အပိုင်း ၁၆၆ ( Mine Owner 15 )

အများအားဖြင့် ကြယ်တာရာမဟာမိတ်၏ ငွေကြေးစနစ်ကို ခရက်ဒစ်အမှတ်များအဖြစ် သတ်မှတ်ခေါ်ဝေါ်ကြသည်။

ကြယ်မြို့တော်တွင် အသားနှင့် အသီးအရွက်တို့ ပါရှိသော အသင့်စား အစားအစာကို စားရန် ခရက်ဒစ်အမှတ် ၁၀ မှတ်သာ ကုန်ကျပြီး ဝေးလံခေါင်သီသော ကြယ်စင်စုများတွင် ဈေးနှုန်းများက ပို၍ပင် သက်သာသည်။

ခရက်ဒစ်အမှတ် သန်း ၁၀၀ ဟာ ရှဝေချန်ကဲ့သို့ ဗိုလ်ချုပ်မှူးတစ်ဦးအတွက် များပြားလှသော ငွေပမာဏကြီး ဖြစ်သည်။ ဘီလီယံဆယ်နှင့်ချီတန်သော အာကာသယာဉ်ကို သူ မောင်းနှင်သော်ငြား သူ၏ပုဂ္ဂိုလ်ပိုင်ဆိုင်မှုမှာ သန်း ၁၀၀ အောက်ထက်ပင် များစွာနည်းသည်။

ယခုမူ လူတစ်ဦးက သူ့ကို သန်း ၁၀၀ ပေး၍ သူ့သားကို မုန့်ဖိုးပေးခိုင်းလာသည်။

ရှဝေချန် : “ ... ”

တပ်မှူးခုနစ်ဦး : “ ... ”

တပ်မ ၁ ၏ တပ်မှူးသည် ထင်ယောင်ထင်မှားဖြစ်နေသည်ဟု သံသယဝင်မိကာ သူ့မျက်လုံးများကို ပွတ်လိုက်သည်။

ဤအချိန်တွင် ရှဝေချန်ထံသို့ ပေးပို့သော အရှင် Marshal ၏ မက်ဆေ့ခ်ျမှာ အမှန်တကယ်ပင် သူတို့ကို ညွှန်ကြားချက်များ ပေးလာသည်ဟု သူ ထင်ခဲ့သည်။

ရလဒ်ကမူ... ဒီလိုမက်ဆေ့ခ်ျမျိုးလား?

ပြီးတော့ ဒါက တကယ်ပဲ အရှင် Marshal လား? ဘာလို့ သူက ရှဝေချန်ကို “အဖေ” လို့ ခေါ်တာလဲ?

အခြားတပ်မှူးများသည် တပ်မ ၁ ၏ တပ်မှူးကဲ့သို့ပင် ပဟေဠိဖြစ်နေကြပြီး အားလုံးက ရှဝေချန်ကို ကြည့်လိုက်ကြသည်။

တစ်ချိန်တည်းတွင် သူတို့သည် ကိစ္စတစ်ခုကိုလည်း သတိရမိကြ၏ – ရှဝေချန်ရဲ့အကြီးဆုံးသားက အရမ်းကို ထင်ထင်ရှားရှားနဲ့ ကြီးပြင်းလာခဲ့ပြီး... မကြာသေးခင်ကပဲ လက်ထပ်သွားတာမလား?

ရှဝေချန်ရဲ့သားမက်က... အရှင် Marshal လား?

တပ်မှူးခုနစ်ဦးသည် သူတို့၏စိတ်စွမ်းအင်ကို လျှော့ချထားသော်လည်း လူတို့အပေါ် ကြီးမားသော ဖိအားများ ပေးဆောင်နေဆဲဖြစ်သည်။

ထိုဖိအားများအောက်တွင်... ရှဝေချန်၏စိတ်စွမ်းအင်က ရုတ်တရက် အဆင့်ဖြတ်‌ကျော်သွားသည်။

ရှဝေချန်သည် ယန်ကျင်းဇီ ယခင်ညက ပေးထားသော “လန်းဆန်းဆေးလုံး” ကို စားခဲ့သည်။ သူသည် ဇနီးဖြစ်သူကိုလည်း ချော့မော့ပြီး ၎င်းက ကိုယ်ခန္ဓာ အာဟာရဖြစ်စေသော ဆေးဟု ဆိုကာ ဇနီးဖြစ်သူကိုလည်း စားစေခဲ့သည်။

ဤကဲ့သို့သော အရာမျိုးမှာ ဗိုက်ထဲတွင် ထည့်ထားခြင်းက ပိုကောင်းသည်။ ထိုအခါမှသာ စိတ်သက်သာရာရနိုင်သည်။

ဤဆေးလုံးအမျိုးအစားသည် အလွန်ပျော့ပျောင်းပြီး လူ့စိတ်စွမ်းအင်ကို ဖြည်းဖြည်းချင်း တိုးစေသည်။ ရှဝေချန်၏ ခန့်မှန်းချက်အရ သူသည် ရက်အနည်းငယ်အတွင်း အဆင့်တိုးလိမ့်မည်ဖြစ်သည်။

သို့သော် ဤအချိန်တွင် ဖိအားအရမ်းများလွန်းသဖြင့် သူသည် တိုက်ရိုက်အဆင့်တက်သွားခဲ့သည်။

တပ်မှူးခုနစ်ဦးတို့သည် တစ်ယောက်ကိုတစ်ယောက် ကြည့်ကာ ရှဝေချန်ကို စိတ်စွမ်းအင် တည်ငြိမ်အောင် အမြန်ကူ‌ညီပေးခဲ့ကြသည်။

သာမန်လူများသည် အဆင့် A+ မှ S- သို့ အဆင့်တက်လှမ်းရန် အချိန်အတော်ကြာလေ့ရှိကြသော်ငြား ရှဝေချန်တွင် အဆင့် SS စွမ်းအားရှင်ခုနစ်ဦး၏ အကူအညီ ရှိသောကြောင့် ဆယ်မိနစ်အတွင်း၌ပင် ဘေးကင်းလုံခြုံစွာ အဆင့်တက်လှမ်းသွားခဲ့သည်။

ရှဝေချန်သည် ယခင်ကထက် ပိုကောင်းလာသော သူ့အခြေအနေကို ခံစားမိသည်။ သူသည် သူ့စိတ်စွမ်းအင်ကို ဆန့်ထုတ်၍ ကမ္ဘာကြီးကို စိတ်လက်ချမ်းသာစွာ ခံစားချင်ခဲ့သည်။ သို့သော်ငြား သူ့အတွေး ပေါ်လာသည်နှင့်တပြိုင်နက် သူသည် သူ့ပတ်ဝန်းကျင်ရှိ စွမ်းအားကြီးမားသော စိတ်စွမ်းအင်ခုနစ်ခုကို ခံစားလိုက်ရသည်။

ရှဝေချန်သည် ယခုလေးတင် သူ ထုတ်လိုက်သည့် စိတ်စွမ်းအင် အနည်းငယ်ကို တိတ်တဆိတ် ပြန်သိမ်းလိုက်သည်။

တပ်မ ၁ ၏ တပ်မှူးက ရှဝေချန်ကို တောင့်တင်းစွာ ပြုံးပြသည် : “ မြန်မြန်လုပ်၊ မင်းရဲ့သားကို မုန့်ဖိုးလွှဲပေးလိုက်တော့! ”

တပ်မ ၂ ၏ တပ်မှူးက ရှဝေချန်ကို ကြင်နာစွာ ပြုံးပြ၏ : “ မင်းကို စာပို့တာ အရှင် Marshal ဟုတ်တယ်မလား? ဂုဏ်ယူပါတယ်... ဟားဟား ”

တပ်မ ၃ ၏ တပ်မှူး : “ မင်းရဲ့သားကို အရှင် Marshal အတွက် ပိုက်ဆံပိုသုံးခိုင်းလိုက်ပါ။ ”

တပ်မ ၄ ၏ တပ်မှူး : “ အနာဂတ်မှာ အရှင် Marshal ဆီက လိုအပ်ချက်တွေ မင်းမှာ ရှိလာခဲ့ရင်၊ ပြီးတော့ အဲ့ဒါကို မင်း မလုပ်နိုင်ဘူးဆိုရင် ငါ့ဆီကိုလာခဲ့။ ”

တပ်မ ၅ ၏ တပ်မှူး : “ မင်းရဲ့စိတ်စွမ်းအင် အဆင့်တိုးသွားပြီ။ မင်း တစ်နေရာရာမှာ အဆင်မပြေဘူးလို့ ခံစားရရင် မင်း ငါ့ကို လာရှာပြီး မင်းရဲ့စိတ်စွမ်းအင်ကို ဘယ်လိုသုံးရမလဲ သင်ယူနိုင်တယ်။ ”

...

ရှဝေချန်သည် မြှောက်ပင့်ခံရသကဲ့သို့ ခံစားရသည်။

တပ်မှူးများစွာသည် ရှဝေချန်ကို ထပ်မမေးကြတော့သော်လည်း ရှဝေချန် ထွက်သွားပြီးနောက်တွင်မူ သူတို့သည် ရှဇီရှိူ့ကို စတင်စုံစမ်းခဲ့ကြသည်။

ဤစုံစမ်းစစ်ဆေးမှု... မကြာခင်မှာပဲ Central Shopping Center ကို လည်ပတ်နေကြသော ရှဇီရှိူ့နှင့်ယန်ကျင်းဇီတို့၏ ဓာတ်ပုံများကို သူတို့ တွေ့လိုက်ကြရသည်။

အသားအရေက ပိုမည်းပြီး ပိုကြမ်းတမ်းသော်ငြား ရှဝေချန်၏ သားအလှလေးကို အဖော်ပြုနေသူမှာ တကယ်ပင် အရှင် Marshal ဖြစ်သည်...

တပ်မှူးခုနစ်ဦး : “ ... ”

သူတို့ရဲ့ Marshal အရှင်က ဒီနေရာမှာ ဘာလုပ်ဖို့ ကြိုးစားနေတာလဲ?

တပ်မှူးများ ပဟေဠိဖြစ်နေစဉ်တွင် ရှဝေချန်သည် ယန်ကျင်းဇီကို သူ တွေ့ကြုံခဲ့ရသည်များအား ပြောပြပြီးဖြစ်ကာ တစ်ချိန်တည်းတွင် သားဖြစ်သူထံသို့ ခရက်ဒစ် တစ်သန်း လွှဲပြောင်းပေးခဲ့သည်။

သန်းတစ်ရာကို တစ်ခါတည်း လွှဲပေးခြင်းမှာ... သားဖြစ်သူတင်မက သူပါ ကြောက်ရွံ့လိမ့်မည်ဖြစ်သည်။

သို့သော်လည်း တစ်သန်းတည်းသာ ဖြစ်လျှင်ပင် ရှဇီရှိူ့ အံ့ဩသွားသည်။

သူသည် မူလက ယန်ကျင်းဇီ၏စိတ်စွမ်းအင်နှင့် ရောထွေးနေပြီး ရုတ်တရက် သူ ဖြောင့်တန်းသွား၏။

“ ဘာဖြစ်လို့လဲ? ” ယန်ကျင်းဇီက မေးသည်။

“ အဖေက ငါ့ကို မုန့်ဖိုးဆိုပြီး ရုတ်တရက်ကြီး တစ်သန်းပေးလာတယ်။ ” ရှဇီရှိူ့၏မျက်နှာက မယုံနိုင်ဖြစ်နေသည် : “ အဖေ သုညနှစ်လုံး ပိုရိုက်မိတာလား? ” 

သူ့ဖခင်သည် သူ့ကို အလွန်ချစ်ပြီး ကြယ်မြို့တော်၏ ဈေးနှုန်းများက မသက်သာဘဲ သူ့ဖခင်သည် မပျောက်ဆုံးမီတွင် သူ့ကို တစ်လလျှင် နေထိုင်စရိတ် ၁၀,၀၀၀ ပေးလေ့ရှိခဲ့သည်။  

ယန်ကျင်းဇီ : “ ... ” သူ့တွင် မူလပိုင်ရှင်၏ မှတ်ဉာဏ်များသာ ရှိသည်။ မူလပိုင်ရှင်အတွက် တစ်သန်းက တကယ်ပင် အလွန်နည်းသည်...

“ ငါ အိမ်ရောက်မှ အဖေ့ကို မေးပြီး ပိုက်ဆံပြန်ပေးလိုက်မယ်။ တကယ်တော့ ငါ့မှာ အခု ဝင်ငွေရှိနေပြီ။ အဖေ ငါ့ကို ပိုက်ဆံပေးစရာမလိုတော့ဘူး။ ” ရှဇီရှိူ့က စကားပြောပြီးနောက် ယန်ကျင်းဇီကို ကြည့်ကာ ပြုံးသည် : “ ပြီးတော့ ငါက လက်ထပ်ပြီးပြီလေ။ ”

သူသည် လက်ထပ်ပြီးဖြစ်ကာ သူ့ကိုယ်ပိုင်မိသားစု ရှိနေပြီဖြစ်သည်။ သူသည် သူ့ဖခင်၏‌ပိုက်ဆံကို ထပ်မယူနိုင်တော့ပေ၊ သူ့မိသားစုကို သူ ထောက်ပံ့နိုင်ပြီဟု ခံစားရသည်။

ယန်ကျင်းဇီ : “ !!! ” ဟုတ်သားပဲ၊ သူနဲ့ရှဇီရှိူ့ လက်ထပ်ပြီးပြီဆိုတဲ့ အချက်ကို သူ တကယ်ကြီး မေ့သွားတယ်!

လက်ထပ်ထားတဲ့လူတွေမှာ ပူးတွဲပိုင်ဆိုင်မှု ထည့်ဖို့ ဘုံအကောင့် ရှိဖို့ ခွင့်ပြုထားတယ်!

ယန်ကျင်းဇီသည် ဆက်သွယ်ကိရိယာကို ယူကာ ဆက်လက်လုပ်ဆောင်လိုက်သည်။

မူလပိုင်ရှင် ပိုင်ဆိုင်သည့် မိုင်းပိုင်ရှင်ထံမှ ဝယ်ယူထားသမျှ ပိုင်ဆိုင်မှုအားလုံးကို ဤဘုံအကောင့်ထဲသို့ သူ ထည့်သွင်းခဲ့သည်။

ထို့နောက် ရှဇီရှိူ့သည် မက်ဆေ့ခ်ျတစ်စောင်ကို လက်ခံရရှိခဲ့၏ : “ ဟယ်လို၊ သင့်လက်တွဲဖော်သည် ဘုံအကောင့်ထဲသို့ မိုင်းတွင်းသုံးတွင်း၊ Kamil ဂြိုဟ်မှ စံအိမ်တစ်လုံး၊ အိမ်ခြံမြေတစ်ခု... နှင့် ခရက်ဒစ်အမှတ် ၇၉၆၅၁၈၄၉၇ တို့ကို လွှဲပြောင်းပေးခဲ့ပါသည်။ ”

ရှဇီရှိူ့ : “ ... ”

ရှဇီရှိူ့သည် ယန်ကျင်းဇီ ချမ်းသာမှန်း အမြဲသိခဲ့သော်ငြား ယန်ကျင်းဇီက ဤမျှချမ်းသာလိမ့်မည်ဟု တစ်ခါမှ မထင်ခဲ့ဖူးပေ။ 

ဒီပိုင်ဆိုင်မှုတွေကို ပေါင်းလိုက်ရင် ဘီလီယံနဲ့ချီတယ် ဟုတ်တယ်မလား?!

အဓိကအချက်မှာ... ဤမျှပိုက်ဆံအများကြီးကို ယန်ကျင်းဇီက ဘုံအကောင့်ထဲသို့ အမှန်တကယ် အားလုံး ထည့်သွင်းခဲ့သည်။ သူ ပိုက်ဆံတွေ သုံးဖြုန်းပစ်မှာကို ယန်ကျင်းဇီ မကြောက်ဘူးလား?

“ ကိုယ့်ဟာ မင်း ပိုင်တယ်။ ” ယန်ကျင်းဇီသည် ရှဇီရှိူ့၏အတွေးများကို ခံစားမိပြီး ချက်ချင်း ပြောလိုက်သည်။

ရှဇီရှိူ့သည် ယန်ကျင်းဇီက အနည်းငယ် မိုက်မဲသည်ဟု ခံစားမိသော်ငြား ယန်ကျင်းဇီက သူ့ကို အလွန်ယုံကြည်သဖြင့်လည်း ပျော်ရွှင်သွားသည်။

သူ့ပိုင်ဆိုင်မှုအားလုံးကို ဘုံအကောင့်ထဲသို့ လွှဲပြောင်းလျက်ဖြင့် ရှဇီရှိူ့က ဆိုသည် : “ ငါ အခု ပိုက်ဆံနည်းနည်း နည်းနေတယ်။ ဒါပေမယ့် ငါ ငွေရှာဖို့ အလုပ်ကြိုးစားမယ်! ”

“ ကိုယ်ရောပဲ။ ” ယန်ကျင်းဇီက ပြောသည်။

သူတို့နှစ်ဦးသည် အချင်းချင်း ကြည့်ပြီး သူတို့၏စိတ်စွမ်းအင်များမှာ တမင်သက်သက် မလုပ်ပဲနှင့် ထပ်မံရောထွေးသွားကြပြန်သည်။

သူတို့သည် အမှန်တကယ်ပင် မနေ့ကမှသာ ဆုံတွေ့ခဲ့ကြပြီး ယခု တစ်ရက်သာ အတူရှိကြရသေးသော်လည်း ယန်ကျင်းဇီသည် သူတို့က အချိန်အကြာ့အကြာကြီး အတူရှိခဲ့ကြသည်ဟု အမြဲခံစားရကာ ခွဲခွာရခြင်းကို အမြဲမုန်းတီး၏။

ရှဇီရှိူ့က Central Mall တွင် ဈေးဝယ်ထွက်နေသည်ကို သိရှိပြီး ရှဇီရှိူ့က တကယ်ပင် နှောင်ကြိုးဖွဲ့ပြီးပြီလောဟု တကူးတက လာရောက်ကြည့်ရှုကြသည့် ရှဇီရှိူ့၏အတန်းဖော်များ : “ ...... ”

သူတို့၏စိတ်စွမ်းအင်က တကယ်ကို ခွဲခြားရခက်လှသည်။

ရှဇီရှိူ့၏ ယခင်က မယုံနိုင်လောက်အောင် ဆိုးရွားလှသော ဂုဏ်သတင်းမှာ ရုတ်တရက် ပိုကောင်းသွားသည်။ ရှဇီရှိူ့နှင့် အတူအိပ်ဖူးသည်ဟု ယခင်က ပြောဆိုခဲ့သော စစ်သည်တော်များပင် ဆူပူကြိမ်းမောင်းခံကြရသည် – ဤကဲ့သို့သော ကောလာဟလများနှင့် အခြားသူများကို အသရေဖျက်သူများမှာ တကယ့်ကို ရွံရှာဖွယ်ကောင်းလှသည်။

Cossack ၏ နေအိမ်။

ဖုဖေးသည် ရှချီချီကို အိမ်သို့ အတင်းအကြပ် ခေါ်ဆောင်လာခဲ့ပြီး Cossack ၏ စိတ်စွမ်းအင်ကို ဖြေရှင်းခိုင်းခဲ့သည်။

Cossack သည် အဆင့် SS စစ်သည်တော် ဖြစ်သည်။ ယန်ကျင်းဇီကြောင့် သူ့စိတ်စွမ်းအင် ထိခိုက်ဒဏ်ရာရပြီးနောက် စတင်ဖရိုဖရဲဖြစ်လာသည်။ သူ၏ လက်ရှိအခြေအနေအရ သူသည် စိတ်စွမ်းအင်လမ်းညွှန်မှု မြန်မြန်ရရှိနိုင်သည်နှင့်အမျှ ပိုမိုကောင်းမွန်စွာ ပြန်လည်ကောင်းမွန်လာနိုင်မည် ဖြစ်သည်။

သို့သော် သူ့လက်တွဲဖော်က သူ့ကို စိတ်စွမ်းအင်လမ်းညွှန်မှုဖြင့် ကုသပေးရန် မလိုလား‌ချေ။ အခြားသူများကမူ...

ကြယ်မြို့တော်၏ အစွမ်းထက်သော အကူဆရာများသည် ပင်ကိုအားဖြင့် အားလုံးတွင် စစ်သည်တော်များ ရှိကြပြီး တစ်ဦးချင်းစီက အဆင့်အတန်း မြင့်မားကြသည်။ ဖုဖေးသည် အကူအညီတောင်းရမည့်လူကို အချိန်အတော်ကြာ မရှာနိုင်ခဲ့ပေ။

သူသည် ဖုဖေးကိုသာ အကူအညီတောင်းနိုင်ခဲ့သည်။

ရှချီချီသည် ပြင်းထန်ကြမ်းတမ်းသော စိတ်စွမ်းအင်နှင့် ဝန်းရံလျက် ခုတင်ပေါ်တွင် လဲလျောင်းနေသည့် Cossack ကို မြင်ပြီး အနည်းငယ် စိတ်ရှုပ်ထွေးသွားသည်။  

ရှချီချီနှင့်ဖုဖေးတို့သည် ထိမ်းမြားလက်ထပ်ရန် ဆွေးနွေးကြပြီးဖြစ်သည်။ သူတို့သည် ယခင်က Cossack နှင့် တွေ့ဖူးခဲ့ကြသည်။ ထိုအချိန်တွင် Cossack က သူ(မ)ကို အလွန်ဖော်ရွေခဲ့သည်။ ရှချီချီသည်လည်း Marshal Cossack နှင့် တွေ့ဆုံခြင်းအတွက် စိတ်လှုပ်ရှားနေခဲ့ပြီး သူ(မ)တို့ အတော်လေး အဆင်ပြေခဲ့ကြသည်။

ယခုမူ Cossack က သေလုမျောပါးဖြစ်နေပြီပင်။

ဘာဖြစ်နေတာလဲ?

Cossack က အစွမ်းထက်ဆုံး စစ်သည်တော်၊ ကြယ်တာရာမဟာမိတ်ရဲ့ Marshal! ဘယ်လိုလုပ် သူက ဒီလိုဖြစ်နိုင်မှာလဲ?

စာအုပ်ထဲတွင် တပ်မှူးများစွာက သူ့စကားကို နားထောင်ရန် ငြင်းဆိုကြသောကြောင့် သူသည် သူတို့ကို စစ်တပ်စရိတ် ထောက်ပံ့ရန် တန်း၍ ငြင်းဆိုလိုက်ပြီး သူတို့ကို အတင်းအကြပ် ထိန်းချုပ်ခဲ့သည်။

သူ့လိုလူက ဘယ်လိုလုပ် ဒီလိုပုံစံ ဖြစ်နိုင်မှာလဲ?

ဤသည်က စမ်းသပ်မှုဟု ရှချီချီ ခံစားနေရဆဲဖြစ်သည်။

စာအုပ်ထဲတွင် ရှဇီရှိူ့သည် Cossack ၏ အထောက်အထား အစစ်အမှန်ကို တစ်ခါမှ မသိခဲ့ချေ။ Cossack က Marshal ဖြစ်ကြောင်း ပထမဆုံး သိရသောအခါ ဖုဖေးပင် အံ့အားသင့်သွားခဲ့ရသည်... ဒါဆို Cossack က သူ(မ)ရဲ့ အရည်အချင်းကို ကြည့်ဖို့ အခု ဒီလိုလုပ်နေတာလား?

ရှချီချီ အတွေးများသွားသည်။

သူ(မ)က Cossack ကို အကောင်းမြင်စေချင်ရင် Cossack ရဲ့ စိတ်စွမ်းအင်ကို သူ(မ) လမ်းပြပေးရမယ်၊ ဒါပေမယ့် သူ(မ) ဒီလိုလုပ်ရင်... ဖုဖေးက အနာဂတ်မှာ ဒါကိုတွေးမိပြီး စိတ်ရှုပ်မှာလား?

“ ချီချီ၊ ကျေးဇူးပြုပြီး ကိုယ့်အဖေကို စိတ်စွမ်းအင် လမ်းညွှန်ပေးပြီး ကူညီပေးပါ။ ” ဖုဖေးက ပြောသည်။

ရှချီချီက တုန့်ဆိုင်းနေဆဲ။

ဖုဖေး : “ ကိုယ် အရင်က မှားခဲ့တယ်! ကိုယ့်အတွေးက မှားခဲ့တယ်! ချီချီ၊ မင်း ကိုယ့်အဖေကို ကူညီရမှဖြစ်မယ်! ”

ရှချီချီ : “ ဖုဖေး၊ ကျွန်မ သဘောတူပါ့မယ်။ ဒါပေမယ့် ဒါက ရှင် ကျွန်မကို ကူညီခိုင်းတာနော်။ အနာဂတ်မှာ ရှင် ကျွန်မကို အပြစ်တင်လို့မရဘူး! ”

ဖုဖေးသည် ရှချီချီ၏စကားကို ကြားလိုက်ရသောအခါ နောက်တစ်ကြိမ် နင်သွားရပြန်သည်။ သူ စကားမပြောနိုင်တော့ပေ။ ပထမအကြိမ်အဖြစ် သူ စိတ်ရှုပ်ထွေးသွားသည်။ သူ အရင်က မှားခဲ့တာလား?

အမှန်တော့ အစပိုင်းတွင် သူသည်လည်း အထက်တန်းလွှာက အကူဆရာကို မူပိုင်သတ်မှတ်ခြင်းမှာ မမှန်ကန်ဟု ခံစားမိခဲ့သည်။ သို့သော်ငြား သူ ရှဇီရှိူ့ကို သဘောကျမိချိန်မှစ၍ သူသည် ရှဇီရှိူ့ကို အခြားသူများနှင့် ဘာတစ်ခုမှ မပတ်သက်စေချင်ခဲ့ပေ။ ထို့အပြင် အထက်တန်းလွှာတစ်ဦး ဖြစ်လာသောအခါ သူသည် သူ့အကူဆရာကို သူတစ်ဦးတည်းကသာ ပိုင်ဆိုင်သင့်သည်ဟုပင် ခံစားလာရသည်။

သူ့နားက အထက်တန်းလွှာတွေ အကုန်လုံးလည်း အဲ့လိုပဲတွေးကြတယ် မဟုတ်လား?

ဒါပေမယ့် အခုတော့...

ဖုဖေးသည် သူ့နားထင်များကို သူ့လက်များနှင့် ပွတ်သပ်လိုက်သည်။

ရှချီချီက Cossack ၏ စိတ်စွမ်းအင်ကို ဂရုတစိုက် သွားရောက်သွယ်ပို့ပေးမှသာလျှင် ဖုဖေးသည် သူ့ဆက်သွယ်ကိရိယာရှိ မက်‌ဆေ့ခ်ျမျိုးစုံကို အာရုံစိုက်ရန် အချိန်ရခဲ့သည်။

မက်ဆေ့ခ်ျများကို ကြည့်နေစဉ် သူသည် ကျောင်းဖိုရမ်ထဲရှိ စကားပြောမှတ်တမ်းများကိုလည်း သဘာဝကျစွာ တွေ့မြင်လိုက်ရပြီး ထိုနှစ်ဦးကို မြင်လိုက်ရရုံနှင့် ဖုဖေး အေးခဲသွားသည်။

ဖိုရမ်ထဲမှ လူအချို့က ရှဇီရှိူ့ကို ထိုအချိန်တွင် မပိုးပန်းမိခဲ့သည်အား နောင်တရခဲ့ကြပြီး သူလည်း နောင်တရမိသည်။

တကယ်တော့ ဖုဖေးသည် ရှချီချီနှင့် အချိန်အကြာကြီး ကုန်ဆုံးပြီးနောက် ရှချီချီကိုလည်း သဘောကျခဲ့မိသည်။ 

သို့ရာတွင် ရှဇီရှိူ့ဟာ သူ့အချစ်ဦး ဖြစ်ပြီး သူ မရရှိနိုင်တော့သည့် လူတစ်ဦး ဖြစ်သည်။ သူသည် ရှဇီရှိူ့ကို အထင်လွဲခဲ့မိသည့်အကြောင်းကိုလည်း သိရှိထားသည်။ ရှချီချီကရော? ရှချီချီက သူ(မ)ဘက်မှ သူ့ကို စတင်ဆက်သွယ်ခဲ့သူ ဖြစ်သည်...

တခါတရံတွင် လူများဟာ အလွန်ဈေးပေါကြပြီး သူတို့ မရရှိနိုင်သည့် အရာများက သူတို့အတွက် အမြဲတစေ ပိုကောင်းနေတတ်သည်။

ဖုဖေးသည် စိတ်မသက်မသာ ဖြစ်နေမိပြီး ဤအချိန်၌ မက်ဆေ့ခ်ျအသစ်တစ်စောင်က သူ့ဆက်သွယ်ကိရိယာတွင် ရုတ်တရက် ပေါ်လာသည်ကို သူ တွေ့လိုက်ရသည်။

တပ်မ ၈ ရဲ့ တပ်မှူး Cossack က သူ့အာဏာကို အလွဲသုံးစားလုပ်လို့ တပ်မ ၈ ရဲ့ တပ်မှူးရာထူးကနေ ဖယ်ရှားခံလိုက်ရတယ်!

ဤသတင်းကို တွေ့လိုက်ရသော် ဖုဖေး၏မျက်နှာက သိသိသာသာ ပြောင်းလဲသွားသည်။

သူသည် သူ့ဖခင်က တပ်မှူးတစ်ဦးအနေဖြင့် သူ့ထံသို့ ယူဆောင်ပေးနိုင်မည့် အရာများကို ရှင်းရှင်းလင်းလင်း သိသည်။ 

သူ့ဖခင်ကသာ တပ်မှူးမဟုတ်တော့လျှင်...

ဖုဖေးသည် အခြေအနေကို သိရှိရန် သူ့ဖခင်၏ လက်အောက်ငယ်သားများကို ချက်ချင်း ဆက်သွယ်လိုက်သော်ငြား ထိုလူများက သူ့ဆက်သွယ်မှုများကို လုံးဝ ပြန်မဖြေကြချေ။ သူ့မျက်နှာက ပိုပိုအရုပ်ဆိုးလာပြီး စိုးရိမ်ပူပန်စိတ်များ ပိုပိုများပြားလာသည်...

“ ဖုဖေး၊ ကျွန်မ အရင်ခဏအနားယူချင်တယ်။ ” စိတ်စွမ်းအင်သွယ်ပို့ခြင်း အချိန်ပိုင်းတစ်ဖြတ် ပြီးဆုံးပြီးနောက် ရှချီချီက ဖုဖေးကို ပြောသည်။

ဖုဖေးသည် ရှချီချီကို ရုတ်တရက် လှမ်းကြည့်သည် : “ ချီချီ၊ ကိုယ့်အဖေ ဘယ်လိုနေလဲ? ”

“ စိတ်မပူပါနဲ့၊ သူ အဆင်ပြေမှာပါ။ ” ရှချီချီသည် အလွန်ယုံကြည်မှုရှိသည်။ ဖုဖေးရဲ့အဖေက Marshal, ဘယ်လိုလုပ် တစ်ခုခုဖြစ်နိုင်မှာလဲ? သူက ဤကဲ့သို့ဖြစ်နေခြင်းမှာ အများဆုံးအားဖြင့် သူ ဟန်ဆောင်နေသောကြောင့်သာ ဖြစ်နိုင်သည်။

ရှချီချီ၏စကားကို ကြားရသော် ဖုဖေးသည် သူ့ဖခင်ကို ပျောက်ကေင်းအောင် ကုသနိုင်မည်ဟု တွေးထင်ခဲ့ပြီး နောက်ဆုံးတွင်တော့ စိတ်သက်သာရာရသွားသည်။

ဤအချိန်တွင် ယန်ကျင်းဇီနှင့် ရှဇီရှိူ့တို့သည်လည်း တပ်မ ၈ ၏ တပ်မှူး ဖယ်ရှားခံရသော သတင်းများကို သိရှိခဲ့ကြပြီး အင်တာနက်ပေါ်ရှိ မှတ်ချက်များစွာကိုလည်း တွေ့ခဲ့ကြသည်။

“အရင်က Marshal အရှင် ရုတ်တရက် ပေါ်လာတာက Cossack ကို သူ့ရာထူးကနေ ဖယ်ဖို့ပဲမလား?”

“တပ်မ ၈ က နည်းနည်းရှုပ်တယ်လို့ သူများ ပြောတာ ငါ ကြားဖူးတယ်...”

“သိပ်မကြာသေးခင်တုန်းက ရု

တ်တရက် ထွက်လာတဲ့ သတင်းမှာလေ၊ ဗိုလ်ချုပ်ရှ ပျောက်သွားပြီးတော့ တပ်မ ၈ က သူ့ကို ဘယ်သူမှ သွားမရှာကြဘူး ဆိုတဲ့ဟာလား?” 

...

လူတိုင်း ပြောနေကြစဉ် ရှဝေချန်၏ အဖြစ်အပျက်တစ်ခုလုံးကို လူသိရှင်ကြား ထုတ်ပြန်ခဲ့သည်။

_____