အပိုင်း ၁၆၁ ( Mine Owner 10 )

ရှဝေချန်သည် ယန်ကျင်းဇီကို ကြည့်ကာ ထို့နောက် Allen ကို ဆက်ကြည့်လိုက်ပြီး သူ့အမူအရာမှာ အေးခဲသွားသည်။

အိပ်မက်‌မက်နေသလားဟု သူ သံသယဖြစ်မိ၏။

ဘာဖြစ်‌နေတာလဲ? ဘာလို့ သူ့သားက ရုတ်တရက်ကြီး နှောင်ကြိုးဖွဲ့လိုက်တာလဲ? သူ့သားရဲ့စိတ်စွမ်းအင်နဲ့ ရောထွေးနေတဲ့ စိတ်စွမ်းအင်ပိုင်ရှင် ဒီလူက ဘာကြောင့်... Marshal ဖြစ်နေတာလဲ?

အမှန်ပင်၊ ရှဝေချန်သည် 'များစွာပိုမည်းပြီး များစွာကြမ်းတမ်းသော ဤတောသား' ဟာ ယခင်က အာကာသယာဉ်ပေါ်တွင် သူ တွေ့မြင်ခဲ့သော အလွန်မြင့်မြတ်သည့် အရှင် Marshal ဖြစ်ကြောင်း အတည်ပြုပြီးဖြစ်သည်။

တကယ်တော့ ယနေ့ ဤနေရာတွင် ဤလူတစ်ဦးတည်းသာ ရှိနေလျှင် သူသည် သေချာပေါက် အသိအမှတ်မပြုဝံ့ပေ။ သူတို့က ရုပ်ဆင်ကြသည်ဟုသာ သူ တွေးမိမည်ဖြစ်သော်ငြား ဤလူဘေးရှိ အိမ်တော်ထိန်း Allen ကမူ... အကယ်၍ လူနှစ်ယောက်မှာ ဆင်တူတာ ရှိတယ်ဆိုရင်တောင်မှ ဒီလောက် အရမ်းမတူနိုင်ဘူး၊ အဝတ်အစားတွေတောင် အတူတူပဲဟ!

သို့သော် သဘောထားကမူ အလွန်ပြောင်းလဲသွား၏။

သူ မှတ်မိသည်၊ အိမ်တော်ထိန်း Allen က သူတို့ကို အာကာသယာဉ်ပေါ်မှ လိုက်ပို့ချိန်တွင် အထက်တန်းဆန်ပြီး Marshal ၏ ကိစ္စရပ်များကို မပြောဆိုရန် သူတို့ကို သတိပေးခဲ့သည်။ လူများကို သူ့မေးစေ့နှင့် ကြည့်ခြင်းဖြင့် တူညီလုနီးပါးပင်။

ယခုမူ ဤအဆင့် S စွမ်းအားရှင်သည် သူ့ကို ပြုံးပြရုံတင်မဟုတ်ဘဲ သူ့ကို တိတ်တဆိတ် ဦးညွှတ်ကာ အလေးပြုလာသည်။

ရှဝေချန်၏အမူအရာမှာ တောင့်တင်းနေရုံသာမက သူ့မျက်နှာမှာ ဆန့်တငင်ငင် တွန့်ကွေးလုနီး ဖြစ်နေ၏။

ဤအချိန်တွင် ယန်ကျင်းဇီသည် ရှဝေချန်ကို အပြုံးလေးနှင့်ပင် နှုတ်ဆက်လိုက်သည် : “ အဖေ၊ နေကောင်းလား? ”

ယန်ကျင်းဇီ နည်းနည်းရှက်နေသည်။

သူသည် ရှဇီရှိူ့ကို ချစ်မိသွားလိမ့်မည်ဟု မသိခဲ့ပေ။ သူ၏ ရှဇီရှိူ့နှင့် လက်ထပ်မှုကို သိရှိပြီးနောက် သူသည် ရှဝေချန်ကို ထိုမျှလောက် ကောင်းကောင်းမဆက်ဆံတော့ဘဲ ရှဝေချန်ကို လျစ်လျူပင်ရှုခဲ့၏...

သူ ယခု တကယ် နောင်တရမိသည်။

ဒီလိုဖြစ်လာမယ်လို့ သူ ကြိုသိခဲ့မယ်ဆိုရင် ယာဉ်ပေါ်မှာ ရှဝေချန်နဲ့ ဆက်ဆံရေးကောင်းအောင် သူ လုပ်ခဲ့မှာ!

ယန်ကျင်းဇီ၏ “အဖေ” ခေါ်သံ ထွက်လာပြီး ရှဝေချန်သည် သူ့နှလုံးသားလေး တုန်ယင်သွားသည်ဟု ခံစားလိုက်ရသည်။

ဒါက အရှင် Marshal!

မြင့်မားကြီးမြတ်တဲ့ အရှင် Marshal!

အရှင် Marshal သည် သူတို့ကို မျက်လုံးထဲ မထည့်ခဲ့သော်လည်း ၎င်းက ပုံမှန်ဟု သူတို့အားလုံး ခံစားရပြီး အရှင် Marshal ကို အလွန်ပင် ကျေးဇူးတင်ခဲ့ကြသည်။ ဒါပေမယ့် အခုတော့ သူနဲ့ အရမ်းအလှမ်းဝေးတဲ့ အရှင် Marshal က သူ့အိမ်ကို ရောက်လာပြီး သူ့ကို “အဖေ” လို့ ခေါ်တယ်!

ရှဝေချန်သည် သူ့သားက အရမ်းတော်ပြီး ကမ္ဘာပေါ်တွင် အကောင်းဆုံး ဖြစ်သည်ဟု အမြဲခံစားရကာ သူ့သားနှင့် ထိုက်တန်သူ လုံးဝ မရှိဟု အမြဲတွေးကြောင်း ဝန်ခံသော်ငြား ဤသည်မှာ အရှင် Marshal ဖြစ်သည်။

အရှင် Marshal က သူ့သားနှင့် မထိုက်တန်ဟု ပြောဖို့ရန်အတွက် သူ့တွင် တကယ် မျက်နှာမရှိပါပေ။

သူ အခု ဘာလုပ်သင့်လဲ...?

ဧည့်ခန်းတွင် ခဏတာ အလွန်တိတ်ဆိတ်သွား၏။

ရှဇီရှိူ့သည် ရှေ့သို့ ခြေတစ်လှမ်းတိုးကာ ရှဝေချန်ကို ရှက်ရွံ့စွာ ပြုံးပြသည် : “ အဖေ၊ သူက ကျွန်တော့်စစ်သည်တော် ယန်ကျင်းဇီ၊။ ”

” အင်း ” ရှဝေချန်သည် ဘာပြောရမှန်း မသိဘဲ မှင်တက်စွာ ပြန်ဖြေရှာသည်။

ကံကောင်းစွာဖြင့် သူသည် ဤကိစ္စကို ကြာကြာစိတ်မပူလိုက်ရပေ။

ခင်ပွန်းဖြစ်သူကို တွေ့မြင်ပြီးနောက် ရှအမျိုးသမီးသည် အေးခဲသွားပြီး နောက်ဆုံးမှသာ တုံ့ပြန်နိုင်ကာ ခင်ပွန်းဖြစ်သူ၏ရင်ခွင်ထဲသို့ ပစ်ဝင်လိုက်သည် : “ ဝေချန်! ”

ရှဝေချန်သည် သူ့ဇနီးကို ဖက်လိုက်ပြီး သူတို့နှစ်ဦး၏ စိတ်စွမ်းအင်များသည် တင်းတင်းကြပ်ကြပ် ‌ချည်နှောင်ထားကြသည်။ ရှအမျိုးသမီးက ဦးစွာစငိုကြွေးပြီး ရှဝေချန်သည်လည်း သူ့ဇနီး၏ခံစားချက်များ ကူးစက်ခံရကာ မျက်ရည်များကို မထိန်းနိုင်တော့ပေ။

ဤအခိုက်အတန့်တွင် သူသည် ယန်ကျင်းဇီကို ဂရုမစိုက်နိုင်တော့ချေ။

ယန်ကျင်းဇီသည် သူတို့ ငိုနေသည်ကို မြင်လိုက်ရသောအခါ သူ့စိုးရိမ်ပူပန်မှုမှာ များစွာလျော့ကျသွားသည်။

ထို့အပြင် ရှဇီရှိူ့က သူ့ကို နှစ်သိမ့်ပေးနေသေးသည်... ယန်ကျင်းဇီ၏ စိတ်စွမ်းအင်သည် ရှဇီရှိူ့၏ စိတ်စွမ်းအင်နှင့် ရောထွေးနေပြီး ခဏတာ ကြောက်ရွံ့မှုပျောက်ဆုံးသွား၏။

တကယ်တော့ သူ့တွင် ကြောက်စရာမရှိပေ။ သူသည် ရှဇီရှိူ့နှင့် နှောင်ကြိုးဖွဲ့ပြီးဖြစ်ရာ ရှဝေချန်သည် သူတို့ကို ဘယ်တော့မှ နှောင်ကြိုးပယ်ဖျက်ခိုင်းမည်မဟုတ်ချေ။

ထို့အပြင် မည်သို့ပင်ဖြစ်စေ သူသည် ရှဝေချန်ကို ကယ်တင်ခဲ့ပြီး ရှဝေချန်၏ အသက်သခင်ကျေးဇူးရှင်လည်း ဖြစ်သည်။ 

ယန်ကျင်းဇီသည် ယခုအခါ ပိုမိုစိတ်အေးသွားသည်။

ဤအချိန်၌ ရှအမျိုးသမီး၏စိတ်မှာ ငြိမ်သက်သွားပြီဖြစ်သည်။ ရှအမျိုးသမီး နှောင့်ယှက်ပြီးနောက် ရှဝေချန်သည်လည်း ပိုမိုတည်ငြိမ်သွား၏။

အနာဂတ်တွင် သူ့ကို မသိချင်ယောင်ဆောင်ရန် အရှင် Marshal သည် ယခင်က ထပ်တလဲလဲ အလေးထားမှာကြားခဲ့သည်။ ထို့ကြောင့် သူသည် ဤသည်က အရှင် Marshal ဖြစ်ကြောင်း မသိဟန်ဆောင်မည်ဖြစ်သည်။

သို့သော်လည်း သူသည် အကြိမ်ပေါင်း မရေတွက်နိုင်အောင် ယခင်က တွေးခဲ့ဖူးသည်။ အနာဂတ်တွင် သူ့သားက လက်တွဲဖော် ရှာလာလျှင် သူသည် သူ့သား၏လက်တွဲဖော်ကို တိုက်ခိုက်ရန် စိန်ခေါ်မည်ဟု။

အခု... သူ တိုက်လို့ရလား? သူ တိုက်ရဲလား?

သူ အနိုင်ယူနိုင်လို့လား? 

ရှဝေချန်၏စိတ်ခံစားချက်များမှာ အဆုံးမဲ့ လူးလွန့်နေ၏။

“ ဝေချန် ဘာဖြစ်လို့လဲ? ” ရှအမျိုးသမီးက အံ့ဩစွာ မေးမြန်းသည်။ သူ(မ)သည် ခင်ပွန်းဖြစ်သူ၏ ခံစားချက်များမှာ အလွန်မတည်မငြိမ်ဖြစ်နေမှန်း ခံစားမိသော်ငြား ၎င်းက သူ(မ)ကို မရည်ရွယ်သဖြင့် အကြောင်းအရင်းကို သူ(မ) မသိပေ။

“ ငါ အဆင်ပြေပါတယ်... ” ရှဝေချန်က ပြန်ဖြေသည်။

သူ စကားပြောပြီးပြီးချင်း ရှဇီရှိူ့က ဆိုသည် : “ အမေ၊ အဖေက အခုမှ ပြန်ရောက်တယ်။ အဖေ့ကို အနားယူခိုင်းပြီး တခုခုစားခိုင်းရမယ်။ ” 

ရှအမျိုးသမီးက အမြန်ပြန်ဖြေသည် : “ ဟုတ်တယ်။ အရင်ဆုံး တခုခုစားကြရအောင်။ အမေ စားစရာတွေ အများကြီး ပြင်ဆင်ထားတယ်... ”

ရှအမျိုးသမီးသည် အလျင်အမြန် စားသောက်ဖွယ်ရာကို သွားရောက်ခင်းကျင်းသည်။ ရှဇီရှိူ့သည် သူ့ဖခင်ကို ကြည့်ကာ ပြော၏ : “ အဖေ... ပြန်လာတာကို ကြိုဆိုပါတယ်။ ”

ရှဝေချန် : “ ဇီရှိူ့၊ မင်း ဒီရက်တွေ ပင်ပန်းသွားရပြီ။ ” သူသည် ဇနီးဖြစ်သူနှင့် အဆက်အသွယ်ရှိပြီး ဤနှစ်၏ အဖြစ်အပျက်များကို အကြမ်းဖျင်း သိရှိသော်လည်း သူ့သားက Marshal နှင့် မည်သို့လက်ထပ်ဖြစ်ကြောင်းကိုတော့ သူ မသိပေ။

၎င်းကို တွေးမိပြီးနောက် ရှဝေချန် မေးလိုက်သည် : “ ဇီရှိူ့၊ မင်း ဘယ်လိုလက်ထပ်ဖြစ်တာလဲ? ”

ရှဇီရှိူ့သည် မဖုံးကွယ်ဘဲ ဇာတ်လမ်းကို ပြောပြသည်။

ဤအကြောင်း ကြားသိရပြီးနောက် ရှဝေချန်သည် သူ့စိတ်ထဲတွင် ဒေါသမီးကိုသာ ခံစားလိုက်ရသည်။

ယခင်နှစ်ပေါင်းများစွာတိုင်အောင် သူသည် ရှမိသားစုကို တစ်ခါမှ မတရားမဆက်ဆံခဲ့ဖူးသော်ငြား ရှမိသားစုက အလွန်ကောင်းပြီး သူ့သားကိုပင် ဒုက္ခပေးခဲ့သည်။

ဒါနဲ့ ဒီလူက အရှင် Marshal ဆိုတာ သေချာပါတယ်၊ သူက ဂြိုဟ်စွန်ဂြိုဟ်ဖျားရဲ့ မိုင်းပိုင်ရှင် ဘယ်လိုဖြစ်လာတာလဲ?

ရှဝေချန်သည် ယန်ကျင်းဇီကို စိတ်ရှုပ်ထွေးစွာ ကြည့်မိလိုက်ပြီး ထို့နောက် ယန်ကျင်းဇီ၏ ကြီးမားသော အပြုံးကြီးကို မြင်လိုက်ရသည်။

ရှဝေချန် : “ ....... ”

ရှဝေချန်သည် မသက်မသာ ခံစားရသော်လည်း ဤအချိန်တွင် အိမ်တော်ထိန်း Allen သည်လည်း ရှအမျိုးသမီးကို ကူညီ၍ ပန်းကန်ခွက်ယောက်များ စတင်ခင်းကျင်းပေးသည်။

“ မဟုတ်ဘူး၊ ငါ လုပ်မယ်။ ” ရှအမျိုးသမီးက ပြောသည်။

သူ့စိတ်စွမ်းအင်ကို လျှော့ချထားပြီး သာမန်လူတစ်ဦးကဲ့သို့ ပြုမူနေသော အိမ်တော်ထိန်း Allen က ဆိုသည် : “ မဒမ်၊ ကျေးဇူးပြုပြီး သွားစားပါ။ ဒီလိုအလုပ်မျိုးကို ကျွန်တော် လုပ်ပါ့မယ်... ကျွန်တော်က သခင်လေးကို ကလေးအရွယ်ကတည်းက ပြုစုစောင့်ရှောက်ခဲ့ပြီး ဒီအလုပ်တွေကို လုပ်နေတာ ကျင့်သားရနေပါပြီ။ ”

“ ဒါပေမယ့်... ”

“ မဒမ် မြန်မြန်ထိုင်လိုက်ပါ။ ” အိမ်တော်ထိန်း Allen သည် ရှအမျိုးသမီးကို ထိုင်နေခိုင်းပြီး မီးဖိုချောင်သို့ ကိုယ်တိုင်ဝင်သည်။

အိမ်တော်ထိန်း Allen က အဆင့် S စွမ်းအားရှင်တစ်ဦး တကယ်ဖြစ်မှန်းကိုသာ မသိခဲ့လျှင် ဤမြင်ကွင်းဟာ မှားယွင်းနေသည်ဟု ရှဝေချန် မတွေးမိနိုင်ပေ။ ယခုမူ...

သူသည် အမှန်တကယ်ပင် အနည်းငယ် အဆင်မပြေဖြစ်မိနေသည်။

သို့သော်လည်း သူ အဆင်မပြေဖြစ်နေသော အချက်က သူ့ထံသို့ စားစရာသယ်လာသော Allen ကို မတားမြစ်နိုင်ချေ...

ရှမိသားစု၏လေထုဟာ အလွန်ထူးဆန်းနေခဲ့သော်ငြား ကံကောင်းထောက်မစွာဖြင့် ဤအခြေအနေက မကြာရှည်ခဲ့ပေ — စားသောက်ပြီးနောက် ရှဝေချန်သည် သူ့သားငယ်ကို သွားကြည့်ရန် စီစဉ်ခဲ့သည်။

သူ့သား‌ငယ်သည် မျိုးရိုးဗီဇရောဂါတစ်ခုကို ခံစားနေရပြီး မကြာသေးမီကမှ အပြင်းဖျားကာ ဆေးရုံတွင် ကုသမှုခံယူနေရသည်။ 

ရှဝေချန်က သွားပြီး ရှအမျိုးသမီးနှင့် ရှဇီရှိူ့တို့ကလည်း သေချာပေါက် သွားကြမည်ဖြစ်သော်လည်း ယန်ကျင်းဇီက မသွားပေ – “ ဇီရှိူ့၊ လူတစ်ယောက်က ကိုယ်နဲ့တွေ့ဖို့ မေးထားလို့ ကိုယ် ဆေးရုံကို မလိုက်တော့ဘူး။ ”

သူသည် ရှဇီအန်း၏အခြေအနေကို သိရှိပြီးဖြစ်သည်။ ကလေးသည် မကြာသေးမီကမှ သတိမေ့မျောသွားခဲ့သည်။ သူ သွားကြည့်ချင်လျှင်ပင် ဤအခိုက်အတန့်တွင် အလျင်လိုစရာ မရှိချေ။

ပိုအရေးကြီးသည်မှာ သူ့တွင် လုပ်စရာရှိ၏။

ရှဇီရှိူ့က သဘောတူသည်။ စဉ်းစားပြီးနောက် သူသည် ယန်ကျင်းဇီ၏ ဆက်သွယ်ကိရိယာကို ရှအိမ်၏ ဝင်ထွက်ခွင့် ပေးလိုက်သည်။ ဤသို့ဆိုလျှင် ယန်ကျင်းဇီက ဆက်သွယ်ကိရိယာကို အသုံးပြု၍ ရှမိသားစု၏အိမ်ကို အဝင်အထွက်ပြုနိုင်မည်ဖြစ်သည်။

“ ကိုယ် ဒီည သေချာပေါက် ပြန်လာမယ်။ ” ယန်ကျင်းဇီက ပျော်ရွှင်စွာ ပြောသည်။

ရှဇီရှိူ့က ရှက်သွားသည် : “ ဘယ်သူက မင်းကို ပြန်လာစေချင်လို့လဲ!”

သူက ထိုသို့ပြောသော်ငြား သူ့စိတ်စွမ်းအင်က ယန်ကျင်းဇီ၏စိတ်စွမ်းအင်နှင့် တင်းတင်းကြပ်ကြပ် ဖက်တွယ်ထားပြီး မလွှတ်ပေးပေ...

ယန်ကျင်းဇီ : “ ကိုယ် မကြာခင် ပြန်လာပါ့မယ်။ ” 

ရှဇီရှိူ့က ပို၍ပင် ရှက်သွေးဖြာသွားသည်။

ရှဝေချန် : ” ... ” ဟား ဟား

ယန်ကျင်းဇီနှင့် ရှဇီရှိူ့တို့ နှစ်ဦးစလုံး၏ စိတ်စွမ်းအင်များသည် အချင်းချင်း မလွှတ်ပေးနိုင်ဘဲ သူတို့သည် အချိန်အတော်ကြာ ပူးကပ်နေပြီးမှ နောက်ဆုံးတွင်သာ သူတို့ ခွဲခွာလိုက်ကြသည်။

ခွဲခွာပြီးနောက် ရှဇီရှိူ့သည် ကားပျံပေါ်သို့ သူ့ဖခင်နောက်မှ လိုက်ပါသွားသည်။

ယန်ကျင်းဇီ မရှိတော့သဖြင့် ရှဝေချန်သည် ‌‌ယခုမှသာ မေးနိုင်သည် : “ ဇီရှိူ့၊ မင်း အဲ့ယန်ကျင်းဇီကို တကယ် ကြိုက်တာလား? ”

“ အဖေ၊ ကျွန်တော်တို့ နှောင်ကြိုးဖွဲ့ပြီးပြီ! ” ယန်ကျင်းဇီကို သူ မကြိုက်ပဲနဲ့ ဘယ်လိုလုပ် သူက ယန်ကျင်းဇီနဲ့ နှောင်ကြိုးသွယ်နိုင်မှာလဲ?

ရှဝေချန်က ဆက်ပြောသည် : “ မင်း သူ ဘယ်သူလဲ သိလား? သူက... ”

ရှဇီရှိူ့၏မျက်ခုံးများ တွန့်ချိုးသွားပြီး အနည်းငယ် သဘောမတူဟန်ပုံပေါ်သည်။ ရှဇီရှိူ့က ပြော၏ : “ အဖေ၊ ကျင်းဇီက ဝေးလံတဲ့ ဂြိုဟ်ပေါ်မှာ မွေးလာပေမယ့် သူက တကယ် ကောင်းပြီး အရမ်းအကောင်းမြင်တတ်တဲ့ သဘောထား ရှိတယ်! အဖေ သူ့ကို ကြိုပြီး မကောင်းမမြင်သင့်ဘူး။ ”

ရှဝေချန် : “ ... ” သူ့မှာ တကယ်ကို မလိုမုန်းထားစိတ် မရှိပါဘူး။ ဘယ်လိုလုပ် သူက အရှင် Marshal ကို မလိုမုန်းထားစိတ် ရှိရဲမှာလဲ?

ရှဝေချန်သည် စကားတည်သော ယောက်ျားတစ်ဦး ဖြစ်သည်။ သူသည် အရှင် Marshal ၏ အထောက်အထားကို မပြောရန် ယခင်က ကတိပေးခဲ့ဖူးသောကြောင့် ယခု ထုတ်ပြောရန်မှာ သူ့အတွက် ခက်ခဲ‌သည်... သူ့သားကို သတိပေးသင့်၊မသင့် သူ စတင်စဉ်းစားမိသည်။

ရလဒ်ကမူ ဤအတွေး သူ့စိတ်ထဲတွင် ပေါ်လာပြီးနောက် ဆေးရုံက ဖုန်းဆက်လာသည်။

ဆေးရုံ၏ဒါရိုက်တာသည် ဖုန်းခေါ်ဆိုသူ ဖြစ်သည်။ ရာထူးကြီးမြင့်သူများစွာ၏ ‌အရှေ့တွင် မတုန်လှုပ်ခဲ့သော ဆေးရုံဒါရိုက်တာသည် ယခုအခါ အလွန်အမင်း စိတ်လှုပ်ရှားနေသည် : “ ဗိုလ်ချုပ်ရှ! ကြယ်တာရာ မဟာမိတ်ရဲ့ ထိပ်တန်းဆေးဘက်ဆိုင်ရာအဖွဲ့ ‘Lola’ က ခင်ဗျားရဲ့သားကို ရွေးချယ်လိုက်တယ်! သားဖြစ်သူက ‘Lola’ ထောက်ပံ့တဲ့ ထိပ်တန်းဆေးကုသမှုကို လက်ခံရရှိနိုင်ပြီ! အဲ့ဒါ Lola! Lola! မျိုးရိုးဗီဇရောဂါကို ကုသနိုင်တဲ့ ‘Lola’! ဗိုလ်ချုပ်ရှ၊ ခင်ဗျားသား တကယ် ကံကောင်းတယ်! ”

ဆေးရုံဒါရိုက်တာက ဗလုံးဗထွေး စကားပြောခဲ့သည်။

ရှမိခင်နှင့် ရှဇီရှိူ့တို့သည်လည်း ဒါရိုက်တာ၏စကားများကို ကြားလိုက်ရသောအခါ စိတ်လှုပ်ရှားသွားကြသည်။ 

ဆေးသုတေသနရလဒ်များစွာကို လူသိရှင်ကြား ထုတ်ဝေထားသည့် “Lola” ရှိကြောင်းကို သူတို့အားလုံး သိထားကြပြီး ၎င်းက ကြယ်တာရာ မဟာမိတ် တစ်ခုလုံး၏ ထိပ်တန်းဆေးဘက်ဆိုင်ရာ အဖွဲ့အစည်း ဖြစ်ကြောင်းကိုလည်း သိရှိထားကြ၏။

Lola သည် သာလွန်လွှမ်းမိုးသော အဆင့်အတန်းတွင် အမြဲတည်ရှိနေခဲ့ပြီး ဗိုလ်ချုပ်ကြီးများ၊ တပ်မှူးများကိုပင် Lola က သူတို့ကို မျက်နှာသာသိပ်မပေးခဲ့ဘဲ ယခုမူ အံ့ဩစရာကောင်းလှစွာဖြင့် ရှဇီအန်းကို ကုသပေးရန် ဆန္ဒရှိသည်... 

ဒါဘယ်လောက် စိတ်လှုပ်ရှားစရာကောင်းလိုက်သလဲ?

ရှဇီအန်း၏ မျိုးရိုးဗီဇရောဂါသည် အကယ်ပင် ကုသရန် ခက်ခဲသော်ငြား ကုသရန် အခက်ခဲဆုံးတော့ မဟုတ်ချေ။ Lola က သူ့ကို ကုသပေးချင်တယ်ဆိုရင် ရှဇီအန်း ရောဂါပျောက်ဖို့ အခွင့်အရေးများသွားပြီ!

ဒါက တကယ်ကို အရမ်းဝမ်းမြောက်ဖွယ်ရာပဲ!

ရှမိခင်သည် ခင်ပွန်းဖြစ်သူကို တင်းတင်းကြပ်ကြပ် ပွေ့ဖက်ကာ ရုတ်တရက် ငိုချလိုက်ပြီး သူ(မ)၏စိတ်စွမ်းအင်က သူ(မ)၏စိတ်လှုပ်ရှားမှုကို ထုတ်ဖော်ရန်အတွက် ရှဝေချန်၏စိတ်စွမ်းအင်ထဲတွင် ဆက်တိုက်လူးလွန့်နေသည်။ 

ရှဝေချန်သည် အစပိုင်းတွင် တည်ငြိမ်နေသေးသော်လည်း မကြာမီတွင် သူ၏စိတ်စွမ်းအင်သည် ရှမိခင်နှင့်အတူ လူးလိမ့်သွားသည်။

ရှဇီရှိူ့သည် သူတို့ကို ဖျတ်ခနဲ တစ်ချက်လှမ်းကြည့်ပြီး ယန်ကျင်းဇီကို ချက်ချင်း စာပို့လိုက်သည်။ သူ့လက်များမှာ အလွန်တုန်ယင်နေသဖြင့် သူသည် စာသားမက်ဆေ့ခ်ျကိုပင် မပို့နိုင်ပေ။ နောက်ဆုံးတွင် သူသည် အသံမက်ဆေ့ခ်ျကိုသာ ပို့လိုက်၏ : “ ကျင်းဇီ၊ Lola က ငါ့ညီကို ဆေးကုသဖို့ ကူညီပေးချင်တယ်တဲ့! ”

ရှဝေချန်သည် စိတ်လှုပ်ရှားနေပြီး မက်ဆေ့ခ်ျပို့နေသော သူ့သား၏အသံကို ရုတ်တရက် ကြားလိုက်ရကာ တစ်စုံတစ်ခုကို ရုတ်တရက် သတိရသွားသည်။

သူ့သားငယ်၏ရောဂါကြောင့် သူသည် သူ့အထက်အရာရှိကို “Lola” အကြောင်း မေးခဲ့ဖူးသည်။

တပ်မှူးကပင် “Lola” ကို မဖိတ်ခေါ်နိုင်ဟု ဆိုလျက် သူ့ဘော့စ်က သူ၏ကြိုးပမ်းအားထုတ်မှုများကို အလဟဿ မဖြုန်းတီးရန် သူ့အား ပြောခဲ့သည်။

ထိုအချိန်တွင် သူသည် အလွန်အံ့သြခဲ့ပြီး မည်သူက Lola ကို ငှားရမ်းနိုင်မည်နည်း၊ မရေမတွက်နိုင်သော ဆေးသုတေသနရလဒ်များကို လူသိရှင်ကြား ထုတ်ဝေနေသည့် “Lola” ကဲ့သို့သော အဖွဲ့အစည်းကို ဘာက အကျိုးအမြတ်ရှိအောင် လုပ်ဆောင်နိုင်သနည်းနှင့် ၎င်းက အဘယ့်ကြောင့် တည်ရှိနေသနည်းဟု သူ့ဘော့စ်ကို မေးမြန်းမိသည်။

ထိုအချိန်တွင် သူ့ဘော့စ်က ဖြေခဲ့သည် : “ အရှင် Marshal လောက်ပဲ ဖိတ်နိုင်မယ်မလား? ‘Lola’ က ဘယ်သူ့အတွက် တည်ရှိနေလဲကတော့... ဘယ်သူက သိမှာလဲ? ”

“Lola” အဖွဲ့အစည်းက အရှင် Marshal ရဲ့ ပိုင်ဆိုင်မှု ဖြစ်လောက်တယ်ဆိုတော့... တကယ်တော့ သူ့သားက ဆေးကုသဖို့ အခွင့်အရေးရတာ အရှင် Marshal ကြောင့်ပဲ ဟုတ်တယ်မလား?

အရှင် Marshal က သူ့ကို ကယ်တင်ခဲ့ပြီး သူ့သားငယ်ကိုလည်း ကယ်တင်ခဲ့ကာ သူ့သားကြီးအပေါ်တွင်လည်း စိတ်ရင်းစစ်မှန်သည်...

ရှဝေချန်သည် တဝဲလည်လည် ဆက်တွေးနေရန် မလိုတော့ဟု ရုတ်တရက် ခံစားလိုက်ရသည်။

ဘာပဲဖြစ်ဖြစ် သူ ဆက်တွေးနေလျှင်ပင် အသုံးမဝင်ချေ။

ရှမိသားစုသည် စိတ်လှုပ်ရှားစွာဖြင့် ဆေးရုံသို့ သွားခဲ့ပြီး ဤအချိန်တွင် ယန်ကျင်းဇီသည် အဝတ်အစားတစ်စုံနှင့် ကားပျံတစ်စင်းတို့ကို ပြောင်းလဲပြီးဖြစ်ကာ စစ်ဌာနချုပ်သို့ တို

က်ရိုက်သွားခဲ့သည်။

တပ်ကြီးရှစ်၏တပ်မှူးကို သူ သွားတွေ့မည်။

မူလပိုင်ရှင်၏ကိုယ်တွင် ပြဿနာရှိစဉ် ခေါင်းကြွလာသူများကို ရိုက်နှက်ဆုံးမသင့်သည်။

ဖုဖေး၏ကျောထောက်နောက်ခံအဖြစ် ရှိနေသူဟာလည်း ကျဆုံးသင့်၏။

____