Chapter 2

🎶 Chapter 2

ဘာကိုမှဂရုစိုက်ပုံမရသော သူ၏တူကဲ့သို့ချစ်ရသည့် ယဲ့ဇယ်ရှစ်ကိုကြည့်၍ လီချန်ကျန့် သက်ပြင်းချလိုက်မိသည်။ ထို့နောက် ကြင်နာသောလေသံဖြင့် သတိထား၍ပြောလိုက်သည်။

"မင်းအဖေ မနေ့ညက ငါ့ကို ဖုန်းဆက်တယ်...ဒီတစ်ခေါက်တော့ သူမင်းကို တော်တော်စိတ်ဆိုးနေပုံရတယ်...မင်းရဲ့ ဘဏ်ကတ်တွေအကုန်လုံးကို တစ်နှစ်ပိတ်လိုက်ပြီတဲ့..."

ယဲ့ဇယ်ရှစ်၏မျက်နှာက ရုတ်တရက် အံ့ဩကြောင်အသွား၍ ဦးနှောက်က အလုပ်မလုပ်ရသေးမီမှာပင် ပါးစပ်ကမေးလိုက်မိသည်။

"ဘာဖြစ်လို့ အဖေက ကျွန်တော့်ကတ်တွေအကုန်လုံးကို တစ်နှစ်ပိတ်လိုက်တာလဲ..."

လီချန်ကျန့်က အနားမှလူများကို မျက်လုံးတစ်ချက်ဝေ့ကြည့်လိုက်၍ ယဲ့ဇယ်ရှစ်ကို ဘေးသို့ဆွဲခေါ်ကာ အသံတိုးတိုးဖြင့်ပြောလိုက်သည်။

"မင်း ဘာဖြစ်လို့ မနေ့ညက မင်းအဖေ ဖုန်းခေါ်တာကို မကိုင်တာလဲ..."

ယဲ့ဇယ်ရှစ်က နားမလည်ဘဲ ဖုန်းကိုထုတ်ကာ ဖုန်းအဝင်စာရင်းကို ဖွင့်ကြည့်လိုက်ပြီးမှ အံ့ဩစွာပြောလိုက်သည်။

"ကျွန်တော့်ဖုန်းထဲမှာ ဘာ missed call မှမရှိဘူးလေ..."

ယဲ့ဇယ်ရှစ်က ထိုသို့ပြော၍ လီချန်ကျန့်အား အပြစ်ကင်းစင်၍ သူ 'မတရားလုပ်ခံရပါတယ်' ဟူသောပုံလေးဖြင့် မော့ကြည့်လိုက်သည်။ ထို့နောက် နှစ်စက္ကန့်အကြာတွင် တစ်စုံတစ်ခုကိုသတိရသွား၍ ယဲ့ဇယ်ရှစ်က တုန်ယင်နေသောလက်ဖြင့် ဖုန်းထဲမှ block လုပ်ထားသောဖုန်းနံပါတ်များကို ဖွင့်ကြည့်လိုက်သည်။ ထိုစာရင်းထဲတွင် အဖေယဲ့၏ ဖုန်းနံပါတ်က တိတ်တဆိတ်လေး ရှိနေလေသည်။ 

ယဲ့ဇယ်ရှစ်: "..."

ကူးပြောင်းလာတာတစ်ရက်ပဲရှိသေးတယ်...ထောင်ချောက်ဆင်ခံလိုက်ရပြီ...

လီချန်ကျန့်က ယဲ့ဇယ်ရှစ်အား သနားသည့်ပုံဖြင့် ကြည့်လိုက်သည်။

"ဘာမှမဖြစ်ပါဘူး...စိတ်အေးအေးထား...မင်းအဖေ စိတ်ဆိုးလည်း တစ်ရက် နှစ်ရက်ပေါ့...မင်း ဒီပြိုင်ပွဲမှာ အဆင့်ကောင်းကောင်းရရင် ဒီကတ်တွေကို စောစောပြန်ဖွင့်ပေးဖို့ စဉ်းစားမယ်လို့လည်း ပြောသွားတယ်..."

ယဲ့ဇယ်ရှစ်ကမူ လီချန်ကျန့်ပြောနေသည်ကို နားမဝင်နိုင်ဖြစ်ကာ အလွန်ဝမ်းနည်းနေမိသည်။

"ဦးလေး...ကျွန်တော့်မှာ ပိုက်ဆံဘယ်လောက်ကျန်သေးလဲသိလား..."

လီချန်ကျန့်၏မျက်လုံးများတွင် ယဲ့ဇယ်ရှစ်ကို ပို၍ပင်သနား၍ စိတ်မကောင်းဖြစ်သည့်အရိပ်အယောင်များ ဖုံးသွားသည်။

"ဇယ်ရှစ်...ငါတို့ အစမ်းလေ့ကျင့်တဲ့ ပထမဆုံးနေ့မှာပဲ မင်းနဲ့မင်းအဖေ ရန်ဖြစ်ပြီး မင်းရဲ့ ဘဏ်ကတ် အခု ၂၀ လုံးကို မင်းအဖေ ပိတ်ချလိုက်တာလေ...မနေ့က အပိတ်ခံလိုက်ရတဲ့ကဆ်က မင်းရဲ့ နောက်ဆုံးကတ်ပဲ..."

ယဲ့ဇယ်ရှစ်: "..."

လီချန်ကျန့်က ဆက်နှစ်သိမ့်နေလိုက်သည်။

"ဒါပေမယ့် စိတ်မပူပါနဲ့...မင်း ဒီရှိုးထဲမှာ ကြာကြာနေနိုင်လေ ပိုက်ဆံပိုရလေပဲ...ပြီးတော့ ဒီရှိုးမှာနေနေတဲ့ နှစ်လအတွင်း နေစရိတ် စားစရိတ်တွေ ဘာမှမပူရဘူးလေ...ငါတို့ဖွဲ့မယ့် ယောင်္ကျားလေးအဖွဲ့ထဲတောင် မင်းဝင်စရာမလိုပါဘူး...နည်းနည်းလေးကြိုးစားပြီး အဆင့်တစ်ကနေ တစ်ဆယ်အတွင်းဝင်ရင်ကိုပဲ မင်းအဖေက ဝမ်းသာပြီး မင်းရဲ့ကတ်တွေကို အကုန်ပြန်ဖွင့်ပေးရင် ဖွင့်ပေးမှာပေါ့..."

[T/N: ယောင်္ကျားလေးအဖွဲ့ - Idol boy group။ Kpop အဖွဲ့တွေလိုမျိုး ယောင်္ကျားလေးတွေနဲ့ပဲဖွဲ့ထားတဲ့ အဆိုတော်အဖွဲ့ကိုပြောတာပါ။]

ဒုတိယမျိုးဆက်သူဌေးသား ငါးဆားနယ်လေး၏ဘဝသည် မစရသေးခင်မှာပင် ပြီးဆုံးသွားသောကြောင့် ယဲ့ဇယ်ရှစ် ရယ်ပင်မရယ်နိုင်တော့ချေ။

ယဲ့ဇယ်ရှစ်လည်း အခြားရွေးချယ်စရာလမ်းမရှိဘဲ ဤပြိုင်ပွဲကိုသာ ဆက်ပြိုင်ရတော့ပေမည်။ သူ့လက်ထဲ၌ တကယ်ပင် ပိုက်ဆံက ရှိမနေပေ။ မူလယဲ့ဇယ်ရှစ်၏ PayPal၊ WeChat နှင့် ပိုက်ဆံအိတ်ထဲမှ ရှိသမျှပိုက်ဆံများအားလုံးပေါင်းမှ ယွမ် ၅၀၀၀ သာရှိသည်။ ယဲ့ဇယ်ရှစ် ညကပင် ကြည့်ထားခြင်းဖြစ်သည်။ 

အခုခေတ်သူဌေးသားလေးတွေက ပိုက်ဆံတွေကို တစ်နေရာထဲမှာ စုမထည့်ဘဲ နေရာတွေအများကြီးမှာ ခွဲထည့်ထားရတယ်ဆိုတာကို မသိကြဘူးလား...

ယဲ့ဇယ်ရှစ်၏နှုတ်ခမ်းထောင့်မှ အပြုံးက အသက်မပါဘဲ တောင့်တင်းနေတော့သည်။

ထားလိုက်ပါတော့...

ဤပြိုင်ပွဲ၌ပြိုင်ရခြင်းကို အနာဂတ်အတွက် အတွေ့အကြုံရသည်ဟုသာ ယဲ့ဇယ်ရှစ် သဘောထားလိုက်တော့မည်။ 

ထို့အပြင် ယဲ့ဇယ်ရှစ်၏ယခင်ဘဝတွင်လည်း လူရွေးပွဲတစ်ခုမှ ယောင်္ကျားလေးအဖွဲ့ဝင်တစ်ယောက်အနေဖြင့် အနုပညာလောကထဲသို့ ပွဲဦးထွက်ခဲ့ခြင်းဖြစ်သည်။ ထိုကဲ့သို့ အောက်ဆုံးအဆင့်မှစ၍ တဖြည်းဖြည်းကြိုးစားလာရင်းမှ နာမည်ကြီးမင်းသားတစ်ယောက်ဖြစ်လာခဲ့ခြင်းဖြစ်သည်။ 

ထို့ကြောင့် ဤဘဝတွင်လည်း ယောင်္ကျားလေးအဖွဲ့ဝင်အနေဖြင့် ပြန်လုပ်ရခြင်းမှာ ဂိမ်းတစ်ခုလုံးကို ပြီးအောင်ဆော့ပြီးသွားသူတစ်ယောက်က ယခုမှ အဆင့်တစ်က ပြန်စသည်နှင့် တူနေသည်။

ထို့အပြင် ယခုပြိုင်ပွဲက ယောင်္ကျားလေးအဆိုတော်အဖွဲ့ရွေးချယ်သည့် ပြိုင်ပွဲဖြစ်သည်။ 

ယောင်္ကျားလေးအဖွဲ့ လူရွေးပွဲဆိုတော့ လူတိုင်းက ချောနေကြမှာပဲ...

ယဲ့ဇယ်ရှစ်က လိင်တူချစ်ကြိုက်သူ gay တစ်ယောက်ဖြစ်သော်လည်း ယခင်ဘဝက သူ၏သရုပ်ဆောင်အလုပ်နှင့်သာ အလုပ်ရှုပ်နေခဲ့မိသည်။ ထို့အပြင် သူ၏ယခင်ဘဝက ကမ္ဘာက လိင်တူချစ်ကြိုက်ခြင်းများကို လက်မခံပေ။ ထိုကဲ့သို့ လိင်တူခြင်းချစ်ကြိုက်ရန်ဆိုသည်မှာ စိတ်ကူးထဲ၌သာရှိ၍ လက်တွေ့လုပ်ဆောင်ရန်မှာ အလွန်ခက်ခဲသောအလုပ်ဖြစ်သည်။

ယခုတွင် မတူတော့ပေ။ ယဲ့ဇယ်ရှစ်မှတ်မိနေသည်သာ မှန်ကန်ပါက ဤဝတ္ထုက သန်းမေ့ဝတ္ထုဖြစ်သည်။ အဓိကဇာတ်ဆောင် ယောင်္ကျားလေးနှစ်ယောက်၏ဇာတ်လမ်းကို ပံ့ပိုးရန် စာရေးဆရာက ဝတ္ထုထဲမှကမ္ဘာကိုလည်း ထိုဇာတ်ကောင်နှစ်ယောက် လွတ်လပ်စွာ ချစ်ကြိုက်နိုင်ရန် ဖန်တီးထားတတ်သည်။ ထို့ကြောင့် ဤကမ္ဘာထဲ၌ လိင်တူလူနှစ်ယောက်သည် ချစ်ကြိုက်ရုံမက လက်ပင်ထပ်နိုင်သေးသည်။ 

တစ်နည်းပြောရလျှင် ဤကမ္ဘာ၌ ယဲ့ဇယ်ရှစ် ချစ်ခွင့်ရပြီဖြစ်သည်။ 

အင်း...

ထိုအကြောင်းကိုတွေး၍ ယဲ့ဇယ်ရှစ်၏ အပြုံးက ပို၍ အသက်ဝင်လာကာ စကားပြောနေဆဲဖြစ်သော လီချန်ကျန့်ကို ဖြတ်ပြောလိုက်သည်။

"ဦးလေး...ဒီရှိုးမှာ ကျွန်တော်တို့က ဘယ်လောက်ရမှာလဲ..."

ယဲ့ဇယ်ရှစ်၏စကားကိုကြားသောအခါ လီချန်ကျန့်မှာ သူ၏ဆွဲဆောင်မှုက အလုပ်ဖြစ်သွားသည်ဟု ထင်ကာ ပြုံး၍ ပြောလိုက်သည်။

"မင်းတို့အားလုံးက ပွဲဦးမထွက်ရသေးတဲ့ သင်တန်းသားတွေဆိုတော့ ဒီလူရွေးပွဲမှာပါတဲ့ သင်တန်းသားတိုင်းက အောက်ခြေ ယွမ် ၂၀,၀၀၀ ရမယ်...နောက်ပိုင်းမှာ သင်တန်းသားတိုင်းရဲ့ စွမ်းဆောင်ရည်ကိုကြည့်ပြီး တစ်ယောက်ချင်းစီက အမြင့်ဆုံး ယွမ် ၂၀၀,၀၀၀ ထိရနိုင်မယ်..."

တစ်နည်းဆိုရလျှင် ယဲ့ဇယ်ရှစ်က ပထမအဆင့်ကို အောင်မြင်လျှင်ပင် မနက်ဖြန်ည၌ ယွမ် ၂၀,၀၀၀ သာရဦးမည်ဖြစ်သည်။

စိတ်ညစ်ဖို့ကောင်းလိုက်တာ...

"အဆင့်တစ်ကနေ တစ်ဆယ်အတွင်းဝင်တဲ့လူတွေကရော..."

ယဲ့ဇယ်ရှစ်က မေးလိုက်သည်။ 

လီချန်ကျန့်: "ယွမ် ၁၀၀,၀၀၀ ရမယ်..."

ယဲ့ဇယ်ရှစ် အံကြိတ်လိုက်မိသည်။

"ကောင်းပါပြီ...ဒါဆိုလည်း တစ်ကနေ တစ်ဆယ်အတွင်းပေါ့..."

လီချန်ကျန့်၏မျက်လုံးထဲ၌ အံ့ဩသွားသည့် အရိပ်အယောင်က မသိမသာ ဖြတ်သွားသည်။ ယဲ့ဇယ်ရှစ်၏ ရည်မှန်းချက်ကြီးမှုကို သ‌ဘောကျသော်လည်း လီချန်ကျန့်က သူ့တူ အဆင့်တစ်မှ တစ်ဆယ်အတွင်းဝင်ရမည်ဆိုသော ပန်းတိုင်အတွက် ယုံကြည်ချက်မရှိလှချေ။ သို့သော်လည်း ပြုံးကာ ပြောလိုက်သည်။

"ဒီလိုမှပေါ့...မင်းကိုယ်မင်း ယုံကြည်ချက်ရှိဖို့ပဲလိုတာ...မင်းက သီချင်းဆိုတာရော ကတာရော မကောင်းပေမယ့် ဒီလူရွေးပွဲက အဆိုနဲ့ အကကိုပဲ ကြည့်တာမဟုတ်ဘူးလေ...မင်းရဲ့မျက်နှာနဲ့ဆိုရင် ပရိသတ်တွေက မင်းကို မဲမပေးမှာ စိတ်ပူစရာမလိုပါဘူး ဟုတ်တယ်မလား..."

ရှိုးတွင် ယဲ့ဇယ်ရှစ်၏ ချောမောကြည့်ကောင်းသည့်ရိုက်ချက်များထည့်ပေးလိုက်လျှင် အင်တာနက်အသုံးပြုသူ များအား ပို၍ပင် ဆွဲဆောင်နိုင်လိမ့်ဦးမည်ဟု လီချန်ကျန့် တွေးလိုက်သည်။

သို့သော်လည်း လီချန်ကျန့်က ထိုအကြောင်းကို ပါးစပ်မှထုတ်‌မပြောဘဲ နောက်မှပင် ထုတ်လုပ်ရေးအဖွဲ့နှင့် တိုင်ပင်ရန် စိတ်ကူးလိုက်သည်။ 

ယဲ့ဇယ်ရှစ်က လီချန်ကျန့်နှင့် ခဏကြာ စကားဆက်ပြောနေလိုက်သည်။ မကြာမီ၌ အစမ်းလေ့ကျင့်ခြင်းက စတော့မည်ဖြစ်သောကြောင့် လီချန်ကျန့်လည်း သူ့နေရာဆီသို့ ပြန်သွားသောအခါတွင် ယဲ့ဇယ်ရှစ်လည်း နားနေခန်းသို့ ပြန်လာလိုက်သည်။

ယဲ့ဇယ်ရှစ် နားနေခန်းသို့ လျှောက်သွားနေချိန်တွင် လူတစ်‌ယောက်က မည်သည့်နေရာကမှန်းမသိ ပေါ်လာကာ ယဲ့ဇယ်ရှစ်ရှေ့မှ ပိတ်ရပ်လိုက်သည်။ 

ယဲ့ဇယ်ရှစ်ရှေ့၌ ရပ်နေသော ထိုလူက ရိုးရိုးတီရှပ်အဖြူနှင့် အညိုရောင်ဘောင်းဘီကိုသာ ဝတ်ဆင်ထားသော်လည်း သူ၏ အချိုးအစားကျနသော ခန္ဓာကိုယ်က ပေါ်လွင်နေသည်။ သူ့ဘာသာသူဆိုလျှင် အရပ်က အတော်ရှည်သော်လည်း ယဲ့ဇယ်ရှစ်နှင့် ယှဉ်လျှင် ခေါင်းတစ်ဝက်စာခန့် နိမ့်နေသည်။ 

ယဲ့ဇယ်ရှစ်က သူ့ရှေ့မှလူငယ်လေး၏မျက်နှာကို ကြည့်လိုက်မိသည်။ ထိုလူငယ်လေး၏အသားအရည်က ဖြူဖွေး၍ အညိုရောင်ဆံပင်များနှင့် ဖြောင့်တန်းနေသာ မျက်ခုံးတစ်စုံတို့ဖြင့် အတော်ချောမောသူတစ်ယောက်ဖြစ်လေသည်။ 

သို့သော်လည်း ထိုချောမောသောလူငယ်လေးက ယဲ့ဇယ်ရှစ်အား ဒေါသအမျက်ချောင်းချောင်းထွက်နေသောမျက်လုံးများဖြင့် စိုက်ကြည့်နေလေသည်။ 

ယဲ့ဇယ်ရှစ်က ဤကမ္ဘာဆီသို့ ယခုမှကူးပြောင်းလာသည်ဖြစ်သောကြောင့် သူ၏ စကားအပြောအဆိုနှင့် အမူအရာများကို အလွန်သတိထားနေရသည်။ သူက မည်သူနှင့်မှလည်း ရန်သူမဖြစ်ချင်၍ ဤကဲ့သို့ ချောမောသည့်လူငယ်လေးမျိုးနှင့်ဆိုလျှင် ပို၍ပင် မဖြစ်ချင်သေးသည်။ 

ယခု အခြေအနေကို ကြည့်ရခြင်းဖြင့် သူ့ရှေ့မှ လူငယ်လေးက မူလပိုင်ရှင်ယဲ့ဇယ်ရှစ်နှင့် တစ်ခုခုအဆင်မပြေထားပုံရလေသည်။ 

ယဲ့ဇယ်ရှစ်က ဤကဲ့သို့ ချောမောသောကောင်လေးနှင့် အချေအတင်မဖြစ်လိုချေ။ ထို့ကြောင့် သဘောကောင်းစွာ ပြုံးလိုက်၍ ခပ်တိုးတိုးပြောလိုက်သည်။

"ဘာဖြစ်လို့လဲ...ငါ့ကို လိုက်ရှာ..."

"ဟန်ဆောင်မနေနဲ့ ယဲ့ဇယ်ရှစ်..."

သူ့ရှေ့မှ ကောင်ချောလေးက စကားကိုဖြတ်ပြောလိုက်သောကြောင့် ယဲ့ဇယ်ရှစ် ဆက်ပြောမည့်စကားပင် နင်သွားရသည်။ ကောင်ချောလေး၏မျက်လုံးများက နီနေကာ လက်သီးများကိုလည်း ကျစ်ကျစ်ပါအောင်ဆုပ်ထားသောကြောင့် သူက ဒေါသကို မနည်းထိန်းထားရဟန်ပေါက်နေသည်။

"မနှစ်တည်းကစတာ အခုဆို တစ်နှစ်ရှိပြီ...မင်း ငါ့ကို နှောင့်ယှက်နေတာ ဘယ်တော့မှရပ်မှာလဲ...မနေ့ကဆို မင်းလုပ်နေတာတွေကို လူတိုင်း..."

ကောင်ချောလေးက ဒေါသတကြီးပြောလိုက်ပြီးမှ ရှက်သွား၍ ဆက်မပြောရဲတော့သလိုရပ်သွားကာ အကြည့်ကို လွှဲလိုက်သည်။

ထိုစကားများထဲ၌ အချက်အလက်များ တော်တော်စုံစုံလင်လင်ပါသွား၍ ယဲ့ဇယ်ရှစ်က ချက်ချင်းပင် သူ့ရှေ့မှ လူဘယ်သူမှန်းသိသွားတော့သည်။

ထန်ကျင့်...

ထန်ကျင့်နှင့်ပတ်သတ်၍ ရှင်းပြစရာများစွာရှိနေသည်။ 

ဝတ္ထုထဲတွင် မူလခန္ဓာကိုယ်ပိုင်ရှင်ယဲ့ဇယ်ရှစ်က Time Idol လူရွေးပွဲသို့ ဝင်လာရသည့်အကြောင်းရင်းမှာ ထန်ကျင့်ကို လိုက်ရန်ဖြစ်သည်။ 

အဲဒီလိုဆိုတော့ ထန်ကျင့်က ဘယ်သူလဲ...

ထန်ကျင့်က ဤဝတ္ထုထဲမှ အဓိကဇာတ်ဆောင်ဖြစ်သည်။ မူလယဲ့ဇယ်ရှစ်က ထန်ကျင့်ကို လိုက်ရာ၌ ပက်ပက်စက်စက် ကျရှုံးခဲ့ရုံမျှမက ထန်ကျင့်က မူလယဲ့ဇယ်ရှစ်အား အစတည်းက လှည့်၍ပင် မကြည့်ခဲ့ချေ။ 

ထို့ကြောင့် မူလယဲ့ဇယ်ရှစ်လည်း ရှက်စိတ်ဖြင့် သူ့မိသားစု၏ အနုပညာအသိုင်းအဝိုင်းထဲရှိသော ဩဇာအရှိန်အဝါကိုသုံး၍ ထန်ကျင့်၏ တက်လမ်းမှန်သမျှကိုပိတ်ကာ အမျိုးမျိုးခက်ခဲအောင် လုပ်ခဲ့သည်။ 

မူလယဲ့ဇယ်ရှစ်၏ သေဆုံးခြင်းကလည်း ထိုကိစ္စနှင့် ဆက်စပ်နေလေသည်။

ထိုအကြောင်းများကို ပြန်သတိရသွားပြီးသောအခါမှ သူ့ရှေ့မှ ထန်ကျင့်က အဘယ်ကြောင့် ဤကဲ့သို့ ဒေါသတကြီးမျက်နှာဖြစ်နေရသည်ကို ယဲ့ဇယ်ရှစ် သိသွားတော့သည်။

ကျန်းရန်နှင့် အခြားလူများက မူလယဲ့ဇယ်ရှစ်မှာ ထန်ကျင့်အား လိုက်နေသည်ဟု ပြောခဲ့သည်မှာလည်း မထူးဆန်းချေ။ 

တကယ်လည်း မှန်နေတာကိုး...

ယဲ့ဇယ်ရှစ်က သူ့ကိုယ်သူ ထန်ကျင့်၏နေရာ၌ ဝင်ခံစားလိုက်မိသည်။ မိမိ သိပင်မသိသူတစ်ယောက်က မိမိအား အတင်း မရမကလိုက်၍ မအောင်မြင်သောအခါ ထိုလူက မိမိ၏ အလုပ်၌တိုးတက်ရာတိုးတက်လမ်းမှန်သမျှကို ပိတ်ပင်နေသည်ဆိုလျှင်...

ယဲ့ဇယ်ရှစ်က စဉ်းစားရင်းဖြင့်ပင် လက်သီးကို ကျစ်ကျစ်ပါအောင် ဆုပ်လိုက်မိသည်။ 

မိမိရှေ့မှ ဒေါသတကြီးဖြစ်နေသော ထန်ကျင့်ကို ကြည့်၍ သူ့အခြေအနေကို ယဲ့ဇယ်ရှစ် နားလည်သွားသည်။

ငါ တစ်ခုခုပြောသင့်တယ်မလား...

ယဲ့ဇယ်ရှစ်က ထန်ကျင့်၏မျက်လုံးများကို တည့်တည့်စိုက်ကြည့်၍ အလွန်တည်ငြိမ်လေးနက်သောအသံဖြင့် ပြောလိုက်သည်။

"ငါ တောင်းပန်ပါတယ်..."

ယဲ့ဇယ်ရှစ် ထိုစကားကိုပြောလိုက်သည်နှင့် အရှေ့မှ ထန်ကျင့်က ရုတ်တရက် လန့်ဖြန့်သွားသည်။

ငါ နားကြားလွဲနေတာလား...

ထန်ကျင့် ပြန်ပြောမည်ကို မစောင့်ဘဲ ယဲ့ဇယ်ရှစ်က ဆက်ပြောလိုက်သည်။

"မင်းကို တစ်ချိန်လုံးနှောင့်ယှက်နေမိတာ ငါ့အပြစ်ပါ...အဲဒီအတွက် ငါတောင်းပန်ပါတယ်...နောက်ကျရင်လည်း ဒီလိုမျိုး ကိစ္စတွေ ဘယ်တော့မှထပ်မဖြစ်ဖို့ ငါ ကတိပေးပါတယ်..."

ယဲ့ဇယ်ရှစ်: " မင်း ငါ့ကို ခွင့်လွှတ်ပေးဖို့ တောင်းဆိုနေတာလည်းမဟုတ်ဘူး...ဒီတိုင်း ငါ အရင်ကလို အမှားမျိုးတွေ မလုပ်တော့ဘူးဆိုတာပဲ မင်းကို သိစေချင်လို့...ငါ့ကို မင်းတွေ့ရတာလည်း ဒါနောက်ဆုံးအကြိမ်ပါပဲ...ငါ ဒီပွဲကနေ ပြုတ်တာနဲ့ တစ်ပြိုင်နက် မင်းရှေ့ကို လုံးဝမပေါ်မလာဖို့ ကတိပေးပါတယ်..."

"ဒါပေမယ့် ငါ ဒီပွဲကနေ မပြုတ်သေးသရွေ့တော့ မင်း ငါ့ကို တွေ့နေရဦးမှာမို့လို့ ငါ ကြိုပြီး တောင်းပန်ထားပါမယ်..."

ဒီလောက်ချော‌တဲ့ကောင်လေးက စိတ်ဆိုးနေမှတော့ ငါ တောင်းပန်ရုံကလွဲပြီး တခြားဘာလုပ်ရဦးမှာလဲ...

ယဲ့ဇယ်ရှစ်၏မျက်လုံးများက အမှန်ကိုပြောနေကြောင်း ထင်ဟပ်နေ၍ မျက်နှာကလည်း လေးနက်နေသည်။ သူ ‌ထိုစကားများပြောနေချိန်တစ်လျှောက်လုံးလည်း သူ လိမ်မနေကြောင်း သိစေရန် ထန်ကျင့်၏မျက်လုံးများကို တစ်ချိန်လုံး စိုက်ကြည့်နေခဲ့သည်။ 

ထန်ကျင့်လည်း ကြောင်တောင်တောင်ဖြစ်နေမိသည်။ သူ့ကို တစ်ချိန်လုံး လိုက်နှောင့်ယှက်နေခဲ့သော ဒုတိယမျိုးဆက်သူဌေးသား ယဲ့ဇယ်ရှစ်က ယခု သူ့အား စိတ်ပါလက်ပါတောင်းပန်နေ၍ နောင်အနာဂတ်‌တွင်လည်း လုံးဝမပတ်သတ်တော့ပါ ဟုပြောနေလိမ့်မည်ဟု ထန်ကျင့် လုံးဝမထင်ထားခဲ့မိချေ။

ငါ အိပ်မက်မက်နေတာလား...

ထန်ကျင့်က ယဲ့ဇယ်ရှစ်အား မယုံသင်္ကာစွာကြည့်လိုက်သည်။ ထန်ကျင့်ရှေ့မှ အမျိုးသားက သူ၏ အလွန်ဆွဲဆောင်မှုရှိသော ပန်းရောင်ဆံပင်များကြောင့် အသားအရေက ပို၍ပင် ဖြူဖွေးနေသည့်ပုံပေါက်နေသည်။ ပြုံးမနေသည့်အချိန်တွင် ယဲ့ဇယ်ရှစ်၏မျက်လုံးများက အနည်းငယ်မှေးစင်း၍ အရာရာကို ကန့်လန့်တိုက်မည့်အရိပ်အယောင်များ ပေါ်နေကာ "ငါ့ကို ရန်လာမစနဲ့" ဟု သတိပေးနေသယောင်ယောင် ဖြစ်နေသည်။ 

သို့သော် ယခုအခိုက်အတန့်တွင်မူ ယဲ့ဇယ်ရှစ်က ပြုံးနေ၍ ထိုမျက်လုံးထဲများ၌ မြင်နေကျဖြစ်သော ကြမ်းတမ်းသည့်အငွေ့အသက်များပျောက်နေကာ နူးညံ့မှုများသာ ကျန်နေလေသည်။ 

ထန်ကျင့်လည်း မနေနိုင်ဘဲ ယဲ့ဇယ်ရှစ်၏မျက်နှာမှ အကြည့်မလွှဲနိုင်ဖြစ်သွားသည်။ 

ယဲ့ဇယ်ရှစ်ကလည်း ထန်ကျင့် သူ့အား ကြည့်နေသည်ကို သတိထားမိသောကြောင့် ရင်ထဲမှလာသောအပြုံးကို နှစ်နှစ်ကာကာ ပြုံးပြလိုက်သည်။ 

အမှန်တွင် ယဲ့ဇယ်ရှစ်က အလွန်ချောမောသူဖြစ်သည်။ ယခင်က အခြားလူများက သူ၏ ဆောင့်ကြွားကြွားနှင့် ကြမ်းတမ်းသောအမူအရာများကိုသာ တွေ့၍ တစ်ခါကြည့်ပြီးလျှင် ပြန်လှည့်မကြည့်ချင်ကြတော့ချေ။

သို့သော် ယခုတွင်မူ ယဲ့ဇယ်ရှစ်၏မျက်နှာပေါ်၌ ထန်ကျင့် မမြင်ဖူးသည့် နူးညံ့မှုများကို မြင်နေရလေသည်။ 

သေချာကြည့်တော့မှ...ယဲ့ဇယ်ရှစ်က တကယ်ကိုချောတာပါလား...

ထိုသို့တွေးလိုက်မိသောအခါ ထန်ကျင့်၏ မျက်နှာအမူအရာက သိသိသာသာပင်ပြောင်းသွားတော့သည်။ 

"အေး မင်းပြောတဲ့အတိုင်းဖြစ်ပါစေ..."

ထန်ကျင့်က ခပ်ရှက်ရှက်ပြောလိုက်ပြီး ယဲ့ဇယ်ရှစ်၏မျက်နှာကို မကြည့်တော့ဘဲ လှည့်ထွက်သွားတော့သည်။ 

ထန်ကျင့်၏နောက်ကျောကိုကြည့်၍ ယဲ့ဇယ်ရှစ်လည်း ထိုအခါမှပင် သက်ပြင်းချနိုင်တော့သည်။

ထန်ကျင့်တစ်ယောက် ယဲ့ဇယ်ရှစ်က မူလယဲ့ဇယ်ရှစ်မဟုတ်တော့သည်ကို သိပုံမရသောကြောင့် ယဲ့ဇယ်ရှစ်၏သရုပ်ဆောင်မှုက အလွန်ကောင်းသွားဟန်တူသည်။ 

အေးလေ...ငါ့လိုလူကမှ သရုပ်ဆောင်မကောင်းရင် ဘယ်သူက ကောင်းဦးမှာလဲ...

ယဲ့ဇယ်ရှစ်လည်း ပြုံးလိုက်၍ ထန်ကျင့် ထွက်သွားသောဘက်သို့ လျှောက်သွားလိုက်သည်။ ‌

နားနေခန်းက အဲ့ဘက်မှာ ရှိနေတာမလား…

...

ယခုနှစ်ပိုင်းတွင် ယောင်္ကျားလေးအဖွဲ့လူရွေးချယ်ခြင်းရှိုး များက နာမည်အတော်ကြီးလာ၍ Time Idol ပြိုင်ပွဲကိုလည်း လူပေါင်းများစွာက စိတ်ဝင်တစားဖြစ်နေကြသည်။ 

လီချန်ကျန့်က နိုင်ငံ၏ ပထမဆုံးသော ယောင်္ကျားလေးအဖွဲ့ကိုဖွဲ့ချင်သောကြောင့် ထိုပြိုင်ပွဲကို စီစဉ်ခဲ့ခြင်းဖြစ်သည်။ ပြိုင်ပွဲဝင်ပေါင်း အယောက် ၁၀၀ ထဲကမှ လေးယောက်သာ ရွေးမည်ဖြစ်သောကြောင့် လူများရွေးချယ်သည်ကို သေချာစိစစ်နေရသည်။  

ထိုပြိုင်ပွဲဝင်အယောက် ၁၀၀ ထဲမှ အများစုမှာ နိုင်ငံအနှံ့ရှိ နာမည်ကြီးဖျော်ဖြေရေးကုမ္ပဏီများမှ အကောင်းဆုံးသင်တန်းသားများဖြစ်ကြသည်။ သို့သော် ထိုအထဲ၌ ပွဲဦးထွက်ပြီးသားဖြစ်သော်လည်း နာမည်မရသေးသည့် ထန်ကျင့်ကဲ့သို့ လူများလည်း ပါနေသည်။ 

ထိုသင်တန်းသားများအားလုံးကို တစ်ယောက်ချင်းစီ စိစစ်ရန်က မလွယ်ကူသောကြောင့် ရုပ်လေးသာချော၍ မည်သည့်စွမ်းရည်မှမရှိသော ယဲ့ဇယ်ရှစ်ကဲ့သို့ လူများလည်း ရှိနေလေသည်။ 

ထိုအကောင်း အဆိုး အကုန်ရောနှောနေသော သင်တန်းသား အယောက် ၁၀၀ တို့ဖြင့် ယနေ့ Time Idol ပြိုင်ပွဲကို စတင်တော့မည်ဖြစ်သည်။ 

Time Idolက အခြားရသစုံရှိုးများနှင့်မတူဘဲ ကွဲပြားစွာ ဆန်းသစ်ထားသည်။ ရှိုး၌ပါဝင်မည့် ပြိုင်ပွဲဝင်သင်တန်းသားများနှင့် နည်းပြများ၏နာမည်ကို အစောကြီးတည်းက မဖော်ပြထားဘဲ ယနေ့ ရှိုးကို ပထမဆုံး ထုတ်လွှင့်သည့်နေ့မှပင် ပါဝင်သူများကိုလည်း ထုတ်ပြမည်ဖြစ်သည်။ 

ထိုသတင်းထွက်လာသည်နှင့် တစ်ပြိုင်နက် Time Idol ပွဲအား တိတ်တဆိတ်စောင့်မျှော်နေကြသော ပရိသတ်များ အလွန်စိတ်လှုပ်ရှားကုန်ကြတော့သည်။ 

Time Idolက မည်သည့်သတင်းမှမထုတ်ပြန်ဘဲ လပေါင်းများစွာ ရိုက်ကူးရန်ပြင်ဆင်နေခဲ့၍ ယခု စထုတ်လွှင့်သည်နှင့် တစ်ပြိုင်နက် အလွန်ပေါက်သွားတော့သည်။

မနက်တွင် အင်တာနက်ပေါ်၌ Time Idol နှင့်ပတ်သတ်သော ရှာဖွေခြင်းများက trending ဖြစ်နေတော့သည်။ 

မကြာမီတွင် Time Idol ၏ တရားဝင်ဝက်ဘ်ဆိုက်မှ နှစ်မိနစ်စာ ဗီဒီယိုတစ်ခု တင်ပေးလိုက်သည်။ 

ဗီဒီယိုမှာ ပြိုင်ပွဲဝင်များ လေ့ကျင့်ရေးလုပ်နေသည့်ဗီဒီယိုဖြစ်သည်။ များစွာသော ချောမောလှပသည့် မျက်နှာများကြားထဲတွင် ပရိသတ်များနှင့် ရင်းနှီးပြီးသားဖြစ်သော မျက်နှာအချို့လည်း ပါလာသည်။ 

အမြင်စူးရှသော အချို့ အင်တာနက်အသုံးပြုသူ များက စက္ကန့်အနည်းငယ်အကြာမှာပင် ထန်ကျင့်အား ရှာတွေ့သွားတော့သည်။ 

"အဲဒါ ထန်ကျင့်မလား..."

"မနှစ်က "အဆိုတော်သစ်" ရှိုးမှာ တတိယရသွားတဲ့ တစ်ယောက်လား..."

"ဟုတ်တယ် အဲဒါ သူလေ..."

"ဒါဆို သူက အခု ယောင်္ကျားလေးအဖွဲ့လူရွေးပွဲမှာ ထပ်လာပြိုင်နေတာပေါ့...သူ့အသံလေး မကြားရတာတောင် တော်တော်ကြာနေပြီ...အရင်ကလို ကောင်းနေတုန်းပဲ..."

"သူတို့ဆိုနေတဲ့သီချင်းရဲ့နာမည်က ဘာလဲ...နားထောင်လို့ကောင်းလိုက်တာ..."

"..."

"နေဦး...ဟို ဘယ်ဘက်ထောင့်စွန်းက တစ်‌ယောက်က တကယ်မဆိုဘဲ နှုတ်ခမ်းပဲလှုပ်နေသလိုပဲ..."

"တကယ်လား...အဲဒီ ဆံပင်ပန်းရောင်နဲ့တစ်ယောက်က ဘယ်သူလဲ...လေ့ကျင့်ရေးလုပ်နေတာတောင် နှုတ်ခမ်းပဲလှုပ်နေစရာလား..."

"သူလုပ်တာနဲ့ ဒီရှိုးကိုတောင် အရမ်းကောင်းမယ်လို့ မထင်တော့ဘူး..."

"အဲဒီ ဆံပင်ပန်းရောင်က ထန်ကျင့်နဲ့တစ်ဖွဲ့တည်းလား...ထန်ကျင့်ကိုကြည့်ရတာ မျက်နှာတော်တော်ပျက်နေသလိုပဲ...ထုတ်လုပ်သူတွေက ထန်ကျင့်ကို တမင်သက်သက်ယုတ်မာပြီး စောစောထွက်ရမယ့်အဖွဲ့ထဲ ထည့်ထားတာလား..."

"အဲဒီဆံပင်ပန်းရောင်က ဘယ်သူလဲ...ထုတ်လုပ်သူတွေက ငါတို့အစ်ကို ထန်ကျင့်ကို တကယ်မကောင်းကြံနေတာပဲ...သူ့လိုလူကို ထန်ကျင့်နဲ့ တစ်ဖွဲ့တည်းထားရတယ်လို့..."

"ထန်ထန် ဘာမှမဖြစ်ပါစေနဲ့ပဲ ဆုတောင်းပါတယ်...မနက်ဖြန် အကောင်းဆုံးကြိုးစားပေးနော်..."

"ထန်ထန် ကံကောင်းပါစေ...မနက်ဖြန် ရှိုးစတာနဲ့ မဲပေးလို့ရမယ့် ချန်နယ်လည်း တစ်ချိန်တည်း ဖွင့်ပေးမယ်လို့ ငါကြားတယ်...ထန်ထန့်ကို မဲပေးဖို့ မမေ့ကြနဲ့နော်..."

"..."

ယဲ့ဇယ်ရှစ် သီချင်းတကယ်မဆိုဘဲ နှုတ်ခမ်းပဲလှုပ်သည့်ကိစ္စက အလွန်နာမည်မကြီးသွားပေ။ 

ထန်ကျင့်က အနုပညာအသိုင်းအဝိုင်း၌ လူသစ်တစ်ယောက်သာဖြစ်သည်။ ပွဲဦးထွက်သည်မှာလည်း တစ်နှစ်သာရှိသေးသောကြောင့် ပရိသတ်လည်း များများစားစားမရှိသေးချေ။ ပို၍ အရေးကြီးသည်မှာ ယဲ့ဇယ်ရှစ်ကလည်း လူသစ်သာဖြစ်သောကြောင့် လူမသိသေးကာ ထိုကိစ္စက ဘာမှမဖြစ်လိုက်ဘဲ ဤအတိုင်းသာ ပြန်ငြိမ်ကျသွားသည်။ 

သို့သော်လည်း ထိုည၌ #ယဲ့ဇယ်ရှစ်က ထန်ကျင့်ကိုလိုက်နေတယ်# ဆိုသော ရှာဖွေမှုက အင်တာနက်ပေါ်၌ အလွန်နာမည်ကြီးသွား၍ ထိုရှာဖွေမှုနှင့် တစ်ဆက်တည်းပါလာသည်က "အရမ်းမိုက်တယ်" ဟူသော စာသားဖြစ်နေမည်ကိုမူ မည်သူမှ မမျှော်လင့်ထားမိခဲ့ကြချေ။

🎶🎶🎶