MM Story Teller

👻Chapter 25

Viewers 3k

👻Chapter 25

ပြောပြီးသည်နှင့် ယဲ့ကျင်းကျီက အခန်းထဲသို့ တရှိန်ထိုး၀င်သွားခဲ့လေသည်။ သူ၏လက်ချောင်းများကိုလှုပ်ရှားလိုက်သည်နှင့် လေပြင်းတစ်ချက်မှာ ရှောင်ကျွင်းကို၀င်တိုက်သွားခဲ့လေသည်။ ရှောင်ကျွင်းမှာ သွေးများစွာကိုအန်ထုတ်လိုက်လေသည်။ လွန်ခဲ့သောမိနစ်ပိုင်းကတင် သေလုမြောပါးအရိုက်ခံထားရသော ရှောင်ကျွင်းမှာ နံရံကိုတဖန်၀င်တိုက်သွားခဲ့ပြန်သည်။

ရှီကျား၏ လက်ဗလာနှင့်ဖြေရှင်းမှုနှင့်ကွဲပြားစွာ ယဲ့ကျင်းကျီက လက်ဖ၀ါးကိုလှန်လိုက်သည်နှင့် အ၀ါရောင်အဆောင်စာရွက်တစ်ခုပေါ်လာခဲ့လေသည်။ ထိုစာရွက်အဆောင်ပေါ်လာသည်နှင့် ရှောင်ကျွင်းမှာ ကြောက်ရွံ့မှုကြောင့်တုန်ယင်လျက်ထိုအဆောင်စာရွက်ကို ဖြူလျော်စွာစိုက်ကြည့်နေခဲ့လေသည်။ သူမ ထွက်ပြေးချင်ခဲ့လေသည်။

သို့သော် ယဲ့ကျင်းကျီက သူ၏ခြေထောက်ကိုဆန့်ထုတ်လိုက်ကာ သူမကိုကြမ်းပြင်ပေါ်လဲကျသွားစေခဲ့သည်။

သေရမည်ကိုမကြောက်သည့်အလား ရှောင်ကျွင်းသည် ယဲ့ကျင်းကျီထံပြေး၀င်သွားခဲ့၏။ ယဲ့ကျင်းကျီသူ၏လက်ချောင်းများကိုလှုပ်ခါလိုက်သည်နှင့်ရွှေရောင်အလင်းတစ်ခုဖြတ်ခနဲလင်းလာခဲ့ကာ သူမ၏သွေးများရွှဲနေသော မျက်နှာပေါ်တွင်တစ်စုံတစ်ခုကိုရေးဆွဲလိုက်လေသည်။ တချိန်တည်းမှာပင် အ၀ါရောင်အဆောင်စာရွက်မှာ သူမ၏နဖူးပေါ်သို့ ကပ်သွားခဲ့လေသည်။

ရှောင်ကျွင်း၏လှုပ်ရှားမှုများက ရုတ်ချည်း အရှိန်တ၀က်မျှလျော့ကျသွားခဲ့ကာ နာကျင်စွာအော်မြည်လိုက်လေသည်။ ရှောင်ကျွင်း၏ မျက်နှာပေါ်တွင် အကြောက်တရားများဖြတ်ပြေးသွားသည့်တိုင် သူမကိုယ်သူမ ယဲ့ကျင်းကျီထံခုန်၀င်လိုက်ပြန်သည်။

ထိုစဥ်ယဲ့ကျင်းကျီက ရှောင်ကျွင်းအား အညှာအတာမဲ့စွာ စတင်ရိုက်နှက်လိုက်သည်အားတွေ့လိုက်ရလေသည်။ တချိန်တည်းမှာပင် သူသည်အ၀ါရောင်အဆောင်စာရွက်ကလေးအား ရှောင်ကျွင်း၏ နဖူး လက်ပြင် ရင်ဘတ်နှင့် ကျောဘက်တို့ကိုကပ်လိုက်လေသည်။

နောက်ဆုံးအဆောင်စာရွက်ကိုကပ်ပြီးနောက် ယဲ့ကျင်းကျီမှာ အေးစက်စွာဆိုလိုက်သည်။

"မင်းသူ့ကိုထိခိုက်အောင်လုပ်တယ်..လူတွေကိုထိခိုက်အောင်လုပ်ရဲတယ်ပေါ့..ဒီလိုမကောင်းဆိုး၀ါးမျိုးကို ငရဲပြည်၃ထပ်မြောက်ကို ဆင်းရအောင်လုပ်ပစ်မယ်"

ရှီကျား ဘေးမှကြောင်တောင်တောင်ရပ်ကြည့်နေမိလေသည်။

"..."

ရှောင်ကျွင်းမှာ မသေရုံတမယ်အရိုက်ခံနေရပြီး သူမမှာ သေသွားလျှင်ကောင်းမည်ဟုပင်တွေးကာ စိတ်ထဲမှလည်း ဆက်တိုက်ကျိန်ဆဲနေခဲ့လေသည်။

"...."

နင့်အမေ*

အဆောင်စာရွက်၇ရွက်အကပ်ခံထားရပြီးနောက် ရှောင်ကျွင်း မလှုပ်ရှားနိုင်တော့ချေ။ သူမ၏အမေပင်မမှတ်မိနိုင်လောက်အောင် ရိုက်နှက်ခံထားရသော မျက်နှာကိုသာမော်လျက် ရှီကျားနှင့် ယဲ့ကျင်းကျီအား တစစီဆုတ်ဖြဲပစ်လိုသည့်အကြည့်နှင့် အငြိုးတကြီးကြည့်လိုက်ရုံသာတတ်နိုင်လေသည်။

ရှီကျားမှာ အခန်းထဲသို့လျှောက်၀င်သွားလိုက်သည်။ သူမမေးနိုင်ခင်မှာပင် ယဲ့ကျင်းကျီမှာ သူဘာမေးလိုသည်ကို သိလျက်ဆိုလာခဲ့သည်။

"ဒါကတကယ်ပဲ သရဲမဟုတ်ဘူး..ဒါပေမယ့် မကောင်းဆိုး၀ါးမိစ္ဆာတစ်မျိုးပဲ...ကိုယ့်အမှားပါ..ဒီလိုမိစ္ဆာမျိုးက ပေါ်လာတတ်တာရှားတယ်လေ...အရင်တုန်းကတစ်ခါပဲ ကြုံခဲ့ဖူးတာ ပြီးတော့ သတိမထားခဲ့မိဘူး...ရှီ.ရှီကျား..မင်းတနေရာရာထိခိုက်သွားသေးလား"

သူ့စကားကိုကြားလျှင် ရှီကျား တန့်သွားခဲ့မိလေသည်။ ယဲ့ကျင်းကျီ သူ၏လက်ကိုကိုင်လျက် အလွန်စိုးရိမ်တကြီးနှင့် မေးလာချိန်တွင် သူ၏ကိုယ်ပေါ်တွင် နာကျင်နေသောနေရာများရှိသလားဟုပင် ဂရုတစိုက်တွေးလိုက်မိလေသည်။

ထိုအခိုက်အတန့်တွင် လက်ကိုထိသင့် မထိသင့် ရှက်သင့်မရှက်သင့်ကိုမည်သို့သတိရနိုင်ပါမည်နည်း။

ကောင်းကင်ဘုံဆရာသခင်ယဲ့မှာ လူရွယ်လေး၏ လက်ချောင်းပေါ်မှဒဏ်ရာလေးကိုကြည့်လျက် အဖြူရောင်ကြွေပုလင်းလေးကိုထုတ်ယူလာခဲ့လေသည်။

"ဒါက ရှန်းနန်တောင်ကြား မြက်တစ်ထောင်ကျောက်စက်ရည်ပဲ..ကိုယ်မင်းကိုလိမ်းပေးမယ်"

ထို့နောက် သူသည်ထိုပုလင်းထဲမှ ကြည်လက်ကာ တလက်လက်တောက်ပနေသော အရည်တို့ကိုအနည်းငယ်သွန်လျက် ရှီကျား၏လက်ပေါ်လိမ်းကျံပေးလိုက်လေသည်။

ရှီကျား သတိလက်လွတ်လက်ကိုရုတ်လိုက်မိလျှင် ယဲ့ကျင်းကျီမှာ သူ့ကိုမော့ကြည့်လာခဲ့သည်။ ရှီကျားရယ်လိုက်မိကာ ရှက်ရွံ့စွာဆိုလိုက်သည်။

"ဆရာယဲ့..ဒီဟာက..တန်ဖိုးကြီးမယ့်ပုံပဲ"

ယဲ့ကျင်းကျီမှာ ခေါင်းကိုခါလျက် သူ၏လက်ကိုဆက်၍ကိုင်ထားကာ ဆေးကိုလူးပေးလိုက်လေသည်။

"မကြီးပါဘူး ၁၀pointsထဲပါ"

ရှီကျား"..."

၁၀ pointဆိုတာ အများကြီးပဲဗျ ဟုတ်ပြီလား...

ဖေးယွီလို ငယ်ငယ်ရွယ်ရွယ် အရည်အချင်းလည်းမဆိုး မော့သို့ အဆင့်သတ်မှတ်ချက် ထိပ်ဆုံး၁၀ယောက်ထဲကသူတောင်မှ တစ်လမှာ point၁၀၀ပြည့်အောင်မရှာနိုင်တာ..ခင်များစကားကိုကြားရင် သူငိုသွားလိမ့်မယ်...

ခင်များက pointတွေများလွန်းလို့ ကြယ်တွေကြားမှရှင်သန်နေတဲ့ ငရဲဘုရင်ယဲ့ဆိုရင်တောင် ဒီလိုစိတ်၀ိညာဥ်ဆေးတွေဘာတွေကို မဖြုန်းတီးသင့်ဘူးနော်...

ရှီကျားမှာ ယဲ့ကျင်းကျီကိုကြည့်လိုက်ပြီးနောက် ရှောင်ကျွင်း၏ဆံပင်ကိုဆွဲကာ နံရံပေါ်ကိုင်ပေါက်ချိန်၌ မတော်တဆပြတ်ရှသွားသော သူ၏လက်ချောင်းထိပ်မှဒဏ်ရာကိုကြည့်လိုက်မိသည်။

ထိုလက်မှဒဏ်ရာကိုဆေးလူးပေးပြီးနောက် အခြားမည်သည့်ဒဏ်ရာများမရှိတော့သည်ကိုအတည်ပြုပြီးမှသာ ယဲ့ကျင်းကျီက ရှောင်ကျွင်း၏ကိစ္စကိုစတင်ကိုင်တွယ်တော့သည်။

ရှီကျား သူ၏ကိုယ်ပိုင်လက်ချောင်းကိုပွတ်သပ်လိုက်မိသည်။ ထိုမြက်တစ်ထောင်ကျောက်စက်ရေကိုလိမ်းပြီးသည်နှင့် သူ၏ဒဏ်ရာမှာချက်ချင်းပျောက်ကင်းသွားခဲ့လေသည်။ ၅မိနစ်သာရှိသေးသော်လည်း မည်သည့်အမာရွတ်မျှပင် မကျန်ခဲ့ချေ။ သူမနေနိုင်ဘဲဆိုလိုက်မိသည်။

"ဆရာယဲ့..ဖေးယွီက ခင်များကို စံပြမော်..ခင်များမှာ စံပြပုဂ္ဂိုလ်တစ်ယောက်ရဲ့အလေ့အကျင့်မျိုးရှိတယ်လို့ပြောခဲ့ဖူးပေမယ့်..ခင်များကျွန်တော့်ကို.."

ဒီလောက်ထိကောင်းပေးစရာမလိုပါဘူး..မှော်လက်နက်တွေ၀ယ်ပေးပြီး ဆေးတွေလိမ်းပေးတဲ့အထိပေါ့...

ထိုမတိုင်ခင် လက်ကိုကိုင်ကာ ဆေးလူးပေးနေစဥ်ကအထိ မေ့လျော့နေခဲ့သော ရှက်ရွံ့မှုများက ယဲ့ကျင်းကျီ၏မျက်နှာပေါ်တရိပ်ရိပ်တက်လာပြီး သူ၏နားရွက်များမှာပင် နီရဲလာခဲ့လေသည်။ သူကအသံတိုးတိုးနှင့်ဆိုလာခဲ့သည်။

"ရ..ရပါတယ်..ကိစ္စမရှိပါဘူး..ဒါကကိုယ်လုပ်ပေးသင့်တာပါ"

ရှီကျား"..."

ခင်များကရွှမ်းရွှယ်လောကရဲ့စံပြမော်ဒယ်မဟုတ်ဘူး..ခင်များက ရာစုသစ်ရဲ့ကိုယ်ကျိုးမငဲ့နိုင်ဆုံးနိုင်ငံသားပဲဟုတ်ပြီလား...

ထောင့်တစ်နေရာတွင် လဲကျလျက် ထိုချစ်ခြင်းများထုတ်ဖော်ပြသနေသော ၂ဦးကိုကြည့်နေရပြီး ရှောင်ကျွင်းမှာ ထို၂ဦးလုံးကို အစိမ်းလိုက်၀ါးစားပစ်ရန် မစောင့်နိုင်တော့ချေ။

“@#$@#!!!”

ထိုကြားဖြတ်၀င်မှုကြောင့် ယဲ့ကျင်းကျီမှာ ရှောင်ကျွင်းကိစ္စကိုရှင်းရန်ပြန်သွားလိုက်ကာ ရှောင်ကျွင်းခမျာလည်း ထိုစက္ကူအဆောင်များထံမှ အချိန်တစ်ခုစာဆက်လက်လောင်ကျွမ်းခြင်းကိုခံစားနေရတော့သည်။

ယဲ့ကျင်းကျီနှင့် ရှီကျား. ရှောင်ကျွင်း၏ရှေ့သို့လျှောက်သွားလိုက်ကြပြီးနောက် ယဲ့ကျင်းကျီက သူ့အား ရှင်းပြလာခဲ့သည်။

"ဒီအဆောင်စက္ကူ၇ရွက်က ကိုယ့်သွေးနဲ့ရေးထားတာ..မကောင်းဆိုး၀ါး၀ိဥာဥ်တွေနဲ့ မိစ္ဆာတွေကိုဖိနှိပ်တဲ့နေရာမှာ အရမ်းအသုံး၀င်တယ်..မိစ္ဆာ၀ိညာဥ်တွေက သရဲနဲ့တော့မတူဘူး ဒါပေမယ့် သူကမကောင်းမှုနဲ့ ယင်စွမ်းအင်ကနေဖြစ်တည်လာတဲ့ သက်ရှိတမျိုးပဲ..ကိုယ်တို့အရင်က သူ့ကိုယ်ပေါ်က ယင်စွမ်းအင်ကိုမမြင်နိုင်ခဲ့တာက သူကယင်စွမ်းအင်တွေကို ဖုံးကွယ်ထားနိုင်လို့"

ရှီကျားမှာ နှစ်ပေါင်း၂၀ကျော်အထိ သရဲများစွာကိုမြင်ဖူးခဲ့သော်လည်း မိစ္ဆာများကိုမြင်ဖူးသည်က ဤသည်မှာ ပထမဆုံးအကြိမ်ဖြစ်လေသည်။ သူကမေးလိုက်မိသည်။

"မိစ္ဆာတွေနဲ့ သရဲ၀ိညာဥ်တွေက အတူတူပဲမဟုတ်ဘူးလား"

ယဲ့ကျင်းကျီခေါင်းခါလိုက်သည်။

"တူတယ်လို့တော့ပြောလို့မရပေမယ့် ဆက်တော့ဆက်စပ်နေတာပေါ့.. သရဲတွေကယင်စွမ်းအင်ကြောင့်ဖြစ်လာတယ်..ဒါပေမယ့်ဒီကမ္ဘာပေါ်မှာ မကောင်းမှုနဲ့ ယင်စွမ်းအင်က သရဲတွေဖြစ်လာအောင်ဖန်တီးပေးတာမဟုတ်ဘူး.. တခါတလေမှာ လူတွေရဲ့ရင်ထဲက မကောင်းမှုနဲ့ ဆိုးယုတ်တဲ့စိတ်တွေက နှစ်တစ်ထောင်အငြိုးကြီး၀ိဥာဥ်တွေထက်တောင် ပိုပြီးသန်မာတဲ့ယင်စွမ်းအင်တွေရှိနေနိုင်တယ်.. ကမ္ဘာပေါ်မှာ ရှိတဲ့ မိစ္ဆာဆိုတာ အငြိုးကြီး၀ိဥာဥ်တွေဆိုတာထက် လူတွေရဲ့နှလုံးသားပဲ..လူတစ်ယောက်ရဲ့ရင်ထဲက နက်ရှိုင်းတဲ့မကောင်းမှုတွေကနေ မကောင်းဆိုး၀ါးမိစ္ဆာတွေပေါက်ဖွားလာစေတယ် ဒီမိစ္ဆာကိုလည်း doppelgänger( ကိုယ်တုမိစ္တာ)လို့ခေါ်တယ်”

(TN-အခုခေတ်မှာတော့ doppelgangerကိုလူတိုင်းသိကြမယ်ထင်ပါတယ်..ကိုယ်နဲ့တစ်ပုံစံထဲတူပေမယ့်ကိုယ်မဟုတ်တဲ့ဟာမျိုးပါ..ဥပမာလိုင်းပေါ်မှာတွေ့တွေ့နေရတဲ့ -အမေကိုအပေါ်ထပ်မှာတွေ့ပြီးအခုလေးတင်စကားပြောပြီးဆင်းလာတယ်ဆိုပေမယ့် အောက်မှာကျ အမေနောက်တစ်ယောက်ထိုင်နေတာ..ဒါပေမယ့် ဒီ၀တ္တုထဲမှာကတော့ ၂ကိုယ်မခွဲထားပါဘူး..)

လူကြီးသူမများ ယခင်ကပြောခဲ့ဖူးသည်မှာ ဤကမ္ဘာပေါ်တွင် မိမိနှင့် တပုံစံတည်းတူသော လူမျိုးရှိနိုင်သည်ဟုပင်။ ထိုလူမှာ သင်နှင့်တစ်ရွယ်ထဲ တစ်ရုပ်ထဲ အသံမှာလည်းတစ်သံထဲဖြစ်ကာ အမူအကျင့်များမှာလည်း အတူတူပင်ဖြစ်လိမ့်မည်။ ထိုသူကသင်နှင့်ဆုံသည်နှင့် သင့်ကိုနည်းလမ်းပေါင်းစုံနှင့် သတ်ရန်ကြိုးစားလိမ့်မည်။ ထို့နောက် သူတို့သည်သင်၏နေရာကို၀င်လာပြီး သင့်ကိုအစားထိုးကာ သင့်ဘ၀ကိုနေထိုင်နေလိမ့်မည်။

၄င်းတို့မှာသင်၏ doppelgängerဖြစ်သည်။

ယဲ့ကျင်းကျီဆက်ပြောလာခဲ့သည်။

"ကိုယ်တုမိစ္ဆာတွေက အစတည်းက မင်းနဲ့တကယ်ကြီးတူတာတော့မဟုတ်ဘူး..သူတို့ကမင်းနားကိုကပ်လာမှာ..ကိုယ်တုမိစ္ဆာတွေက ကမ္ဘာပေါ်ကနေ အကောင်းဆုံးပစ်မှတ်ကိုရှာပြီး မင်းဘ၀ထဲကို၀င်လာလိမ့်မယ်..တစ်နေ့ပြီးတစ်နေ့ အဲဒါကမင်းနဲ့ပိုပိုပြီးတူလာတာကိုတွေ့ရလိမ့်မယ်..မင်းရဲ့မိသားစုနဲ့ သူငယ်ချင်းတွေကတောင် မင်းတို့၂ယောက်ကိုတဖြည်းဖြည်းလူချင်းမှားလာကြမယ်..နောက်ဆုံးတစ်နေ့မှာတော့ သူကမင်းနေရာကိုလုံး၀ယူသွားပြီး မင်းခန္ဓာကိုလည်း ထိန်းချုပ်နိုင်သွားမယ်.. ဒီကမ္ဘာပေါ်မှာ မင်းဟာမင်းပဲလို့တွေးပေးတော့မယ်သူမရှိတော့သ၍ မင်းဟာလည်းရှင်သန်တည်ရှိဖို့ကိုအဓိပ္ပါယ်မရှိဖြစ်လာပြီး ကိုယ်တုမိစ္ဆာဆီမှာရှုံးနိမ့်သွားပြီးတော့ မင်းလည်း ဆက်ပြီးတည်ရှိတော့မှာမဟုတ်ဘူး"

ရှီကျားနားလည်သွားခဲ့လေသည်။

"ပိုင်ရှင်ရဲ့ခန္ဓာကိုယ်ကိုအပိုင်စီးလိုက်တာဆိုတော့ ခင်များပြောချင်တာက ဒီမိစ္ဆာက ၀မ်းကွဲရှောင်ကျွင်းမဟုတ်ပေမယ့် ဒီခန္ဓာကတော့ သူ့ခန္ဓာကိုယ်ပေါ့"

"အင်း"

ယဲ့ကျင်းကျီ ခတ္တမျှတွေးလျက်ဆိုလိုက်သည်။

"လက်ရှိမှာက လူတွေကလည်း သရဲတွေ မိစ္ဆာတွေရဲ့တည်ရှိမှုကိုယုံကြည်တဲ့သူတွေရှားသွားပြီ..လူတွေရဲ့ဘ၀ကလည်းပိုပြီးအဆင်ပြေလာတယ် အချင်းချင်းဆက်ဆံရေးတွေလည်းကောင်းကြတော့ ကိုယ်တုမိစ္ဆာတွေက လူတစ်ယောက်ရဲ့ခန္ဓာကိုယ်ကိုအပိုင်စီးဖို့ဆိုတာ ခက်သွားပြီ... လွန်ခဲ့တဲ့၁၀နှစ်က ကိုယ်ကိုယ်တုမိစ္ဆာတစ်ကောင်ကိုတွေ့ခဲ့ပေမယ့် သူကခန္ဓာကိုယ်ပိုင်ရှင်ကိုအစားထိုးဖို့ကျရှုံးခဲ့တယ်လေ..နောက်ဆုံးမှာတော့ သူလည်းပျောက်ကွယ်သွားတယ်..ဒီလိုအောင်အောင်မြင်မြင်နဲ့အစားထိုးသွားတဲ့ ကိုယ်တုမိစ္ဆာမျိုး ဒါကိုယ်ပထမဆုံးမြင်ဖူးတာပဲ"

ရှီကျားက ခေါင်းကိုငုံ့လျက် ထောင့်တွင်လဲလျောင်းနေသော ရှောင်ကျွင်းကိုကြည့်လိုက်လေသည်။ ထိုအခိုက်အတန့်တွင် သူမမှာရှီကျားကိုကြည့်မနေတော့ဘဲ သူမမျက်နှာကို အမှောင်ထုထဲ၌သာနစ်မြှုပ်ထားခဲ့လေသည်။ ၄င်းကဘာတွေးနေမှန်း ရှီကျားမသိချေ။

အတော်ကြာပြီးနောက် ရှီကျားကတည်ငြိမ်စွာဆိုလိုက်လေသည်။

"သူကဘယ်လိုလုပ်၀မ်းကွဲရှောင်ကျွင်းရဲ့ခန္ဓာကိုယ်ကို အစားထိုးနိုင်သွားလဲဆိုတာ ကျွန်တော်သိပြီထင်တယ်"

၁၀မိနစ်ခန့်ကြာပြီးနောက် ဒုတိယအိပ်ခန်းတွင် မေ့လဲနေကြသော ဦးလေးနှင့် အန်တီကိုတွေ့လိုက်ရလေသည်။ ယဲ့ကျင်းကျီ၏မန္တာန်ကြောင့် သူတို့၂ဦး ပြန်နိုးလာခဲ့လေသည်။ အန်တီနိုးလာပြီး လဲကျနေသော သူမသမီးကိုတွေ့သည်နှင့် သူမ အလျင်အမြန်ပြေးသွားလျက် သူမကိုယ်ပေါ်မှ အ၀ါရောင်အဆောင်စက္ကူများကိုဆွဲခွာပစ်လိုက်လေသည်။

ရှီကျား မျက်မှောင်ကျုံ့လျက် သွား၍တားရန်ပြင်လိုက်သော်လည်း ရှောင်ကျွင်းမှာ သူမ၏ခွန်အားများကိုပြန်လာရရှိလာသည်နှင့် ထွက်ပြေးမသွားခဲ့သည်ကိုတွေ့လိုက်ရသည်။ ထိုအစား သူမကအန်တီကိုဆွဲထူလိုက်ကာ သူမကိုချက်ချင်းနှစ်သိမ့်ပေးလိုက်လေသည်။

၄င်းကိုမြင်လျှင် ရှီကျား၏လည်ချောင်းမှာတင်းကြပ်လာခဲ့ပြီး မည်သည်ကိုဆိုရတော့မှန်း မသိတော့ချေ။

ယဲ့ကျင်းကျီကတည်ငြိမ်စွာဆိုလိုက်သည်။

"ဒီဟာက အဒေါ့်ရဲ့သမီးမဟုတ်ဘူးဆိုတာကို သိမှာပါ"

အန်တီ၏ကိုယ်မှာတောင့်တင်းသွားလျက် ယဲ့ကျင်းကျီဘက်သို့လှည့်၍ ဒေါသတကြီးမာန်မဲလိုက်လေသည်။

"ပေါက်ကရ..ဘာတွေလာပြောနေတာလဲ..ဘာလို့ကျွင်းကငါ့သမီးမဟုတ်ရမှာလဲ...ငါ့သမီးလေးကျွင်းအများကြီးနာကျင်ထားတာ..သွေးတွေအများကြီးထွက်ထားတာလား..လာ..အမေမင်းကိုဆေးရုံကိုခေါ်သွားမယ်...ရှောင်ကျား..မင်းငါတို့ကိုဒီမှာမနေစေချင်ရင်လည်း ငါ့ကိုတည့်ပဲပြောလို့ရပါတယ်..မင်းရဲ့၀မ်းကွဲကိုဘာလို့ဒီလိုဆက်ဆံရတာလဲ..ငါ့သမီးမဟုတ်ဘူးတဲ့လား"

ရှီကျားသက်ပြင်းအသာချလိုက်မိသည်။

"အန်တီ..တကယ်မသိတာလား"

တတိယအန်တီ၏မျက်လုံးများမှာ နီရဲနေလျက်ကျယ်လောင်စွာဆိုလာခဲ့သည်။

"ငါတို့ဒီမှာဆက်မနေတော့ဘူး..အဘိုးကြီး..ကျွင်း..သွားကြစို့"

ပြောပြောဆိုဆိုနှင့်သူမက သူမမိသားစုသမီးဖြစ်သူ၏လက်ကိုဆွဲလျက် အိမ်ရှေ့တံခါးထံလျှောက်သွားလိုက်လေသည်။ ဦးလေးမှာလည်း သူမနောက်မှလိုက်သွားခဲ့လေသည်။

ထိုစဥ်ယဲ့ကျင်းကျီ၏ ကြည်လင်ကာအေးစက်သော အသံကိုကြားလိုက်ရလေသည်။

"ခင်များတို့ရဲ့သမီးကမသေသေးဘူးဆိုရင်ရော.."

လူ၃ယောက်၏ခြေလှမ်းများက ရုတ်ချည်းတုံ့ခနဲရပ်တန့်သွားခဲ့လေသည်။

ပိန်းပိတ်အောင်မှောင်နေသော အခန်းထဲတွင် သူတို့၃ဦးမှာ တံခါးအနီးတွင် ကျောက်ရုပ်ထုများနှယ် မလှုပ်မယှက်ရပ်နေခဲ့ကြလေသည်။ အတော်ကြာပြီးနောက် တတိယအန်တီက ရှောင်ကျွင်း၏လက်ကိုဆွဲလျက် ဆက်၍လျှောက်ထွက်သွားရန်ပြင်လိုက်လေသည်။ သို့သော် ဦးလေးက သူမ၏လက်ကိုဆွဲလိုက်ပြီး သူ၏ကြမ်းတမ်းသော အရိုးခံအသံဖြင့်ဆိုလာခဲ့သည်။

"သူပြောတာ..ငါတို့သမီးမသေသေးဘူးတဲ့"

တတိယအန်တီမှာ သူမယောကျာ်း၏လက်ကိုဖယ်ချလိုက်သည်။

"ဒီအဘိုးကြီးကတော့ ဘာတွေလာပြောနေတာလဲ..ကျွန်မတို့သမီးကဒီမှာလေ..ဒီမှာပဲအမြဲရှိနေခဲ့တာ..ဒီမှာပဲ..."

တတိယအန်တီသည် သူမ၏ရှိုက်သံများနှင့်အတူ မျက်ရည်များကိုပွတ်သုတ်လျက် အတော်ကြာပြီးနောက် သူမခြေကိုလှမ်းကာ ဆက်၍လှမ်းသွားရန်ကြိုးစားလိုက်သည်။ သို့သော်ထိုခြေလှမ်းမှာ အလွန့်အလွန်လေးလံနေသလိုခံစားနေရလေသည်။ မည်မျှပင်ကြိုးစားပါစေ သူမ ရှေ့သို့ဆက်မလှမ်းနိုင်ခဲ့ချေ။ သူမ၏ဘေးမှ ရှောင်ကျွင်းမှာ တတိယအန်တီက သူမ၏လက်ကျန်ခွန်အားများကိုသုံးလျက် ခြေလှမ်းရန်ပြင်လိုက်ပြီးမှ ပြန်ချလိုက်သည်ကိုတွေ့လိုက်ရလေသည်။

သူမ၏အရေတွန့်နေသောမျက်နှာပေါ်တွင် မျက်ရည်များစီးကျလျက် ယဲ့ကျင်းကျီကိုကြည့်လျက် ခွန်အားမဲ့စွာမေးလိုက်လေသည်။

"ကျွင်းလေးက.. တကယ်မသေသေးဘူးလား"

ဘန်း..

ရှောင်ကျွင်းက ရုတ်ချည်း ဦးလေးနှင့် အန်တီအားတိုက်ခိုက်လိုက်လေသည်။

ယဲ့ကျင်းကျီလက်ချောင်းများကိုလှုပ်ရှားလိုက်သည်နှင့် သူမမှာမမြင်ရသော အားတစ်ခု၏ရိုက်ခတ်ခြင်းကိုခံလိုက်သည့်အလား နံရံပေါ်လွင့်ထွက်သွားခဲ့လေသည်။ အရိုးများကျိုးပဲ့သွားသည်ကိုကြားနိုင်လေသည်။ ၄င်းကိုကြားသည်နှင့် လင်မယားနှစ်ဦးမှာ ငိုကြွေးလျက် သူတို့၏သမီးဖြစ်သူထံသွားကာ ကူညီပေးချင်ကြပြန်သည်။ သို့သော် ရှောင်ကျွင်း၏မျက်လုံး၂လုံးမှာ သွေးတမျှနီရဲလျက် သူတို့အားမုန်းတီးစွာကြည့်ကာ တိုက်ခိုက်ရန်ကြိုးစားလာပြန်သည်။

ယဲ့ကျင်းကျီက နောက်ထပ်အဆောင်စက္ကူတစ်ခုကိုထုတ်ယူလျက် ရှောင်ကျွင်း၏နဖူးပေါ်သို့ကပ်လိုက်သည်။ ဤတစ်ကြိမ်တွင် ၄င်းမှာထပ်၍မလှုပ်ရှားနိုင်တော့ချေ။

ဧည့်ခန်းထဲတွင် ၀ူရှန်းချင်းလီက စုန့်စုန့်ကိုခေါ်လာပြီး ရှီကျားထံပြေးလာခဲ့လေသည်။ ကြေးအံစာတုံးလေးမှာ ဟိုဟိုသည်သည်၀င့်ကြွားစွာလျှောက်ခုန်နေပြီး ချီးကျူးခံချင်နေခဲ့လေသည်။ ရှီကျား လက်ကိုဆန့်ထုတ်လျက် ၄င်းပေါ်တစ်ချက်မျှတောက်ကာဆိုလိုက်သည်။

"မင်းကအတော်ဆုံးပဲ"

ထိုအခါမှသာ ၄င်းကကျေနပ်စွာ ရှီကျား၏အိတ်ကပ်ထဲ၀င်သွားတော့သည်။

👻

Prev Next