အပိုင်း ၁၆၈ ( Mine Owner 17 )

သူ့ကို တွယ်တာခြင်းများ ပြည့်နှက်နေသော ရှဇီရှိူ့၏ စိတ်စွမ်းအင်အမျှင်ငယ်လေးများမှာ ချစ်စရာကောင်းလွန်းသည်...

ယန်ကျင်းဇီသည် ၎င်းကို သူ့စိတ်စွမ်းအင်နှင့် ရစ်ပတ်လိုက်သည်။ သို့သော် ယခင်ကကဲ့သို့ ၎င်းကို ဖျစ်ညှစ်မည့်အစား သူသည် သူ့စိတ်စွမ်းအင်ကို ပျော့ပျောင်းစေကာ စတင်ချော့မော့လိုက်သည်။

၎င်းက ပျော်ပျော်ရွှင်ရွှင် လူးလွန့်သွားပြီး လှုပ်ရှားခြင်း မရှိတော့ဘဲ ရှဇီရှိူ့လည်း အိပ်ပျော်သွားသည်။

အိပ်ပျော်သွားပြီးနောက် ရှဇီရှိူ့၏စိတ်စွမ်းအင်က စိတ်လိုလက်ရ ထွက်လာကာ ယန်ကျင်းဇီ၏စိတ်စွမ်းအင်နှင့် လုံးထွေးလာသည်။

ယန်ကျင်းဇီသည် သူ့ကို နမ်းလိုက်ပြီး သူ့ထံမှ လာသော ပြင်းထန်သည့် အိပ်ငိုက်ခြင်းကို ခံစားလိုက်ရကာ အိပ်ချင်သွားသည်...

အောက်ထပ်တွင် Allen သည် ရှဝေချန်နှင့် သူ၏ဇနီးအတွက် အရသာရှိသော နံနက်စာကို ပြင်ဆင်ပေးခဲ့သည်။

ရှဝေချန်သည် အဆင့် S သို့ အဆင့်တက်ထားသော်ငြား သူ့ခွန်အားက Allen အောက် များစွာနိမ့်ကျသည်ကို အလွန်ကောင်းစွာ သိရှိထားရာ သူသည် Allen နှင့် ရင်ဆိုင်ရချိန်တွင် အမြဲတစေ အနည်းငယ် အဆင်မပြေဖြစ်မိနေသည်။ 

သူသည် သူ့အတွက် Allen ပြုလုပ်ပေးထားသော နို့လက်ဖက်ရည်ကို လက်နှစ်ဖက်နှင့် ယူကာ မနေနိုင်ဘဲ မေးမိသည် : “ ဘာလို့ မင်း ပြင်ထားတဲ့ထဲ... ယန်ကျင်းဇီအတွက် မပါတာလဲ? ”

Allen က ဆိုသည် : “ သခင်လေးက နောက်ကျမှ နိုးလောက်တယ်... ဒီရက်တွေမှာ သူ ကောင်းကောင်းမအိပ်ရသေးဘူး။ ”

ရှဝေချန် : “ ကောင်းကောင်း မအိပ်ခဲ့ဘူးလား? ” SSS အထက်တောင် ကျော်လွန်တဲ့ စိတ်စွမ်းအင်အဆင့်နဲ့ စစ်သည်တော်က ဆယ်ရက် ဒါမှမဟုတ် လတစ်ဝက်လောက် မအိပ်ရင်တောင်မှ ပြဿနာမရှိဘူးမလား?

ရှအမျိုးသမီးသည် ခင်ပွန်းဖြစ်သူ၏စကားကို ကြားသောအခါ ခင်ပွန်းဖြစ်သူကို မျက်စောင်းခဲလိုက်သည် – သူ(မ)တို့ ချစ်ခင်ခဲ့ကြတုန်းက ရှဝေချန်လည်း အိပ်ရာမထနိုင်ဘူး! သူ(မ)ကလည်း အိပ်ရာမထနိုင်ခဲ့ဘူး!

အထူးသဖြင့် နှောင်ကြိုးဖွဲ့ပြီးခါစကာလ။

အဟမ်း၊ အဲ့ဒါက နှစ်ဆပျော်စရာကောင်းတော့ သာမန်လူတွေ သည်းမခံနိုင်ဘူး။

ရှဝေချန်သည် သူ့ဇနီး၏ ဆိုလိုရင်းကို စိတ်စွမ်းအင်ဆက်သွယ်ချက်မှတဆင့် နားလည်ခဲ့သည်... ဟုတ်ပြီ၊ သူ ဘာဖြစ်နေလဲ သိသွားပြီ။

ယန်ကျင်းဇီနှင့် ရှဇီရှိူ့တို့သည် ညနေအထိ အိပ်ခဲ့ကြသည်။

အိပ်ပျော်နေကြစဉ်အလယ်၌ ယန်ကျင်းဇီသည် နိုးလာပြီး အိပ်ပျော်နေသော ရှဇီရှိူ့က အလွန်ကောင်းစွာ အိပ်မောကျနေသည်ကို တွေ့ကာ ပြန်အိပ်ပျော်သွားတော့သည်။

ဤကာလအတွင်း ရှဇီရှိူ့သည်လည်း နိုးလာပြီး သူ့စိတ်စွမ်းအင်ကို ယန်ကျင်းဇီက ထွေးပွေ့လျက် အထူးနှစ်နှစ်ခြိုက်ခြိုက် အိပ်စက်နေသည်ကို တွေ့သောအခါ ဆက်အိပ်လိုက်သည်။

ညနေရောက်မှသာ နောက်ဆုံးတွင် သူတို့နှစ်ဦးသည် အတူတူ အိပ်ရာနိုးလာခဲ့ကြသည်။

အချိန်ကြည့်ပြီးနောက် ရှဇီရှိူ့ အနည်းငယ် ကြောင်သွားရသည် — ညစာစားချိန်တောင် နီးနေပြီ!

ယန်ကျင်းဇီက သူ့ခံစားချက်များကို ခံစားရပြီး နှစ်သိမ့်ပေးသည် : “ ဘာပဲဖြစ်ဖြစ် ဒီလောက်နောက်ကျနေပြီဆိုတော့ နည်းနည်း‌ထပ်နောက်ကျလည်း ကိစ္စမရှိဘူး။ ”

ရှဇီရှိူ့ : အမှန်ပဲ... 

နှစ်ဦးသား ရေချိုးခန်းထဲသို့ အတူဝင်ပြီး ဆေးကြောသန့်စင်ကာ ဤအချိန်တွင် ရှဇီရှိူ့က ရုတ်တရက် ပြောသည် : “ ကျင်းဇီ၊ မင်း နေတဲ့ဂြိုဟ်က တော်တော်လေး နေပူတာလား ဒါမှမဟုတ် မင်း နေရောင်ကာကွယ်ဖို့ အရမ်းအာရုံမစိုက်ခဲ့တာလား? ”

ယန်ကျင်းဇီ၏ ခန္ဓာကိုယ်က အလွန်ဖြူသော်လည်း လည်ပင်းမှစ၍ တဖြည်းဖြည်း စတင်မည်းလာကာ သူ့လက်များကလည်း...

ယန်ကျင်းဇီ : “ ... ”

ယန်ကျင်းဇီသည် ဒုတ်ခနဲ နှလုံးခုန်ကာ မှန်ထဲရှိ သူ့ပုံရိပ်ကို ကြည့်လိုက်သည်။

ဤနှစ်ရက်စလုံး အလွန်ကြည်နူးဖွယ်ကောင်းနေခဲ့သောကြောင့် သူ ဝန်ခံဖို့ပင် မေ့နေခဲ့သည်။

နောက်ပြီး... ဤအချိန်တွင် သူက ရုပ်ဖျက်ထားဆဲဖြစ်သည်။

သူ့ရုပ်ဖျက်မှုသည် ပရော်ဖက်ရှင်နယ် အလှပြင်ကိရိယာမှ ထွက်ပေါ်လာသည်။ ဤအလှပြင်ကိရိယာကို စနစ်ဖွင့်ပြီးနောက် ကလစ်တစ်ချက်နှိပ်ရုံဖြင့် “မိတ်ကပ်လိမ်း”နိုင်ပြီဖြစ်ပြီး ၎င်းက အသားအရေကို မထိခိုက်စေဘဲ ဆေးကြောခြင်းကြောင့် မပျက်သွားရန်လည်း အာမခံသည်။ မိတ်ကပ်ဖျက်ဖို့ဆိုရင် ဒီပရော်ဖက်ရှင်နယ် အလှပြင်ကိရိယာကို သုံးရလိမ့်မယ်!

ဤကဲ့သို့ ပရော်ဖက်ရှင်နယ် အလှပြင်ကိရိယာနှင့်ဆိုလျှင် မျက်နှာပြောင်းလဲဖို့ပင် ပြဿနာမရှိဘဲ သဘာဝအတိုင်း ပုံစံကျရန် သေချာစေသည်။ သူသည် အလှပြင်ကိရိယာဖြင့် သူ့ကိုယ်သူ အနည်းငယ် မည်းစေကာ သူ့အသားအရေကို အနည်းငယ် ပိုကြမ်းတမ်းစေခဲ့သည်။ ဘယ်သူကမှ တစ်ခုခုမှားနေကြောင်း မပြောနိုင်ကြချေ။

သူကိုယ်တိုင်ပင်လျှင် ကျင့်သားရနေပြီဖြစ်သည်။

အခု... ယန်ကျင်းဇီသည် မှန်ထဲမှ “လူမည်း” ကို သေချာကြည့်လိုက်သည်။

“ ငါ မင်းအတွက် ပိုကောင်းတဲ့ နေရောင်ကာစပရေးတွေ နောက်ကျရင် ဝယ်ပေးမယ်။ မင်း အနာဂတ်မှာ အဲ့ဒါတွေကို သုံးဖို့ သတိရရမယ်။ ”ရှဇီရှိူ့သည် လျှပ်စစ်သွားတိုက်တံကို ထုတ်ယူပြီး သူ့ပါးစပ်ထဲတွင် ထည့်ကာ ပလုတ်ပလောင်းဖြင့် သွားတိုက်နေသည်။

ယန်ကျင်းဇီက တကယ် ချောမောသည်၊ ကြည့်လေလေ ပိုချောလာလေလေပင်။ သို့သော် အသားအရေက ဆိုးလွန်းသည်။

သူ့ဘေးနားတွင် ယန်ကျင်းဇီက တိတ်တဆိတ် မျက်နှာသစ်လိုက်သည်။ တကယ်တော့ သူ့မျက်နှာပေါ်မှ “မိတ်ကပ်” မှာ နေရောင်ကာကွယ်မှုနှင့် အတူပေါင်းစပ်ထားသည်။

နှစ်ဦးသား စကားစမြည်ပြောနေကြစဉ် ရှဇီရှိူ့၏ ဆက်သွယ်ကိရိယာ အသံမြည်လာပြီး ရှဇီရှိူ့သည် ၎င်းကို ကြည့်ကာ ရှက်သွားသည်။ သူသည် အမြှုပ်များကို အမြန်ထွေးထုတ်ပြီး မျက်နှာသစ်ကာ အိပ်ခန်းထဲသို့ ပြေးဝင်သွား၏ : “ ငါ့မိဘတွေက ငါတို့ကို ညစာစားဖို့ အောက်ဆင်းလာစေချင်တယ်။ ”

ယန်ကျင်းဇီသည်လည်း အမြန်အဝတ်အစားလဲလိုက်သည် – မြန်မြန်သွားစားရမယ်!

သူတို့သည် အလျင်အမြန် အဝတ်ဝတ်လိုက်ကြပြီး တစ်ချိန်တည်းတွင်ပင် သူတို့ ဝတ်ဆင်ထားသည်များမှာလည်း စုံတွဲဝတ်စုံများ ဖြစ်နေသည်။ ထို့နောက် သူတို့သည် အောက်ထပ်သို့ အတူတူဆင်းခဲ့ကြသည်။

ရှဝေချန်သည် စစ်ဌာနချုပ်ရှိ သူ့အလုပ်ကို လုပ်ဆောင်ပြီးကာ အိမ်ပြန်ရောက်နေပြီဖြစ်သည်။ ထိုအခါမှသာ သူသည် သိလိုက်ရသည်၊ အချိန်တော်တော်ကြာ‌ပြီးတောင်မှ သူ့သားက အိပ်ရာမထသေးချေ။

သူသည် ရှင်းမပြနိုင်စွာ အနည်းငယ် စိတ်ဓာတ်ကျသွားခဲ့ရသည်။

ကံကောင်းစွာဖြင့် မကြာမီမှာပဲ သူ့သားက အောက်ဆင်းလာသည်။ 

ရှဝေချန်က ရှအမျိုးသမီးကို ယန်ကျင်းဇီ၏ ပုဂ္ဂိုလ်အထောက်အထားအကြောင်း မပြောပြခဲ့သော်လည်း ရှအမျိုးသမီးသည် ယန်ကျင်းဇီကို သဘောကျဆဲဖြစ်သည်။

ဤသည်မှာ သူ(မ)သား၏ နှောင်ကြိုးသွယ်လက်တွဲဖော် ဖြစ်ပြီး သူ(မ)သားက သူ့ကို အလွန်ချစ်ခင်နှစ်သက်လျက်ရှိရာ သေချာပေါက်ပင် သူ(မ)လည်း သူ့ကို သဘောကျသည်။

“ ကျင်းဇီ၊ ညစာစားချိန် ရောက်ပြီ။ ဒါနဲ့ မင်းတို့အဖေ ဒုတိယဗိုလ်ချုပ်ကြီး ဖြစ်လာတာကို ဂုဏ်ပြုဖို့ မနက်ဖြန်မှာ ဂုဏ်ပြုစားပွဲ ကျင်းပပြီး ကျင်းဇီကို လူတိုင်းနဲ့ မိတ်ဆက်ပေးဖို့ စီစဉ်ထားတယ်။ ပြီးရင် ငါတို့ မင်္ဂလာပွဲအတွက် စပြင်ဆင်လို့ရပြီ... ” ရှအမျိုးသမီးက ပြုံးကာ ပြောသည်။

ယခုခေတ်တွင် လူတိုင်းက ကိစ္စများကို မြန်ဆန်သော အရှိန်အဟုန်ဖြင့် လုပ်ဆောင်နေကြသည်။ ပါတီပွဲကျင်းပရန် သူတို့ စီစဉ်နေပြီဖြစ်ရာ တတ်နိုင်သမျှ အမြန်ဆုံး လုပ်ဆောင်ခြင်းက ကောင်းမွန်လိမ့်မည်။

“ အမေ ပြောသမျှကို ကျွန်တော် လိုက်နာမှာပါ။ ” ယန်ကျင်းဇီ ဝမ်းသာအားရ ဖြစ်သွားသည် : “ မင်္ဂလာပွဲက ဘယ်တော့လဲ? ”

ရှဇီရှိူ့သည် သန်ဘက်ခါတွင် မင်္ဂလာပွဲကျင်းပချင်နေသော ယန်ကျင်းဇီကို ဆွဲထားပြီး သူ့အမေကို မေးလိုက်သည် : “ အမေ၊ မနက်ဖြန် ပါတီပွဲအတွက် ငွေလုံလောက်ရဲ့လား? ”

“ လုံလောက်တယ်။ Allen က အရမ်းတော်တယ်။ သူက အရမ်းစရိတ်သက်သာတဲ့ အစီအစဉ်ကို ဆွဲပေးတယ်။ ၂၀၀,၀၀၀ ပဲ ကျတယ်။ ” ရှအမျိုးသမီးက အလွန်ပျော်နေသည်။

“ ကောင်းတာပေါ့။ ” ရှဇီရှိူ့သည် Allen ကို လှမ်းကြည့်သည် : “ မစ္စတာ Allen, ကျွန်တော်နဲ့ ကျင်းဇီရဲ့ မင်္ဂလာပွဲအတွက် အစီအစဉ်ဆွဲပေးနိုင်မလား? မင်္ဂလာပွဲကုန်ကျစရိတ်ကတော့... ”

“ မင်း ကြိုက်သလောက် သုံး! ” ယန်ကျင်းဇီက မတုန့်ဆိုင်းပေ။

ရှဇီရှိူ့ : “ ဒါဆို တစ်သန်း။ ” ယခင်နှစ်တွင် အလွန်ဆင်းရဲခဲ့သဖြင့် ယခုမူ ရှဇီရှိူ့သည် ငွေကိုလည်း သေသေချာချာ တွက်ချက်တတ်လာသည်။

ကြယ်မြို့တော်ရှိ လူများစွာဟာ မင်္ဂလာပွဲတစ်ပွဲအတွက် မီလီယံရာချီများစွာ သို့မဟုတ် ဘီလီယံများစွာကိုပင် အသုံးပြု၍ မျိုးစုံကြွားဝါကြသော်ငြား သူ သိသလောက်ဆိုလျှင် တစ်သန်းဖြင့် ကောင်းမွန်သော မင်္ဂလာပွဲတစ်ပွဲကို ကျင်းပနိုင်ပေသည်။

သာမန်မိသားစုများစွာအတွက်မူ မင်္ဂလာပွဲတစ်ပွဲအတွက် တစ်သိန်းက လုံလောက်သည်။

ယန်ကျင်းဇီ : “ ... ” မင်္ဂလာပွဲဘတ်ဂျက်က ၁၀ ဘီလီယံ ဖြစ်နိုင်တယ်လို့ သူ ထင်တယ်!

Allen ကလည်း သူ့သခင်ကို ဝမ်းနည်းသော အကြည့်ဖြင့် လှမ်းကြည့်သည်။

သူ ခံစားမိတယ်၊ သူ့သခင်လေး ဒီလိုသာ ဆက်သွားနေရင် အနှေးနဲ့အမြန် // ကားမှောက်လိမ့်မယ်! ///

ဒါကိုဘယ်လိုလုပ်ရမလဲ?

ဤသို့တွေးမိပြီးနောက် Allen သည် စိတ်ပူပန်သွားပြီး သူ့သခင်လေးကို ဂရုစိုက်ရန် ချက်ချင်း ဆုံးဖြတ်လိုက်သည်။ သေချာတာပေါ့၊ ဤကိစ္စကိုလည်း အသေအချာ စီစဉ်ရမည်ဖြစ်သည်...

ညစာစားပြီးနောက်တွင် Allen နှင့် ရှဇီရှိူ့တို့သည် ဂုဏ်ပြုစားပွဲအတွက် ပြင်ဆင်မှုအမျိုးမျိုးကို ဆွေးနွေးကြသည်။

ယန်ကျင်းဇီနှင့် ရှဝေချန်တို့သည် “ဈေးကြီးသော” ထင်မြင်ချက်အချို့ကို ပြုလုပ်ခဲ့ကြသောကြောင့် သူတို့အကူဆရာများ၏ မောင်းထုတ်ခြင်းကို ခံလိုက်ရပြီး အိမ်အပြင်သို့ ထွက်လာကြရသည်။

ယန်ကျင်းဇီသည် ခဏစဥ်းစားပြီးနောက် ရှဝေချန်ကို ကြည့်လိုက်သည် : “ အဖေ၊ စိတ်စွမ်းအင်သုံးနည်းတွေ သင်ပေးရမလား? ”

“ ကောင်းပြီ! ” ရှဝေချန်က မစဉ်းစားပဲနှင့် သဘောတူသည်။

ရှဝေချန်သည် ယန်ကျင်းဇီ သင်သည့်အတိုင်း နာ‌ရီပေါင်းများစွာ လေ့ကျင့်ခဲ့သည်။ ရှဝေချန် မောပန်းသွားသော်လည်း ရှဇီရှိူ့နှင့် အခြားသူများမှာ ဆွေးနွေးနေကြဆဲဖြစ်သည်။

ရှဇီရှိူ့နှင့် ရှအမျိုးသမီးတို့က ဤပါတီပွဲကို အလွန်အရေးထားကြမှန်း တွေ့မြင်နိုင်သည်။

ဤသည်ကိုလည်း နားလည်နိုင်၏။ သူတို့သည် တစ်နှစ်ကျော်ကျော် ပင်ပန်းခဲ့ကြရသည်။ ယခုမူ သူတို့ ကောင်းကောင်းမွန်မွန် နေထိုင်နေကြကြောင်း လူအများကို အသိပေးနိုင်မည့် အခွင့်အရေး ရောက်ရှိလာပြီဖြစ်သည်။

ရှအမျိုးသမီးတွင် ဤအကြံဉာဏ်မျိုး ရှိသည်။ သူ(မ)သည် ငွေပမာဏအနည်းဆုံးကို အသုံးပြု၍ အသင့်တော်ဆုံး ဂုဏ်ပြုပွဲကို ကျင်းပချင်သည်။

“ စိတ်မပူပါနဲ့ မဒမ်။ ကျွန်တော် ပွဲကို သေချာစီစဉ်ပေးပါ့မယ်။ ကျွန်တော် သိတဲ့ လူတော်တော်များများဆီက စားပွဲတွေနဲ့ ကုလားထိုင်တွေကို ငှားလိုက်လို့ရတယ်... ” Allen က ပြုံးပြုံးရွှင်ရွှင်ဖြင့် ပြောကာ သူ စီမံခန့်ခွဲသော စက်ရုံကို စားပွဲများနှင့် ကုလားထိုင်များ အသစ်စက်စက်တစ်သုတ်အား ချက်ချင်း ထုတ်လုပ်ခိုင်းရန် ဆုံးဖြတ်လိုက်သည်။

ဘုရားသခင်ရဲ့ကျေးဇူးပဲ! ဒုတိယဗိုလ်ချုပ်ကြီးရှ၏ ဇနီးက အရပ်ဘက်နွယ်ဖွား ဖြစ်ပြီး ယခင်ကလည်း လူမှုရေးလှုပ်ရှားမှုများတွင် များစွာမပါဝင်ခဲ့ဖူးသဖြင့် သူသည် သူ(မ) တစ်ခါမှ မကြားဖူးသော တစုံတခုကို ရှာဖွေပြီး ၎င်းက လျှော့ဈေးသဖွယ် ဟန်ဆောင်နိုင်ခဲ့သည်...

“ တကယ်တော့ ဘတ်ဂျက်နည်းနည်းပိုလည်း ကိစ္စမရှိပါဘူး ” ရှဇီရှိူ့က ဆက်ပြောသည် : “ အမေ၊ အဖေ အခု တော်တော်ချမ်းသာနေပြီလား? အဖေ မနေ့က ကျွန်တော့်ကို မုန့်ဖိုးတစ်သန်း ပေးခဲ့တယ်။ ” 

မနေ့က သူ့ဖခင်ကို ဤအကြောင်း မေးရန် သူ မေ့သွားသည်။

ရှအမျိုးသမီး အံ့ဩသွားသည် : “ ဘာ? ဒီလိုကိစ္စ ဖြစ်ခဲ့တာလား? မင်းအဖေ ခရက်ဒစ်တစ်သန်းကို ဘယ်က ရတာလဲ? ” သူ(မ)ခင်ပွန်းရဲ့ ငွေတွေအကုန်လုံး သူတို့ဘုံအကောင့်ထဲမှာ မဟုတ်ဘူးလား? ဘာလို့ သူ(မ)ခင်ပွန်းမှာ သူတို့သားကို ပေးဖို့ တစ်သန်း ရုတ်တရက် ရှိလာတာလဲ?

ရှဇီရှိူ့ : “ ကျွန်တော်က အမေ သိပြီသား ထင်လို့... ဟားဟား။ ” အဖေရေ၊ ကိုယ့်အားကိုယ်ကိုးလိုက်ပါတော့! 

ဆွေးနွေးပြီးနောက် ရှဇီရှိူ့သည် သူ့အခန်းထဲသို့ ပြန်ကာ ယန်ကျင်းဇီကို ဤကိစ္စအကြောင်း တိုးတိုးတိတ်တိတ်‌ ပြောပြလိုက်သည် : “ ငါ့အဖေ ကိုယ်ပိုင်ပိုက်ဆံ သိမ်းထားတာကို ငါ့အမေ မိသွားပြီ။ ငါ့အမေ အရမ်းစိတ်ဆိုးနေပြီ။ ငါ့အဖေ ကံဆိုးတော့မယ်လို့ ငါ ထင်တယ်... ”

ရှဇီရှိူ့၏ အကျိုးအကြောင်း ရှင်းပြချက်ကို နားထောင်ပြီးနောက် ယန်ကျင်းဇီ : “ ...... ” အဲ့တာ ရှဝေချန်ရဲ့ ကိုယ်ပိုင်ပိုက်ဆံ မဟုတ်ဘဲ သူ ရှဇီရှိူ့ကို ပေးချင်တဲ့ မုန့်ဖိုး ဖြစ်လောက်တယ်။

ရှဇီရှိူ့သည် အစပိုင်းတွင် သူ့ဖခင်အတွက် အနည်းငယ် စိတ်ပူမိသော်ငြား နောက်ပိုင်းတွင် သူသည် ယန်ကျင်းဇီ၏ စိတ်စွမ်းအင်ဖြင့် ဆွဲဆောင်ခြင်းကို ခံရကာ အရာအားလုံးကို မေ့လျော့သွားခဲ့သည်။

// နွေဦးည // ဟာ အလဟဿ မဖြုန်းတီးနိုင်လောက်အောင် တိုတောင်းလှသည်။

တစ်ဖက်တွင်မူ ရှအမျိုးသမီးသည် ရှဝေချန် သူ(မ)အတွက် ဖွင့်ထားသော အိမ်ထောင်ရေးခွင့်ပြုချက်များကို အသုံးပြု၍ ရှဝေချန်၏ သီးသန့်အကောင့်ကို စစ်ဆေးနေသည်။

၉၉ သန်း?

ရှဝေချန် ငွေတွေအများကြီး ဘယ်ကရတာလဲ?

ရှအမျိုးသမီး ချက်ချင်း ပေါက်ကွဲသွားသည်...

ရှဝေချန်လည်း ပူပင်နေသည် : “ မိန်းမ၊ ငါ အထင်လွဲခံရတာပါ။ ဒါ ငါ့ပိုက်ဆံ မဟုတ်ဘူး! ”

“ ဒါဆို ဘယ်သူ့ဟာလဲ? ” ရှအမျိုးသမီး မျက်မှောင်ကြုံ့သွားသည် : “ နင် မယူသင့်တဲ့ ပိုက်ဆံကိုတော့ မယူလာဘူးမလား? ”

“ မဟုတ်ဘူး၊ လုံးဝ မဟုတ်ဘူး! ” ရှဝေချန်က ပြောပြီး ယန်ကျင်းဇီ သူ့ကို ငွေလွှဲထားသော မနေ့မှ မှတ်တမ်းနှင့် ယန်ကျင်းဇီ သူ့ကို ပို့ထားသော စာတို့ကို ချက်ချင်း ရှာကာ ရှအမျိုးသမီးကို ပြသလိုက်သည်။

ရှအမျိုးသမီးက စာကို မြင်သောအခါ အနည်းငယ် စိတ်ရှုပ်ထွေးသွားသည် : “ ယန်ကျင်းဇီက အရမ်းချမ်းသာတာလား? ”

“ ဟုတ်တယ်။ ” ရှဝေချန်က ဖြေသည်။ အဲ့ဒါ အရှင် Marshal! အရင်တစ်ခါ အာကာသယာဉ်မှာ သူ သုံးခဲ့တဲ့ စားပွဲကတောင် ကိုယ်ပိုင်အာကာသယာဉ်တစ်စီးစာ တန်ဖိုးရှိတယ်!

“ သူ့မှာ ပိုက်ဆံရှိတယ်ဆိုရင်တောင် နင် သူ့ဆီက ပိုက်ဆံအများကြီး မယူရဘူး... မနက်ဖြန် နင် သူ့ကို ပိုက်ဆံပြန်ပေးလိုက်၊ ငါလည်း ရှဇီရှိူ့နဲ့ စကားသွားပြောဦးမယ်။ ယန်ကျင်းဇီကို သူ စောင့်ကြည့်ထားမှရမယ်။ သူ သူ့ပိုက်ဆံတွေကို လက်လွတ်စပယ် မသုံးသင့်ဘူး။ ” ရှအမျိုးသမီးသည် အနည်းငယ် စိုးရိမ်နေသည်။ သားဖြစ်သူ၏လက်တွဲဖော်က ငွေများစွာ သုံးစွဲမည်ကို ပူပင်နေ၏။

ရှဝေချန်သည် သူ့ဇနီးကို ပြောပြချင်မိသည်၊ ဤကမ္ဘာတွင် မည်သူက ငွေပြတ်ပြတ် ဘာမှဖြစ်မည်မဟုတ်ဘဲ ယန်ကျင်းဇီတွင် အမြဲငွေရှိနေလိမ့်မည်။

သို့သော် ဤကိစ္စကို မည်သို့ပြောပြရမည်မှန်း သူ မသိပေ...

ရှဝေချန် အနည်းငယ် ပင်ပန်းသကဲ့သို့ ခံစားလိုက်ရသည်။

နောက်တစ်နေ့တွင် ယန်ကျင်းဇီနှင့် ရှဇီရှိူ့တို့သည် အိပ်ရာထနောက်ကျကြပြန်သည်။

ရှအမျိုးသမီးသည် သေချာစဉ်းစားပြီးနောက် ယန်ကျင်းဇီထံသို့ မသွားခဲ့ပေ။ ယင်းအစား သူ(မ)သည် သူ(မ)သားကို ခေါ်ပြီး ယန်ကျင်းဇီက ရှဝေချန်ထံသို့ ခရက်ဒစ်သန်း ၁၀၀ လွှဲခဲ့ကြောင်း ပြောပြခဲ့သည်။

ရှဇီရှိူ့ ခဏတာ ဆွံ့အသွားရသည်။ သူ ယန်ကျင်းဇီကို ထိန်းချုပ်ရတော့မည်။

ယခင်က ယန်ကျင်းဇီသည် ရှမိသားစုကို ရက်ရောသော ထိမ်းမြားလက်ဆောင် ပေးခဲ့သည်။ ထို့အပြင် ယန်ကျင်းဇီတွင် မီလီယံရာချီများစွာ ရှိနေသည်မှာလည်း မမျှော်မှန်းနိုင်စရာပင်။ အခု သူက အဖေ့ကို သန်းတစ်ရာ ပေးခဲ့တယ်တဲ့!

ယန်ကျင်းဇီက ဒီလိုလက်ဖွာနေရင် အနာဂတ်မှာ ငွေပြတ်သွားတဲ့အခါ ဘာလုပ်ကြမလဲ?

ကံကောင်းစွာဖြင့် ယန်ကျင်းဇီသည် ငွေအားလုံးကို သူတို့၏ဘုံအကောင့်ထဲတွင် ထည့်ထားခဲ့သည်။ အနာဂတ်တွင် ယန်ကျင်းဇီ ငွေသုံးသည့်အခါတိုင်း သူ စောင့်ကြည့်နိုင်သည်။

ရှအမျိုးသမီးကမူ... ယန်ကျင်းဇီက ငွေအားလုံးကို ဘုံအကောင့်ထဲသို့ ထည့်ထားကြောင်း သူ(မ) သိရှိပြီးနောက် သူ(မ)၏ ယန်ကျင်းဇီအပေါ် အမြင်က ပို၍ပင် ကောင်းမွန်လာသည်။

မည်သို့ပင်ဖြစ်စေ၊ ယန်ကျင်းဇီက သူ(မ)၏သားအပေါ်တွင် အပြည့်အဝ စိတ်ရင်းစစ်မှန်သည်။

အချိန်က လျင်မြန်စွာ ကုန်ဆုံးကာ မျက်တောင်တစ်ခတ်အတွင်း တစ်မနက်ကုန်ဆုံးသွားသည်။

နေ့လယ်ပိုင်းတွင် Allen သည် ရှမိသားစု၏ ဗီလာနှင့် အနီးအနားရှိ ပန်းခြံကို အလှဆင်ရန် လူအများအပြားကို ခေါ်ဆောင်လာခဲ့ပြီး ညနေခင်းတွင်မူ ဂုဏ်ပြုစားပွဲကျင်းပရာကို အားလုံးပြင်ဆင်ပြီးဖြစ်သည်။

သူတို့သည် ရှမိသားစု၏ ဂုဏ်ပြုစားပွဲကို သူတို့အိမ်တွင်သာ ကျင်းပသည်။

သူတို့အိမ်ဟာ ကြီးမားသော ဂုဏ်ပြုစားပွဲ ကျင်းပရန် အနည်းငယ် သေးလွန်းသည်။ အမှန်တော့ ရှမိသားစုက သူတို့ကို ရှအိမ်ဟောင်းတွင် ပွဲကျင်းပစေချင်ခဲ့ကြသော်လည်း ရှအမျိုးသမီးက သဘောမတူပေ။

သူ(မ)သည် မူလက ဟိုတယ်တစ်ခုတွင် ပွဲကျင်းပရန် စီစဉ်ခဲ့သော်ငြား ၎င်းက ကုန်ကျစရိတ်များလွန်းပြီး အလွန်သိက္ခာမဲ့သည်ဟု လူအများက ထင်ကြလိမ့်မည်ဖြစ်သည်... ရှအမျိုးသမီး စိတ်ပူနေခဲ့ပြီး Allen သည် နည်းလမ်းတစ်ခုကို တွေးမိသည် – သူသည် သူတို့နားရှိ ပန်းခြံကို ငှားပြီး ပြင်ဆင်လိုက်ကာ ၎င်းက ပွဲကျင်းပရန် သင့်တော်သွားသည်။

ပန်းခြံကို ခြံစည်းရိုးများဖြင့် ဝန်းရံထားပြီး လှပသေသပ်စွာ အလှဆင်ထားသည်။ လဟာပြင်တွင် အသားကင်လုပ်နေသော အထူးပြုစားဖိုမှူးများ ရှိပြီး အခြားသူများက အချိုပွဲများ ပြုလုပ်နေကြကာ ဧည့်သည်များ သုံးဆောင်ရန်အတွက် စားပွဲပေါ်တွင် နှစ်သက်ဖွယ် အအေးအစားအစာအချို့ကို တင်ထားလျက်ရှိသည်။

ထို့အပြင် သွားလာနေကြသော ငယ်ငယ်ရွယ်ရွယ် စားပွဲထိုးများလည်း ရှိနေပြီး သူတို့က နောက်ဆုံးပြင်ဆင်မှုများကို လုပ်ဆောင်နေကြသည်။ သူတို့သည် နောက်ပိုင်းတွင် ရောက်လာမည့် ဧည့်သည်များကို လက်ခံကြိုဆိုရန်လည်း တာဝန်ယူထားကြ၏။ 

ရှအမျိုးသမီးသည် ဤမြင်ကွင်းကို မြင်သောအခါ အနည်းငယ် အံ့သြမိသည်။

ဤအရာအားလုံးက သူ(မ) စိတ်ကူးထားသည်ထက် များစွာပြီးပြည့်စုံနေသည်။

နောက်ပိုင်းမှာ ဘတ်ဂျက်တိုးပြီး ဒီပွဲကို ကျင်းပဖို့ ခရက်ဒစ် ၅၀၀,၀၀၀ သုံးစွဲဖို့ သူ(မ) ဆုံးဖြတ်ခဲ့ပေမယ့်လည်း ခရက်ဒစ် ၅၀၀,၀၀၀ က ဒီလောက်ကောင်းတဲ့ပွဲ ရဖို့တော့ မလုံလောက်ဘူးမလား?

အခြားကိစ္စများထက် စားပွဲထိုးဝတ်စုံများ ဝတ်ဆင်ထားသည့် လူငယ်များသည် ပရော်ဖက်ရှင်နယ် လေ့ကျင့်ထားသူများနှင့် တူသည်။ သူတို့ကို ဖိတ်ရုံဖြင့် ငွေများစွာ ကုန်ကျလောက်သည်။ 

ပြီးတော့ အဲ့စားဖိုမှူးတွေ... သူတို့လည်း တကယ် ကြည့်ကောင်းကြတယ်!

“ Allen, သန်းတစ်ဝက်နဲ့ လောက်တယ် ဆိုတာ သေချာရဲ့လား? ” ရှအမျိုးသမီး မနေနိုင်ဘဲ မေးမိသည်။ ယန်ကျင်းဇီ ငွေတွေကို သီးသန့်ထပ်ထည့်လိုက်တာလား? ဒါပေမယ့် အဲ့ဒါလည်း မဟုတ်သေးဘူး... ယန်ကျင်းဇီက ငွေတွေအကုန်လုံးကို ဇီရှိူ့နဲ့တွဲသုံးတဲ့ ဘုံအကောင့်ထဲမှာ ထည့်ထားတယ်မဟုတ်လား?

“ လုံလောက်ပါတယ် မဒမ်! ” Allen က ဆိုသည် : “ မဒမ်၊ တကယ်တော့ ဒီစားဖိုမှူးတွေနဲ့ စားပွဲထိုးတွေက ကျွန်တော်တို့သခင်လေးဆီမှာ အလုပ်လုပ်ကြတာပါ။ ဒီမှာ သုံးတဲ့ ပါဝင်ပစ္စည်းတွေ အများကြီးကလည်း သခင်လေးရဲ့စံအိမ်ဆီက ယူလာတာပါပဲ။ ”

ရှအမျိုးသမီး အနည်းငယ် အံ့အားသင့်သွားသည် : “ သူ့အတွက် အလုပ်လုပ်တဲ့လူတွေ အများကြီး ရှိတာလား? ”

Allen က မျက်နှာတချက်မပြောင်းပေ : “ ဂြိုဟ်စွန်ဂြိုဟ်ဖျားက အလုပ်သမားခက ဈေးနည်းတယ်... ကျွန်တော်တို့သခင် ဒီတစ်ခေါက် ကြယ်မြို့တော်ကို လာတော့ လူတိုင်းကလည်း ကမ္ဘာကြီးကို ကြည့်ချင်လို့ အတူတူ ရောက်လာခဲ့ကြတယ်။ ”

ဒီလိုကိုး! ရှအမျိုးသမီးသည် ဤရှင်းပြချက်ကို လက်ခံခဲ့ပြီး သာမန်မဟုတ်သော ပါဝင်ပစ္စည်းများကို တွေ့ရကာ ၎င်းတို့က ဇာတိမြေမှ ယူဆောင်လာသည့် ဒေသတွင်းထွက်ကုန်များ ဖြစ်ကြောင်း Allen ထံမှ သူ(မ) သိရသောအခါ သူ(မ) ပေါ့ပါးသွားခဲ့သည်။

ဂြိုဟ်တစ်ခုစီတွင် မတူညီသော ထူးခြားချက်များ ရှိပြီး ဝေးလံခေါင်သီသော ဂြိုဟ်များ၏ ပါဝင်ပစ္စည်းများသည် ကြယ်မြို့တော်နှင့် အလွန်ကွာခြားသည်။

ယခင်၌ ဝေးလံခေါင်သီသော ဂြိုဟ်တွင် အလွန်အလွန် ပေါများသော ဈေးချိုသည့် အစားအစာတစ်ခုဟာ ကြယ်မြို့တော်တွင် အလွန်နာမည်ကြီးခဲ့ပြီး ဈေးကြီးမြင့်စွာဖြင့် ရောင်းချခံခဲ့ရသည်။

Allen သည် ရှအမျိုးသမီးကို ပွဲအခြေအနေအကြောင်း ထပ်မံရှင်းပြကာ ဆိုသည် : “ မဒမ်၊ ကျွန်တော် သခင်လေးကို သွားကြည့်လိုက်ဦးမယ်။ ”

“ ကောင်းပြီ။ ” ရှအမျိုးသမီးက ခေါင်းညိတ်သည်။

Allen သည် သူ့သားနှစ်ယောက်ကို ထားခဲ့ပြီး ယန်ကျင်းဇီကို သွားရှာသည်။ ရှအမျိုးသမီးသည် Allen ချန်ထားခဲ့သော ရွှေရောင်ဖျော့ဆံပင်နှင့် အပြာရောင်မျက်ဝန်းတို့ဖြင့် လူငယ်ချောနှစ်ဦးကို ကြည့်ကာ နှမြောသွားသည်။

ဒီကောင်လေးနှစ်ယောက်က တကယ်ချောတယ်! သူတို့က စစ်သည်တော်တွေ မဟုတ်ဘဲ သာမန်လူတွေပဲ ဖြစ်နေတာ စိတ်မကောင်းစရာပဲ...

Allen ၏ အဆင့် S သားနှစ်ဦးသည် ရှအမျိုးသမီး၏ အတွေးများကို မသိခဲ့ကြဘဲ ဂုဏ်ပြုစားပွဲ ပိုမိုကောင်းမွန်လာစေရန်သာ အစွမ်းကုန် ကြိုးစားနေကြသည်။

တခြားထက် ဤပွဲ၏ လုံခြုံရေးအဆင့်က အမှန်တကယ် အလွန့်အလွန် မြင့်မားလှသည်။

Allen က အနီးအနားရှိ ပန်းခြံကို ငှားရမ်းခြင်းအား လုံးဝ မလုပ်ခဲ့ဘဲ ရိုးရှင်းစွာဖြင့် တိုက်ရိုက်ဝယ်ယူခဲ့သည်။ ယခု ဤမြေအောက်တွင် လက်နက်မည်မျှ မြှုပ်ထားမှန်း ဘယ်သူမှ မသိကြချေ။ ပန်းခြံဘေးရှိ ရိုးရိုးရှင်းရှင်း အလှဆင်ထားပုံပေါ်သော လှလှပပ အလင်းရောင်စက်ဝန်းမှာလည်း တကယ်တမ်းတွင်မူ အထူးအကာအကွယ်ဒိုင်းကာ ဖြစ်သည်။

သို့သော် ဤအရာတို့သည် ပုံမှန်အခြေအနေများအောက်တွင် စတင်လိမ့်မည်မဟုတ်။

ပွဲခန်းမတွင် အသုံးပြုသော အစားအသောက်များမှာလည်း အမှန်တကယ်ပင် သာမန်မဟုတ်ချေ။ သေချာတာပေါ့၊ လူအများစုက ၎င်းတို့ကို မသိနိုင်ကြပေ။

ဗီလာထဲတွင်။

Allen သည် ရှည်လျားသော လမ်းကြောင်းကို ဖြတ်လျှောက်ပြီးနောက် ယန်ကျင်းဇီနှင့် ရှဇီရှိူ့တို့ကို တွေ့ရှိခဲ့သည်။

ယန်ကျင်းဇီနှင့် ရှဇီရှိူ့တို့သည် ဂုဏ်ပြုစားပွဲအတွက် ကူညီပေးနေခဲ့ကြပြီး ယခုမှ ပြန်လာကာ ရေချိုးခဲ့ကြသည်။

ရေချိုးပြီးနောက် ရှဇီရှိူ့သည် လွန်ခဲ့သည့်နှစ်နှစ်က သူ့မိခင် သူ့အတွက် လုပ်ပေးခဲ့သည့် ဝတ်စုံတစ်စုံကို သူ့ဗီရိုထဲမှ ထုတ်ကာ ဝတ်ရန်ပြင်သည်။

“ ဇီရှိူ့၊ Allen က ကိုယ်တို့အတွက် ဝတ်စုံပြင်ဆင်ထားတယ်။ ” ယန်ကျင်းဇီက ရှဇီရှိူ့ကို တားသည်။

“ သူက အဝတ်အစားတွေကိုလည်း ပြင်ဆင်ထားတာလား? ” ရှဇီရှိူ့ အနည်းငယ် အံ့သြသွားသည်။

“ အင်း။ ” ယန်ကျင်းဇီသည် ရှဇီရှိူ့၏ ပွဲတက်ဝတ်စုံကို ထုတ်ကာ ရှဇီရှိူ့ကို ၎င်းအား ဝတ်ဆင်စေသည်။

၎င်းမှာ အခမ်းအနားပွဲတက် အဖြူရောင် အမျိုးသားဝတ်စုံ ဖြစ်ပြီး ကိုယ်တိုင်းအရ ချုပ်လုပ်ထားကာ တွဲဖက်ပစ္စည်းများလည်း ပြည့်စုံစွာ ပါရှိသည်...

ရှဇီရှိူ့သည် ဤဝတ်စုံကို တွေ့သောအခါ အစပိုင်းတွင် ၎င်းက ထူးခြားသည်ဟု မထင်ခဲ့မိသော်လည်း ၎င်းကို ထုတ်၍ ဝတ်လိုက်သောအခါ သူသည် ၎င်းနှင့် အလွန်ကောင်းမွန်စွာ တော်နေသည်ကို သိလိုက်ရသည်။ ပြီးတော့ သူ ဒါဝတ်ထားတာ တော်တော်ကြည့်ကောင်းတယ်!

ယန်ကျင်းဇီ၏ပွဲတက်ဝတ်စုံကမူ သူ့ပုံစံနှင့် တူသော်ငြား အရောင်မှာ အနက်ရောင် ဖြစ်ကာ ၎င်းကို ဝတ်ဆင်ပြီးနောက်... ယန်ကျင်းဇီက အလွန့်အလွန် မည်းသွားသည်။

ရှဇီရှိူ့သည် ယန်ကျင်းဇီကို ခဏတာ စိုက်ကြည့်ပြီးနောက် ပြောလိုက်သည် : “ ကျင်းဇီ၊ မင်း နောက်ကျရင် အလှပြင်ကိရိယာကို သုံးမှာလား? ” ယန်ကျင်းဇီက မည်သည့်ပုံစံဖြစ်ဖြစ် ကြည့်ကောင်းနေသည်ဟု သူက ထင်သည်။ ဒါပေမယ့် အဲ့ဒါက သူပဲထင်မှာ!

သူသည် သန့်ရှင်းသော အသိစိတ်ဖြင့် ယန်ကျင်းဇီအကြောင်းကို မကြွားဝါနိုင်ပေ...

ဒါပေမယ့် အသားယာယီဖြူဖို့ အလှပြင်ကိရိယာကို သုံးလိုက်မယ်ဆိုရင်တော့ ယန်ကျင်းဇီက ပိုကြည့်ကောင်းသွားမယ်မလား?

ယန်ကျင်းဇီ တစ်ခုခုပြောခါနီးတွင် သူတို့အခန်းကို တံခါးခေါက်ပြီး Allen က အသက်သုံးဆယ်ကျော် စတိုင်ကျကျ ဝတ်ဆင်ထားသော အမျိုးသားတစ်ဦးကို ခေါ်လာခဲ့သည် : “ သခင်လေးတို့အတွက် ပုံရိပ်ဒီဇိုင်နာတစ်ယောက်ကို ခေါ်လာခဲ့တယ်။ ”

ဤပုံရိပ်ဒီဇိုင်နာကို ယန်ကျင်းဇီ သိသည်။ ယခင်က သူ၏ မျက်စိစပါးမွေးစူးစရာ ဝတ်စုံကို ဤလူက သူ့အတွက် ကူညီဒီဇိုင်းဆွဲပေးခဲ့သည်။

အမှန်ပင်၊ ဤလူ၏အဆင့်က ဘယ်တော့မှ ထိုကဲ့သို့ မဖြစ်နိုင်ပေ – ထိပ်တန်းပါရမီရှင်ကသာ မူလပိုင်ရှင်အတွက် အလုပ်လုပ်နိုင်သည်။

ရှဇီရှိူ့က ပုံရိပ်ဒီဇိုင်နာကို ကြည့်သည် : “ ဘယ်စတူဒီယိုကလဲ? ” ကြယ်မြို့တော်တွင် ပုံရိပ်ဒီဇိုင်းပြင်ဆင်ပေးသော စတူဒီယိုများစွာ ရှိပြီး သူသည် Allen ခေါ်လာသူက မည်သည့်စတူဒီယိုကမှန်း မသိပေ။

“ ရှသခင်လေး၊ ကျွန်တော်က ယန်သခင်လေးအတွက် အလုပ်လုပ်နေတာပါ။ ” ဒီဇိုင်နာက ယုံကြည်မှုအပြည့်နှင့် ပြောသည်။

ရှဇီရှိူ့ အံ့အားသင့်သွားသည် : “ သူ ကျွန်တော်နဲ့ ပထမဆုံး တွေ့တဲ့နေ့က ပုံစံ... ”

“ ရှသခင်လေး! အဲ့ဒါက ကျွန်တော့်အမြင် လုံးဝ မဟုတ်ပါဘူး! ဒီနေ့ ဝတ်တဲ့ အဝတ်အစားတွေကသာ ကျွန်တော့်အမြင်ပါ! ” ဒီဇိုင်နာက တုန်လှုပ်သွားသည်။

အလွန်စိတ်လှုပ်ရှားနေသော ဒီဇိုင်နာကို ကြည့်ပြီး ရှဇီရှိူ့သည် သူ့အတွက် ပုံရိပ်ဒီဇိုင်း ပြင်ဆင်ပေးရန် ဒီဇိုင်နာကို သဘောတူလိုက်ကာ ယန်ကျင်းဇီကိုလည်း မမေ့မလျော့ပဲနှင့် ပြောသည် : “ ကျင်းဇီ၊ မင်း အသားဖြူအောင် အလှပြင်ကိရိယာ သုံးရမယ်နော်! ”

ယန်ကျင်

းဇီသည် Allen နောက်မှ လိုက်သွားခဲ့သော်ငြား အသားဖြူအောင် အလှပြင်ကိရိယာကို မသုံးခဲ့ဘဲ သူ့မိတ်ကပ်ကိုသာ ဖျက်ခဲ့သည်။

မိတ်ကပ်ဖျက်ပြီးနောက် သူ့အသားအရေဟာ နောက်ဆုံးတွင် ပုံမှန်ပြန်ဖြစ်သွားခဲ့၏။

ယန်ကျင်းဇီသည် သူ့အသွင်အပြင်ကို အလွန်စိတ်ကျေနပ်ကာ အလွန်ဝမ်းမြောက်စွာဖြင့် ရှဇီရှိူ့ထံသို့ ပြန်သွားသည်။