အပိုင်း ၁၆၄ ( Mine Owner 13 )

ယန်ကျင်းဇီသည် ရှဇီရှိူ့၏ အချက်အလက်များကို ဖတ်ရှုပြီးဖြစ်ကာ ဖုဖေးကြောင့် လူအများအပြားက ရှဇီရှိူ့ကို ပစ်မှတ်ထားခဲ့ကြကြောင်း သိရှိခဲ့သည်။ ဒါပေမယ့် သူတို့ ဈေးဝယ်ထွက်တုန်း လူတွေက ရန်လာစလိမ့်မယ်လို့ သူ မထင်ထားဘူး!

ယန်ကျင်းဇီသည် ချက်ချင်း ‌ဒေါသပေါက်ကွဲသွားပြီး သူ့စိတ်စွမ်းအင်ကို ထုတ်လိုက်သည်...

သို့သော် သူ့စိတ်စွမ်းအင်များ ထွက်လာသည်နှင့်တပြိုင်နက် သူသည် ရှဇီရှိူ့စိတ်စွမ်းအင်၏ ဖမ်းဆီးခြင်းကို ခံလိုက်ရသည်။

ယန်ကျင်းဇီ၏စိတ်စွမ်းအင်ကို ထိန်းထားလျက်ဖြင့် ရှဇီရှိူ့သည် မျက်နှာချင်းဆိုင်ရှိလူကို မထီမဲ့မြင် ကြည့်လိုက်သည် : “ ရွှေသခင် ရှာရတာကို မင်း သဘောကျတာ ဘာမှမဖြစ်ပေမယ့် သူများတွေကို မင်းလို ရွံစရာလို့ မတွေးစမ်းပါနဲ့။ ” 

သူ့ရှေ့မှ အကူဆရာ၏ ဖခင်ကလည်း အထက်တန်းလွှာတစ်ဦး ဖြစ်ပြီး စစ်သည်တော်၏ဖခင်မှာ ဒုတိယဗိုလ်ချုပ်ကြီး ဖြစ်သည်။ သူတို့နှစ်ယောက်စလုံးက အဆင့်အတန်း မနိမ့်ကြဘဲ ရန်သွားစရန် မလွယ်ကူချေ။ ယန်ကျင်းဇီက သူတို့ကို စိတ်ဆိုးစေမည်အား ရှဇီရှိူ့ စိုးရိမ်မိပြီး ဤအချိန်တွင် သူသည် သူ့စိတ်စွမ်းအင်ကို အသုံးပြု၍ ယန်ကျင်းဇီကို နှစ်သိမ့်ပေးနေသည်။

သို့ရာတွင် သူကိုယ်တိုင်ကမူ အလွန်ရိုင်းစိုင်းသော ပုံစံဖြင့် စကားပြောခဲ့သည်။

“ဒီလိုလူမျိုး” ဆိုတာ ဘာစကားလဲ? ယန်ကျင်းဇီက အရမ်းကောင်းတယ်!

ပြီးတော့ ဒီလူက သူ့ကို ရွှေသခင် ရှာနေတယ်လို့ ယန်ကျင်းဇီရှေ့မှာ တကယ်ကြီး အသရေလာဖျက်တယ်! အရမ်းမုန်းဖို့ကောင်းတယ်!

ယန်ကျင်းဇီသည် ရှဇီရှိူ့၏ဒေါသကို ခံစားမိပြီး ရှဇီရှိူ့ကို ချက်ချင်းပင် ပြန်နှစ်သိမ့်ပေးသည်။ သူတို့နှစ်ဦး၏ စိတ်စွမ်းအင်များမှာ နောက်တစ်ကြိမ် အတူရောထွေးသွားကြပြန်သည်။

မူလက ရှဇီရှိူ့သည် ခွဲခွာရန် ခက်ခဲလွန်းသော သူတို့၏ စိတ်စွမ်းအင်များကြောင့် ရှက်ရွံ့မိသဖြင့် ကားပေါ်မှ မဆင်းမီ သူတို့၏စိတ်စွမ်းအင်များကို ပြန်သိမ်းထားခဲ့ကြသည်။ ယခုမူ... ထပ်ပေါ်လာပြန်ပြီ!

ယန်ကျင်းဇီနှင့်ရှဇီရှိူ့တို့ရှေ့ရှိ လူနှစ်ယောက်စလုံး ထိတ်လန့်သွားကြသည်။ အကူဆရာက ရှဇီရှိူ့ကို အံ့ဩတကြီး ကြည့်သည် : “ မင်း သူနဲ့ နှောင်ကြိုးဖွဲ့လိုက်တာလား? ”

“ မင်း မခံစားရဘူးလား? ” ရှဇီရှိူ့က ပြန်မေးသည်။

“ မင်း... ” ဤအကူဆရာခမျာ ဆွံ့အသွားရှာသည်။ ရှဇီရှိူ့ဟာ ယခုနှစ်တွင် ရူးရူးနှမ်းနှမ်း ကိစ္စအချို့ကို ပြုလုပ်ခဲ့သော်ငြား ထိုသို့ဆိုလျှင်ပင် ရှဇီရှိူ့က အထက်တန်းလွှာ အဆင့်အတန်း ရှိသည့် အတော်ဆုံး အကူဆရာတစ်ဦး ဖြစ်နေဆဲဖြစ်သည်။ ဘယ်လိုလုပ် သူက သာမန်စစ်သည်တော်တစ်ယောက်နဲ့ ရုတ်တရက် နှောင်ကြိုးဖွဲ့နိုင်ရတာလဲ?

သူသည် ကြယ်မြို့တော်ရှိ ထူးချွန်သော စစ်သည်တော်များ အားလုံးကို သိရှိပြီး သူ့ရှေ့ရှိ ဤလူက သူတို့ထဲမှ မဟုတ်ချေ။

ထို့အပြင် ဤလူ ဝတ်ဆင်ထားပုံကို ကြည့်လိုက်လျှင်လည်း... ဤလူ၏အဝတ်အစားများမှာ သာမန်လူများ၏အမြင်ထဲတွင်မူ ဇိမ်ခံပစ္စည်းများ ဖြစ်ကြသည်။ ဒါပေမယ့် ဒီအဝတ်အစားတံဆိပ်က ကြော်ငြာအားကိုးပြီး ဂြိုဟ်စွန်ဂြိုဟ်ဖျားက လူတွေကို လှည့်စားနေတာလေ!

ကြယ်မြို့တော်ရှိ အထက်တန်းလွှာများ၏ အမြင်ထဲတွင်မူ နောက်ခံမရှိသော ဤအမှတ်တံဆိပ်မျိုးကို တောသူဌေးများကသာ ဝတ်ဆင်ကြခြင်း ဖြစ်သည်။ သူတို့သည် ဤအမှတ်တံဆိပ်ကို ဝတ်ဆင်ရမည့်အစား ဇိမ်ခံအမျိုးအစားကို မဝတ်ဆင်ပဲနှင့်သာ နေလိုက်ကြမည်ဖြစ်၏။

ဒီလူရဲ့ တွဲဖက်ဝတ်တဲ့ စတိုင်ပုံစံက အရမ်းရှုပ်ထွေးနေတာကိုတောင် ထည့်မပြောရသေးဘူး!

ဒါ့အပြင် ဒီလူရဲ့အသားအရေလည်း ရှိသေးတယ်!

လူတိုင်းတွင် မတူညီသော အကြိုက်နှစ်သက်မှုများ ရှိကြပြီး ကြယ်မြို့တော်တွင်လည်း ပိုမိုညိုမည်းသော အသားအရေကို နှစ်သက်သူများ ရှိကြသည်။ ဒါပေမယ့် ဘယ်သူ့မျက်နှာကမှ တစ်ခါမှ ဂရုမစိုက်ထားသလိုမျိုး ဒီလောက်ကြီး ကြမ်းထော်မနေကြဘူး!

ဒါဆိုရင် ရှဇီရှိူ့က တခြားဂြိုဟ်က တောသူဌေးနဲ့ နှောင်ကြိုးဖွဲ့လိုက်တာလား?

“ ရှဇီရှိူ့! ” စစ်သည်တော်ကလည်း ရှဇီရှိူ့ကို တအံ့တဩ ကြည့်သည်။ သူသည် ရှဇီရှိူ့ကို တစ်ချိန်က နှစ်သက်ခဲ့ဖူးသည်။ သို့သော် ရှဇီရှိူ့က သူနှင့် မနှိုင်းယှဉ်နိုင်သော လူနှင့် နှောင်ကြိုးဖွဲ့ထားသည်ကို ယခု တွေ့လိုက်ရသောအခါ သူသည် အမှန်တကယ် စိတ်ရှုပ်ထွေးသွားရသည်။

သို့သော်လည်း ရှဇီရှိူ့သည် သူတို့ကို လုံးဝ ဂရုမစိုက်ဘဲ ယန်ကျင်းဇီကို ခေါ်၍ ထွက်သွားခဲ့ပြီးဖြစ်သည်။

သူ ဒီလူနှစ်ယောက်အတွက်နဲ့ အချိန်မဖြုန်းသင့်ဘူး!

ထို့အပြင်... စိတ်စွမ်းအင်ကို ထုတ်ပြီးပြီဖြစ်ရာ သူသည် ၎င်းကို ပြန်သိမ်းမည်မဟုတ်ပေ။

ရှဇီရှိူ့ ရှက်သွေးဖြာသွားသည်။ သူနှင့် ယန်ကျင်းဇီတို့သည် လက်တွဲထားကြပြီး စိတ်စွမ်းအင်များ ရောထွေးလျက်ဖြင့် ဈေးဝယ်ထွက်ကြသည်။

သူတို့နောက်တွင် အကူဆရာသည် ရှဇီရှိူ့နှင့်ယန်ကျင်းဇီတို့ကို ဓာတ်ပုံအမြန်ရိုက်ပြီး ကျောင်းဖိုရမ်သို့ ပို့လိုက်သည် : “ရှဇီရှိူ့က လူတစ်ယောက်နဲ့ နှောင်ကြိုးဖွဲ့လိုက်ပြီ!”

ဤဓာတ်ပုံနှင့် ဤစာကြောင်းတို့သည် မရေမတွက်နိုင်သော လူများ၏ အာရုံကို ချက်ချင်း ဆွဲဆောင်ခဲ့သည် : “ဘာ? ရှဇီရှိူ့က လူတစ်ယောက်နဲ့ နှောင်ကြိုးဖွဲ့လိုက်တယ်လား?”

“ဒါဘယ်သူလဲ?”

“ရှဇီရှိူ့က ရုတ်တရက်ကြီး လူတစ်ယောက်နဲ့ ဘယ်လိုနှောင်ကြိုးသွယ်လိုက်တာလဲ?”

…

ဤလူများ မေးမြန်းသောအခါ ဤအကူဆရာသည် သူတို့ကို သူ၏ ရှဇီရှိူ့နှင့် မမျှော်လင့်ဘဲ တွေ့ဆုံပုံအား ပြောပြခဲ့ပြီး သူသည် ၎င်းကို ပြောပြနေစဉ် နှစ်ထောင်းအားရဖြစ်နေခဲ့သည်။ 

သူ့စကားကို နားထောင်ပြီးနောက် လူတစ်ဦးက ဆိုသည် : “ငါ ရှချီချီ ပြောတာ ကြားဖူးတယ်၊ သူ(မ) ဒုတိယအခေါက် စိတ်စွမ်းအင်မနိုးကြားခင်တုန်းက သူ(မ)ဆီမှာ အဝေးက ကြယ်စင်စုမှာ နေတဲ့ မိုင်းပိုင်ရှင်တစ်ယောက်နဲ့ လက်ထပ်စာချုပ် ရှိခဲ့တယ်... အခု သူ(မ)က ဒုတိယအခေါက် စိတ်စွမ်းအင်နိုးကြားပြီးတော့ ပြန်ဖျက်ချင်တယ်။ ဒါပေမယ့် ရှဇီရှိူ့က ငွေပြတ်နေလို့ လက်ထပ်စာချုပ်ကို လိုချင်တယ်တဲ့။”

“ဒါဆို ရှဇီရှိူ့ရဲ့ ဒီလက်တွဲဖော်က အစွန်အဖျားကြယ်စင်စုက မိုင်းပိုင်ရှင်တစ်ယောက်လား?”

“ရှချီချီရဲ့ လက်ထပ်စာချုပ်အဟောင်း... ဒါ...”

“ရှဇီရှိူ့က ပိုက်ဆံကြောင့် သူနဲ့ အတူနေနေတာ ငါ နားလည်တယ်။ အချို့အစွန်အဖျားကြယ်စင်စုတွေရဲ့ မိုင်းပိုင်ရှင်တွေက တော်တော်လေး ချမ်းသာတယ်။ ဒါပေမယ့် ဘာကြောင့် သူတို့က နှောင်ကြိုးဖွဲ့ကြတာလဲ?”

…

ရှဇီရှိူ့၏ကျောင်းမှ လူများဟာ ရှဇီရှိူ့နှင့်ပတ်သက်ပြီး အမှန်တကယ်ပင် အလွန်တုံ့ပြန်တတ်ကြသည်။

စစ်သည်တော်များစွာက ရှဇီရှိူ့ကို သဘောကျကြပြီး အကူဆရာများစွာက ရှဇီရှိူ့ကို မနာလိုဖြစ်ကြသည်။

ယခင်က ရှဇီရှိူ့၌ နာမည်ဆိုး ရှိခဲ့ချိန်တွင် ရှဇီရှိူ့ကို ကြိုက်ခဲ့သော စစ်သည်တော်အချို့သည် ရှဇီရှိူ့ကို ကြိုက်မိသည်အား ရှက်ကာ ဖိုရမ်တွင် ရှဇီရှိူ့ကို အသရေဖျက်စကားများ ပြောဆိုခဲ့ကြပြီး အကူဆရာအချို့က ၎င်းကို မီးလောင်ရာ လေပင့်ပေးခဲ့ကြသည်... ရှဇီရှိူ့သည် ကျောင်းဖိုရမ်ကို ဘယ်တော့မှ ထပ်မ‌ဖတ်တော့ပေ။

ယခု ဤကိစ္စ ထွက်လာသောအခါ...

သူတို့သည် ရှဇီရှိူ့ကို သိကြပြီး ရှချီချီကိုလည်း သေချာပေါက် သိကြသည်။ ရှချီချီဟာ ယခင်က အဆင့် E သို့မဟုတ် E- အကူဆရာတစ်ဦးသာ ဖြစ်သည်။ ဤဘဝတွင် သူ(မ) အဆင့် D သို့ အဆင့်တိုးရန်မှာ ခက်ခဲပေလိမ့်မည်။ သူ(မ)၏အိမ်ထောင်ဖက်မှာ သေချာပေါက် မကောင်းနိုင်ချေ။ ရှဇီရှိူ့က အဲ့လိုလူနဲ့ တကယ် နှောင်ကြိုးဖွဲ့လိုက်တာလား?

”သူ့ကို ဘယ်သူမှ မလိုချင်တော့လို့ အဲ့လိုလူကိုပဲ သူ ရှာနိုင်တော့တာများလား?” ကောင်းမွန်သော ရည်ရွယ်ချက်မရှိသူတစ်ဦးက ဆိုသည်။

သို့သော်ငြား ဤလူ စကားပြောပြီးနောက် ချက်ချင်းပင် *“Lone Wolf” အမည်ရှိသူ လူတစ်ဦးက ပြောလာသည် : “ရှဇီရှိူ့က တကယ်ပဲ ငါ မြင်ဖူးသမျှတွေထဲမှာ အတော်ဆုံးအကူဆရာပါ။ သူက ကိုယ့်ကိုကိုယ် အားကိုးပြီး အမှီအခိုကင်းတယ်။ သူ့ကို သူများတွေက အသရေဖျက်နေရင်တောင်မှပဲ သူက သူ့ဘာသာသူ ရပ်တည်နိုင်‌တယ်။ ငါ အရင်က သူ့ကို မပိုးပန်းခဲ့မိတာ နောင်တရတယ်။ သူ သဘောကျတာကို ခံရရင် ငါ အရမ်းပျော်ရလောက်မှာ။” 

*“Lone Wolf” - (တစ်ကိုယ်တော်ဝံပုလွေ)

Lone Wolf သည် သူတို့ကျောင်းရှိ အနည်းငယ်သော အဆင့် S စစ်သည်တော်များထဲမှ တစ်ဦး ဖြစ်သည်။ သူက တပ်မ ၁ နှင့် ပတ်သက်သည်ဟု လူပြောကြသော်လည်း အများအားဖြင့် သူက တစ်ယောက်တည်း နေတတ်ပြီး အလွန်ငြိမ်သည်။

သို့သော်လည်း ဤအချိန်တွင်မူ သူက စကားပြောပြီးနောက် ဖိုရမ်ထဲမှ တန်းထွက်သွားသည်။

Lone Wolf က ရှဇီရှိူ့အတွက် ရုတ်တရက် ကူပြောပေးခဲ့ပြီး ဂရုထဲမှ လူတိုင်း အံ့အားသင့်သွားကြသည်။ ဤအချိန်တွင် လူတစ်ဦးက ဆိုသည် : “အစွန်အဖျားကြယ်စင်စုတွေရဲ့ မိုင်းပိုင်ရှင်တွေ ဘယ်လောက်ပဲ ချမ်းသာချမ်းသာ၊ သူတို့က အဲ့ထက်ပိုမတက်နိုင်ဘူး။ ရှဇီရှိူ့က အဲ့လိုလူနဲ့ နှောင်ကြိုးဖွဲ့ဖို့ ဆန္ဒရှိတယ်။ ဒါက သူဟာ ရွှေတူးတဲ့ အလကားလူ လုံးဝ မဟုတ်ဘူးလို့ ဆိုလိုတာပဲ။”

“တကယ်တော့ ရှဇီရှိူ့ကသာ တကယ် လုပ်ချင်ရင် သူ့မှာ လုံးဝ ငွေပြတ်မှာမဟုတ်ဘူး။”

“အရင်တုန်းက သူများတွေ ရှဇီရှိူ့ကို လက်ဆောင်ပေးရင်တောင် သူ တစ်ခါမှ လက်မခံခဲ့ဘူး။”

… ...

Lone Wolf ပြောပြီးနောက် ရှဇီရှိူ့အတွက် ကူညီပြောပေးသူများမှာ အမှန်တကယ် အများအပြား ရှိလာခဲ့သော်လည်း ဤလူများက ဖုဖေးကို ကြောက်ကြသောကြောင့် သူတို့အားလုံးက အမည်မသိအဖြစ်သာ ရှိနေခဲ့ကြသည်။

ဖိုရမ်သို့ ရှဇီရှိူ့နှင့် ယန်ကျင်းဇီတို့၏ ဓာတ်ပုံများကို ပေးပို့ခဲ့သော အကူဆရာသည် ဤအခြေအနေကို တွေ့လိုက်ရသောအခါ လှုပ်လှုပ်ရှားရှား ဖြစ်သွားသည် : “ရှဇီရှိူ့က စစ်သည်တော်တွေ အများကြီးအတွက် စိတ်စွမ်းအင်လမ်းညွှန်မှု လုပ်ပေးခဲ့တာ မင်းတို့ မေ့သွားကြပြီလား?”

အမည်မဖော်လိုသူ နောက်လူတစ်ဦးက ဆိုသည် : “မင်းတို့အထက်တန်းလွှာတွေ ဘာတွေတွေးလဲ ငါ မသိဘူး။ ငါက အရပ်သားစစ်သည်တော်တစ်ယောက်ပဲ။ ငါ ငယ်ငယ်ကတည်းက သိခဲ့တဲ့ လူအကုန်လုံးကလည်း အရပ်သား စစ်သည်တော်တွေပဲ။ ငါတို့အများစုမှာ ကိုယ်ပိုင်အကူဆရာတွေ မရှိကြဘူး။ အဲ့တာနဲ့ပဲ စိတ်စွမ်းအင် အထိန်းကွပ်မဲ့တာက တစ်နေ့နေ့မှာ ဖြစ်လာခဲ့ရင် ငါတို့က သေဖို့ကို ထိုင်စောင့်နေရမှာလား?”

“ရှဇီရှိူ့ရဲ့အမြင်က အရမ်းမမြင့်မှန်း ငါ ကြိုသိခဲ့မယ်ဆိုရင် ငါ သူ့ကို ရအောင် လိုက်ခဲ့မှာ။”

“အရင်က သူ မကောင်းပြောခံရတုန်းက ငါ သူ့အတွက် စကားတစ်လုံးတောင် ဝင်မပြောခဲ့ဘူး။ အခု ငါ နာမည်ဝှက်ကို မဖယ်ရဲဘူး... တောင်းပန်ပါတယ်။”

“ငါက အကူဆရာတစ်ယောက်ပါ။ ငါလည်း ရှဇီရှိူ့က တော်တော်ကောင်းတယ်လို့ ထင်တယ်။”

နောက်ပိုင်းတွင် အမည်ဝှက် မရှိဘဲ တိုက်ရိုက်ပြောချလာသော အဆင့် A အကူဆရာတစ်ဦးပင် ရှိသည် : “အကူဆရာရဲ့တာဝန်က စစ်သည်တော်တွေကို စိတ်စွမ်းအင်ဖြီးသင်ပေးဖို့ပဲ မဟုတ်ဘူးလား? စစ်သည်တော်တွေကို စိတ်စွမ်းအင်ဖြီးသင်ပေးတဲ့ အကူဆရာတွေက ဘာကြောင့် ‘မသန့်ရှင်းဘူး’ လို့ နာမည်တပ်ခံရမှာလဲ?”

ဤ အဆင့် A အကူဆရာတွင်လည်း ကြီးမားသော မိသားစုနောက်ခံ ရှိသည်။ အမှန်ပင်၊ သူ(မ)သည် ယခင်က မကျေမနပ်ဖြစ်ခဲ့လျှင်တောင်မှ ဖုဖေးကြောင့် သည်းခံနေခဲ့ရသည်။ ဒါပေမယ့် အခု... တပ်မရှစ်က အဆုံးသတ်ပြီလို့ သူ(မ)ရဲ့အဖေက ပြောတယ်!

ဖိုရမ်တွင် ရုတ်တရက် စည်ကားလာသည်။ ကျောင်းဖိုရမ်သို့ ရှဇီရှိူ့၏ဓာတ်ပုံ ပေးပို့သော အကူဆရာသည် စိတ်ရှုပ်ထွေးသွားသည်။ သူသည် ရှဇီရှိူ့ကို သရော်ရန် ကြိုးစားနေခဲ့သည်။ ဘာလို့ ဒီလိုဖြစ်လာတာလဲ?

ဤအချိန်တွင် သူ မော့ကြည့်လိုက်သောအခါ သူ့စစ်သည်တော်က ရှေ့သို့ သို့မဟုတ် ရှဇီရှိူ့ရှိရာသို့ တန်းတန်းမတ်မတ် ဆက်လျှောက်နေသည်ကို သူ အံ့အားသင့်စွာ မြင်လိုက်ရသည်။

ရှဇီရှိူ့သည် ယန်ကျင်းဇီကို သူ အဝတ်အစားများ သွားဝယ်လေ့ရှိသည့် ဆိုင်သို့ ခေါ်သွားခဲ့သည်။

သူ့ဖခင်၏ဝင်ငွေက မနည်းသော်ငြား သူ့ညီကို ဆေးကုသရမည်ဖြစ်သဖြင့် သူသည် ကျကျနန မနေဖြစ်တော့ဘဲ သူ့အဝတ်အစားများကို ဈေးမကြီးသော ဤဆိုင်တွင် ဝယ်သည်။

ယန်ကျင်းဇီက ချမ်းသာမှန်း သူ သိသော်ငြား ယန်ကျင်းဇီက ချမ်းသာလျှင်ပင် ၎င်းကို ကြုံရာကျပန်း သုံးဖြုန်း၍မဖြစ်ချေ...

“ ငါ ဒီဆိုင်မှာ အဝတ်အစားတွေ ဝယ်တယ်။ မင်း ငါနဲ့ အဝတ်အစားတူတာ ဝတ်ချင်လား? ” အတူဝတ်ရန် ရှဇီရှိူ့ မျှော်လင့်နေသည်။

“ ကောင်းတယ်! ” ယန်ကျင်းဇီ သဘောတူသည်။ သူ စုံတွဲဝတ်စုံတွေ ကြိုက်တယ်!

သူတို့နှစ်ဦး၏စိတ်စွမ်းအင်များသည် ပူးကပ်ပြီး ချစ်ခင်ကြင်နာနေကြကာ ယန်ကျင်းဇီသည် ရှဇီရှိူ့ကို ထပ်မေးသည် : “ မင်း အဝတ်အစား ဝယ်ဦးမလား? ”

“ မဝယ်ဘူး ” ရှဇီရှိူ့က ပြောသည် : “ ငါ့မှာ အဝတ်အစားတွေ အများကြီး ရှိတယ်။ ” သူ့ခန္ဓာကိုယ်သည် လွန်ခဲ့သော နှစ်အနည်းငယ်အတွင်းတွင် ပြောင်းလဲခြင်းမရှိဘဲ သူသည် ယခင်အဝတ်အစားများကို ဆက်လက်ဝတ်ဆင်နိုင်သေးသည်။

ထိုသို့ပြောလျက်ဖြင့် ရှဇီရှိူ့သည် အဝတ်အစားတစ်စုံကို ရွေးကာ ယန်ကျင်းဇီကို အဝတ်လဲခန်းထဲသို့ တွန်းပို့လိုက်သည်။

သို့သော် လူချင်းကွဲကွာသွားလျှင်တောင်မှ သူတို့၏စိတ်စွမ်းအင်များကမူ တင်းတင်းကြပ်ကြပ် ယှက်နွယ်နေကြဆဲဖြစ်သည်။

စာရေးသည် သာမန်လူတစ်ဦး ဖြစ်ပြီး ၎င်းကို လုံးဝ သတိမပြုမိသော်လည်း သူတို့နောက်မှ လိုက်လာသော စစ်သည်တော်သည် ၎င်းကို ခံစားနိုင်သည်။

သူသည် ခပ်နီးနီး အကွာအဝေးတွင် ရပ်လိုက်ပြီး အဝတ်အစား အမြန်လဲ၍ ထွက်လာသော ယန်ကျင်းဇီကို တွေ့လိုက်ရသည်။

သူ့အဝတ်အစားများကို လဲထားသော ယန်ကျင်းဇီသည် ပို၍ပင် ချောမောနေသည်။ ရှဇီရှိူ့သည် သူ့အဝတ်အစားများကို သေချာပြင်ပေးပြီး အသင်းဝင်ကဒ်ကို ထုတ်၍ စာရေးအား အဝတ်အစားများအတွက် လျှော့ဈေးပေးခိုင်းကာ ခြေ‌အိတ်များကိုလည်း ပေးခိုင်းသည်။

ဤကိစ္စများအားလုံးကို ရှဇီရှိူ့ ပြုလုပ်နေစဉ်တွင် အလွန်သဘာဝကျနေပြီး လျှော့ဈေး တောင်းရန် မဆိုနှင့်၊ ဤကဲ့သို့သော ဆိုင်မျိုးကို ဝင်လိမ့်မည်ပင် မဟုတ်သော အချို့အကူဆရာများနှင့် မတူချေ။

တံခါးနားတွင် မတ်တပ်ရပ်နေသော စစ်သည်တော်သည် ရုတ်တရက် နောင်တရသွားသည်။

စစ်သည်တော်နှင့် တွဲနေသော အကူဆရာသည် စစ်သည်တော်ကို ကြည့်ပြီး ဘာမှမပြောဘဲ ထွက်လာသည်။ အစပိုင်းတွင် သူသည် ထိုနေရာတွင် ရပ်ပြီး သူ့ကို စစ်သည်တော် လာချော့မည်ကို စောင့်ဆိုင်းနေခဲ့သည်။ အချိန်အကြာကြီး စောင့်ဆိုင်းပြီးနောက် ဘယ်သူမှ ရောက်မလာသောကြောင့် သူသည် စစ်သည်တော်ကို အပြေးအလွှား လိုက်ရှာခဲ့၏။ နောက်ဆုံးတွင် သူသည် ဤမြင်ကွင်းကို မြင်လိုက်ရသည်။

“ ဒါဘာအဓိပ္ပာယ်လဲ? ” အကူဆရာက ဒေါသတကြီး မေးမြန်းသည်။

“ ဘာမှမဟုတ်ဘူး... လမ်းခွဲရအောင်။ ” စစ်သည်တော်က အလွန့်အလွန် ငြိမ်သက်နေသည်။

“ မင်း ဘာပြောလိုက်တာလဲ? ” အကူဆရာက အံ့အားသင့်သွားသည်။

“ လမ်းခွဲရအောင် ” စစ်သည်တော်က ပြောလိုက်သည်။ သူသည် ရှဇီရှိူ့ကို အလွန်သဘောကျခဲ့ဖူးပြီး ဖွင့်ပြောခြင်းဖြင့်လည်း ဝန်ခံခဲ့သော်ငြား ရှဇီရှိူ့က ငြင်းဆိုခဲ့သည်။ သူသည် အမှန်ပင် အနည်းငယ် မပျော်မရွှင် ဖြစ်ခဲ့သောကြောင့် လွန်ခဲ့သော ရက်အနည်းငယ်က ရှဇီရှိူ့နှင့်ပတ်သက်ပြီး အခြားသူများ မကောင်းပြောနေချိန်တွင် သူသည် ရှဇီရှိူ့ဘက်မှ ကူမပြောပေးခဲ့ဘဲ နောက်လူတစ်ယောက်ကို အမြန်ရှာဖွေခဲ့၏။

သို့သော် သူ အမှန်တကယ် နောင်တရသည်။

ရှဇီရှိူ့က လူတစ်ဦးနှင့် နှောင်ကြိုးဖွဲ့ပြီးဖြစ်ရာ သူနှင့် ရှဇီရှိူ့တို့ အတူရှိရန်မှာ လုံးဝ မဖြစ်နိုင်တော့ကြောင်းကို သူ သိရှိသည်။ သို့ရာတွင် သူသည် နေ့စဉ်နေ့တိုင်း ရှဇီရှိူ့ကို အမြဲတစေ မကောင်းပြောနေသော ဤအကူဆရာနှင့် မတွဲချင်တော့ပေ။

စစ်သည်တော်သည် လှည့်ထွက်သွားပြီး သူ့နောက်မှ အကူဆရာသည် အလျင်စလို ပြေးလိုက်သွားသည်။

ယန်ကျင်းဇီသည် သူတို့ ထွက်သွားသော ဦးတည်ရာကို တစ်ချက်လှမ်းကြည့်ပြီး ရှဇီရှိူ့ကို ပြန်ကြည့်လိုက်သည် : “ ဇီရှိူ့၊ မင်း ငါ့ကို အဝတ်အစားတွေ ဝယ်ပေးတယ်။ ငါလည်း မင်းအတွက် အဝတ်အစား ဝယ်ပေးမယ်။ ”

“ ငါ မလိုပါဘူး။ ”

“ မလိုလည်း ငါ မင်းအတွက် ဝယ်ပေးချင်တယ်။ ငါတို့က လက်ထပ်ပြီးပေမယ့် ငါ မင်းကို လက်ထပ်လက်ဆောင် မပေးရသေးဘူး။ ” ယန်ကျင်းဇီသည် ရှဇီရှိူ့ကို ချစ်မြတ်နိုးစွာ ကြည့်သည်။

အဝတ်အစားလဲပြီးနောက် ယန်ကျင်းဇီသည် တကယ်ကို ချောမောလှသည်။ ရှဇီရှိူ့သည် သူ့ကို ကြည့်ရုံဖြင့် မူးဝေလာသကဲ့သို့ ခံစားရပြီး ရိုးရှင်းစွာပင် မငြင်းဆိုနိုင်တော့ပေ။

ယန်ကျင်းဇီသည် မှင်တက်နေသော ရှဇီရှိူ့ကို အဝတ်အစားများ ဝယ်ယူရန် ခေါ်သွားပြီး ဤအချိန်တွင် ဖုဖေးသည် အလွန်စိတ်တိုနေပြီဖြစ်သည်။

မနေ့က ရှအိမ်မှ ပြန်လာပြီးနောက် ဖုဖေးသည် ထိုအချိန်တွင် ဖြစ်ပျက်ခဲ့သည်များကို စစ်ဆေးရန် လူလွှတ်ခဲ့သည်။ သူ စုံစမ်းလိုက်သည်နှင့်တပြိုင်နက် သူ့ရည်းစားစာကို ရှဇီရှိူ့က လုံးဝ မရရှိခဲ့လောက်ကြောင်း သူ သိလိုက်ရသည်။

သူ့စုံစမ်းမှုများအရ တစ်စုံတစ်ယောက်က နှစ်သက်ကြောင်း ဝန်ခံဖွင့်ပြောသည့်အကြိမ်တိုင်းတွင် ရှဇီရှိူ့ဟာ သေသေချာချာ ငြင်းဆိုမည်ဖြစ်ပြီး လူကို မနောက်ပြောင်ဘဲ သူတို့ကို တမင်တကာ တစ်ညလုံး မစောင့်ခိုင်းတတ်ချေ။

ရှဇီရှိူ့က သူ ချမ်းသာသည်ကို မြင်ပြီး သူ့ကို ချဉ်းကပ်ရန် အကြောင်းပြချက် ရှာနေသည် ဟူသော နောက်ပိုင်းတွင် သူ ထင်မြင်ခဲ့သည့် ကိစ္စကား ပို၍ပင် မတည်ရှိခဲ့ပေ။ ထိုအချိန်တွင် ရှဇီရှိူ့သည် လူအများအပြားကို မေးမြန်း၍ ရှဝေချန်၏သတင်းကို စုံစမ်းခဲ့ပြီး ရှဝေချန်ကို အမှန်တကယ် ရှာဖွေနေခဲ့ခြင်း ဖြစ်သည်။

ဤအရာအားလုံးကို စစ်ဆေးရန် တကယ်ပင် လွယ်ကူလှသော်ငြား ယခင်က သူသည် ၎င်းကို တမင်ဂရုမစိုက်ခဲ့ပေ။

ဖုဖေးသည် ရှဇီရှိူ့ကို ချက်ချင်း သွားတွေ့ချင်ခဲ့သော်လည်း ရှဇီရှိူ့က နှောင်ကြိုးဖွဲ့ပြီးပြီဖြစ်ကြောင်းကို မကြာမီ၌ သူ သတိရလာသည်။

ထိုသို့ဖြစ်စေခဲ့သူမှာလည်း သူသာ ဖြစ်သည်။

ဖုဖေးသည် အလွန်ဒေါသထွက်ကာ သွေးအန်ချင်မိသော်ငြား ဤအခိုက်အတန့်တွင် လူတစ်ဦးက သူ့ကို ဆက်သွယ်ပြီး သူ့ဖခင် တစ်ခုခုဖြစ်သွားသည်ဟု ပြောလာခဲ့သည်။

သူ့အဖေရဲ့ စိတ်စွမ်းအင်ပင်လယ်က တိုက်ခိုက်ခံရပြီး စိတ်စွမ်းအင် အထိန်းအကွပ်မဲ့နေတယ်!

ဖုဖေးသည် သူ့ဖခင်၏အကူဆရာဆီသို့ ချက်ချင်း သွားပြီး သူ့ဖခင်၏အကူဆရာကို သူ့ဖခင်အား ကူညီကုသပေးစေချင်ခဲ့သော်လည်း သူ့ဖခင်၏အကူဆရာက ဆန္ဒမရှိချေ။

နှောင်ကြိုးဖွဲ့ပြီးနောက် အကူဆရာနှင့် စစ်သည်တော်တို့က အချင်းချင်း၏နှလုံးသားများတွင် ခံစားချက်ပိုင်းဆိုင်ရာ ချိတ်ဆက်ထားကြသော်ငြား ၎င်းက ဤနှစ်ဦးတွင် အငြင်းပွားမှုများ ရှိလိမ့်မည်မဟုတ်ဟု မဆိုလို။

အစောပိုင်းနှစ်များ၌ Cossack ၏ အကူဆရာ နှင့် Cossack တို့တွင် ကောင်းမွန်သော ဆက်ဆံရေး ရှိခဲ့ကြသော်လည်း နောက်ပိုင်း၌ သူသည် Cossack ပြုလုပ်သော ကိစ္စအချို့ကို မကျေမနပ်ဖြစ်ခဲ့သည်။ Cossack နှင့် ဆက်ဆံရေး ဆိုးရွားလာခဲ့၏။ သူတို့နှစ်ဦးသည် လွန်ခဲ့သော နှစ်ပေါင်းများစွာကတည်းက လမ်းခွဲခဲ့ကြသည်။

Cossack က ဖုဖေးကို အိမ်ပြန်ခေါ်လာသောအခါ သူသည် Cossack ကို ဘယ်တော့မှ ထပ်မတွေ့ချင်တော့ဟု တိုက်ရိုက်ပြောခဲ့သည်။

သူနှင့် Cossack တို့သည် အစောပိုင်းနှစ်များတွင် ကလေးရရန် ကြိုးစားခဲ့ကြသော်ငြား Cossack ၏ မျိုးရိုးဗီဇပြဿနာအချို့ကြောင့် ကျရှုံးခဲ့ကြသည်။ ထိုအချိန်မှစ၍ သူနှင့် Cossack ၏ ဆက်ဆံရေးက ဆိုးရွားလာခဲ့ပြီး သူသည် Cossack နှင့် ကလေးယူရန် တွန့်ဆုတ်ခဲ့သည်။ ရလဒ်ကမူ ကလေးလိုချင်သော Cossack က အမျိုးသမီးတစ်ယောက်ကို တွေ့ပြီး အခြားသူများနှင့်လည်း ကလေးယူခဲ့၏...

ဖုဖေးဟာ Cossack ၏ တရားမဝင်သား ဖြစ်ပြီး ဖုဖေး၏အသက်အရွယ်အရ ဖုဖေး၏မိခင်နှင့် Cossack အတူရှိနေချိန်တွင် Cossack နှင့် သူ၏ ဆက်ဆံရေးသည် အလွန်ကောင်းမွန်နေဆဲဖြစ်သည်။

Cossack ၏ အကူဆရာသည် စက်ဆုပ်ရွံရှာသွားသည်။ ယခု ဖုဖေးက Cossack ၏ စိတ်စွမ်းအင်ကို ကူညီဖြေရှင်းပေးရန် သူ့ကို တောင်းဆိုလာသောအခါ သူက တိုက်ရိုက်ပြောလိုက်သည် : “ ငါ သူ့စိတ်စွမ်းအင်ကို ဘယ်တော့မှ မဖြေရှင်းပေးဘူး! ဒီအချိန်မှာ ငါ သူနဲ့ နှောင်ကြိုးမဖျက်တာပဲ အရမ်းကောင်းနေပြီ! ”

စိုးရိမ်ပူပန်နေသော ဖုဖေးသည် အကူဆရာကို တစ်ခုခုလုပ်ချင်ခဲ့သည်။ ဒါပေမယ့် ဒါက ကြယ်မြို့တော်ပဲ၊ လူတွေ စိတ်ကြိုက်လှုပ်ရှားလို့ရတဲ့ နေရာ မဟုတ်ဘူး!

Cossack ၏ အကူဆရာက အဆင့် A+ ဖြစ်နေသေးသည်ကို ထည့်မပြောနှင့်ဦး။

ဖုဖေးသည် ကောင်းမွန်သော ရလဒ်ကို လုံးဝ မရရှိခဲ့ပေ။ သူ့ကို တိုင်ကြားချက်အရ အခင်းဖြစ်ပွားရာသို့ ရောက်ရှိလာသော လုံခြုံရေးအရာရှိတစ်ဦးက ‌ဆုံးမသွားခဲ့သည်။

အဆုံးတွင် ဖုဖေးသည် ရွေးချယ်စရာမရှိတော့ဘဲ ရှချီချီထံသို့သာ သွားရသည်။

ရှချီချီက အဆင့် S အကူဆရာတစ်ဦး ဖြစ်သည်။ သူ(မ)က သူ့ဖခင်၏စိတ်စွမ်းအင်ကို အလုံးစုံ မဖြေရှင်းပေးနိုင်‌လျှင်တောင်မှ သူ့ဖခင် ပိုမိုသက်သာအောင် လုပ်ပေးနိုင်ဆဲပင်။

တိုက်ဆိုင်စွာဖြင့် ရှချီချီသည် စီးပွားရေးစင်တာတွင် ရှိနေသည် – ရှဇီရှိူ့နှင့် ယန်ကျင်းဇီက ဤနေရာတွင် ရှိနေကြောင်းကို သူ(မ) သိရသောအခါ လာကြည့်ချင်ခဲ့သည်။

ရလဒ်ကမူ ရှဇီရှိူ့ကို သူ(မ) ရှာမတွေ့ခင် ဖုဖေးက သူ(မ)ကို ရှာတွေ့သွားသည်။

“ ချီချီ၊ ကိုယ့်အဖေရဲ့စိတ်စွမ်းအင် ရုန်းရင်းဆန်ခတ်ဖြစ်နေတယ်။ မင်း ကိုယ်နဲ့ လိုက်ခဲ့။ ” ဖုဖေးက ‌ဆိုသည်။

ရှချီချီ အံ့အားသင့်သွားသည် : “ ရှင့်အဖေရဲ့စိတ်စွမ်းအင် အထိန်းအကွပ်မဲ့တာ၊ ရှင် ကျွန်မကို ဘာလုပ်စေချင်လို့လဲ? ” ဖုဖေးရဲ့အဖေက Marshal, ဘယ်လိုလုပ် သူ့မှာ စိတ်စွမ်းအင်အထိန်းကွပ်မဲ့တာ ဖြစ်နိုင်မှာလဲ? စိတ်စွမ်းအင်အထိန်းကွပ်မဲ့တာ ဖြစ်ရင်တောင် သူ့ကို ကူညီဖြေရှင်းပေးမယ့် သူ့ကိုယ်ပိုင် အကူဆရာတစ်ယောက် ရှိလိမ့်မယ်... ဖုဖေး သူ(မ)ကို စမ်းသပ်နေတာလား?

“ ကိုယ့်အဖေရဲ့စိတ်စွမ်းအင်ကို ကူညီဖြေရှင်းပေးဖို့ ကိုယ် မင်းကို တောင်းဆိုချင်တယ်။ ” ဖုဖေးက ပြောသည်။

ရှဇီရှိူ့၏စိတ်စွမ်းအင်ဖြင့် လမ်းညွှန်ခံရသော လူတိုင်းကို မနာလိုဖြစ်ပြီး ရူးသွပ်နေသော စာအုပ်ထဲမှ ဖုဖေးကို ရှချီချီ တွေးမိလိုက်သည်။ သူ(မ) ဘယ်လိုလုပ်သဘောတူရဲပါ့မလဲ။ ထို့ကြောင့် သူ(မ) ပြုံးကာ အာမခံလိုက်သည် : “ ဖုဖေး၊ ကျွန်မ ရှင်တစ်ယောက်တည်းကိုပဲ စိတ်စွမ်းအင်ကူညီပေးမှာပါ။ ”