Chapter 21

🎶 Chapter 21

"ဒီတစ်ခေါက်ပြိုင်ပွဲမှာ အားလုံးကို ပြဿနာတက်စေမိခဲ့တဲ့အတွက် ငါတောင်းပန်ပါတယ်..." 

ထန်ကျင့်က နီရဲနေသော မျက်လုံးများဖြင့် လူတိုင်းအား တောင်းပန်လိုက်သည်။

ယုယန်၏ နှုတ်ခမ်းများ လှုပ်ရှားသွားသော်လည်း ခဏကြာသော် သူ့လည်ချောင်းဝရောက်လာသော စကားတို့အား ပြန်မျိုချလိုက်လေသည်။ 

ဝမ်အန်မှာ ဘာပြောရမည်မသိသောကြောင့် ဆိတ်ဆိတ်သာနေနေသည်။

သို့သော် ကျန်းရန်က ပြောလိုက်သည်။

"အဆင်ပြေပါတယ်... နည်းပြ‌တွေက မဲနှစ်မဲတောင်ပေးခဲ့တာပဲ... ပြီးတော့ ငါတို့ပရိသတ်တွေဆီက ရမယ့် မဲတွေလည်းရှိသေးတာပဲ... ငါတို့မရှုံးနိုင်ပါဘူး ဟုတ်တယ်မလား ယဲ့ဇယ်ရှစ်..."

ယဲ့ဇယ်ရှစ် ခေါင်းညိတ်လိုက်သည်။ သို့သော် စကားမပြောလိုက်ရမီတွင် ရင်းနှီးနေသော အသံတစ်သံကို ကြားလိုက်ရသည်။

"ရှားရှားပါးပါး... ထန်ကျင့်က အမှားလုပ်မိလိမ့်မယ်လို့ ငါဘယ်တုန်းကမှ မထင်ခဲ့မိဘူး..."

လူတိုင်း အနောက်သို့လှည့်ကြည့်လိုက်သောအခါ အလိုက်မသိ လမ်းလျှောက်လာသော စွေ့ယီအား တွေ့လိုက်ရသည်။ သူ၏မျက်နှာပေါ်တွင်လည်း အဓိပ္ပါယ်ဖော်ရခက်သော အပြုံးတစ်ခုက ရှိနေလေသည်။

ကျန်းရန် မျက်မှောင်ကြုတ်လိုက်ကာ အနည်းငယ် စိတ်မသက်မသာ ဖြစ်သွားရသည်။

ယုယန်က ထန်ကျင့်ဖက်မှ ဝင်ကူပြောလေသည်။ 

"လူတိုင်းအမှားနဲ့မကင်းနိုင်ဘူး ပြီးတော့ မင်းလည်း ဒီလောက်မြန်မြန် ပြဿနာရှာဖို့ မကောင်းပါဘူး...ပြောရရင် ပြိုင်ပွဲရဲ့ ရလဒ်တွေကိုတောင် အခုထိ မ‌ကြေညာရသေးဘူးလေ...ဘယ်သူရှုံးမယ် ဘယ်သူနိုင်မယ်ဆိုတာတောင် သေချာမသိသေးပါဘူး...ဟုတ်တယ်မလား ယဲ့ဇယ်ရှစ်..."

ထန်ကျင့် အပါအဝင် အခြားသူများလည်း ယဲ့ဇယ်ရှစ်ကို ကြည့်လာကြသည်။

လူငါးယောက်ရှိသောအဖွဲ့မှာ ယဲ့ဇယ်ရှစ်၏ လွှမ်းမိုးမှုအောက် မသိမသာကျရောက်နေကြလေသည်။

ယဲ့ဇယ်ရှစ်က ယုယန်၏ မေးခွန်းအားမဖြေခဲ့ပေ။ ထိုအစား သူ စွေ့ယီဘက်သို့လှည့်ကြည့်လိုက်သည်။ 

သူ၏လှပကာ ရွှန်းလဲ့နေသော မက်မွန်ပွင့် မျက်ဝန်းများမှာ အနည်းငယ် ပ‌ဟေဠိ ဖြစ်သွားဟန်ရှိလေသည်။ တို့နောက် သူ့ အရှေ့ရှလူအား လေးလေးနက်နက် စူးစိုက်ကြည့်နေခဲ့သည်။ 

စွေ့ယီ ထိုသို့ အကြည့်ခံရသောကြောင့် မသက်မသာ ခံစားလာရလေသည်။ သို့သော် သူ ယဲ့ဇယ်ရှစ်၏ သရုပ်မှန်အား စိုးရိမ်သောကြောင့် သူ့အား မချေမငံ မလုပ်ဝံ့ပေ။ ထို့ကြောင့် သူ သည်းခံကာ မေးလိုက်လေသည်။ 

"ဘာဖြစ်လို့လဲ..."

ထိုအခါမှပင် ယဲ့ဇယ်ရှစ် ပြုံးလိုက်ကာ သူ့မျက်ဝန်းရှိ သံသယတို့မှာလည်းပျောက်ကွယ်သွားလေသည်။ သူ ခေါင်းရမ်းကာ ပြောလိုက်သည်။ 

"ဘာမှမဖြစ်ဘူး...ဒီအတိုင်း မင်း ဒီနေ့လိမ်းလာတဲ့ အောက်ခံမိတ်ကပ်တံဆိပ်ကို သိချင်မိလို့..."

စွေ့ယီမျက်မှောင်ကြုတ်လိုက်သည်။

"ဘာကြီး..."

ယဲ့ဇယ်ရှစ် သူ၏ လက်ချောင်းသွယ်သွယ်လေးဖြင့် မျက်လုံးကိုပုတ်ပြလိုက်ကာ အဓိပ္ပါယ်ပါပါ ပြောလိုက်သည်။

"မင်းရဲ့ပန်ဒါမျက်လုံးတွေကို ကောင်းကောင်း ဖုံးထားနိုင်လို့လေ...အဲဒီတံဆိပ်က ကုမ္ပဏီသာသိသွားရင် မင်းကို ပြောရေးဆိုခွင့်ပုဂ္ဂိုလ်အဖြစ်တောင် အထူးတလည်ဖိတ်ချင် ဖိတ်လာမှာ..."

စွေ့ယီ၏ မျက်နှာအမူအရာ ရုတ်တရက် ပြောင်းလဲသွားလေသည်။

လွန်ခဲ့သည့် ရက်အနည်းငယ်မှ သူနှင့် ထန်ကျင့်တို့ ရန်ပွဲမှရလာသည့်ဒဏ်ရာများမှာ အရှင်းမပျောက်သေးပေ။ ထိုသည်ကို အခြားသူများ မြင်မည်ဆိုးသောကြောင့် ယနေ့အချိန်အထိ မိတ်ကပ်အထူကြီး လိမ်းထားခြင်းဖြစ်လေသည်။ 

ကျန်းရန်က ထိန်းမထားနိုင်တော့ဘဲ "ခွီ" ဟူသည့်ရယ်သံထွက်လာကာ ရယ်လေတော့သည်။ ယဲ့ဇယ်ရှစ်၏ လူများကို ထွက်သွားခိုင်းသည့် ပုံရိပ်မှာ ထိုနေ့က သူ့အားထွက်သွားခိုင်းသည့်ပုံနှင့် တစ်ပုံစံတည်းပင်ဖြစ်လေသည်။

အခြားသူများ၏ မျက်နှာတွင်လည်း ချုပ်ထိန်း၍မရသော အပြုံးများဖြင့်သာမက ထန်ကျင့်၏ နှုတ်ခမ်းမှာလည်း တွန့်ကွေးသွားလေသည်။

"မင်း..."

စွေ့ယီ အံကြိတ်လိုက်သည်။

ယဲ့ဇယ်ရှစ်က လုပ်ယူထားသည့် အံ့ဩသွားဟန်ဖြင့် ပြောလိုက်သည်။

"ငါ...ငါကဘာဖြစ်လို့လဲ..."

"မင်း...မင်းက တကယ်ကို သန်မာပါတယ် ဒါပေမယ့်..."

"ငါသန်မာတာ ငါသိတာပေါ့ အဲ့ဒီလိုကြီးလည်း တကူးတကထုတ်ပြောစရာမလိုပါဘူးလေ..." 

ယဲ့ဇယ်ရှစ် စွေ့ယီစကားအား ဖြတ်ပြောလိုက်သည်။ ထို့နောက် နက်နက်ရှိုင်းရှိုင်း ပြုံးလိုက်ကာ ခိုင်မာသောလေသံဖြင့် ထပ်ပြောလိုက်သည်။

"ပြီးတော့ ငါတို့က အဆင့်လည်းတက်သွားဦးမှာ..."

စွေ့ယီ တစ်စုံတစ်ရာ ပြန်လည်ချေပလိုသော်လည်း ယဲ့ဇယ်ရှစ်၏ပုံစံမှာ ထန်ကျင့်အား ကာကွယ်ပေးလိုနေသည့်ပုံ ပေါ်လေသည်။ သူက ယဲ့ဇယ်ရှစ်နှင့် ဆက်ဆံရေးအခြေအနေ မဆိုးလိုသည့်အတွက် ပြောချင်သည့်စကားလုံးတို့အား ပြန်မျိုချလိုက်ရန်သာ တတ်နိုင်ခဲ့သည်။

စွေ့ယီ အလွန်ဒေါသထွက်သွားသော်လည်း အနာဂတ်တွင် အချိန်အများကြီး ကျန်ပါသေးသည်ဟု ကိုယ်ကိုယ်ကို ပြန်ဖြေသိမ့်လိုက်လေသည်။

စွေ့ယီ ထွက်မသွားမီမှာပင် ယုယန် တီးတိုးရေရွတ်လိုက်သည်။ 

"သူ ကံကောင်းသွားတယ်..."

အဖွဲ့အတွင်းရှိ စိတ်ဓာတ်ကျဆင်း‌နေသော လေထုမှာလည်း လွင့်ပြယ်သွားလေကာ လူတိုင်း၏အမူအရာများမှာလည်း ပို၍ သက်သက်သာသာ ဖြစ်လာကြသည်။ ထန်ကျင့်၏ စိတ်အခြေအနေလည်း ပိုတည်ငြိမ်လာလေသည်။

သူ့အရှေ့ရှိ ပြုံးနေသော ယဲ့ဇယ်ရှစ်အား ကြည့်လိုက်မိသောအခါ ထန်ကျင့်၏ စိတ်ထဲ အနည်းငယ် လှုပ်ရှားသွားလေသည်။ သူ့အရှေ့ရှိ ထိုအမျိုးသားမှာ ယခင်ကသူ့နောက် နေ့တိုင်း တကောက်ကောက်လိုက်နေခဲ့သောသူနှင့် လုံးလုံးမတူချေ။ 

ထန်ကျင့် မျက်လွှာချလိုက်လေသည်။

သူ့ဘေးတွင် ကျန်းရန်က မည်သည့်အချိန်တည်းက လာထိုင်နေမှန်းသူမသိလိုက်ပေ။ သူက ထန်ကျင့်အား လက်မောင်းဖြင့်တွတ်ကာ တိုးတိုးပြောလိုက်လေသည်။

"အဲဒီအချိန်တုန်းက ငါဘယ်လိုခံစားခဲ့ရလဲ မင်းအခုသိသွားပြီမလား..."

ထန်ကျင့် ကျန်းရန်ကို ကြည့်လိုက်သည်။ ကျန်းရန်မှာ သူ့ကိုကြည့်မနေပေ။ 

ကျန်းရန်အား ကျော်ကြည့်လိုက်သောအခါ ယဲ့ဇယ်ရှစ်မှာ ဆိုဖာပေါ်တွင် အသိုက်ဖွဲ့နှင့်လေပြီ ဖြစ်သည်။

ထိုဆံပင်ပန်းရောင်နှင့် ကောင်လေးမှာ ခေါင်းငိုက်စိုက်ချထားလျက်ပင်။ ရှေ့ဆံပင်လေးများမှာ သူ၏မျက်နှာတစ်ဝက်အား ဖုံးထားလေကာ သူ၏ ဖြူဖျော့သော အသားအရောင်မှာ မီးရောင်အောက်တွင် အဖိုးတန်ကျောက်စိမ်းကဲ့သို့ တောက်ပနေလေသည်။ သူ၏ နှုတ်ခမ်းထောင့်လေးမှာလည်း သေသပ်သော မျဉ်းကွေးလေးကဲ့သို့ တွန့်ကွေးနေခဲ့သည်။

ထိုကောင်လေး၏ ဆံပင်လေးများကြားမှ အနှီဖမ်းစားနိုင်စွမ်းရှိသည့် မျက်လုံးထောင့်မှ မှည့်လေးအား ထန်ကျင့် ဝိုးတဝါး မြင်နိုင်လေသည်။ 

အချို့သောသူများမှာ အလင်းရောင်နှင့်အတူ မွေးဖွားလာခဲ့သည်။ တစ်ချက်ကြည့်လိုက်ရုံနှင့်ပင် အခြားသူတို့အား သေးသိမ်သွားသယောင် ခံစားမိစေနိုင်သည်။ 

ယဲ့ဇယ်ရှစ်မှာ ထိုကဲ့သို့ တည်ရှိမှုမျိုးဖြစ်သည်။

ထန်ကျင့် ခဏတာ တွေဝေမှင်သက်မိသွားသည်။

ကျန်းရန် သက်ပြင်းချလိုက်သည်။

မည်သို့ပင်ဖြစ်စေကာမူ သူကတော့ စိတ်အေးသွားပြီဖြစ်သည်။ ထန်ကျင့်က အချိန်ယူရဦးမည့်ပုံပင်။

ထိုနေ့ညတွင် ပြိုင်ပွဲရလဒ်များကိုကြေညာလေသည်။

ယဲဇယ်ရှစ် ပြောခဲ့သည့်အတိုင်းပင်ယဲ့ဇယ်ရှစ်အဖွဲ့၏ အဖွဲ့ဝင်ငါးယောက်လုံးမှာ လွတ်လွတ်ကျွတ်ကျွတ် အဆင့်တက်သွားလေသည်။

နေရာအဆင့်ရလဒ်များကိုကြေညာသောအခါ ယဲ့ဇယ်ရှစ်က ပထမ ၊ စွေ့ယီက ဒုတိယဖြစ်ကာ ၊ ထန်ကျင့်က တစ်နေရာအနောက်ဆုတ်သွားရာ အဆင့်သုံး ဖြစ်သွားလေသည်။ 

ကျန်းရန်နှင့် ယုယန်မှာ အဆင့်ငါးနှင့် ခြောက် အသီးသီးဖြစ်ကြသည်။ ဝမ်အန်မှာ နံပါတ်ခုနှစ်နေရာတွင် ရှိလေသည်။ 

ရလဒ်များအား သိပြီးသောအခါ ယုယန်မှာ စိတ်လှုပ်ရှားစွာ ငိုချလိုက်ကာ မျက်ရည်လည်ရွဲ နှာတရှုတ်ရှုတ်ဖြင့် ယဲ့ဇယ်ရှစ်အား ဖက်ရန်ပြေးလာလေသည်။ 

ယဲ့ဇယ်ရှစ် ခြေတစ်လှမ်း နောက်ဆုတ်လိုက်ကာ တဲ့တိုးပင် ငြင်းပယ်ကြောင်း ပြလိုက်သည်။

ကင်မရာများမှာ ထိုမြင်ကွင်းအားရိုက်ယူမိသွားလေရာ ပရိသတ်တို့နှင့် ဖန်တို့မှာ ရယ်ပွဲကျလေတော့သည်။

ယုယန်မှာ ကူကယ်ရာမဲ့သွားလေရာ ဘေးနားရှိ သူ့ကဲ့သို့ စိတ်လှုပ်ရှားနေသည့် ဝမ်အန်ကိုသာ ဖက်လိုက်တော့သည်။

ကျန်းရန်လည်း ထပ်တူစိတ်လှုပ်ရှားနေခဲ့လေသည်။ သူ လူမှန်နောက်လိုက်မိသည်ကို သူသိလေသည်။

ထန်ကျင့် သူ့ဘေးရှိ ယဲ့ဇယ်ရှစ်အား မကြည့်ဘဲ မနေနိုင်တော့ချေ။

ယဲ့ဇယ်ရှစ် ထိုအကြည့်အား သတိထားမိသွားကာ ဘေးဘက်သို့ငဲ့ကြည့်လိုက်ပြီး ပြုံးကာမေးလိုက်သည်။ 

"ဘာဖြစ်လို့လဲ..."

ထန်ကျင့်၏ နှလုံးသားမှာ ချဉ်စူးစူးခံစားချက်တို့ဖြင့် ပြည့်နှက်သွားကာ လည်ချောင်းထဲ၌ပင် ကျပ်တည်းလာသည်။

သူ၏လည်စေ့ အပေါ်အောက်ရွေ့လျားသွားလေသည်။ သူ ဤကဲ့သို့ ရလဒ်မျိုးရသည်မှာ ယဲ့ဇယ်ရှစ်ကြောင့် ဆိုသည်ကို သူနှလုံးသားထဲမှပင် နားလည်လေသည်။

သူ အလိုမရှိသော်လည်း နှိမ်နင်းခံလိုက်ရပြီ ဖြစ်ကြောင်းသာ ဝန်ခံရပေတော့မည်။

ထန်ကျင့် နှုတ်ခမ်းများအား စေ့ကာပြုံးလိုက်သည်။ ထို့နောက် နှုတ်ခမ်းလှုပ်ကာ အသံမထွက်ဘဲ ပြောလိုက်သည်။ 

"ကျေးဇူး..."

ယဲ့ဇယ်ရှစ် နှုတ်ခမ်းထောင့်များ ပို၍ပင် ကျယ်လာကာ သူတို့နှစ်ဦး တစ်ယောက်နဲ့တစ်ယောက် ကြည့်ကာ ပြုံးလိုက်ကြသည်။ 

ထိုမြင်ကွင်းမှာ စူးရှထက်မြက်သည့် အင်တာနက်အသုံးပြုသူများကြားမှ သေချာပေါက်ကို လွတ်သွားမည် မဟုတ်ပေ။

တိုက်ရိုက်စကားပြောခန်းမှာ ချက်ချင်း ပေါက်ကွဲထွက်လာတော့သည်။

[သေစမ်း...အရင်က cpဖန်တွေ ဘယ်ရောက်ကုန်တာလဲ ...ငါ့ကိုလာအပ်ကြပါဦး...]

[တော်တော်ကြည်နူးဖို့ကောင်းတာပဲ...တစ်ယောက်နဲ့တစ်ယောက်ကြည့်ပြီး ပြုံးနေတာ ဒါဒုတိယအကြိမ်ပဲ...]

[ရှီးထန်ကနေ မင်္ဂလာသကြားလုံး ဖြစ်လာတာလား ...ဒါ cpဖန်တွေရဲ့ အောင်ပွဲပဲ...]

[ဝူး...ငါဘာမှမသိတော့ဘူး ရှီးထန်က တကယ်ပဲ...]

ထိုည၏ ရှာဖွေမှု အများဆုံးစာရင်းများမှာ "Time Idol "နှင့် ပတ်သတ်၍ဖြစ်သည်။ 

#ယဲ့ဇယ်ရှစ်၏နောက်ကျွမ်း# နှင့် #ရှီးထန် CP# စသည်တို့မှာ အင်တာနက်အသုံးပြုသူများကြား အပူတပြင်း ဆွေးနွေးကြသည့် အကြောင်းအရာများပင် ဖြစ်တော့သည်။ 

ဒုတိယမြောက်ရက်တွင် ထိုဗီဒီယို အားတိုက်ရိုက်ပြသလေသည်။ ပြိုင်ပွဲအတွင်းရှိ ပရိသတ်တို့၏ အားပေးသံများကြားထဲမှ အင်အားအပြည့်ဖြင့် သန်မာလှသော အားပေးသံတစ်ခုအား ကြည့်ရှူသူတို့ သတိထားမိလိုက်ကြသည်။ ထိုအားပေးသံမှာ သီးခြားကွဲထွက်နေကာ လူတိုင်း၏အာရုံအား ဖမ်းယူထားလေသည်။ 

"ယဲ့ဇယ်ရှစ် ကြိုးစားထား...ယဲ့ဇယ်ရှစ် အကောင်းဆုံး...ယဲ့ဇယ်ရှစ် မင်းကိုချစ်တယ်..."

ပြိုင်ပွဲအား ကြည့်ရှုနေကြသောပရိသတ်များမှာ ချက်ချင်းပင်ရွှင်မြူးသွားကြလေသည်။

"ဒါက ဖန်ဘွိုင်း တစ်ယောက်ရဲ့ အသံပဲ..."

"တကယ်ကြီး ဖန်ဘွိုင်း တစ်ယောက်ပဲ ...ဟားဟားဟား အသံကိုက တမူထူးခြားနေတာ..."

"ဘာကိုချစ်တာလဲ... ငါ့အစ်ကိုက ငါနဲ့ပဲ ဆိုင်တယ်ဟဲ့...ပြဿနာတက်ချင်တာလား..."

"အရှေ့ကလူတွေရေ...စကားကို ဆင်ဆင်ခြင်ခြင်ပြောကြပါ ...မင်းတို့စကားတွေကြောင့် ယဲ့ဇယ်ရှစ် ငါ့ကို တစ်ညလုံး ချော့နေရမယ်..."

(T/N: အရှေ့မှာ male fanကို ယောကျာ်းလေးပရိသတ်လို့ ဘာသာပြန်ခဲ့ပါတယ်။ အခု fanboy ကိုတိုက်ရိုက်မပြန်တော့ဘဲ ဖန်ဘွိုင်းလို့ပဲ ရေးလိုက်ပါတယ်။ male fan ဆိုတာက ဒီအတိုင်းသာမန် ယောကျာ်း‌လေးပရိသတ် ဖြစ်ပြီး ဖန်ဘွိုင်းလေးတွေက သဲသဲကဲကဲလေးတွေမို့ ပိုချစ်ဖို့ကောင်းတယ်လို့ထင်လို့ပါ)

..........

ပို၍အာရုံစိုက်တတ်ကြည့်သော အင်တာနက်အသုံးပြုသူတို့မှာ ယဲ့ဇယ်ရှစ်နှင့် သူ့အဖွဲ့၏ တင်ဆက်မှုအား 0.5 အမြန်နှုန်းဖြင့်ပင်လျှင် ကြည့်ကြလေရာ မယုံနိုင်ဖွယ်အရာတစ်ခုကိုပင် ရှာတွေ့ခဲ့ကြလေသည်။

(T/N - 0.5အမြန်နှုန်းဆိုတာက သာမန် vd ထက် နည်းနည်းနှေးတဲ့ အရှိန်နဲ့ ဗီဒီယိုကိုပြောတာပါ။)

[ ရှိုးကြည့်ရင်း သခွားမွှေးစားသူ: "ဖြတ်လျှောက် စစ်စစ်တစ်ယောက်ပါ... ငါ CP ဆိုတာကိုလည်း မshipပါဘူး... ဒါပေမဲ့ ဒါကိုမှ အချစ်လို့မခေါ်ရင် ...ဘာကိုခေါ်ကြမှာလဲ...]

ထိုဗီဒီယိုမှာ ယဲ့ဇယ်ရှစ်နှင့် သူ့အဖွဲ့၏အကကို အနှေးပြုလုပ်ထားသော ဗီဒီယိုဖြစ်လေသည်။ ကင်မရာက ထန်ကျင့်ကိုပြနေကာ ထန်ကျင့်ခြေချော်သွားသည်ကို မြှားအနီဖြင့် သေချာထိုးပြထားလေသည်။ သူ့ဘေးရှိ ယဲ့ဇယ်ရှစ်မှာ ထန်ကျင့်အားဖမ်းရန် ဘေးဖက်သို့ ချက်ချင်းခုန်လိုက်လေသည်။ 

ထိုဗီဒီယိုကို မြင်သောအခါ ရှီးထန် cpဖန်များ၏ အုပ်စုစကားပြောခန်းမှာ ရှော့ခ်ရသွားကြသည်။

[လခွမ်း...မင်းမျက်လုံးတော်တော်ကောင်းတာပဲ ငါဆို သတိတောင်မထားမိဘူး...]

[ဒါအချစ်ပဲ...]

[အရိုးသားဆုံးပြောရရင် ဒီပြိုင်ဘက်တွေရဲ့ပြိုင်ပွဲမှာ နိုင်တဲ့သူ‌ဆိုတာရော ရှုံးတဲ့သူဆိုတာ‌ရောမရှိဘူး...ရှီးထန် က အမှန်ဆိုတာ ငါဆို့အားလုံးသိလိုက်ကြရတာပဲ...]

ဤအကြောင်းအရာနှင့် ပတ်သက်၍ ပြောရလျှင် ယဲ့ဇယ်ရှစ်ဖန်များသာမက ထန်ကျင့်ဖန်များပါ တမူထူးခြားစွာ ပြုမူနေကြလေသည်။

သူတို့ ကံစမ်းမဲကိစ္စတွေနဲ့ အလုပ်ရှုပ်နေကြတာလေ ဘယ်သူက cp ဖန်တွေကို ဂရုစိုက်အားမှာတုန်း ...

စနေနေ့ညတွင် ပို၍အရေးကြီးသောသတင်းမှာ ပရိသတ်တို့၏အာရုံအားဖမ်းစားလိုက်လေသည်။ 

ယဲ့ဇယ်ရှစ်၏ စတူဒီယိုအား တည်ထောင်လိုက်ပြီ ဖြစ်သည်။

ကောင်းရှူမှာ ဤအခြေအနေအား ရှေ့ပြေးကြိုမြင်ထားလေသောကြောင့် အင်တာနက်ပေါ်တွင်လူအများဆုံးရှိမည့်အချိန်အား အသုံးချကာ အမြတ်ထုတ်လိုက်လေသည်။ ထိုအချိန်တွင် လူထုဆက်ဆံရေးဝန်ထမ်းများအား Weiboတွင်တရားဝင်ပို့စ်တစ်ခု တင်ရန် စေခိုင်းခဲ့‌သည်သာမက "Time Idol" ၏ နည်းပြများကိုပင် ပြန်လည်မျှဝေပေးရန် တောင်းဆိုခဲ့လေသည်။ 

ကောင်းရှူမှာ ပရိုဂရမ်အဖွဲ့နှင့်သာမက နည်းပြများကိုပါ သေချာတွေ့ဆုံကာ စကားပြောခဲ့လေသည်။ နည်းပြများမှာလည်း ဝမ်းမြောက်စွာပင် ကူညီခဲ့ကြလေသည်။

ပွဲဦးထွက်ခြင်းမတိုင်မီမှာပင် စတူဒီယို တည်ထောင်သည်မှာ ယဲ့ဇယ်ရှစ်က ပထမဆုံးဖြစ်လေသည်။

ပရိသတ်များမှာ ရိုးရှင်းစွာပင် နှလုံးပီတိဂွမ်းဆီထိ နေကြလေသည်။ 

ဒါ ဘာကိုဆိုလိုတာလဲ...

ဘာကိုဆိုလိုတာလဲဆိုတော့ သူတို့အနာဂတ်မှာ ပိုပြီး စောင့်ကြည့်စရာရှိလာပြီဆိုတဲ့ သဘောပဲပေါ့...

Talent ပြိုင်ပွဲတို့မှတစ်ဆင့် ပွဲဦးထွက် ထားသည့် အနုပညာရှင်တို့မှာ သူတို့၏ အထွတ်အထိပ်အချိန်၌ ပွဲဦးထွက်ခဲ့ကြသော်လည်း နောက်ပိုင်း၌ အရင်းအမြစ်ကောင်းများ မရှိသောကြောင့် သူတို့၏ ငယ်ရွယ်သောအချိန်များမှာ အလဟသကုန်ဆုံးသွားကြရသည်။ ဤသည်မှာ အများသိကြသော အနုပညာရှင်တို့အတွက် ကျိန်စာတစ်ခုလိုမျိုးပင် ဖြစ်လေသည်။

ထိုသူတို့မှာ နောက်ဆုံးတွင် လူထုအာရုံမှ တဖြည်းဖြည်း ပျောက်ဆုံးသွားကြလေသည်။ ဆက်လက်လုပ်ဆောင်မည့် အလုပ်အသစ်များမရှိလျှင် ပရိသတ်များကြား ဆက်လက်တည်ရှိရန်မှာ ခက်ခဲ‌ပေသည်။ 

ဤအချိန်၌ ကြေညာခဲ့သော ယဲ့ဇယ်ရှစ်၏ စတူရီဒီယို တည်ထောင်သည့်သတင်းမှာ ပရိသတ်တို့အား ကြက်သွေးထိုးပေးလိုက်သကဲ့သို့ပင်။ 

(T/N- ပိုပြီးတက်ကြွသွားကြတာလို့ ပြောချင်တာပါ။)

တစ်ညတည်းမှာပင် ယဲ့ဇယ်ရှစ်၏ ထောက်ပံ့‌ရေးအဖွဲ့ကိုလည်း တရားဝင် ကြေညာခဲ့လေသည်။ 

ပရိသတ်များမှာ ပို၍ပင်စိတ်လှုပ်ရှားခဲ့ကြသည်။ အဘယ့်ကြောင့်ဆိုသော် ထိုအဖွဲ့မှာ အနုပညာရှင်နှင့် ပရိသတ်ကြား ဆက်သွယ်ရာ၌ အချက်အချာကျသောကြောင့်ဖြစ်သည်။ စတူဒီယိုက ထိုသတင်းနှစ်ခုအား ကြေညာလိုက်ခြင်းမှာ ယဲ့ဇယ်ရှစ်၏ဖန်တို့ကို သူတို့တွင် အိမ်ရှိပြီဟု ပြောလိုက်သကဲ့သို့ပင်။

ယဲ့ဇယ်ရှစ်၏ ဖန်များမှာ အလွန်ပျော်ရွှင်နေကြလေသည်။

CPဖန်‌တွေကတော့ သူတို့နိုင်တယ်ပြောတာပဲ...

ဘာမှမဖြစ်ဘူး ...စိတ်ပျော်ရာ လုပ်ကြပါစေ...

ထိုသို့တွေးသည်မှာ လူတိုင်းမဟုတ်ကြပေ။စတူဒီယို၏ တရားဝင်ကြေညာချက်ထွက်ပြီး နာရီဝက်ခန့်အကြာတွင် ကွဲလွဲချက်များနှင့် မှတ်ချက်အချို့မှာ အားပေးသည့် မှတ်ချက်များကြားမှ ပေါ်ထွက်လာခဲ့သည်။

[ @ယဲ့ဇီ: "တကယ်ကြီးလား... ပွဲဦးတောင် မထွက်ရသေးတဲ့ အနုပညာရှင်ပေါက်စတစ်ယောက်ကလေ...သူနေ့တိုင်း hot search ဝယ်တယ်ဆိုတဲ့အချက်ကို ငါမပြောသေးဘူးနော်... အခုတော့ ကိုယ်ပိုင်စတူဒီယို ဆိုပါလား ... အခုခေတ် အနုပညာအသိုင်းအဝိုင်းထဲက လူငယ်တွေက အနုပညာအစစ်တွေ လုပ်မယ့်အစား နာမည်ကြီးဖို့အတွက် ဈေးကွက်မြှင့်တင်ရေးတွေကိုပဲ အားကိုးနေကြပြီပေါ့လေ...]

🎶🎶🎶