အပိုင်း ၁၆၉ ( Mine Owner 18 )

Star Network ဟာ ဤရက်ပိုင်း၌ လွန်စွာသက်ဝင်လှုပ်ရှားနေသည်။

တပ်မ ၈ မှ တပ်ဖွဲ့ဝင်အချို့ကို သူတို့၏ရာထူးများမှ ဖယ်ရှားခဲ့သည်။ လွယ်လွယ်ကူကူ ဘဝကို ဖြတ်သန်းနေခဲ့ကြသော ကြယ်မြို့တော်၏ သာမန်လူများသည် ကမ္ဘာကြီးတွင် အမှောင်ထုများ ပြည့်နှက်နေကြောင်း ပထမဆုံးအကြိမ် သိသွားကြရသည်။

တစ်ချိန်တည်းတွင် လူတိုင်းသည် လူတစ်ဦး – ရှဝေချန်ကို စတင်အာရုံစိုက်လာကြသည်။ 

ရှဝေချန်၏ ကိုယ်ရေးအကျဉ်းကို ထုတ်ကာ star network တွင် တင်ခဲ့သည်။

ရှဝေချန်သည် ငယ်ရွယ်သော ပါရမီရှင်ဟု ခေါ်ထိုက်သည်။ သူသည် အထက်တန်းလွှာ မိသားစုမှ ဆင်းသက်လာသော်ငြား ခွန်အားကို အသုံးပြု၍ စကားပြောရသော စစ်တပ်သို့ သွားခဲ့၏။

စစ်တပ်တွင် သန်မာသူများ အလွန်ပြည့်ဝနေရာ အဆင့် A စစ်သည်တော်တစ်ဦး ဖြစ်သော သူ့အတွက် ဗိုလ်ချုပ်တစ်ဦး ဖြစ်ဖို့ရန်ပင် အမှန်တကယ် မလွယ်ကူပါချေ။ ဒါပေမယ့် သူက လုပ်နိုင်ခဲ့တယ်!

သူသည် အာကာသသူခိုးများကို သုတ်သင်ခဲ့ပြီး လူအများကို ဘေးဥပဒ်များမှ ကယ်တင်ခဲ့ကာ အန္တရာယ်များသော အာကာသသတ္တဝါများကို သတ်ဖြတ်ခဲ့သည်... သူ့စိတ်စွမ်းအင်အဆင့်သာ S ဖြစ်မည်ဆိုလျှင် သူဟာ ဟိုးယခင်ကတည်းက ဒုတိယဗိုလ်ချုပ်ကြီးတစ်ဦး ဖြစ်လာနိုင်ဖွယ်ရှိ၏။

ထိုမျှတင်မက သူ့အချစ်ရေးကလည်း အရမ်းသန့်ရှင်းသည်။

အထက်တန်းလွှာအချို့က သူတို့၏အကူဆရာများကို အခြားသူများအတွက် စိတ်စွမ်းအင်လမ်းညွှန်မှု လုပ်ပေးရန်ပင် သဘောမတူသော်လည်း သူတို့ကမူ အကူဆရာများ ရှိနေပြီးသောအခါတွင်ပင် အခြားသူများနှင့် ပွေရှုပ်ကြလိမ့်မည်... ရှဝေချန်က မတူဘူး!

ရှဝေချန်နှင့် သူ့ဇနီးတို့သည် စစ်တပ်ထဲတွင် တွေ့ဆုံခဲ့ကြသည်။ သူတို့နှစ်ဦးသည် ယခုအချိန်အထိ တစ်ဦးကိုတစ်ဦး ပံ့ပိုးပေးခဲ့ကြပြီး သူတို့၏ဆက်ဆံရေးက အလွန်ကောင်းမွန်သည်။ ရှဝေချန်သည် သူ့ဇနီးအတွက် အိမ်အပြင်သို့ပင် ပြောင်းရွှေ့ခဲ့သည်။

ဒါလူကောင်းတစ်ယောက်ပဲ! သူက ချောလည်း ချောတယ်!

ယနေ့တွင် ရှဝေချန်၌ ပရိသတ်များစွာ ရှိနေပြီဖြစ်သည်။

ထို့အတွက်ကြောင့် လူများစွာသည် ရှမိသားစု ကျင်းပမည့် ဂုဏ်ပြုစားပွဲကို အာရုံစိုက်လာကြသည်။

ပွဲမစမီ၌ပင် ရှမိသားစုအိမ်အပြင်တွင် ထိုင်စောင့်နေသူများ ရှိနေပြီဖြစ်ပြီး အချို့က star network တွင် တိုက်ရိုက်ထုတ်လွှင့်နေကြသည်။

စတင်တိုက်ရိုက်ထုတ်လွှင့်သူမှာ နာမည်ကျော် အွန်လိုင်း အစီအစဉ်တင်ဆက်သူ Kan Ye ဖြစ်သည်။ သူသည် တိုက်ရိုက်ထုတ်လွှင့်ခန်း၏နာမည်ကို “ရှမိသားစု၏ ဂုဏ်ပြုစားပွဲထံသို့ အလည်တစ်ခေါက်” ဟု ပြောင်းလဲကာ ရှမိသားစု၏နေအိမ်ဝန်းကျင်သို့ စောစီးစွာ ရောက်လာခဲ့သည်။

ကြည့်ဖို့အချိန်နီးလာရာ သူသည် တိုက်ရိုက်ထုတ်လွှင့်မှုကို ဖွင့်ပြီး ပရိသတ်များကို ပြောလိုက်သည် : “ အားလုံးပဲ ဟယ်လို! ငါ ဒီနေ့ ရှမိသားစုအိမ်ဆီ အားလုံးကို ခေါ်လာပါတယ်။ ဟိုမြင့်မြတ်တဲ့ ရှမိသားစု မဟုတ်ဘဲ ရှဝေချန်ရဲ့အိမ်ပါ! ”

“ ရှဝေချန် ဒုတိယဗိုလ်ချုပ်ကြီးအဖြစ် ရာထူးတိုးသွားတာအတွက် ရှမိသားစုက ဂုဏ်ပြုစားပွဲ ကျင်းပတော့မယ်။ ငါ အားလုံးကို ဒီပွဲပြဖို့ ရောက်နေပါတယ်! ”

“ ဒါပေါ့၊ ငါတို့ အထဲဝင်လို့မရဘူး။ ငါတို့ အပြင်ကနေပဲ ကြည့်လို့ရမယ်! ”

Kan Ye စကားပြောပြီးသောအခါ pop-ups တင်၍ Kan Ye ကို အတင်းဝင်ရန် အားပေးအားမြှောက်ပြုနေကြသူများ အများအပြား ရှိနေခဲ့သည်။

“ မင်းတို့ ရူးနေကြပြီ။ အိမ်က သာမန်ပုံစံပေါ်နေရင်တောင်မှ အဲ့ဒါက ဒုတိယဗိုလ်ချုပ်ကြီးရဲ့အိမ်ပဲ။ ဖောက်ဝင်ဖို့လား? ငါ သေကြောင်းကြံရမှာလား? ” Kan Ye က ဆက်ပြောသည် : “ ဒါနဲ့ ဒုတိယဗိုလ်ချုပ်ကြီးရှရဲ့အိမ်ကို အဝေးက ကြည့်ကြရအောင်။ အင်း၊ သူ့အိမ်က တကယ် သာမန်ပဲ၊ တည်နေရာကလည်း ပုံမှန်ရိုးရိုးပဲ။ ငါ စိတ်ကူးထားတဲ့ စံအိမ်နဲ့ လုံးဝ ကွာတယ်... ဒါပေမယ့် သူ့အိမ်ရှေ့က ပန်းခြံကို သူ ငှားထားတော့ သူ့ပွဲကျင်းပမယ့် နေရာကတော့ တော်တော်လေး ကြီးတယ်! ” 

barrage ပေါ်တွင် တစ်စုံတစ်ယောက်က “ဟားဟားဟား” ဟု ရေးကာ လူအချို့က Kan Ye အသက်ရှင်လိမ့်မည်ဟု ပြောကြသည်။

“ စိတ်မကောင်းစရာက ပွဲကျင်းပမယ့်နေရာမှာ အကာအကွယ်အမိုး သုံးထားတော့ ငါ အထဲက အခြေအနေကို မမြင်ရဘူး။ ဒါပေမယ့် မင်းတို့ကို ငါ ပြောပြမယ်၊ ပွဲကိုလာတဲ့လူတွေအကုန်လုံးကို ငါတို့ ဒီကနေ တွေ့နိုင်တယ်! ” Kan Ye က ထပ်ပြောသည်။

အားလုံးက ပျော်ပျော်ရွှင်ရွှင်ဖြင့် စောင့်ကြသည်။

အမှန်ပင်၊ လူအချို့က ပြောကြသေးသည် : “ဒုတိယဗိုလ်ချုပ်ကြီးရှက အခုမှ ဒုတိယဗိုလ်ချုပ်ကြီး ဖြစ်လာတာဆိုတော့ ဧည့်သည်တွေက အရေးကြီးတဲ့ ပုဂ္ဂိုလ်တွေ မဖြစ်နိုင်လောက်ဘူးမလား?”

“ငါတို့ ဒီမှာ စောင့်နေကြပေမယ့် ငါတို့တွေ့ရမယ့်လူတွေက နာမည်မကြီးတဲ့လူတွေ ဖြစ်ဖို့များတယ်...”

“လာတဲ့လူတွေအားလုံးက ဘယ်သူမှမသိတဲ့ လွယ်လွယ်လေး ကျော်မြင်ခံရတဲ့ လူတွေတော့ မဖြစ်နိုင်လောက်ပါဘူး ဟုတ်တယ်မလား?”

…

သို့သော်... ပထမဆုံး ရောက်လာသူအားလုံးမှာ သူတို့ သိပင် မသိသော လူများသာ ဖြစ်ကြသည်။

ပထမဆုံးရောက်လာသူများ အားလုံးမှာ ရှဝေချန်၏ သူငယ်ချင်းများနှင့် ရှအမျိုးသမီး၏ သူငယ်ချင်းများ ဖြစ်ကြပြီး သူတို့ဟာ အမှန်တကယ်တော့ ကြယ်မြို့တော်၏ အတော်ဆုံးများ ဖြစ်နေကြပြီးဖြစ်သော်ငြား သူတို့ကို အွန်လိုင်းပေါ်ရှိ လူတိုင်းက မသိရှိကြချေ။

ဤသည်ကိုတွေ့ရသော် တိုက်ရိုက်ထုတ်လွှင့်မှုကို ကြည့်နေကြသူများမှာ အနည်းငယ် ပျင်းသွားကြသည်။

“ရောက်လာတဲ့သူတွေထဲက ဘယ်သူ့ကိုမှ ငါတို့ မသိဘူး...”

“လူတွေက နာမည်မကြီးတာကို မပြောနဲ့ဦး၊ ဇိမ်ခံကားတစ်စီးတောင် မရှိဘူး။”

“ဒီပွဲက နည်းနည်းအဆင့်နိမ့်နေသလားလို့?”

“ကြည့်ကြ၊ နောက်ထပ်သာမန်ကားတစ်စီး လာနေတယ်...”

…

အမှန်ပင်၊ ဤအချိန်တွင် နောက်ထပ် အလွန်သာမန်ဆန်သော ကားတစ်စီး ရောက်လာသည်။

တိုက်ရိုက်ထုတ်လွှင့်မှုကို ကြည့်ရှုနေကြသော ပရိတ်သတ်များက အနည်းငယ် ပျင်းရိနေကြသည်ကို Kan Ye တွေ့သောကြောင့် ပြောလိုက်သည် : “ ကားက သာမန်ဆန်တာနဲ့ပဲ အထဲမှာ ရာထူးကြီးကြီးတွေ မပါဘူးလို့ မတွေးကြပါနဲ့။ အဲ့ဒီသာမန်ကားတွေပေါ်ကနေ တပ်မှူးတစ်ယောက် ဆင်းလာနိုင်ပါတယ်! ”

Kan Ye ပြောပြီးသည်နှင့်တပြိုင်နက် သူသည် barrage ပျောက်ကွယ်သွားသည်ကို တွေ့လိုက်ရသည်။

ဘယ်လိုဖြစ်တာလဲ?

Kan Ye အံ့အားသင့်နေစဉ် barrage တစ်ခုကို တွေ့လိုက်ရ၏ : “ Kan Ye လမ်းဖယ်ဦး! ”

ဤဖန်သားပြင်ဘက်ကို မျက်နှာမူထားသော Kan Ye သည် အလိုအလျောက် ဘေးဖယ်‌ကာ သူ့နောက်ကို ထပ်ကြည့်လိုက်သည်။ သူ့ပရိသတ်များက သူ့မျက်နှာကိုပင် မကြည့်တော့လောက်အောင် တကယ်ပင် ဘာတွေ့လိုက်ရသနည်းဟု သိချင်နေမိသည်။

သူ့ပရိသတ်များက... တပ်မှူးကို တွေ့လိုက်ကြသည်။

တပ်မ ၁ ရဲ့ တပ်မှူးက အဲ့သာမန်ကားထဲက တကယ် ဆင်းလာတယ်!

ဒါ... ဒါ...

Kan Ye တကိုယ်လုံး အေးခဲသွားသည်။

တပ်မ ၁ ၏ တပ်မှူးက သူ့အနားမှ ဖြတ်သွားသည်ကို သူသည် သူ့မျက်လုံးများ ပြူးကျယ်လျက်ဖြင့် ကြည့်နေခဲ့သည်။

သူတို့က နည်းနည်းဝေးပေမယ့်လည်း တပ်မ ၁ ရဲ့ တပ်မှူးကို သူ့မျက်လုံးတွေနဲ့ တပ်အပ်မြင်လိုက်ရတယ်လို့ သတ်မှတ်နိုင်တယ်!

Kan Ye သည် အချိန်အကြာကြီး ကြက်သေသေနေခဲ့ပြီးမှ အသိဝင်လာကာ သူ့ပရိသတ်တို့ကို လှည့်မေးလိုက်သည် : “ ငါ မှားမြင်လိုက်တာ မဟုတ်ဘူးမလား? ”

“Kan Ye, နင် မှားမမြင်လိုက်ဘူး!”

“Kan Ye, မင်း အတွင်းသတင်း သိလား? ဘာလို့ မင်း တပ်မှူးလို့ ပြောပြောချင်း တပ်မှူးက ဆင်းလာရတာလဲ?”

“ဒုတိယဗိုလ်ချုပ်ကြီးရှက အံ့ဩစရာပဲ! တပ်မှူးတောင် လာလိမ့်မယ်လို့ ငါ တစ်ခါမှ မတွေးခဲ့ဘူး!”

“အခြားတပ်မှူးတွေရော လာကြမှာလား?”

“လုံးဝ မဖြစ်နိုင်ဘူး! တပ်မ ၁ ရဲ့ တပ်မှူးက တပ်မ ၈ ကိုလည်း တာဝန်ယူထားလို့ ရောက်လာတာ။ အခြားတပ်မှူးတွေ မလာမှာ သေချာတယ်!”

“ဟုတ်တယ်... ဘာပဲဖြစ်ဖြစ် ရှဝေချန်က ဒုတိယဗိုလ်ချုပ်ကြီးအဆင့်ပဲ‌လေ။”

…

Kan Ye က ဆိုသည် : “ ဖြစ်နိုင်ပါတယ်။ ဒီနေ့ ငါတို့ တပ်မှူးခုနစ်ယောက်ကို စုဆောင်းနိုင်လောက်တယ်! ဟားဟား! ”

သူ စကားပြောပြီးပြီးချင်း ရင်းနှီးသော ကားတစ်စီး ဝင်လာသည်ကို သူ တွေ့လိုက်ရသည်။ ၎င်းဟာ တပ်မ ၇ မှ အင်တာနက်ပေါ်တွင် အလွန်ရေပန်းစားသော အမျိုးသမီးစစ်သည်တော်တစ်ဦး ပိုင်ဆိုင်သည့် ကား ဖြစ်သည်။

Kan Ye : “!!!”

ကြည့်ရှုသူများ : “!!!”

ထို့နောက် တပ်မ ၂ ၏ တပ်မှူး၊ တပ်မ ၃ ၏ တပ်မှူးနှင့် အခြားသော တပ်မှူးများလည်း ရောက်ရှိလာကြသည်။

တိုက်ရိုက်ထုတ်လွှင့်မှုကို ကြည့်ရှုကြသူများ : “... Kan Ye, မင်းမှာ အတွင်းသတင်း ရှိလား?!!!”

Kan Ye က သူ့နဖူးမှချွေးကို သုတ်သည် : “ ငါ တကယ် မသိဘူး! ”

ဒီတပ်မှူးတွေက အရမ်းမြန်မြန်နဲ့ အရမ်းအစောကြီး ရောက်လာကြတာပဲ!

သူတို့ကဲ့သို့လူများဟာ အများအားဖြင့် နောက်ဆုံးမှသာ လာကြသော်လည်း ယနေ့တွင်မူ... ပွဲက အခုမှ စတာကို သူတို့အကုန်လုံး ဒီရောက်နေကြပြီ!

Kan Ye နှင့် တိုက်ရိုက်ထုတ်လွှင့်မှုကို ကြည့်ရှုနေကြသူများသာမက ပွဲသို့သွားရန် စီစဉ်နေသူများပါ ဆွံ့အထိတ်လန့်သွားကြသည်။

နောက်ကျမှ သွားရန် ကြံရွယ်ပြီး နှေးကွေးနေကြသော ဒုတိယဗိုလ်ချုပ်ကြီးများအားလုံး ရှအိမ်သို့ အမြန်သွားကြတော့သည်။

ခဏကြာသော် ရှအိမ်တံခါးဝတွင် ကားမျိုးစုံဖြင့် ပြည့်ကျပ်နေပြီး အများစုမှာ ဇိမ်ခံကားများ ဖြစ်ကြသည်။

Kan Ye သည် ရှမိသားစု၏အိမ်တံခါးရှေ့တွင် ငေးကြောင်ကြည့်နေပြီး သူ့ပရိသတ်များကလည်း barrage ဆက်မရေးကြတော့ဘဲ လူတစ်စုပြီးတစ်စု ရှမိသားစု၏အိမ်ထဲသို့ စုပြုံဝင်ရောက်နေသည်ကိုသာ အလွန်တိတ်ဆိတ်စွာဖြင့် ကြည့်ရှုနေကြသည်။ 

ယခု အထဲတွင် ဘာဖြစ်နေမှန်း ဘယ်သူမှမသိချေ...

ရှမိသားစု၏နေအိမ်။

ရှဝေချန်နှင့် ရှအမျိုးသမီးတို့သည် သူငယ်ချင်းများနှင့် စကားပြောနေစဉ် တပ်မ ၁ ၏ တပ်မှူးကို ကြိုဆိုခဲ့ကြသည်။

ရှဝေချန်က အဆင်ပြေသည်။ ရှအမျိုးသမီးသည် လူကိုတွေ့သည်နှင့် ထိတ်လန့်သွားပြီး သူ(မ)နှင့် စကားပြောနေသူကလည်း အေးခဲသွားသည်။

ရှဝေချန်က ဖွံ့ဖြိုးတိုးတက်လာမှန်း သူတို့ သိသော်ငြား သူက အလွန်တိုးတက်နေမည်ဟု သူတို့ မမျှော်လင့်ထားခဲ့ကြပေ... တပ်မ ၁ ရဲ့ တပ်မှူးက ဒီကိုလာတယ်တဲ့လား?

မယုံနိုင်စရာကောင်းလောက်အောင် မိုက်လွန်းတယ်!

သို့သော်လည်း ယင်းကား အစပိုင်းသာ ဖြစ်သေးသည်။

ထို့နောက် ချက်ချင်းဆိုသလိုပင် အခြားသော တပ်မှူးများလည်း တစ်ဦးပြီးတစ်ဦး ရောက်ရှိလာကြသည်။

စောစောလာကြသော ဧည့်သည်များ : “!!!”

ရှဝေချန်လျှင်ပင် ဖိအားများစွာ ခံစားခဲ့ရပြီး အနည်းငယ် စိတ်ဖိစီးသွားသည်။ 

သို့သော်ငြား အမှန်တကယ်တော့ ဤတပ်မှူးများလည်း ဖိအားများစွာကို ခံစားခဲ့ရပြီး တောင့်မခံနိုင်လုနီးပါးပင် ဖြစ်နေကြသည်။

သူတို့ကို လက်ခံကြိုဆိုရန် တာဝန်ယူထားသူမှာ အရှင် Marshal ၏ အိမ်တော်ထိန်း Allen ဖြစ်သည်။

သူတို့ ယူဆောင်လာသော လက်ဆောင်များကို စာရင်းသွင်းရန် တာဝန်ရှိသူမှာ ယခင်က သူတို့၏စစ်စရိတ်များအတွက် သူတို့ကို ငွေပေးခဲ့သူ ဖြစ်ပြီး သူတို့သည် ဤလူကို မစော်ကားဝံ့ပေ။

သွားလာနေကြသော ဤစားပွဲထိုးများမှာလည်း... သူတို့သာ အထင်မမှားလျှင် ဤလူများဟာ အနည်းဆုံးတော့ အဆင့် A စစ်သည်တော်များ ဖြစ်ကြသည်။

အသားကင်နေသော စားဖိုမှူးက ပို၍ပင် ကြောက်စရာကောင်းသေးသည်။ သူက အဆင့် SS စစ်သည်တော် အစစ်ပဲ!

သူတို့သည် အရှင် Marshal ၏ အနားတွင် အဆင့် SS သက်တော်စောင့်တစ်ဦး ရှိပြီး ဤသက်တော်စောင့်က တိုက်ခိုက်ရခြင်းကို မနှစ်သက်ဘဲ ချက်ပြုတ်ရခြင်းကိုသာ သဘောကျသည်ဟု ကြားဖူးထားသည်။ ၎င်းက အမှန်ဖြစ်ပုံရသည်...

ယခုအခါ ဤတပ်မှူးများသည် အားလုံး ဆွံ့အသွားကြပြီး ဘာပြောရမှန်းကိုပင် မသိကြတော့ပေ။

ဤသည်ကား အမှန်တကယ်ကို ထူးထူးခြားခြား အဆင့်အတန်းမြင့်သော ဂုဏ်ပြုပွဲ ဖြစ်သည်။

တပ်မှူးခုနစ်ဦးသည် ရှဝေချန်ကို စကားအနည်းငယ် ပြောကာ မေးကြသည် : “ ဒုတိယဗိုလ်ချုပ်ကြီးရှ၊ မင်းရဲ့သားနဲ့ သူ့ရဲ့နှောင်ကြိုးသွယ်လက်တွဲဖော်ရော ဘယ်မှာလဲ? ”

“ သူတို့က အပေါ်ထပ်မှာပဲ ရှိနေသေးတယ်။ ကျွန်တော် သွားပြီး သူတို့ကို ဆင်းလာဖို့ ပြောလိုက်မယ်... ” ရှဝေချန်က ပြောသည်။ ယနေ့တွင် သူက ယန်ကျင်းဇီကို အခြားသူများနှင့် မိတ်ဆက်ပေးမည်ဖြစ်သောကြောင့် ရှဝေချန်သည် ယန်ကျင်းဇီနှင့်သူ့သားကို နောက်မှသာ ဆင်းလာခိုင်းထားခဲ့သည်။

သူ ဤသို့ဆောင်ရွက်သည်မှာ အရှင် Marshal အား သူနှင့်အတူ ဧည့်သည်များကို ဧည့်မခံခိုင်းရဲသောကြောင့်လည်း ဖြစ်သည်။ သို့သော် သူ့ဇနီးက နားလည်မှုလွဲပြီး သူတို့သားအား ယန်ကျင်းဇီကို ပွဲစည်းမျဉ်းအချို့ ရှင်းပြရန် အဆုံးအထိ ထပ်တလဲလဲ ပြောနေခဲ့၏...

ရှဝေချန်သည် ၎င်းကို မမြင်ချင်ယောင်သာဆောင်နေလိုက်သည်။

ကျေးလက်က လာပြီး ဘာမှမသိတဲ့ မိုင်းပိုင်ရှင်တစ်ယောက်လို ဟန်ဆောင်ဖို့ အရှင် Marshal ကို ဘယ်သူက ပြောခဲ့လို့လဲ?

“ မလိုဘူး၊ မလိုဘူး၊ သူတို့ဘာသာ နောက်မှဆင်းလာပါစေ။ ” တပ်မ ၁ ၏ တပ်မှူးက အလျင်အမြန် ဆိုသည်။

ရှဝေချန်ကလည်း လူသွားမခေါ်ခဲ့ဘဲ ဤအချိန်တွင် လူတော်တော်များများ တစ်ဦးပြီးတစ်ဦး ရောက်လာကြသည်။

Allen က ပန်းခြံတစ်ခြံလုံးကို ငှားထားခဲ့ရာ နေရာဟာ အလွန်ကျယ်ဝန်းပြီး လူအများအပြားကိုလည်း လက်ခံနိုင်သည်။

သူတို့က ဤလူများကို တွေ့သောအခါ တပ်မှူးများစွာဟာ တည်ကြည်နေကြပြီးဖြစ်သည်။ သူတို့ဟာ အသားကင်ဆိုင်ခန်းငယ်ရှေ့တွင် မတ်တပ်ရပ်ကာ လျှောက်မသွားကြဘဲ သူတို့ကဲ့သို့ပင်ဖြစ်သော အဆင့် SS စွမ်းအားရှင် ကင်ပေးသည့် အသားကင်သီတံများကိုသာ ဖြည်းဖြည်းချင်း စားနေကြသည်။

ရှမိသားစုမှ အဘိုးရှ၏ ယာဉ်ပျံသည် မူလက ‌ဖြည်းညင်းစွာ မောင်းနှင်နေခဲ့သည်။ သူသည် အလွန်လည်း မစော၊ အလွန်လည်း နောက်မကျသည့် အချိန်ကို ရွေးချယ်ချင်ခဲ့သော်ငြား တပ်မှူးများစွာ လာနေသည့်အကြောင်းကို သူ နောက်ပိုင်းတွင် ရုတ်တရက် သိလိုက်ရကာ ချက်ချင်းပင် အရှိန်မြှင့်၍ အမြန်သွားခဲ့၏။ 

အဘိုးရှသည် အသက်နှစ်ရာနီးပါး ရှိပြီဖြစ်ပြီး အရမ်းမငယ်တော့ချေ။ ထို့အပြင် သူ၏ သာမန်ပင်ကိုယ်စွမ်းရည်နှင့် သာမန်ကိုယ်ကာယကြံ့ခိုင်မှုတို့ကိုပါ ထည့်ပေါင်းလိုက်သောအခါ တစ်လမ်းလုံး အပြေးအလွှား လာခဲ့ရသဖြင့် သူသည် သိပ်မသက်သာလှပေ။

သို့ရာတွင် ထိုသို့ဖြစ်နေလျှင်တောင်မှ သူက ရောက်သွားသည်နှင့်တပြိုင်နက် ပြုံးကာ တပ်မှူးများကို နှုတ်ဆက်သည်။

တပ်မှူးများက သူ့ကို မြင်‌သောအခါ သူတို့၏အမူအရာများမှာ အနည်းငယ် ကင်းမဲ့နေကြသည်။

အဘိုးရှတွင် ဘာမှပြောစရာမရှိပေ : “ ဝေချန်ကို စံအိမ်ကြီးမှာ လာပြီး ပွဲကျင်းပစေချင်ပေမယ့် ကံမကောင်းစွာပဲ သူက သဘောမတူဘူး။ ဒီပွဲအခမ်းအနားက နည်းနည်းအရိုင်းဆန်နေတယ်။ ဒီလူက အားလုံးကို မေ့လျော့ပျက်ကွက်မိပြီ... ”

တပ်မှူးများစွာသည် အဘိုးရှကို ဆွံ့အစွာ ကြည့်လိုက်ကြသည်။

အရိုင်းဆန်တယ်?

ဒီပွဲကို အရိုင်းဆန်တယ်လို့ ခေါ်လို့ရလား?

ဒီမှာ ကင်ထားတဲ့ အသားနဲ့ ဟင်းခတ်အမွှေးအကြိုင်တွေက အပြင်မှာတောင် ပုံမှန်လို ဝယ်လို့မရနိုင်တာတွေပဲ!

ဒီမှာ သုံးထားတဲ့ အကာအကွယ်အဖုံးကလည်း သူတို့ အရှင် Marshal ဆီက ဝယ်ချင်နေတဲ့ဟာ ဖြစ်ပေမယ့် အရှင် Marshal က မရောင်းပေးဘူး!

မီးလုံးတွေ၊ စားပွဲတွေနဲ့ ဒီက အခြားအရာတွေ အကုန်လုံးကလည်း သီးသန့်ဒီဇိုင်းထုတ်ထားတာတွေပဲ!

သို့သော်လည်း လူအများစုက မပြောနိုင်ကြချေ...

တပ်မှူးများသည် အသားကင်စားပြီး အချိုပွဲထံသို့ ရောက်သွားကြသည်။

သူတို့သာ အထင်မမှားလျှင်... အကုန်လုံးက စိတ်စွမ်းအင်အတွက် ကောင်းတယ်!

တပ်မှူးများသည် အလွန်ဗဟုသုတကြွယ်ဝကြသော်လည်း ယေဘုယျအားဖြင့် အခြားသူများက မသိနားမလည်ကြချေ။

ပွဲက မဆိုးဘူးဟု သူတို့ ခံစားမိသော်လည်း... တပ်မှူးများနှင့် အနည်းငယ် မထိုက်တန်ဟုတော့ ထင်မိသည်။

ရှအမျိုးသမီးလျှင်ပင် အနည်းငယ် စိတ်မသက်မသာဖြစ်မိသည်။ ဤတပ်မှူးများ လာမည်ကို သူ(မ)သာ ကြိုသိခဲ့ပါလျှင်၊ သူ(မ) ယန်ကျင်းဇီထံမှ ငွေချေးရမည်ဆိုလျှင်တောင်မှ ပွဲအခမ်းအနားကို ပိုမိုသင့်တင့်ခမ်းနားအောင် ပြုလုပ်ခဲ့မည်ပင်။

သို့သော်ငြား ယခုမူ ဤသို့ပြောရန် အလွန်နောက်ကျသွားပြီ။

လူစုံလုနီးပါးဖြစ်ရာ ရှဝေချန် စင်ပေါ်တက်၍ စကားအနည်းငယ် ပြောကာ ယန်ကျင်းဇီကို မိတ်ဆက်ပေးဖို့ရန် အချိန်ကျရောက်လာခဲ့သည် – သူတို့ ဘာမှမလုပ်ဘဲ ဒီတိုင်းနေပြီး တပ်မှူးတွေကို စောင့်ခိုင်းထားလို့ မဖြစ်တော့ဘူး!

ရှဝေချန်သည် စင်မြင့်ပေါ်သို့ ရောက်ရှိပြီး စတင်၍ စကားပြောခဲ့သည်။ စစ်ဌာနကို ကျေးဇူးတင်ကာ သူ့အတွေးအချို့ကို ပြောပြီးနောက် သူက ပြောလိုက်သည် : “ အခုဆက်ပြီးတော့ ကျွန်တော့်မှာ ကြေညာစရာတစ်ခု ရှိပါသေးတယ်။ ကျွန်တော့်ရဲ့သား ရှဇီရှိူ့က လူတစ်ယောက်နဲ့ နှောင်ကြိုးဖွဲ့ပြီးပြီဖြစ်ပြီး သူတို့က မကြာခင် လက်ထပ်ကြပါတော့မယ်။ ”

ရှဝေချန်သည် စကားပြောပြီးနောက် တစ်ဘက်သို့ လှည့်ကြည့်လိုက်သည်။

ယန်ကျင်းဇီနှင့် ရှဇီရှိူ့တို့သည် ထိုနေရာမှ အတူတကွ ထွက်လာခဲ့ကြသည်။

°°°