အပိုင်း ၁၇၄ ( Mine Owner 23 )

Zerg နှင့် တိုက်ပွဲက ပြီးဆုံးသွားပြီ။ ဤအခိုက်အတန့်တွင် လူတိုင်းဟာ စစ်နတ်ဘုရား mecha ကို ကြည့်နေကြပြီး mecha ထဲမှ ထွက်လာသော ယန်ကျင်းဇီကိုလည်း ကြည့်နေကြသည်။

သူတို့ရဲ့စိတ်ကူးအရကတော့ အရှင် Marshal က Mecha ထဲကနေ ချောချောမောမော ထွက်လာပြီး အားလုံးရဲ့ ကြိုဆိုမှုကို ခံစားရမှာ!

လူတော်တော်များများက အားပေးဖို့တောင် အဆင်သင့်ဖြစ်နေကြပြီ!

ယခုမူကား… လူအချို့သည် သူတို့၏ အားပေးစကားများကို ပြောရန် နှုတ်ဟပြီးနောက် ချက်ချင်းပင် ပါးစပ်ပိတ်လိုက်ကြသည်။

ဒီအချိန်မှာ အားပေးနေတာ... မင်း Marshal ဆီက အရိုက်ခံချင်လို့လား?

တပ်မှူးများအပြင် တိုက်ပွဲတွင် ပါဝင်ခဲ့ကြသော အနီးအနားရှိ လူများသည် ဤအချိန်တွင် ရှဇီရှိူ့နှင့် အတူရပ်နေကြပြီး သူတို့၏ အမူအရာများမှာ ယန်ကျင်းဇီနှင့် တွေ့ရသောအခါ တင်းတောင့်နေကြသည်။

ဗီလာထဲရှိ လူများသည်လည်း ဆွံ့အသွားကြ၏။

တိုက်ရိုက်ထုတ်လွှင့်မှုကို ကြည့်ရှုနေကြသူများဆိုလျှင်... ဘာအခြေအနေလဲ? ဘာလို့ အရှင် Marshal က ရုတ်တရက်ကြီး ခွင့်လွှတ်ဖို့ တောင်းပန်နေတာလဲ?

Allen သည် သူ့သခင်လေးကို ဤသို့တွေ့ရပြီး တည့်တည့်ပင် မကြည့်နိုင်ရှာပေ။ 

သူ့သခင်က သေချာပေါက် အချစ်ရူးပင်။ ရှဇီရှိူ့ မရှိချိန်တွင် သူက အေးစက်ပြီး ရက်စက်ကာ သူ့အကြည့်တစ်ချက်က လူအများကို တုန်ယင်စေသည်။ ဒါပေမယ့် ရှဇီရှိူ့ အနားမှာရှိသရွေ့ သူ့ပုံစံက အမြဲမှားနေတယ်! 

ရှဇီရှိူ့လျှင်ပင် ဤစကားပုံစံမျိုးကို မြင်ရသောအခါ ဒေါသမထွက်နိုင်တော့ဟု ခံစားလိုက်ရပြီး သူ့စိတ်စွမ်းအင်က ပို၍ပင် စိတ်အားထက်သန်လာသည်။

ယန်ကျင်းဇီရဲ့ ဒီပုံစံက နည်းနည်းချစ်ဖို့ကောင်းတယ်လို့ သူ ထင်မိတယ်!

ရှဇီရှိူ့သည် သူ့ခေါင်းပေါ်သို့ လက်တစ်ဖက်ကို ဆန့်ထုတ်၍ တင်လိုက်ပြီး ဤနည်းလမ်းကို အသုံးပြုခြင်းဖြင့် သူ့စိတ်စွမ်းအင် ထွက်မလာအောင် ကြိုးစားနေသည်။ 

“ ဇီရှိူ့၊ ကိုယ် အမြဲတမ်း ရှင်းပြချင်နေခဲ့တာပါ။ ဒါပေမယ့် ကိုယ် ရှင်းပြဖို့ အခွင့်အရေး မရခဲ့ဘူး... ” ယန်ကျင်းဇီသည် ရှဇီရှိူ့၏ ရှေ့သို့ ရောက်ရှိနေပြီဖြစ်ကာ စိုးရိမ်တကြီး ရှင်းပြလိုက်သည်။

သူ၏ ဤကူးပြောင်းမှုတွင်... ဘ၀ဟာ တကယ်ကို ခမ်းနားလှသည်။

သူက ကိစ္စတွေ အများကြီး လုပ်ခဲ့ပြီး ဝတ္ထုတစ်ပုဒ်အဖြစ် အပိုင်းနှစ်ဆယ်စာတောင် အရေးခံရပြီးပြီ ဆိုပေမယ့်လည်း တကယ်က သူ ဒီမှာ ရောက်နေတာ တစ်ပတ်တောင် မပြည့်သေးဘူး! သူနဲ့ ရှဇီရှိူ့တို့ အချင်းချင်း သိကြတာ ရက်နည်းနည်းပဲ ရှိသေးတယ်!

သူ့နေ့ရက်များက လွန်စွာ သက်တောင့်သက်သာရှိလှသောကြောင့်သာ ၎င်းကို သူ မေ့လျော့သွားခဲ့သည်...

ယန်ကျင်းဇီ၏ စိတ်စွမ်းအင်သည် ရှဇီရှိူ့၏ ခန္ဓာကိုယ်တစ်ခုလုံးကို လွှမ်းခြုံထားပြီး သနားစရာကောင်းသည့် ခံစားချက်ကို ထုတ်လွှင့်နေသည်။

ရှဇီရှိူ့သည် သူ့ခေါင်းကို ဆက်လက်ဖုံးအုပ်ထားသည် : “ မင်း ဘာလို့ အစွန်အဖျားဂြိုဟ်က မိုင်းပိုင်ရှင်တစ်ယောက်လို ဟန်ဆောင်နေတာလဲ? ” 

“ တကယ်တော့ ကိုယ်က အစွန်အဖျားဂြိုဟ်မှာ အမြဲနေခဲ့ပြီး ကိုယ့်မှာ မိုင်းတွင်းတွေလည်း အများကြီး ရှိပါတယ်... ” ယန်ကျင်းဇီသည် ရှဇီရှိူ့၏မျက်နှာက ကြည့်မကောင်းဖြစ်သွားသည်ကို သတိပြုမိပြီး အမြန်ပြောလိုက်သည် : “ ကိုယ် မှားသွားပါတယ်။ ကိုယ် တကယ် မရည်ရွယ်ခဲ့ပါဘူး... ဇီရှိူ့၊ မင်းခေါင်းကို အုပ်ထားတာ မင်း အဆင်မပြေလို့လား? ”

ရှဇီရှိူ့သည် ယန်ကျင်းဇီကို မျက်စောင်းထိုးကာ သူ့လက်ကို ချလိုက်သည်။

သူ့ခေါင်းကို သူ့လက်တွေနဲ့ အုပ်ထားတာက သူ့စိတ်စွမ်းအင်ကို လုံးဝ မတားဆီးနိုင်ဘူး၊ သူ ဇွဲကိုပဲ အားကိုးသင့်တယ်!

ယန်ကျင်းဇီ ထပ်ခေါ် ကြည့်သည် : “ ဇီရှိူ့... ”

ယန်ကျင်းဇီသည် မည်သို့ရှင်းပြရမည်မှန်းကို မသိပေ။ ကံကောင်းထောက်မစွာဖြင့် ဤအချိန်တွင် Allen က ရှေ့ထွက်လာခဲ့သည် : “ ရှသခင်လေး၊ ကျွန်တော့်သခင်လေးကို အပြစ်မတင်ပါနဲ့၊ အပြစ်တင်ချင်တဲ့လူ လိုရင် ကျွန်တော့်ကိုသာ အပြစ်တင်ပါ။ အဲ့ဒါ အားလုံး ကျွန်တော့် အပြစ်ပါ။ ”

သူ အရင်က သူ့သခင်လေးအတွက် အပြစ်တင်ခံဖို့ တွေးခဲ့ဖူးတယ်၊ အခု လုပ်ဖို့ အချိန်ကျပြီ!

ရှဇီရှိူ့ Allen ကို ကြည့်လိုက်သည်။

Allen သည် စိတ်ရင်းစစ်မှန်ပုံပေါ်ပြီး အလွန်အားကိုးရကာ ယုံကြည်စိတ်ချရပုံလည်း ပေါ်သည် : ” ရှသခင်လေး၊ ကျွန်တော်တို့သခင်လေးရဲ့ စိတ်စွမ်းအင်က အရမ်းမြင့်လွန်းတယ်။ အရင်က သူ့စိတ်စွမ်းအင်က မတော်တဆ အထိန်းကွပ်မဲ့သွားပြီး သတိမေ့မျောသွားခဲ့တယ်။ ဒါပေမယ့် တပ်မ ၈ ရဲ့ တပ်မှူး Cossack က စဉ်းလဲတဲ့ ရည်ရွယ်ချက်နဲ့ သူ့ကို တိတ်တဆိတ် သတ်ပစ်ဖို့တောင် ကြံရွယ်ခဲ့ပါတယ်။ ရှချီချီရဲ့ စိတ်စွမ်းအင်အဆင့်က S လို့ ကျွန်တော် သတင်းကြားရတော့ သခင်လေးရဲ့ စိတ်စွမ်းအင်ကို ကူညီဖြေရှင်းဖို့ သူ(မ)ကို ကူညီစေချင်ခဲ့တယ်။ ပြီးတော့ ဖုဖေးနဲ့ သူ(မ)က အရမ်းရင်းနှီးကြတော့ ကျွန်တော်တို့က တံခါးဝကို တိုက်ရိုက်မသွားရဲခဲ့ကြဘဲ ဒီလိုမျိုး လူအထောက်အထားကိုပဲ အသုံးပြုပြီး ရှမိသားစုဆီမှာ လက်ထပ်ပွဲ သွားတောင်းဆိုခဲ့တာပါ... ”

ရှဇီရှိူ့၏နှလုံး “ဒုတ်ခနဲ” ခုန်သွားရသည်။

ဟုတ်တာပေါ့၊ သူ ထင်ခဲ့သည့်အတိုင်းပင်။ ယန်ကျင်းဇီဟာ မူလက ရှချီချီကို လက်ထပ်ရန် စီစဉ်ခဲ့သည်။ သူ့ကို လက်မထပ်ချင်ခဲ့သောကြောင့် သူတို့နှစ်ဦး လက်ထပ်ပြီးကြောင်း ကြားသိရပြီးနောက် ပထမဆုံး တုံ့ပြန်မှုမှာလည်း ကွာရှင်းဖို့ရန်သာ ဖြစ်ခဲ့၏။

အဲ့တုန်းက သူ ကွာရှင်းဖို့ သဘောတူလာအောင် ဖိအားပေးနိုင်ဖို့ ယန်ကျင်းဇီက အဲ့လိုမျိုး ဝတ်လာခဲ့တာမလား? မထင်ထားတာက သူ မြင်မြင်ချင်း ချစ်မိသွားမှာနဲ့ အဆုံးသတ်သွားမယ်လို့... 

ရှဇီရှိူ့သည် သူ ပျော်ရွှင်သင့်သလား၊ စိတ်ဓာတ်ကျသင့်သလားပင် မသိတော့ပေ။

“ ရှသခင်လေး၊ သခင်လေးက အဲ့တုန်းက သတိမေ့မျောနေခဲ့တယ်! အဲ့ဒါက ကျွန်တော့်အကြံပါ။ သူ နိုးလာပြီးတော့ ကျွန်တော်က သူ့ကို ရှချီချီနဲ့ လက်ထပ်ဖို့ မေးမြန်းခဲ့ပေမယ့် သူက မလိုလားခဲ့ပါဘူး... ” Allen က ဆက်ပြောသည် : “ ရှသခင်လေး၊ ကျွန်တော့်မှာ ဗီဒီယိုတောင် ရှိသေးတယ်။ ”

Allen သည် စကားပြောပြီးနောက် ရှဇီရှိူ့ကို ဗီဒီယိုတစ်ပုဒ် ပြခဲ့သည်။

၎င်းမှာ ယန်ကျင်းဇီ ပထမဆုံးကူးပြောင်းလာချိန်တွင် သူက ယန်ကျင်းဇီကို ရှချီချီနှင့် လက်ထပ်ရန် ချော့မော့သိမ်းသွင်းခဲ့စဉ်က ဖြစ်သည်။

ယန်ကျင်းဇီသည် ထိုအချိန်တွင် အလွန်လွှမ်းမိုးနေခဲ့သည် : “ ငါ သူ(မ)နဲ့ လက်မထပ်ချင်ဘူး။ ငါ သူ(မ)ကို မကြိုက်ဘူး။ ”

“ ငါ အကူဆရာ လိုတယ်လို့ ငါ မထင်ဘူး။ ” 

“ ဒီရှချီချီက ဘယ်မှာလှလို့လဲ? သူ(မ)က သာမန်ပဲလို့ ငါ ထင်တယ်! ”

…

ရှဇီရှိူ့ : “ ... ”

တိတ်တဆိတ် လာချောင်းကြည့်ကြသော တပ်မှူးများ : “ ... ” ဒီတော့ အရှင် Marshal ကလည်း သူ အကူဆရာ မလိုချင်ဘူးလို့ အော်ခဲ့ဖူးတာပဲ...

“ ရှသခင်လေး သိတဲ့အတိုင်းပဲ အဲ့တုန်းက လက်ထပ်ဖို့ ရုတ်တရက် စာရင်းသွင်းခံခဲ့ရတယ်... သခင်လေးက အဲ့အချိန်တုန်းက ရှသခင်လေးကို မမြင်ဖူးသေးဘူး။ သူက တကယ် ကွာရှင်းချင်ခဲ့တယ်။ သူ သူ့ပုံရိပ်ကိုပါ ဖျက်ဆီးခဲ့ပေမယ့် ရှသခင်လေးကို တွေ့တော့ သူက မြင်မြင်ချင်း ချစ်မိသွားခဲ့တယ်... ” Allen က ဆက်ဆိုသည်။

ရှဇီရှိူ့သည် ဗီဒီယိုထဲရှိ လူက လက်မထပ်ဘူး၊ ရှချီချီက မလှပဘူးဟု ပြောဆိုနေသည်ကို ကြည့်ကာ ပထမဆုံး တွေ့ဆုံချိန်ကို တွေးမိသည်။ ထိုအချိန်တွင် ယန်ကျင်းဇီက သူ့ကို တွေ့သောအခါ မူးဝေဟန်ဆောင်ခဲ့သည်။

အရှင် Marshal လည်း ခက်ခဲရှာသည်။

သူ စိတ်မဆိုးနိုင်တော့ဘူး!

ရိုးရိုးသားသား ပြောရလျှင် ယန်ကျင်းဇီက မကောင်းမှုတစ်ခုကိုမျှ မလုပ်ခဲ့ပေ။ သူတို့သည် ရှမိသားစုထံသို့ လက်ထပ်ခွင့်သွားတောင်းခဲ့ပြီး ချက်ချင်း လက်ထပ်ကြမည်ဟု မပြောခဲ့ကြချေ။ ရှမိသားစုကသာ သူ့ကို ထိုနေရာသို့ ပို့ရန် မစောင့်နိုင်တော့ဘဲ ဖုဖေးက သူတို့ကို တစ်ခါတည်းတောင် စာရင်းသွင်းပေးခဲ့သည်...

ယန်ကျင်းဇီက ပြောသည် : “ ဇီရှိူ့၊ ကိုယ် မင်းတစ်ယောက်တည်းကိုပဲ ကြိုက်တယ်! ” သူသည် သူ့စိတ်စွမ်းအင်ကို အသုံးပြုကာ ရှဇီရှိူ့ကို တင်းတင်းကြပ်ကြပ် ထွေးပွေ့လိုက်ပြီး သူ့အချစ်များကို ရှဇီရှိူ့ထံသို့ အသည်းအသန် ပို့ ပေးနေခဲ့သည်။

ထွေးပွေ့ခံထားရသော ရှဇီရှိူ့သည် နောက်ဆုံးတွင် မနေနိုင်တော့ပေ။ သူ့စိတ်စွမ်းအင်တန်းများအားလုံးဟာ ဆန့်ထွက်ပြီး ယန်ကျင်းဇီနှင့် လုံးထွေးလိုက်တော့သည်။

သို့သော် သူ့ကို ရက်များစွာ ဖုံးကွယ်ထားခဲ့ခြင်းက သူ့စိတ်ကို အနည်းငယ် စိတ်မသက်မသာ ဖြစ်စေနေသေးသောကြောင့် သူသည် ယန်ကျင်းဇီ၏ စိတ်စွမ်းအင်တန်းများကို ဖမ်းကိုင်လိုက်ပြီး “ဖော့၊ ဖော့၊ ဖော့” မြည်အောင် ရိုက်ပစ်လိုက်တယ်!

ယန်ကျင်းဇီ... အရိုက်ခံရသည်မှာ အလွန်အဆင်ပြေလှသည်။

သူတို့ရဲ့ စိတ်စွမ်းအင်တွေက ချည်နှောင်ထားတော့ ရှဇီရှိူ့က သူ့စိတ်စွမ်းအင်ကို လုံးဝ မထိခိုက်နိုင်ဘူး!

အမှန်မှာ ရှဇီရှိူ့က စိတ်စွမ်းအင် အသုံးပြုပြီး သူ့ကို နှောင့်ယှက်သည်ဖြစ်‌စေ သို့မဟုတ် သူ့ကို “ရိုက်နှက်” ရန် စိတ်စွမ်းအင် အသုံးပြုသည်ဖြစ်စေ သို့မဟုတ် ဒီအတိုင်း သူ့စိတ်စွမ်းအင်ပေါ်တွင် အပြန်ပြန်အလှန်လှန် ခုန်ပေါက်နေသည်ဖြစ်စေ ကိစ္စမရှိဘဲ အားလုံးဟာ နှစ်ဦး၏စိတ်စွမ်းအင်များ ပေါင်းစည်းခြင်း‌သာ ဖြစ်သည်။

ဤသည်က အလွန်သက်တောင့်သက်သာရှိရာ သူသည် နောက်ထပ်အကြိမ်အနည်းငယ်ပင် ထပ်အရိုက်ခံနိုင်သည်။

သို့သော်ငြား ယန်ကျင်းဇီ၏စိတ်စွမ်းအင်က သန်မာလွန်းသဖြင့် ပတ်ဝန်းကျင်ရှိလူများသည် ၎င်းကို သတိမပြုမိကြပေ။ ရှဇီရှိူ့က နှုတ်ဆိတ်နေသည်ကို တွေ့ရသော် Allen သည် ရှဇီရှိူ့ စိတ်ဆိုးနေသေးသည်ဟု ထင်ကာ အပြစ်လွှဲချခြင်း ဟူသော အစွမ်းထက်ဆုံးနည်းလမ်းကို ချက်ချင်း အသုံးပြုလိုက်သည် : “ ရှသခင်လေး၊ ဒုတိယဗိုလ်ချုပ်ကြီးရှကို ကျွန်တော်တို့သခင်လေး ကယ်ခဲ့တာပါ။ သခင်လေးက ဘယ်သူမှန်း သူ အမြဲသိနေခဲ့ပါတယ်။ ”

ရှဝေချန် : “ ??? ” သူ စည်းဘေးမှာ နေနေတာ၊ ဘာကြောင့် သူ့ကို ဒီထဲဆွဲ‌သွင်းတာလဲ? 

ရှဇီရှိူ့ : “ ...... ” သူ့အဖေ ယန်ကျင်းဇီကို အရမ်း“သဘောကျ”နေတာ မအံ့ဩတော့ဘူး!

ရှအမျိုးသမီး : “ ...... ” ဒီရက်တွေမှာ သူ(မ)ခင်ပွန်းရဲ့ စိတ်စွမ်းအင်က အရမ်းရှုပ်ယှက်ခတ်နေတာ မဆန်းတော့ဘူး!

ယန်ကျင်းဇီ : Allen, မင်း အရမ်းတော်တယ်! မင်းက အကောင်း‌ဆုံးပဲ!

ယန်ကျင်းဇီသည် စစ်မြေပြင်ကို ရင်ဆိုင်ရတော့မည်ဟု ခံစားခဲ့ရသော်လည်း Allen က ပြဿနာအားလုံးကို အပြုံးတစ်ပွင့်နှင့် စကားပြောခြင်းဖြင့် ဖြေရှင်းနိုင်လိမ့်မည်ဟု သူ မထင်ထားခဲ့ပေ။

စကားပြောပြီးနောက် Allen သည် အနည်းငယ် ပြုံးကာ စကားထပ်မပြောတော့ဘဲ ဘေးသို့ ဆုတ်သွားသည်။

ရှဇီရှိူ့ကမူ သူသည် ယန်ကျင်းဇီကို “ရိုက်နှက်”ဖို့ ရှက်ရွံ့သွားခဲ့သည်။

အနားရှိလူများသည် ဤလူနှစ်ဦး၏ စိတ်စွမ်းအင်များက ပြန်လည်ရောထွေးနေကြပြီဖြစ်ကြောင်းကို နားလည်သွားကြသည်။

တပ်မှူးခုနစ်ဦး : အရှင် Marshal က သူ့ဇနီးကို လိုက်နေရတာကို သူတို့ ကြည့်ချင်တယ်! ဘာလို့ ဒီလိုဖြစ်ရတာလဲ! ဘာလို့‌ နောက်ဆုံးကျ သူတို့ပဲ ခွေးစာတွေ အသိပ်ခံရတာလဲ! 

ဗိုလ်ချုပ်ကြီးများနှင့် တခြားသူများ : အရင်ကတော့ သူတို့က လူစုလူဝေးရဲ့ အာရုံစိုက်ရာ အမြဲဖြစ်ခဲ့ကြပေမယ့် ဒီနေ့‌တော့ သူတို့မှာ တည်ရှိမှုအသိ လုံးဝ မရှိတဲ့ပုံပါပဲ။

Lone Wolf ကဲ့သို့ စွမ်းအားရှင်ငယ်များ : ရုတ်တရက်ကြီး ငါ အကူဆရာ ရှာချင်လိုက်တာ...

ဖုဖေးကမူ သူသည် အဖမ်းခံလိုက်ရသည်။

သူ့ဖခင်ကို Zerg မျိုးနွယ်နှင့် ပူးပေါင်းကြံစည်သည်ဟု သံသယရှိထားပြီး သူ့ကိုလည်း စစ်ဆေးမေးမြန်းရန်အတွက် ခေါ်ဆောင်သွားမည်ဖြစ်သည်။

ဤအခိုက်အတန့်တွင် သူ့ခံစားချက်များသည် အနှိုင်းမဲ့ ရှုပ်ထွေးနေပြီး သူ့စိတ်ပင်လျှင် ဗလာဖြစ်နေသည်။

သူ့အဖေက... အဲ့လိုလူမျိုးလား?

ဗီလာထဲရှိ လူများ : “ ... ”

သူတို့သည် အနည်းငယ် ဝေးသော်ငြား သူတို့၏ ဆက်သွယ်ကိရိယာများနှင့် အလားတူအရာတို့က မြင်ကွင်းကို ပိုမိုနီးကပ်စေရန် လုပ်ဆောင်နိုင်သည်။ 

ရှဇီရှိူ့က အရှင် Marshal ၏ အထောက်အထားကိုပင် မသိခဲ့ဘဲ အမှန်တကယ် မတော်တဆ ‌ပေါင်းစည်းမိခဲ့ကြကြောင်းကို သူတို့ ယခုမှသာ သိခဲ့ကြသည်။ 

လူအတော်များများက ရှချီချီကို ဂရုဏာသက်စွာ ကြည့်ကြသည် – အရှင် Marshal အစတုန်းက ရှာဖို့ပြင်ထားတဲ့လူက ရှချီချီ!

ရှချီချီ၏မျက်နှာ ဖြူဖျော့သွားသည်။

သူ(မ)သည် စာအုပ်ထဲမှ ဇာတ်အိမ်ကို ပြောင်းလဲမိလိုက်နိုင်ကြောင်း ရုတ်တရက် သဘောပေါက်သွားသည်။

ထို Allen က ယန်ကျင်းဇီကို ကုသပေးရန် သူ(မ)ကို ရှာဖွေချင်ခဲ့‌သဖြင့် ယန်ကျင်းဇီကို အထောက်အထားအသစ် ပေးခဲ့သည်။ 

Zerg နှင့် လက်တွဲနေသော Cossack က ယန်ကျင်းဇီကို ရှာမတွေ့နိုင်ဘဲ ထိုအချိန်တွင် အခြေအနေဆိုးရွားနေသော ယန်ကျင်းဇီကို မသတ်နိုင်ခဲ့ချေ။ ထို့နောက် သူက Marshal ဖြစ်လာခဲ့သည်။

နောက်ဆုံးတွင် ယန်ကျင်းဇီက ရောဂါပျောက်ကင်းပြီး ရှဇီရှိူ့နှင့် အတူနေသွားသည်။

သူ(မ) ကူးပြောင်းပြီးနောက် သူ(မ)သည် အဓိကဇာတ်လိုက် ရှဇီရှိူ့ထက် ပိုမိုကောင်းမွန်စွာ အမြဲနေချင်ခဲ့ကာ Marshal ၏ ဇနီး ဖြစ်ချင်ခဲ့သော်ငြား ယခုမူ...

ရှချီချီဟာ တုန်တုန်ယင်ယင်ဖြစ်နေပုံရှိသည်။

သူ(မ)ပတ်ဝန်းကျင်ရှိ လူများသည် သူ(မ)ကို ပို၍ပင် သနားသွားကြသည် – သူ(မ) သေချာပေါက် နောင်တရမှာပဲ!

တိုက်ရိုက်ထုတ်လွှင့်မှုကို ကြည့်ရှုသူများ : “ ...... ”

သူတို့သည် စိတ်ကူးယဉ်တိုက်ပွဲဇာတ်လမ်းကို ကြည့်ရှုပြီးနောက် မျက်စိတမှိတ်အတွင်း ရိုမန့်စ်ဇာတ်လမ်းကို ဆက်ကြည့်လိုက်ရသည်။ ဒီနေ့ တကယ်တန်တယ်! 

ဒါပေမယ့် အရှင် Marshal နဲ့ အဲ့ရှသခင်လေးက စကားမပြောပဲနဲ့ အချင်းချင်း ကြည့်ပြီး ရှက်နေကြတယ်၊ ဘာဖြစ်နေတာလဲ?

သာမန်လူများ၏ သံသယများကို တွေ့ရသောအခါ စစ်သည်တော်တစ်ဦးက မတ်တပ်ရပ်ကာ ရှင်းပြသည် : “ သူတို့နှစ်ယောက် နှောင်ကြိုးသွယ်ပြီးတဲ့အချိန်မှာ သူတို့က စိတ်ခံစားမှုတွေနဲ့ ခံစားချက်တွေကို ဖော်ပြဖို့ သူတို့စိတ်စွမ်းအင်တွေကို အသုံးပြုနိုင်သွားကြတယ်။ ဒါကြောင့် အများအားဖြင့် ဒီအချိန်မှာ တိတ်ဆိတ်နေတာက အသံထွက်တာထက် ပိုကောင်းပါတယ်။ ”

ရှင်းပြချက် နားထောင်ပြီးနောက် သာမန်လူတစ်ဦးက မေးသည် : “ဒါဆို အခု ရှသခင်လေးရဲ့မျက်နှာက အရမ်းနီနေတယ်၊ အရှင် Marshal ဘာတွေးနေတာလဲ?” သူ မတော်တရော်တွေ တွေးနေတာပဲ ဖြစ်ရမယ် ဟုတ်တယ်မလား?

ရှင်းပြနေသော စစ်သည်တော် : “ မသိဘူး... ” သူ ဘယ်လောက်ဖြူစင်လိုက်သလဲ၊ သူ့မှာ အကူဆရာတောင် မရှိသေးဘူး။ သူ ညစ်တီးညစ်ပတ်တစ်ခုခုကို တွေးချင်တယ်ဆိုရင်တောင် သူနဲ့ အတူတွေးပေးမယ့် တစ်ယောက်ယောက်ကို သူ ရှာနိုင်ပါ့မလား ဆိုတာကိုပဲ သူ စဉ်းစားနိုင်မယ်...

ယန်ကျင်းဇီသာ ဤလူများ၏ အတွေးများကို သိလျှင် သေချာပေါက် စွပ်စွဲခံရသကဲ့သို့ ခံစားရမည်ပင်။

သူ တကယ် ဘာမှမလုပ်ဘူး! သူက တောင်းပန်ပြီး သူ့အချစ်ကို ဖော်ပြနေတာပါ!

သူ ညစ်ညစ်ပတ်ပတ်အရာတွေကို တကယ် တွေးချင်ရင်တောင်မှ သူတို့နှစ်ယောက်လုံး သူ့အိပ်ခန်းထဲကို ဝင်မယ့်အချိန်အထိ သူ စောင့်နေမှာ...

“ အရှင်၊ ကျွန်တော်တို့ တိုက်ပွဲနေရာကို ရှင်းလင်းရတော့မလား? ” Allen က ယန်ကျင်းဇီကို မေးမြန်းခဲ့သည်။ သူသည် တချိန်လုံး ဤကဲ့သို့ မတ်တပ်ရပ်နေရသည်ကို စိတ်မရှိသော်ငြား အဆုံးတွင်မူ ၎င်းက မကောင်းသေးချေ။

“ အင်း ” ယန်ကျင်းဇီသည် စိတ်ငြိမ်သွားပြီး သူ့အထောက်အထား ပေါ်သွားသည်ကိုလည်း နောက်ဆုံးတွင် သတိပြန်ရသွားသည်။ အခု သူက အရှင် Marshal ပဲ!

အရှင် Marshal က ပိုပြီးအေးစက်သင့်တယ်!

ယန်ကျင်းဇီသည် အေးစက်သော မျက်နှာထားဖြင့် သူ့စိတ်စွမ်းအင်ကို တစ်စိတ်တစ်ပိုင်းခွဲကာ ရှဇီရှိူ့၏ဘေးတွင် ဆက်ထားပြီး အနမ်းများ၊ ပွေ့ဖက်မှုများနှင့် ကြင်နာယုယမှုများကို တောင်းဆိုနေခဲ့သည်။

ကျန်စိတ်စွမ်းအင်များက သူ့အတွက် သန်မာသော ရောင်ဝါနှင့် အေးစက်သော သဘောထားကို စတင်ဖန်တီးပေးသည် : “ ကြယ်မြို့တော်ကို Zerg တွေ ရုတ်တရက် ရောက်လာတဲ့ ကိစ္စကို ရှင်းရှင်းလင်းလင်း စုံစမ်းရမယ်။ ဒီကိစ္စနဲ့ ပတ်သက်တဲ့လူတွေ အကုန်လုံးကို အလွယ်တကူ လွှတ်မပေးနိုင်ဘူး! ” 

ဤအခိုက်အတန့်တွင် ဖန်သားပြင်မှတဆင့် ကြည့်ရှုနေကြသူတို့ပင် ပြင်းထန်သော ရောင်ဝါကို ခံစားမိပြီး သူ့ကို ကိုးကွယ်ချင်ကြသည်။ သူ့အနားရှိ လူများသည် သူ့စိတ်စွမ်းအင်၏ဖိနှိပ်မှုအောက်တွင် ပို၍ပင် အလိုအလျောက် နာခံကြသေးသည်။

သို့သော်...

သူတို့၏စိတ်ထဲတွင် သူတို့သည် ယခင်က ယန်ကျင်းဇီ၏ ခွင့်လွှတ်မှုကို တောင်းခံနေသော အသွင်အပြင်ကိုလည်း မလွဲမသွေ သတိရမိကြသည်။

ကောင်းပြီ၊ တကယ်တော့ ဤကဲ့သို့ “မျက်နှာနှစ်ဖက်” ဖြင့် အရှင် Marshal ကလည်း အလွန်ချစ်စရာကောင်းပြီး အလွန်စစ်မှန်သည်။

တပ်မခုနစ်ခုမှ တပ်မှူးများသည် ဤအရှင် Marshal ကို သူတို့ သိပ်မကြောက်ကြတော့ဟု ခံစားမိလိုက်ကြသည်...