ ကျန်ရှမိသားစုဝင်များကလည်း ထိုင်မနေနိုင်တော့ချေ။

ရှမိခင်က သူတို့ကို ကြည့်ပြီး သိမ်မွေ့စွာ ပြုံးပြသည် : “ ဝေချန်က စစ်ဌာနချုပ်ကို သွားပြီ၊ သူ မနက်ဖြန်တောင် ပြန်မရောက်မှာကို စိုးရိမ်မိတယ်။ ”

ရှမိသားစုသည် ဤနေရာတွင် တစ်ချိန်လုံး မနေနိုင်ပေ။ သူတို့သည် ဖုဖေး ရုတ်တရက် ထွက်ခွာသွားသော အကြောင်းအရင်းကိုလည်း သိချင်ကြသည်။ ဤသို့ကြားရသော် သူတို့က ပြန်သွားကြ၏။

သူတို့အားလုံး ထွက်သွားသောအခါ ရှမိခင်က ရှဇီရှိူ့နှင့် ယန်ကျင်းဇီတို့ကို လှည့်ကြည့်သည် : “ မင်းတို့နှစ်ယောက် ဘယ်လိုလုပ် စာချုပ်ချုပ်လို့ရတာလဲ? ”

ရှဇီရှိူ့သည် ရုတ်တရက် စိတ်လှုပ်ရှားလာသည်။

ယန်ကျင်းဇီသည် ရှဇီရှိူ့ကို နှစ်သိမ့်ပေးပြီး ရှအမျိုးသမီးကို ပြုံးပြလိုက်သည် : “ အမေ၊ ကျွန်တော်တို့နှစ်ယောက်စလုံးက မြင်မြင်ချင်း ချစ်မိသွားကြတာပါ။ စကားပြောပြီးတော့ အမြင်သုံးချက်က အရမ်းကိုက်ညီတယ်လို့ ကျွန်တော်တို့ ခံစားရလို့ အတူရှိဖို့ ဆုံးဖြတ်လိုက်ကြတယ်။ မစိုးရိမ်ပါနဲ့၊ ကျွန်တော် ဇီရှိူ့ကို ကောင်းကောင်းမွန်မွန် ဆက်ဆံပါ့မယ်! ”

“ ရှသခင်မ၊ ကျွန်တော်တို့သခင်လေးနဲ့ ရှသခင်လေးမှာ အရမ်းမြင့်မားတဲ့ စိတ်စွမ်းအင်လိုက်ဖက်နှုန်း ရှိပါတယ်။ သူတို့က အတူရှိနေဖို့ ကံကြမ္မာပါရှိပြီးသားပါ။ ” ဤအချိန်တွင် Allen က ဝင်ပြောသည်။

Allen ၏ စကားကို ကြားရသောအခါ ယန်ကျင်းဇီသည် Allen က သူ့နောက်မှလိုက်ပါနေကြောင်း သတိရသွားသည်။

သူ ဒီလူကို မေ့သွားတယ်...

ယန်ကျင်းဇီ : “ ဟုတ်တယ်၊ ဇီရှိူ့နဲ့ကျွန်တော်က နတ်ဖက်တဲ့စုံတွဲပဲ! ”

ရှအမျိုးသမီး : “ ... ”

“ ဘာ ‘နတ်ဖက်တဲ့စုံတွဲ’ လဲ? ” အသံတစ်သံ ထွက်လာကာ ရှဝေချန် ဝင်လာသည်။

ရှအမျိုးသမီးသည် ရှမိသားစုကို ရှဝေချန်က မနက်ဖြန်အထိ ပြန်လာမည်မဟုတ်ဟု ပြောခဲ့သော်ငြား ၎င်းမှာ သူ(မ)၏ ရှမိသားစုကို ဘဲငန်းရိုင်းတစ်ကောင် လိုက်ဖမ်းခြင်းမှ မောင်းထုတ်ရန် ကြံစည်အားထုတ်မှုသာ ဖြစ်သည်။

အမှန်တွင်မူ ရှဝေချန်သည် စစ်ဆေးမှု ခံယူပြီးနောက် အိမ်ပြန်လာနိုင်မည်ဖြစ်သည် – သူက ရာဇဝတ်သား မဟုတ်ဘူး!

သို့သော် ယခုအခြေအနေကမူ...

ရှအမျိုးသမီးသည် အနည်းငယ် ခက်ခဲသည်ဟု ခံစားလိုက်ရသည်။

သူ(မ)သည် သားဖြစ်သူကို အလေးထားသေးသော်လည်း သူ(မ)၏ခင်ပွန်းက သူတို့သားဟာ ရုတ်တရက် လက်ထပ်လိုက်သည့်အပြင် ရုတ်တရက် နှောင်ကြိုးသွယ်လိုက်ခြင်းအား လက်မခံနိုင်မည်ကို စိုးရိမ်မိသည်။ သူ(မ)၏ခင်ပွန်းက ယန်ကျင်းဇီနှင့် အတိုက်အခံဖြစ်မည်ကိုလည်း သူ(မ) စိုးရိမ်နေ၏။

မဟုတ်ဘူး၊ ထိုသို့လည်း မဖြစ်နိုင်ချေ... ကလေးနှစ်ယောက်က နှောင်ကြိုးဖွဲ့ပြီးပြီဖြစ်၏။ သူတို့သည် ကလေးများကို ကောင်းချီးမင်္ဂလာများ ပေးခြင်းမှလွဲ၍ အခြားဘာကိုမှ မလုပ်နိုင်သည့်ပုံပေါ်သည်။

ဤသို့တွေးမိသော် ရှမိခင်သည် အတော်စိတ်သက်သာရာရပြီး ဤအချိန်တွင် ရှဝေချန်သည်လည်း ယန်ကျင်းဇီနှင့် ရှဇီရှိူ့တို့၏ ရောနှောနေသော စိတ်စွမ်းအင်များကို ခံစားလိုက်ရသည်။

သူ့သားက လူတစ်ယောက်နဲ့ တကယ် နှောင်ကြိုးဖွဲ့လိုက်တာလား? အဲ့ဒါ ဘယ်သူလဲ?

ရှဝေချန်သည် ယန်ကျင်းဇီကို လှမ်းကြည့်လိုက်သည်။ ယန်ကျင်းဇီ၏မျက်နှာကို ရှင်းရှင်းလင်းလင်း မြင်လိုက်ရသောအခါ သူ လုံးဝ အံ့အားသင့်သွားသည်။

ဤမျက်နှာကို အနည်းငယ် ရင်းနှီးနေသည်။

ဤလူက... အရှင် Marshal နှင့် တူသော်ငြား အနည်းငယ် ပိုမည်းပြီး အဝတ်အစားများကလည်း အနည်းငယ် ပိုညံ့သည်။

ဤသို့‌စဉ်းစားနေမိစဉ် ရှဝေချန်သည် ယန်ကျင်းဇီဘေးတွင် လေးလေးစားစားဖြင့် မတ်တပ်ရပ်နေသော Allen ကို တွေ့လိုက်ရသည်။

ဤလူက အရှင် Marshal နှင့် အလွန်တူရုံသာမက သူ့အနားမှလူများပင် အရှင် Marshal အနားရှိ လူများနှင့် အတိအကျ တူသည်။

ရှဝေချန် : “ ... ”