MM Story Teller

👻Chapter 27

Viewers 3k

👻Chapter 27

ထိုညလင်းပုလဲ၏အလင်းရောင်အောက်တွင် ရှီကျားနှင့် ယဲ့ကျင်းကျီတို့ တိုက်ခန်းတစ်ခုလုံးကိုစတင်ရှင်းလင်းတော့သည်။ အနည်းဆုံးတော့ ကြမ်းပြင်ပေါ်မှ မှန်ကွဲစများကိုရှင်းလင်းရန်လိုလေသည်။ နာရီ၀က်ခန့် ရှင်းလင်းနေပြီးနောက် ယဲ့ကျင်းကျီမှာပို၍ပင်လျင်မြန်လာတော့သည်။ သူသည်လက်တစ်ဖက်မှ တံမြက်စည်းကိုကိုင်လျက် ကျန်တစ်ဖက်မှ ကြမ်းတိုက်၀တ်ကိုကိုင်ထားခဲ့သည်။ ထို့နောက်ရုတ်ချည်းအိမ်ရှေ့တံခါးကိုလှည့်ကြည့်လိုက်လေသည်။

ရှီကျားမှာလည်း ရုတ်ချည်းတန့်သွားလျက် ယဲ့ကျင်းကျီ၏အကြည့်လားရာအတိုင်းကြည့်လိုက်မိလေသည်။

ထိုတံခါးတွင် မည်သည့်လှုပ်ရှားမှုမှမရှိသည့်တိုင် ယဲ့ကျင်းကျီက ထိုအတိုင်းစိုက်ကြည့်နေမြဲဖြစ်သည်။ ထို့နောက် တောက်ပသော အနီရောင်ဓါးတစ်ချောင်းက သူ၏တံခါးမှရုတ်ချည်းဖောက်ထွက်လာပြီး တံခါးကို နည်းနည်းချင်းစီလှီးဖြတ်နေသည်ကိုတွေ့လိုက်ရတော့သည်။

ထိုဓါးမှာ တံခါးအား တို့ဖူးလှီးသလိုပင်လှီးဖြတ်နေခြင်းဖြစ်သည်။ မိနစ်ပိုင်းအတွင်း မသေမသပ်နှင့် စက်၀ိုင်းပုံတစ်ခုက ရှီကျား၏ မဟော်ဂနီသားတံခါးပေါ်တွင်ပေါ်လာခဲ့လေသည်။ အပြင်မှတစ်စုံတစ်ယောက်က ၄င်းကိုတွန်းလိုက်သည်နှင့် ထိုစက်၀ိုင်းပုံလှီးဖြတ်ခံထားရသော သစ်သားအပိုင်းမှ ရှီကျား၏မျက်လုံးရှေ့မှာပင် ဘုန်းခနဲပြုတ်ကျလာတော့သည်။

ရှီကျား"!!!"

ထိုသစ်သားချပ်ပြုတ်ကျလာခြင်းကြောင့် ဖုန်အနည်းငယ်ပင်ထသွားစေသည်။ ဆံပင်ဖြူတို့နှင့်လူအိုကြီးတစ်ဦးမှာ သူ၏လက်ကိုယမ်းလျက် ထိုဖုန်များကိုခါထုတ်လိုက်လေသည်။ ထို့နောက်သူကချောင်းတဟွတ်ဟွတ်ဆိုးလျက် တိုက်ခန်းထဲ၀င်လာရင်းဆိုလိုက်လေသည်။

"များလိုက်တဲ့ဖုန်တွေ..လူမနေတာဘယ်လောက်ကြာပြီလဲမသိဘူး..ယင်စွမ်းအင်ကလည်းလေးပြီး ဖုန်တွေကထူချက်...ကံကောင်းချင်တော့ ငါဆရာသခင်ရှိနေလို့ပေါ့..မဟုတ်ရင်ဒီမကောင်းဆိုး၀ါးဟာလူတွေကိုဒုက္ခပေး..အယ်..တာအိုရောင်းရင်းလေးယဲ့..."

ယဲ့ကျင်းကျီခေါင်းအသာညိတ်လိုက်လေသည်။

"စီနီယာ ကျူးကျောက် မတွေ့တာကြာပြီ"

ထျန်းကျိကျောင်းမှ ကျူးကျောက်ကျန်းရန်သည် သူ၏လက်ကိုဝေ့ယမ်းလျက်ရယ်မောလာခဲ့သည်။

"ဟုတ်ပါ့ ဟုတ်ပါ့ မတွေ့တာကြာပြီ..လွန်ခဲ့တဲ့၄နှစ် ဖုန်းတုမှာတစ်ခါတွေ့ပြီးကတည်းက မတွေ့ဖြစ်တော့တာနော်...တာအိုရောင်းရင်းလေးယဲ့သာဒီမှာရှိနေမှန်း သိရင် ဒီတာအိုဆရာလည်း အပြေးလာမိမှာမဟုတ်ဘူးရယ်..ဒီတာအိုဆရာက S မြို့ကဖြတ်သွားတုန်း ပြင်းထန်တဲ့ယင်စွမ်းအင်ကိုခံစားမိလို့ နည်းနည်းတွက်ချက်ကြည့်လိုက်တယ်လေ.. အဖြေကနည်းနည်းမူမမှန်တော့ဒီတာအိုဆရာလည်း မကောင်းဆိုး၀ါး၀ိညာဥ်များရှိနေလားလာကြည့်တာ..ဒီကတာအိုရောင်းရင်းလေးယဲ့ရှိနေမှန်းသိရင် ဒီတာအိုဆရာကြီး ဘယ်လာဖို့လိုမလဲနော့်"

ရှီကျား"....."

လွန်ခဲ့တဲ့၄နှစ်က သူအတွက်အချက်မှားလို့ ရွှမ်းရွှယ်လောကရဲ့မျိုးဆက်သစ်တွေအကုန်လုံး မျိုးတုံးလုနီးပါးဖြစ်သွားအောင်လုပ်ခဲ့တဲ့ အဲဒီထျန်းကျိကျောင်းက စီနီယာ ကျူးကျောက်လား...

ရှီကျား သူ၏အာရုံတို့ကို သူ၏တံခါးပေါ်မှအပေါက်ကြီးထံနှစ်မြုပ်ထားခဲ့လေသည်။ သူ၏လက်မှာ ယားယံနေပြီး လူတစ်ယောက်ယောက်ကို ရိုက်နှက်ချင်သလိုခံစားနေရလေသည်။ ထိုအချိန်မှာပင် ကျူးကျောက်က သူ၏ခေါင်းကိုပွတ်လျက် ဟဲဟဲဟူသောရယ်သံနှင့်အတူ တောက်လောင်နေသောမီးပုံထဲ ဆီဖြန်းပေးလာခဲ့သည်။

"ဒီနေ့ခေတ်တံခါးတွေကခိုင်ချက်ကွာ...ဒီတာအိုဆရာကြီးက တံခါးကိုဖြတ်ဖို့မနည်းကြိုးစားလိုက်ရတယ်"

ယဲ့ကျင်းကျီမေးလိုက်မိသည်။

"စီနီယာ..ဘာလို့တံခါးကို မခေါက်လိုက်တာလဲ"

ကျူးကျောက်၏အမူအရာမှာတောင့်တင်းသွားခဲ့လေသည်။

"ယင်စွမ်းအင်ကဒီနားမှာအတော်ပြင်းနေတာလေ..အကယ်၍ မကောင်းဆိုး၀ါး၀ိညာဥ်သာတကယ်ရှိနေရင် သူ့ကိုသတိပေးလိုက်သလိုဖြစ်သွားမှာပေါ့"

ယဲ့ကျင်းကျီ "စီနီယာက မီးလျှံဓါးကိုသုံးပြီးတံခါးကိုဖောက်လိုက်တော့လည်း အရမ်းသိသာနေတုန်းပဲလေ"

ကျူးကျောက်ကျန်းရန်မှာ ရုတ်ချည်းလှုပ်ရှားမှုကင်းမဲ့သွားလျက် သူယခုလေးတင်မည်မျှတုံးအပုံပေါက်နေခဲ့ကြောင်းနားလည်သွားတော့သည်။ ထိုအရှက်ရမှုကိုဖုံးကွယ်ရန် သူကပတ်ပတ်လည်ကို ဟိုကြည့်သည်ကြည့်လုပ်လိုက်လေသည်။ ထိုစဥ်ရုတ်ချည်းဆိုသလို ယဲ့ကျင်းကျီ၏ လက်ထဲ၌ တံမြက်စည်းတစ်ချောင်းနှင့် ကြမ်းတိုက်တံတစ်ချောင်းကိုကိုင်ထားသည်အားတွေ့လိုက်ရလေသည်။ ထို့နောက် ဘေးသို့ကြည့်လိုက်သော် မရင်းနှီးသောမျက်မှာစိမ်းလူရွယ်တစ်ဦးကိုထပ်မံတွေ့လိုက်ရပြန်သည်။

ထိုလူရွယ်လေးမှာ အလွန်အံ့ဖွယ်ကောင်းလှပေသည်။ သူက ယဲ့ကျင်းကျီအနားတွင်ရပ်နေပြီး သူကိုယ်တိုင်လည်း တံမြက်စည်းတစ်ချောင်းကို ကိုင်ထားခဲ့သည်။

ကျူးကျောက်ကျန်းရန် သူ၏မျက်လုံးကိုအသာလေးရွေ့လျက်အကြည့်လွှဲလိုက်လေသည်။

"အဲ..ဒီတာအိုဆရာကြီးမှာ လုပ်စရာတစ်ခုရှိသေးတာပဲ ခုမှသတိရတော့တယ်...တာအိုရောင်းရင်းလေးယဲ့..နောက်မှထပ်ဆုံကြတာပေါ့"

စကားဆုံးသည်နှင့် မုတ်ဆိတ်ဖြူတို့နှင့် အဘိုးကြီးမှာ လှည့်ကာပြေးသွားတော့သည်။

ရှီကျားက သူ၏တံခါးပေါ်မှအပေါက်ကြီးကိုစိုက်ကြည့်နေဆဲပင်။ ကျူးကျောက်ကျန်းရန်ထွက်ပြေးသွားချိန်တွင် သူတုန့်ပြန်ရန်အချိန်ပင်မရှိခဲ့ချေ။ ယခုလိုက်လျှင်လည်းမီတော့မည်မဟုတ်။ ယဲ့ကျင်းကျီကဆိုလာခဲ့သည်။

"ကိစ္စမရှိပါဘူး ကိုယ့်မှာပိုက်ဆံတွေအများကြီးရှိတယ်..တကယ်အများကြီးပဲ..နောက်တံခါးတစ်ချပ်၀ယ်လို့ရတယ်လေနော်"

ရွှမ်းရွှယ်လောကမှလူများတွင် ပိုက်ဆံပြတ်လပ်မနေချေ။ pointများကိုသာ အသည်းအသန်လိုအပ်ကြခြင်းဖြစ်သည်။ ရှီကျားက ၄င်းကိုသိသော်လည်း သူသည်ယဲ့ကျင်းကျီက သူ့အတွက်လျော်ပေးမည်ကို မည်သို့လက်ခံနိုင်ပါမည်နည်း။

ယဲ့ကျင်းကျီမှာ ရှီကျား၏မှုန်မှိုင်းနေသော အမူအရာကို ဂရုတစိုက်ကြည့်လျက် နားလည်သွားခဲ့လေသည်။

"ခဏလေးနော် ကိုယ်စီနီယာ ကျူးကျောက်ကိုwechatမှာဆက်သွယ်ကြည့်လိုက်မယ်..သူကအလျော်ပေးလောက်ပါတယ်"

ရှီကျား အနည်းငယ်မျှခံစားရကောင်းသွားခဲ့သည်။

သို့သော်သူတို့မသိသည်က ထိုဖေးယွီထက်ပင် ကျိုးကြောင်းမဆီလျော်သော် ကျူးကျောက်ကျန်းရန်မှာ အဝေးသို့ပြေးပြီးသည်နှင့် သူ၏အိတ်ထဲမှ ဖုန်းကိုအလျင်အမြန်ထုတ်ယူလိုက်ခြင်းပင်။ ထို့နောက်ကျွမ်းကျင်လျင်မြန်စွာပင် wechatကိုဖွင့်လျက် message boxတစ်ခုတွင် အလင်းအလျင်ဖြင့်စာများစရိုက်လိုက်တော့သည်။

: 【 ဒီတာအိုဆရာကြီးမှာ သတင်းထူးရှိတယ်နော်..ကောင်းကင်ဘုံကိုကိုင်လှုပ်နိုင်တဲ့ သတင်းထူးနော်..အယ်ဒီတာအမြန်ထွက်လာခဲ့..ဒီတာအိုဆရာကြီးက ၀က်၀က်ကွဲအတင်းအဖျင်းအကြီးစားကိုပေးတော့မှာကွ!!! 】

ညသန်းခေါင်အချိန်တွင် သေမျိုးကမ္ဘာပေါ် ယင်စွမ်းအင်အထူထပ်ဆုံးအချိန်ဖြစ်ပြီး သရဲဖမ်းရန်အကောင်းဆုံးအချိန်ဖြစ်လေသည်။

Zခရိုင် Hမြို့တော်၏ဆင်ခြေဖုံးတစ်နေရာတွင် ကောင်းကင်ဘုံဆရာသခင်တစ်ဦးသည် မက်မွန်သားဓါးကိုသုံးလျက် မကောင်းဆိုး၀ါး၀ိညာဥ်၏ ၀မ်းဗိုက်ကို ထိုးဖောက်လိုက်လေသည်။ မကောင်းဆိုး၀ါး၀ိညာဥ်မှာ နာကျင်စွာအော်မြည်လိုက်လေသည်။ ဆရာသခင်က တည်တံ့သော အမူအရာဖြင့် မန္တာန်တစ်ခုကိုရွတ်ဆိုလျက် ထိုမကောင်းဆိုး၀ါး၀ိညာဥ်အားဖယ်ရှားရန်ကြိုးစားနေခဲ့လေသည်။ ထိုစဥ်သူ၏အိတ်ကပ်ထဲမှ ထူးဆန်းသော ringtoneသံကိုကြားလိုက်ရလေသည်။

"အား အတင်းအဖျင်း အသစ်ရောက်နေပြီ ရောက်လာပြီကွ..အတင်းအဖျင်းအကြမ်းစားနော်"

(TN- ringtoneသံပါ)

ဆရာသခင်အိုကြီး၏ မန္တာန်ရွတ်နေခြင်းရုတ်ချည်းရပ်သွားခဲ့လေသည်။ မကောင်းဆိုး၀ါး၀ိညာဥ်မှာ သူ့အားကြောင်တောင်တောင်ကြည့်လျက် ဘာလုပ်ရမှန်း မသိခဲ့ချေ။ ဆရာသခင်အိုကြီးက လက်တစ်ဖက်ကိုသုံးလျက် မက်မွန်သားဓါးနှင့် ထိုသရဲကိုထိုးဖောက်လိုက်လေသည်။ သရဲခမျာမှာ ထိုဓါးနှင့်အသားကင်တုတ်ထိုးနှယ်အထိုးခံထားရလေသည်။ ၀တ်ရုံလက်ကိုတစ်ချက်ခါလိုက်ပြီး သူကဆိုလာသည်။

"ခဏစောင့်ဦး ဒီအဘိုးကြီးက အတင်းအဖျင်းလေးအရင်ဖတ်လိုက်ဦးမယ်"

မကောင်းဆိုး၀ါး၀ိညာဥ်"...."

ဒီလူမဆန်တဲ့အဘိုးကြီးကတော့..ငါတို့သရဲတွေမှာလည်း အဖတ်ဆယ်စရာမျက်နှာမရှိဘူးလို့ထင်နေလား...

ထိုသို့တူညီသော အခြေအနေများမှာ ဟွာရှားတခွင်တွင်ဖြစ်ပျက်နေခဲ့လေသည်။

ဟိုင်ချန်းမြို့ပြင်ရှိဗီလာတစ်ခုတွင် ချီရှန်းတောက်ရန်သည် ၁၂နာရီမထိုးခင် ၁စက္ကန့်အလိုအထိနှစ်ခြိုက်စွာအိပ်ပျော်နေဆဲဖြစ်သော်လည်း ၁၂နာရီထိုးသည်နှင့် ချက်ချင်းနိုးလာခဲ့၏။ ဆံပင်ဖြူတို့နှင့် ဆရာသခင်အိုကြီးမှာ သူ၏မုတ်ဆိတ်ကိုပွတ်သပ်ရင်း ဖုန်းကိုဖွင့်လိုက်လေသည်။ တစ်ချက်မျှကြည့်လျက် သူသည် တဟားဟားနှင့် အော်ရယ်တော့သည်။

ဘန်း...

၁မိနစ်မျှအကြာတွင် ချီရှန်းတောက်ရန်၏သားဖြစ်သူမှာ လှေကားမှပြေးတက်လာပြီး ဒေါသတကြီးဆိုလာခဲ့လေသည်။

"အဖေ! ဒါဒီလမှာ ကျွန်တော်တို့ပြတင်းပေါက်မှန်တွေလဲရတာ ဒုတိယအကြိမ်နော်...အဖေအဲဒီ'ghosts know'ကိုမဖတ်ပါနဲ့တော့လား..ဖတ်မယ်ဆိုရင်လည်းအဲဒီ မိုးကောင်းကင်တုန်ဟီးဟိန်းသံကြီးကိုသုံးပြီး အိမ်ကပြတင်းပေါက်မှန်တွေကို မခွဲပါနဲ့တော့လား"

ဤတစ်ကြိမ်တွင် ချီရှန်းတောက်ရန်မှာ စိတ်လှုပ်ရှားနေလွန်း၍ ဘာမျှတောင်ပြန်မပြောနိုင်ချေ။ လူအိုကြီးက သူ၏ဖုန်းကို သားဖြစ်သူ၏မျက်နှာရှေ့သို့တိုက်ရိုက်ထောင်ပြလိုက်လေသည်။

ဖုန်းစခရင်ပေါ်မှသတင်းကိုမြင်လိုက်ရသော သားဖြစ်သူမှာလည်း မျက်လုံးများပြူးကျယ်သွားလျက် တုန်လှုပ်စွာဆိုလာခဲ့သည်။

"တာအိုရောင်းရင်းလေးယဲ့က သူ့ဇနီးလောင်းကိုတောင် ရှာတွေ့သွားပြီလား"

ဤကိစ္စကိုပြောရမည်ဆိုပါက လွန်ခဲ့သော တစ်ပတ်ကနှင့်စရပေလိမ့်မည်။

အမည်မသိပုဂ္ဂိုလ်တစ်ဦးက ငရဲဘုရင်ယဲ့တွင် စီစဥ်ပေးထားသော လက်ထပ်ပွဲရှိကြောင်း ဖော်ထုတ်ပြီးကတည်းကပင် အချိန်အကြာကြီးထိုသို့ အကြမ်းစားအတင်းအဖျင်းကိုငတ်မွတ်နေခဲ့သော ရွှမ်းရွှယ်လောကတစ်ခွင်လုံး ဆူပွက်သွားခဲ့လေသည်။

ကြားရသည်မှာ ထျန်းကျိကျောင်းမှ ကျူးဖုန်းကျန်းရန်က ၈၁ကြိမ်တိတိ ကံကြမ္မာကိုတွက်ချက်ကြည့်ခဲ့ပြီးနောက် လိပ်ခွံ၁၁ခွံကွဲသွားပြီးသည့်တိုင် အံ့ဖွယ်ကောင်းစွာ ငရဲဘုရင်ယဲ့၏ ဇနီးလောင်းမှာမည်သူဖြစ်သည်ကို အဖြေမထုတ်နိုင်ခဲ့ချေ။

တချို့ကဆိုကြသည်မှာလည်း ယခင်ကစီနီယာ ရီလင်းကျစ်နှင့်သိကျွမ်းခဲ့ဖူးသော စီနီယာများကိုအနည်းငယ်မေးမြန်းကြည့်ခဲ့ကြသော်လည်း သူတို့မှာခါးသက်သော မျက်နှာဖြင့် ဤသို့သာဆိုနိုင်ခဲ့ကြသည်ဟုပင်။

"ဒီလူအိုကြီးက ဒီအတင်းအဖျင်းကိုရေးတဲ့သူမဟုတ်ရပါဘူးကွာ..ရီလင်းကျစ်က သူ့တပည့်အတွက် လက်ထပ်ပွဲစီစဥ်ပေးခဲ့တယ်လို့တောင် မသိခဲ့ဘူးကွ"

အဖြေကိုရှာမတွေ့လေ သိချင်စိတ်ပြင်းထန်လေဖြစ်သည်။

ထျန်းကျိကျောင်းကိုယ်တိုင်က ကံကြမ္မာတွက်ချက်ခြင်းကို အထူးပြုထားသည့်ဂိုဏ်းဖြစ်လေသည်။ ကျန်ဆရာသခင်များမှာလည်း ကံကြမ္မာတွက်ချက်ခြင်းကို အနည်းအကျဥ်းတော့ တီးမိခေါက်မိ သိကြလေသည်။ သို့သော် ထျန်းကျိကျောင်း၏ဂိုဏ်းချုပ် ကျူးဖုန်းကျန်းရန်ပင် ဇနီးလောင်းဖြစ်သူကိုမတွက်ချက်နိုင်လေရာ ကျန်မတောက်တခေါက်များမှာ အဘယ်တတ်နိုင်အံ့နည်း။ ထို့ကြောင့် ထိုနေ့မှစ၍ပင် 'ghosts know'မှာ အတင်းအဖျင်းအတွဲများကိုဆက်တင်နေခဲ့ပြီး အားလပ်နေသောဆရာသခင်များမှာလည်း ထိုယင်စွမ်းအင်အလွန်သန်မာသော ခန္ဓာကိုယ်ပိုင်ရှင် ဇနီးလောင်း၏ သရုပ်မှန်ကို ဆွေးနွေးနေကြကုန်သည်။

သူမကိုရှာမတွေ့နိုင်ဟူသည်မှာ သူမ၏ခွန်အားကအလွန်မြင့်မားပြီး သူမအားနောက်ယောင်ခံလိုက်လိုသည့်လူများကို ပိတ်ပင်တားဆီးနိုင်လေသည်။

ကျူးဖုန်းကျန်းရန်တောင် သူ့နာမည်ကိုမတွက်နိုင်ဘူးဆိုတော့ ဘယ်လောက်တောင် ကြမ်းတာတုန်း...

အစပိုင်းတွင်လူတိုင်းမှာ ထိုဇနီးလောင်းက မည်သူဖြစ်နိုင်သည်ကိုဆွေးနွေးနေခဲ့ကြသော်လည်း နောက်ပိုင်းတွင် စကား၀ိုင်းမှာ 'ငရဲဘုရင်ယဲ့နဲ့ ဘယ်သူမှန်းအဖြေတောင်ထုတ်မရအောင်သန်မာတဲ့ အဲဒီ တာအိုသခင်မလေးတို့ယူလိုက်ကြပြီးရင် သူတို့ကဘယ်လောက်ကြောက်ဖို့ကောင်းလိုက်မလဲ'နှင့်
'ငရဲဘုရင်ယဲ့ရဲ့သားကသာ ငရဲဘုရင်ယဲ့ထက်ပိုပြီးသန်မာတယ်ဆိုရင် သူ့ကိုဘယ်လိုခေါ်ကြမလဲ ယဲ့၀ူတိ(အနှိုင်းမဲ့) လို့ခေါ်မလား ဒါမှမဟုတ် ယဲ့ရှန်းထျန်း( ကောင်းကင်နတ်ဘုရား)လို့ခေါ်ကြမလား' ဟူ၍ပင်။

ထိုမျှအတင်းအဖျင်းကြီးမျိုးမရှိသည်မှာ အတော်ကြာခဲ့ပြီဖြစ်လေရာ ယဲ့ကျင်းကျီ၏ မိဘသဘောတူလက်ထပ်ပွဲသတင်းမှာ ၃ရက်တိတိအကြိတ်အနယ်ဆွေးနွေးခြင်းခံနေရလေသည်။ သို့သော် ၃ရက်ကျော်လွန်သွားပြီးနောက် မည်သည့်သတင်းအသစ်များလည်းတက်မလာတော့လေရာ လူတိုင်းလည်း သတင်းခေါင်းစဥ်ကိုပြောင်းလဲလိုက်ကြတော့သည်။

၄င်းမှာ 'ghosts know'မှ အောက်ပါခေါင်းစည်းဖြင့် အတင်းအဖျင်းကြီးတစ်ပုဒ်ကို ထပ်ဖြေချမလာခင်အထိသာဖြစ်လေသည်။

《သူ့ရဲ့ဇနီးလောင်းကိုရှာတွေ့တဲ့အချိန်မှာပဲ သူ့လက်ထဲမှာ ရှည်ရှည်ထူထူတစ်ခုကိုကိုင်ထားတယ်တဲ့....》

မည်သည့်အမည်ကိုမှ ထည့်သွင်းဖော်ပြမထားပါချေ။ သို့သော် ထိုဇနီးလောင်းဆိုသည့်ဝေါဟာရကိုမြင်သည်နှင့် လူတိုင်းမှာ ချက်ခနဲပင် ငရဲဘုရင်ယဲ့ကိုသာတန်းမြင်လိုက်ကြသည်သာ။

ခေါင်းစဥ်မှာ ထိုမျှသာဆိုလျှင် သူတို့အလွယ်တကူမေ့သွားနိုင်လောက်သည်။ သို့သော်ခေါင်းစီးမှ "ရှည်ရှည်ထူထူတစ်ခု"ဟူသောဝေါဟာရကိုမြင်သည်နှင့် မရေတွက်နိုင်သော ဆရာသခင်များမှာ ဒိန်းခနဲမီးပွင့်သွားလျက် အလင်းအလျင်နှင့် သတင်းကိုဖွင့်ဖတ်ကြတော့သည်။ တိုတောင်းသော ၃မိနစ်အတွင်းမှာပင် ကောမန့်ပေါင်းတစ်ထောင်ကျော်မှာ ghost know၏ ပို့စ်အောက်တွင် ပေါက်ကွဲထွက်လာခဲ့လေသည်။

【 Clickbaitကြီး! ဒီအဘိုးကြီး clickbaitsတွေကိုအမုန်းဆုံးပဲကွ..အယ်ဒီတာ..သတ္တိရှိရင် မင်းတို့HQ(ဌာနချုပ်)ကဘယ်မှာလဲဆိုတာ ဒီအဘိုးကြီးကိုပြောရဲလား..ဒီအဘိုးကြီးကလည်းလာရဲတယ်ကွ ! 】

【 666, clickbaitကြီးပဲဟေ့, တံမြက်စည်းကိုရှည်ရှည်ထူထူတစ်ခုလို့ ပုံဖော်နိုင်စွမ်းရှိတဲ့ 'ghosts know'ကိုလေးစားမိတယ်ကွာ..lol..ဒါပေမယ့်အစတော့ ဒီတိုင်း clickbaitကြီးသပ်သပ်ပဲထင်တာ..ဒါပေမယ့်ငရဲဘုရင်ယဲ့ရဲ့ဇနီးကိုဘယ်သူကမှရှာမတွေ့တာကို ဒီသတင်းကရှာတွေ့သွားတယ်ပေါ့ ! 】

【S မြို့ဟုတ်လား..ငရဲဘုရင်ရဲ့ဇနီးလောင်းကSမြို့မှာလား..ဒီဘုန်းဘုန်းကလည်းS မြို့မှာပဲကွ ! 】

【Sမြို့တော်ကတာအိုရောင်းရင်းတွေရှိကြလားဗျ! မနက်ဖြန်အတူစုပြီး အဲဒီတာအိုဆရာမလေးဘယ်လောက်တောင်ဆန်းကြယ်သလဲသွားကြည့်ကြစို့လား ? 】

……

"ghosts know"တရား၀င်အကောင့်၏ ဌာနချုပ်တွင်...

ယနေ့သတင်းထူးကိုတင်လိုက်ပြီးသည်နှင့် ၀င်ကြည့်သူအရေအတွက်မှာ တရှိန်ထိုးမြင့်တက်လာခဲ့ပြီး ကောမန့်နှင့်likeများမှာလည်း သောင်းကျော်အထိထိုးတက်သွားခဲ့လေသည်။

ဖေးယွီကသူကိုပြောရန်မေ့နေခဲ့ပြီး ရှီကျားကိုယ်တိုင်လည်း မသိခဲ့သည်မှာ 'ghosts know'တွင် တစ်လသာ freeဖတ်ခွင့်ရှိခြင်းဖြစ်သည်။ ထိုofficial အကောင့်တွင် တစ်လအတွင်း ပို့စ်မှန်သမျှကို freeဖတ်ခွင့်နှင့် ကောမန့်စိတ်ကြိုက်မန့်ခွင့်လည်းရှိလေသည်။ သို့သော် တစ်လကျော်လွန်ပြီးလျှင်တော့ ပို့စ်များကိုဖတ်၍ ကောမန့်ပေးနိုင်စေရန် တစ်လစာ pointတစ်ခုကျသင့်မည်ဖြစ်လေသည်။

ဆယ်ပြားစေ့(tencent ကုမ္ပဏီ)တွင် ထိုသို့ထုံးစံမရှိခဲ့ချေ။

ဘယ်လိုofficialအကောင့်မျိုးကများဒီလို ငွေအရင်းရှင်ကြီးလို ပြုမူရဲမှာတဲ့လဲ...အကောင့်အပိတ်ခံရဖို့ ကြံစည်နေတာမဟုတ်လား..

သို့သော် 'ghost know'နှင့် ထျန်းကုံးပွဲကြည့်စဥ်မှ တပည့်များကတော့ ၄င်းကိုလုပ်ရဲလေသည်။

ဒီတော့မင်းကအရမ်းသန်မာတဲ့ အကြမ်းစားအစွမ်းတွေနဲ့ စီနီယာဆရာသခင်ကြီးဆိုတော့ ဘာဖြစ်တုန်း..ဆောရီးပဲ တစ်လစာအရင်သွင်းလိုက်..

ယဲ့ကျင်းကျီနှင့် ဖေးယွီကဲ့သို့လူမျိုးများအတွက်မူ ထို pointတစ်ခုဆိုသည်မှာ ဘာမျှမဟုတ်ချေ။ သို့သော် ဆရာသခင်အများစုအတွက်မူ ၄င်းမှာ တစ်လစာအသုံးစားရိတ်ထဲမှဖြစ်လေသည်။

သို့နှင့်'ghosts know'ကနောက်တစ်ကွက်ရွေ့လာခဲ့လေသည်။

တစ်လစာကြိုမပေးနိုင်ဘူးလား...အိုကေလေ..ဒါဆို နေ့စဥ်သတင်းထူးရဲ့ ခေါင်းစဥ်နဲ့ previewစာလုံးရေအလုံး၁၀၀ဖတ်လို့ရမယ်..အကုန်လုံးကိုဖတ်ချင်လား..ဒါဆိုပို့စ်တစ်ခုစီအတွက်ဆို ၀.၁ pointကျမယ်ဗျ...

Pointsအရေအတွက်များတဖြည်းဖြည်းတိုးလာသည်ကိုကြည့်ရင်း အယ်ဒီတာများ၏ပါးစပ်ကြီးများမှာဖြီးနေခဲ့ကြပြီး စိတ်လှုပ်ရှားမှုကို မဖုံးကွယ်နိုင်ကြချေ။

တစ်ဖက်တွင်တော့ ကျူးကျောက်ကျန်းရန်မှာ ပါးစပ်ကြီးမှာ ဖြဲနေလွန်း၍ သွားရည်များတောင်စီးကျလာခဲ့သည်။ သူသည်သွားရည်များကို ပွတ်သုတ်လိုက်ပြီး wechatမှ စာပို့လိုက်လေသည်။

: 【 ဘယ်လိုလဲ? ဒီအဘိုးကြီးပေးတဲ့ သတင်းကအကြမ်းစားပဲမလား? မင်းတို့ ဒီတာအိုဆရာကြီးကို pointဘယ်လောက်ပေးမှာလံ အမြန်ပေးတော့ ! 】

အယ်ဒီတာမှာ လျင်မြန်စွာစာပြန်လာခဲ့သည်။

: 【 စီနီယာကျူးကျောက် လောလောဆယ် viewကနေ point ၈၀,၀၀၀ နဲ့ ကောမန့်က ၂၀,၀၀၀ရမယ်】

ကျူးကျောက်ကျန်းရန်မှာ စိတ်လှုပ်ရှားစွာ ခေါင်းတညိတ်ညိတ်လုပ်နေခဲ့လေသည်။ ထိုအခိုက်အတန့်တွင် ယဲ့ကျင်းကျီ၏profileမှာ သူ၏ homepageတွင် ဘွားခနဲပေါ်လာခဲ့၏။

ကျူးကျောက်ကျန်းရန် ထိတ်လန့်သွားလွန်း၍ တိမ်ပေါ်မှပင် ပြုတ်ကျလုနီးပါးဖြစ်သွားခဲ့လေသည်။

👻

Prev Next