Chapter 27

🎶 Chapter 27

ကောင်းရှူ ဖုန်းဖြေပြီးနောက် သူ့ကိုအမြဲတမ်း စိတ်ပူရအောင်လုပ်သည့် အနောက်မှ သခင်ငယ်လေးအား ကြည့်လိုက်သည်။ သူ့ရင်ထဲမှ သက်ပြင်းချလိုက်ကာ ပြောလိုက်သည်။

"သခင်လေး ဒါရိုက်တာလီက အခုပဲဖုန်းဆက်တယ် သခင်လေး တကယ်ပဲ မနက်ဖြန်ဖိုင်နယ်ပွဲကို မသွားတော့ဘူးလား..."

ယဲ့ဇယ်ရှစ် ခိုင်ခိုင်မာမာပြန်ဖြေသည်။

"မသွားချင်ဘူး..."

သူ ပြန်မသွားရုံသာမက ဤအနုပညာလောကမှ အငြိမ်းစားယူတော့မည်ကိုပင် ကြေညာရန်ပြင်ဆင်ပြီးဖြစ်လေသည်။

ကောင်းရှူ၏ မျက်ခုံးများ ရုတ်တရက်တွန့်သွားလေသည်။

"သခင်လေးက တကယ်ပဲ အွန်လိုင်းက မှတ်ချက်တွေကြောင့် ခံစားသွားရတာများလား..."

မဖြစ်နိုင်တာ...

ကောင်းရှူက အနောက်ခုံရှိ ယဲ့ဇယ်ရှစ်ကို ငဲ့ကြည့်လိုက်သည်။ ဖုန်းမျက်နှာပြင်၏ မှိန်ဖျော့‌ဖျော့အလင်းရောင်မှာ သူ့မျက်နှာပေါ်တွင် ရောင်ပြန်ဟပ်နေသည်။ ပန်းရောင်ရှေ့ဆံပင်များက အရှေ့သို့ကျနေသောကြောင့် သူ့မျက်နှာရှိ ခံစားချက်များကို ရှင်းလင်းစွာမမြင်ရပေ။ 

ကောင်းရှူ ရင်တစ်ချက်တုန်သွားသည်။ 

သခင်လေးက ငယ်ငယ်ကတည်းက ရန်စကားတွေ မကျေနပ်ချက်ဆိုတာတွေကို ခံစားဖူးတာမဟုတ်ဘူး... အခုသူက တော်တော် တိတ်ဆိတ်နေတယ်... သူ အဲဒီမှတ်ချက်တွေကြောင့် ခံစားသွားရတာ သေချာပေါက်ပဲ...

ပြောရရင် သခင်လေးလည်း ကြီးပြင်းလာတာအမှန်ပဲ... အရင်ကလို သူ့ဒေါသတွေကို တခြားသူတွေကို အော်‌ငေါက်ပြီး ဖွင့်မထုတ်တော့ဘူးလေ...

ထိုင်ခုံတွင် ငြိမ်သက်စွာ ထိုင်နေသော ယဲ့ဇယ်ရှစ်၏ ပုံရိပ်လေးကို ကြည့်ရသည်မှာ ဒဏ်ရာရနေသည့် ကြောင်လေးက သူ့ဒဏ်ရာသူ လျှာလေးဖြင့်လျက်ရင်း ထောင့်နားလေးတွင် တစ်ကောင်တည်းခွေနေသည့်ပုံကို မြင်ရသည့်အတိုင်းပင်။

ထိုသို့တွေးမိသည့်အခါ ကောင်းရှူပို၍ပင် စိတ်မကောင်းဖြစ်သွားရသည်။ 

ဒရိုင်ဘာ မောင်းသည့်နှုန်းမှာ အလွန်နှေးလေသည်။ Weiboကို ရှာဖွေကြည့်ပြီးနောက် ယဲ့ဇယ်ရှစ် အိပ်ငိုက်လာပြီဖြစ်သည်။

သူ အိပ်ပျော်တော့မည့်အချိန်မှာပင် အရှေ့မှ ကောင်းရှူ ပြောသည်ကိုကြားလိုက်ရသည်။

"သခင်လေး ကျွန်တော် တောင်းပန်ပါတယ်..."

ယဲ့ဇယ်ရှစ်၏ မက်မွန်ပွင့်မျက်ဝန်းများမှာ အနည်းငယ် ကျဉ်း‌မြောင်းသွားပြီး စိတ်ရှုပ်ထွေးသွားသည်။

ကောင်းရှူ၏ လည်စေ့အပေါ်အောက် လှုပ်ရှားသွားပြီး သူဆက်ပြောလာသည်။

" ဒီတစ်ခါကိစ္စအတွက် ကျွန်‌တော့်ကိုအပြစ်တင်ရမှာပါ... အင်တာနက်ပေါ်က မှတ်ချက်တွေကို ကျွန်တော် ကောင်းကောင်း မကိုင်တွယ်နိုင်ခဲ့လို့ဒီလိုတွေ ဖြစ်လာခဲ့ရတာ... သခင်လေး ဖုန်းကို ကြည့်စရာမလိုတော့ဘူး...ကိစ္စမရှိဘူး... သခင်လေးကိုအားပေးတဲ့ ဖန်တွေက အမြဲတမ်းသခင်လေးကိုပဲ အားပေးနေမှာလို့ ကျွန်တော် ယုံကြည်တယ်..."

"ကောလာဟလကို လွှင့်တဲ့သူတွေနဲ့ ပို့စ်ဖျက်သွားတဲ့သူတွေကို တရားစွဲဖို့ ကျွန်‌တော်တို့ရဲ့ ဥပဒေအဖွဲ့ကို ဆက်သွယ်ပြီးပြီ... ကောလာဟလကို ဖြန့်တဲ့သူတွေကို သူတို့လုပ်ခဲ့တဲ့အတိုင်း ပြန်ပေးဆပ်ရအောင် ကျွန်တော်တရားစွဲပစ်မယ်..."

"အဲ့ဒါကြောင့် သခင်လေး..." 

ဆက်ပြီးဝမ်းနည်းမနေပါနဲ့တော့... 

ထိုစာကြောင်းလေးမှာ တစ်နည်းနည်းဖြင့် တိမ်မြုပ်သွားရသည်။ အရပ် ၁၉၀စင်တီမီတာရှိသည့် အတွင်းရေးမှူးကောင်းကဲ့သို့ သူတစ်ယောက်မှာ ထိုစကားပြောရန်အတွက် ခက်ခဲနေခဲ့ရသည်။

ကောင်းရှူ ဘာပြောရမှန်းမသိ ဖြစ်နေစဉ်မှာပင် ယဲ့ဇယ်ရှစ်၏ ပျင်းရိစွာ ပြန်ဖြေသံကို ကြားလိုက်သည်။ 

"ဟမ်...ဒါပေမယ့် သူတို့ကို တရားစွဲစရာမလိုဘူးလေ...ဒါက ဒီအတိုင်း အင်တာနက်ပေါ်က ကောလာဟလသက်သက်ပဲကို ကျွန်တော်အတည်မယူပါဘူး..."

ထိုသို့ပြောပြီးသောအခါ ယဲ့ဇယ်ရှစ် အလွန်အိပ်ချင်နေသောကြောင့် သမ်းလိုက်သည်။ သမ်းလိုက်သောကြောင့် မျက်ဝန်းထောင့်တွင် မျက်ရည်စများ ဝေ့သိီလာသည်။

ကောင်းရှူ ယဲ့ဇယ်ရှစ်၏ မျက်လုံးထောင့်ကို ကြည့်ကာ အံကိုကြိတ်လိုက်သည်။ 

သခင်လေးက စိတ်မကောင်းဖြစ်လွန်းလို့ မျက်လုံးတွေတောင် နီရဲနေရပြီ... ဒီလိုခံစားနေရတာတောင်မှ သူက ကောလာဟလ ဖြန့်တဲ့သူတွေအတွက် ကူပြောပေးနေသေးတယ်... ငါတို့ရဲ့ သခင်လေးက တကယ်ကြင်နာတတ်တာပဲ...

ကောင်းရှူ သက်ပြင်းတစ်ချက်ရှိုက်လိုက်ပြီး ပြောလိုက်သည်။

"သခင်လေး ဒီလိုကိစ္စတွေအတွက် စိတ်ပူနေစရာမလိုဘူး...ကျွန်‌တော်ပဲ ဂရုစိုက်လိုက်မယ်..."

အဲ့ဒီလူတွေကို ငါ အလွတ်မပေးနိုင်ဘူး...

ယဲ့ဇယ်ရှစ် အလွန်အိပ်ချင်နေပြီဖြစ်သည်။ သူ ဝတ်ကျေတန်းကျေ ခေါင်းညိတ်လိုက်ပြီး ဖုန်းကိုချကာ မျက်လုံးမှိတ်လျက် တစ်ရေးတမောအိပ်ရန်ပြင်တော့သည်။ 

ကောင်းရှူ သူ့သခင်လေး၏ အလွန်အိပ်ချင်နေသော မျက်နှာကိုကြည့်ကာ ဆက်မနှောင့်ယှက်တော့ဘဲ အ 

ရှေ့သို့ပြန်လှည့်ကာ ယဲ့ဇယ်ရှစ်အတွက် အနာဂတ်အစီအစဉ်များကို စိတ်ထဲတွင် ပြန်ပြင်ရေးဆွဲနေခဲ့သည်။

ယဲ့ဇယ်ရှစ်က အဖွဲ့မဖွဲ့လိုသောကြောင့် အဖွဲ့မဖွဲ့ခြင်းမှာ အဆင်ပြေသည်။

အဖွဲ့ဖွဲ့ရန်အတွက်မှာ အလုပ်ပို၍ရှုပ်လေသည်။ အဖွဲ့ထဲမှ လူတစ်ယောက်ချင်းစီ၏ တိုးတက်မှုအတွက်လည်း လုပ်ငန်းစဉ်များ ကွဲပြားလေသည်။ ထို့အပြင် အဖွဲ့ဝင်တစ်ယောက်ချင်းဆီမှ ရရှိမည့် ကြော်ငြာကြေးများမှာလည်း ညီမျှမှု ရှိမည်မဟုတ်ပေ။ 

သူတို့သခင်လေး၏ ကိုယ်ပိုင်အရင်းမြစ်များမှာ ကောင်းလှသည်။ သို့သော် အဖွဲ့ဖွဲ့လိုက်ပါလျှင် ယဲ့ဇယ်ရှစ်၏ တိုးတက်မှုအတွက် ကန့်သတ်ချက်များ ရှိနေပေလိမ့်မည်။

ယဲ့ဇယ်ရှစ်က ပြိုင်ပွဲမှ နှုတ်ထွက်ခဲ့ပြီးဖြစ်သည့်အတွက် ယခုရိုက်ကူးရေးလုပ်နေသည့် ဗီလာသို့ပြန်သွားရန် မဖြစ်နိုင်တော့‌ပေ။ 

ကောင်းရှူ ဒရိုင်ဘာအား ယဲ့ဇယ်ရှစ်ကို ရေကန်ဘေးရှိ ဗီလာအား လိုက်ပို့ခိုင်းလိုက်သည်။ ထိုဗီလာမှာ ယဲ့ဇယ်ရှစ် အရွယ်ရောက်သည့်အချိန်မှစ၍ နေခဲ့သောဗီလာဖြစ်သည်။ 

ရေကန်ဘေးရှိ ဗီလာမှာ လုံခြုံရေးတင်းကျပ်သော နေ‌ရာကောင်းတွင် တည်ရှိသည်။ ယဲ့ဇယ်ရှစ်သာ ထိုနေရာ၌ နေပါက ကောင်းရှူလည်း စိတ်အေးရမည်ဖြစ်သည်။ 

သူ့အရှေ့ရှိ ဗီလာကို မြင်သောအခါ ယဲ့ဇယ်ရှစ် အလွန်ကျေနပ်သွားလေသည်။ 

ကောင်းချက်...အခုတော့ အိမ်ဝယ်ဖို့ ပိုက်ဆံကို စုပြီးသားဖြစ်သွားပြီ... 

"သခင်လေး ဒီနေ့တော့နားလိုက်ပါဦး...တစ်ခုခုလိုရင် ကျွန်တော့်ကို ဖုန်းဆက်လိုက်ပါ..."

ကောင်းရှူ ပြောလိုက်သည်။

ယဲ့ဇယ်ရှစ် ပြုံးလျက် ခေါင်းညိတ်လိုက်သည်။ 

အတွင်းရေးမှူးကောင်း ထွက်သွားသောအခါ ယဲ့ဇယ်ရှစ် သူပိုင်ဆိုင်သည့် ဗီလာအား လှည့်ပတ်ကြည့်ရှုတော့သည်။ 

သုံးထပ်ဗီလာ၊ ဂိမ်းအခန်း၊ ဘိလိယက်အခန်း၊ မိသားစုရုပ်ရှင်ရုံနဲ့ အပြင်ဖက်က ရေကူးကန်အကြီးကြီး... လုံးဝကိုနိဗ္ဗာန်ပဲ မဟုတ်ဘူးလား...

ဒါက လူချမ်းသာတွေရဲ့ ဘဝပေါ့လေ...တော်တော် မနာလိုချင်စရာ ကောင်းတာပဲ...

အာ...မဟုတ်တာ ငါကအခု အဲ့ဒီမနာလိုချင်စရာဘဝရောက်နေပြီပဲကို...

ယဲ့ဇယ်ရှစ်၏ နှုတ်ခမ်းထောင့်များ ကတိုက်ကရိုက် ကော့တက်သွားသည်။ ငွေအရှိန်ကြောင့် အစောက အိပ်ချင်စိတ်များပင် လွင့်ပြယ်သွားသည်။ 

သူ့ခန္ဓာကိုယ်ပေါ်တွင် ချွေးအလွှာပါးတစ်ခုရှိနေခဲ့လေသည်။ ယဲ့ဇယ်ရှစ် ပထမဦးစွာ ၁၀မီတာရှိသည့် ရေချိုးကန်ထဲသို့သွားကာ ရေချိုးလိုက်ပြီး အိစက်နေသည့် ဆိုဖာ‌ကြီး‌ပေါ်တွင် ပျော်ရွှင်စွာလဲလျောင်းလိုက်ကာ လူးလိမ့်နေခဲ့သည်။ 

ဝါး...အိစက်နေရောပဲ... အရမ်းဇိမ်ကျပြီး...အရမ်းမိုက်တယ်...

ဆိုဖာပေါ်တွင် နောက်ထပ်နှစ်ပတ်ခန့် လူးလိမ့်ပြီးနောက် ယဲ့ဇယ်ရှစ် အလွန်အရေးကြီး‌သော အရာတစ်ခုကို ရုတ်တရက် သတိရသွားသည်။

အခု ငါက ချမ်းသာမှုတွေကြားထဲ မွေ့လျော်တော့မယ်လို့ ဆုံးဖြတ်လိုက်ပြီဆိုတော့ ငါ့ရဲ့အရင်ဘဝလေးကို နှုတ်ဆက်ရတော့မှာပေါ့...

ယခင်ဘဝက အလုပ်ကြိုးစားခဲ့ပြီး ရုတ်တရက်သေသွားခဲ့သော ယဲ့ဇယ်ရှစ်ပင်ဖြစ်စေ၊ ဘဝအတွေ့အကြုံ မပြည့်စုံ‌ခဲ့သော ယဲ့ဇယ်ရှစ်ပင်ဖြစ်စေ၊ စင်မြင့်ပေါ်တွင် တောက်ပနေသော ယဲ့ဇယ်ရှစ်ပင်ဖြစ်စေ ထိုအရာများမှာ ယနေ့တွင် အဆုံးသတ်ရတော့မည်ဖြစ်သည်။

ယဲ့ဇယ်ရှစ် ဖုန်းကိုထုတ်လိုက်ကာ Weiboတွင် ပို့စ်တင်ပြန်လေသည်။

နှစ်မိနစ်ကြာသောအခါ Weiboပို့စ်တစ်ခုမှာ အင်တာနက် တစ်ခုလုံးအား ကိုင်လှုပ်လိုက်ပြန်သည်။ 

@ယဲ့ဇယ်ရှစ်: တချို့လူတွေက ထွက်ခွာသွားပြီးရင် ပြန်မတွေ့ကြရတော့ဘူး...သူတို့က သူ့တို့ဘဝထဲမှာ ပုံမှန်အတိုင်း ဆက်တည်ရှိသွားကြမှာ... ကျွန်တော့်အတွက်ကတော့ "Time Idol" က စမှတ်နဲ့ အဆုံးသတ်ဖြစ်ခဲ့ပါတယ်... ကံကြမ္မာဖန်ရင် ကျွန်တော်တို့ ပြန်ဆုံကြရမှာပါ... အနာဂတ်မှာ အားလုံး အဆင်ပြေပါ‌စေလို့ ဆုတောင်းပေးပါတယ်..."

[ဒါ...ဒါ...ငါထင်နေသလို အဓိပ္ပာယ်တော့ မဟုတ်ဘူးမို့လား...]

[မဟုတ်ဘူးမို့လား... ဒီအနုပညာလောကကနေ ထွက်သွားတော့မှာလို့ ဆိုလိုချင်တာလား...]

ဖန်များ အနည်းငယ် စိတ်ရှုပ်ထွေးသွားကြသည်။ 

ယဲ့ဇယ်ရှစ် ရှားရှားပါးပါး စိတ်ကောင်းဝင်နေသောကြောင့် ဖန်များကို စာပြန်ခဲ့သည်။

"ဟုတ်တယ်... အနာဂတ်မှာ ကျွန်တော် ပိုပြီး နာခံတတ်ရတော့မယ်လေ..."

ကျောင်းတုံးတစ်တုံးက လှိုင်းပေါင်းများစွာ ဖြစ်စေနိုင်သကဲ့သို့ပင် ဖန်များလည်း ချက်ချင်းဆိုသလိုပင် ပေါက်ကွဲထွက်သွားကြသည်။  

[ညီအစ်ကို...အနားမယူပါနဲ့...]

[ဝူး...ယဲ့ဇယ်ရှစ် ဒီလိုမျိုးထွက်သွားလို့မရဘူး...မင်းရဲ့ ဖန်တွေက အခုထိ မင်းကိုစောင့်နေကြတုန်းပဲ...]

[ဘရို... မင်းကအရမ်းတော်တာကို ဘာဖြစ်လို့အနားယူမှာလဲ...]

[ငါ့လခွမ်း... ငါငိုနေပြီ... ဝူး...ယဲ့ဇယ်ရှစ် ဟိုချီးထုပ်ကောင် စွေ့ယီတောင် အခုထိ ထွက်မသွားသေးတာကို မင်းကဘာဖြစ်လို့ ငါတို့ကို အရင်ထားသွားရတာလဲ..]

[ငါ ယုံမပေးနိုင်ဘူး... ငါတို့ယုံကြည်မပေးနိုင်ဘူး... ယဲ့ဇယ်ရှစ် ကိုယ်တိုင် ပါးစပ်က မပြောမချင်း ပို့စ်တင်ပြီး Weiboကနေပြောတာကို ထည့်မတွက်ဘူး...ငါတို့မယုံပေးနိုင်ဘူး...]

[ငါတို့မယုံဘူး...]

ဖန်များ မည်ကဲ့သို့ပင် ဝမ်းနည်းပူဆွေးနေကြပါစေ ထိုစာပြန်ပြီးသည်မှစ၍ ယဲ့ဇယ်ရှစ်မှာ အွန်လိုင်းတက်မလာတော့ပေ။ 

ဖန်များမှာ ပို၍ ပို၍ စိတ်မအေးမချမ်းဖြစ်လာကြကာ အချို့ဖန်များဆိုလျှင် ယဲ့ဇယ်ရှစ် Weiboသို့သွားကာ ရှင်းပြချက်တောင်းသည့် စာများတရစပ်ပို့ကြလေသည်။ 

ထိုသီးသန့် ပို့စာများမှာ သမုဒ္ဒရာထဲကျသကဲ့သို့ နစ်မြုပ်ပျောက်ဆုံးသွားကြရသည်။ ဖန်များလည်း တုံ့ပြန်ချက်မရသည်ကို စိတ်မရှည်ဖြစ်လာကြသည်။

တစ်ညလွန်သောအခါ #ယဲ့ဇယ်ရှစ် အနုပညာလောကမှထွက်ခွာ# ဆိုသည်မှာ hot search ဖြစ်လာခဲ့သည်။ 

ထိုကိစ္စကို အာရုံစိုက်‌နေသည့် လူများလည်း ပို၍များပြားလာကာ ဖြေရှင်းချက်ပေးလာမည်ကို စောင့်ဆိုင်းနေသည်မှာလည်း ပို၍ ရှည်ကြာလာသည်။ သို့သော် မည်သည့်သတင်းမှ တက်မလာသောအခါ အင်တာနက်အသုံးပြုသူများနှင့် ဖန်များမှာ ပို၍ပင် စိတ်ပူလာကြသည်။

ထိုသည်မှာ ဟယ့်ကျင်းယွင်၏ ဝေးပေါ်ပို့တစ်ခုက လူအများ၏ မျက်စိရှေ့မှောက် ရောက်မလာမီအထိသာ ဖြစ်သည်။

@ဟယ့်ကျင်းယွင်: "သူငယ်ချင်းလေး @ယဲ့ဇယ်ရှစ်ရေ မင်းမှာ ရိုက်ကူးဖို့ ရုပ်ရှင်တစ်ခုရှိနေသေးတယ်လေ...ဘာတွေလုပ်နေတာတုန်း..."

ဖန်များ: "..."

ဟယ့်ကျင်းယွင်၏ Weiboပို့စ် တင်ပြီးသည်နှင့် မိနစ်ပိုင်းအတွင်းမှာပင် မှတ်ချက်များက တစ်သောင်းကျော်သွားခဲ့သည်။ 

[ရုပ်ရှင်အသစ်လား...]

[ရှေ့တန်းကနေ စောင့်နေတဲ့ငါလေး ဘာရလိုက်လဲ ကြည့်လိုက်ကြစမ်း...]

[အယ်...ယဲ့ဇယ်ရှစ်နဲ့ ရုပ်ရှင်အသစ်လား...]

[နေပါဦး... ယဲ့ဇယ်ရှစ်က အနုပညာလောကကနေ ထွက်သွားတော့မယ်လို့ ပြောလိုက်တာ မဟုတ်ဘူးလား...]

ထိုသတင်းကြားသောအခါ ယဲ့ဇယ်ရှစ်ဖန်များလည်း ရောက်လာကြသည်။

[နည်းပြဟယ့်က ရှစ်ရှစ်နဲ့ စာချုပ်လက်မှတ်ထိုးခဲ့တာလား...]

[ယဲ့ဇယ်ရှစ်က နည်းပြဟယ့်နဲ့ ပူးပေါင်းချင်တယ်ပေါ့လေ ...ဆိုလိုချင်တာက အနားမယူဘူးပေါ့လေ...ဟုတ်တယ်မလား...]

[ဝူး... ငါ တစ်ညလုံး သတင်းအသစ်အတွက် စောင့်နေခဲ့တာ...ရှစ်ရှစ်ကို ဆွဲထားပေးပါ နည်းပြဟယ့်...သူ့ကိုဒီလောကထဲကနေ အနားယူခွင့်မပေးလိုက်ပါနဲ့...ಥ⁠╭⁠╮⁠ಥ ]

[နည်းပြဟယ့် ယဲ့ဇယ်ရှစ်ကို ဆွဲထားပေးပါ... ကျွန်တော်တို့ ဖန်တွေက သူ့ကိုစောင့်နေခဲ့ကြတာ... အဲ့ဒီ မကောင်းတဲ့မှတ်ချက်တွေက ကိစ္စကြီးမဟုတ်ပါဘူး...]

[ကျွန်မအိုင်ဒေါရေ ကျွန်မကိုပြောပေးပါဦး ယဲ့ဇယ်ရှစ်က အဲဒီWeiboပို့စ်ကို မှားပြီးတင်မိတာ ဟုတ်တယ်မလား...သူအနားယူမှာ မဟုတ်ဘူးမို့လား...]

မှတ်ချက်စာမျက်နှာတွင် ယဲ့ဇယ်ရှစ်၏ အခြေအနေအကြောင်းကို မေးနေသူများ များစွာ ရှိလေသည်။ ဟယ့်ကျင်းယွင် ယဲ့ဇယ်ရှစ်၏ ဖန်တစ်ယောက်ကို စာပြန်လိုက်သည်။

"အဲ့ဒါက ရုပ်ရှင်အတွက် ပူးပေါင်းမှုပါ... ပြီးတော့ စာချုပ်ကိုလည်း လက်မှတ်ထိုးပြီးပါပြီ..."

ယနေ့မှသာ လက်မှတ်ထိုးပြီးသော်လည်း စာချုပ်မှာ လက်မှတ်ထိုးပြီးစီးခဲ့ပြီး ယဲ့ကျန့်ပင်း၏ ရင်းနှီးမြှုပ်နှံမှု ငွေသည်ပင် ပေးချေပြီးဖြစ်လေသည်။

ယဲ့ဇယ်ရှစ်က နှုတ်ထွက်ချင်တယ်... ဘယ်ကိုနှုတ်ထွက်မှာလဲ...

ဟယ့်ကျင်းယွင် ပြုံးလိုက်ကာ သူရှေ့ရေးကို ကျော်မြင်ခဲ့သည့်အတွက် စိတ်သက်သာမိသွားသည်။

ကံကောင်းစွာပင် စာချုပ်များမှာ လက်မှတ်ထိုးပြီးသွားပြီ ဖြစ်သည်။

ယဲ့ဇယ်ရှစ်ဖန်များမှာ ‌ချောက်နက်ထဲသို့ လှမ်းရန် ခြေလှမ်းတစ်ဝက် ထုတ်ပြီးဖြစ်‌သော်လည်း ဟယ့်ကျင်းယွင်၏ ပြန်စာကို မြင်လိုက်ရခါမှ သူတို့ခြေလှမ်းကို နောက်ပြန်ဆုတ်လိုက်ကြသည်။

စာချုပ်ကို လက်မှတ်ထိုးပြီးသွားပြီ... ယဲ့ဇယ်ရှစ် စာချုပ်ဖောက်ဖျက်ခဲ့ရင်တောင်မှ သူ မထွက်သွားနိုင်တော့ဘူး...

ဖန်များက ထိုသို့တွေးခဲ့ကြသည်။

ထိုသို့တွေးမိသောအခါ ဖန်များက တစ်ခုခုမှားနေသည်ကို ခံစားလိုက်ကြရသည်။

ယဲ့ဇယ်ရှစ်က စာချုပ်ဖောက်ဖျက်ဖို့ ကြောက်မှာတဲ့လား...

ဖန်များက ဘယ်ညာကြည့်လျက် သူတို့၏ နှုတ်ခမ်းများကို‌ စေ့စေ့ပိတ်ကာ ခါးသီးသောမျက်ရည်များ သူတို့ပါးစပ်ထဲမှ ထွက်ကျလာမည်ကို တားဆီးလိုက်ကြရသည်။ 

ယဲ့ဇယ်ရှစ်က သေချာပေါက် ကြောက်မည် မဟုတ်ပေ။

သူက ချမ်းသာသည့် ဒုတိယမျိုးဆက်သူဌေးသား ဖြစ်သည်။ 

အရမ်းချမ်းသာလွန်းလို့ အဲ့ဒီလောက် လျော်ကြေးပမာဏလေးကို သူက ဂရုစိုက်မှာတဲ့လား...

ဟယ့်ကျင်းယွင် ပိုက်ဆံစကားပြောမလာမီကပင် ယဲ့ဇယ်ရှစ်က ငွေပေးချေပြီး ဖြစ်နေမည်ဟု သူတို့ ယုံကြည်ထားကြသည်။ 

စာချုပ်ဖောက်ဖျက်သည့် လျော်ကြေးမှာ နေရာမှာပင် ပေးချေပြီးဖြစ်သောကြောင့် ထိုကိစ္စမှာ တရားရုံးသို့ပင် ရောက်လိုက်မည် မဟုတ်ပေ။

များစွာသောဖန်များမှာ နှလုံးဆေး ဆောင်ထားသင့်သည်ဟုပင် ခံစားလိုက်ကြရသည်။ ယနေ့ သူတို့၏စိတ်ခံစားချက်များမှာ ချိန်သီးနာရီအကြီးကြီးပေါ်တွင် ထိုင်နေရသကဲ့သို့ပင် တစ်ခဏအတွင်းမှာပင် ကောင်းကင်အထက်သို့ မြင့်တက်သွားပြီး ချက်ချင်းမြေကြီးပေါ်သို့ ပြန်ကျလာသည့် ခံစားချက်မျိုးဖြစ်သည်။ အရာအားလုံးမှာ တုန်လှုပ်ဖွယ်ရာချည်းသာဖြစ်သည်။

သို့သော် ဖန်များမသိသည်မှာ ယဲ့ဇယ်ရှစ်က ထိုလျော်ကြေးငွေကို အမှန်တကယ် မပေးနိုင်သည်ကိုဖြစ်သည်။

ယခုတွင်မူ ယဲ့ဇယ်ရှစ်က အိပ်ရာပေါ်တွင် ထိုင်နေကာ စဉ်းစားခန်းဖွင့်နေလေသည်။

သူ့အိပ်ရာဘေးတွင် ကောင်းရှူမှာ ပုံမှန်ကဲ့သို့ပင် ရှုတည်တည်ဖြင့်သာ မတ်တပ်ရပ်နေ‌လေသည်။

ယဲ့ဇယ်ရှစ်မှာ ကောင်းရှူ နှိုးသည်ကိုခံလိုက်ရခြင်း ဖြစ်သည်။ ကောင်းရှူ မည်ကဲ့သို့ ဝင်လာသည်ကို ယဲ့ဇယ်ရှစ် မတွေးနိုင်မီမှာပင် ကောင်းရှူ တရစပ်ပြောသည်ကို ကြားလိုက်ရသည်။

ထိုအရာများအား စာကြောင်းတစ်ကြောင်းဖြင့် အကျဉ်းချုပ်လိုက်ရလျှင် "ယဲ့ဇယ်ရှစ် အငြိမ်းစားမယူနိုင်ပါ" ဟူ၍ပင်။

🎶🎶🎶