အပိုင်း ၁၆၇ ( Mine Owner 16 )

စစ်ဌာနချုပ်သည် တပ်မ ၈ မှ လူအချို့ ကျူးလွန်ခဲ့သော တရားမဝင် ရာဇဝတ်မှုများ အားလုံးကို လျှို့ဝှက်ထားခြင်းမရှိဘဲ လူသိရှင်ကြား ထုတ်ပြန်ခဲ့သည်။

မှောင်ခိုကုန်ကူးခြင်း၊ လူကုန်ကူးခြင်း၊ လုပ်ဖော်ကိုင်ဖက် အရာရှိများကို သတ်ဖြတ်ခြင်း...

ရှဝေချန် ပျောက်ကွယ်သွားပြီး ပြန်ရောက်လာခဲ့သည့် ဖြစ်ရပ်ကို လွန်ခဲ့သော နှစ်ရက်အတွင်း အင်တာနက်ပေါ်တွင် ပြင်းပြင်းထန်ထန် ဆွေးနွေးခဲ့ကြသည်။ လူတချို့သည် ရှဝေချန်နှင့် သူ့လက်အောက်ရှိ တပ်သားများ ပျောက်ဆုံးပြီးနောက် တပ်မ ၈ ၏ ဘာကိုမျှ မလုပ်ဆောင်မှုကို တွေ့ရှိခဲ့ကြ၏။

သို့သော် လူအများသည် ဤမျှလောက်သော ကိစ္စများစွာ ပါဝင်ပတ်သက်နေမည်ကို တစ်ခါမှ မတွေးဆမိခဲ့ကြပေ။

ရှဝေချန် ပျောက်ဆုံးသွားရတဲ့ အကြောင်းအရင်းက သူ့လုပ်ဖော်ကိုင်ဖက် ဥပဒေချိုးဖောက်ခဲ့တာကို သူ ရှာတွေ့မိလို့ ရက်ရက်စက်စက် နှုတ်ပိတ်ခံလိုက်ရတာကြောင့်ပဲ!

ရှဝေချန်နှင့် သူ့တပ်သား ၃၀၀၀၊ နောက်ဆုံးတွင် လူတစ်ဒါဇင်သာ အသက်ရှင်လျက် ပြန်လာနိုင်ခဲ့ကြသည်... အဲ့လူတွေအကုန်လုံးက မဟာမိတ်ရဲ့ ထိပ်တန်းစစ်သည်တော်တွေ!

ယခင်ကမူ လူအများဟာ အသေးစိတ် အကြောင်းအရာကို မသိခဲ့ကြဘဲ ရှဝေချန်၏ ပျောက်ဆုံးသွားမှုမှာ စကြဝဠာထဲရှိ မတော်တဆမှုတစ်ခုကြောင့်ဟုသာ တွေးထင်ခဲ့ကြသည်။ ယခုမူ သူတို့သည် ဤကဲ့သို့သော ကိစ္စမျိုး ဖြစ်ပျက်ခဲ့သည်ဟု ရုတ်တရက် သိလိုက်ရသောအခါ အားလုံး ဒေါသပေါက်ကွဲသွားကြ၏။

“ဒီလူတွေက လူ့တိရစ္ဆာန်တွေပဲ!”

“ကြောက်စရာကောင်းလိုက်တာ၊ ဒီနေ့ဒီခေတ်မှာ ဒီလိုကိစ္စတွေ ဖြစ်နေဦးမယ်လို့ ငါ မထင်ခဲ့ဘူး!”

“တရားခံတွေကို သေဒဏ်ပေးရမယ်!”

“အရှင် Marshal ရုတ်တရက် ပေါ်လာပြီး Cossack ရာထူးကနေ အထုတ်ခံရတာ မဆန်းတော့ပါဘူး။ ဒါကြောင့်ကိုး!”

...

စစ်ဌာနချုပ်မှ ထုတ်ပြန်သော သတင်းအချက်အလက်ကို Allen ဟာ ဟိုးအရင်ကတည်းက စုံစမ်းခဲ့ပြီးဖြစ်သည်။ အကြောင်းအရာက အလွန်အသေးစိတ်ပြီး ၎င်းက အလွန်စိတ်တိုစရာကောင်းသည်။ သို့သော်လည်း လူတို့၏ဒေါသသည် ရာဇဝတ်ကောင်များကိုသာ ဦးတည်ပြီး အခြားသူများထံသို့ မရောက်ရှိချေ။

ထိုအတွက် အကြောင်းပြချက် ရှိသည်။

ပထမဦးစွာ ဤရာဇဝတ်မှုဆိုင်ရာ အချက်အလက်များနှင့်အတူ Cossack မှလွဲ၍ တပ်မှူးခုနစ်ဦး ပူးတွဲလက်မှတ်ရေးထိုးထားသော တောင်းပန်စာတစ်စောင်လည်း ပါရှိသည်။

တပ်မ ၁ မှ ၇ အထိ တပ်မှူးများ အားလုံးတို့သည် သူတို့၏စာများထဲတွင် နောင်တရကြောင်း ဖော်ပြထားကြပြီး ဤကဲ့သို့သော လူ့အမှိုက်ကို သူတို့ ဖယ်ရှားပစ်မည်ဖြစ်ကြောင်းကိုလည်း ဖော်ပြထားကြသည်။ သူတို့သည် မဟာမိတ်တပ်ဖွဲ့ဟာ လူအားလုံး၏တပ်ဖွဲ့ ဆက်လက်ဖြစ်နေဦးမည်ဟု အကြိမ်ကြိမ် အာမခံထားကြ၏။

ဤနည်းလမ်းကြောင့် လူတိုင်းတွင် တပ်မ ၈ မှလွဲ၍ အခြားတပ်မများထံသို့ မကောင်းသော ခံစားချက်များ မရှိကြတော့ချေ။ တပ်မ ၈ ကမူ...

တပ်မ ၈ ဟာ တပ်မတစ်ခု ဖြစ်သည်။ လူအနည်းစုကသာ ဤကိစ္စများကို ပြုလုပ်ခဲ့ကြသော်ငြား လူအများက မသိကြပေ။ တပ်မတစ်ခုလုံးကို အလွယ်တကူ မုန်းတီးသွားကြခြင်းမှာ သဘာဝကျသည်... သို့သော် တပ်မ ၈ တွင် ရှဝေချန် ရှိနေသည်။

ရှဝေချန်ကလည်း တပ်မ ၈ တွင် တာဝန်ထမ်းဆောင်နေသည်။ သို့ရာတွင် သူက ပဋိပက္ခ၌ မပါဝင်ဘဲ လုပ်ကြံခံရလုနီးပါး ဖြစ်ခဲ့သည်။ ဤအခြေအနေမျိုးတွင် လူအများသည် တပ်မ ၈ တစ်ခုလုံးကို တစ်ချက်တည်းနှင့် မဖြိုခွင်းနိုင်ကြတော့ပေ။

ထို့အပြင် စစ်ဌာနချုပ်က ရှဝေချန်နှင့် အခြားသူများ၏ အန္တရာယ်ရှိဂြိုဟ်ပေါ်မှ အတွေ့အကြုံအချို့ကို ထုတ်ပြန်ခဲ့သောကြောင့် ရှဝေချန်တွင် ပရိသတ်တစ်စု ရှိနေဆဲဖြစ်ကာ လူအချို့က မဟာမိတ်တပ်ဖွဲ့ဟာ ယုံကြည်ထိုက်ဆဲဟု ထင်မြင်လျက်ရှိကြသည်။

အတိုချုံ့ရသော် ဤကိစ္စသည် အလွန်တိုတောင်းသော အချိန်ကာလအတွင်း ကြယ်မြို့တော်၏ အကြီးဆုံးသတင်း ဖြစ်လာခဲ့ပြီး မရေမတွက်နိုင်သော လူများက ၎င်းကို အာရုံစိုက်ခဲ့ကြ၏။ 

တစ်ချိန်တည်းမှာပင် ရှဇီရှိူ့ တက်ရောက်ခဲ့သော ကျောင်း၌ ရှဇီရှိူ့ကို အနိုင်ကျင့်ခဲ့ကြသူများသည် ပြောစရာများ ပျောက်ဆုံးနေကြပြီဖြစ်သည်။

တကယ်တော့ သူတို့ထဲမှ အချို့ဟာ သာမန်မိသားစုများမှ ဖြစ်ကြသည်။ သူတို့သည် ဖုဖေး ကျေနပ်စေရန်အတွက်နှင့် ရှဇီရှိူ့ကို အကျပ်အတည်းဖြစ်စေခဲ့ပြီး သိက္ခာချခဲ့ကြ၏။

ယခုမူ ဖုဖေး၏ဖခင်က မတော်တဆဖြစ်ပြီး ရှဇီရှိူ့၏ဖခင်က...

စစ်ဌာနချုပ်မှ ထုတ်ပြန်သော သတင်းများအရ ရှဇီရှိူ့၏ဖခင်က ဤအဖြစ်ဆိုးကို ကြုံတွေ့ရပြီးနောက် သူ့စိတ်စွမ်းအင်အဆင့်မှာ အဆင့် S အထိ မြင့်တက်ခဲ့ပြီး သူ့ကို ဒုတိယဗိုလ်ချုပ်ကြီးအဖြစ် ခန့်အပ်လိမ့်မည်ဖြစ်သည်။

ရှဝေချန်က အသက်ငယ်သေးသည်။ ဤဖြစ်ရပ်ကြောင့် သူ့အနာဂတ်ဟာ သေချာပေါက် တောက်ပနေလိမ့်မည်။ အနှေးနှင့်အမြန် သူက ဗိုလ်ချုပ်ကြီးတစ်ဦး ဖြစ်လာလိမ့်မည်ပင်... သူတို့သည် ရှဇီရှိူ့ကို ဒုက္ခပေးခဲ့ကြပြီး သူတို့အား လက်တုံ့ပြန်ခြင်း ရှိ၊မရှိကို သူတို့ မသိပေ။

အထူးသဖြင့် ရှဇီရှိူ့နှင့် အတူအိပ်ဖူးသည်ဟု ကြွေးကြော်ခဲ့ဖူးသူများမှာ စာရွက်ကဲ့သို့ ဖြူဆုတ်နေကြသည်။

ရှဇီရှိူ့ကတော့ ကွဲပြားသည်။

ဤသတင်းကို တွေ့သော် သူ ဆွံ့အသွားသည်။

သူသည် ဖုဖေးကို အမြဲကြောက်ရွံ့နေခဲ့ပြီး ရလဒ်ကမူ ဖုဖေး၏ဖခင်က... ပြဿနာတက်တယ်လား?

နောက်ပြီးတော့ သူ့အဖေကလည်း ဒုတိယဗိုလ်ချုပ်ကြီး ဖြစ်သွားပြီလား?

ဒါတွေအကုန်လုံးက တကယ် အရမ်းကောင်းတယ်! အမှန်ပင်၊ ၎င်းက သူ့အပေါ် သိပ်ပြီး မသက်ရောက်ချေ...

သူသည် ယန်ကျင်းဇီနှင့် ဆုံတွေ့ပြီးကတည်းက အနည်းငယ် မှင်တက်နေခဲ့သည်ဟု ထင်မိသည်။ ယခု သူသည် အမှန်တကယ်ပင် နေ့စဉ်နေ့တိုင်း ယန်ကျင်းဇီနှင့်သာ ချိုမြိန်ပျော်ရွှင်စွာ အတူနေချင်မိတော့သည်။

ညစာစားပြီးနောက် ရှဇီရှိူ့သည် ယန်ကျင်းဇီကို ခေါ်၍ အပြင်ထွက်ပြီး ယန်ကျင်းဇီကို ကြယ်မြို့တော်နှင့် စတင်မိတ်ဆက်ပေးသည်။

“ အဲ့နားမှာ ကစားကွင်းတစ်ခု ရှိတယ်။ ငါ ငယ်ငယ်တုန်းက အဖေက ငါ ကစားဖို့ ခဏခဏ ခေါ်သွားပေးတယ်! ”

“ ဒီမှာ စားရတာ အရမ်းအရမ်း အရသာရှိတယ်! ”

“ ဟိုမှာ ပြတိုက်တစ်ခု ရှိတယ်။ ပိတ်ရက်တွေ အပြင်ထွက်တုန်းက အဲ့ကို ခဏခဏ သွားဖြစ်ခဲ့တယ်... ”

ရှဇီရှိူ့သည် ယန်ကျင်းဇီကို အမျိုးမျိုးသော အကြောင်းအရာများနှင့် စိတ်လှုပ်ရှားစွာ မိတ်ဆက်ပေးသည်။

ယန်ကျင်းဇီသည် ဂရုတစိုက် နားထောင်ပြီး သူ့စိတ်စွမ်းအင်က လူအုပ်ထဲသို့ ရံဖန်ရံခါ ဖြတ်သန်းကာ အမြင်မတော်သော လူအချို့ကို ရိုက်နှက်သည်။

ဂုဏ်သိက္ခာရှိတပ်ရဲ့ တပ်မှူးက သူ ဒိတ်လုပ်တာကို လာကြည့်မယ်လို့ မထင်ထားဘူး!

အရိုက်ခံရသော တပ်မှူး : “ ... ” အရှင် Marshal က အရှင် Marshal ဖြစ်ထိုက်ပါပေတယ်။ သူသည် ပြီးပြည့်စုံစွာ ရုပ်ဖျက်လာခဲ့သည်ဟု ထင်မိသော်ငြား တစ်ချက်ကြည့်ရုံဖြင့် သူ့ကို သိသွားလိမ့်မည်ဟု သူ တစ်ခါမှ မတွေးမိခဲ့ပေ။

ယန်ကျင်းဇီနှင့် ရှဇီရှိူ့တို့ အတူဈေးဝယ်ထွက်နေကြစဉ် Cossack က အိမ်တွင် ရှိနေသည်။

ရှချီချီသည် Cossack ကို ကူညီ၍ အချိန်တစ်ခုစာ စိတ်စွမ်းအင်ဖြီးသင်ပေးပြီးလျှင် ခဏအနားယူကာ သူ(မ) နောက်တစ်ကြိမ် အနားယူသောအခါ ဖုဖေး၏မျက်နှာက အလွန်အရုပ်ဆိုးနေသည်ကို သူ(မ) သတိပြုမိသည်။

“ ဖုဖေး၊ ဘာဖြစ်လို့လဲ? ” ရှချီချီက မေးသည်။

“ ချီချီ၊ ကိုယ့်အဖေ ရာထူးကနေ အထုတ်ခံရတယ်... ” ဖုဖေးက ပြောပြီး ရှချီချီကို အင်တာနက်မှ သတင်းများ ပြသခဲ့သည်။

ရှချီချီက ဤကိစ္စများကို အနှေးနှင့်အမြန် သိသွားလိမ့်မည်ဖြစ်သည်။

ရှချီချီသည် အနည်းငယ် ကြည့်ရှုပြီး ဆက်မဖတ်ဘဲ ဖုဖေးကို ပြောသည် : “ ဖုဖေး စိတ်မပူပါနဲ့။ အားလုံး အဆင်ပြေသွားမှာပါ! ” တစ်ခုခုမှားနေပြီဟု သူ(မ) ဖျတ်ခနဲ ခံစားမိလိုက်သော်လည်း စာအုပ်ထဲရှိ နောက်ခံဝန်းကျင်ကို တွေးမိသောအခါ သူ(မ) စိတ်ပြန်အေးသွားသည်။

စာအုပ်ထဲတွင် Marshal ရာထူးဟာ ဓနဥစ္စာများစွာဖြင့် မျိုးရိုးစဉ်ဆက် လွှဲပြောင်းခံရသည်... Cossack သည် ယခင်က အတွေ့အကြုံ အနည်းငယ် လိုချင်ခဲ့သောကြောင့် ဖြစ်နိုင်သည်။ သူက တပ်မ ၈ ၏ တပ်မှူး ဖြစ်လာခဲ့သည်။ ယခု တပ်မ ၈ တွင် တစ်ခုခုဖြစ်သောအခါ သူ တပ်မှူး မဖြစ်ချင်တော့သည်မှာ ပုံမှန်ပင်။

အဲ့တော့ အခု အွန်လိုင်းမှာ Cossack ကို ကျိန်ဆဲနေတဲ့ လူတွေ အများကြီး ရှိနေရင်ရော ဘာအရေးလဲ? အချိန်ကျလာလျှင် သူ့အထောက်အထားကို ထုတ်ဖော်လိမ့်မည်... ရှချီချီသည် ထိုမြင်ကွင်းကို တွေးမိရုံဖြင့် စိတ်လှုပ်ရှားမိသည်။

သူ(မ)သည် ဖုဖေးကို ချက်ချင်း နှစ်သိမ့်ပေးခဲ့သည်။

ဖုဖေးသည် အပြစ်ရှိသကဲ့သို့ ခဏခံစားလိုက်ရသည်။ ရှချီချီက သူ့အပေါ် တကယ် ကောင်းသည်။ သူသည် သူ(မ)ကို မြတ်နိုးသင့်သော်ငြား သူ့စိတ်ထဲတွင် ရှဇီရှိူ့ ရှိနေသည်...

စစ်ဌာနချုပ်။

Seren သည် ဧည့်သည်များကို စာရင်းသွင်းနေဆဲဖြစ်သည်။

သူသည် လွန်ခဲ့သော ရက်အနည်းငယ်က အရှင် Marshal ကို တွေ့ခဲ့ရ... မဟုတ်သေး၊ အရှင် Marshal ၏ ကားကို တွေ့ခဲ့ရသည်။ ယင်းက သူ့ကို သူ့အလုပ်တွင် ပိုမိုစိတ်အားထက်သန်စေသည်။ ယနေ့တွင် တပ်မ ၈ ၏ အရေးကိစ္စများ ထွက်ပေါ်လာပြီး မရေမတွက်နိုင်သော လူများက လာရောက်လည်ပတ်ကြသော်ငြား သူသည် အားအင်ပြည့်ဝပြီး လူတိုင်းအား ပြုံးပြလျက်ရှိသည်။

တိုက်ဆိုင်စွာပင် သူသည် ဝေးလံခေါင်သီသော ဂြိုဟ်မှ ဝန်ကြီးချုပ်ကို နောက်တစ်ကြိမ် တွေ့ရလိုက်ပြန်သည်။

“ ဟယ်လို! ” Seren သည် ဤလူကို ပြုံးကာ နှုတ်ဆက်လိုက်သည်။ သူတို့သည် ယခင်က အရှင် Marshal ၏ ကားကို အတူမြင်ဖူးခဲ့ပြီး သူတို့တွင် ကောင်းမွန်သော ဆက်နွယ်မှု ရှိသည်ဟု သူ ထင်မိသည်။

“ ဟယ်လို။ ” ဝန်ကြီးချုပ် စကားပြောရာတွင် သူ့အသံမှာ ရှိုက်သံနှင့် အမှန်တကယ် ဆို့နင်နေခဲ့သည်။

Seren အံ့ဩသွားသည် : “ ဘာဖြစ်လို့လဲ? ”

“ ငါ့ဂြိုဟ်မှာ အပြင်ကို အလုပ်သွားလုပ်ပြီး တစ်ခါမှ ပြန်ရောက်မလာတော့တဲ့ လူငယ်တွေ အများကြီး ရှိတယ်။ ငါ ဒီအတွက် ဒီကို လာရတယ်။ ငါ... ” ဝန်ကြီးချုပ်က မငိုနိုင်ပေ။

သူသည် ဘာများ ဖြစ်နေသနည်းဟု သိရန် မျှော်လင့်လျက် စစ်ဌာနချုပ်သို့ လာခဲ့ပြီး ယခုမူ ၎င်းကို သူ သိလိုက်ရသည်။ 

“ ရာဇဝတ်သားတွေကို တရားစီရင်ရမယ်! ” Seren က စကားပြောကာ ဝန်ကြီးချုပ်ကို ကူညီ၍ ဖောင်ဖြည့်ပေး‌နေသည်။

“ ဟုတ်တယ်။ ” ဝန်ကြီးချုပ်က သူ့မျက်ရည်များကို လက်ကိုင်ပုဝါနှင့် သုတ်လိုက်သည် – အနည်းဆုံးတော့ အနာဂတ်မှာ မတရားခံရသူတွေ ရှိမလာတော့ဘူးမလား?

ချစ်ရသူနှင့် အတူရှိနေလျှင် အချိန်များဟာ အလွန်လျင်မြန်စွာ ကုန်ဆုံးတတ်သည်။ ယန်ကျင်းဇီနှင့် ရှဇီရှိူ့တို့ အေးအေးလူလူ လမ်းလျှောက်နေစဉ် မှောင်လာခဲ့သည်။

နောက်ဆုံးတွင် ရှဇီရှိူ့က ဆိုသည် : “ ငါတို့... ပြန်သင့်ပြီထင်တယ်။ ”

“ အင်း ” ယန်ကျင်းဇီက ပြောသည် : “ ပြန်ရအောင်! ”

ယန်ကျင်းဇီနှင့် ရှဇီရှိူ့တို့ ပြန်ရောက်သောအခါ နောက်ကျနေပြီဖြစ်သော်လည်း အိမ်တွင် လင်းထိန်နေဆဲဖြစ်သည်။

ရှမိသားစုက ယခုထိ မပြန်သေးဘဲ အခြားသူများကလည်း ရောက်လာကြသည်။

ကြိုးဆွဲကြံစည်ကြခြင်း၊ တောင်းပန်ကြခြင်းနှင့် အမျိုးစုံပင်။ ယခုအချိန်တွင် သူတို့ကို လက်ခံနေသူမှာ Allen ဖြစ်သည်။

ယန်ကျင်းဇီနှင့် ရှဇီရှိူ့တို့ လက်တွဲလျက် ရောက်လာကြသောအခါ...

“ ဒါက ရှသခင်လေးလား? သူက တကယ် ချောမောတယ်! ”

“ ဇီရှိူ့၊ မင်း ငါ့ကို မှတ်မိလား? မင်း ငယ်ငယ်တုန်းက ငါ မင်းကို ဖက်တောင် ဖက်ဖူးတယ်! ”

“ ရှသခင်လေး၊ ငါ့သားနဲ့မင်းက အတန်းဖော်တွေ... ”

...

ဤလူများသည် ရှဇီရှိူ့ကို တွေ့သောအခါ အလွန်စိတ်အားထက်သန်ကြသော်ငြား ယန်ကျင်းဇီကို တွေ့သောအခါ သိပ်ပြီး စိတ်အားမထက်သန်ကြပေ။

ဤတစ်ယောက်ဟာ ဝေးလံသော ဂြိုဟ်မှ မိုင်းပိုင်ရှင်တစ်ဦး ဖြစ်သည်ကို သူတို့အားလုံး သိကြသည်။

ဤလူက အတော်ချမ်းသာသော်လည်း ကြယ်မြို့တော်ရှိ အင်အားကြီးသူတို့က ခရက်ဒစ် မီလီယံရာချီများစွာ တန်ဖိုးရှိသော ကိုယ်ပိုင်ယာဉ်များစွာကို ပိုင်ဆိုင်ကြသည်။ သူတို့နဲ့ယှဉ်လိုက်ရင် ယန်ကျင်းဇီက ဘာလဲ?

သို့သော် ယန်ကျင်းဇီက ရှဇီရှိူ့နှင့် နှောင်ကြိုးသွယ်ပြီးဖြစ်ရာ သူတို့သည် ယန်ကျင်းဇီကို မရိုင်းပြကြပေ။ ရှဇီရှိူ့ ယခင်က အောက်ဆုံးတွင် ရှိနေစဉ် သူတို့ မကူညီခဲ့သည်ကိုသာ သူတို့ နောင်တရမိသည်။

ရှဇီရှိူ့သည် ဤလူများ၏ မီးတောက်နေသော အကြည့်များဖြင့် စိုက်ကြည့်ခံရကာ ဘာလုပ်ရမှန်းမသိဖြစ်နေရှာသည်။

သူ့ကို မပြောနှင့်၊ ရှဝေချန်နှင့် ရှအမျိုးသမီးတို့ပင်လျှင် မည်သို့ဖြေရှင်းရမည်မှန်း မသိကြချေ။ ကံကောင်းစွာဖြင့် Allen က ထိုနေရာတွင် ရှိနေခဲ့သည်။

Allen သည် အမှန်တကယ်ပင် လူတိုင်းကို ကောင်းစွာ လက်ခံခဲ့ပြီး နှစ်ရက်အကြာတွင် ရှမိသားစုက ဂုဏ်ပြုစားပွဲ ကျင်းပမည်ဖြစ်ကြောင်း ပြောကာ လူတိုင်းကို ပွဲတက်ရောက်ရန် ဖိတ်ခေါ်သည်... ထို့နောက်တွင် ရိုးရိုးရှင်းရှင်းပင် အားလုံးကို ပြန်ပို့လိုက်သည်။

Allen က အရာရာကို လွယ်ကူစွာ ကိုင်တွယ်ဖြေရှင်းလိုက်သည်ကို တွေ့ရသောအခါ ရှအမျိုးသမီးသည် အထင်ကြီးမိသည် : “ Allen, မင်းက အရမ်းအံ့ဩဖို့ကောင်းတာပဲ! ”

“ ကျွန်တော် လုပ်သင့်တာကိုပဲ လုပ်ခဲ့တာပါ။ ” Allen က ပြန်ဖြေသည်။

“ ဒီပွဲ... ” ရှအမျိုးသမီးက Allen ကို ကြည့်သည်။ တကယ်တော့ သူ(မ)က သာမန်လူတစ်ဦး ဖြစ်သဖြင့် ယခင်နှစ်များတွင် ရှမိသားစုထံမှ ကောင်းမွန်စွာ ဆက်ဆံခြင်းကို မခံစားခဲ့ရခြင်း ဖြစ်သည်။ ရှဝေချန်က ဗိုလ်ချုပ်တစ်ဦး ဖြစ်ခဲ့သော်ငြား သူ့တွင် လူမှုရေးပွဲအခမ်းအနားများ သိပ်မရှိခဲ့ရာ သူ(မ)သည် ဤကိစ္စများတွင် သိပ်မတော်ပေ။

“ မဒမ် စိတ်ချထားလို့ရတယ်။ ဒီကိစ္စကို ကျွန်တော့်ဆီ လုံးဝ အပ်ထားနိုင်ပါတယ်။ ” Allen က ဆိုသည်။

“ ဒါဆို ငါ မင်းကိုပဲ ဒုက္ခပေးရ‌တော့မယ်! ” ရှအမျိုးသမီးက ပြောသည်။

“ ဒုက္ခမများပါဘူး။ ဒါက နဂိုကတည်းက အိမ်တော်ထိန်းတစ်ယောက်ရဲ့ တာဝန်ဝတ္တရားပါပဲ။ ” Allen က ပြန်ပြောသည်။

ရှဝေချန် : “ ... ” အံ့ဩစရာပင်၊ သူသည်လည်း အဆင့် S စစ်သည်တော် အိမ်တော်ထိန်း၏ ပြုစုဂရုစိုက်မှုကို ကိုယ်တိုင်ကိုယ်ကျ ခံစားနိုင်နေသည်... 

နောက်ဆုံးတွင် ထိုလူများ ထွက်သွားခဲ့ပြီး ယန်ကျင်းဇီသည် အဆုံး၌မူ ရှဇီရှိူ့နှင့်အတူ အခန်းထဲသို့ သွား၍ နှစ်ယောက်တည်းကမ္ဘာတွင် နေနိုင်ပြီဖြစ်သည်။

သူတို့နှစ်ဦးသည် မနေ့ညက အချင်းချင်း မရင်းနှီးကြသေးသောကြောင့် စကားများသာ ပြောခဲ့ကြပြီး / ရုပ်ပိုင်းဆိုင်ရာ ထိတွေ့မှု / လုံးဝ မရှိခဲ့ချေ... အဟမ်း အဟမ်း၊ ဒီည အဆင်ပြေပါ့မလား?

ယန်ကျင်းဇီသည် တစုံတခုကို မလွှဲရှောင်သာ တွေးနေမိသည်။

ရှဇီရှိူ့၏မျက်နှာသည် ရုတ်တရက် နီမြန်းသွားပြီး ယန်ကျင်းဇီ ပြုလုပ်ချင်နေသော အရာကို သူ ခံစားမိသည်... သူသည် ထွက်ပြေးချင်သော်လည်း မထွက်သွားနိုင်ပေ။ ဒါ... ဒါ...

ဟုတ်သည်၊ သူသည်လည်း ယန်ကျင်းဇီနှင့် အမှန်တကယ် အတူရှိချင်မိသည်။

နှောင်ကြိုးတောင် သွယ်ပြီးပြီ၊ ဘာကြောက်စရာရှိလဲ?

ပြောရမည်ဆိုလျှင် စစ်သည်တော်နှင့် အကူဆရာ အများစုသည် သာမန်လူများကဲ့သို့ ဦးစွာချစ်ကြိုက်ပြီးမှသာ နှောင်ကြိုးဖွဲ့ကြသည်။ သို့ရာတွင် သူတို့ကတော့ လုံးဝ ပြောင်းပြန်ပင်...

မည်သို့ပင်ဖြစ်စေ ယန်ကျင်းဇီအတွက် / အလွန်ပျော်ရွှင်ဖွယ် / ညတစ်ည ဖြစ်ခဲ့သည်။

နှစ်မျိုးနှစ်သွယ်သော ရုပ်ပိုင်းဆိုင်ရာနှင့် စိတ်ပိုင်းဆိုင်ရာ သာယာမှုများက သူ့ကို ရှဇီရှိူ့နှင့် လုံးထွေးနေကာ ဘယ်တော့မှ မခွဲခွာချင်အောင် ပြုလုပ်ခဲ့၏။

ကံမကောင်းစွာဖြင့် အရုဏ်တက်လာသည်။

အခန်းထဲသို့ လိုက်ကာများကြားထဲမှ နေအလင်း ဝင်လာသောအခါ ရှဇီရှိူ့သည် ယန်ကျင်းဇီကို တွန်းထုတ်ကာ သူ့စိတ်စွမ်းအင်အားလုံးကို သိမ်းပြီး ခေါင်းကိုသာ ဖော်လျက် သူ့ကိုယ်သူ စောင်ထည်နှင့် ရစ်ပတ်လိုက်သည် : “ မင်း ငါ့ကို ထပ်မထိနဲ့တော့၊ မင်းစိတ်စွမ်းအင်နဲ့လည်း ငါ့ကို ထိလို့မရဘူး! ငါ အိပ်ချင်ပြီ! ”

လွန်ခဲ့သော ရက်အနည်းငယ်က သူသည် သူ့အနာဂတ်ကို စိုးရိမ်ပူပန်နေခဲ့ပြီး ကောင်းမွန်စွာ အိပ်မပျော်ခဲ့ဘဲ ဟိုယခင်ညကလည်း ယန်ကျင်းဇီနှင့် စကားပြောကာ တစ်ညလုံး မအိပ်ခဲ့ပေ။ မနေ့ညကဆို ပြောစရာတောင် မလိုဘူး!

သူ မခံနိုင်တော့ဘူး!

ယန်ကျင်းဇီနဲ့ ခွဲနေဖို့ သေချာပေါက် လိုတယ်၊ ယန်ကျင်းဇီ သူ့ကို ဆွဲဆောင်မှာကို သူ ခွင့်မပြုနိုင်တော့ဘူး!

ရှဇီရှိူ့သည် ဤသို့တွေးမိပြီးနောက် ယန်ကျင်းဇီကို အနည်းငယ် ထိချင်သွားကာ သူ့စိတ်စွမ်းအင်ပင်လယ်ထဲမှ သေးငယ်သော စိတ်စွမ်းအင်အမျှင်တန်းတစ်တန်း ထွက်လာပြီး ယန်ကျင်းဇီ၏စိတ်စွမ်းအင်ကို သွားထိလိုက်သည်။

ယန်ကျင်းဇီ : “ ... ” ကိုယ်က မင်းကို

ထိခွင့်မရှိပေမယ့် မင်းက ကိုယ့်ကို လာထိတယ်...

____