Chapter 22

🎶 Chapter 22

ထိုမှတ်ချက်မှာ အခြားသော ကောင်းချီးပေးသည့် မှတ်ချက်များကြားထဲတွင် ရောနေသောကြောင့် မြင်သာထင်သာမရှိဟု ထင်ရသော်လည်း အချို့ဖန် အနည်းငယ်မှာ ထိုမှတ်ချက်အား ရှာတွေ့သွားကြသည်။

ထိုမှတ်ချက်မှာ မြင်ရုံနှင့်ပင် တမင်ဒေါသထွက်အောင်ဆွသည့် မှတ်ချက်မှန်းသိသာပေသည်။ ထိုမှတ်ချက်ကိုမြင်သော ဖန်များမှာ အစ၌ဆွံ့အသွားကြသော်လည်း နောက်ပိုင်းတွင်မူ အလွန်ပျော်ရွှင်သွားကြလေသည်။

[ငါတို့ရဲ့ အနုပညာရှင်ပေါက်စလေး ယဲ့ဇယ်ရှစ်က antiဖန်တောင် ရနေပါပေါ့လား...မဆိုးဘူး... မဆိုးဘူး...]

[ဟားဟားဟား...ဒါက ဘာကိုဆိုလိုတာလဲ...ယဲ့ဇယ်ရှစ်က တကယ်ကြီး နာမည်ကြီးလာပြီလို့ ဆိုလိုတာပေါ့...]

[ကြိုးစားထား....ကြိုးစားထား ယဲ့ဇယ်ရှစ်...မင်း C နေရာကနေ ပွဲဦးထွက်အောင်လုပ်ပစ်...]

ဖန်များမှာ ထိုကဲ့သို့ အပျက်သဘောဆောင်သည့် မှတ်ချက်များအား အတည်မယူဘဲ ဟာသအဖြစ်သာ သဘောထားကြလေသည်။

သို့သော် ထိုဖန်များ မမျှော်လင့်ခဲ့သည်မှာ သူတို့၏အပြုသဘောဆောင်သော မှတ်ချက်များမှာ ယဲ့ဇီဟုခေါ်သည့် antiဖန်အား ခါးသီးသွားစေသည်ကိုပင်။

ယဲ့ဇီ : "မဟုတ်ဘူးလား...ဒါကိုကြည့်လိုက်ရင်ကို သူ့အတွက် ဒီလိုကူပြောပေးဖို့ အကောင့်တွေအများကြီးကို ဝယ်ခဲ့မှန်းအသိသာကြီး တွေ့လား...သူမင်းတို့ကိုဘယ်လောက်ပေးလဲ...ငါတို့လည်း ပိုက်ဆံရှာချင်လို့ အားလုံးကိုပြောပြပေးပါဦး..."

ယဲ့ဇီ : "ဒီ fanနှစ်သန်းကို သူဝယ်ခဲ့တာလို့တောင် ငါထင်တယ်..."

ယဲ့ဇီ : "ငါသူ့ကို အနုပညာရှင်ပေါက်စလေးလို့ ခေါ်တာကတောင် သူ့ကိုချီးကျူးတာဖြစ်နေပြီ ... အမိတို့ရယ် သူက ပွဲဦးတောင်မထွက်ရသေးဘူးလေ...အင်တာနက်ဆယ်လီတွေကတောင် သူ့ထက်သာဦးမယ်..." 

ယဲ့ဇီ : "အဲ့ဒီ အင်တာနက်ဆယ်လီတွေကတောင် သူတို့ လှုပ်ရှားမှုတွေကိုချပြဖို့ အလုပ်တွေရှိတယ်...ယဲ့ဇယ်ရှစ်မှာ ဘာရှိလို့လဲ..."

ယဲ့ဇီ : "သူ့လိုရုပ်ရည်နဲ့ ... ဒါဆိုရင် ငါတောင်ပွဲဦးထွက်လို့ရတယ်..."

ယဲ့ဇီ : "အလကား... အလှပန်းအိုးပါကွာ..."

ဖန်များ မမျှော်လင့်ခဲ့သည်မှာ သူတို့အာရုံစိုက်မနေသောအချိန်တွင် ထိုantiဖန်မှာ ထွက်သွားဖို့ရန် တင်းခံနေခဲ့ပြီး ပို၍ ရုန့်ရင်းကြမ်းတမ်း‌သော စကားများကိုပင် ချရေးလာသည်ကိုဖြစ်သည်။

[တကယ်ကြီးလား... ဒီantiဖန်က ဆယ်ပြားလိုနေတာလား မူလီချောင်နေတာလား... ဒီလောက်တောင် ကိုယ့်အတွေးတွေကို ချပြချင်နေရင်လည်း ကိုယ့်ကိုယ်ပိုင်အကောင့်ထဲကို သွားပြီးတော့ ပြောလေ...]

[အခုမှ ဖွင့်ထားတဲ့အကောင့်အသစ်ကြီး ငါတို့အချိန်တွေ ဖြုန်းပေးဖို့တောင်မတန်ဘူး...]

[ယဲ့ဇယ်ရှစ်က အနုပညာရှင်ပေါက်စလေးဆိုရင်တောင်မှ နင့်မှာမျက်လုံးပါတယ်ဆိုရင် ကန်းချင်ယောင်ဆောင်ပြီး သူအရင်က စင်ပေါ်မှာ ဖျော်ဖြေသွားတာတွေကို လစ်လျူရှုလိုက်လို့မရဘူးလေ...ယဲ့ဇယ်ရှစ်ရဲ့ "Pure Land of Paradise" ဗီဒီယိုဆိုရင် ကြည့်ရှုသူ ဆယ်သန်းတောင် ကျော်သွားတာနော်... သူ့ရဲ့ လှုပ်ရှားမှုတွေသိချင်တာဆိုရင် အဲဒါကိုထည့်မတွက်ဘူးလား...ဒါဆိုရင်တော့ ငါလည်း ဘာပြောရမှန်းမသိတော့ဘူး...]

ယဲ့ဇီ : "ဟ... ဟ..."

ဖန်များ :"..."

"နင့်မေကြီးတော်ကို ဟဟ ပါလား..."

ဤကဲ့သို့ ရန်စသည့် အပြုအမူမျိုးမှာ ယခင်က မရှိခဲ့ဖူးသောကြောင့် ဖန်များမှာ ငြိမ်ခံမနေကြတော့ပေ။ 

ထိုမှတ်ချက်များကို ပထမဆုံးစမြင်သည့်ဖန်များမှာ ထိုယဲ့ဇီဖြင့် ရှင်းကြတော့မည်ဖြစ်သည်။ 

သို့သော် မည်သူမှ မထင်ထားခဲ့ကြသည်မှာ ထိုယဲ့ဇီမှာ အလွန် တိုက်ခိုက်နိုင်စွမ်းကောင်းပြီး ဖန်များက ပြောသည့် မည်သည့်အရာကိုမဆို ထိုသူက ချက်ကျလက်ကျ ပြန်လည်ချေပနိုင်သည်ကိုပင် ဖြစ်သည်။

ထိုကဲ့သို့ဆက်ဖြစ်သွားသောအခါ ထိုမှတ်ချက်တစ်ခုထဲမှာပင် အခြားသူများ၏ ပြန်စာများမှာ ရာချီစုမိသွားလေသည်။

ထိုပြန်စာများ၏ နှစ်ပုံသုံးပုံမှာ ယဲ့ဇီ၏ပွဲခံသည့် မှတ်ချက်များပင်ဖြစ်သည်။ 

တစ်ညတည်းနှင့်ပင် ယဲ့ဇီဆိုသော ပုဂ္ဂိုလ်တွင် သူ၏ကိုယ်ပိုင်ပရိသတ်များပင် ရှိလာသည်ကို သူတို့ သတိထားမိလိုက်ကြသည်။ သို့သော် ယဲ့ဇယ်ရှစ်၏ဖန်များက ထိုကိစ္စကို အထွေအထူးမဟုတ်လျှင် အရေးမစိုက်သင့်ဟု ခံစားနေကြရဆဲဖြစ်သည်။ အချို့ဝါရင့်သောဖန်များမှာ အခြားဖန်များနှင့် အငြင်းအခုံလုပ်ရာတွင် ဂရုစိုက်ရန်နှင့် အခြားသူများ၏ အကွက်ချသည်ကို မခံမိစေရန် Weiboအုပ်စုစကားပြောခန်းတွင်ပင် ပို့စ်တင်လာသည်။

ဖြစ်နိုင်သည်မှာ သူတို့ ထိုအကောင့်နှင့်စကားပိုပြောလေ ယဲ့ဇီက သူတို့အား အမှန်တရားအား အလွန်သက်သေပြချင်နေသည်ဟု ထင်လေ ဖြစ်သည်။

နောက်တစ်‌နေ့ နံနက်စောစောတွင် ယဲ့ဇယ်ရှစ် သူအိပ်ရာမှ နိုးလာသည်နှင့် ထိုဝေဖန်ချက်တို့အား မြင်လေသည်။

ယဲ့ဇယ်ရှစ် စိတ်ဝင်တစားကြည့်ရင်းဖြင့် တီးတိုးရေရွတ်မိသည်။

ဒီantiဖန်က တိုက်ခိုက်နိုင်စွမ်းတော်တော်ကောင်းပေမယ့်...စကားလုံးတွေက တော်တော်လေး ဇဝေဇဝါမနိုင်လွန်းဘူးလား...

သူ၏ ယခင်ဘဝမှ antiဖန်များနှင့် ယှဉ်လိုက်လျှင် ယခုantiဖန်မှာ သူတို့နှင့်အဆင့်တူပင် မရှိချေ။ 

အမှတ်ပြည့်မှာ အမှတ်တစ်ရာဆိုလျှင် ယဲ့ဇယ်ရှစ် သူ့အား ဆယ်မှတ်သာ ပေးမည်ဖြစ်သည်။ ထိုဆယ်မှတ်မှာ antiဖန်လေး၏ တစ်ညလုံး အငြင်းအခုံပြုကာ ကြိုးစားထားမှုကြောင့်သာ ဖြစ်လေသည်။ ဤကဲ့သို့ငြင်းခုံမှုမှာ စွမ်းရည်လိုအပ်နေသေးသည်။ 

တစ်ညလုံး ကြိုးစားထားမှုကိုတော့ လေးစားမိပေမယ့်ပေါ့...

သေချာပေါက်ပင် ထိုသည်မှလွဲ၍ အခြား ကောင်းကွက် မရှိပေ။

ဘယ်လိုတောင် antiဖန်တစ်ယောက်အ‌နေနဲ့ ချစ်စရာကောင်းစွာ ကျဆုံးမှုလေးလဲ...

အင်တာနက်တခွင် ရှာဖွေကြည့်ပြီးနောက် ယဲ့ဇယ်ရှစ် သူ၏ကိုယ်ပိုင်အကောင့်သို့ ပြောင်းဝင်လိုက်သည်။

ယဲ့ဇီ : "ဒီယဲ့ဇယ်ရှစ်က သူ့ကိုယ်သူဘာကောင်လို့ထင်နေတာလဲ..."

ယဲ့ဇယ်ရှစ်: "ဘာကောင်မှလို့ မထင်ပါဘူး...သူက ဒီအတိုင်းလေး ချမ်းသာတဲ့ သူဌေးတစ်ယောက်ပါ..."

ယဲ့ဇီ : "ဒီအမှိုက်လို ယဲ့ဇယ်ရှစ်က အနုပညာ‌အသိုင်းအဝိုင်းထဲမှာ နေနိုင်သေးတယ်ပေါ့လေ...တကယ်ရယ်ရတာပဲ..."

ယဲ့ဇယ်ရှစ် : "ဒါဆို သူဘာလုပ်သင့်တယ်လို့ မင်းထင်လဲ..."

ဤတစ်ခေါက်တွင် ယဲ့ဇီက မည်သူစကားပြန်မှန်း သတိမထားဘဲ တိုက်ရိုက်ပင်ပြောလိုက်သည်။ 

"သင်ပေးဖို့ လိုနေသေးတာလား... ဒီအနုပညာ လောကထဲက‌နေ ထွက်သွားလိုက်ရုံပေါ့..."

ယဲ့ဇယ်ရှစ် အလွန်အမင်းကို သဘောတူလေသည်။ ထို့ကြောင့် Weiboတွင် ပို့စ်တင်ကာ မှတ်ချက်ရေးလေသည်။

"ကောင်းလိုက်တဲ့အကြံ..."

Weiboတွင် ပို့စ်တင်လေ့မရှိ‌သော ယဲ့ဇယ်ရှစ်က သူအွန်လိုင်းတက်သည်နှင့် antiဖန်တစ်ယောက်၏ Weiboပိုစ့်သုံးခုတွင် မှတ်ချက်ပေးသည်သာမက သူအနုပညာအသိုင်းအဝိုင်းမှ ထွက်သင့်သည်ဟုပြောသည်ကိုပင် ဆွဲထုတ်လာကာ ပို့စ်ပြန်တင်လိုက်သေးသည်။ 

ဖန်များမှာ ယဲ့ဇယ်ရှစ်က antiဖန်အား စကားပြန်သည်ကို တွေ့သောအခါ စိတ်ဝင်စားစရာကောင်းသည်ဟု ထင်မိကြသည်။ Weiboတွင် နှစ်တစ်ရာနီးပါး ပို့စ်တင်မလာသော ယဲ့ဇယ်ရှစ်မှာ ပို့စ်တင်လာသောအခါတွင်လည်း antiဖန်တစ်ယောက်အား စကားပြန်ထားသည့်ပို့စ် ဖြစ်နေမည်ဟု မည်သူမှထင်ထားခဲ့မည် မဟုတ်ချေ။

"သူက ဒီအတိုင်းလေး ချမ်းသာတဲ့ သူဌေးတစ်ယောက်ပါ..." ဟုဆိုသည့်စာကြောင်းကို မြင်သောအခါတွင်မူ ဖန်များမှာ ရယ်ပွဲဆင်ကြလေတော့သည်။

ယဲ့ဇယ်ရှစ်က တကယ်ကိုပြောတတ်တာပဲ ပြီးတော့ အမှန်ကိုပြောသွားတာနော်...

ဖန်များမှာ ကြာရှည်မပျော်နိုင်ကြဘဲ အနုပညာလောကထဲကနေ ထွက်သွားလိုက် ဟူသည့် စကားအား တွေ့သွားကြသောအခါ ဖန်များ၏ မျက်နှာပေါ်ရှိ အပြုံးများမှာချက်ချင်းပင် တောင့်ခဲသွားကြလေသည်။ ထို့နောက်ဖန်များမှာ အလွန်စိတ်ဆိုးသွားကြပေရာ သူတို့ဒေါသများကို ထပ်မံ ထိန်းမထားနိုင်ကြတော့ချေ။

"ဒီantiဖန်တွေက သူတို့ကိုယ်သူတို့ ဘာ‌အကောင်တွေလို့ ထင်နေတာလဲ...သူတို့က ဘာမို့လို့ ယဲ့ဇယ်ရှစ်ကို ထွက်သွားလို့ ပြောရတာလဲ..."

ဖန်များမှာ ထိုantiဖန်တို့အား တစ်ညလုံး သည်းခံထားကြလေသည်။ ထိုသည်မှာ အဘယ်ကြောင့်ဆိုသော် သူတို့အမှန်တကယ် ပြဿနာမတတ်ချင်သည့်အပြင် ယဲ့ဇယ်ရှစ်အား အကြောင်းမရှိဘဲ သိက္ခာမကျစေချင်သောကြောင့် ဖြစ်သည်။ 

အခုကြည့်လိုက်တော့ ငါတို့သည်းခံနေခဲ့တာကို ဒီantiဖန်တွေက သူတို့ကိုသူတို့ အဟုတ်ကြီးလို့ ထင်သွားကြပုံပဲ...ယဲ့ဇယ်ရှစ် ရှေ့မှာ ပရမ်းပတာတွေ ပြောရုံမကဘူး အခုဆို သူ့ကိုပါထွက်သွားဖို့ ဖိအားပေးသေးတာပေါ့လေ...

ဒီသောက် antiဖန်က တကယ်ရောတန်လို့လား...

ဖန်များမှာစိတ်ဆိုးနေကြသည်။ အိုတာကု ဖန်များမှာလည်း ငြိမ်မနေခဲ့ကြပေ။ 

ယင် နဲ့ ယန် ပဲလေ ...ဘယ်သူကမလုပ်နိုင်ရမှာလဲ...

(T/N-ဆိုလိုချင်တာက antiဖန်တွေတောင် အဲ့ဒီလိုပြောနိုင်သေးရင် သူတို့လည်း ဘာလို့ပြန်မပြောနိုင်ရမှာလဲ ဆိုတဲ့ သဘောထင်ပါတယ်)

ဖန်များမှာ ယဲ့ဇယ်ရှစ်အား ‌နှစ်သိမ့်ပေးနေခဲ့ကြပြီး တစ်ချိန်တည်းမှာပင် အဖွဲ့ဖွဲ့ကာ တစ်လှည့်စီ antiဖန်များနှင့် တိုက်ပွဲဖြစ်ကြတော့သည်။

တိုးပွားလာသော Weiboမှ မှတ်ချက်များကို ယဲ့ဇယ်ရှစ် ဖတ်နေရင်း "antiဖန်များ၏ လွှမ်းမိုးမှုကြောင့် အနုပညာလောကမှ ထွက်ခွာနည်း" ဆိုသည်ကို တွေးနေခဲ့လေသည်။

ယဲ့ဇယ်ရှစ် ပိုတွေးလေ ထိုအစီအစဉ်မှာ ပို၍ပင် ဖြစ်နိုင်ခြေရှိလေဟု ခံစားရလေဖြစ်သည်။

ယဲ့ဇယ်ရှစ် ဘာမှမလုပ်ရ‌သေးမီတွင် ကောင်းရှူ ဖုန်းခေါ်လာသည်။

ယနေ့နံနက် နိုးလာသောအခါတွင် ကောင်းရှူမှာ ယဲ့ဇယ်ရှစ်၏ Weiboမှတုန့်ပြန်ပုံကိုကြည့်ပြီး မအံ့ဩခဲ့ပေ။ ထိုအစား ဤသည်က သူမျှော်လင့်ထားသည့်အရာဟုပင် တွေးမိသည်။

ဒါကမှ ငါ့ရဲ့မှတ်ဉာဏ်ထဲက အကြောက်အလန့်မရှိတဲ့ သခင်လေးပဲ ...

သို့သော်လည်း မကြာမီ ပွဲဦးထွက်တော့မည့် အနုပညာရှင်တစ်ယောက်အနေဖြင့် သူ၏အတွေးများကို အင်တာနက်ပေါ်တွင် ချပြရန်မှာ စောလွန်းနေသေးလေသည်။

ကောင်းရှူ လက်ခံခဲ့သော်လည်း ပြောလိုက်သေးသည်။ 

"သခင်လေး အဲဒီantiဖန်တွေနဲ့ ပတ်သက်ပြီး စိတ်နှောင့်အယှက်အဖြစ်မခံပါနဲ့..."

ယဲ့ဇယ်ရှစ်၏ လေသံမှာ တည်ငြိမ်လှသည်။

"သူပြောတာ ဘာမှ မမှားဘူးလို့ကျွန်‌တော်ထင်တာပဲ..."

ကောင်းရှူ ချက်ချင်း အလေးအနက် ဖြစ်လာကာ ပြောလိုက်သည်။

"သူပြောတာ မမှားဘူးဆိုတာ ဘာကိုပြောတာလဲ သခင်လေး...သခင်လေးမှာ ဒီလောက်အံ့သြဖို့ကောင်းတဲ့ အလုပ်တွေရှိနေတာကို အဲဒီလူကသာ ကန်းချင်ယောင်ဆောင်နေတာ..."

"ဟုတ်ပါပြီ ဒီကိစ္စကို ဘာမှစိုးရိမ်မနေနဲ့တော့... သခင်‌လေးက စိတ်ရောကိုယ်ပါ အေးအေးသက်သာနေပြီး လေ့ကျင့်စရာရှိတာသာ လေ့ကျင့်နေလိုက် ဒီကိစ္စကိုကျွန်တော်ပဲ ဖြေရှင်းလိုက်မယ်..."

ယဲ့ဇယ်ရှစ် တုံ့ဆိုင်းသွားလေသည်။ သူ ဤလောကမှ ထွက်သွားချင်သော်လည်း သူ့လက်ထဲတွင် ပိုက်ဆံအလုံအလောက် မရှိ‌သေးသည်သာမက ကြိုတင်ပြင်ဆင်ထားသည်များလည်း ဘာမှမရှိပေ။ သူသာ antiဖန်များကြောင့် ဤလောကထဲမှ ထွက်ခွာသွားရပါသည်ဟု အကြောင်းပြလိုက်လျှင်လည်း အလွန်သံသယဖြစ်ဖွယ် ကောင်းပေလိမ့်မည်။

သူသာပရိသတ်ဖြစ်လျှင် ထိုသည်ကို ယုံမည်မဟုတ်ပေ။ 

ထိုကြောင့် သူသာ ဤအနုပညာလောကထဲမှ ထွက်သွားချင်ပါလျှင် အနာဂတ်တွင် ပိုကောင်းသည့် အကြောင်းပြချက်များနှင့် အချိန်ကို ရှာထားရန်လိုလေသည်။

နောင်တအချို့နှင့် ယဲ့ဇယ်ရှစ်မှာ လက်ခံလိုက်ရုံသာ တတ်နိုင်‌ပေတော့သည်။

ယဲ့ဇယ်ရှစ်၏ အဖြေအားကြားသောအခါ ကောင်းရှူ ချက်ချင်းပင် ပို၍ စိတ်ကျေနပ်သွားလေသည်။ သခင်လေးမှာ ယခင်ကအတိုင်း စိတ်တိုလွယ်သည့် ပုံစံရှိနေသေးသော်လည်း ယခုတွင်မူ ဖျောင်းဖျသည်ကို လက်ခံတတ်လာပြီဖြစ်လေသည်။

ဒါတိုးတက်မှုပဲ...တိုးတက်မှု...

ပျော်ရွှင်စွာဖုန်းချပြီးနောက် ကောင်းရှူက လူထုဆက်ဆံရေးအဖွဲ့ကို ထိုWeiboပို့စ်အား ဖြုတ်ချခိုင်းလိုက်သည်။ 

နာရီဝက်ခန့်ကြာသောအခါ ယဲ့ဇယ်ရှစ်ဖန်များနှင့် antiဖန်များ မှတ်ချက်ကဏ္ဌတွင် တစ်ယောက်နှင့်တစ်ယောက် ချနေကြသည့်အချိန်တွင် ယဲ့ဇယ်ရှစ်၏ စတူဒီယိုမှ အောက်ပါပို့စ်ကို Weiboတွင် တင်လာခဲ့သည်။

@ယဲ့ဇယ်ရှစ် စတူဒီယို: "ဘာရယ်တော့မဟုတ်ပါဘူး Bulgari ကြော်ငြာလေးတစ်ခုနဲ့ TVရှိုး ဖိတ်ခေါ်စာလေးတွေလောက်ပါပဲ...အားပေးမှုတွေအတွက် ကျေးဇူးတင်ပါတယ်...ရှင်းပြလို့မရတဲ့ လူတွေအတွက်ကြောင့်နဲ့တော့ စိတ်မဆိုးကြပါနဲ့နော်..."

တစ်ချိန်ထဲမှာပင် စတူဒီယိုက ဓာတ်ပုံနှစ်ပုံကိုလည်း ပို့စ်တင်ခဲ့သည်။ တစ်ပုံမှာ ကြော်ငြာအတွက် လက်မှတ်ထိုးထားသော စာချုပ်ဖြစ်ပြီး တစ်ပုံမှာ TVရှိုးဖိတ်ခေါ်စာဖြစ်လေသည်။

ထိုအချိန်တွင် ဖန်များ အလွန်အံ့ဩသွားကြလေသည်။

ငါတို့ယဲ့ဇယ်ရှစ်က ပွဲဦးမထွက်ရခင်မှာကို Bulgari ကြောငြာရတယ်တဲ့...ပြီးတော့ TVရှိုး ဖိတ်ခေါ်စာရောတဲ့လေ...ဒါအတုလား ...အစစ်လား...

ဒါပေမယ့် Bulgari ကြော်ငြာကို ကြော်ငြာလေးလို့ ခေါ်ရဲတာကလဲ ယဲ့ဇယ်ရှစ် စတူဒီယိုတစ်ခုပဲ ရှိတာလားလို့...

သူက တကယ်ကို ချမ်းသာတဲ့သခင်လေး ဖြစ်ထိုက်ပါပေတယ်...

ထိုWeiboပို့စ်‌အောက်တွင် ဖန်များက "ဟားဟားဟား" ဟုရယ်လျက် စခရင်ရှော့များရိုက်ကာ anti ဖန်များ၏ မျက်နှာအား ဖြတ်ရိုက်လိုက်ကြသည်။

"Bulgariက ‌ကြော်ငြာလေးလို့ အခေါ်ခံနေရပြီဟေ့..."

စတူဒီယို: "ရှူး...တိုးတိုး...#အဆိုးလေးမျက်နှာ အီမိုဂျီ# ဒီတစ်ခေါက်ကတော့ အသစ်ထွက်ရှိမယ့်စီးရီးရဲ့ ကြော်ငြာပါ...နောက်လာမယ့်ကြော်ငြာတွေ အတွက်ကတော့ဆွေးနွေးနေဆဲပါ..."

ဖန်များ: "ဘာလဲ...ဘာလဲ... TVစီးရီးလား ...မျှော်နေမိပါပြီနော်..."

စတူဒီယို: "အခုထိ အတည်မပြုရသေးပါဘူး... မနေ့ညက စတူဒီယိုရဲ့ တရားဝင်ကြေညာချက် ထုတ်ပြန်အပြီးမှာရရှိလာတဲ့ စီးပွားရေးအရအလုပ်ကလေးတွေပါ...အားလုံးကိုတော့ ဘော့စ်ကနေ ပြန်ပြီးကြည့်ရဦးမှာပေါ့လေ..."

ဖန်များ: "ယဲ့ဇယ်ရှစ် ဆိုတဲ့အတိုင်းပါပဲ...ငါတို့ကလေးလေးက တကယ်ကိုတော်တာပဲ... ဒါပေမဲ့ ငါတို့တကယ်ကိုသိချင်နေတုန်းပဲ...အဲဒီဟာတွေအကုန်လုံးက စီးပွားရေးကြော်ငြာတွေနဲ့ TVစီးရီး ဖိတ်ခေါ်စာတွေပဲလား... သီချင်းနဲ့ ပတ်သက်တာတွေရော မပါဘူးလား... ငါတို့ကလေးလေး သီချင်းဆိုတာ ကတာကို ဆက်လုပ်တာ မြင်ချင်သေးတယ်..."

ဤတစ်ကြိမ်တွင် စတူဒီယိုမှ စာပြန်သည်ကို မစောင့်တော့ဘဲ ရှန်ဇယ်ယွီမှ ဖန်များအား စာပြန်လိုက်သည်။

@ရှန်ဇယ်ယွီ: "သီချင်းတစ်ပုဒ်ရေးရတာက အချိန်လိုတယ်... ပြီးတော့အဲ့ဒါက နည်းနည်းလည်း ကြာဦးမယ်..."

Fan: "!!!!"

နည်းပြရှန်ကလည်း ယဲ့ဇယ်ရှစ်နဲ့ ပူးပေါင်းချင်နေတယ်...ဒါတကယ်ကြီး ငါတို့ယဲ့ဇယ်ရှစ် ဟုတ်ပါတယ်နော်...

ရှန်ဇယ်ယွီ Weiboတွင် ပို့စ်တင်ပြီးသောအခါ စခရင်ရှော့ရိုက်ပြီး သူ့သူငယ်ချင်းဆီသို့ ပို့လိုက်ကာ ကူကယ်ရာမဲ့ဟန်ဖြင့် ပြောလိုက်သည်။

"ဒါဆို ရပြီလား..."

ဟယ့်ကျင်းယွင် အလျင်အမြန် စာပြန်လာသည်။

"ဒါဆိုလည်း သီချင်းတစ်ပုဒ် မြန်မြန်သွားရေးတော့လေ..."

ရှန်ဇယ်ယွီ: "ငါ့ကို မင်းရဲ့ လက်တိုလက်တောင်းခိုင်းတဲ့ ကောင်လေးများ မှတ်နေတာလား..."

ဟယ့်ကျင်းယွင်: "မင်းကို အလကားလုပ်ခိုင်းတာမှ မဟုတ်တာ ပိုက်ဆံ ပေးပြီးပြီလေ... ပြီးတော့ အဲဒီသီချင်းထဲကို နောက်တစ်ယောက် ထပ်ထည့်လိုက်ရရုံပဲကို..."

ရှန်ဇယ်ယွီ: "..."

စိတ်ဆိုးတယ်...ဒါပေမယ့် ငါ အကုန်လုံးကိုမလုပ်နိုင်ဘူးလေ...ဘယ်သူက သူ့ကို စာချုပ်မှာ လက်မှတ်ထိုးခိုင်းမှာလဲလို့...သေစမ်း...

ဟယ့်ကျင်းယွင် သူ့သူငယ်ချင်း ဒေါသထွက်နေသည်ကို မသိချင်ယောင်ဆောင်ကာ ပို့စ်မတင်သည်မှာ နှစ်ကြာပြီဖြစ်‌သော သူဝင်‌လေ့မရှိသည့် Weiboအကောင့်အား ဝင်လိုက်သည်။ ပထမဆုံး သူ ယဲ့ဇယ်ရှစ်၏ ကိုယ်ပိုင် Weiboအကောင့်အား followလုပ်ပြီး ယဲ့ဇယ်ရှစ် စတူဒီယို၏ Weiboပို့စ်အား ပြန်တင်လိုက်လေသည်။

@ဟယ့်ကျင်းယွင်: "ဇာတ်ညွှန်းရေးတာကလည်း အချိန်ယူရတယ်...ခဏလောက်တော့ စောင့်ရမယ်..."

ယဲ့ဇယ်ရှစ်ဖန်များသာမက ဟယ့်ကျင်းယွင်၏ ဖန်များလည်း အံ့အားသင့်သွားကြသည်။

ဒါ ဘယ်လိုအခြေအနေကြီးလဲဟေ...

🎶🎶🎶