Chapter 26

🎶 Chapter 26

စွေ့ယီက ရှုံးခဲ့သော်လည်း သူလက်လျှော့ရန် ဆန္ဒမရှိသောကြောင့် အော်ဟစ်ကာ ထန်ကျင့်ထံ ပြေးသွားပြီး ရန်ပြန်ဖြစ်လေသည်။ အငြင်းပွားနေစဉ်အတွင်း ထန်ကျင့်က မြေပြင်ပေါ်သို့ ထပ်မံ တွန်းချခံလိုက်ရပြန်သည်။

သွေးရူးသွေးတန်း ဖြစ်နေသော စွေ့ယီကို ဝန်ထမ်းများပင် မတားနိုင်တော့ပေ။ သူထန်ကျင့်ကို ရိုက်တော့မည်ကို မြင်သောအခါ ယဲ့ဇယ်ရှစ် ရုတ်တရက် အရှေ့သို့ရောက်လာပြီး စွေ့ယီအား ပုခုံးပေါ်မှတစ်ဆင့် ကိုင်ပေါက်လိုက်သည်။ တစ်ချိန်တည်းမှာပင် သူ စွေ့ယီ၏လက်များကို မလှုပ်နိုင်စေရန် ကျောဖက်တွင် ချုပ်ထားလိုက်သည်။ 

စွေ့ယီက မြေပေါ်မှာ အဖိခံထားရသည့်တိုင် ရပ်တန့်မသွားဘဲ ပါးစပ်မှ ဆက်လက်ဆဲဆိုနေခဲ့သည်။ 

ဗီဒီယိုအဆုံးတွင် ဘေးနားရှိဝန်ထမ်းများမှာ စွေ့ယီအား အေးစက်စွာကြည့်နေခဲ့ကြပြီး သူ့အစားမည်သူမှရှေ့ထွက်ပြီး ဝင်မပြောခဲ့ပေ။ နောက်ခံတွင်လည်း ဆင်ဆာဖြတ်ထားသည့် ဆဲဆိုသံတို့ ဆူညံနေလေသည်။

ထိုနေရာသို့ရောက်သောအခါ စွေ့ယီဖန်များ တစ်ကိုယ်လုံး အေးစက်သွားကြလေသည်။

အမှန်တရားကို သိသွားကြသော အင်တာနက်အသုံးပြုသူများမှာ ပို၍ပင် တုန်လှုပ်သွားကြသည်။

သူတို့ တစ်ဦးတစ်ယောက်ထံမှ လှည့်စားခံလိုက်ရသည်။ 

ယဲ့ဇယ်ရှစ်က စွေ့ယီကို ရိုက်ခဲ့သည်မဟုတ်ပေ။ အမှန်တကယ်မှာ သူက ကူညီရန်လာခဲ့ခြင်းဖြစ်သည်။ 

ပြီးတော့ သောက်ကောင်စွေ့ယီ... အဲ့ဒီ ချီးထုပ်ကောင်က ဘယ်လိုငတုံးမျိုးတုန်းဟ...

ထန်ကျင့်၏ဖန်များမှာ နေရာမှာပင် သေလောက်အောင် ဒေါသထွက်ခဲ့ကြသည်။ 

သူတို့ရဲ့အကိုက ပြိုင်ပွဲမှာ ပြိုင်နေရင်းနဲ့ နှစ်လတောင် လိုက်ပြီးအနှောင့်ယှက်ခံနေရမယ်လို့ သူတို့စဉ်းတောင် မစဉ်းစားဖူးဘူး…

ထန်ကျင့် ဘာမှမမှားဘူး...

သူ ထပ်ခါထပ်ခါ သည်းခံခဲ့ပေမယ့် ဘာမှကောင်းတာဖြစ်မလာခဲ့ဖူး စွေ့ယီကသာ သူ့ကိုနေ့တိုင်းအနိုင်ကျင့်ခဲ့တာပဲ...

ထန်ကျင့် မြေပြင်ပေါ် အတွန်းခံလိုက်ရသောအခါ သူ စားပွဲနှင့် ဦးစွာတိုက်မိပြီးမှ မြေကြီးပေါ်ကျသွားသည်ကို ဖန်များ သတိထားမိလိုက်ကြသည်။

ကျသည့်အားမှာ အလွန်ပြင်းထန်သောကြောင့်ထင်သည် ထန်ကျင့်က မြေပေါ်မှ တော်တော်နှင့်မထနိုင်ဘဲ ဝန်ထမ်းများ လာဆွဲထူမှသာ မတ်တတ်ရပ်နိုင်ခဲ့သည်။ သူ့မျက်နှာမှာလည်း အလွန်ဖြူဖျော့နေကာ မတ်မတ်ရပ်နိုင်ရန်အတွက် လူတစ်ယောက်အား မှီထားနေရသည်။ 

ထန်ကျင့်ဖန်များမှာ မျက်ရည်များစီးကျလာပြီး ဒေါသထွက်လွန်းသောကြောင့် တုန်ယင်နေလေသည်။ 

ယဲ့ဇယ်ရှစ်သာ ချက်ချင်းရောက်မလာပါက ထန်ကျင့်မည်သို့ ဆက်ဖြစ်မည်မှန်း သူတို့မတွေးရဲကြပေ။

အမှန်တရားက ဖော်ထုတ်ခံလိုက်ရသည်။ လူထု၏ အတွေးအမြင်တို့လည်း လုံးဝ ပြောင်းပြန်လှန်ခံလိုက်ရသည်။

အစောက ရှေ့တန်းမှနေ၍ ယဲ့ဇယ်ရှစ်အား တိုက်ခိုက်ခဲ့ကြသော စွေ့ယီဖန်များနှင့် အင်တာနက်အသုံးပြုသူများမှာ ချက်ချင်းဆိုသလိုပင် ပျောက်ကွယ်သွားကြသည်။

[ကောင်းပြီ ဒါကမှ ရိုက်ချက်အကြီးကြီးပဲ...စောနက ဂျိုကြွနေတဲ့ စွေ့ယီဖန်တွေ ဘယ်မှာတုန်း...]

[စွေ့ယီလို အစုတ်အပြတ်မျိုးကမှ အသိုင်းအဝိုင်းက ထွက်သွားသင့်တာ...]

[ငါတကယ်ကို သိချင်လို့ပါ...သူတို့ ရဲကိုရော ခေါ်ခဲ့ရဲ့လား...ငါတော်တော်ကို စိတ်ပျက်သွားတယ်...]

[ယဲ့ဇယ်ရှစ်က တကယ်သနားဖို့ကောင်းတာပဲ...သူက ကောင်းတာလုပ်ခဲ့တာအတွက်နဲ့ အစော်ကားခံလိုက်ရတယ်...]

[ဝူး...ငါ ယဲ့ဇယ်ရှစ်အတွက် တကယ်စိတ်မကောင်းဖြစ်မိတယ်... ဗီဒီယိုကိုလည်းကြည့်ပြီးရော မျက်ရည်တွေကျလာတော့တာပဲ...သူကတကယ်ကို လူကောင်းတစ်ယောက်ပဲ...အဲဒီလိုလူက အကြောင်းရင်းမရှိဘဲနဲ့ အမုန်းခံလိုက်ရတယ်...]

[ယဲ့ဇယ်ရှစ်က လူတစ်ယောက်ကို ရိုက်လိုက်တယ်ဆိုတဲ့ ပို့စ်ကို ဖတ်လိုက်ရတုန်းက ငါလည်းမယုံခဲ့ဘူး... အခုနောက်ပိုင်း လူတွေက လွယ်လွယ်နဲ့ အလှည့်စားခံနေရတယ်... ယဲ့ဇယ်ရှစ် ခံစားမသွားရဖို့ မျှော်လင့်ပါတယ်...]

[အခုမှ ဒီလိုတွေပြောနေတော့‌ရော ဘာထူးမှာလဲ နောက်ကျသွားပြီ...ယဲ့ဇယ်ရှစ်ကဖြင့် နှုတ်ထွက်ပြီးသွားပြီ‌လေ...အခုကျေနပ်ကြပြီလား...]

ထန်ကျင့်ဖန်များလည်း ထိုအတွက် စိတ်မကောင်းဖြစ်နေကြသည်။ ထိုကြောင့် သူတို့ ယဲ့ဇယ်ရှစ်၏ Weiboအကောင့်သို့သွားကာ ကျေးဇူးတင်ကြောင်း ပြောကြသည်။

[ကျေးဇူးပါ ယဲ့ဇယ်ရှစ်...]

[ကျေးဇူးအများကြီး တင်ပါတယ်...]

[ကျေးဇူးပါ...]

[ဟိုခွေးကောင် စွေ့ယီက ရှင်းပြဖို့ ထွက်မလာဘူးလား...]

[ယဲ့ဇယ်ရှစ်ကို စော်ကားထားတဲ့ သူတွေရော ဘယ်ရောက်ကုန်တာလဲ…အခုထိ မတောင်းပန်ကြသေးဘူးလား...]

[ညီအစ်ကိုရေ ပုခုံးပေါ်က ကိုင်ပေါက်လိုက်တာများ မိုက်ချက်...]

[ယဲ့ဇယ်ရှစ်က ထန်ကျင့်ကို ကူညီတာမြင်လိုက်ရတော့...ငါတစ်သက်လုံး သူ့ဖန်ဖြစ်နိုင်သွားတယ်...]

[အရမ်းယောက်ျားဆန်ပြီးတော့ အရမ်းခံ့ညားတာပဲ...]

ဤတစ်ခါတွင် ယဲ့ဇယ်ရှစ်ဖန်များလည်း အမှန်တရားကို သိသွားကြသည်။ ထိုအချိန်က သူတို့ တစ်ချိန်တည်းမှာပင် ခံစားသွားကြရပြီး ဒေါသလည်း အလွန်ထွက်သွားကြသည်။ 

သူတို့ခံစားသွားရသည့် အကြောင်းမှာသူတို့ လိုက်ခဲ့သည့်အိုင်ဒေါ မမှား၍ဖြစ်ပြီး ဒေါသထွက်ရသည့်အကြောင်းမှာ စွေ့ယီကြောင့် ပြိုင်ပွဲမှ နှုတ်ထွက်သွားရသည်ကို ဖြစ်သည်။

[ယဲ့ဇယ်ရှစ် အရမ်းမိမိုက်နေရောပဲ...ငါလိုက်ခဲ့တဲ့သူ မမှားခဲ့ဘူး...]

[ငါပြောပါရစေ house dance ကနိုင်တဲ့ သူတစ်ယောက် ဘယ်တော့မှ လူဆိုးမဖြစ်နိုင်ဘူး...]

[ကိစ္စမရှိဘူး... C နေရာလေးပဲဟာ...ငါတို့မလိုအပ်ဘူး... မင်းက ငါတို့နှလုံးသားထဲမှာတော့ Cနေရာပဲ...]

[ညီအစ်ကိုက တကယ်ခံ့ညားတာပဲ...မျက်ရည်တောင်ကျလာပြီ...အဲဒီပုခုံးပေါ်ကနေ ကိုင်ပေါက်လိုက်တဲ့အကွက် ကျွန်တော်လည်းခံဖူးတယ်... ကျွန်တော့်အစ်ကိုက ကျွန်တော့်ကိုတစ်ခါက အဲဒီလိုလုပ်ဖူးတယ်...]

[အပေါ်ထပ်က ဘဒိုရေ နည်းနည်းများသွားပြီ...]

[မင်းစိတ်ထိခိုက်ရတာကို ငါနားလည်တယ်... ညီကို ...သူက ကောင်းတာလုပ်ခဲ့ပေမယ့် လူအများကြီးဆီကနေ အဆဲခံလိုက်ရတယ်...]

[ကံကောင်းလို့ အခုမှ အားလုံးအမြင်မှန်ရကုန်တာ... မင်းကို ဖက်လိုက်တယ်ညီကို... ငါတို့မင်းဘက်မှာ အမြဲရှိနေပေးမယ်...]

[cpဖန်တွေရဲ့ နှလုံးသားကတော့ ဒီနေ့ည ရိုလာကိုစတာ စီးနေရသလိုပဲ အပေါ်တတ်လိုက် အောက်ကျလိုက်နဲ့ ငါ့နှလုံးသားလေးလည်း မခံစားနိုင်တော့ဘူး... ငါ့အပေါ်ကောင်းပေးကြရမယ်နော်...]

[တကယ်ကို နာကျင်ရတယ်... ယဲ့ဇယ်ရှစ်ရော ထန်ကျင့်ရော အဆင်ပြေရမယ်နော်...]

[ငါအခု အသေဒေါသထွက်နေတယ်... သူတို့နှစ်ယောက်က ဘာဖြစ်လို့ လူရွေးပွဲကနေ နှုတ်ထွက်သွားရတာလည်း ဟိုငတုံးကတောင် နှုတ်မထွက်ရသေးတာကို... အကြောင်းအရင်းကဘာလဲလို့...ဝူး...]

ထန်ကျင့်မှာလည်း ပရိသတ်များနည်းတူ ယဲ့ဇယ်ရှစ်အား ပြိုင်ပွဲမှ မနှုတ်ထွက်စေချင်ပေ။ သူ ရဲစခန်းမှ ထွက်လာပြီးသောအခါ ချက်ချင်း Weiboပို့စ်တင်ခဲ့သော်လည်း ယဲ့ဇယ်ရှစ်ထက် ခြေတစ်လှမ်းနောက်ကျခဲ့ရသည်။ 

သူ့ အေးဂျင့်ထံမှ အပြစ်ဖို့ခံလိုက်ရသည်ကို သိသောအခါ ထန်ကျင့် ယဲ့ဇယ်ရှစ်ကိုရှာရန် ကားထဲမှ ထွက်သွားချင်ခဲ့သည်။

"မင်း ဘာဖြစ်လို့ နှုတ်ထွက်သွားတာလဲ..."

ထန်ကျင့်က တုံ့ဆိုင်းခြင်းမရှိဘဲ WeChat ကိုဖွင့်ကာ ယဲ့ဇယ်ရှစ်ထံ စာပို့လိုက်သည်။

ယဲ့ဇယ်ရှစ်နှင့် wechat အပ်ပြီးချိန်မှစ၍ ထန်ကျင့်ဘက်မှ ‌ဦးဆုံးစာပို့သည်မှာ ယခုက ပထမဆုံးဖြစ်လေသည်။ 

ယဲ့ဇယ်ရှစ်က လျင်မြန်စွာပင် စာပြန်ခဲ့သည်။

"ငါပင်ပန်းနေပြီ...မနက်ဖြန် မပြိုင်ချင်တော့ဘူး..."

ဤသည်မှာ အမှန်ပင်ဖြစ်သည်။ လွန်ခဲ့သောရက်အနည်းငယ်အတွင်း ယဲ့ဇယ်ရှစ်၏ လေ့ကျင့်နှုန်းက ယခင်ပြိုင်ပွဲများထက် ပို၍များလေသည်။ ထို့ကြောင့် သူ့တွင် အွန်လိုင်းဝတ္ထုဖတ်ရန်ပင် အချိန်မရှိခဲ့ပေ။

နေ့တိုင်း သူ၏အခန်းသို့ပြန်ရောက်သည်နှင့် ရေချိုးကာ အိပ်ရာထဲ ‌ထိုးကျသွားသည်ချည်းသာဖြစ်သည်။

ယနေ့ကဲ့သို့ စောစောပြန်ရသည်မှာ ယဲ့ဇယ်ရှစ်အတွက် ရှားပါးလေသည်။ ယဲ့ဇယ်ရှစ် ကားထဲသို့ဝင်သောအခါ အနည်းငယ် မူးဝေနေခဲ့သည်။ ထိုသို့မူးနေချိန်မှာပင် သူကိုယ်သူတည်ငြိမ်အောင်လုပ်ကာ ထန်ကျင့်အား ဖြေပေးနေရသည်။

သို့သော်ငြား ထန်ကျင့်က ထိုသို့တွေးမနေပေ။

"Time Idol "တွင် ယဲ့ဇယ်ရှစ်မှာ ကျော်ကြားမှုအရသာမက သန်မာမှုအရပါ ထိုက်တန်သော ပြိုင်ပွဲဝင်တစ်ယောက်ဖြစ်သည်။ ပွဲဦးထွက်ရန်မှာ သူတို့၏ ကျော်ကြားမှုအပေါ်တွင် မူတည်နေသည်။ ယဲ့ဇယ်ရှစ်သာ ဖိုင်နယ်ပွဲတွင် ပါဝင်ပါက သူCနေရာမှ သေချာပေါက်ပင် ပွဲဦးထွက်နိုင်လိမ့်မည်ဖြစ်သည်။ 

သူ့(ထန်ကျင့်)ကို ကူညီလိုက်သောကြောင့် ယဲ့ဇယ်ရှစ်က သူ၏ ပွဲဦးထွက်နေရာကိုပင် လက်လျှော့လိုက်ရသည်။

ထန်ကျင့်၏ ရင်ထဲတွင် ခံစားချက်များ ရှုပ်ထွေးနေလေသည်။ သူ့ကြောင့်သာ မဟုတ်ပါလျှင် ယဲ့ဇယ်ရှစ် ထိုသို့နှုတ်ထွက်လိုက်ရမည်မဟုတ်ပေ။

အမှန်တကယ်တွင် ထိုအချိန်က ယဲ့ဇယ်ရှစ် ကူညီရန် ထွက်မလာလည်းရသည်။ ထန်ကျင့် စိတ်ကိုပြင်ဆင်ပြီးဖြစ်သောကြောင့် သူပြန်တိုက်ခိုက်မှာပင်ဖြစ်သည်။

စွေ့ယီဆီမှ ခပ်ပြင်းပြင်း အရိုက်ခံရရုံသာဖြစ်သည်။ သို့သော် သူ စွေ့ယီကိုသာ ဖျက်ဆီးနိုင်သရွေ့ ထိုဒဏ်ရာများက မပြောပလောက်ချေ။

ယဲ့ဇယ်ရှစ်က ရှေ့ထွက်လာပြီး သူ့ကို ကူညီခဲ့ခြင်းမှာ သူမျှော်လင့်ထားသည့်အရာ မဟုတ်ခဲ့ပေ။

အမည်မသိသော ခံစားချက်တစ်ခုက တဖြည်းဖြည်းနှင့် သူ့ရင်ထဲတွင် ပျံ့နှံ့လာသည်။ ထန်ကျင့်၏ မျက်လုံးများလည်း အနည်းငယ်စိုစွတ်လာခဲ့သည်။ စာရိုက်နေစဉ်အတွင်း တုန်ရင်နေသော လက်များကို အားသုံးကာ ထိန်းချုပ်ထားရသည်။

"မင်း ငါ့အတွက် ဒီလိုလုပ်ပေးစရာ မလိုပါဘူး..."

ထန်ကျင့် ထိုစာကြောင်းကို ဖျက်လိုက်သည်။ စာကြောင်းတစ်ကြောင်းလုံးအား ဖျက်လိုက်ခြင်းဖြစ်ကာ ရိုးရှင်းသည့် စာလုံးလေးသုံးလုံးသာ ချန်ခဲ့လေသည်။

"ကျေးဇူးပါ..."

ယဲ့ဇယ်ရှစ်: "ကိစ္စမရှိဘူး... ကောင်းကောင်းအနားယူလိုက်..."

"မင်းရောပဲ..." 

ထန်ကျင့် ပြုံးလိုက်သည်။ 

သူပြန်စာပို့ပြီးသည်နှင့် သူ့အေးဂျင့်က အပြင်မှ ကားတံခါးကို ဆွဲဖွင့်လိုက်‌သောကြောင့် အပြင်မှလေပူများ ရုတ်တရက် ဝင်ရောက်လာသည်။ အေးဂျင့်က ထန်ကျင့်ကိုပြောလိုက်သည်။ 

"စိတ်မပူနဲ့‌တော့... အားလုံးကိုင်တွယ်ပြီးသွားပြီ..."

ထန်ကျင့် ခေါင်းညိတ်လိုက်သည်။ အတန်ကြာ တိတ်ဆိတ်နေပြီး‌နောက် သူ ဖုန်းကိုဖွင့်လိုက်ကာ ယဲ့ဇယ်ရှစ်ကို followလိုက်ပြီး Weiboပို့စ် တစ်ခုကို တင်လိုက်လေသည်။

@ထန်ကျင့်: "အရာအားလုံးက သေသေချာချာ ရှင်းလင်းသွားခဲ့ပြီ... ကျွန်တော် စိတ်လိုက်မာန်ပါ လုပ်ခဲ့မိသလို ဖြစ်သွားခဲ့ပေမယ့် အဲ့ဒီအတွက် နောင်တမရပါဘူး... ဒီနေ့အတွက် ယဲ့ဇယ်ရှစ်ကို အရမ်းကျေးဇူးတင်မိပါတယ်... ကျေးဇူးပါ ညီအစ်ကိုကောင်း @ယဲ့ဇယ်ရှစ်..."

ထိုWeiboပို့စ်ကို မြင်သောအခါ ထန်ကျင့်ဖန်များ ငိုကြလေသည်။

[ထန်ထန် အဆင်ပြေရမယ်နော်...]

[ကောင်းကောင်းအနားယူလိုက် ပေါင်ပေ့...]

[ငါတို့မင်းကို အမြဲထောက်ပံ့နေမှာ...]

[ကျေးဇူးပါ ယဲ့ဇယ်ရှစ်... အရမ်းကျေးဇူးတင်ပါတယ်...]

[ဝူး...ဝူး... ငါ့cp ဆီကနေရတဲ့ ပထမဆုံးအချိုက ငါ့ကို ငိုအောင်လုပ်တာဖြစ်နေတယ်...ငါတကယ်ကို စိတ်မချမ်းမသာဖြစ်နေတယ်... ကလေးလေးတို့ အဆင်ပြေရမယ်နော်...]

[ငါ့အကောင်ပေါက်လေးနှစ်ယောက်အတွက် အရမ်းဝမ်းနည်းတာပဲ...]

[ငါ မင်းတို့နှစ်ယောက်ကို တကယ်ထွက်မသွားစေချင်ဘူး...နှုတ်မထွက်လို့ မရဘူးလားဟင်...]

"Time Idol" ပရိုဂရမ်အဖွဲ့မှာ ကြေညာချက်တစ်စောင် ထုတ်ပြန်ရန်အတွက် နောက်ဆုံးတွင် ထွက်ပေါ်လာခဲ့သည်။

@Time Idol: စွေ့ယီမှ ထန်ကျင့်အား လိင်ပိုင်းဆိုင်ရာ အနှောင့်အယှက်ပေးမှုနှင့် ပတ်သက်၍ သေသေချာချာ စုံစမ်းစစ်ဆေးမှုများ ပြုလုပ်ခဲ့ရာတွင် ထိုကိစ္စမှာ အမှန်တကယ်ဖြစ်ခဲ့သည်ဟု ထွက်ရှိလာသောကြောင့် ရဲများက ထိုကိစ္စအားလက်လွှဲယူလိုက်ပြီ ဖြစ်ပါသည်။

စွေ့ယီကို ရာဇဝတ်မှု ကျူးလွန်သည့်စွဲချက်ဖြင့် ရဲများထံသို့ လက်လွှဲလိုက်ပြီဖြစ်ပြီး အစီအစဉ်မှလည်း ထုတ်ပယ်လိုက်ပြီ ဖြစ်သည်။

ဒီနေရာမှာပဲ ကျွန်တော်တို့ ထန်ကျင့်နှင့် ဖန်များကို နောက်တစ်ကြိမ်တောင်းပန်လိုပါတယ်…

အစီအစဉ်အဖွဲ့မှ ပြိုင်ပွဲဝင်တို့၏ ကိုယ်ရေးကိုတာအချက်အလက်များနှင့် လုံခြုံမှုတို့ကို သေသေချာချာ ကာကွယ်စောင့်ရှောက်မည်ဖြစ်ပြီး နောင်အခါတွင် ဤကဲ့သို့အဖြစ်မျိုး ထပ်မံမဖြစ်ပေါ်လာစေရန် အာမခံပါသည်။

တစ်ချိန်ထဲမှာပဲ အစီအစဉ်မှ ထွက်ခွာသွားသည့် ပြိုင်ပွဲဝင်နှစ်ယောက်ဖြစ်သည့် ယဲ့ဇယ်ရှစ်နှင့် ထန်ကျင့်တို့အား စင်‌မြင့်ပေါ်သို့ ပြန်လာပေးရန်လည်း အလွန်မျှော်လင့်နေမိပါသည်။

..............

ပရိုဂရမ်အဖွဲ့မှ ထုတ်ပြန်ချက်ထွက်ပေါ်လာပြီး ရလဒ်တို့ကို ရင်ဆိုင်ခဲ့လေသည်။ ဤကိစ္စမှာ ပရိုဂရမ်အဖွဲ့နှင့် မသက်ဆိုင်သော်လည်း ထန်ကျင့်ဖန်များမှာ ဒေါသထွက်ဆဲဖြစ်သည်။

[ဆိုတော့... သူတို့က တောင်းပန်ကြောင်း စာထုတ်လာတာပေါ့လေ...]

[ငါအခုထိ မှားနေတယ်လို့ ခံစားမိနေတုန်းပဲ... နှစ်လတောင်လေ... ပြီးတော့နောက်ဆုံးရက်လေ... ထန်ထန်က မကြာခင်မှာပဲ ပွဲဦးထွက်နိုင်တော့မှာကို အချိန်အကြာကြီး ကြိုးစားခဲ့ရသမျှက စက္ကန့်ပိုင်းလေးအတွင်းမှာ ပျက်စီးသွားရတာ... ပြီးတော့ ပိုပြီးစိတ်တိုဖို့ကောင်းတာက ဒီကနေ့အဖြစ်အပျက်သာ အဖြစ်မှန်ပေါ်မလာဘူးဆိုရင် ပရိုဂရမ်အဖွဲ့က စွေ့ယီရဲ့ ရွံစရာကောင်းတဲ့ အကြောင်းတွေ ကို သိမှာမဟုတ်ဘူး.. ဒါက သူတို့တွေ ပြိုင်ပွဲဝင်တွေအပေါ် သေချာဂရုမစိုက်ဘူးဆိုတာကို သက်သေပြလိုက်သလို ဖြစ်မနေဘူးလား...]

[ငါ ပြိုင်ပွဲဝင်နှစ်ယောက်အတွက် တကယ်စိတ်မကောင်းဘူး...ယဲ့ဇယ်ရှစ်နဲ့ ထန်ကျင့်ကို စင်ပေါ်မှာနောက်ထပ် ပြန်မြင်ချင်သေးတယ်...ငါ ဒီအတွက် တစ်ပတ်ကြီးများတောင် စောင့်ခဲ့ရတာ...]

[ပွဲစီစဉ်သူရေ...ရှင်းပြချက်ပေးပါဦး...]

ထိုနေ့ညတွင် ထန်ကျင့်မှာ လီချန်ကျန့်နှင့် ပရိုဂရမ်၏ တရားဝင်Weiboအကောင့်ကို ပြန်တင်ကာ ဤကိစ္စမှာ ပရိုဂရမ်အဖွဲ့နှင့်သာမက ဒါရိုက်တာနှင့်ပါ မသက်ဆိုင်ကြောင်း ပြောခဲ့သည်။

ပြောရလျှင် လူတစ်ယောက်ကို အချိန်အကြာကြီးပေါင်းသင်းလျှင်ပင် ထိုသူ၏အကြောင်းအား အလုံးစုံမသိနိုင်သောကြောင့် သူ ပရိုဂရမ်အဖွဲ့ကို အပြစ်မတင်ပေ။

တစ်ချိန်တည်းမှာပင် ထန်ကျင့်က ပရိုဂရမ်အဖွဲ့အား ဖိတ်ခေါ်သည့်အတွက် ကျေးဇူးတင်ကြောင်းပြောကာ သူ "Time Idol" စင်မြင့်ပေါ်သို့ ပြန်မလာတော့ကြောင်း ရှင်းလင်းစွာ ပြောလိုက်သည်။

ဝမ်းနည်းဖွယ်ရာ အကောင်းဆုံးကိစ္စမှာ ပရိသတ်များနှင့် ဖန်များအား စိတ်ပျက်သွားစေရခြင်း ဖြစ်သည်။ 

[ငါအကြိုက်ဆုံး ပြိုင်ပွဲဝင်နှစ်ယောက်က တစ်ချိန်တည်းမှာပဲ ထွက်သွားကြတယ်...ငါတော့ရူးပါပြီ...]

[ဝူး...ယဲ့ဇယ်ရှစ် ပြန်လာခဲ့ပေးပါ...]

[စင်ပေါ်မှာ ထန်ကျင့်နဲ့ ယဲ့ဇယ်ရှစ် မရှိမှတော့ ဘာကြည့်စရာရှိတော့မှာလဲလို့...]

[ယဲ့ဇယ်ရှစ်က သေချာပေါက် ပြန်လာတော့မှာ မဟုတ်ဘူး...ဝူး...]

သူ့ဖန်များလည်း မသေချာပေ။ ယဲ့ဇယ်ရှစ် နှုတ်ထွက်ကြောင်း Weiboတွင် ပို့စ်တင်ပြီးကတည်းက အွန်လိုင်းဖြစ်သည်ကို သူတို့မတွေ့ရတော့ပေ။

ယဲ့ဇယ်ရှစ် မနှုတ်ထွက်မီ ထိုဆိုးရွားသော မှတ်ချက်များကြောင့် ခံစားသွားခဲ့ရသည်ဟု ဖန်များကထင်ခဲ့ကြသည်။

ယဲ့ဇယ်ရှစ် ကိုယ်တိုင်ကမူ ထိုသို့ပြောသည်။

"သေချာပေါက် အဲ့ဒီလို ဘယ်ဟုတ်ပါ့မတုန်း..."

သူက စိတ်ဖြောင့်ဖြောင့် အငြိမ်းစားယူနိုင်ရန်အတွက် အကြောင်းပြချက် ရှာလိုခဲ့ခြင်းသာဖြစ်သည်။

ယဲ့ဇယ်ရှစ်က စောစောစီးစီး အငြိမ်းစားယူရန် ကြံနေခဲ့ခြင်းဖြစ်သည်။ ထို့အပြင် အရန်သင့် အကြောင်းပြချက်က ရောက်ရှိလာခဲ့သည်။ 

ဒီအခွင့်အရေးကိုမှ ထွက်သွားဖို့ အသုံးမချရင် ငါ ပွဲဦးထွက်ပြီးမှလုပ်ရမှာလား... ထားလိုက်တော့ အဲဒီအခွင့်အရေးကို ပိုပြီးလိုအပ်တဲ့ ပြိုင်ပွဲဝင်တွေအတွက် ထားလိုက်တာပေါ့...

ယဲ့ဇယ်ရှစ်မှာ ထိုအတွေ့အကြုံများအား ကြုံတွေ့ခဲ့ရပြီးဖြစ်သောကြောင့် အနုပညာလောကထဲသို့ ဝင်ရောက်ရန် ပွဲဦးထွက်သည်ကို မှီခိုရန်မလိုပေ။

ပြီးတော့ ငါ့မှာ ပိုက်ဆံလည်းရှိပြီလေ...

စာချုပ်အရ ယဲ့ဇယ်ရှစ်သာ ထိပ်တန်းဆယ်ယောက်ထဲသို့ ရောက်ခဲ့ပါလျှင် သူ ယွမ်တစ်သိန်းရမည် ဖြစ်သည်။

ယွမ်တစ်သိန်းမှာ များသည်မဟုတ်သော်လည်း ထိုအရာက သူ့လတ်တလော အခြေအနေအား ဖြေရှင်းရန် ကူညီနိုင်လေသည်။

ရှေ့လျှောက် ရိုက်ရမည့် Bulgari ကြော်ငြာအတွက် ကြော်ငြာကြေးကလည်း မနည်းလှဘဲ တစ်သန်းဖြစ်သည်။ 

ယဲ့ဇယ်ရှစ် တစ်သန်းအား ငါးနှစ်ခန့်ပင်သုံးနိုင်သည်။ 

ပြီးတော့...ငါ တစ်သန်းကို တစ်နှစ်အတွင်း ဘယ်လိုလုပ် သုံးနိုင်မှာလဲလို့...

ယဲ့ဇယ်ရှစ်က အားလုံး စီစဉ်ပြီးပြီဖြစ်သည်။ သူ စီစဉ်ထားသည့်အတိုင်းသာ ဖြစ်လာပါလျှင် ယွမ်သောင်းဂဏန်းခန့်အား နေ့စဉ်အသုံးစရိတ်အတွက် ဖယ်ထားပြီးကျန်သည့်ငွေများကို ရင်းနှီးမြှုပ်နှံမှုထဲ ထည့်လိုက်မည်ဖြစ်သည်။

ပိုက်ဆံက ပိုက်ဆံကို ပွားပေးနိုင်တယ်...အကြံမဆိုးဘူး...

ပို၍အရေးကြီးသည့်အချက်မှာ သူ့တွင် ချမ်းသာသည့် အဖေရှိပြီး နောက်ခံလည်း တောင့်လေသည်။

နှစ်များစွာကြာသည့်အထိ သူ၏ ချမ်းသာသည့်အဖေက သူ့ကိုကတ်များ ပြန်မပေးဟု သူ မယုံပေ။

ယဲ့ဇယ်ရှစ် သူ၏အနာဂတ်မှ ပျော်ရွှယ်ဖွယ်ရာ ဘဝလေးအားတွေးပြီး မပြုံးဘဲ မနေနိုင်တော့ချေ။

🎶🎶🎶