MM Story Teller

👻Chapter 17

Viewers 3k

👻Chapter 17

ဧည့်ခန်းထဲတွင် ဖေးယွီသည် ယဲ့ကျင်းကျီ၏ ဒဏ္ဏာရီလာအောင်မြင်မှုပေါင်းများစွာကို အာပေါင်အာရင်းသန်သန်ပြောနေခဲ့လေသည်။

ရှီကျားမှာ လွန်ခဲ့သော၄နှစ်ခန့်က ယဲ့ကျင်းကျီတစ်ယောက် ဖုန်းတုမှ သရဲတစ်သောင်းကျော်ကို ရှင်းပစ်ခဲ့ခြင်းကိုကြားခဲ့ပြီးဖြစ်သည်။ ဤတစ်ကြိမ်တွင်တော့ယဲ့ကျင်းကျီသည် ၀ူရှင်းချင်းလီနှင့် ရာစုနှစ်ကြာသက်တမ်းရှိသော မကောင်းဆိုး၀ါး၀ိညာဥ်ကြီးကိုမည်သို့ဖြိုခွဲပစ်ခဲ့ကြောင်းပါ ပါ၀င်လေသည်။

ဖေးယွီမှာ သူ၏မျက်ခွံတို့လေးလံလာသည်အထိ တတွတ်တွတ်ဆိုနေခဲ့ပြီး ထိုအတိုင်းပင်အိပ်ပျော်သွားတော့သည်။ ရှီကျား ဧည့်သည်အိပ်ခန်းကို ခြေသံဖော့ဖော့ဖြင့်လျှောက်သွားလိုက်မိလေသည်။ ထို့နောက်တံခါးကို ညင်သာစွာခေါက်လိုက်လေသည်။

"ဆရာယဲ့..အိပ်နေပြီလား"

သိပ်မကြာလိုက်ခင်မှာပင် အခန်းတံခါးမှာ ပွင့်လာခဲ့လေသည်။ ယဲ့ကျင်းကျီက အနက်ရောင်ကုတ်အင်္ကျီရှည်ကြီးကို မပြောင်းမလဲအမူအရာဖြင့်၀တ်ဆင်ထားဆဲဖြစ်သည်။ ၄င်းမှာ အဝေးမှပင် နီးကပ်လာလိုသောလူများကို ငြင်းဆန်နေသည့်အလား။ တံခါးအဟကြားမှတဆင့် ကုတင်ပေါ်မှစောင်ခေါက်မှာ အရာမယွင်းသေးသည်ကို ရှီကျားတွေ့လိုက်ရလေသည်။ အိပ်ယာခင်းများမှာလည်း ချောမွေ့ပြီး အတွန့်ရာများရှိမနေသည်မှာ ထိုအပေါ်တွင် မည်သူမျှလှဲမထားသည့်အလားပင်။

ရှီကျား၏ရင်ထဲတွင် ဖေးယွီ၏' ငါတို့က သူ့ကိုဘာလို့ဂရုစိုက်နေမှာတုန်း'ဟူသော စကားကိုထပ်မံကြားယောင်လာမိလေသည်။ ရှီကျား၏နှုတ်ခမ်းထောင့်တို့မြင့်တက်သွားခဲ့လေသည်။ ညင်သာသောအပြုံးတစ်ပွင့်နှင့်အတူ သူကဆိုလိုက်လေသည်။

"ဆရာယဲ့ စောစောအိပ်သင့်တယ် ကောင်းသောညပါ"

အမျိုးသား၏ နက်ရှိုင်းသောမျက်၀န်းတို့ ဖြတ်ခနဲတုန်ရီသွားခဲ့လေသည်။ ယဲ့ကျင်းကျီ၏နှုတ်ခမ်းတို့မှာ ပိတ်လိုက်ဖွင့်လိုက်ဖြစ်နေခဲ့လေသည်။ အတော်ကြာမှ ခပ်နိမ့်နိမ့်လေသံဖြင့်တုန့်ပြန်လာခဲ့လေသည်။

"ကောင်းသောညပါ"

***
လမင်းမှာ ကောင်းကင်၏အလယ်တွင်ချိတ်ဆွဲနေခဲ့လေသည်။ ဇစ်ရှီ(၁၁နာရီမှ ၁နာရီ)မှာ ရောက်ရှိလာခဲ့လေပြီ။ ဤသည်မှာ ကမ္ဘာပေါ်တွင် ယင်စွမ်းအင် အထူထပ်ဆုံးအချိန်ဖြစ်လေသည်။

၄င်းမှာ 'Ghosts know' officialအကောင့်၏ ပို့စ်အသစ်တစ်ခု ပုံမှန်တင်သောအချိန်လည်းဖြစ်သည်။

လက်ရှိသရဲဖမ်းနေကြသော သို့မဟုတ် လေလွင့်၀ိညာဥ်များနှင့် ကစားနေကြသောဆရာသခင်များအားလုံးမှာ သူတို့၏အိတ်ကပ်ကိုယ်စီမှ ဖုန်းများကိုထုတ်ယူလိုက်ကြလေသည်။ ထို့နောက် 'Ghosts know'အကောင့်ကို၀င်ကြည့်လျက် ယနေ့အတွက်အထူးအတင်းအဖျင်းကိုကြည့်ရန်ပြင်လိုက်ကြလေသည်။ ခါတိုင်းကဲ့သို့ ဆိုလျှင် ခေါင်းစဥ်ကြီးတစ်ခုနှင့် အခြားသတင်းလေး၃ခုရှိရမည်ဖြစ်သည်။ သို့သော် ယနေ့သတင်းကိုဖွင့်ကြည့်လိုက်သည့် ကောင်းကင်ဘုံဆရာသခင်အားလုံးမှာ ကြောင်အသွားကြလေသည်။

ကြီးမြတ်သော၀မ်ရှို့ဘုရားကျောင်းတော်မှ ဘုန်းကြီးလေးတစ်ပါးမှာ သူ၁၀နှစ်တာအသုံးပြုလာသော အနီရောင် သစ်သားငါးရုပ်ကလေးကို ခွဲပစ်မိသွားခဲ့သည်။

ကျစ် ဝေ့ ရှင်းခန်းမဆောင်မှ တပည့်ငယ်များမှာအလန့်တကြားပြိုင်တူအော်သံကြောင့် သူတို့၏အကြီးဆုံးစီနီယာအစ်ကိုကြီး နန်ရိ မျက်မှောင်တို့ကျုံ့လိုက်မိလေသည်။

ဟိုင်ချန်းအပြင်ဘက် ဗီလာတစ်ခုရှိ ဆံပင်ဖြူတို့နှင့် လူအိုကြီးတစ်ဦးမှာ တကိုယ်လုံးတုန်လှုပ်သွားခဲ့လေသည်။ ထိုတစ်အိမ်လုံးမှရှိရှီသမျှသရဲ၀ိညာဥ်များလည်းတမဟုတ်ချင်းပြိုကွဲသွားခဲ့လေသည်။ သူ၏အသက်၆၀ကျော် သားဖြစ်သူမှာ အပေါ်ထပ်သို့ ဒေါသတကြီးပြေးတက်လာခဲ့လေသည်။

"အဖေ..ကျွန်တော်ရှိခိုးတောင်းပန်ပါတယ်..'Ghosts know'ကိုသွားမဖတ်ပါနဲ့တော့လို့..ဟုတ်ပြီလား..အဖေ ရင်ပြင်မှာပဲ square danceသွားကနေလို့မရဘူးလား..အဲဒီမှာတခြားသူတွေနဲ့ square danceကတာက ခန္ဓာကိုယ်အတွက်လည်းကောင်းတယ် ကျန်းမာတယ် အဖေရဲ့"

ရှီရှန်း-တောက်ရန်၏မျက်လုံးတို့ပြူးကျယ်နေခဲ့သည်။

"မင်းဒီညသတင်းကိုဖတ်ပြီးပြီလား"

သူ၏အသက်၆၀ကျော်သားဖြစ်သူမှာခေါင်းကိုခါလိုက်လေသည်။

"မဖတ်ရသေးဘူး..ကျွန်တော်ဖုန်းကိုဖွင့်လိုက်တာပဲရှိသေးတယ်..အဖေ့အော်သံကြီးကြောင့် မှန်တွေအကုန်ကွဲကုန်တာလေ...အဲဒါကြောင့် အပေါ်လာတက်ကြည့်တာ"

ချီရှန်းတောက်ရန်မှာ စားပွဲကိုရိုက်ချလိုက်လေသည်။

"မင်းအမြန်ကြည့်လိုက်စမ်း..အရမ်းမိုက်တယ်..ရောင်းရင်း ရီလင်းကျစ်မသေခင်က သူကသူ့တပည့်အတွက် စေ့စပ်ကြောင်းလမ်းပေးခဲ့တာတဲ့ကွ"

သားဖြစ်သူလူအိုကြီးမှာ ရှော့ခ်ရသွားခဲ့သည်။

"စီနီယာရီလင်းကျစ်ကလား...သူ့မှာတပည့်ဆိုလို့ အဲဒီ ငရဲ..အဲ..တာအိုရောင်းရင်းယဲ့တစ်ယောက်ပဲရှိတာမဟုတ်ဘူးလား.."

ချီရှန်းတောက်ရန်ကရယ်လိုက်လေသည်။

"အေးလေ..ဒီနေ့ 'ghosts know'ထိပ်စီး သတင်းက ရီလင်းကျစ်က ယဲ့ကျင်းကျီအတွက် လွန်ခဲ့တဲ့၁၉နှစ်ကတည်းက သတို့သမီးလောင်းရှာပေးထားခဲ့တာကွ"

ရွှမ်းရွှယ်လောက၏မျိုးဆက်သစ်များအတွက် ယဲ့ကျင်းကျီမှာ မျှော်ကြည့်ရုံသာတတ်နိုင်သော ဖိအားကြီးဆိုလျှင် ချီရှန်းတောက်ရန်နှင့် သူ့သားအတွက်မူ 'ရီလင်းကျစ်'ဟူသော အမည်မှာ ကလေးများပင် အသံကြားသည်နှင့် အငိုတိတ်သွားစေလောက်အောင် ကြောက်စရာကောင်းလေသည်။

ချီရှန်းတောက်ရန်၏သားကိုသာဥပမာယူနိုင်သည်။ ထိုနေ့များတွင် သူသည် ချီရှန်းတောက်ရန်ထံမှ 'မင်းကိုယ်မင်း ရီလင်းကျစ်နဲ့ယှဥ်ကြည့်စမ်း'ဟု နားနှင့်မဆန့်နိုင်အောင်ကြားခဲ့ရလေသည်။

"မင်းကိုယ်မင်း ရီလင်းကျစ်နဲ့ယှဥ်ကြည့်စမ်း..သူများတကာက အသက်၁၆နှစ်ကတည်းက မော့သို့ဇယားမှာ အဆင့်၁ချိတ်လာတာ..မင်းကရော...ပုခုံးကလည်းမသယ်နိုင် လက်လည်းမမြှောက်နိုင်..ငါမင်းလို အသုံးမကျတဲ့သားမျိုး ဘယ်လိုများမွေးခဲ့မိတာလဲ"

ထိုနေ့များတွင် ထိပ်ဆုံးအဆင့်၁၀ထဲမှ အရည်အချင်းရှိပြီးတော်သောလူငယ်လေးမှာ မခံမရပ်နိုင်ပဲ မျက်ရည်ပေါက်ပေါက်ကျသည်အထိ အဆူခံခဲ့ရလေသည်။

သူကစီနီယာရီလင်းကျစ်နဲ့ယှဥ်နိုင်မှာတဲ့လား...

စီနီယာရီလင်းကျစ်က ဟိုဘက်အိမ်က ကလေးဖြစ်ဖို့မွေးဖွားလာတာ ဟုတ်ပြီလား.

ရီလင်းကျစ်မှာအလွန်သန်မာသော်လည်း ချီရှန်းတောက်ရန်နှင့် သူနှင့်မျိုးဆက်တူများမှာ အခုချိန်အထိ ရီလင်းကျစ်မည်မျှအထိသန်မာမှန်း မသိခဲ့ကြချေ။ သို့သော်သူ၏ သရဲဖမ်းရန်ကလွဲလျှင် ဘာကိုမျှစိတ်မ၀င်စားပဲ အေးတိအေးစက်နိုင်သော တပည့်ဖြစ်သူနှင့်ယှဥ်လျှင် ရီလင်းကျစ်မှာ ဆက်ဆံရေးကောင်းသူဖြစ်လေသည်။ ထိုစဥ်က ရီလင်းကျစ်မှာ အလွန်တက်ကြွကာ တူညီသော မျိုးဆက်များနှင့်အတူ ပွဲတိုင်းကျော်ဖြစ်ခဲ့သည်။

သူ၏ငယ်ရွယ်စဥ်ကအခိုက်အတန့်များကိုပြန်တွေးမိလျှင် ချီရှန်းတောက်ရန် နှမြောတသနှင့် သက်ပြင်းချလိုက်မိလေသည်။

"နှမြောစရာပဲ..လွန်ခဲ့တဲ့၁၈နှစ်တုန်းက ငါ ရီလင်းကျစ်နဲ့အတူသောက်ဖို့ချိန်းထားခဲ့တာ..ဒါပေမယ့်မတိုင်ခင်မှာပဲ သူကနှစ်တစ်ထောင်ကျော် မိစ္ဆာကိုအသက်နဲ့ရင်းပြီးရှင်းသွားခဲ့တယ်လေ"

ဤတစ်ကြိမ်တွင် 'Ghosts know'၏သတင်းတွင် ရီလင်းကျစ်၏အမည်ပါရှိလာခဲ့သည်။ မျိုးဆက်ဟောင်းမှစီနီယာများလည်း ကိုယ်စီထွက်လာပြီး ထိုပို့စ်အောက်တွင် အတိတ်ကို စားမြို့ပြန်ကြကုန်သည်။ သူတို့ကတိတ်တဆိတ်အတင်းအဖျင်းများဖလှယ်နေခဲ့ကြသည်။

【ငရဲဘုရင်ယဲ့မှာလည်း သတို့သမီးလောင်းရှိတယ်လား...သူ့ဆရာကအနာဂါတ်ကိုတွက်ချက်တဲ့နေရာမှာ သိပ်တော်တာပဲဖြစ်ရမယ်.. မဟုတ်ရင် ငရဲဘုရင်ယဲ့က ခုချိန်ထိရေခဲတုံးလို အေးတိအေးစက်နဲ့ ရည်းစားလည်းမရှိသေးဘူးဆိုတာ သူဘယ်လိုကြိုမြင်ခဲ့မှာလဲ..အဲဒါကြောင့် လွန်ခဲ့တဲ့ ၁၉နှစ် ငရဲဘုရင်ယဲ့က ငရဲဘုရင်ယဲ့ဖြစ်မလာခင်ကတည်းက ကလေးမလေးတစ်ယောက်ကိုလှည့်ဖျားပေးခဲ့တာပဲဖြစ်မယ်? 】

【 စီနီယာရီလင်းကျစ်ကတကယ်အမြင်ရှိတာပဲဗျာ...ကျွန်တော့်ဆရာကကျဘာလို့ ကျွန်တော်ငယ်ငယ်ထဲက အဲလိုစေ့စပ်ကြောင်းလမ်းပေးခဲ့တာမျိုးမရှိခဲ့ရတာလဲ..ကျွန်တော်ဖြင့် အသက်၃၀တောင်ရှိနေပြီ ခုထိမိန်းမမရသေးဘူး..ငရဲဘုရင်ယဲ့ကို ကြည့်စမ်း မနေ့ကထိသူကလူလွတ်..ဟော ဒီနေ့သူ့မှာ အနာဂါတ် သတို့သမီးလောင်းရှိနေပြီ...ဒီတာအိုဆရာသခင်က မနာလိုဖြစ်လို့ သေရပါတော့မယ် 】

【 ငရဲ့ဘုရင်ယဲ့မှာက မိစ္ဆာ၃မျိုးခန္ဓာဖွဲ့စည်းပုံရှိတာမလား...ဒီအတိုင်းဆို သူကသူ့မိန်းမကိုသေအောင်ပဲလုပ်မိတော့မှာပေါ့..တကယ်အကျိုးအကြောင်းကျပြောရရင် သူ့အတွက်မိန်းမဆိုတာမရှိသင့်ဘူး..စီနီယာရီလင်းကျစ်က သောက်ရမ်းမိုက်တာပဲ...စီနီယာရီရဲ့နာမည်ကြားတာနဲ့ ကျွန်တော့်အဖိုးတစ်ယောက်တုန်နေအောင်ကြောက်ခဲ့တာ မအံ့သြတော့ပါဘူး..သူကငရဲဘုရင်ယဲ့နဲ့လိုက်ဖက်တဲ့ ပြင်းထန်တဲ့ယင်စွမ်းအင်ပိုင်ရှင် သတို့သမီးကိုတောင် ရအောင်ရှာပေးနိုင်တယ်လေ .. 】

【 ဟေး..တစ်ခုခုကမဟုတ်သေးဘူးနော်..ဒီသတင်းထဲမှာ ငရဲဘုရင်ယဲ့ဇနီးလောင်းက ဘယ်မှာရှိနေလဲဆိုတာ ပြောမထားဘူးလို့.အား..! 】

****

ထိုအချိန် Sခရိုင် ချန်းအန်မြို့ တောင်ခြေတွင်..

ကတုံးပြောင်နှင့် ဘုန်းကြီးအိုတစ်ပါးမှာ သစ်ပင်အိုကြီးအပေါ်တွင်ရပ်လျက် ရှေ့ဘက်သို့ စိတ်လှုပ်ရှားစွာကြည့်နေခဲ့လေသည်။ သူသည်ကား တောရိုင်းထဲတွင်တစ်ဦးတည်းဖြစ်သည်။ ၂ကီလိုမီတာအကွာတွင် ဧကရာဇ်ချင်၏ မြေနီတပ်တော် တနည်း ကမ္ဘာ့အမွေအနှစ်များထဲမှတစ်ခု။

နေ့လည်ခင်းတွင် လာရောက်လည်ပတ်သည့်ခရီးသွားဧည့်သည်များရှိသော်လည်း ညဘက်တွင်မူ ကျောချမ်းဖွယ်တိတ်ဆိတ်နေခဲ့လေသည်။ အမှောင်ထုမှာဖုံးလွှမ်းလျက် ကမ္ဘာကြီးကိုဖိနှိပ်ထားသည့်နှယ်။

ဘုန်းကြီးအိုကြီးက လက်ညှိုးတစ်ချောင်းကို နှုတ်ခမ်းပေါ်တင်လျက် မန္တာန်တချို့ကိုရွတ်ဖတ်လိုက်လေသည်။ သူ၏ရှေ့တွင် လုံး၀န်းသော ရေမှန်တစ်ချပ်ပေါ်လာခဲ့သည်။ သူကစိုးရိမ်တကြီးဆိုလိုက်လေသည်။

"ဒီဘုန်းကြီးကမင်းတို့ကို အကြမ်းစားအတင်းအဖျင်းကြီးပေးပြီးပြီ..ဒီဘုန်းကြီးကိုကျ ခုထိဘာလို့ pointတွေပို့မပေးသေးတာလဲ...ဇစ်ရှီလည်းကျော်နေပြီ..ဒီဘုန်းကြီးက နှစ်၃၀၀ကျော် မကောင်းဆိုး၀ါးကိုလိုက်နေရတာ ၁လလောက်ရှိပြီကွ..သူကအဲဒီပထမအင်ပါယာရဲ့ သင်္ချိုင်းဂူထဲ၀င်သွားပြီး ပြဿနာရှာလို့ကတော့ဂူပွင့်လာရင် ရွှမ်းရွှယ်လောကကြီးတစ်ခုလုံး ကမောက်ကမဖြစ်သွားမှာနော်... ဒီဘုန်းကြီးကတော့ဖြစ်လာသမျှကိုတာ၀န်ယူမှာမဟုတ်ဘူးနော်.."

ထိုရေမှန်၏တဖက်ခြမ်းတွင်တော့ မျက်မှန်တပ်ထားသော လူရွယ်လေးတစ်ဦးရှိနေခဲ့သည်။ သူ၏နောက်တွင်မူ အလုပ်များနေပုံပေါ်သော ကောင်လေးတချို့နှင့်မိန်းကလေးတစ်ချို့က ခြေလှမ်းကျယ်များနှင့် သွက်သွက်လျှောက်နေကြလေသည်။

ဘုန်းကြီးအိုကြီး၏စကားကိုကြားသော် လူရွယ်ကလူ၏ မျက်မှန်ကို နှာရိုးပေါ်ပင့်တင်လိုက်လေသည်။

"ဆရာတော်ပုရှင်း..ခင်များရဲ့ အတင်းအဖျင်းကိုခုလေးတင်မှတင်လိုက်တာပါ..ကျွန်တော်တို့ကို viewနဲ့ likeအရေအတွက်ကို တွက်ဖို့ အချိန်တော့ပေးရဦးမှာပေါ့..သြော် ဟုတ်သား...ခင်များကိုဆုတွေအများကြီးပို့ပေးနေတဲ့ တာအိုရောင်းရင်းတွေရှိသေးတာပဲ.. အဲဒါတွေအားလုံးကို pointအဖြစ်ပြောင်းပြီး ခင်များအကောင့်ထဲကိုပို့ပေးလိုက်မယ်..ဒါပေမယ့် ခင်များအခုချက်ချင်းလိုချင်တာဆိုရင်တော့ ရထားသလောက်ကိုပေးလိုက်လို့ရတယ် ဒါပေမယ့်နောက်ပိုင်းထပ်ရလာတဲ့ pointတွေကိုတော့ထည့်လည်းမတွက်သလို ခင်များအကောင့်ထဲလွှဲတော့မှာမဟုတ်ဘူးနော်"

၄င်းကိုကြားသော် ဆရာတော်ပုရှင်း၏နှုတ်ခမ်းတို့မဲ့ကျသွားခဲ့သည်။

"ဟုတ်ပြီ ဟုတ်ပြီ..ဒီဘုန်းကြီးထပ်မတောင်းတော့ဘူး ရပြီလား..ခုရထားသလောက်ကိုသာလွှဲပေးတော့..ဒီဘုန်းကြီးက ထျန်းကုန်းပွဲကြည့်စင်ကနေ နှစ်တစ်ရာဖုတ်အလောင်း၀ယ်ဖို့ pointမလောက်ဘူးလို့ မဟုတ်ရင် ဟိုမိစ္ဆာသရဲလွတ်သွားတော့မှာနော်"

ကျေနပ်သွားသော 'Ghosts know'၏အယ်ဒီတာမှာပြုံးလိုက်လေသည်။

"ချက်ချင်းပဲလွှဲပေးလိုက်မယ်"

တစ်မိနစ်မျှကြာပြီးနောက် ဆရာတော်ပုရှင်းသည် သူ၏ မော့သို့ကိုဖွင့်လိုက်ကာ သူ၏အကောင့်ထဲတွင် အပိုpointပေါင်း၁သောင်းကျော်ရောက်ရှိနေသည်ကိုတွေ့လိုက်ရလေသည်။ ထိုကြောက်မက်ဖွယ်pointအရေအတွက်ကိုမြင်သော် သူသည်အေးခဲသွားလျက် အလိုအလျောက်ရေရွတ်လိုက်မိလေသည်။

"ရီလင်းကျစ်နဲ့ ယဲ့ကျင်းကျီတို့ အတင်းအဖျင်းကဒီလောက်တောင်တန်တာလား.."

ထို့နောက်သူကခေါင်းခါလျက်အကြိမ်အနည်းငယ် ရေရွတ်လိုက်လေသည်။

"သြမိသောဖော"

"တာအိုရောင်းရင်းရီလင်းကျစ်..အဲဒီတုန်းက မင်းအတွက်မောက်ထိုင်ကျောက်ကိုရဖို့ ဒီဘုန်းကြီးအတူလိုက်ရှာပေးခဲ့တယ်နော်...ပြီးတော့မင်းလည်းရွှမ်းရွှယ်လောကအတွက် အသက်ပေးသွားခဲ့တာပဲ..အခုဒီဘုန်းကြီးလည်းရွှမ်းရွှယ်လောကကြီးအေးချမ်းဖို့ ဒီနှစ်၃၀၀မိစ္ဆာကိုဖမ်းမှရမယ်..ဒါပေမယ့် သူ့ကိုဖမ်းဖို့လိုအပ်တဲ့ပစ္စည်းတွေ၀ယ်ဖို့ကျတော့လည်း point မလုံလောက်လို့ပါကွာ...အဲဒါကြောင့်ဒီဘုန်းကြီးက မင်းတို့ဆရာတပည့်၂ယောက်ရဲ့အတင်းအဖျင်းကိုမတတ်သာပဲထုတ်ရောင်းလိုက်ရတာပါ.. ကောင်းကင်ဘုံကနေ ဒီဘုန်းကြီးကို အပြစ်တင်မနေဘူးမလား..အိုင်းရိုး.."

လက်သီးဆုပ်အရွယ် အခွံမာသီးတစ်လုံးက ဆရာတော်ပုရှင်း၏ ကတုံးပြောင်ပေါ်ရုတ်ချည်းဒေါင်ခနဲ ကြွေကျလာခဲ့ကာ ဘုသီးကြီးတစ်လုံးကိုချန်ရစ်လေသည်။

ဆရာတော်ပုရှင်း သူ၏ခေါင်းကလေးကိုပွတ်လျက် ဆက်၍ရေရွတ်လိုက်လေသည်။

"မင်းဒီဘုန်းကြီးကိုအပြစ်မတင်ပါဘူး..အပြစ်မတင်ပါဘူး..ဒီဘုန်းကြီးကလည်း လူတွေကောင်းကျိုးအတွက် မကောင်းဆိုး၀ါးကိုပယ်ဖို့ကြိုးစားနေတာ..အိုင်းရိုး အိုင်းရိုး အိုင်ရိုး.."

လေတစ်ချက်နှင့်အတူ အခွံမာသီးများမှာ မိုးရွာချသည့်အလား ဆရာတော်ပုရှင်း၏ကတုံးပြောင်ပေါ်သို့ တတောင်တောင်နှင့် ကြွေကျကုန်ကြလေသည်။ ဆရာတော်ပုရှင်း၏ခေါင်းပေါ်တွင် ဘုသီးများပလုံစီနေခဲ့လေသည်။ သူသည်လည်းထိုအပင်ပေါ်မှလျင်မြန်စွာပြေးဆင်းလာခဲ့ကာ ဧကရာဇ်ချင်၏ သင်္ချိုင်းဂူသို့ထွက်ပြေးလာခဲ့လေသည်။ ပြေးလွှားနေရင်း သူကကျယ်လောင်စွာအော်လိုက်သေးသည်။

"ဒီဘုန်းကြီး အခုမိစ္ဆာသွားဖမ်းတော့မယ်နော်"

ယနေ့ 'ghosts know'၏ သတင်း၄ပုဒ်ထဲမှ ၃ပုဒ်မှာ အမေ့လျော့ခံနေရရှာသည်။ ' ငရဲဘုရင်ယဲ့တွင် ဇနီးလောင်းရှိသည်'ဟူသော အတင်းအဖျင်းတစ်ခုကသာ ရွှမ်းရွှယ်လောကတစ်ခုလုံး၏ အုန်းအုန်းကျွက်ကျွက်ဆွေးနွေးခြင်းကိုခံနေရလေသည်။

ထိုညမှာပင် ယဲ့ကျင်းကျီသည် တံမြက်စည်းတစ်ချောင်းကိုကိုင်လျက် တစ်အိမ်လုံးကိုလှည်းကျင်းနေခဲ့လေသည်။ သူ၏ဖုန်းမှာ ရုတ်ချည်းတုန်ခါလာခဲ့လျှင် သူကထုတ်ယူကာကြည့်လိုက်လေသည်။

စီနီယာဆရာကြီးများနှင့် မျိုးဆက်ဟောင်းမှ တာအိုရောင်းရင်းများမှာ သူ့အား နှုတ်ခွန်းဆက်စကားနှင့်အတူ မင်္ဂလာနေ့ရက်ကိုလာရောက်မေးမြန်းနေခဲ့ကြလေသည်။ ရီလင်းကျစ်မှာဆုံးပါးသွားပြီးဖြစ်လေရာ သူတို့သည် ယဲ့ကျင်းကျီ၏ဆရာဖြစ်သူနေရာတွင် အစား၀င်လျက် မိဘနေရာမှမင်္ဂလာကိုကျင်းပပေးနိုင်လေသည်။

၄င်းမှလွဲလျှင် မျိုးဆက်သစ်လေးများထဲမှ ၃ယောက်ကသာ စပ်စုလာရဲကြလေသည်။

ယဲ့ကျင်းကျီမျက်ခုံးကိုအသာတွန့်ချိုးလိုက်မိလေသည်။ သူ'ghosts know'ကိုဖွင့်ကြည့်လိုက်ပြီး သတင်းကိုမြင်လိုက်ရချိန်တွင်သူနားလည်သွားခဲ့လေသည်။

သူသည်တံမြက်စည်းကိုအသာချကာ တစ်ယောက်ပြီးတစ်ယောက် အလေးအနက်စာပြန်လိုက်လေသည်။

【 လွန်ခဲ့တဲ့၁၉နှစ်တုန်းက ဆရာနဲ့နောက်ဆုံးအကြိမ်တွေ့ခဲ့ရတုန်းက ဆရာကကျွန်တော့်ကို မင်္ဂလာကိစ္စအကြောင်းတကယ်ပဲပြောပြခဲ့ဖူးပါတယ်..ပြီးတော့ ကတိအနေနဲ့မောက်ထိုင်ကျောက်တစ်ဖက်ကိုလည်း ပေးခဲ့တယ်..ဒါပေမယ့်အဲဒီအချိန်မှာပဲ နှစ်တစ်ထောင် မိစ္ဆာ ပေါ်လာတဲ့အတွက်ဆရာကအသေအချာရှင်းပြချိန်မရလိုက်ပဲ အဲဒီမိစ္ဆာနဲ့အတူ ပျောက်ကွယ်သွားခဲ့တယ်..

တဖက်လူကဘယ်သူလဲဆိုတာ ကျွန်တော်လည်းမသိပါဘူး..ပြီးခဲ့တဲ့နှစ်တွေကလည်း တဖက်လူက ကျွန်တော့်ကိုလာမရှာခဲ့ဘူး..ဆရာပြောခဲ့တာကတော့ ကျွန်တော့်ထက်၂နှစ်ငယ်ပြီး ယင်စွမ်းအင်အရမ်းသန််မာပြီး ကျွန်တော်နဲ့လိုက်ဖက်တဲ့ မိန်းကလေးတဲ့ ဒီနှစ်ဆိုရင် ၂၃နှစ်ရှိလောက်ပြီပေါ့】

မျိုးဆက်ဟောင်းဆရာသခင်ကြီးများမှာ ရှင်းပြချက်ကိုနားထောင်ရန် ရောက်လာကြခြင်းမဟုတ်ချေ။ သူတို့ကအတင်းအဖျင်းကိုသာရှာလိုကြခြင်းဖြစ်သည်။

ထျန်းကျီကျောင်းမှ ဆရာသခင်မှာ လျင်မြန်စွာစာပြန်လာခဲ့သည်။

【တာအိုရောင်းရင်းလေးယဲ့..ဒီလူအိုကြီးကမင်းအတွက် တွက်ချက်ပြီးတော့ မင်းဇနီးလောင်းကဘယ်မှာလဲဆိုတာရှာပေးမယ် ! 】

ယဲ့ကျင်းကျီ၏နှုတ်ခမ်းတို့ဖြောင့်တန်းသွားလျက် ငြင်းဆန်ချင်ခဲ့လေသည်။ သူ၏အမြင်အရတွင် ထို၁၉နှစ်အတွင်းတဖက်လူထံမှ မည်သည့်သတင်းမှမကြားခဲ့ရချေ။ သူမမှာရွှမ်းရွှယ်လောကမှမဟုတ်သည်လည်းဖြစ်နိုင်သည်။ သို့တည်းမဟုတ် သူမသည် သူ့သတင်းကိုကြားမိကာ တမင်ရှောင်နေသည်လည်းဖြစ်နိုင်ကာ သူ့ဇနီးမဖြစ်လိုသည်လည်းဖြစ်နိုင်လေသည်။ ထိုသို့သာဆိုလျှင် သူသည်လည်းတဖက်လူကို တွန်းအားပေးရန်စိတ်ကူးမရှိပဲ ဘာမှမရှိခဲ့သလိုသာ သဘောထားမည်ဖြစ်သည်။

သို့သော် ထျန်းကျိကျောင်းမှဆရာကြီးက ၅မိနစ်အတွင်းမှာပင်စာပြန်လာခဲ့လေသည်။

【 လင်းရှောင်ဖွဲ့စည်းပုံအရ ၃ဘ၀ဆက်နွယ်မှု..ယင်ဟာ ရှနဲ့တွဲတယ်..အာ..တာအိုရောင်းရင်းလေးယဲ့..အဖြေထွက်တာကတော့..မင်းကမင်းရဲ့ဇနီးလောင်းနဲ့ ဆုံပြီးပြီတဲ့ 】

ယဲ့ကျင်းကျီ၏မျက်၀န်းတို့ကျုံ့သွားမိလေသည်။

【 ကျေးဇူးတင်ပါတယ် စီနီယာ... 】

👻

Prev Next