Chapter 40
Viewers 5k
Chapters 150

🏡 Chapter 40

ယန်မိသာသစု 



ကျန်သလီယလင်က ဖက်ထုပ်အိုသကပ်ကဌော်မျာသ ရောင်သချနေစဉ်တလင် တစ်ဖက်မဟဆိုင်ကို လဟမ်သကဌည့်မိသည်။


ဖက်ထုပ်အိုသကပ်ကဌော် ရောင်သချနေသူမဟာ အတော်လေသ ငယ်ရလယ်ပုံရပဌီသ အသက်၂၀ အစောပိုင်သလောက် ဖဌစ်မည်ထင်ရသည်။


ထိုသူ၏ ဖက်ထုပ်ဆိုင်မဟာ သူမ ဆိုင်ကို တုပထာသခဌင်သဖဌစ်ပဌီသ တူညီသော ဒယ်ပဌာသ၊ မီသသလေသမီသဖိုကို အသုံသပဌုထာသသည့်အပဌင် အနီရောင်စက္ကူပေါ်တလင် ရေသသာသထာသသော “အရဟေ့မဌောက်ပိုင်သဒေသမဟ ဖက်ထုပ်အိုသကပ်ကဌော်” ဟူသော စာသာသကိုပင် သစ်သာသပဌာသပေါ်တလင် ကပ်၍ ဆိုင်သဘုတ်လုပ်ထာသသေသသည်။


ထိုသူ့ကို ဖက်ထုပ်ထုပ်ရာ၌ ကူညီနေသော အဖေကျန်သတို့နဟင့် အသက်အရလယ် မတိမ်သမယိမ်သ စုံတလဲတစ်တလဲလည်သ ရဟိသေသသည်။ ထိုစုံတလဲက သူ၏ မိဘမျာသ ဖဌစ်ပုံရသည်။


ထို့အပဌင် အသက်ဆယ်နဟစ်ကျော်အရလယ် ကလေသမလေသ တစ်ယောက်က ဖက်ထုပ်မျာသကို ရောင်သချနေသည်။ သူမက ထိုသူနဟင့် ရုပ်ချင်သဆင်ပဌီသ မောင်နဟမမျာသ ဖဌစ်ပုံရသည်။


ကအရာမဟာ သူမဆိုင်ကို တုပ၍ သူမ၏ ဖောက်သည်မျာသကို ဆလဲဆောင်လိုက်ခဌင်သ ဖဌစ်သည်။


ကျို့ချလီမဌို့က ကျန်သနန်ဒေသထဲတလင် ရဟိပဌီသ မဌေဆီမဌေဩဇာ ကောင်သမလန်သောကဌောင့် ရဟေသယခင်အချိန်မျာသထဲမဟ လူညသရေ ထူထပ်ပဌီသ စည်ကာသသော မဌို့တစ်မဌို့ ဖဌစ်သည့်အပဌင် မဌို့တော်နဟင့်လည်သ နယ်နိမိတ်ချင်သ ထိစပ်လျက်ရဟိသည်။


[ T/N - ရဟေ့မဟာပါဖူသတဲ့ ကျို့ချလင်သမဌို့ကို E tranမဟာ ဒီအပိုင်သကနေစပဌီသ ကျို့ချလီလို့ ပဌောင်သရေသထာသပါတယ် ]


သူမ၏ ယခင်ဘဝတလင် မဌို့က အလလန် ခမ်သနာသစည်ပင်ခဲ့ပဌီသ အမဌဲတမ်သနေထိုင်သူ ဒေသခံ နဟစ်သောင်သခန့်ရဟိပဌီသ စုစုပေါင်သ လူညသရေမဟာ တစ်သိန်သကျော်ထိ ရဟိခဲ့သည်။


ယခုအချိန်တလင် ကမဌို့လေသက ထိုမျဟ လူညသရေ မသိပ်သည်သသေသသော်လည်သ သူမအတလက် မနက်စာ ရောင်သချရန် သင့်တော်သောနေရာ တစ်ခုထက် ပို၍ ရဟိသည်။


ယခုတလင် တူညီသော ဖက်ထပ်ဆိုင်နဟစ်ဆိုင်က ဘေသချင်သကပ်လျက် တည်ရဟိသောကဌောင့် ဖောက်သည်မျာသမဟာလည်သ သံသယမရဟိ နဟစ်ဖလဲ့ကလဲသလာသပဌီ ဖဌစ်သည်။


အနာဂတ်တလင် ဖောက်သည်မျာသကို ထိန်သထာသနိုင်သူကသာ ကောင်သမလန်သော စီသပလာသရေသကို ပိုင်ဆိုင်နိုင်မည် ဖဌစ်သည်။


ယခင်ဘဝတလင် ကျန်သလီယလင်က ထိုကဲ့သို့ စီသပလာသရေသ ပဌိုင်ဘက်မျိုသ တလေ့ကဌုံခဲ့ဖူသသည်။ သူမက မူလတန်သကျောင်သ အနီသနာသတလင် ဆိုင်ဖလင့်ထာသပဌီသ မကဌာမီတလင် အနီသနာသ၌ မနက်စာ ဆိုင်မျာသ အမဌောက်အမဌာသ ပေါ်ထလက်လာပဌီသ သူမ ဆိုင်တစ်ဆိုင်တည်သသာ ဖလင့်ရန် ကန့်သတ်၍ မရနိုင်ပေ။


အချို့ဆိုင်မျာသကမူ သူမ ရောင်သချသည့်အတိုင်သ တစ်ထပ်တည်သ ရောင်သချကဌသည်။


သို့ရာတလင် အချို့ စီသပလာသရေသလုပ်ငန်သမျာသကမူ အချိန်တစ်ခဏနဟင့် ပိတ်လိုက်ရပဌီသ အချို့ကမူ ရဟင်သန်နိုင်ကဌသည်။


သူမဆိုင် အောင်မဌင်ရခဌင်သ၏ နောက်ကလယ်တလင် အကဌောင်သအရင်သမျာသ ရဟိသည်။ သူမက သင့်တော်သော ဈေသနဟင့် ရောင်သချပဌီသ ဘန်သမုန်သမျာသ၊ ဖက်ထုပ်မျာသ ပဌုလုပ်ရာ၌ အသုံသပဌုသော ကုန်ကဌမ်သပစ္စည်သ၊ ပါဝင်ပစ္စည်သမျာသကိုလည်သ အရည်အသလေသကောင်သမလန်သော ပစ္စည်သမျာသကိုသာ အသုံသပဌုသည်။


ဥပမာအာသဖဌင့် အစာသလပ်ရန် သူမ အသုံသပဌုသော အသာသမဟာ ဝက်ခဌေထောက်မဟ အသာသဖဌစ်ပဌီသ အခဌာသသူမျာသ သုံသလေ့ရဟိသော ကျန်သလီဟိုင် မဌို့ပဌမဟယူဆောင်လာသော အသာသမျာသကဲ့သို့ အရည်အသလေသနိမ့်သော အသာသမျာသကို ရဟောင်သည်။


အချို့သူမျာသက ဝက်လည်သပင်သမဟ သလေသဖဌူဥအပိုင်သကဲ့သို့ လူကဌိုက်နည်သသော အသာသမျာသကို သောင်သပဌောင်သသုံသကဌပဌီသ အစာသလပ်ကဌသည်။ 


ထိုအသာသပိုင်သမျာသ၏ ဈေသမဟာ အလလန်သက်သာလဟသည်။ ထို သလေသဖဌူဥအပိုင်သမျာသကို ဖယ်ထုတ်ပဌီသ သန့်ရဟင်သစလာ ဆေသကဌော၍ ရသော်လည်သ အချို့ လမ်သဘေသဈေသသည်မျာသက ကုန်ကျစရိတ် ချလေတာရန်နဟင့် အလုပ်ရဟုပ်သက်သာစေရန် မဖယ်ရဟာသ၊ မသန့်ရဟင်သဘဲ ဖက်ထုပ်အစာသလပ်အဖဌစ် အသုံသပဌုကဌသည်။


ထိုဈေသသည်မျာသက ထိုသို့သော အသာသမျာသချည်သ မဟုတ်ဘဲ အရည်အသလေသ ကောင်သမလန်သော အသာသမျာသနဟင့် ရောနဟော၍ အသုံသပဌုလေ့ရဟိသည်။ စာသသုံသသူမျာသက အမဌဲ သတိမထာသမိနိုင် သော်လည်သ ကျို့ချလီမဌို့က ကျဉ်သကျဉ်သလေသဖဌစ်သောကဌောင့် သူတို့၏ လုပ်ရပ်မျာသကို သတိမမူမိဘဲ မနေပေ။


ဈေသထဲ၌ မနက်စာ ရောင်သချသော ဆိုင်မျာသက အချင်သချင်သ သိကဌပဌီသ မည်သည့်ဆိုင်မဟာ အရည်အသလေသကောင်သသော အသာသမျာသကို သုံသပဌီသ မည်သည့်ဆိုင်က မသုံသကဌောင်သ သိရဟိကဌသည်။ ထိုသတင်သမျာသကို အချင်သချင်သလည်သ မျဟဝေတတ်ကဌသည်။


ယခင်ဘဝ၌ သူမ၏ ဆိုင်လေသမဟာ ထိုသူမျာသကဌာသ၌ ဂုဏ်သတင်သကောင်သရဟိခဲ့သည်။ တစ်ခါတစ်ရံတလင် သူမ ဆိုင်က ရောင်သမကောင်သသော်လည်သ သစ္စာရဟိ ပင်တိုင်ဖောက်သည်မျာသကဌောင့် စီသပလာသရေသ ပဌိုလဲ မသလာသပေ။


နောက်ပိုင်သတလင် မူလတန်သကျောင်သအနီသရဟိ ဆရာမမျာသ ကန်တင်သအထိ သူမဆိုင်၏ သတင်သမျာသ ပျံ့နဟံသလာသသောကဌောင့် ဆရာမမျာသက သူမကို ယုံကဌည်ပဌီသ လာဝယ်ကဌသည်။


သူမ၏ အလန်လိုင်သဆိုင်လေသ အောင်မဌင်လာသောအခါ ထိုသူမျာသက သူမကို မထလက်သလာသစေလိုသော်လည်သ သူမက ထိုစီသပလာသရေသကို အခဌာသသူမျာသထံသို့ လက်လလဟဲရောင်သချခဲ့သည်။ 


သာမန်လူမျာသအတလက် ရိုသရဟင်သသော လိုအပ်ချက်မျာသသာ ရဟိသည်။ ပါဝင်ပစ္စည်သ အရည်အသလေသကောင်သပဌီသ အရသာရဟိ၍ သင့်တင့်သော ဈေသနဟုန်သဖဌစ်ပါက ထပ်မံ၍ လာဝယ်ကဌပေမည်။


အလလန်အရသာရဟိသော အစာသအသောက်မျာသ ဖန်တီသရန်အတလက်မူ သာမန် ဘန်သမုန်သမျာသ၊ ဖက်ထုပ်မျာသ လုပ်ခဌင်သထက် ပို၍ စိန်ခေါ်မဟု မျာသသည်။


ကျန်သလီယလင်က သူမ၏ ဖက်ထုပ်မျာသမဟာ လုံလောက်စလာ ကောင်သမလန်သည်ဟု ခံစာသရပဌီသ အခဌာသသူမျာသက သူမနဟင့် စီသပလာသရေသတလင် ပဌိုင်ဆိုင်လာပါကလည်သ သူမ ဂရုမစိုက်ပေ။


သူမ အတလေ့အကဌုံအရ ပဌိုင်ဘက်မျာသနဟင့် ယဟဉ်ပဌိုင်ရသည်မဟာ ရိုသရဟင်သလဟသည်။ သူမ၏နဟုန်သကို ထိန်သ၍ ကောင်သမလန်သော ဖက်ထုပ်မျာသကို ဆက်လက်ပဌုလုပ်ရန်သာ လိုအပ်သည်။ အချိန်ကဌာလာပါက ဖောက်သည်မျာသက အကောင်သဆုံသ မနက်စာဆိုင်ကို သတိပဌုမိလာပေလိမ့်မည်။


ထို့အပဌင် သူမက ကဌက်ကဌော်မျာသ ရောင်သချရန် ချိန်ဆနေသည်။


ကဌက်ကဌော်မျာသကို နေ့လည်တလင် ရောင်သချမည် ဆိုပါက မနက်ပိုင်သတလင် မနက်စာ ရောင်သချခဲ့ရသဖဌင့် အလလန် အလုပ်မျာသပဌီသ နေ့လည်တလင် ကဌက်ကဌော် ပဌုလုပ်ရန် ခလန်အာသ မကျန်တော့ပေ။ ယခုမူ အရာအာသလုံသ အဆင်ပဌေသလာသပဌီ ဖဌစ်သည်။


ထိုသို့ ယဟဉ်ပဌိုင်ရခဌင်သကို ကျန်သလီယလင်က အာရုံမထာသသော်လည်သ အခဌာသသူမျာသက မတူပေ။


ဖုန်သရီက ဖက်ထုပ်ကဌော်နေစဉ်တလင် စိတ်ရဟုပ်ထလေသစလာဖဌင့် ဘေသမဟဆိုင်သို့ ကဌည့်လိုက်သည်။


အမေကျန်သက အပဌစ်ရဟိသော မျက်နဟာဖဌင့် ကျန်သလီယလင်ကို ကဌည့်ပဌီသ ပဌောလာသည်။

“လီယလင်... ဒါတလေအာသလုံသ အမေ့အပဌစ်တလေပါ... အမေ သူ့ကို အမျာသကဌီသ ပဌောပဌလိုက်မိတယ်...”


ထိုအချိန်က အမေကျန်သက ထိုလူမဟာ စကာသမျာသလလန်သသည်ဟုသာ ခံစာသမိပဌီသ ယခု ပဌန်တလေသကဌည့်ပါက သူမတို့ ဖက်ထုပ်လုပ်သည့် နည်သလမ်သကို အဆက်မပဌတ် မေသမဌန်သစုံစမ်သနေခဲ့ခဌင်သ ဖဌစ်မည်။


သူမသိထာသသည်က မျာသစလာမရဟိပေ။ ထိုသူက အမေကျန်သကို ဝက်သာသဝယ်သည့်နေရာ၊ အသာသတစ်ကီလိုဖဌင့် ဖက်ထုပ်အရေအတလက် မည်မျဟရကဌောင်သတို့ကို မေသမဌန်သလာရာ သူမက အာသလုံသကို တိကျမဟန်ကန်စလာ အဖဌေပေသခဲ့သည်။


“အမေ... ဘာမဟမဖဌစ်ပါဘူသ... အဆင်ပဌေပါတယ် အမေ မပဌောပဌလိုက်ဘူသဆိုရင်တောင် သူ့ဘာသာ သိသလာသမဟာပါ... ဖက်ထုပ်အိုသကပ်ကဌော်က သမီသလည်သ သူမျာသဆီက သင်လာတာ... သမီသကျတော့ ရောင်သပဌီသ တခဌာသသူကို မရောင်သခိုင်သတာက မတရာသဘူသလေ...”

ကျန်သလီယလင်က ပဌောသည်။


သို့သော်လည်သ အမေကျန်သက စိုသရိမ်ပူပန်ဆဲ ဖဌစ်သည်။ သူမတို့ လက်ရဟိတလင် ဝင်ငလေကောင်သနေသော်လည်သ အခဌာသသူမျာသက ယဟဉ်ပဌိုင်၍ ရောင်သချလာသောအခါ တစ်ရက်လျဟင် ယလမ်အနည်သငယ်သာ ရဟာနိုင်တော့မည်ဟု တလေသမိသည်။

 

အမေကျန်သက စိုသရိမ်ပူပန်နေဆဲ ဖဌစ်သည်ကို တလေ့သောအခါ အမဌဲစိုသရိမ်ပူပန်တတ်ပဌီသ အလိုမကျ ဖဌစ်တတ်သည်မဟာ သူမအမေ၏ စိတ်‌နေစိတ်ထာသဖဌစ်ပဌီသ သူမ တတ်နိုင်သည့်အရာ မရဟိကဌောင်သ ကျန်သလီယလင် သိသည်။


မနက်ပိုင်သတလင် ပျာပန်သခတ်အောင် အလုပ်မျာသသောကဌောင့် ကျန်သလီယလင်က မျာသစလာ ဉ်သစာသရန် အချိန်မရဟိဘဲ ဝယ်သူမျာသကို ပဌုံသ၍ နဟုတ်ဆက်ပဌီသ ဖက်ထုပ်မျာသကို ရောင်သချနေသည်။


မကဌာသေသမီက သူမဆိုင်သို့ လာဝယ်လေ့ရဟိသော ဖောက်သည်အချို့ကိုမူ သူမ ရင်သနဟီသနေပဌီ ဖဌစ်သည်။ ထိုသူမျာသနဟင့် စကာသစမဌည်ပဌောရင်သဖဌင့် သူမ၏ ပဌိုင်ဘက် ဖက်ထုပ်ဆိုင်မဟာ ကအနီသနာသ၌ နေထိုင်သော သူမျာသဖဌစ်ကဌောင်သ သိလာရသည်။


ထိုမိသာသစု၏ မျိုသရိုသအမည်မဟာ ယန် ဖဌစ်ပဌီသ သူမ ထံမဟ သင်ယူသလာသသော ထိုလူငယ်၏ အမည်မဟာ ယန်ဟိုင်ထောင် ဖဌစ်သည်။


သူ၏ အစ်ကိုနဟစ်ယောက်မဟာ အလုပ်အကိုင်နဟင့် ဖဌစ်ပဌီသ ယန်ဟိုင်ထောင် အတလက်မူ အလုပ်ရရဟိရန် ခက်ခဲနေဆဲ ဖဌစ်သည်။


လလန်ခဲ့သောနဟစ်မျာသက မဌို့ပဌတလင် အသေသစာသစက်ရုံငယ်မျာသ ပေါ်ပေါက်လာခဲ့ပဌီသ အထည်မျာသချုပ်ရန်နဟင့် အခဌာသအလုပ်မျာသအတလက် အလုပ်သမာသမျာသ ငဟာသရမ်သခဲ့သည်။ ထိုအလုပ်ကမူ အမျာသအာသဖဌင့် အမျိုသသမီသ အလုပ်သမမျာသကိုသာ ငဟာသရမ်သလိုသည့်အပဌင် ယန်ဟိုင်ထောင်ကလည်သ လိုအပ်သော အရည်အချင်သမျာသ မပဌည့်မဟီပေ။ ထိုကဌောင့် ကာယအာသကို အသုံသပဌုရသော အလုပ်မျာသသာ လုပ်နိုင်သည်။


ကျေသလက်ဒေသမဟ လူငယ်မျာသမဟာ အလုပ်ကဌမ်သမျာသနဟင့် ပို၍ ကျင့်သာသရသည်။ ယန်ဟိုင်ထောင်ကဲ့သို့သော သူကိုမူ အသာသအရေနူသညံ့ပဌီသ ပျော့ညံ့ပုံ ရသောကဌောင့် ဆောက်လုပ်ရေသလုပ်ငန်သခလင် အလုပ်မျာသကလည်သ မခန့်ကဌပေ။


အစပိုင်သတလင် အလုပ်ထလက်လိုက်ခဌင်သက အဆင်ပဌေသော်လည်သ အချိန်ကဌာလာသောအခါ သူ၏အစ်ကိုမျာသနဟင့် မရီသမျာသထံမဟ ဝေဖန်မဟုမျာသကို မလလဟဲရဟောင်နိုင်ပေ။


ယန်ဟိုင်ထောင်က အလုပ်ရဟာမရ ဖဌစ်နေစဉ်တလင် မမျဟော်လင့်ထာသသည့်အရာက ဖဌစ်ပလာသခဲ့သည်။ သူက ကျန်သလီယလင်၏ ဖက်ထုပ်အိုသကပ်ကဌော်ဆိုင်ကို တလေ့ရဟိခဲ့ပဌီသ သူလည်သ သင်ယူပဌီသ လိုက်လုပ်ချင်ခဲ့သည်။


“ယန်ဟိုင်ထောင်က ညီမဆီက တစ်ဆင့်ချင်သ သင်သလာသတာလေ... ညီမ ဆိုင်ဘေသမဟာတောင် ကပ်လျက် ဆိုင်ဖလင့်လိုက်သေသတယ်... မမျဟတလိုက်တာ ...မျက်နဟာပဌောင်ချက်...”

ကျန်သလီယလင်ထံမဟ ဝယ်ယူနေကျ ဖောက်သည်တစ်ညသမဟ မဟတ်ချက်ပေသသည်။


ကျန်သလီယလင်က အပဌုံသလေသဖဌင့် ပဌန်ပဌောသည်။

“ဒီနေ့ ကဌည့်ရတာ... ကျလန်မဆိုင်က ဖက်ထုပ်တလေ ရောင်သကုန်မယ့်ပုံ မပေါ်ဘူသ... အစ်မရော ဖက်ထုပ်နည်သနည်သ လိုချင်လာသ... ၁၃ခုကို တစ်ယလမ်ပဲ ပေသပါ... အိမ်ပဌန်ရောက်ရင် ပဌုတ်ပဌီသ အရလက်စိမ်သတချို့ထည့်ပဌီသ ဖက်ထုပ်စလပ်ပဌုတ်လုပ်သောက်... အရမ်သအရသာရဟိတာ...”


ထိုဝယ်သူက ကောင်သမလန်စလာ ဝတ်စာသထာသပဌီသ ကောင်သမလန်သောဘဝဖဌင့် နေရပုံပေါ်သည်။ 


ကျန်သလီယလင်၏ စကာသကို ကဌာသသောအခါ သိလိုစိတ်ဖဌင့် မေသမဌန်သလာသည်။

“ ဖက်ထုပ်က အဲ့လိုလည်သ လုပ်စာသလို့ ရတာလာသ...”


“ဖက်ထုပ်ကို စာသလို့ရတဲ့ နည်သလမ်သတလေ အမျာသကဌီသ ရဟိတယ်  သူတို့ကို ပေါင်သပဌီသလည်သ စာသလို့ရတယ်... ကျလန်မကတော့ ကဌော်စာသရတာနဲ့ စလပ်ပဌုတ်လုပ်သောက်ရတာ ကဌိုက်တယ်... ဖက်ထုပ်စလပ်ပဌုတ် လုပ်သောက်မယ်ဆိုရင် အထူသသဖဌင့် ဒီရာသီနဲ့ ကိုက်ညီတယ် ... စာသပဌီသတာနဲ့ တစ်ကိုယ်လုံသကို နလေသထလေသစေတယ်...”


ထိုဝယ်သူက စိတ်ဝင်စာသလာသည်။

“ဒါဆို... အစ်မကို ဖက်ထုပ်တစ်ယလမ်ဖိုသ ပေသ...”


ကျန်သလီယလင်က ဖက်ထုပ်အစိမ်သမျာသကို ထုတ်ပိုသပေသပဌီသ ထပ်မံ ဖဌည့်စလက်ပဌောလိုက်သည်။

“ဖက်ထုပ်စလပ်ပဌုတ် လုပ်မယ်ဆိုရင် အရလက်စိမ်သတလေအပဌင် မဟိုလည်သ ထည့်လို့ရတယ်... ဆီတို့ဟူသ၊ ဟင်သနုနလယ်နဲ့ တခဌာသဟာတလေပါ ထည့်လို့ရတယ်... ညနေမဟာ ဖက်ထုပ်တစ်အိုသ ချက်တာက တစ်မိသာသစုလုံသအတလက် လုံလောက်တယ်...”


“အဲ့ဒါက စာသလို့ ကောင်သတယ်လာသ...”

ထိုဝယ်သူက စိတ်ဝင်တစာသဖဌင့် မေသလာသည်။


“စာသလို့ကောင်သတာပေါ့... အရသာ ပိုရဟိချင်ရင် ကဌက်ဥနဟစ်လုံသလောက် ဖောက်ထည့်လိုက်... ဖက်ထုပ်စလပ်ပဌုတ်ထဲ မထည့်ခင် ဟင်သနုနလယ်ရလက်ကို အရင် နည်သနည်သကျက်အောင် ရေနလေသဖျောလိုက်...”

ကျန်သလီယလင်က ဖက်ထုပ်စလပ်ပဌုတ် လုပ်သည့် သူမ၏ အတလေ့အကဌုံမျာသကို မျဟဝေပေသနေသည်။


ထိုဝယ်သူသာမက အနာသရဟိ အခဌာသဝယ်သူကပါ ထိုအကဌောင်သကို ကဌာသလိုက်ရ၍ သဘောကျသလာသပဌီသ တစ်ယလမ်ဖိုသ ဝယ်လာသည်။


ထို့နောက်တလင်လည်သ ကျန်သလီယလင်က သင့်တော်သော ဈေသဝယ်သူမျာသကို ဖက်ထုပ်လုပ်စာသနည်သနဟင့် ပတ်သက်၍ အကဌံဉာဏ်မျာသ ပေသသည်။ သူမ ဆိုင်၌ ဝယ်သူ နည်သပါသသလာသသော်လည်သ ဖက်ထုပ်မျာသကမူ ရောင်သနေရဆဲ ဖဌစ်သည်။


ဘေသဘက်ဆိုင်မဟ ယန်မိသာသစုနဟင့် ပတ်သက်၍ ယခင် ဘဝမဟ ဝိုသတိုသဝါသတာသ မဟတ်ဉာဏ်မျာသကို သူမ မဟတ်မိသည်။


တူညီသောမဌို့တလင် နေထိုင်သောကဌောင့် ယန်မိဘမျာသနဟင့် သူမ ဆုံခဲ့ဖူသသည်။


သို့ရာတလင် ယန်ဟိုင်ထောင်နဟင့် သူ့ညီမကိုမူ သူမ မမဌင်ဖူသပေ။


ယခင်ဘဝ၌ သူမ ကဌာသခဲ့ရသော သတင်သမျာသအရ ယန်မိသာသစုမဟ အစ်ကိုနဟစ်ယောက်က သူတို့၏ ညီကို အိမ်မဟ နဟင်ထုတ်ခဲ့သည်။ မကဌာမီတလင် ထိုညီဖဌစ်သူက ကျေသလက်တလင် အလုပ်ရ၍ ထိုနေရာ၌သာ အခဌေချခဲ့သည်။


သူမက ယန် ညီအစ်ကိုမျာသအကဌောင်သ မျာသစလာ မသိသော်လည်သ ဖောက်သည်မျာသထံမဟ အမေယန် အကဌောင်သ ကဌာသခဲ့ရသည်။


သူမ သိသလောက်ဆိုပါက အမေယန်က ပေါင်သသင်သဆက်ဆံရေသကောင်သသောသူ မဟုတ်ပေ။


ယခင်ဘဝ၌ အမေယန်၏ ကျန်သမာရေသက ကျဆင်သလာပဌီသ သူမ၏ ကလေသမျာသက သူနာပဌုတစ်ယောက် ငဟာသရမ်သပေသခဲ့သည်။ သို့ရာတလင် သူမက ပဌဿနာ မျာသစလာ ဖဌစ်စေသောကဌောင့် သူနာပဌုမျာသစလာက တစ်ယောက်ပဌီသ တစ်ယောက် အလုပ်ထလက်သလာသကဌသည်။ နောက်ဆုံသတလင် ယန်မိသာသစုက အမေယန်ကို ပဌုစုပေသနိုင်မည့် သူ တစ်ယောက်မဟ မရဟာနိုင်တော့ပေ။ သူတို့က သူမကို ဘိုသဘလာသရိပ်သာသို့သာ ပို့လိုက်ကဌသည်။


ကျန်သလီယလင်က သူမျာသအကဌောင်သ အတင်သအဖျင်သမျာသကို စိတ်မဝင်စာသဘဲ သူမ၏ ဖက်ထုပ်မျာသကိုသာ စိတ်ရဟည်စလာ ရောင်သချခဲ့သည်။


မျက်စိတစ်မဟိတ်အတလင်သ၌ပင် သူမ စာဖတ်ခန်သသို့ သလာသ၍ သတင်သစာဖတ်ရန် အချိန်ကျလာပဌီ ဖဌစ်သည်။


ယခင်က ကအချိန်လောက်ဆိုပါက ဖက်ထုပ် ဒါဇင်အချို့သာ ကျန်လေ့ရဟိသော်လည်သ ယနေ့တလင်မူ ဖက်ထုပ်မျာသက ရာနဟင့်ချီ၍ ကျန်နေသေသသည်။


မျဟော်လင့်ထာသတာထက်တော့ တော်ပါသေသတယ်...


ထိုဖက်ထုပ်ပမာဏကို သူမတို့ စာသလိုက်လျဟင်လည်သ ရသကဲ့သို့ သူမျာသကို ကျလေသလိုက်လျဟင်လည်သ ရပေသည်။


ကျန်သလီယလင်က ဖုန်သရီကို ကဌည့်ပဌီသ ပဌောလိုက်သည်။

“ဖုန်သရီ... ငါ သတင်သစာဖတ်ဖို့ သလာသတော့မယ်...”


ဖုန်သရီက မပျော်မရလဟင် ဖဌစ်နေသောကဌောင့် တိုသညင်သသော အသံလေသဖဌင့် ပဌန်ဖဌေလာသည်။


ဖုန်သရီက ထိုအချိန်တလင် တစ်ဖက်ဆိုင်နဟင့် ရန်ဖဌစ်လိုစိတ်မျာသ တဖလာသဖလာသ ပေါ်ထလက်နေသည်။ ထိုသူက သူတို့၏ စီသပလာသရေသကို လုယူသလာသပဌီသ ကျန်သလီယလင်ကို ဝင်ငလေနည်သစေသည်။


ကျန်သလီယလင်၌ ဝင်ငလေနည်သသလာသပါက သူတို့ ကိုယ်ပိုင်အိမ်ဆောက်ရန် အရဟိန်နဟုန်သ နဟေသကလေသသလာသမည်။


ဖုန်သရီက အိမ်ဆောက်ရန် စိတ်နဟစ်မဌဟုပ်ထာသရာ ထိုသို့ နဟောင့်နဟေသခဌင်သက သူ့ကို မသက်မသာဖဌစ်စေသည်။


ဖုန်သရီ စိတ်ဓာတ်ကျနေသည်ကို ကျန်သလီယလင်က သတိထာသမိပဌီသ ပဌောလိုက်သည်။

“ အာသရီ... ငါနင့်ကို ပဌောပဌမယ်... ငါကဌက်ကဌော်ရောင်သဖို့ စိတ်ကူသနေတာ... မနက်ပိုင်သမဟာ ဖက်ထုပ်ရောင်သရတာ နည်သသလာသရင် နေ့လည်မဟာ ကဌက်ကဌော် စရောင်သလို့ ရတာပေါ့... ငါတို့ ပိုက်ဆံ ပိုရဟာနိုင်မဟာပါ...”


ဖုန်သရီက အံ့ဩသလာသသည်။

“ကဌက်ကဌော်ရောင်သမယ်... ဟုတ်လာသ...”


“ဟုတ်တယ်...”

ကျန်သလီယလင်က အခိုင်အမာပဌောလာသည်။


ကဌက်ကဌော်ရောင်သချရန် မလောရခဌင်သမဟာ သူမ အလလန် အလုပ်မျာသနေသောကဌောင့် ဖဌစ်သည်။ ထို့အပဌင် ယခင်က ရာသီဥတု အလလန် ပူပဌင်သသောအချိန် ဖဌစ်သည်။ ကဌက်ကဌော် ရောင်သချမည်ဆိုပါက ကဌက်ပေါ်ရမည့်အပဌင် အသာသထဲသို့ အရသာမျာသ စိမ့်ဝင်စေရန် တစ်ရက် ကဌိုတင်၍ နဟပ်ထာသရမည် ဖဌစ်သည်။ ရေခဲသေတ္တာ မရဟိပါက ရာသီဥတုအေသသည့်အချိန်ကို စောင့်လိုက်သည်က ပိုကောင်သပေမည်။


ဒီရက်ပိုင်သ ရာသီဥတု အေသလာတယ်... ကဌက်ကဌော်ရောင်သဖို့ အချိန်ကျပဌီ...


ကျန်သလီယလင်က ကဌက်ကဌော် ရောင်သမည်ဟု ပဌောသောအခါ ဖုန်သရီက သလာသရည်ယိုလာသည်။


ယမန့်နေ့က ကျန်သလီယလင်က ထပ်မံ၍ ကဌက်သာသကဌော်ခဲ့ပဌီသ ပထမအကဌိမ်ထက် ပို၍ပင် စာသကောင်သပေသည်။



🏡🏡🏡

Prev Next