အပိုင်း ၁၆၃ ( Mine Owner 12 )

ယန်ကျင်းဇီသည် တပ်ကြီးရှစ်၏တပ်မှူးကို တိုက်ရိုက်အပြစ်ပေးခဲ့သည်။ ယင်းကား မျောက်များကို သတိပေးရန် ကြက်သတ်ပြခြင်း ရည်ရွယ်ချက်အတွက်လည်း ဖြစ်သည်။

တပ်မှူး Cossack သည် တပ်ကြီးရှစ်တပ်တို့၏ တပ်မှူးများအနက် အသက်အငယ်ဆုံး ဖြစ်ပြီး ရည်မှန်းချက်အကြီးဆုံးနှင့် လှုပ်ရှားမှုအများဆုံးလူလည်း ဖြစ်၏... ပို၍အရေးကြီးသည်မှာ သူသည် အချို့သော တရားမဝင်ကိစ္စများကို ပြုလုပ်သည့် သူ့လက်အောက်ငယ်သားများကို အမြဲတစေ လျစ်လျူရှုထားသည်။

သူ့လူများက မှောင်ခိုကုန်ကူးသည့်အပြင် လူကုန်ကူးမှုများတွင်ပင် ပါဝင်သေးသည်။

သူတို့က ဝေးလံခေါင်သီသော ဂြိုဟ်များသို့ သွားပြီး ကြယ်မြို့တော် သို့မဟုတ် ဂြိုဟ်ကြီးကြီးတစ်ခုတွင် အလုပ်သမားများ ခေါ်ယူရန် လိုအပ်နေသည်ဟု ဆိုကာ ကြယ်မြို့တော်ဂြိုဟ်ကို တောင့်တသည့် နုပျိုလှပသော မိန်းကလေးများနှင့် ယောက်ျားလေးများ အုပ်စုတို့ကို လှည့်စားကြလိမ့်မည်ဖြစ်သည်။ ထို့နောက်တွင်တော့ ဤလူများ မည်သည့်နေရာသို့ ရောက်ရှိသွားသည်ကို ဘယ်သူမှ မသိကြတော့ချေ။

စကြဝဠာကြီးဟာ အလွန်ကြီးမားလှသည်။ စကြဝဠာအတွင်းတွင် ဆက်သွယ်ရန်ပင် အဆင်မပြေလေရာ အချို့သော မကောင်းမှုများကို ဖုံးကွယ်ထားခြင်းမှာ လွယ်ကူလွန်းလှ၏။

Cossack ကိုယ်တိုင်က ဤကိစ္စမျိုးကို မလုပ်ခဲ့သော်လည်း သူ့လက်အောက်ငယ်သားတချို့က လုပ်ခဲ့သည်။ သူက ငွေယူပြီး ဤလူများကို စတင်ခွင့်လွှတ်ခဲ့၏။ ရှဝေချန်၏ ရုတ်တရက် တိုက်ခိုက်မှုနှင့် “ပျောက်ကွယ်သွားမှု” တို့မှာလည်း ဤကိစ္စနှင့် ဆက်နွယ်နေသည်။

“ပျောက်ကွယ်သွားမှု” မဖြစ်မီ ရှဝေချန်သည် သူ့လူများကို ဦးဆောင်၍ မှောင်ခိုကုန်ကူးသော ယာဉ်တစ်စီးကို ဖမ်းဆီးခဲ့ပြီး လူအချို့ကို ကယ်တင်ခဲ့သည်။ သူသည် ဤကိစ္စအကြောင်းကို ကြယ်မြို့တော်သို့ ပြန်ရောက်ပြီးနောက်တွင် သတင်းပို့မည်ဖြစ်သည်။

ရလဒ်ကမူ သူသည် ကြယ်မြို့တော်သို့ ပြန်မရောက်မီ တိုက်ခိုက်ခံခဲ့ရသည်။

မှောင်ခိုကုန်ကူးယာဉ်သည် တပ်ကြီးရှစ်မှ ဗိုလ်ချုပ်တစ်ဦး၏ ပိုင်ဆိုင်မှု ဖြစ်ပြီး ယာဉ်ပေါ်တွင် ဤဗိုလ်ချုပ်လက်အောက်ရှိ စစ်သားများ ရှိနေသည်။ ဤဗိုလ်ချုပ်သည် ရှဝေချန်က တစ်ခုခုရှာတွေ့သွားမည်ကို စိုးရိမ်ပြီး ဤကိစ္စကို ရှဝေချန် မွှေမည်အား မနှစ်သက်သောကြောင့် သူသည် ရှဝေချန်ကို ကြယ်မြို့တော်ဂြိုဟ်သို့ ပြန်ခွင့်မပေးခဲ့ပေ။

သူ့ဆန္ဒအတိုင်း ရှဝေချန်ဟာလည်း ကြယ်မြို့တော်ဂြိုဟ်သို့ ပြန်မလာနိုင်တော့လုနီးပါး ဖြစ်ခဲ့ရသည်။

စစ်ဌာနချုပ်၏ အပေါ်ဆုံးထပ်ရှိ ခန်းမအလွတ်ထဲတွင်။

ယန်ကျင်းဇီက ကုလားထိုင်ပေါ်တွင် ထိုင်နေပြီး Cossack က မေ့မျောနေကာ ကျန်တပ်မှူးခုနစ်ဦးက ယန်ကျင်းဇီရှေ့တွင် တလေးတစား ရပ်နေသည်။

ယန်ကျင်းဇီသည် ကိစ္စများကို တစ်ခုချင်းစီ ပြောဆိုခဲ့သည်။

Cossack က ဤကဲ့သို့သော ကိစ္စများကို လျစ်လျူရှုထားခြင်းမှာ သူ့လက်အောက်မှ လူများကို ခေါ်ယူနိုင်ရန်အတွက် ဖြစ်ပြီး ချမ်းသာကြွယ်ဝစေရန်အတွက်လည်း ဖြစ်သည်။ တပ်ကြီးရှစ်၏ တပ်မှူးဟာ မရှိသင့်တော့ချေ။ ထို့အပြင် တပ်ကြီးရှစ်တစ်ခုလုံးကိုလည်း သန့်စင်ရမည်။ ဒီကိစ္စမှာ ပါဝင်ပတ်သက်တဲ့ လူတွေအကုန်လုံးကို ကြီးလေးတဲ့ စီရင်ချက် ချရမယ်! 

ထို့အပြင် အခြားသော တပ်ကြီးခုနစ်တပ်တို့တွင်လည်း အနည်းနှင့်အများ စနစ်တကျမရှိကြချေ။

Marshal ၏ လက်ထဲတွင် စောင့်ကြည့်ရေးအဖွဲ့အစည်းတစ်ခု ရှိသည်။ ယခင်က မူလပိုင်ရှင် နေမကောင်းဖြစ်နေစဉ်တွင် ဤအဖွဲ့အစည်းမှာ လုံးဝ အသုံးမဝင်ခဲ့ချေ။ သို့သော် ယန်ကျင်းဇီ၏ အားကောင်းသော ပြန်လည်ရောက်ရှိလာမှုဖြင့်... ရှင်းသင့်သမျှကို ရှင်းပစ်ရမည်ဖြစ်သည်။

ယန်ကျင်းဇီသည် အလျင်လိုမှုမရှိဘဲ စကားပြောနေပြီး သူ့လက်ထဲမှ အချက်အလက်များကို ရံဖန်ရံခါ ကြည့်နေသော်ငြား တပ်မှူးခုနှစ်ဦးတို့သည် ချွေးအေးများ ထွက်လျက် နားထောင်နေကြသည်။

သူတို့အားလုံး အရမ်းကြောက်နေကြ၏။

Marshal က အပြင်းအထန် ဖျား‌နာနေပြီး မကြာမီ သေဆုံးတော့မည် ဟူသော ကောလာဟလများ ထွက်ပေါ်နေခဲ့သော်လည်း ၎င်းတို့အားလုံးမှာ အတုအယောင်များသာ ဖြစ်သည်။ သူတို့ရှေ့ရှိလူက ထောင်ချောက်တစ်ခု ဆင်ပြီး ထိုသတင်းအတုကို အသုံးပြု၍ သူတို့ထဲမှ အငြိမ်မနေနိုင်သူများကို ဆွဲထုတ်ရန် ရည်ရွယ်ခဲ့ခြင်း ဖြစ်လောက်သည်။

သူတို့ အရှင် Marshal ကို တကယ် မဆန့်ကျင်ခဲ့သင့်ဘူး!

ယန်ကျင်းဇီသည် တပ်မှူးခုနစ်ဦးတို့၏ အတွေးများကို မသိပေ။

Cossack က တပ်မှူး ဆက်မဖြစ်နိုင်တော့ချေ။ တပ်ကြီးရှစ်ကို တပ်ကြီးတစ်၏ တပ်မှူးမှ ယာယီလွှဲပြောင်းရယူထားသည်။ ထို့အပြင် တပ်ကြီးသုံး‌နှင့် တပ်ကြီးလေးတို့၏ တပ်မှူးများမှာလည်း ရာထူးမှ လျှော့ချခံရသည်။ သို့ရာတွင် တပ်ကြီးများမှာ သူတို့လက်အောက်၌ လတ်တလော ရှိနေဆဲဖြစ်သည်။

ယန်ကျင်းဇီသည် အားလုံးပြီးသွားသောအခါ ဆက်ပြောလိုက်သည် : “ ဒါနဲ့ အခုကစပြီး ငါ ကြယ်မြို့တော်မှာ နေပြီး မင်းတို့ကို စောင့်ကြည့်နေမယ်။ ”

ပြောပြီးနောက် သူသည် တပ်မှူးများကို အနည်းငယ် ပြုံးပြကာ သူ့စိတ်စွမ်းအင်က ဤလူများအပေါ်တွင် ဖြတ်သန်းသွားသည်။

ဤတပ်မှူးများ၏‌ နောက်ကျောများတွင် ချွေးများ စိုရွှဲနေပြီး သူတို့သည် ငြိမ်သက်စွာ ခေါင်းငုံ့ထားကြကာ လုံးဝ ခေါင်းမမြှောက်ရဲကြပေ။

“ ဟား... ” ယန်ကျင်းဇီသည် ခစ်ခနဲ ရယ်ကာ လှည့်ထွက်သွားသည်။

ခြေလှမ်းအနည်းငယ်လှမ်းပြီးနောက် သူ ပြန်ရပ်လိုက်သည် : “ ဒါနဲ့ တပ်ကြီးရှစ်က ရှဝေချန်... မင်းတို့ သူ့ကို ယဉ်ယဉ်ကျေးကျေး ဆက်ဆံကြ။ ”

ဤသို့ပြောပြီးနောက် ယန်ကျင်းဇီက တကယ် ထွက်သွားသည်။

သူ ထွက်သွားပြီး ခဏကြာပြီးမှသာလျှင် တပ်မှူးခုနစ်ဦးတို့သည် စိတ်သက်သာရာရစွာ သက်ပြင်းချနိုင်ကြတော့သည်။ သို့သော်ငြား သူတို့သည် တိုးပွားလာသော ဖိအားကိုလည်း ထူးထူးခြားခြား ခံစားလိုက်ရသည်။

သူတို့၏ အနာဂတ်နေ့ရက်များမှာ ယခင်ကကဲ့သို့ မကောင်းမွန်လောက်တော့ချေ။

“ Cossack ကိုရော ဘာလုပ်ရမလဲ?... ” လူတစ်ယောက်က မေးသည်။

“ သူ့မိသားစုကို ဖုန်းဆက်ပြီး သူ့ကို လာခေါ်ဖို့ လူလွှတ်ခိုင်းလိုက်။ ” တပ်ကြီးတစ်၏ တပ်မှူးက ဆိုသည်။

အစောက ယန်ကျင်းဇီသည် တပ်မရှစ်၏ အရှုပ်အထွေးများကို ပြောပြခဲ့ပြီး ယခု သူတို့သည် Cossack ကို ကြည့်မိသောအခါ အနည်းငယ် စက်ဆုပ်မိကြသည်။

သူတို့လိုလူတွေက သူတို့ဟာ ဘယ်တော့မှ အမှားမလုပ်တဲ့ လူကောင်းတွေလို့ မပြောရဲပေမယ့် အဲ့လိုငွေတွေကိုတော့ ဘယ်တော့မှ မယူဘူး!

Cossack ကို ဖြေရှင်းပြီးနောက် သူတို့သည် အနည်းငယ် ပဟေဠိဖြစ်စွာ အချင်းချင်း ကြည့်လိုက်ကြသည် : “ ရှဝေချန်က ဘာဖြစ်လို့လဲ? ”

ရှဝေချန်ဟာ ပျောက်ဆုံးသွားသော တပ်မရှစ်၏ ဗိုလ်ချုပ်တစ်ဦး ဖြစ်ပြီး ယခုတလောမှသာ ပြန်ရောက်လာကြောင်း လူတိုင်း သိရှိထားသည်။

ဒီလူမှာ အံ့ဩစရာမရှိဘူး၊ ဘာကြောင့် အရှင် Marshal က သူ့ကို အထူးတလည် ထည့်ပြောသွားတာလဲ?

ဤတပ်မှူးများသည် ချက်ချင်းပင် လူလွှတ်၍ စုံစမ်းစေပြီး ဤစုံစမ်းစစ်ဆေးမှုကမူ...

ရှဝေချန်၏ အငယ်ဆုံးသားကို “Lola” မှ လက်ခံထားသည်။

“Lola” သည် Marshal အတွက်သာ ဖွဲ့စည်းထားသော အဖွဲ့ ဖြစ်သည်။ အရှင် Marshal ငွေသုံး၍ တည်ထောင်ထားသော ဆေးအဖွဲ့အစည်းသည် အခြားသူများကိုပင် ကုသပေးခြင်းမရှိချေ။ ယခု သူတို့က ရှဝေချန်၏ အငယ်ဆုံးသားကို ကု‌သပေးသည်...

“ အရှင် Marshal က ရှဝေချန်ကို အရမ်းအလေးအနက်ထားတာလား? ”

“ ဒါဘယ်လိုလုပ်ဖြစ်နိုင်မှာလဲ? ”

“ ရှဝေချန်မှာ အရမ်းကြည့်ကောင်းတဲ့ သားကြီးတစ်ယောက် ရှိတယ်... ဒါပေမယ့် သူက လက်ထပ်ပြီးပြီ။ ”

သူတို့သည် အကြောင်းအရင်းကို ယခု မစဉ်းစားနိုင်ဘဲ အဆုံးတွင် စွန့်လွှတ်လိုက်ရသည်။

သို့သော် ကိစ္စတစ်ခုကတော့ သေချာသည်။ သူတို့တပ်မတွင် တပ်သားတစ်ဦးကြောင့် ရှဝေချန်၏ စစ်ယာဉ်မှာ တိုက်ခိုက်ခံခဲ့ရပြီး တပ်သားနှစ်ထောင်ကျော် သေဆုံးခဲ့ရသည်။ ဒီကိစ္စနဲ့ပတ်သက်ပြီး စစ်ဌာနချုပ်က ရှင်းရှင်းလင်းလင်း ဖြေရှင်းရမယ်!

စစ်ဌာနချုပ်တစ်ခုလုံး အလုပ်များလျက်ရှိသည်။

ဤအချိန်တွင် စစ်ဌာနချုပ်သို့ အရှင် Marshal ဆင်းသက်လာသော သတင်းများသည် အင်တာနက်ပေါ်တွင် ပျံ့နှံ့နေပြီးဖြစ်သည်။

ရှဝေချန်သည် ဆေးရုံသို့ ‌သွားပြီး သူ့သားငယ်ကို သွားကြည့်ခဲ့သည်။ သူသည် အိမ်အပြန်လမ်းတွင် သတင်းကြားလိုက်ရသည်။ ထိုအကြောင်းကို သိရှိပြီးနောက် သူသည် သူ့သားကြီးကို ကြည့်မိလိုက်သည် : “ ဒီနေ့ Marshal က စစ်ဌာနချုပ်ကို ရောက်လာတယ်။ ”

“ တကယ်လား? ” ရှဇီရှိူ့ အနည်းငယ် စိတ်လှုပ်ရှားသွားသည် : “ အဖေ၊ Marshal က တကယ် ရှိတာလား? Marshal ကို အဖေ တွေ့ဖူးလား? သူက ဘယ်လိုပုံစံရှိလဲ? ”

ရှဇီရှိူ့သည် စစ်တပ်ထဲသို့ အမြဲဝင်ချင်နေခဲ့ပြီး လျှို့ဝှက်ဆန်းကြယ်သော Marshal ကို အလွန်သိချင်မိသည်။

ရှဝေချန်သည် သူ့သားကို ခဏစိုက်ကြည့်ပြီးမှ‌ ပြောလိုက်သည် : “ အရှင် Marshal က အရမ်းအစွမ်းထက်ပြီး ချောမောတယ်... ယန်ကျင်းဇီထက် အများကြီး ပိုချောတယ်။ ” 

သူ့အဖေက ယန်ကျင်းဇီကို အမြင်မကြည်ဘူးလား? ရှဇီရှိူ့က ဆိုသည် : “ အဖေ၊ ယန်ကျင်းဇီကို သူများတွေနဲ့ မနှိုင်းယှဉ်ပါနဲ့။ သူက တကယ် ကောင်းတယ်... သူက ကမ္ဘာပေါ်မှာ အချောဆုံးလို့ ကျွန်တော် ထင်တယ်! ”

ရှဝေချန် : “ သူ့အကြိုက်က... ”

ရှဇီရှိူ့ : “ အဖေ၊ ကျွန်တော် သူ့ကို အဲ့လိုပဲကြိုက်တယ်! ”

ရှဝေချန် : “ ... ” မဟုတ်တာ၊ သူ့သားရဲ့အကြိုက်က အရမ်းထူးဆန်းနေတာလား?

သူ့သားက အမြဲတမ်း ပိုးပန်းခံရပေမယ့် ဘယ်သူ့ကိုမှ မကြိုက်ခဲ့တာက သူ့သားမှာ အလှအပဆိုင်ရာ ပြဿနာတွေ ရှိနေလို့များလား?

အရှင် Marshal အဲ့လိုဝတ်စားတာက သူ့သားရဲ့အကြိုက်တွေအတိုင်း လိုက်ဝတ်ပေးချင်တာကြောင့်လား?

ရှဝေချန်နှင့် အခြားသူများ အိမ်ပြန်ရောက်သောအခါ ယန်ကျင်းဇီသည် အိမ်ပြန်ရောက်နေပြီးဖြစ်ကာ Allen ဆိုလျှင် အဆာပြေမုန့်ကိုပင် ပြင်ဆင်ထားသည်။

“ ‌အဖေ၊ အမေ၊ ဆေးရုံက ပြန်လာပြီးတော့ ဗိုက်ဆာနေကြပြီမလား? ကျွန်တော် Allen ကို စားစရာအချို့ ပြင်ခိုင်းထားတယ်။ ” ယန်ကျင်းဇီသည် ပြုံးလိုက်ပြီး သူ့စိတ်စွမ်းအင်ကို ရှဇီရှိူ့ထံသို့ ရွှေ့လိုက်သည်။

ရှဇီရှိူ့က သူ့ကို မျက်စောင်းထိုးသည်။ သူ့မိဘတွေ ရှိနေတုန်းပဲ!

ယန်ကျင်းဇီတွင် အပြစ်ကင်းစင်မှုများ ပြည့်နေသည် – ရှဇီရှိူ့ရဲ့မိဘတွေကလည်း သူတို့စိတ်စွမ်းအင်တွေကို ရစ်ပတ်ထားကြတာပဲလေ!

ရှဇီရှိူ့သည် အနည်းငယ် ရှက်နေသော်ငြား ယန်ကျင်းဇီ၏စိတ်စွမ်းအင်က သူ့ပတ်ဝန်းကျင်တွင် ခုန်ပေါက်နေသည်... နောက်ဆုံးတွင် သူသည် မနေနိုင်တော့ပဲ သူ့စိတ်စွမ်းအင်ကို ထုတ်ကာ သူ့စိတ်စွမ်းအင်တန်းများနှင့် ယန်ကျင်းဇီကို ဂရုတစိုက် ချိတ်ဆက်လိုက်သည်။

ထို့နောက် သူသည် ယန်ကျင်းဇီ၏ ပြည့်လျှံနေသော ချစ်ခြင်းမေတ္တာများဖြင့် ဝန်းရံခံလိုက်ရသည်။

ဤခံစားချက်မှာ အလွန်ကောင်းမွန်ပြီး ရှဇီရှိူ့သည် အနည်းငယ် မူးဝေသွားကာ ယန်ကျင်းဇီကို ကြည့်နေသော သူ့အကြည့်များမှာလည်း တောက်ပသထက် တောက်ပလာသည်။

ရှဝေချန်နှင့် ရှအမျိုးသမီး : “ ... ” သူတို့သည် သူတို့သားနှစ်ဦး၏ရှေ့တွင် ချစ်ခင်ကြင်နာပြလေ့ရှိခဲ့သော်လည်း တစ်နေ့တွင် သူတို့သားက သူတို့ရှေ့၌ ချစ်ခင်ကြင်နာပြလိမ့်မည်ဟုတော့ သူတို့ မမျှော်လင့်ထားခဲ့ပေ။

ရှအမျိုးသမီးသည် အတူတကွ ပူးကပ်နေချင်ကြသော ယန်ကျင်းဇီနှင့် ရှဇီရှိူ့တို့ကို တစ်ချက်ကြည့်လိုက်ပြီးနောက် ခင်ပွန်းဖြစ်သူကို ကြည့်လိုက်သည်။ သို့သော် သူ(မ)၏ခင်ပွန်းက ဤအခြေအနေကို မျက်ကွယ်ပြုထားသည်ကိုသာ သူ(မ) တွေ့လိုက်ရသည်...

ရှအမျိုးသမီးသည် ခင်ပွန်းဖြစ်သူကို စိတ်စွမ်းအင်နှင့် လှမ်းဆွဲပြီး သူ(မ)၏သားကို ကြည့်လိုက်သည် : “ ဇီရှိူ့၊ မင်းတို့ရဲ့ဆက်ဆံရေးက ကောင်းမွန်တယ် ဆိုတာကို အမေ သိပါတယ်။ ဒါပေမယ့် ဒါက တကယ်ပဲ အရမ်းမြန်လွန်းတယ်... အမေ မင်းနဲ့ စကားပြောချင်တယ်။ ”

ရှအမျိုးသမီးသည် ရှဇီရှိူ့ကို ခေါ်သွားကာ ရှဝေချန်နှင့် ယန်ကျင်းဇီတို့ကို ထားခဲ့သည်။ သူ(မ) ထွက်သွားသောအခါ သူ(မ)၏စိတ်စွမ်းအင်က ရှဝေချန်၏စိတ်စွမ်းအင်ကို နှစ်ကြိမ်တိုင်တိုင် အသာပုတ်သွားသေးသည်။  

ဇနီးဖြစ်သူက သူ့ကို ယန်ကျင်းဇီ၏ အတိမ်အနက်အား ရှာဖွေစေချင်ကြောင်း ရှဝေချန် သိရှိသည်။ သို့သော်ငြား... 

သူ့ဇနီးနှင့်သား ထွက်သွားသောအခါ ရှဝေချန်သည် ယန်ကျင်းဇီကို ကြည့်လိုက်သည် : “ အရှင် Marshal? ”

“ အဖေ၊ ကျွန်တော့်ကို ကျင်းဇီလို့ပဲ ခေါ်လို့ရတယ်။ ” ယန်ကျင်းဇီက ရှဝေချန်ကို ပြုံးပြ၏။

ရှဝေချန် : “ ... ”

“ အဖေ၊ ကျွန်တော်က ဇီရှိူ့အပေါ် ရိုးသားပါတယ်။ သူက ကျွန်တော့်ရဲ့ဘဝကို အတူဖြတ်သန်းဖို့ ရွေးချယ်ထားတဲ့ ကျွန်တော့်ချစ်သူပါ။ အခုအချိန်ကစပြီး ကျွန်တော်က ဇီရှိူ့ရဲ့အပိုင်ပါပဲ။ ” ယန်ကျင်းဇီက ထပ်ပြောသည်။ သူသည် စကားပြောနေစဉ် လေးထောင့်ဘူးနှစ်ဘူးကို ထုတ်ယူလိုက်သည် : “ အဖေ၊ ဒါက အဖေနဲ့အမေတို့အတွက် ကျွန်တော့်ရဲ့ တွေ့ဆုံခြင်းလက်ဆောင်ပါ။ ”

ရှဝေချန်သည် တွေ့ဆုံခြင်းလက်ဆောင်နှစ်ခုကို မထိသော်လည်း ယန်ကျင်းဇီသည် ၎င်းကို ဖွင့်လိုက်၏။

လေးထောင့်ဘူးများမှ တစ်ဘူးတွင် ပိုင်ဆိုင်မှုအထောက်အထားတစ်ခု ပါရှိသည်။ 

အိမ်ဝယ်သည်ဖြစ်စေ၊ မြေဝယ်သည်ဖြစ်စေ၊ ပိုင်ဆိုင်မှုအထောက်အထား ရှိလိမ့်မည်ဖြစ်သည်။ သို့သော် ဤပိုင်ဆိုင်မှုအထောက်အထားသည် ဂြိုဟ်ပိုင်ဆိုင်မှုအထောက်အထား ဖြစ်သည်။

ရှဝေချန်သည် ထိုကဲ့သို့သော ပစ္စည်းများ ရှိကြောင်း သိရှိသော်လည်း ၎င်းကို မြင်ဖူးသည်မှာ ပထမဆုံးအကြိမ် ဖြစ်သည်။

နောက်တစ်ဘူးတွင်မူ ကောင်းမွန်သော ရနံ့ ထုတ်လွှတ်နေသည့် ဆေးနှစ်လုံး ပါရှိ၏။ ရှဝေချန်၏စိတ်စွမ်းအင်သည် ၎င်းကို မရစ်ပတ်ဘဲ မနေနိုင်ချေ။

ရှဝေချန် လေအေးရှိုက်သွင်းမိသည်။ သူ အထင်မမှားလျှင် ဤဆေးလုံးမှာ “Lola” ဆေးအဖွဲ့ကသာ ထုတ်လုပ်နိုင်သည့် ဒဏ္ဍာရီလာ “လန်းဆန်းဆေးလုံး” ဖြစ်သည်။ 

ထိုကဲ့သို့သော သာမန်နာမည်မှာ ကောင်းမွန်သော အရာ မဟုတ်ဟု မထင်လိုက်နှင့်။ အဘယ့်ကြောင့်ဆိုသော် ဤလန်းဆန်းဆေးလုံးကို ဈေးကြီးသော ဆေးဖက်ဝင်ပစ္စည်းမျိုးစုံဖြင့် ပြုလုပ်ထားပြီး လူ့စိတ်စွမ်းအင်ကို မြှင့်တင်ပေးနိုင်သောကြောင့် ဖြစ်သည်။

ယေဘူယျအားဖြင့် ပြောရလျှင် စိတ်စွမ်းအင် အဆင့်တစ်ခု၏ အထွတ်အထိပ်တွင် ရောက်ရှိနေသော်လည်း အဆင့်မကျော်ဖြတ်နိုင်သူများသည် ဤလန်းဆန်းဆေးလုံးကို သောက်ပြီးနောက် သေချာပေါက် အဆင့်ကျော်ဖြတ်နိုင်မည်ဖြစ်၏။

ရှဝေချန်၏ လက်ရှိစိတ်စွမ်းအင်အဆင့်မှာ A+ ဖြစ်ပြီး ရှအမျိုးသမီး၏ စိတ်စွမ်းအင်အဆင့်မှာ B+ ဖြစ်သည်။ အကယ်၍ သူတို့သာ လန်းဆန်းဆေးလုံးများကို သောက်လိုက်မည်ဆိုလျှင် သူတို့ အဆင့်တိုးမြှင့်နိုင်ချေမှာ အတော်လေး မြင့်မားသည်။

ဤတွေ့ဆုံခြင်းလက်ဆောင်နှစ်မျိုးမှာ တကယ်ပင် သာမန်ထက်လွန်ကဲစွာ တန်ဖိုးကြီးလှသည်။

ရှဝေချန်သည် သူ့ဆင်းရဲမှုကို နက်နက်ရှိုင်းရှိုင်း ခံစားလိုက်ရသည်။

သူ့သားက သန်မာသော စစ်သည်တော်တစ်ဦးနှင့် လက်ထပ်လိမ့်မည်ဟု သူသည် ယခင်ကတည်းက ပြင်ဆင်ထားပြီးဖြစ်သည်။ သူတို့မိသားစုက သားဖြစ်သူ၏ လက်တွဲဖော်မိသားစုလောက် မကောင်းမွန်လျှင်ပင် သူ့သားတွင် ပိုပြီးယုံကြည်မှုရှိစေရန်အတွက် သူက သူ့သားကို တစ်ခုခုပေးမည်ဟူ၍ သူ တွေးထားခဲ့သည်။ ယခုမူကား...

“ ဇီရှိူ့က B+, သူ ဒါကို စားရင်... ”

“ အဖေ၊ ဇီရှိူ့က A+ ဖြစ်နေပြီ။ ” ယန်ကျင်းဇီ ပြုံးလိုက်သည် : “ ကျွန်တော့်စိတ်စွမ်းအင်အဆင့်က SSS ထက် ကျော်တယ်။ ဇီရှိူ့က ကျွန်တော်နဲ့ နှောင်ကြိုးသွယ်ထားပြီး အနာဂတ်မှာ သူ့စိတ်စွမ်းအင်အဆင့်က တိုးလာလိမ့်မယ်။ ”

သူနှင့် ရှဇီရှိူ့၏ စိတ်စွမ်းအင်များသည် တစ်ကိုယ်တည်း ဖြစ်နေသကဲ့သို့ ဖြစ်သောကြောင့် သူနှင့်အတူရှိလျှင် ရှဇီရှိူ့၏စိတ်စွမ်းအင်များကို သေချာပေါက် တိုးမြှင့်နိုင်လိမ့်မည်ပင်။

အဆင့် SSS ထက်တောင်လား? ဒါ တကယ်ပဲ အစွမ်းထက်လွန်းတယ်!

ရှဝေချန်လျှင်ပင် ဒူးထောက်ပြီး ကိုးကွယ်ချင်သွားရာ ဆက်ပြောစရာ စကားများ မရှိတော့ချေ။

ဤအချိန်တွင် ရှဇီရှိူ့သည် အပေါ်ထပ်မှ ဆင်းလာသည်။

ယန်ကျင်းဇီသည် ဘူးနှစ်ဘူးကို အမြန်ပိတ်လိုက်သည်။

ရှဇီရှိူ့ ရောက်လာသောအခါတွင် သူသည် ယန်ကျင်းဇီနှင့် သူ့ဖခင်တို့နှစ်ဦးစလုံးက မျက်နှာချင်းဆိုင် ဖြောင့်မတ်စွာ ထိုင်နေကြသည်ကို တွေ့လိုက်ရသည်။

“ ဇီရှိူ့၊ မင်း ဘာလို့ ဆင်းလာတာလဲ? ” ယန်ကျင်းဇီက မေးသည်။

ရှဇီရှိူ့ : “ ငါ့အခန်း ဘယ်မှာလဲ မင်း မသိမှာစိုးလို့။ ”

ရှဇီရှိူ့၏စကားကို ယန်ကျင်းဇီ ကြားလိုက်ရသောအခါ သူ့ခေါင်းက ပူတက်လာပြီး သူ့စိတ်စွမ်းအင်လည်း ပေါက်ကွဲသွားသည် – ဒါဆို သူ ရှဇီရှိူ့နဲ့ တစ်ခန်းတည်း နေနိုင်တာလား?!

ရှဝေချန် : “ ... ... ” သား၊ စိတ်လျှော့!

ရှဇီရှိူ့သည် အမှန်တကယ်ပင် အတော်လေး စိတ်ငြိမ်သက်နေသည်။ သူသည် ယန်ကျင်းဇီကို သူ့အခန်းထဲသို့ ခေါ်သွားပြီး သူတို့နှစ်ယောက် အတူလှဲကြကာ အချင်းချင်း ပွေ့ဖက်လျက် စောင်အောက်တွင် စကားစမြည် ပြောနေကြသည်။

ဤသို့ဖြစ်ရခြင်း၏ အဓိကအကြောင်းအရင်းမှာ... စိတ်စွမ်းအင်များ ရောထွေးနေပြီး တစ်ဦးနှင့်တစ်ဦး စကားစမြည် ပြောရသော ခံစားချက်က အလွန်ကောင်းသည်။ သူတို့နှစ်ဦးဟာ တခြားကိစ္စများ လုပ်ရန် ခဏမေ့သွားကြသည်။

သေချာတာပေါ့၊ နောက်ထပ်အကြောင်းအရင်း ရှိသေးတယ်... သူတို့ စကားပြောတာ အဲ့လောက်မကြာသေးမှန်း သိသာပေမယ့် ရုတ်တရက်ကြီး ကောင်းကင်က တောက်ပသွားတယ်!

ပြီးတော့ မိုးလင်းတာနဲ့ ရှအိမ်က တံခါးဝကို ထပ်ရောက်လာကြပြန်တယ်!

ယန်ကျင်းဇီ၏စိတ်စွမ်းအင်က သန်မာလွန်းရာ အိမ်အောက်ထပ်မှ အခြေ‌အနေကို ရှင်းလင်းစွာ ကြားသိနိုင်နေသည်... သူက ရှဇီရှိူ့ကို နမ်းလိုက်သည် : “ ကိုယ်တို့ အောက်ဆင်းပြီး သွားကြည့်ကြမလား? ”

ရှဇီရှိူ့က ခေါင်းညိတ်သည်။ သူသည် သူ့မိခင် ခံစားရမည်ကို ကြောက်မိပြီး အောက်ထပ်သို့ ဆင်းကာ သွားကြည့်ချင်သည်။

သို့သော် အောက်ထပ်သို့ သူ ရောက်ချိန်တွင် ရှဇီရှိူ့သည် သူ အတွေးလွန်သွားမှန်း သိလိုက်ရသည်။ သူ့ဖခင် ရှိနေလျှင် သူ့မိခင်က ဘယ်တော့မှ ထိခိုက်နစ်နာရမည်မဟုတ်ချေ။

ထို့ကြောင့် ရှအမျိုးသမီးက သူ(မ)၏သားနှင့် ယန်ကျင်းဇီတို့ကို တွေ့သောအခါတွင် ပြောလာသည် : “ ဇီရှိူ့၊ ကျင်းဇီက ကြယ်မြို့တော်သို့ အခုမှ ရောက်လာတာ။ သူနဲ့ အပြင်ထွက်ပြီး အဝတ်အစားတွေ ဝယ်လာခဲ့လေ။ ”

ဤသို့ပြောပြီးနောက် ရှအမျိုးသမီးသည် ယန်ကျင်းဇီ၏ ယမန်နေ့က ရောက်လာချိန်တွင် ဝတ်ထားသော အဝတ်အစားများကို လှမ်းကြည့်လိုက်သည်။

ဒီပုံစံက တကယ်... ကြည့်မကောင်းဘူး!

မနေ့က ရှအမျိုးသမီးသည် ခင်ပွန်းဖြစ်သူကို ယန်ကျင်းဇီနှင့် စကားပြောစေခဲ့သည်။ နောက်ပိုင်းတွင် သူ(မ)၏ခင်ပွန်းသည် ယန်ကျင်းဇီက အဆင်ပြေသည်ဟု ပြောလာခဲ့သည်။ သူ(မ) စိတ်သက်သာရာရသွားသော်ငြား ခင်ပွန်းဖြစ်သူက ထူးဆန်းနေသည်ဟု ထင်နေမိသည် – ယောက်ျားဖြစ်သူရဲ့ ခံစားချက်တွေက ခဏလောက် ပျော်သွားလိုက်၊ ခဏလောက် စိတ်ညစ်သွားလိုက်နဲ့ အမြဲပြောင်းနေတယ်!

သို့သော်လည်း ထိုခံစားချက်များမှာ သူ(မ)ကို မရည်ရွယ်သည့်အပြင် သူ(မ)၏ခင်ပွန်းက သေခြင်းမှ လွတ်မြောက်လာခါစ ဖြစ်သဖြင့် သူ(မ) သိပ်မတွေးတော့ပေ။

ရှမိခင်က ထိုသို့ပြောသောအခါ ယန်ကျင်းဇီသည် ရှဇီရှိူ့ကို ရှအိမ်မှ အဝေးခေါ်လာပြီး ကြယ်မြို့တော်၏ စီးပွားရေးစင်တာသို့ ရောက်လာကြသည်။

လမ်းတွင် ရှဇီရှိူ့က ယန်ကျင်းဇီကို မေးသည် : “ ကျင်းဇီ၊ မင်း ဘယ်လိုအဝတ်အစားမျိုးကို ကြိုက်လဲ? ”

“ မင်း ကြိုက်တာမှန်သမျှ ကိုယ် ကြိုက်တယ်! ” ယန်ကျင်းဇီက ပြန်ဖြေသည်။ ရှဇီရှိူ့ သဘောကျသရွေ့ သူ ဘာဝတ်ဝတ် အရေးမကြီးဘူး!

ရှဇီရှိူ့သည် ယန်ကျင်းဇီ၏ခံစားချက်များကို ခံစားမိပြီး ပို၍ စိတ်အေးလက်အေးဖြစ်လာသည်။

ယန်ကျင်းဇီက ဒီစတိုင်ကို အရမ်းမကြိုက်‌မှတော့ သူ သူ့ပုံစံကို ပြောင်းလို့ရတယ်...

ကြယ်မြို့တော်၏ စီးပွားရေးစင်တာသည် အလွန်ချမ်းသာပြီး အလွန်ကြီးမားသည်။

ယန်ကျင်းဇီနှင့် ရှဇီရှိူ့တို့သည် ကားပျံပေါ်မှ ဆင်းပြီး အဝတ်အစားများ ဝယ်ရမည့် နေရာကို စဉ်းစားနေကြသည်။ သူတို့သည် ရှဇီရှိူ့၏ အသိတစ်ဦးနှင့် ဆုံရလိမ့်မည်ဟု မမျှော်လင့်ထားကြပေ။

၎င်းမှာ ရှဇီရှိူ့ကို ယခင်က ပိုးပန်းခဲ့ဖူးသူ၊ ငယ်ရွယ်သော အဆင့် A စစ်သည်တော်တစ်ဦးနှင့် ရှဇီရှိူ့နှင့် အလွန်မတည့်သော အမျိုးသား အကူဆရာတစ်ဦးတို့ ဖြစ်သည်။ သူတို့နှစ်ဦးက လက်တွဲထားကြပြီး တွဲနေကြခြင်း ဖြစ်လောက်သည်။ 

ရှဇီရှိူ့နှင့် ယန်ကျင်းဇီတို့ ရင်းနှီးချစ်ခင်သော အသွင်အပြင်ကို မြင်သော် စစ်သည်တော်က အံ့အားသင့်သွားပြီး အကူဆရာက သတိရှိလာကာ သူ့စစ်

သည်တော်ရှေ့တွင် မတ်တပ်ရပ်လျက် ဆိုသည် : “ ရှဇီရှိူ့၊ မတွေ့တာ ကြာပြီ အာ... မင်း အခု ရွှေသခင် မရှာနိုင်တော့ဘူးလား? အံ့ဩစရာပဲ၊ မင်း ဒီလိုလူနဲ့ အတူရှိနေတယ်။ ”