MM Story Teller

👻Chapter 11

Viewers 3k

👻Chapter 11

ထိုနည်းမှလွဲ၍ pointများရရှိနိုင်သော အခြားနည်းလမ်းမှာ 'Ghosts know' အကောင့်ထံသို့ သတင်းများ ပို့ပေးခြင်းဖြစ်ကာ ထျန်းကုန်းကျိုက်က ၄င်းတို့ကို ပြန်ရောင်းလေသည်။

ထျန်းကုန်းကျိုုက်မှာ ရွှမ်းရွှယ်လောက၏ ရတနာထုတ်လုပ်သန့်စင်ခြင်းတွင် နာမည်ကြီး ဂိုဏ်းဖြစ်လေသည်။ ဂိုဏ်း၏တည်ထောင်သူအကြီးအကဲမှာ လက်မှုနတ်ဘုရား လုပန်ဖြစ်သည်။ သူတို့၏နာမည်အကြီးဆုံး ရတနာ modou အဆင့်ဇယားမှာ လုပန်၏ modouကိုသုံးလျက် ပြန်လည်ပြင်ဆင်ထားခြင်းဖြစ်လေသည်။ ၄င်းအပြင်ကို သူတို့၏ ၁၄၂ဆက်မြောက် ထျန်းကုန်း ခိုက်၀ူ အကြီးအကဲမှ ရတနာသန့်စင်နည်းအသစ်ကို တီထွင်နိုင်ခဲ့ပြီး ထိုအချိန်မှစ၍ ဂိုဏ်းအား ထျန်းကုန်းကျိုက်ဟု ခေါ်ဝေါ်ခဲ့ကြလေသည်။

နှစ်စဥ်နှစ်တိုင်းတွင် ထျန်းကုန်းကျိုက်မှာ 'Ghosts Know'အား ငွေအလုံးအရင်းနှင့်ထောက်ပံ့လေ့ရှိကာ သူသည်ကား အဓိကရှယ်ယာရှင်ဟုပင်ယူဆနိုင်လေသည်။ ထို့ကြောင့်ပင် 'Ghosts know'တရား၀င်အကောင့်၏ စာမျက်နှာအောက်တွင် ထျန်းကုန်းကျိုက်၏ အွန်လိုင်းရှော့ linkက တွဲလျက်ရှိနေခြင်းဖြစ်လေသည်။

ရွှမ်းရွှယ်လောကမှ လူအများမှာ ငွေကြေးပြတ်လပ်မနေကြချေ။ သူတို့သည်သေမျိုးလောက၏ ပိုက်ဆံကို သိပ်လိုအပ်မနေခဲ့ကြဟုဆိုနိုင်သည်။ သူတို့အသုံးများသည်က သရဲဖမ်းရမှတ် (point)များဖြစ်သည်။ ဥပမာ ဖေးယွီမှာ သူ၏ကိုယ်ပိုင်သွေးစက်ကို ထျန်းကုန်းကျိုက်၏ အွန်လိုင်းစျေးစင်ပေါ်တွင် ရောင်းချရန်တင်ထားခဲ့လေသည်။ ရောင်းချရငွေကို သူသည် ထျန်းကုန်းကျိုက်နှင့် ၅၀ ၅၀စီ ခွဲယူရသည်။

"ငါကြားတာတော့ နန်ရိက ထျန်းကုန်းကျိုက်နဲ့ ၆၀ ၄၀စီခွဲတာတဲ့..ငရဲဘုရင်ယဲ့ဆို ၈၀ ၂၀ခွဲတာ..လုံး၀မျှတမနေဘူး..ငရဲဘုရင်ယဲ့က တကယ်ဆို pointတွေပြတ်လပ်မနေတာကို သူကျဘာလို့ pointတွေ pointတွေချည်း ရပြီးရင်းရနေတာလဲ..ငါကျမွဲပြီးရင်းမွဲနေတယ်...ဒီလိုလူ့အဆင့်အတန်းကွဲပြားမှုက ဆိုရှယ်လစ်စံတန်ဖိုးကိုချိုးဖျက်နေတာပဲ.."

ရှီကျား"...."

မင်းတို့လောကက လူတွေရှိနေတာကိုက ဆိုရှယ်လစ် စံတန်ဖိုးတွေအမှုန့်ချေပစ်ဖို့လုံလောက်တာထက်တောင်ပိုနေပြီ ဟုတ်ပြီလား...

သူ့အားဂရုစိုက်ရန်ပင် ပျင်းလွန်းစွာ ရှီကျားမှာ ခေါင်းကိုငုံ့လျက် 'Ghosts know' official အကောင့်ကို ဆွဲချကာ ဟိုဟိုသည်သည် ဖတ်ကြည့်နေခဲ့လေသည်။

အဆောက်အဦးမှ ယင်စွမ်းအင်ကို ဖိနှိပ်ပြီးသည်နှင့် ရှီကျားနှင့်ဖေးယွီမှာ အနီးအနားရှိ ပန်းခြံလေးတွင် ထိုင်ကာ ထိုအဆောက်အဦးမှ လှုပ်ရှားမှုတစုံတရာရှိမရှိ စောင့်ကြည့်နေခဲ့ကြလေသည်။ မိသားစု၂ခုထဲတွင် အဘိုးတစ်ဦးဆုံးသွားသည်ဆိုသော မိသားစုမှာ အိမ်မှာမရှိကြပုံပေါ်ကာ အသုဘအတွက် မွေးရပ်မြေကိုပြန်သွားကြခြင်းလည်းဖြစ်နိုင်လေသည်။ အမေနှင့်သား ၂ဦးမိသားစုကမူ အပြင်ထွက်သည်က အလွန်ရှားလေသည်။

ညနေခင်းတွင် အမျိုးသမီးမှာ ကောင်ငယ်လေးနှင့်အတူ အောက်ထပ်သို့ အမှိုက်ပစ်ရန် ဆင်းလာခဲ့လေသည်။

သူတို့၏ကိုယ်ပေါ်မှ အလွန့်အလွန်ထူထဲသော ယင်စွမ်းအင်ထုကြီးမှလွဲလျှင် ထိုသားအမိမှာ သာမာန်အမေနှင့်သားနှင့်သာတူလေသည်။

နောက်တစ်နေ့တွင် ဖေးယွီမှာ ထျန်းကုန်းကျိုက်ထံမှ အမြန်ချောနှင့်ပို့လိုက်သော သွေးစက်များကို လက်ခံရရှိခဲ့ကာ ယဲ့ကျင်းကျီ၏သွေးစက်များကို အလျင်အမြန် အသုံးပြုလိုက်လေသည်။

ဤတစ်ကြိမ်တွင်တော့ ရှီကျားမှာ ထူးခြားမှုကို ကျိန်းသေပေါက်တွေ့ခဲ့ရလေသည်။ ယဲ့ကျင်းကျီ၏ သွေးစက်၄စက်က ဖေးယွီ၏လက်ထဲသို့စုစည်းမလာခဲ့ချေ။ ထိုသွေးစီးကြောင်း ၄ကြောင်းမှာ လျင်မြန်စွာ အပေါ်သို့ထိုးတက်သွားခဲ့ပြီး ၇ထပ်အဆောက်အဦးပေါ်မှ မိသားစု၂စု၏ တိုက်ခန်းများကို ခိုင်မာစွာဖိနှိပ်ထားခဲ့လေသည်။

အဆောက်အဦးတစ်ခုလုံးတွင် ပျံ့နှံ့နေသော ယင်စွမ်းအင်များမှာ ၇ထပ်မြောက်သို့ချက်ချင်းပြန်လည်ဖိနှိပ်ခံလိုက်ရသည်။ ယင်စွမ်းအင်မှာ အော်မြည်လျက် လွတ်မြောက်ရန်ရုန်းကန်ချင်ခဲ့လေသည်။ သို့သော် သွေးချည်မျှင်များကိုထိမိသည်နှင့် ထိုစွမ်းအင်မှာ မခံနိုင်သည့်အလား ပြန်ဆုတ်ပြေးရုံသာတတ်နိုင်လေသည်။

ခွန်အားကွာခြားချက်မှာ ထိုမျှသိသာလေသည်။

သို့တိုင်အောင် ဖေးယွီ၏ အမူအယာမှာ ပို၍ လေးနက်လာခဲ့လေသည်။

"ငရဲဘုရင်ယဲ့ရဲ့သွေးစက်ကတောင် မကောင်းဆိုး၀ါး၀ိညာဥ်ကိုချက်ချင်းမဖမ်းနိုင်ဘူး..ရှီကျား ငါတော့ဒီကောင့်ရဲ့ ခွန်အားကို လျှော့တွက်မိပြီထင်တယ်...ငါမြို့တော်ကိုသွားပြီး ဆရာဦးလေးဆီကအရေးတကြီးလိုအပ်တာတစ်ခုခုသွားယူလိုက်ပြီးရင် ချက်ချင်းပြန်လာခဲ့မယ်..ဒီသရဲကသာမာန်မဟုတ်ဘူးမင်း သတိထားသင့်တယ်...နောက်ဆုံးမရတော့ရင်ကွာ မင်း၀ူရှန်းရှင်းလီနဲ့သာ ကောက်ပေါက်ပစ်လိုက်..ဒီကောင်က ၀ူရှန်းရှင်းလီကိုတောင် မဖြုံဘူးလို့တော့ ငါမယုံဘူးကွာ"

ပြောပြီးသည်နှင့် ဖေးယွီက အလျင်အမြန်ထွက်ခွာသွားတော့သည်။

အင်္ကျီထဲမှ ကြေးအံစာတုံးလေးမှာ ရှီကျားကို သတိပေးလိုသည့်အလား လှုပ်ခါလာခဲ့လေသည်။

'မင်းမှာ ဒုက္ခတွေ့နေရင် ငါ့ကိုသာပစ်ထုတ်လိုက်..ငါကာကွယ်ပေးမယ်'

ရှီကျားမပြုံးပဲမနေနိုင်ခဲ့ချေ။ သူကခေါင်းကိုငုံ့လျက် ထိုကြေး အံစာတုံးလေးကို ငုံ့ကြည့်လိုက်လေသည်။

"ဖေးယွီက ငါ့ကို မင်းကိုကျောက်တုံးတစ်တုံးလို ပစ်ပေါက်ဖို့မှာခဲ့တာ..မင်းကအဲဒါလည်းပျော်နေသေးတာပဲလား"

၀ူရှန်းရှင်းလီမှာ ရုတ်ချည်းရပ်တန့်သွားခဲ့လေသည်။ ခတ္တမျှအကြာ ၄င်းက ပြင်းပြင်းထန်ထန်ပြန်လည်လှုပ်ခါလာခဲ့သည်။

ဖေးယွီမှာ ထိုနေရာမှာ လျှောက်၍ထွက်လာစဥ် ရုတ်ချည်းကြက်သီးများထသွားခဲ့သည်။

"ငါကလည်း အအေးမိနိုင်သေးတာလား.."

အခြေအနေမှာ ဖေးယွီပင်ဘာမျှမတတ်နိုင်လောက်အောင် ဆိုးနေလေရာ ရှီကျား ခတ္တမျှတွေးတောနေပြီး အဆုံးတွင် အိမ်ကို မပြန်ဖြစ်ခဲ့ချေ။ သူသည် ကြောင်စာတစ်ထုပ်နှင့် သူမိသားစုဝင် စုန့်စုန့်ကိုပါသယ်လျက် ထိုအဆောက်အဦးအနီးတွင်ထိုင်ကာ တိတ်တဆိတ်စောင့်ကြည့်နေခဲ့လေသည်။

ညအမှောင်ထဲတွင် ချောမောလှပသော လူရွယ်လေးမှာ သူ၏လက်ထဲမှ အနက်ရောင်ကြောင်ကလေးကို ပွတ်သပ်ရင်း အစာကျွေးနေခဲ့လေသည်။ ညလယ်မျှရောက်ရှိသွားပြီးသည့်တိုင် သူကဤနေရာမှာ ထိုင်နေဆဲဖြစ်သည်။ ၄င်းမှာ သူကတစ်ယောက်ယောက် သို့တည်းမဟုတ် တစ်ခုခုကိုကာကွယ်စောင့်ရှောက်နေသည့်အလား။

သို့သော် ရှီကျားမှာ ထိုမကောင်းဆိုး၀ါး၀ိညာဥ်ထွက်လာပြီး သောင်းကျန်းသည်အထိမစောင့်လိုက်ရချေ။

မနက်၃နာရီခန့်တွင် ဖိုသီဖတ်သီပုံစံနှင့် ခပ်ပိန်ပိန်လူလတ်ပိုင်းအမျိုးသမီးတစ်ဦးမှာ တာအိုဆရာကြီးတစ်ဦးကို ဦးဆောင်လျက်ပင် အဆောက်အဦးထဲလျင်မြန်စွာ ၀င်သွားခဲ့လေသည်။ ထို၂ယောက်မှာရှီကျားကို မြင်သော် အံ့သြသွားပုံပင်။ သူတို့၏အမူအရာများမှာ ဤလူရွယ်လေးက ညလယ်ခေါင်းကြီးတွင် ဤနေရာတွင် အဘယ်ကြောင့်ထိုင်ပြီး ကြောင်နှင့်ဆော့နေသည်ကို နားမလည်ပုံရလေသည်။

ရှီကျားကို အကြိမ်အနည်းငယ်ကြည့်၍ အန္တရာယ်ရှိသူမဟုတ်မှန်း အတည်ပြုပြီးသည့်နောက် ထိုအမျိုးသမီးမှာ တာအိုဆရာကြီးဖက်လှည့်ကာဆိုလိုက်လေသည်။

"ဆရာကြီးရယ်..ကျွန်မအကူအညီတောင်းပါတယ် အဲဒီသရဲကို အမြန်ခေါ်သွားပေးပါရှင်..ကျွန်မတကယ်ဘယ်လိုမှနေလို့မရတော့လို့ပါ...အမြန်ဆုံးသာ ရှင်းထုတ်ပေးပါတော့ရှင်...အဲဒီအဘိုးကြီးကသေသွားတာကို ကောင်းကောင်းမွန်မွန်ထွက်မသွားဘူး..သူ့၀ိညာဥ်ပြိုကွဲသွားရင်အကောင်းဆုံးပဲ"

မှောင်မိုက်တိတ်ဆိတ်သော ညအလယ်တွင် ပန်းခြံထဲထိုင်ကာ ကြောင်နှင့်ဆော့နေသော လူငယ်လေးမှာ အတော်ထူးဆန်းနေပြီးဖြစ်သည်။ ယခုထပ်မံ၍ ပုံမှန်မဟုတ်သော အမူအရာများနှင့် မိန်းမတစ်ဦးနှင့် တာအိုဆရာတစ်ဦးကရောက်ရှိလာပြန်သည်။ ဤညမှာ တိတ်ဆိတ်ငြိမ်သက်သော ဖြစ်နိုင်တော့မည်ပုံမပေါ်ချေ။

သို့သော် ထိုမိန်းမနှင့် တာအိုဆရာမှာ သရဲဖမ်းရန် အပေါ်ထပ်သို့ တက်မသွားခဲ့ကြချေ။ မိနစ်အနည်းငယ်မျှအကြာတွင် လူလတ်ပိုင်းကြီးတစ်ဦးမှာ ရုတ်ချည်းရောက်ရှိလာပြီး ထိုအမျိုးသမီးကြီး၏ မျက်နှာကို ဖြန်းခနဲရိုက်ချလိုက်လေသည်။ အမျိုးသမီးကြီးမှာ သူမ၏ပါးကိုအုပ်ကိုင်လျက် ထိုလူကြီးကို ဒေါသတကြီးပြန်ကြည့်လိုက်လေသည်။ ထို့နောက် သူမကလက်သည်းတို့ဖြင့် ထိုလူကြီး၏မျက်နှာကို မုန်းတီးစွာကုတ်ခြစ်လိုက်ပြီး သွေးစို့နေသော ကုတ်ရာများကို ချန်ထားခဲ့လေသည်။

သိပ်မကြာခင်မှာပင် ထိုလူကြီးနှင့်အမျိုးသမီးတို့မှာ စတင်လုံးထွေးသတ်ပုတ်ကြတော့သည်။ ရှီကျားမှာ မလှမ်းမကမ်းတွင်ထိုင်လျက် ဖြစ်ပျက်သည်တို့ကို ကြည့်ရှုနေခဲ့လေသည်။

မိနစ်အနည်းငယ်မျှသတ်ပုတ်နေခဲ့ကြပြီးနောက် သူတို့၏ ရန်ပွဲမှ ဆူညံသံကြောင့် အိမ်နီးချင်း မိသားစုများမှာလည်း မီးများကိုဖွင့်လျက် ထိုရန်ပွဲကို ထွက်ကြည့်လာကြလေသည်။ မနက်၃နာရီကြီးတွင် ထိုစုံတွဲမှာ သွေးထွက်သံယိုဖြစ်သည်အထိ တစ်ဦးကိုတစ်ဦး ရိုက်နှက်နေခဲ့ကြသည်။ အဆုံးတွင် ယောကျာ်းကြီး၏ ရိုက်ချက်ကြောင့် အမျိုးသမီးမှာ လဲကျသွားခဲ့လေသည်။ ထိုလူလတ်ပိုင်းအမျိုးသမီးကြီး၏ ဆံပင်များမှာ ဖွာလန်ကျဲနေပြီး မျက်နှာတွင်လည်း ညိုမဲစွဲနေသော ဒဏ်ရာများရှိလေသည်။ သူမကငိုကြွေးရင်း ကျိန်ဆဲနေခဲ့သည်။

"ငါဆိုတဲ့ကောင်မကြီးက ကံဆိုးချက်ပါအေ..ဒီလိုတိရိစ္ဆာန်ကောင်နဲ့မှ ယူမိရတယ်လို့..ရှင်ကိုယ်တိုင်ပဲပြောခဲ့တာ.. ရှင့်အဖေက၈၆နှစ်ရှိပြီဆို...ကင်ဆာဖြစ်တာလည်း ၁၂နှစ်ရှိပြီ အခုထိမသေနိုင်သေးဘူး..သူကဘယ်လိုလုပ်အသက်ရှင်နေဦးမှာလဲ..ဘယ်လိုလုပ်လူဖြစ်နိုင်မှာလဲ..ရှင်ပြောလေ"

လူကြီးမှာ သွေးနှင့်ရောနေသော တံတွေးတစ်ကွက်ကို မြေကြီးပေါ်ထွေးချလိုက်သည်။

"ငါ့အဖေကသေပြီးပြီကို..မင်းကဘာလို့ ဒီသောက်ရေးမပါတာတွေကိုထပ်ပြောနေသေးတာလဲ"

အမျိုးသမီးကြီးမှာ မြေကြီးပေါ်မှထမလာပဲ ထိုအတိုင်း ခြေပစ်လက်ပစ်ထိုင်နေခဲ့လေသည်။ ထို့နောက် လည်ချောင်းကွဲထွက်လူမတက် အော်ဟစ်လာခဲ့သည်။

"ရှင် လူတွေကြားအောင်အော်ပြီးပြောလိုက်ပါလား..ကျွန်မနဲ့ သာ့ပေါင်နဲ့ ရှောင်ပေါင်လေး..၁၀နှစ်တောင်မပြည့်သေးဘူး..သေပြီလို့...မနှစ်ကလည်း ကျွန်မရဲ့ဗိုက်ထဲက ၆လကလေးလေး..ဒီတိုင်း ထွက်ကျသွားတယ်..ရှင်ကတော့ရှင့်သားတွေအတွက် ၀မ်းတောင်မနည်းပေမယ့် ကျွန်မကတော့အသည်းနာတယ်..သူတို့အားလုံးက ကျွန်မသွေးသားတွေ...ရှင့်အဖေကဘာလို့ဒီလောက်တောင်အသက်ရှည်နေတာလဲ ရှင်ကောင်းကောင်းသိမှာပါ...အဲဒီမသေနိုင်တဲ့ဟာကြီးက သူ့မြေးတွေရဲ့ အသက်ကိုစားပြီး နေနေတာလို့..အား.."

အဆုံးတွင်သူမက နာနာကျည်းကျည်းအော်ငိုနေခဲ့သည်။

လူကြီးမှာ ချက်ချင်းပြေးလာပြီး ထိုအမျိုးသမီး၏ ဆံပင်ကိုဆောင့်ဆွဲကာ မြေကြီးပေါ်တွန်းချလိုက်ပြန်သည်။

"အဖေကသေသွားပြီးပြီ..အပျက်မ..မင်းထပ်ပြောရဲပြောကြည့်"

"တိရိစ္ဆာန်ကောင်..."

ထိုမြင်ကွင်းကိုကြည့်နေရင်း ရှီကျားမှာ မျက်မှောင်ကျုံ့လျက်ထရပ်လိုက်မိလေသည်။ သို့သော်သူ၀င်မတားနိုင်ခင်မှာပင် ဘေးတွင်ရပ်နေသော တာအိုဆရာကြီးမှာ ရုတ်တရက် cinnabar အ၀ါရောင်စက္ကူအဆောင်တစ်ခုကို ထိုလူကြီးရှေ့သို့ပစ်လိုက်လေသည်။ ထိုစက္ကူအဆောင်မှာ လေထဲတွင် ၀ုန်းခနဲမီးထတောက်သွားကာ ထိုလူကြီးကို အလန့်တကြားနောက်သို့ဆုတ်သွားစေပြီး ရှီကျား၏ ခြေလှမ်းများကိုလည်း ရပ်တန့်သွားစေခဲ့လေသည်။

သူကတကယ်သရဲဖမ်းတဲ့ ဆရာသခင်လား...

တာအိုဆရာကြီးမှာ သူ၏မြင်းမြှီးယပ်ကိုယမ်းလျက် ထိုလူကြီးကိုမျက်နှာချင်းဆိုင်၍ လေးနက်စွာဆိုလိုက်သည်။

"မဒမ်ကျောက်ပြောနေတာတွေက တစ်ခုမှမမှားဘူး..လူကြီးမင်းလီ ဒီအဆောက်အဦးရဲ့ ယင်စွမ်းအင်က အရမ်းသန်မာနေတယ်..မင်းအဖေရဲ့၀ိညာဥ်ကဒီမှာ ခြောက်လှန့်နေတာဖြစ်မယ်..အသက်ရှည်အောင် သန္ဓေသားရဲ့အသက်ကိုခိုးတာ..တကယ်ဆိုးရွားတဲ့အဆင့်ရောက်နေပြီပဲ...ဒီဆရာအိုကြီး မကောင်းဆိုးရွားကို ဖယ်ရှားပြီးတဲ့အထိသာစောင့်ပါ..ညတိုင်းအိပ်မက်ဆိုးမက်စရာမလိုတော့သလို..ကလေးလည်းထပ်ပြီးရလာလိမ့်မယ်"

ရှီကျားမှာ ထိုတာအိုဆရာကြီးအား လေးလံသော အမူအယာဖြင့်ကြည့်နေခဲ့လေသည်။

သန္ဓေသားကိုစားပြီး အသက်ရှည်အောင်လုပ်တာ..

ရှီကျား ထိုသို့ဇာတ်လမ်းမျိုးကို မကြားဖူးသည်တော့မဟုတ်ချေ။

သူ၏ထူးခြားသော ခန္ဓာကိုယ်ကြောင့် သူ၏ဖခင်မှာ သူ့အား ဆရာသခင်များစွာနှင့်တွေ့ပေးရန် ခေါ်သွားပေးဖူးလေသည်။ ထို့အပြင် သူက သန္ဓေသားကိုစားပြီး အသက်ရှည်အောင်ဆွဲဆန့်ခြင်းအစသဖြင့် ထူးဆန်းသော အရာများစွာကိုလည်း ကြားဖူးခဲ့လေသည်။

ရှေးယခင်ကပင် ဆိုရိုးစကားရှိဖူးသည်မှာ အကယ်၍ သက်ကြီးရွယ်အိုတစ်ဦးက အကြာကြီးအသက်ရှည်နေခဲ့လျှင် သားစဥ်မြေးဆက်တို့၏ အသက်ကိုခိုးယူထား၍ဟုပင်။ သူတို့အသက်တစ်နှစ်ပိုရှည်လေ...သားစဥ်မြေးဆက်တို့၏ ကောင်းချီးတို့နည်းလေ..အသက်တိုလေဖြစ်သည်။ ထို့ကြောင့် ရှေးတုန်းက တချို့ရွာများတွင် မိသားစုတချို့၌ ကလေးမွေးခဲ့လျှင် အိမ်ရှိသက်ကြီးရွယ်အိုအား တောင်ပေါ်ရှိဂူတစ်ဂူထဲ သုံးရက်စာ အစာနှင့်ရေကိုပေးကာ သွားပစ်ထားတတ်ကြလေသည်။

သို့တိုင်အောင် မနေ့က ရှီကျားမှာ ပျင်းလွန်း၍ 'Ghosts know'၏ officialအကောင့်ထဲ မွှေနှောက်ကြည့်နေရာမှ 《သေမျိုးတို့၏ အဆိုးရွားဆုံးနှင့် ဟာသအဆန်ဆုံး အယူသီးမှုကြီး ၈ခု》ဆိုသည့် သတင်းတစ်ပုဒ်ကိုတွေ့ရှိခဲ့ကာ ထိုအထဲတွင် 'သန္ဓေသားကိုစားကာ အသက်ရှည်အောင်ဆွဲဆန့်ခြင်း'ဟူသည့်ခေါင်းစဥ်က နံပါတ်၆နေရာတွင်ရှိနေသည်ကိုတွေ့ခဲ့ရလေသည်။

ထိုသတင်းပို့စ့်၏အောက် ကောမန့်များတွင် ရွှမ်းရွှယ်လောကမှ အားလပ်နေကြသော ဆရာသခင်အုပ်စုမှာ ထိုအယူသီးမှုများမှာ မည်မျှ အဓိပ္ပါယ်မရှိကာ ရယ်စရာကောင်းလှကြောင်း ဆွေးနွေးနေခဲ့ကြလေသည်။ အတိအကျဆိုရပါက ထို'သန္ဓေသားကိုစား၍ အသက်ရှည်အောင်ဆွဲဆန့်သည်' ဟူသော ခေါင်းစဥ်အားမျက်လုံးထောင့်မှပင် စွေကြည့်ရန် စိတ်မပါပုံပေါ်သည်။

【ဒီလူအိုကြီးက ဒီနှစ်မှာ ၉၆နှစ်ရှိပြီ..တကယ်လို့ ငါ့ရဲ့အသုံးမကျတဲ့သားကသာ ဒီလူအိုကြီးကို စွန့်ပစ်ရဲလို့ကတော့ ဒီလူအိုကြီးကလည်း ကောင်းကင်ဘုံမိုးကြိုးကိုဆင့်ခေါ်ပြီးတော့ကို သေအောင်ကင်ပေးလိုက်မယ်】

ထိုကောမန့်များ၏ အောက်တွင် ထိုဆရာသခင်၏ သားဖြစ်သူကလည်း လာမန့်ထားခဲ့လေသည်။

【 အဖေ! ကျွန်တော်က ၆၄နှစ်ရှိပြီနော် ကျွန်တော့်ကိုလည်း မျက်နှာသာပေးပါဦး..ဟုတ်ပြီလား...အဖေ့ကိုအမြဲပြောသားပဲ..ရင်ပြင်မှာ လွတ်လွတ်လပ်လပ် square danceသွားက..အန်တီလှလှလေးတွေနဲ့ရင်းနှီးအောင်နေ..ကိုယ့်ဘ၀ကိုကိုယ် ငြိမ်းငြိမ်းချမ်းချမ်းဖြတ်သန်းပြီး..ဒီ'Ghosts know'မှာပဲ အချိန်လာဖြုန်းမနေပါနဲ့ဆို..ကျွန်တော့်ကိုနားထောင် အိုကေလား..!? 】

၄င်းကို သူ၏ရှေ့က တာအိုဆရာကြီးမှ 'သန္ဓေသားကိုစား၍ အသက်ကိုဆွဲဆန့်ခြင်း' အကြောင်းလာပြောနေခဲ့လေသည်။

ရုတ်ချည်းသူ၏ရှေ့တွင် မီးထတောက်သွားသော အဆောင်လက်ဖွဲ့ကိုတွေ့လိုက်ရ၍လားမဆိုနိုင်။ ထိုလူကြီးမှာ အတော်ကြာ တုန့်ဆိုင်းနေခဲ့လေသည်။ သို့သော်အဆုံးတွင်တော့ သူကထိုအမျိုးသမီးနှင့် တာအိုဆရာနှင့်အတူ အပေါ်ထပ်သို့တက်သွားခဲ့လေသည်။

"မင်းကသရဲကိုဒီလောက်တောင်မှဖမ်းချင်နေလည်း ငါမျက်စိနဲ့ကို တပ်အပ်ကြည့်နေလိုက်ဦးမယ်..မိန်းမယုတ်..ပြီးမှဘာမှမဟုတ်လို့ကတော့ ဒီလောင်ကျစ် မင်းခြေထောက်ကို ရိုက်ချိုးပြီသာမှတ်"

ထိုသို့ဆဲဆိုလျက်သားပင် အပေါ်ထပ်သို့တက်သွားခဲ့ကြလေသည်။

ရှီကျားမှာ အောက်တွင်သာ ရပ်ကျန်ခဲ့ကာ ထိုလူများနှင့်အတူ လိုက်တက်မသွားခဲ့ချေ။ သူတို့ အချင်းချင်းလည်းမသိကြလေရာ သူနောက်ကလိုက်တက်သွားပါက ထိုလင်မယား၂ယောက်က သူ့ကိုမောင်းထုတ်နိုင်လေသည်။ ထို့အပြင် သူနှင့်ဖေးယွီမှာ မနေ့ညက၇ထပ်မြောက်ကို တက်ကြည့်ခဲ့သော်လည်း ဘာမျှမထူးခြားခဲ့ချေ။ ဖေးယွီကိုယ်တိုင်လည်း မကောင်းဆိုး၀ါး၀ိညာဥ်ကို ၇ထပ်မြောက်တွင် မတွေ့ခဲ့ပါချေ။

ထို့အပြင် ယဲ့ကျင်းကျီ၏ သွေးက လောလောဆယ်တွင် ၇ထပ်မြောက်ကို ဖိနှိပ်ထားလေသည်။

👻

Prev Next