အပိုင်း ၁၇၀ ( Mine Owner 19 )

ယနေ့ပွဲသို့ လာကြသောသူများသည် ရှဝေချန်နှင့် မရင်းနှီးလျှင်တောင်မှ ပွဲသို့မလာမီတွင် ရှဝေချန်၏ အချက်အလက်ကို ဖတ်ခဲ့ကြသဖြင့် သဘာဝကျစွာပင် ရှဇီရှိူ့အကြောင်းကို သူတို့ သိကြသည်။

ထိုအချိန် အချက်အလက်ကို သူတို့ ကြည့်ခဲ့သောအခါ၌ ရှဇီရှိူ့၏ရုပ်ရည်က တကယ်ကို ပေါ်လွင်ထူးခြားလွန်းသည်ဟု သူတို့ ‌တွေးခဲ့ကြ၏။

ယခု သူတို့ လူအစစ်ကို တွေ့ရသော်...

‌ဒါက အရမ်းကြည့်ကောင်းတာထက်တောင် ပိုသေးတယ်!

လူတိုင်း၏ အလှတရားနှစ်သက်မှုများက ကွဲပြားကြသည်။ တချို့က ဖြူစင်သူများကို သဘောကျကာ တချို့က လှပသူများကို ကြိုက်ကြပြီး တချို့က ပိန်ပါးသူများကို နှစ်သက်၍ တချို့က အသားပြည့်ဖောင်းသူများကို နှစ်ခြိုက်ကြသည်။

သို့သော် ရှဇီရှိူ့က မချောမောဟု ဘယ်သူမှ မပြောနိုင်ကြချေ။

သူ့မျက်ဝန်းများက ကြည်လင်တောက်ပသည်၊ သူ့နှာတံက တောင့်တင်းဖြောင့်စင်းသည်၊ သူ့အသားအရေက နူးညံ့ပြီး ဖြူဖွေးသည်၊ သူ့ဆံပင်တိုက အနည်းငယ် ရှုပ်‌ပွနေသော်ငြား သူ့မျက်နှာအသွင်အပြင်နှင့် မဖော်ပြတတ်စွာ လိုက်ဖက်ညီနေသည်။ 

သူဟာ လူတို့၏စိတ်ဝိညာဉ်ကို ခိုးယူနိုင်သော နတ်သားငယ်လေးနှင့် တကယ်ကို တူသည်။ ပါတီသို့ လာကြသူ အားလုံးနီးပါးသည် သူ့ကြောင့် အံ့အားသင့်သွားကြရသည်။

ယနေ့ခေတ်တွင် အလှပြင်ကိရိယာကို တွင်တွင်ကျယ်ကျယ် အသုံးပြုနေကြရာ လူတိုင်းသည် အလိုရှိသရွေ့ ချောမောလှပနိုင်လာကြသည်။ သို့သော် ရှဇီရှိူ့တွင် သူ့ထံ၌သာ ရှိ‌သည့် တမူထူးခြားသော အရောင်အဝါ ရှိသည်။ လူအများကို ကြည့်သော သူ့အကြည့်က လူတို့ကို နားလည်ရခက်စွာဖြင့် သူ့အား သဘောကျစေသည်။

တပ်မှူးခုနစ်ဦးသည် ရှဇီရှိူ့ကို တွေ့သောအခါ အရှင် Marshal က ရှဝေချန်ကို “အဖေ” ဟု လိုလိုလားလား ခေါ်နိုင်ရသော အကြောင်းအရင်းကို သူတို့ နားလည်သွားကြသည်။

သူတို့သာ ငယ်ရွယ်သေးလျှင်၊ သူတို့တွင် အကူဆရာ မရှိသေးလျှင် သူတို့လည်း ရှဝေချန်ကို “အဖေ” ဟု ခေါ်ချင်လိမ့်မည်ဖြစ်ကြောင်း သေချာသည်။

အခြားသူများကို မပြောနှင့်၊ တပ်မှူးခုနစ်ဦးတို့ပင် လွန်စွာစိတ်လှုပ်ရှားနေကြသည်။

ကြယ်မြို့တော်၏ ထိပ်တန်းလူအုပ်စုသည် အခြေခံအားဖြင့် တစ်ဦးနှင့်တစ်ဦး အဆက်အသွယ်ရှိကြပြီး ရှဇီရှိူ့နှင့် ကျောင်းတူသော သားသမီးအနည်းငယ်လည်း ရှိနေသည်။

ရှဇီရှိူ့နှင့် အသက်တူသော ဤလူများသည် ရှဇီရှိူ့ကို မြင်သောအခါ ကြက်သေသေသွားကြသည်။

ရှဇီရှိူ့က ကျောင်းတွင် အတောက်ပဆုံးလူ ဖြစ်ခဲ့ရာ သူတို့သည် သူက ထိုမျှအလွန်ချောမောနေရခြင်းမှာ ကောင်းစွာပြင်ဆင်ထားသောကြောင့်ဟုသာ အမြဲထင်ခဲ့ကြ၏။ ယခုမူကား...

ရှဇီရှိူ့က ကျောင်းမှာ တစ်ခါမှ သေချာမဝတ်စားခဲ့လောက်ဘူး!

အဲ့တုန်းက သူတို့ ဘာလို့ ရှဇီရှိူ့ကို မပိုးပန်းမိခဲ့တာပါလိမ့်?

စစ်သည်တော်အချို့သည် စိတ်စွမ်းအင်ဖြင့် သူတို့ကိုယ်သူတို့ နောင်တကြီးစွာ ရိုက်လိုက်ကြသည်။

ရှချီချီနှင့် ရှမိသားစုတို့သည် အတူတကွ မတ်တပ်ရပ်နေကြပြီး သူတို့၏အမူအရာများမှာ ပို၍ပင် ရှုပ်ထွေးသွားခဲ့သည်။

ရှဇီရှိူ့ စင်ပေါ်တွင် ပေါ်မလာမီ အနားရှိ လူတိုင်းနီးပါးက သူ(မ)ကို ကြည့်နေကြသော်ငြား ရှဇီရှိူ့ ပေါ်လာသည်နှင့်တပြိုင်နက် လူတိုင်း၏အကြည့်များကို ရှဇီရှိူ့က ဆွဲဆောင်သွားသည်။

ရှဇီရှိူ့က ဝတ္ထုဇာတ်လိုက် ဖြစ်ပြီး ပရိသတ်သန်းချီ ရှိသည်။ သူ(မ) ရှဇီရှိူ့နဲ့ တကယ်ပဲ မယှဉ်နိုင်ဘူးလား?

မဟုတ်ဘူး၊ သူ(မ)က ရှဇီရှိူ့ထက် ပိုကောင်းသည်။ ရှဇီရှိူ့က အရမ်းကြည့်ကောင်းတော့ရော ဘာဖြစ်လဲ? သူက နှောင်ကြိုးသွယ်ပြီးပြီ၊ သူ့လက်တွဲဖော်က ကျေးလက်က မိုင်းပိုင်ရှင် ဖြစ်နေသေးတယ်!

ဆန့်ကျင်ဘက်အနေနဲ့ သူ(မ)ရဲ့ကောင်လေးကတော့ အနာဂတ်မှာ Marshal ဖြစ်လာလိမ့်မယ်!

ဤသို့တွေးလျက် ရှချီချီသည် ရှဇီရှိူ့ဘေးရှိ ယန်ကျင်းဇီကို ကြည့်လိုက်သည်။ ထို့နောက် သူ(မ)စိတ်ထဲတွင် အနည်းငယ် မသက်မသာ ခံစားလိုက်ရသည် – ဒီလူက ဖုဖေးထက် တကယ်ပဲ အများကြီးပိုချောတယ်!

သူက ဘာလို့ မမည်းတော့တာလဲ? အလှပြင်ကိရိယာ သုံးလာတာလား?

ယန်ကျင်းဇီနှင့် ရှဇီရှိူ့တို့သည် အတူတကွ ထွက်လာခဲ့ကြသည်။ သူတို့ ထွက်လာသောအခါ လူအများ ပထမဆုံး သတိပြုမိကြသည်မှာ ရှဇီရှိူ့ ဖြစ်သော်ငြား ထို့နောက် ချက်ချင်းပင် ယန်ကျင်းဇီကိုလည်း သတိထားမိခဲ့သည်။

တပ်မှူးအနည်းငယ်မှလွဲ၍ ကျန်လူတိုင်းသည် ရှဇီရှိူ့က ကျေးလက်ဒေသမှ မိုင်းပိုင်ရှင်တစ်ဦးနှင့် နှောင်ကြိုးဖွဲ့ခဲ့သော သတင်းကို ရခဲ့ကြသည်။ အများစုသည် ယန်ကျင်းဇီကို စိတ်ထဲမထားကြသော်လည်း ယန်ကျင်းဇီကို တကယ် တွေ့ရသောအခါ... ရှဇီရှိူ့က ဤလူနှင့် နှောင်ကြိုးဖွဲ့လိုသော အကြောင်းအရင်းကို ရုတ်တရက် နားလည်သွားကြရသည်။

ဒီလူက ထပ်တူထပ်မျှ ချောမောပြီး သူက ရှဇီရှိူ့ဘေးမှာ ရပ်နေတာတောင် ရှဇီရှိူ့ရဲ့ လွှမ်းမိုးမှုကို လုံးဝ မခံရတာ အံ့ဩစရာပဲ!

ဒါ့အပြင် သူတို့ရဲ့ရုပ်ရည်တွေက တကယ် လိုက်ဖက်တယ်!

ထို့အပြင် သူတို့က အလွန်ချစ်ခင်ကြသည်ကိုလည်း တွေ့မြင်နိုင်သည်။ သူတို့၏စိတ်စွမ်းအင်များက အတူတကွ ရောနှောနေရုံသာမက သူတို့က လက်လည်း တွဲထားကြသည်...

ပွဲသို့လာရောက်သူ အများအပြားသည် သူတို့၏လက်တွဲဖော်များကို ခေါ်လာကြ၏။ ဤမြင်ကွင်းကို မြင်ရ‌သောအခါ သူတို့သည် မနေနိုင်ဘဲ သူတို့၏စိတ်စွမ်းအင်ကို သုံး၍ သူတို့လက်တွဲဖော်၏စိတ်စွမ်းအင်နှင့် ချိတ်ဆက်ခဲ့ကြသည်။ ခဏကြာသော် ပွဲကျင်းပရာနေရာတစ်ခုလုံးတွင် ပန်းရောင်ပူဖောင်းများနှင့် ပြည့်နေလေသည်။

“ ဒါက ကျွန်တော့်သား ရှဇီရှိူ့ပါ။ သူက အကူဆရာတစ်ယောက်ပါ။ သူ အခု ဗဟိုစစ်တက္ကသိုလ် ကွပ်ကဲမှုဌာနမှာ ပညာသင်ကြားနေပါတယ်။ သူက ကျွန်တော့်ရဲ့ ဂုဏ်ယူဖွယ်ရာပါပဲ! သူနဲ့ သူ့ရဲ့လက်တွဲဖော် ယန်ကျင်းဇီတို့က နောက်လမှာ လက်ထပ်ကြတော့မှာပါ။ ” ရှဝေချန်က ဆက်ပြောသည်။

ရှဝေချန်သည် ရှဇီရှိူ့အကြောင်း ပြောသောအခါတွင် အလွန်ကွဲပြားခြားနားသော စိတ်အခြေအနေ၌ ရှိပြီး ယန်ကျင်းဇီအကြောင်း ပြောသောအခါတွင် သူက နာမည်ကိုသာ ထည့်ပြောခဲ့သည်။

တပ်မှူးခုနစ်ဦးက သူ့ကို နားလည်သည်။ သူတို့သာ သူ့နေရာတွင် ရှိနေလျှင် သူတို့လည်း ယန်ကျင်းဇီကို မည်သို့မိတ်ဆက်ပေးရမည်ကို သိလိမ့်မည်မဟုတ်ပေ။

သို့သော် အခြားသူများက မတူညီစွာ တွေးကြသည်... ရှဝေချန်ကို ဤသို့တွေ့ရသောအခါ သူတို့သည် ရှဝေချန်က ယန်ကျင်းဇီကို အမြင်သိပ်မကြည်‌ဟု ခံစားမိလိုက်ကြသည်။

သူတို့ဆိုလျှင်လည်း သေချာပေါက် ထင်မြင်ချက်ရှိလိမ့်မည်ပင်။

ဤကဲ့သို့သော အတော်ဆုံး အကူဆရာ သားဖြစ်သူ၏ နှောင်ကြိုးသွယ်လက်တွဲဖော်က ကျေးလက်မှ မိုင်းပိုင်ရှင်တစ်ဦးသာ ဖြစ်ရာ အဆင်မပြေဖြစ်လွန်းနေ၏။

သို့သော်ငြား တခြားသူများ၏အတွေးများ မည်သို့ပင် ဖြစ်နေလင့်ကစား ယန်ကျင်းဇီသည် ယခုအခိုက်အတန့်တွင် အလွန်ပျော်ရွှင်သည် မဟုတ်... အလွန့်အလွန် ပျော်ရွှင်နေမိသည်။

သူနဲ့ရှဇီရှိူ့တို့ရဲ့ဆက်ဆံရေးကို အခု တရားဝင်ကြေညာလိုက်ပြီ၊ သူ့ရဲ့အားထုတ်မှုတွေနဲ့ဆို သူတို့ နောက်လမှာ လက်ထပ်လို့ရတယ်!

ဒါတွေအားလုံးက အလှပဆုံးပဲ!

ရှဝေချန်သည် ရှဇီရှိူ့နှင့် ယန်ကျင်းဇီတို့ကို မိတ်ဆက်ပေးပြီးနောက် အခြားဘာကိုမှ မပြောတော့ဘဲ တပ်မှူးများနှင့် တွေ့ဆုံရန် ဤနှစ်ဦးကို ခေါ်သွားခဲ့သည်။ 

တပ်မှူးများ : “ ...... ” တခြားနေ့တွင် သူတို့ကို ဒူးထောက်ကျသည်အထိ ဖိနှိပ်ခဲ့သော အရှင် Marshal က သူတို့ရှေ့၌ မိတ်ဆက်ရန် ရောက်လာသည်ကို တွေ့ရသောအခါ သူတို့၏နှလုံးခုန်သံ ရပ်ဆိုင်းသွားမှုကို သူတို့ ခံစားလိုက်ရသည်။

သူတို့၏အရိုးအိုများက မခံစားနိုင်ချေ။ 

ပေါတောတော ရယ်မောနေသော အရှင် Marshal ကို မြင်ရသော် သူတို့သည် တစ်ခုခုက လုံးဝ မှားယွင်းနေပြီဟု ခံစားလိုက်ကြရ၏။

အရေးကြီးဆုံးကိစ္စမှာ... သူတို့ရှေ့က လူဟာ ရှဇီရှိူ့နှင့် ဆက်နွယ်ရန် သူ့စိတ်စွမ်းအင်၏ တစ်စိတ်တစ်ပိုင်းကို အသုံးပြုနေပြီး တစ်ချိန်တည်းမှာပင် သူတို့ကို ဖိနှိပ်ရန်လည်း သူ့စိတ်စွမ်းအင်၏ တစ်စိတ်တစ်ပိုင်းကို အသုံးပြုလျက်ရှိကာ ပြတ်ပြတ်သားသား သတိပေးနေသည် : “ အဓိပ္ပာယ်မရှိ‌တာတွေ မပြောနဲ့! ” 

သူတို့သည် အဓိပ္ပာယ်မရှိသည်များကို လျှောက်မပြောဝံ့ကြသောကြောင့် ရှဇီရှိူ့ကိုသာ ချီးမွမ်းနိုင်သည် : “ ဒုတိယဗိုလ်ချုပ်ကြီးက အရမ်းအားကျစရာကောင်းတာပဲ။ သူ့မှာ ဒီလိုထူးချွန်တဲ့သားတစ်ယောက် ရှိတယ်! ”

“ မင်းနာမည်က ရှဇီရှိူ့။ ငါ မင်းရဲ့ရလဒ်တွေကို မြင်ဖူးတယ်။ ရလဒ်တွေ အရမ်းကောင်းတယ်။ တပ်မ ၆ က အနာဂတ်မှာ မင်းကို ကြိုဆိုပါတယ်။ ”

“ ငါတို့တပ်မ ၇ ကလည်း မင်းလို ထူးချွန်တဲ့ အရည်အချင်းရှိသူတွေကို ကြိုဆိုနေပါတယ်! ”

…

သာမန်အခြေအနေများတွင် စစ်သည်တော်နှင့် အကူဆရာတို့သည် တစ်သားတည်းဖြစ်သည်။ အချစ်ရူးအဖြစ် ပြောင်းလဲသွားသော သူတို့၏ အရှင် Marshal ကို ကြည့်နိုင်သည်။ ရှဇီရှိူ့ကိုသာ သူတို့၏တပ်မထဲသို့ သူတို့ ခေါ်နိုင်လျှင် အရှင် Marshal ကိုလည်း အမှတ်မထင် ရရှိနိုင်လောက်သည်။ ဘယ်လောက်ကောင်းလိုက်သလဲ!

ရှဇီရှိူ့သည် ဤတပ်မှူးများက သူ့ကို ဤမျှသာယာစွာ စကားပြောလိမ့်မည်ဟု မမျှော်လင့်ထားခဲ့ရာ ခဏတာ ရှက်သွားခဲ့သည်။

သို့သော် ပတ်ဝန်းကျင်ရှိလူများလည်း အံ့ဩသွားကြသည်။

ရှဝေချန်ရဲ့လက်ထဲမှာ တခုခု ထူးခြားတာ ရှိနေလား? မဟုတ်ရင် ဒီရာထူးကြီးလူတွေရဲ့ ကွဲကွဲပြားပြား ဆက်ဆံတာကို ဘယ်လိုလုပ် သူ လက်ခံရနိုင်မလဲ? သူ့သားကိုတောင် လုနေကြတယ်!

ပြီးတော့ တပ်မှူးတွေက ရှဝေချန်ရဲ့သားကို အရမ်းချီးကျူးထားကြတယ်။ အခု သူတို့ သူ့ကို ဘယ်လိုချီးကျူးရတော့မလဲ?

ဤလူများသည် ချီးမွမ်းစကားအချို့ကို လျင်မြန်စွာ တွေးတောခဲ့သော်လည်း ၎င်းတို့က အသုံးမဝင်ခဲ့ချေ။

ရှဝေချန်သည် ရှဇီရှိူ့ကို ယန်ကျင်းဇီအား ခေါ်၍ သွားရောက်စားသောက်ခိုင်းခဲ့ပြီး သူတို့ကို ဆက်လက်၍ မိတ်မဆက်ပေးခဲ့ပေ။

သူက တကယ့်မိုင်းပိုင်ရှင်တစ်ယောက် မဟုတ်မှတော့ မိတ်ဆက်နေတော့ရော ဘာထူးမှာလဲ!

ရှဇီရှိူ့သည် သူ့ဖခင် လွှတ်ပေးလိုက်သည့်အတွက် စိတ်သက်သာရာရသွားပြီး ပွဲခန်းမရှိ အစားအသောက်မျိုးစုံကို အာရုံစိုက်မိလိုက်သည်။

သူသည် အလုပ်အရမ်းများနေခဲ့ရာ ဘာမှမစားရသေးပေ။

“ ဇီရှိူ့၊ ဒီအသားကင်က အရမ်းအရသာရှိတယ်။ စားကြည့်! ” ယန်ကျင်းဇီသည် သေးငယ်သော ပန်းကန်ပြားတစ်ချပ်ပေါ်ရှိ အသားကင်ကို ယူကာ ရှဇီရှိူ့ကို ပေးလိုက်သည်။

စားပြီးနောက် ရှဇီရှိူ့၏မျက်ဝန်းများ တောက်ပလာသည်။

၎င်းကိုတွေ့သော် ယန်ကျင်းဇီသည် ရှဇီရှိူ့ကို နောက်ထပ်အချိုပွဲတစ်ခု အမြန်ယူပေးလိုက်သည် : “ ဒါက... ဒါက ကိုယ်နေတဲ့ဂြိုဟ်ပေါ်က အထူးထွက်ကုန်တစ်ခုပဲ။ မင်း ဒါကိုလည်း စားကြည့်သင့်တယ်။ ” 

ရှဇီရှိူ့ တစ်ကိုက်စားကြည့်လိုက်တော့ ဒါကလည်း အရမ်းအရသာရှိတာကို သိလိုက်ရတယ်!

ပွဲခန်းမတစ်လျှောက်တွင် စားကောင်းသောက်ဖွယ်များစွာ ရှိနေသည်။ ရှဇီရှိူ့သည် ၎င်းတို့အားလုံးကို စိတ်ဝင်စားမိသော်ငြား သူ့လက်ထဲရှိ အချိုပွဲကို စားပြီးနောက် သူ တခြားဘာကိုမှ ထပ်မစားနိုင်လောက်တော့ပေ...

ယန်ကျင်းဇီသည် ရှဇီရှိူ့၏အမူအရာကို ကြည့်ပြီး သူ၏စိတ်စွမ်းအင်ကို ခံစားမိကာ သူ့အတွေးများကို ခန့်မှန်းမိသည်။ ယန်ကျင်းဇီသည် ရှဇီရှိူ့၏လက်ထဲရှိ အချိုပွဲကို ယူကာ စားလိုက်သည် : “ အခြားတစ်ခု သွားစားကြည့်ရအောင်။ ”

“ အင်း! ” ရှဇီရှိူ့ သဘောတူလိုက်၏။ သူ့စိတ်စွမ်းအင်က ယန်ကျင်းဇီကို ထိတွေ့နေပြီး ယန်ကျင်းဇီ၏စိတ်စွမ်းအင်ကို ရေကဲ့သို့ တဖြည်းဖြည်း တွယ်တက်ကာ တစ်သားတည်း ဖြစ်သွားခဲ့သည်။ 

ယန်ကျင်းဇီ၏စိတ်စွမ်းအင်ဟာ ပျော်ပျော်ကြီး ပေါက်ကွဲလုနီးပါးပင်။

ပတ်ဝန်းကျင်ရှိ စစ်သည်တော်များနှင့် အကူဆရာများသည် သူတို့၏စိတ်စွမ်းအင် အပြန်အလှန်တုံ့ပြန်မှုကို အတိအကျ မခံစားနိုင်သော်ငြား သူတို့၏စိတ်စွမ်းအင်များ ရောထွေးနေမှုကိုတော့ ခံစားနေနိုင်သေးသည်။ 

ထိုစစ်သည်တော်များသည် ယန်ကျင်းဇီကို အလွန်အားကျနေကြသည် – ဒီလောက်လှတဲ့အကူဆရာက သူ့ကို အရမ်းတွယ်ကပ်တာ တကယ့်ကို ကောင်းလွန်းတာပဲ!

သူတို့ နောင်တရသွားကြပြန်သည်။ ရှဇီရှိူ့က တကယ်ပဲ အရမ်း“ချိုမြိန်”တာကို ဟိုးအရင်ကတည်းက သူတို့ သိခဲ့မယ်ဆိုရင် သူတို့ ရှဇီရှိူ့ကို ပိုးပန်းခဲ့‌မိမှာ!

အကူဆရာအချို့ကမူ ရှဇီရှိူ့ကို အတော်လေး မနာလိုဖြစ်နေကြသည်။

စစ်သည်တော်အများအပြားတွင် သူတို့၏လက်တွဲဖော်များကို ဂရုမစိုက်တတ်ခြင်းကဲ့သို့ ပြဿနာဆိုးများစွာ ရှိသည်။ ရှဇီရှိူ့၏စစ်သည်တော်ကတော့ မတူချေ။ သူက ရှဇီရှိူ့ကို ဂရုစိုက်ပေးနေတယ်!

ရှဇီရှိူ့ စားရန် တစ်ခုပြီးတစ်ခု ယူပေးကာ ရှဇီရှိူ့ မကုန်လျှင် သူက စားပေးသည်...

တကယ်တမ်း တွေးကြည့်လိုက်တော့ ဒီလိုစစ်သည်တော် ရှာတာမျိုးက ကောင်းတာပဲမလား?

ရှဇီရှိူ့နှင့် ယန်ကျင်းဇီတို့ ချိုချိုမြိန်မြိန် စားသောက်နေကြစဉ် ရှချီချီ ရောက်လာသည်။

ရှချီချီက ရှဇီရှိူ့ထံသို့ ရောက်လာကာ မေးသည် : “ အစ်ကို၊ ဒီလူနဲ့ တစ်သက်လုံး တကယ် အတူတူနေချင်တာလား? ”

ရှဇီရှိူ့ မျက်မှောင်ကြုံ့လိုက်သည်။

ရှချီချီက ဆက်ပြောသည် : “ သူက ဂြိုဟ်အစွန်အဖျားက မိုင်းပိုင်ရှင်တစ်ယောက်ပဲ... ”

“ မိုင်းပိုင်ရှင်ဖြစ်တော့ ဘာဖြစ်လဲ? သူက အရမ်းကောင်းတယ်။ ငါ့အတွက်တော့ သူက အကောင်းဆုံးပဲ။ ” ရှဇီရှိူ့က ပြောလိုက်သည်။ ဤကမ္ဘာတွင် ယန်ကျင်းဇီထက် ပိုကောင်းသည့်လူ မရှိချေ။

ရှချီချီသည် ရှဇီရှိူ့ကို ကြည့်ကာ ရှဇီရှိူ့က အနည်းငယ် တုံးအသည်ဟု အမြဲခံစားနေခဲ့ရသည်။

စာအုပ်ထဲတွင် ဖုဖေးက ရှဇီရှိူ့ကို မည်မျှလိုက်လိုက်၊ ရှဇီရှိူ့က ဖုဖေးနှင့် တွဲရန် သဘောမတူခဲ့ချေ။ ရှဇီရှိူ့က အချစ်ရေးမနှစ်သက်သူဟု သူ(မ) ထင်ခဲ့သည်။ ရလဒ်ကမူ... မျက်စိတမှိတ်အတွင်း ရှဇီရှိူ့က သူ(မ) အထင်သေးသော လူတစ်ဦးနှင့် နှောင်ကြိုးသွယ်ခဲ့၏။

ရှချီချီသည် ရှဇီရှိူ့ကို အနည်းငယ် သနားသွားသည်။ သူ(မ) ရှဇီရှိူ့ကို ကြည့်သောအခါ သူ(မ)၏အကြည့်ထဲတွင် စာနာသနားမှု ရှိနေသည်။

ဒီရှချီချီ ဘာဖြစ်နေတာလဲ? ယန်ကျင်းဇီသည် ရှဇီရှိူ့ကို အခြားသူများ သနားနေခြင်းအား မကြိုက်ဘဲ ချက်ချင်း ပြောလိုက်သည် : “ ငါက တော်တော်ကောင်းတယ်လို့ ငါလည်း ထင်တယ်။ အနည်းဆုံးတော့ ငါ့ထက် ပိုကောင်းတဲ့ လက်တွဲဖော်ကို မင်း မရှာနိုင်တာ သေချာတယ်! ”

ရှချီချီသည် ယန်ကျင်းဇီ၏စကားကို ကြားသောအခါ အံ့အားသင့်သွားရသည် – ဒီလူက ဂုဏ်မောက်လွန်းလှချည်လား?! သူ(မ)သည် အလွန်ဒေါသထွက်မိသော်ငြား ရယ်လည်း ရယ်ချင်မိသည် : “ ငါ့ကောင်လေးက ဖုဖေး! ”

“ ဖုဖေးလေးပဲမလား? ” ယန်ကျင်းဇီက ဆိုသည် : “ အဲ့ဒါ ဘာကြီးကျယ်စရာရှိလဲ။ ”

“ နင်... ” ရှချီချီ ယန်ကျင်းဇီကို ကြည့်လိုက်သည် : “ ဖုဖေးက အတော်ဆုံးပဲ! ” ဒီစာအုပ်ထဲမှာ ရှဇီရှိူ့က အကောင်းဆုံး ဖြစ်ပေမယ့် ဖုဖေးက ပိုကောင်းတာ သိသာတယ်!

“ ဖုဖေးက အတော်ဆုံးလား? ” ယန်ကျင်းဇီ ဆွံ့အသွားသည်။ ဖုဖေးတွင် အရည်အချင်းကောင်း ရှိသည်ဟု သူ ဝန်ခံနိုင်သော်လည်း ကြယ်မြို့တော်တွင် အရည်အချင်းကောင်းရှိသည့် လူငယ်များစွာ ရှိသည်။ သူ မပါလျှင်တောင်မှ ဖုဖေးက အကောင်းဆုံး ဖြစ်လိမ့်မည်မဟုတ်ချေ။

“ ဖုဖေးက အတော်ဆုံးလား? ” အခြားလူတစ်ဦးက မေးလာသည်။ ထိုလူဟာ တခြားလူ မဟုတ်ဘဲ ဖိုရမ်ထဲတွင် ရှဇီရှိူ့ကို ကူညီ၍ ဝင်ပြောပေးခဲ့သော “Lone Wolf” (အထီးကျန်ဝံပုလွေ) ဖြစ်သည်။ သူသည် တပ်မ ၁ တပ်မှူး၏ မြေး ဖြစ်ပြီး သူ့အရည်အချင်းကလည်း အဆင့် S ဖြစ်သည်။ သူသည် ကျောင်းတွင် ဖုဖေးနှင့် တိုက်ခိုက်ခဲ့ဖူးပြီး ဖုဖေးကို အနိုင်ပင်ယူခဲ့သည်။

“ ဟုတ်တယ်! ” ရှချီချီက မျက်နှာတည်နှင့် ပြောသည်။

သို့သော်လည်း ရှချီချီ စကားပြောပြီးပြီးချင်းတွင် ဖုဖေးက ရုတ်တရက် ပေါ်လာကာ သူ(မ)ကို ဆွဲခေါ်သည်။

ဤအချိန်တွင် ဖုဖေးလည်း ပွဲသို့ရောက်လာသည်။

သူသည် တပ်မှူးခုနစ်ဦးစလုံး ရောက်လာကြောင်း သိပြီးနောက် ရောက်လာခဲ့သည်။ သူ့ဖခင်၏ ရုတ်တရက် ထိခိုက်ဒဏ်ရာရမှု ဖြစ်ခဲ့ပုံကို သိရှိရရန်နှင့် သူ့ဖခင်အတွက် ရှင်းပြချက် တောင်းဆိုရန်အတွက် သူ ကြိုးစားချင်ခဲ့၏။   

ရလဒ်ကမူ လူများကို စော်ကားနေသော ရှချီချီကို သူ တွေ့လိုက်ရသည်...

ဖုဖေးသည် သူ(မ)ကို ချက်ချင်းပင် ဆွဲထုတ်လိုက်သည်။ 

“ ဖုဖေး ဘာလုပ်တာလဲ? ” ရှချီချီက မေးသည်။

“ ဘာမှမပြောနဲ့… ”

“ ဘာလို့ မပြောနိုင်ရမှာလဲ? ရှင်က အဲ့ယန်ကျင်းဇီထက် အဆတစ်ထောင်၊ အဆပေါင်း ၁၀,၀၀၀ ပိုကောင်းတယ်။ ” ရှချီချီက ဆိုသည်။

ယန်ကျင်းဇီ : “ ... ” ဖုဖေးလိုလူလောက်ကတော့ သူ့စိတ်စွမ်းအင်ရဲ့ဖိအားတစ်ခုနဲ့တင် အသေဖိနှိပ်လိုက်လို့ရတယ်!

ယန်ကျင်းဇီသည် ရှဇီရှိူ့ကို မည်သို့ဝန်ခံရမည်နည်းဟု စတင်စဉ်းစားလိုက်သည်။ သို့ရာတွင် သူ ဘာမှမလုပ်နိုင်သေးမီ ပြင်းထန်သော အချက်ပေးသံတစ်ခု ရုတ်တရက် ထွက်ပေါ်လာသည်။