MM Story Teller

👻Chapter 2

Viewers 1k

👻Chapter 2

ရှီကျား ညနေခင်းတွင်အိမ်ကိုပြန်ရောက်လာခဲ့လေသည်။ အိမ်တံခါးကိုဖွင့်လိုက်စဥ်မှာပင် အနက်ရောင်အရိပ်လေးတစ်ခုက ဖြုတ်ခနဲပျံထွက်လာခဲ့သည်။ နူးညံ့သောလက်ဖ၀ါးလေးများမှာ ရှီကျား၏ခြေထောက်အပေါ်တွယ်တက်နေခဲ့ကြသည်။ အရည်ရွှန်းလဲ့နေသောမျက်လုံး၀ိုင်းကြီးတစ်စုံနှင့် သေးငယ်သော အကောင်ပေါက်လေးမှာ သူ့ကိုမော့ကြည့်ကာသနားစဖွယ်မြောင်ခနဲအော်မြည်လာခဲ့သည်။ ရှီကျား လက်ဆွဲအိတ်ကိုချကာ ထိုကြောင်နက်ကလေးကို ပွေ့ချီလိုက်လေသည်။

အိမ်ထဲတွင် အခြားမည်သူမျှရှိမနေခဲ့ချေ။

သူ ကြောင်အိမ်လေးဆီလျှောက်သွားလိုက်လျှင် ပန်းကန်ထဲမှ အရိုးနွှင်ထားသောငါးဖတ်များကိုထိပင်မထိထားသည်ကိုတွေ့လိုက်ရလေသည်။ သူ သက်ပြင်းကိုအသာချလိုက်ကာ ထိုဘေးမှဇွန်းအသေးလေးကိုကောက်ယူလျက်ထိုငါးအသားများကို အနည်းငယ်ချေမွလိုက်လေသည်။ ထို့နောက်ထို့နောက်ထိုဇွန်းလေးဖြင့် ငါးဖတ်များကိုခပ်ယူကာ အကောင်သေးလေး၏ ပါးစပ်ထံခွံ့လိုက်လေသည်။

ကြောင်နက်ကလေးမှာ မျက်လုံးများကို မှေးကျဥ်းလိုက်၏။ ကြောင်ကလေး၏ လျှာနီလေးမှာ ဇွန်း၏ထိပ်မှ ငါးအသားများကို အသာလျက်လိုက်လေသည်။ လူတစ်ယောက်နှင့် ကြောင်တစ်ကောင်မှာ တစ်ယောက်ကိုတစ်ယောက်ငြိမ်းချမ်းစွာခွံ့ကျွေးကာ စားသောက်နေခဲ့ကြသည်။ ရှီကျားမှာနောက်ဆုံးကျန်သော ငါးအသားများကို ကြောင်ကလေး၏ပါးစပ်ထဲခွံ့လိုက်လေသည်။ သို့သော် ကြောင်ငယ်လေးမှာ မ၀သေးသည့်အလား ဆက်တိုက်အော်မြည်နေဆဲဖြစ်သည်။

ရှီကျား ကြောင်ကလေးကိုချီကာ မီးဖိုချောင်သို့လျှောက်သွားလိုက်လေသည်။ ကြောင်နက်ကလေးမှာ ရှီကျားလက်ထဲတွင် ချွဲနွဲစွာမှီနေပြီး ရှီကျားမှာ ရေခဲသေတ္တာကိုဖွင့်လျက် ငါးသေတ္တာတစ်ဘူးကိုထုတ်ယူလိုက်သည်ကိုတွေ့လိုက်ရသည်။ ကြောင်ကလေးမှာ ထိုငါးဘူးကိုမြင်သည်နှင့် မျက်လုံးများတောက်ပလာပြီး တမြောင်မြောင်နှင့် အဆက်မပြတ်အော်မြည်လာခဲ့လေတော့သည်။

ရှီကျား နှုတ်ခမ်းတို့မတွန့်ကွေးသွားပဲ မနေနိုင်ခဲ့ချေ။ ထို့နောက်ညင်သာစွာဆိုလိုက်သည်။

"အခုပြင်ပေးမယ်ဟုတ်ပြီလား.."

ကြောင်ကလေးက သူ့စကားကိုနားလည်ပုံပင်။

သူ၏ခေါင်းလေးက ရှီကျား၏ ပွေ့ဖက်မှုကြားထဲ တိုးဝှေ့နေခဲ့လေသည်။ ရှီကျားမှာ လက်တစ်ဖက်ကကြောင်ကိုပွေ့ထားပြီး ကျန်တစ်ဖက်က မီးဖိုချောင်ဓါးကိုကိုင်ထားခဲ့လေသည်။ သို့သော် သူသည်ထိုငါးဘူးကို စဥ့်တီတုံးပေါ်တွင်တင်လိုက်စဥ်တွင် ရုတ်ချည်း...

ကြောင်ကလေးမှာ ပါးစပ်ကိုဟလျက် ညင်သာစွာကိုက်လိုက်စဥ် ရှီကျား၏လည်တိုင်တွင်ဆွဲထားသော ဆွဲကြိုးလေးမှာ ဖြတ်ခနဲပြတ်ကျသွားခဲ့လေသည်။

သူ၏ကြည်လင်သောမျက်လုံးအစုံမှာ ပြူးကျယ်၀ိုင်းစက်သွားခဲ့လေသည်။ ရှီကျားမှာ မီးဖိုချောင်သုံးဓါးကို လွှတ်ချလိုက်လေသည်။ ထို့နောက် ကြမ်းပြင်ပေါ်ပြုတ်ကျသွားသော ကြိုးကလေးကို လျင်မြန်စွာဖမ်းယူရန်ကြိုးစားလိုက်လေသည်။

ထိုကြိုးနီပေါ်တွင်လက်မအရွယ် သွေးနီရောင်ကျောက်စိမ်းလေးမှာ နေ၀င်ချိန်အလင်းရောင်အောက်တွင် အလင်းပြန်နေခဲ့လေသည်။ ထိုကျောက်စိမ်းလေးမှာ ကြိုးနီလေးထံမှ လျှောကျသွားခဲ့သည်။ ရှီကျား၏တုန့်ပြန်မှုက လွန်စွာလျင်မြန်ကာ ထိုကြိုးနီလေးကိုဖြတ်ခနဲဖမ်းယူလိုက်လေသည်။ သို့သော် သူကြိုးနီလေးကိုဖမ်းမိချိန်မှာပင် သွေးနီရောင် ကျောက်စိမ်းမှာ ကြမ်းပြင်ပေါ်သို့ ခွပ်ခနဲအသံလေးနှင့်အတူပြုတ်ကျသွားခဲ့တော့သည်။

ဘန်း...

မမြင်ရသည့်တစ်ခုခုကထိုးထွက်လာသည့်အလား အိမ်ယာ၀န်းထဲတွင် လမ်းလျှောက်နေကြသူအများအပြားမှာ တစ်ယောက်ပြီးတစ်ယောက် ကြက်သီးမွှေးညှင်းများထသွားခဲ့ကြလေသည်။

"သောက်ပလုတ်တုတ်..မနေ့ကပဲ မိုးလေ၀သက အပူချိန်တိုးမယ်လို့ကြေညာသွားတာမဟုတ်ဘူးလား..အခုကျရုတ်တရက်ကြီး ဘာလို့ချမ်းလာတာတုန်း"

မြေကြီးနှင့် သစ်ပင်များအကြား လမ်း၏မှောင်မိုက်သော ထောင့်ချိုးတွင် အနက်ရောင်အရှိန်အ၀ါတစ်ခုကရုတ်ချည်းနိုးထလာခဲ့သည်။ ၄င်းကကျောက်တုံးများကိုတွယ်လျက်တက်လာခဲ့လေသည်။

ဤအိမ်ယာ၀န်း၏ ၅ပေအကွာ ကျင်းတုရေကန်တွင် လည်ပတ်သူခရီးသည်အများစုမှာ ပိတ်ရက်ဖြစ်လေရာ ရေကန်ကိုပတ်လျက် လှပသောရှုခင်းများနှင့်အပျော်စီးလှေအတွေ့အကြုံကိုခံစားနေခဲ့ကြလေသည်။ လွန်ခဲ့သော၃နာရီမှစ၍ အရပ်မြင့်မြင့်နှင့် သီးခြားဆန်လှသော ကိုယ်တစ်ခုကထိုရေကန်၏အလယ် ရေပေါ်တွင် ရပ်နေပြီး သူ၏ရှေ့မှ အနက်ရောင်ချီအလုံးကြီးကိုကြည့်နေသည်အား မည်သူမျှသတိမထားမိခဲ့ကြချေ။

ထို၃နာရီအတွင်းတွင် ထိုအနက်ရောင်ချီအစုအဝေးကြီးမှာ ကုန်ခမ်းသွားလိုက် ပြန်ပြည့်လာလိုက်ဖြစ်နေခဲ့လေသည်။ သို့သော်မည်သို့ပင်ဖြစ်စေ သူ့ကို၀ိုင်းထားသော စက်၀ိုင်းထဲမှ ချီလုံးကြီးမှာ ထွက်သွား၍မရခဲ့ချေ။ အနက်ရောင်ချီများမှာ တဖြည်းဖြည်းပါးသထက်ပါးလျလာပြီး ရုန်းကန်မှုကပို၍ပြင်းထန်လာခဲ့လေသည်။

အနက်ရောင်၀တ်ရုံကို၀တ်ဆင်ထားသောအမျိုးသားမှာ ထိုချီလုံးကြီးကိုတစ်ချိန်လုံးစိုက်ကြည့်နေခဲ့လေသည်။

လက်ရှိတွင် ထိုအနက်ရောင်ချီလုံးကြီးမှာ လက်သီးဆုပ်အရွယ်တမျှသေးငယ်သွားခဲ့သည်။ နောက်နာရီ၀က်ခန့်ကြာပါက ၄င်းမှာလုံး၀ပျောက်ကွယ်သွားတော့မည့်ပုံပင်။ သို့သော်ထိုအခိုက်အတန့်တွင် အနက်၀တ်အမျိုးသားမှာ အဝေးရှိ အဆောက်အဦးတစ်ခုထံ စူးရှစွာလှည့်ကြည့်လိုက်လေသည်။ အနက်ရောင်ချီမှာလည်း ရုတ်ချည်းပြန်လည်ပြင်းထန်လာပြီး ပေါက်ကွဲနေသော လူလတ်ပိုင်းကြီးအသွင်အဖြစ်တိုက်ရိုက်ပြောင်းလဲသွားခဲ့လေသည်။

"အား..ယင်စွမ်းအင်..ဒီလောက်တောင်မှ အားပြင်းတဲ့ယင်စွမ်းအင်..ငါစားချင်တယ်..ငါစားချင်တယ်"

၀င်လက်စနေမင်းမှာတဖြည်းဖြည်းပို၍ နိမ့်ဆင်းလာခဲ့လေသည်။ နေလုံးကြီး၏ကိုယ်ထည်တစ်၀က်ခန့်မှာ မိုးကုပ်စက်၀ိုင်းအောက်သို့ နစ်မြုပ်နေခဲ့ပြီဖြစ်သည်။ ရွှေရောင်သန်းသောနေရောင်ခြည်အလင်းတန်းတချို့ကသာ ကမ္ဘာမြေအပေါ်ဖြာကျနေခဲ့လေသည်။

ထိုအခိုက်အတန့်တွင် ကလေးအများစုမှာ သူတို့၏မိဘများထံမှ ညစာစားရန်အိမ်ထဲသို့ ပြန်သွင်းခြင်းခံကြရ၏။ သူတို့သည် အိမ်ယာ၀န်း၏ အပန်းဖြေဧရိယာမှထွက်ခွာလာပြီးနောက် လမ်းကွေ့တစ်ခုကိုဖြတ်ကျော်ရလေသည်။ အနက်ရောင်အရှိန်အ၀ါတစ်ခုက မြေကြီးထဲမှ ဖြည်းညှင်းစွာထိုးထွက်လာခဲ့သည်။ ထိုဖြတ်သွားဖြတ်လာများ၏ ကိုယ်ကိုဖြတ်လျက် ဦးတည်ရာတစ်ခုထံရွေ့လျားသွားခဲ့လေသည်။

မည်သူမှထိုအနက်ရောင်အငွေ့အသက်ကိုသတိမထားမိကြချေ။ သို့သော် ထိုအရှိန်အ၀ါကသူတို့ကိုယ်မှဖြတ်အသွားတွင်မူ သူတို့သည်မသိလိုက်ခင်တွင် ကြက်သီးများထကာ အေးစိမ့်သွားခဲ့ကြသည်။ ထို့အပြင်ရှီကျား၏တိုက်ခန်းအတွင်းတွင် အနက်ရောင်အရှိန်အ၀ါများမှာ တံခါးကြား ပြတင်းပေါက်အဟများကြားမှ တိုး၀င်လာပြီး မကြာခင်မှာပင် သာမာန်မျက်စိနှင့်ဖောက်မမြင်နိုင်လောက်သည့်အထိ ထိုအမည်းရောင်အငွေ့အသက်များမှာ အိမ်ထဲတွင် ပြည့်နှက်သွားခဲ့လေသည်။

ထိုအနက်ရောင်အငွေ့အသက်များမှာ တောင်ပေါ်မှ တိမ်ထုများနှယ် မီးဖိုချောင်၏ထောင့်အလပ်မကျန်ဖုံးလွှမ်းလျက် အလယ်သို့တဖြည်းဖြည်းရောက်ရှိလာခဲ့လေသည်။

မီးဖိုချောင်၏ အလယ်တွင် ရှီကျားမှာငုတ်တုတ်ထိုင်ချလျက် တစ်စစီကွဲသွားသော ကျောက်စိမ်းဆွဲသီးလေးကို ကောက်ယူလိုက်လေသည်။ သူ၏မျက်ခုံးတို့ စုကျုံ့သွားခဲ့သည်။ ဒေါသတချို့နှင့်အတူ လက်ထဲမှကြောင်နက်ကလေးကို ကြမ်းပြင်ပေါ်ချလိုက်မိသည်။

ကြောင်နက်ကလေးမှာ သူဘာအမှားလုပ်မိမှန်းနားမလည်ခဲ့ချေ။ သူ၏ရွှန်းလဲ့သောမျက်လုံးကြီးများကို တဖျတ်ဖျတ်ခတ်လျက် ရှီကျားကိုနားမလည်စွာစိုက်ကြည့်နေခဲ့လေသည်။ ရှီကျားက သူ့ကိုမဖက်တော့သည်ကိုတွေ့လျှင် သူ၏လျှာနီလေးကိုထုတ်လျက် ရှီကျား၏လက်ချောင်းလေးများကို လျက်ကာချွဲနွဲ့လိုက်၏။

သက်ပြင်းရှည်ကြီးကိုချပြီးနောက် ရှီကျားမှာ ထိုအကောင်သေးလေးကို ထပ်မံကောက်ချီလိုက်လေသည်။ တချိန်တည်းမှာပင် သူကကျိုးပဲ့သွားသော ကျောက်စိမ်းလေး၃ပိုင်းကို အိတ်ကပ်ထဲထည့်လိုက်သည်။ သူသည်မီးဖိုချောင်ထဲမှ ခြေလှမ်းကျယ်ကျယ်ဖြင့်ထွက်ခွာသွားလျက် အနက်ရောင်အရှိန်အ၀ါများကို မသိချင်ယောင်ဆောင်ထားခဲ့လေသည်။ သူဖိနပ်လဲရန်ဧည့်ခန်းသို့ပြန်ရောက်လာချိန်တွင် ထိုအနက်ရောင်အရှိန်အ၀ါများမှာ မီးဖိုချောင်တစ်ခုလုံးကိုဖုံးလွှမ်းသွားခဲ့ပြီဖြစ်လေသည်။

အနက်ရောင်ချီမှာ မီးဖိုချောင်တစ်ခုလုံးတွင်ပြည့်သိပ်လျက် အမျိုးသမီးတစ်ဦး၏ မှုန်၀ါး၀ါးအရိပ်တစ်ခုကို ပုံဖော်နေခဲ့သည်။

ရှီကျား ဖိနပ်ကိုလဲနေရင်းခေါင်းကိုငုံ့ထားကာ ဘာကိုမှမမြင်သယောင်ဆောင်နေခဲ့လေသည်။ သို့သော် သူ၏ပုခုံးပေါ်မှ ကြောင်နက်ကလေး၏တစ်ကိုယ်လုံး၏အမွှေးများထောင်ထသွားခဲ့လေသည်။ ထို့နောက် သတ္တိကောင်းသောကြောင်ကလေးမှာ သူလည်တိုင်တဖက်ကြားအတင်း၀င်တိုးတော့သည်။ သို့သော် ခြေမငြိမ်လေရာ သူ၏အိတ်ကပ်ထဲချော်ကျသွားခဲ့လေသည်။

(TN- အိတ်ကပ်ဆိုဒ်ကြောင်ပိစိလေးဖြစ်နိုင်ပါတယ်)

ကြောင်နက်ကလေးမှာ ထိုအိတ်ကပ်ထဲတွင် သဘာ၀ကျစွာလုံးလုံးလေးကွေးနေခဲ့လေသည်။ ၄င်းမှာ ကြောက်ရွံ့မှုကြောင့်တုန်ယင်နေပြီး သူ၏ခေါင်းကလေးကို အိတ်ကပ်ထဲဇွတ်နှစ်ထားခဲ့သည်။

မီးဖိုချောင်ထဲတွင် အနက်ရောင်ချီများမှာ ပုံစံပြောင်းလဲလာခဲ့လေသည်။ ၄င်းမှာ အသက်၄၀အရွယ်မျှရှိသော မိန်းမကြီးတစ်ဦးပင်။ သူမ၏ခေါင်းမှာ ငိုက်စိုက်ကျလျက် ရေစိုနေသော ဆံပင်များမှာ အချောင်းလိုက် ငြိထွေးရှုပ်ပွနေခဲ့သည်။ ထို့နောက်သူမ၏ဆံပင်များမှရေတစ်စက်ပေါက်ခနဲပြုတ်ကျလာပြီး ကြမ်းပြင်ပေါ်တွင် သွေးရောင်များပျံ့နှံ့လာခဲ့လေသည်။

ထိုဆံပင်မှာ ရေများနှင့်စိုရွှဲနေခြင်းမဟုတ်ပဲ သွေးများဖြစ်နေခဲ့လေသည်။

ရှီကျား ဖိနပ်လဲပြီးနောက် သော့ကိုဆွဲကာ အပြင်သို့ထွက်ရန်ပြင်လိုက်လေသည်။ သူ၏အိတ်ကပ်ထဲတွင် ပုန်းနေသော ကြောင်ကလေးမှာ တအီအီအော်မြည်နေခဲ့လေသည်။ ရုတ်ချည်း သရဲမမှာ ခေါင်းကိုဖြတ်ခနဲမော့လာခဲ့သည်။ သူမ၏သွေးများနှင့်စိုရွှဲနေသော ဆံပင်များကြားမှာ မျက်ဆံကင်းမဲ့သော အဖြူရောင်မျက်သားလုံးကြီးဖြင့်စိုက်ကြည့်နေခဲ့သည်။ ထို့နောက် ရှီကျားထံအရူးအမူးပြေး၀င်လာတော့သည်။ သူမ၏ဆံပင်များမှာ ရှည်ထွက်လာပြီး

လက်တံ၆ခုအဖြစ်ပြောင်းလဲသွားခဲ့သည်။ ထို့နောက် သူ၏ခေါင်းနောက်သို့ချိန်ရွယ်လာခဲ့လေသည်။

ရှီကျား၏ခြေလှမ်းများ ခတ္တရပ်တန့်သွားခဲ့လေသည်။ သူသည်ညာလက်မှလက်ချောင်းများကိုလှည့်လိုက်ကာ လက်သီးကိုတင်းကြပ်စွာဆုပ်လိုက်လေသည်။ ထို့နောက် အမည်မသိသွေးနီရောင်အရှိန်အ၀ါတစ်ခုသူ၏လက်သီးကိုလွှမ်းခြုံလာခဲ့သည်။ ထိုဆံပင်များရောက်ရှိလာသည်နှင့် သူ၏ခေါင်းကို ညာဘက်ကိုစောင်းလျက် လက်တစ်ဖက်ကိုဆန့်ကာ ဖမ်းဆုပ်လိုက်သည်။ သို့သော် ထိုအချိန်တွင် သူကအသံတစ်ခုကိုသာကြားလိုက်ရလေသည်။

၀မ်....

"အား..."

အနက်ရောင်အရိပ်တစ်ခုမှာ ပြတင်းပေါက်မှ ဖောက်၀င်လာပြီး ထိုသရဲမ၏ခေါင်းပေါ်ကျလာခဲ့သည်။ ထိုသရဲမ၏ဆံပင်များမှာ မီးများထတောက်လာခဲ့သည်။ သရဲမမှာ ကြောက်လန့်တကြားထွက်ပြေးသွားတော့သည်။ သို့သော် ထိုအနက်ရောင်အရိပ်မှာ အလောင်းကိုကိုက်စားနေသော လောက်ကောင်များသဖွယ် ထိုသရဲမ၏ရင်ဘတ်ကို ချက်ချင်းဖောက်ထွက်သွားခဲ့သည်။ စူးရှစွာအော်မြည်သံနှင့်အတူ သရဲမမှာ အနက်ရောင်ချီများအဖြစ် ပြိုကွဲသွားခဲ့လေသည်။

ရှီကျားလျင်မြန်စွာလှည့်လာပြီး သူ၏တိုက်ခန်းထဲမှ ထွက်ပြေးသွားသော အနက်ရောင်ချီများကိုကြောင်အစွာ စိုက်ကြည့်လိုက်မိသည်။ သူမတုန့်ပြန်နိုင်လိုက်ခင်မှာပင် အရှေ့တံခါးကိုခေါက်သံတစ်ခုပေါ်ထွက်လာခဲ့ရာ သူအလိုအလျောက်တံခါးကိုဖွင့်လိုက်မိလေသည်။ လူ၂ဦးမှာတစ်ဦးကိုတစ်ဦးကြည့်မိလျှင် တန့်သွားမိကြလေသည်။

အနက်ရောင် မိုးကာရှည်ကို၀တ်ဆင်ထားသော အမျိုးသားတစ်ဦးမှာ သူ့အခန်းတံခါးရှေ့တွင်ရပ်နေခဲ့သည်။ ထိုလူ၏မျက်နှာမှာ အလွန့်အလွန်ကြည့်ကောင်းကာ နှာတံမြင့်မြင့် ခန့်ထည်သောမျက်ခုံးနှင့် အဖျားရှည်ကာနက်ရှိုင်းသော မျက်၀န်းများရှိလေသည်။ သူ၏ညာဖက်မျက်လုံးထဲတွင် မှည့်ကလေးတစ်စက်က ၀ှက်လျက်တည်ရှိနေခဲ့လေသည်။ ထိုမျက်နှာမှာ မည်သည့်နာမည်ကြီးသရုပ်ဆောင်များကိုမျှမရှုံးနိုင်ချေ။ ထိုမျက်လုံးထဲမှ မှည့်ကလေးကို အကြည့်ရောက်မိသည်နှင့် အေးစိမ့်စိမ့်ခံစားချက်တစ်ခုက သူ၏ခြေဖ၀ါးမှသည် နှလုံးသားထိတိုင်တရွေ့ရွေ့တက်လာခဲ့လေသည်။

ရှီကျားမှာ သူ့အိမ်တံခါးတွင် ရုတ်တရက်ပေါ်လာသည့် ဤလျှို့၀ှက်ဆန်းကြယ်သော အမျိုးသားကိုကြည့်လျက် မျက်ခုံးများကျုံ့ကာ အထက်အောက်အစုန်အဆန်အကဲခတ်လိုက်မိသည်။ ထို့နောက်ထိုလူမှာ အဘယ်ကြောင့်ရယ်မသိ ရုတ်ချည်းမျက်လုံးကိုပိတ်လိုက်လေသည်။ ထို့နောက် နှုတ်ခမ်းပေါ်လက်ချောင်းကိုဖိလျက် ဂါထာတချို့ကိုတိတ်တဆိတ်ရေရွတ်လိုက်လေသည်။ ထို့နောက်သူ၏ထိုလက်ချောင်းကိုသုံးလျက် သူ၏မျက်ခွံများအပေါ်တို့လိုက်လေသည်။

အားလုံးကိုလုပ်ပြီးမှသာ သူကမျက်လုံးကိုဖွင့်လျက် ရှီကျားကိုကြည့်လာခဲ့လေသည်။

ရှီကျား"..."

အနက်၀တ်အမျိုးသား"..."

ခတ္တမျှအကြာ ခပ်နိမ့်နိမ့်နှင့် နား၀င်ချိုသော အသံတစ်ခုကိုကြားလိုက်ရလေသည်။

"၀ူရှန်းရှင်းလီ"

၀ှစ်...

လေထုကိုထိုးဖောက်သံတစ်ခုက ရှီကျားနားရွက်ဘေးမှ ဖြတ်သန်းသွားလျက် သူ၏ဆံစလေးများကိုပင် အနည်းငယ်လှုပ်ရှားသွားစေခဲ့သည်။ ရှီကျားသတိထားမိချိန်တွင် ယခုလေးတင် ထိုသရဲမ၏၀ိညာဥ်ကိုပြန့်ကျဲသွားသည်အထိ ထိုးဖောက်ခဲ့သော အနက်ရောင်အရိပ်မှာ တကယ်တမ်းတွင် ထူးဆန်းသော ပုံစံရှိသည့် မျက်နှာပြင်ခြောက်ခုထက်ပိုစော ကြေးထုလုံးလေးတစ်ခုဖြစ်နေသည်ကိုတွေ့လိုက်ရ၏။

လူ၂ကြားတွင် တိတ်ဆိတ်မှုကြီးကတဖန်လွှမ်းခြုံသွားပြန်သည်။ သို့သော် သိပ်မကြာလိုက်ခင်မှာပင် နောက်ထပ်အနက်ရောင်အရှိန်အ၀ါများက ဓါတ်လှေကားနှင့် လှေကားတို့မှ တက်လာခဲ့ပြန်သည်။ ထိုအမျိုးသား၏မျက်ခုံးတို့က စုကျုံ့သွားခဲ့ပြန်သည်။ လက်ညှိုး၂ချောင်းကိုပူးလျက် သူသည်ရှီကျား၏အခန်းတံခါးပေါ်တွင် ရွှေရောင် အက္ခရာတစ်ခုကိုရေးဆွဲခဲ့လေသည်။

"ယင်စွမ်းအင်ကအရမ်းသန်မာလွန်းနေတယ်..လောလောဆယ်ယာယီပဲပိတ်ထားလို့ရမယ်..အရင်ဆုံးအထဲ၀င်ပြီးမှ ဆွေးနွေးကြတာပေါ့"

ရှီကျားမှာ ၂၃နှစ်ကျော်နေလာခဲ့သည်။ သူ့ဘ၀တွင် သရဲဖမ်းသည့်ကောင်းကင်ဘုံဆရာသခင်တစ်ဦးကိုမြင်ဖူးသည်မှာ ဤသည်က ဒုတိယအကြိမ်ဖြစ်လေသည်။ ဤကမ္ဘာတွင် သရဲပေါင်းများစွာရှိပြီး တစ်နေ့တွင် တစ်ကောင် နှစ်ကောင်ခန့်အမြဲတိုးနိုင်သည်။ သို့သော်သရဲဖမ်းသည့် ကောင်းကင်ဘုံဆရာသခင်များကတော့ သနားစရာကောင်းလောက်အောင် နည်းပါးလှသည်။ သူစကားအပိုမပြောခဲ့ချေ။ ကိုယ်ကိုအသာစောင်းလျက် ထိုသူစိမ်းအမျိုးသားကို သူ့အိမ်ထဲသို့လမ်းဖွင့်ပေးလိုက်လေသည်။

အိမ်ရှေ့တံခါးပေါ်မှ ထိုအမျိုးသားဆွဲခဲ့သော ရွှေရောင်အက္ခရာမှာရွှေရောင်တဖိတ်ဖိတ်တောက်ပနေခဲ့သည်။ မည်သည့်ပြောင်းလဲမှုမှရှိသလိုမထင်ရသော်လည်း အပြင်မှထိုအနက်ရောင်စွမ်းအင်များမှာ တလှမ်းလေးမှဆက်တိုးမလာနိုင်ကြချေ။

အနက်ရောင်ကြောင်ကလေးမှာ ရှီကျား၏အိတ်ကပ်ထဲခေါင်းထောင်လာပြီး ဟိုဟိုသည်သည်ကိုမ၀ံ့မရဲကြည့်လိုက်၏။ အနက်ရောင်သရဲမမရှိတော့သည်ကိုတွေ့မှသာ ရှီကျား၏လက်မောင်းကိုတဖန်ချိတ်တွယ်လာခဲ့လေသည်။ ထိုကောင်လေးမှာ နှစ်သိမ့်မှုကိုတောင်းခံနေသည့်အလား အမြှီးလေးကိုလှုပ်ခါနေခဲ့လေသည်။

အနက်၀တ်အမျိုးသား၏ မျက်နှာမှာ အမူအရာမဲ့စွာ ဆိုလာခဲ့သည်။

"ကြောင်နက်တွေက ၀ိညာဥ်တွေနဲ့ဆက်သွယ်နိုင်တယ် မကောင်းတဲ့စွမ်းအင်တွေကိုလည်း နှင်ထုတ်နိုင်တယ်..ဒီကြောင်နက်ကဘာလို့ဒီလောက်တောင်သတ္တိနည်းရတာလဲ"

ကြောင်ကလေးကိုပွတ်သက်ရင်း ရှီကျားကဆိုလာသည်။

"အဲဒါကြောင့် သူ့ကို စုန့်စုန့်လို့ခေါ်တာပေါ့"

(TN-စုန့်က တရုတ်လိုဆိုကြောက်ရွံ့တယ်ဆိုတဲ့အဓိပ္ပါယ်မျိုးရှိတယ်ထင်ပါတယ်)

စုန့်စုန့်မှာ သူ့နာမည်ကိုကြားလျှင် လျှာကလေးကိုထုတ်လျက် ရှီကျား၏ပါးပြင်ကို လျက်လိုက်လေသည်။ တကယ်တမ်းတွင် ၄င်းမှာ ရှက်ရွံ့မနေသည့်အပြင် ဂုဏ်တောင်ယူနေသည့်ပုံပင်။

ဤအမျိုးသားကိုမြင်သည်နှင့် တဖက်လူမှာ အစစ်အမှန်ကောင်းကင်ဘုံဆရာသခင်ဖြစ်မှန်းရှီကျားသိလိုက်လေသည်။ အတုများမှာ သူ၏ရှေ့တွင် ပေါ်လာရန်မဖြစ်နိုင်ချေ။ အကယ်၍ ဆရာသခင်မကျတကျများဆိုပါက သူသည်ခွေးသွေးတစ်ပုံးလောင်းချခံရလောက်နှင့်ပေပြီ။ ၂ယောက်သား တိုက်ခန်းထဲအတူ၀င်လျက် စိတ်အေးလက်အေးဆွေးနွေးနေရန်မဖြစ်နိုင်ချေ။

ထို့နောက် ရှီကျား သူ၏အခြေအနေကို လိုရင်းတိုရှင်းအဆန်ဆုံး ရှင်းပြလိုက်သည်။

ဘ၀တစ်ခုတွင် မွေးနှစ် မွေးရက် မွေးလ မွေးနာရီတို့အလိုက် ကံကြမ္မာကျောက်တိုင်ကြီး၄လုံးရှိရသည်။ မွေးနှစ်ကျောက်တိုင်မှာ နှစ်ပင်စည်နှင့် အကိုင်းအခက်တစ်ခုပါရှိသည်။ မွေးလကျောက်တိုင်တွင်လည်း လပင်စည်နှင့် အကိုင်းအခက်တစ်ခုပါရှိသည်။ မွေးရက်နှင့် မွေးချိန်လည်းထိုနည်းလည်းကောင်းပင်။ ထိုမွေးနှစ် မွေးလ မွေးရက် မွေးချိန်တို့ကိုလိုက်ကာ လူတစ်ယောက်၏ ကံကြမ္မာကိုဆုံးဖြတ်ပေးလေသည်။

ရှီကျား၏မွေးနေ့မှာ တိုက်တိုက်ဆိုင်ဆိုင်ပင်..တကယ်တမ်းတွင် ရိုးရိုးတမ်းတမ်းတိုက်ဆိုင်မှုသာမဟုတ်ချေ။ သူသည်ယင်နှစ် ယင်လ ယင်ရက် ယင်ချိန်တွင်မွေးဖွားခဲ့ခြင်းဖြစ်သည်။ အမြင့်ဆုံးအရည်အသွေးရှိ ယင်ရွှယ်ဖွဲ့စည်းပုံနှင့် သူ့ကိုမွေးဖွားခဲ့လေသည်။ သူ့၏မိခင်ဖြစ်သူ သူ့ကိုကိုယ်၀န်စဆောင်စဥ်ကလည်း ယင်နှစ် ယင်လ ယင်ရက် ယင်အချိန်တွင်ဖြစ်ခဲ့လေသည်။ ထို့အပြင်သူ့အမေမှာလည်း သူ့ကိုမွေးဖွားစဥ် မီးဖွားရခက်ခဲသော ပြဿနာကိုလည်းကြုံတွေ့ခဲ့ရသေးသည်။

ရှီကျားမှာ ပါးစပ်တွင် သွေးမည်းများ ပေကျံလျက်မွေးဖွားခဲ့ခြင်းဖြစ်သည်။ သို့နှင့် သူသည် ကမ္ဘာပေါ်တွင် အင်မတန်တွေ့ရခဲသော အထူးယင်ခန္ဓာကိုယ်နှင့်မွေးဖွားလာခဲ့ခြင်းဖြစ်လေတော့သည်။

👻

Prev Next