အပိုင်း ၁၇၅ ( Mine Owner 24 - end )

Star Network ၏ အကြီးမားဆုံးဖိုရမ်တွင် မရေမတွက်နိုင်သော *အဆောက်အဦးများ (threads) ဟာ တခဏချင်း တည်ဆောက်ခံခဲ့ရပြီး ဤအဆောက်အဦးများမှာ လျင်မြန်စွာ မြင့်တက်နေဆဲဖြစ်သည်။

( *ဖိုရမ်အဆောက်အဦးများ – ဖိုရမ် Threads များ။ သူတို့က အဲ့ဒါကို အဆောက်အဦးတွေလို့ ခေါ်တာဟာ ကောမန့်တွေရဲ့ အစဉ်တိုင်း စီထားလို့ ဖြစ်တယ်။ ပထမဆုံးကောမန့်ကို ပထမထပ်လို့ ခေါ်တယ်၊ ဒုတိယမြောက်ကောမန့်ကို ဒုတိယထပ်လို့ ခေါ်တယ်... )

“အရှင် Marshal ဆီမှာ ငါ့အချစ်ကို ဝန်ခံချင်တယ်” မှ “အရှင် Marshal ကို ချစ်မိသွားသော အကြောင်းအရင်းများ” ၊ “ရှဇီရှိူ့အစစ်ကို ပြောပြမယ်” မှ “ရှဇီရှိူ့ရဲ့ လှပတဲ့ ဓာတ်ပုံတွေကို ကြည့်ရှုခံစားကြမယ်” ၊ “အရှင် Marshal တို့ ခင်ပွန်းနဲ့ဇနီး CP” ၊ “ဒီအတွဲက ချစ်စရာလေး”... အမျိုးစုံပင်။

ဘာပဲဖြစ်ဖြစ် ၎င်းတို့အားလုံးဟာ ယန်ကျင်းဇီနှင့် ရှဇီရှိူ့တို့နှင့်သာ သက်ဆိုင်သည်။

ယန်ကျင်းဇီနှင့်ပတ်သက်သော အချက်အလက်ကို သာမန်လူများ ရှာမတွေ့ကြသောကြောင့် လူအတော်များများက Star Network ပေါ်သို့ ရှဇီရှိူ့အကြောင်း သတင်းများကိုသာ သယ်ဆောင်သွားကြသည်။

ရှဇီရှိူ့၏ အတန်းဖော်အချို့သည် ရှဇီရှိူ့အကြောင်းကို အွန်လိုင်းတွင် စတင်မိတ်ဆက်ခဲ့ကြ၏။

ဤအချိန်တွင်တော့ သေချာပေါက်ပင် သူတို့သည် ရှဇီရှိူ့ကို မကောင်းမပြောနိုင်ကြပေ။ အားလုံးက ကောင်းမွန်သော အကြောင်းများသာ ဖြစ်သည်။

မဟုတ်ရင်... အရှင် Marshal က ဘယ်သူလဲ? သူက မြွေလို ကောက်ကျစ်တဲ့ လူတစ်ယောက်ကို သဘောကျတာ ဖြစ်နိုင်လို့လား?

ရှဇီရှိူ့က အလွန်ကြည့်ကောင်းသော်ငြား ရိုးရိုးသားသား ပြောရလျှင် ဤကမ္ဘာပေါ်တွင် ရှဇီရှိူ့ တစ်ဦးတည်းကသာ ကြည့်ကောင်းသူ မဟုတ်ချေ။ ရှဇီရှိူ့ထက် ပိုမိုကြည့်ကောင်းသူများမှာ အရေအတွက်များစွာ ရှိသည်။ ရှချီချီကိုသာ ဆိုကြပါစို့၊ သူ(မ)၏အသွင်အပြင်က ရှဇီရှိူ့ထက် မနိမ့်ကျချေ။ 

သို့သော် အရှင် Marshal သည် ရှဇီရှိူ့ကို နှစ်သက်ဆဲဖြစ်သည်။

ဒါ ဘာကိုပြလဲ? ရှဇီရှိူ့က သေချာပေါက် သူများတွေထက် ထူးခြားကွဲပြားတယ် ဆိုတာကို ပြတာပဲ!

“ရှဇီရှိူ့က ကျောင်းသားကောင်းတစ်ယောက်ပါ! သူ ငါတို့အတန်းမှာ ရှိခဲ့တုန်းက သူက အမြဲတမ်း အတော်ဆုံးထဲက တစ်ယောက်!”

“သူက လူတွေကို ကူညီဖို့ အရမ်းဆန္ဒရှိတယ်”

“သူက မြင့်မြတ်တဲ့ မိသားစုက လာပေမယ့် လူတွေကို ဘယ်တော့မှ အထင်မသေးဘူး။”

……

ယခင်က ရှဇီရှိူ့သည် စစ်သည်တော်များစွာကို ကူညီ၍ စိတ်စွမ်းအင် ရှင်းလင်းပေးခဲ့သည်။ ယခု လူတိုင်း သူ့အကြောင်းကို ပြောကြသောအခါ ၎င်းက သူ့အားသာချက် ဖြစ်လာသည်။ Star network တွင် ပို့စ်တင်သော ယခင်အတိတ်၌ ရှဇီရှိူ့၏ စိတ်စွမ်းအင် လမ်းညွှန်ကုသပေးမှုကို ရရှိခဲ့ဖူးကြသူများလည်း ရှိသည် : “ငါက အကူဆရာ မရှာနိုင်တဲ့ စစ်သည်တော်တစ်ယောက်ပါ။ ပုံမှန်ကတော့ ငါ့လို အဆင့်နိမ့် စစ်သည်တော်တွေက စိတ်စွမ်းအင် အထိန်းကွပ်မဲ့တာမျိုး မဖြစ်ဘဲ တစ်သက်လုံး သာမန်လူတွေလို နေထိုင်သွားကြတယ်။ ဒါပေမယ့် ငါကတော့ ကံမကောင်းခဲ့ဘူး။ တစ်ခါက ကားမတော်တဆမှုတစ်ခုမှာ ငါ လူကယ်ဖို့အတွက် စိတ်စွမ်းအင် အလွန်အကျွံ သုံးမိပြီး စိတ်စွမ်းအင်အထိန်းကွပ်မဲ့တာကို ကြုံတွေ့ခဲ့ရတယ်။ စိတ်စွမ်းအင်အထိန်းကွပ်မဲ့ပြီးတော့ ငါ အရမ်းနာကျင်ပြီး အလုပ်မလုပ်နိုင်တော့ဘူး။ ငါ ပြေလျော့ဆေးရည်ကို ဝယ်ခဲ့ပေမယ့် အဲ့ဒါက သက်ပဲသက်သာစေပြီး မကုသနိုင်ဘူး။ စိတ်စွမ်းအင်အထိန်းကွပ်မဲ့တာကြောင့် ငါ သေတော့မယ်လို့ ငါ ထင်ခဲ့ပေမယ့် နောက်တော့ ငါ ရှဇီရှိူ့နဲ့ တွေ့ခဲ့တယ်။ သူက ငါ့ကို စိတ်စွမ်းအင်သွယ်ပို့ပေးခြင်း လုပ်ပေးခဲ့ပြီး ငါ့ကျန်းမာရေးကို ပြန်ကောင်းစေခဲ့တယ်။ ငါ သူ့ကို အရမ်း ကျေးဇူးတင်တယ်။”

ဤလူ၏ အကောင့်ကို အတည်ပြုထားပြီး သူ့အမည်ရင်းကို အသုံးပြုထားသည်။ သူဟာ လွန်ခဲ့သော နှစ်နှစ်က သူ၏ ရဲစွမ်းသတ္တိအတွက် ချီးကျူးခံခဲ့ရကြောင်းကိုလည်း တွေ့မြင်နိုင်ပြီး ၎င်းမှာ သူ ပြောသည့် ကားမတော်တဆမှုအတွင်း လူကယ်ခြင်းအကြောင်း ဖြစ်သည်။ 

နောက်နှစ်နှစ်ကြာအောင် သူ့ထံမှ သတင်းများ မကြားခဲ့ရချေ။ သူ့မှာ စိတ်စွမ်းအင် အထိန်းကွပ်မဲ့တာ ဖြစ်နေလို့ ဆေးကုသဖို့ လိုက်ရှာနေခဲ့တာတဲ့လား?

ရှဇီရှိူ့က သူ့ကို ကယ်ခဲ့တယ်!

ရှဇီရှိူ့သည် အွန်လိုင်းတွင် ပို၍ နာမည်ကြီးလာသော်လည်း သူကိုယ်တိုင်ကမူ မသိပေ။

ရှမိသားစု၏ ဂုဏ်ပြုစားပွဲ ပြီး‌ဆုံးသွားပြီး စစ်တပ်တွင် ကိုင်တွယ်ရမည့် ကိစ္စများစွာ ရှိနေသည်။ ယန်ကျင်းဇီသည် တပ်မှူးခုနစ်ဦးနှင့် အတူထွက်ခွာသွားခဲ့သည်။ ရှဇီရှိူ့အတွက်မူ...  

ဧည့်သည်အချို့ကို ပို့ဆောင်ရန် သူ့မိခင်ကို ကူညီပေးပြီးနောက် သူ့ကို သူတို့မိသားစုနှင့် ဆက်ဆံရေးကောင်းသော လူများက ဝိုင်းထားကြသည် : “ ဇီရှိူ့၊ မင်း အရှင် Marshal ကို ဘယ်လိုသိခဲ့တာလဲ? ”

“ ဇီရှိူ့၊ အရှင် Marshal က အရမ်းတွေးပေးတတ်တာလား? ”

“ ဇီရှိူ့ အရှင် Marshal ကို ကောင်းကောင်းဆက်ဆံရမယ်နော်! ”

…

ဤလူများအနက် ရှဇီရှိူ့ကို သူတို့၏မိသားစု၏ အစောင့်များနှင့် ကူညီမိတ်ဆက်ပေးရန်ပင် တောင်းဆိုသူများ ရှိသည် – အဲ့အစောင့်တွေအကုန်လုံးက အင်အားကြီး စစ်သည်တော်တွေလေ!

ရှဇီရှိူ့ : “ ... ” သူတို့ Zerg ရဲ့ တိုက်ခိုက်မှုကို အခုလေးတင် ခံလိုက်ရတယ်! ဒီအချိန်မှာ ဒါတွေကို ဂရုမစိုက်ဘဲ နေလို့ရမလား?

ကံကောင်းစွာဖြင့် Allen ရှိနေခဲ့သည်။

ဧရာမ Allen က ဤလူများကို စကားအနည်းငယ်ဖြင့် ပြန်ပို့လိုက်သည်။

သို့သော်လည်း ရှအိမ်က မထွက်သွားခဲ့ချေ။

အဘိုးရှသည် သူ၏ ဝါကြီးသော အဆင့်အတန်းကို မှီခိုပြီး ရှဇီရှိူ့က အရှင် Marshal ကို စိတ်ဆိုးစိတ်ကောက် မရှိစေရန်အတွက် ရှဇီရှိူ့ကို သင်ပြနေဆဲဖြစ်သည် : “ အရှင် Marshal က ဘယ်လိုလူမျိုးလဲ? မင်း ခုနက လုပ်ခဲ့သလိုမျိုး အနာဂတ်မှာ မင်း သူ့ကို မလေးမစား မလုပ်ရဘူး။ မင်း အရှင် Marshal ကို မျက်နှာပျက်စေခဲ့တယ်။ အရှင် Marshal က မင်းနဲ့ ပြဿနာဖြစ်ရင် ဘယ်လိုလုပ်မလဲ? ”

“ သူ ကျွန်တော်နဲ့ ပြဿနာရှိမှာ မဟုတ်ဘူး! ” ရှဇီရှိူ့မှာ ယန်ကျင်းဇီကို ယုံကြည်မှုရှိတယ်!

သူတို့နှစ်ဦးက စိတ်စွမ်းအင်ချည်‌နှောင်ထားသောကြောင့် ဖြစ်နိုင်သည်၊ ယန်ကျင်းဇီက သူ့အထောက်အထားကို ပြောင်းခဲ့လျှင်ပင် သူသည် သူတို့၏ ခံစားချက်များမှာ ပြောင်းလဲသွားလိမ့်မည်ဟု မခံစားရပေ။

သူက သူ့ကို အချစ်ဆုံးပဲ!

“ မင်းတို့က အချင်းချင်း သိကြတာ ရက်ပိုင်းပဲ ရှိသေးတာမလား? ” အဘိုးရှ မျက်မှောင်ကြုံ့သွားသည်။

“ ကျွန်တော်တို့ နှောင်ကြိုးဖွဲ့ပြီးပြီ! ” ရှဇီရှိူ့က ပြောဖို့ တွန့်ဆုတ်မနေပေ။

ရှဇီရှိူ့ ဤသို့ပြောသောအခါ အဘိုးရှတွင် ပြောစရာ မရှိတော့ချေ။

တစ်ခုကိုတော့ အသိအမှတ်ပြုရမည်၊ ၎င်းမှာ နှောင်ကြိုးဖွဲ့ထားသော စစ်သည်တော်နှင့် အကူဆရာတို့ဟာ တစ်ဦးနှင့်တစ်ဦး အကြွင်းမဲ့ အသိကြဆုံး ဖြစ်သည်။

လူတချို့သည် အချင်းချင်း နားလည်ပြီး အချင်းချင်း နက်နက်ရှိုင်းရှိုင်း ချစ်ခင်ကြသော်လည်း လူတချို့ကမူ သူတို့ အချင်းချင်း အလွန်ကောင်းစွာ နားလည်သိရှိကြသောကြောင့်သာ တစ်ဦးကိုတစ်ဦး နက်နက်ရှိုင်းရှိုင်း ရွံရှာကြပေသည်။

“ ဇီရှိူ့၊ ငါတို့ကြောင့်သာ မဟုတ်ရင် မင်း အရှင် Marshal နဲ့ သိခဲ့ရမှာ မဟုတ်ဘူး။ အခု ရှမိသားစုက... ” အဘိုးရှက စိတ်အားထက်သန်စွာ ပြောလာသည်။

ရှဇီရှိူ့က ပြောလိုက်သည် : “ အဘိုး၊ တကယ်တော့ ကျင်းဇီက သူ့ကို လှည့်စားလို့ အဘိုးကို အရမ်းမကျေမနပ်ဖြစ်နေတာ။ အဘိုးကို သူ အရင်က ပေးခဲ့တဲ့ ပိုက်ဆံကို ပြန်ယူဖို့ သူ စီစဉ်‌နေတယ်။ ” 

“ ဟုတ်တယ်။ ဒီမှာ ငွေတောင်းခံလွှာ ရှိတယ်။ ” Allen က ပြုံးလျက် ဆိုသည်။

အဘိုးရှ : “ … ”

နောက်ဆုံးတွင် အဘိုးရှဟာ မျက်နှာမဲ့ကာ ထွက်ခွာသွားရဆဲဖြစ်သည်။

ထွက်လာပြီးနောက် အဘိုးရှသည် ရှချီချီကို ကြည့်သည် : “ မင်းကို ပြောတယ်၊ မင်း! မင်း မလုပ်ချင်ရင်တောင် အိမ်ကို လာမယ့်လူကို စောင့်နေလိုက်လို့ရသေးတယ်။ သူတို့နဲ့ တွေ့ပြီးမှ သေချာစကားပြောကြည့်လို့ရတယ်။ ဘာလို့ မင်း ရှဇီရှိူ့ကို သွားခိုင်းလိုက်ရတာလဲ? ”

အရှင် Marshal ကသာ ရှချီချီကို လက်ထပ်ခဲ့မယ်ဆိုရင် သူတို့ရှမိသားစုက အကျိုးအမြတ်တစ်ခုကိုတောင် မရနိုင်စရာ မဖြစ်တော့ဘူး!

ရှချီချီသည်လည်း အမှန်ပင် နောင်တရမိသည်။

သူ(မ) ဖုဖေးကို နှစ်သက်ပြီး ဖုဖေးအတွက် ဤမျှလုပ်ပေးလိုခြင်းမှာ တကယ်တော့ စာအုပ်ဖတ်နေချိန်တွင် ဖုဖေးအတွက် သူ(မ) ထားရှိခဲ့သော ခံစားချက်ကောင်းများကြောင့်သာ ဖြစ်သည်။ ပြီးတော့ ဖုဖေးရဲ့အထောက်အထားလည်း ရှိသေးတယ် — အနာဂတ်မှာ ဖုဖေးက Marshal ဖြစ်လာလိမ့်မယ်!

ဒါကို ဘေးဖယ်လိုက်ရင်... ဖုဖေးက သူ(မ)လို မိန်းမငယ်လေးတစ်ယောက် သဘောကျမယ့် လူ လုံးဝ မဟုတ်ဘူး!

ဖုဖေးက မာနကြီးပြီး ရိုမန့်တစ်မဖြစ်ချေ။ သူနှင့် အတူရှိနေခြင်းမှာ အဓိကအားဖြင့် သူ(မ)၏ စူးစိုက်နှစ်မြှုပ်မှုကြောင့်သာ ဖြစ်သည်...

ဖု‌ဖေးက အနာဂတ်မှာ Marshal ဖြစ်လာမှာမို့ သူ(မ) ဒါတွေကို လက်ခံနိုင်ခဲ့ပေမယ့် အခု ဖုဖေးက မဟုတ်တော့ဘူး!

သေချာစဉ်းစားကြည့်၊ ဘယ်နေရာမှာ ဖုဖေးက ယန်ကျင်းဇီထက် ပိုကောင်းလဲ?

ယန်ကျင်းဇီက အရမ်းသန်မာပြီး ရှဇီရှိူ့ကို အလွန်ကြင်နာသည်...

ဒါပေမယ့်လည်း သူတို့က နှောင်ကြိုးသွယ်ပြီးပြီ!

ရှချီချီ၏မျက်လုံးများ နာကျင်နေပြီး သူ(မ) အနည်းငယ် ငိုချင်လာသည်။

ယန်ကျင်းဇီသည် ရှချီချီ၏ အတွေးကို မသိဘဲ Zerg ကိစ္စများကို ကိုင်တွယ်နေခဲ့သည်။

Zerg ပြန်ပေါ်လာတဲ့ ဒီကိစ္စကို သတိထားရမယ်!

ယန်ကျင်းဇီ လက်အောက်မှ လူများနှင့် စစ်ဌာနချုပ်သည် ဤကိစ္စကို စတင်စုံစမ်းစစ်ဆေးခဲ့ပြီး ဤစုံစမ်းစစ်ဆေးမှုတွင်... သူတို့ ရုတ်တရက် ရှာဖွေသိရှိလိုက်ရသည်မှာ Zerg က... ထိုမျှ ကြောက်စရာမကောင်းလောက်တော့ချေ။

ယင်းကား အဘယ့်ကြောင့်ဆိုသော်...

Cossack နှင့် Cossack လက်အောက်ရှိ လူများကို မေးမြန်းရရှိခဲ့သော အချက်အလက်များအရ ဤအကြိမ်တွင် စွမ်းအားကြီးမားသော zergs များ အားလုံးဟာ “အလုပ်ကြီးကြီးမားမား လုပ်ဆောင်ရန်” ကြယ်မြို့တော်သို့ လာရောက်ရန် ဆန္ဒရှိကြကာ ထွက်လာခဲ့ကြသည်။

ရလဒ်ကမှု သူတို့၏ အသန်မာဆုံး အင်းဆက်များ အားလုံးကို ယန်ကျင်းဇီက သတ်ပစ်ခဲ့သည်။ 

ထိုကဲ့သို့သော အခြေအနေမျိုးတွင် Zerg ဘက်မှ စတင်တိုက်ပွဲဆင်နွှဲရန်မှာ မဖြစ်နိုင်ဘဲ ယခုအချိန်တွင်ပင် Zerg က သူတို့ကို သတိထား၍ စောင့်ကြပ်နေလောက်သေးသည်။

ယန်ကျင်းဇီ : “ ... ” သူ တော်တော် တော်တာပဲ!

အမှန်ပင်၊ ကြယ်တာရာမဟာမိတ်သည်လည်း ပြင်ဆင်ထားရမည်ဖြစ်ပြီး မျိုးဆက်သစ် စွမ်းအားရှင်များကို သေချာပေါက် လေ့ကျင့်ပေးရမည်ဖြစ်သည်။ အဆင့် SSS စစ်သည်တော်တွေ ဖြစ်အောင် သေချာလေ့ကျင့်ပေးရမယ်!

“ ဒါကို ငါ ကူညီနိုင်တယ်။ ” ထိပ်တွင် ထိုင်ပြီး အောက်က လူများထံမှ အစီရင်ခံစာကို နားထောင်နေသော ယန်ကျင်းဇီသည် စားပွဲကို ခေါက်သည် : “ ဗဟိုစစ်တက္ကသိုလ်မှာ ငါ့အတွက် နေရာတစ်ခု စီစဉ်ပေး၊ အဲ့က ကျောင်းသားတွေကို ငါ သွားသင်ပေးလို့ရတယ်။ ”

ယန်ကျင်းဇီ ထိုစကားများကို ပြောပြီးသည်နှင့် အစည်းအဝေးသို့ လာသော တပ်မှူးများနှင့် ဒုဗိုလ်ချုပ်ကြီးများ အားလုံး စိတ်လှုပ်ရှားသွားကြသည်။

အရှင် Marshal က ကြယ်တာရာမဟာမိတ်ကို တကယ် စိတ်နှစ်ထားတာပဲ!

ဤအချိန်တွင် ယန်ကျင်းဇီက ဆက်ပြောသည် : “ ဒါနဲ့ ရှဇီရှိူ့က ငါ့ရဲ့လက်ထောက်ဆရာ ဖြစ်ရမယ်။ ” ရှဇီရှိူ့က ဗဟိုစစ်တက္ကသိုလ်မှ ဘွဲ့မရသေးဘဲ လွန်ခဲ့သော ရက်အနည်းငယ်ကလည်း ကျောင်းမသွားခဲ့ပေ။ ၎င်းမှာ အိမ်တွင် တစ်ခုခု ဖြစ်၍ ခွင့်ယူခဲ့သောကြောင့် ဖြစ်သည်။ ဒါပေမယ့် ရက်အနည်းငယ်ထဲမှာ သူ သေချာပေါက် စာသင်သွားလိမ့်မယ်!

သူ “အိမ်အလွတ်ကို တစ်ယောက်တည်း စောင့်ရှောက်” မနေချင်ဘူး၊ ဒီတော့... အနောက်ကနေ လိုက်ရုံပဲ!

တပ်မှူးများ : “ ... ” သူတို့ရဲ့ အရှင် Marshal က ပြီးပြည့်စုံလွန်းတယ်လို့ သူတို့ ထင်ခဲ့တယ်! ဒါပေမယ့် တကယ်တော့ သူက အချစ်ရူးတစ်ယောက်ပဲ!

သို့သော် အရှင် Marshal က အချစ်ရူး ဟုတ်သည်ဖြစ်စေ၊ မဟုတ်သည်ဖြစ်စေ၊ သေချာသည်မှာ အရှင် Marshal က ယခုအခါ ကြယ်မြို့တော်၏ ကယ်တင်ရှင် ဖြစ်ပြီး သူတို့၏ ကယ်တင်ရှင်လည်း ဖြစ်သည်။

လူတိုင်းက ဆုံးဖြတ်ချက်ကို ထောက်ခံခဲ့ကြပြီး တခြားသူများက ရှဝေချန်ကို မနာလိုစွာ ကြည့်ကြသည် – ရှဝေချန်မှာ သားကောင်းတစ်ယောက် ရှိတာ အရမ်းကံကောင်းတယ်! 

ရှဝေချန် : “ ... ” သူ့ကို မနာလိုမဖြစ်ကြနဲ့! သူ နောက်ကျရင် အိမ်ပြန်ပြီး ယန်ကျင်းဇီက Marshal ဆိုတာ သူ သိပေမယ့် ဘာလို့ ဘာမှမပြောခဲ့ရတဲ့ အကြောင်းကို သူ့ဇနီးကို ရှင်းပြရဦးမယ်...

သို့သော် ရိုးရိုးသားသား ပြောရလျှင် သူသည်လည်း သူ့သားက အလွန်တော်သည်ဟု ထင်မိသည်။

အရှင် Marshal က နည်းနည်း သဲပန်းပုဆန်တယ် ဆိုရင်တောင်မှ ဒါက အရှင် Marshal ဖြစ်နေတုန်းပဲလေ! 

စစ်ဌာနချုပ်သည် အလွန်အလုပ်များနေပြီး တပ်မှူးခုနစ်ဦးတွင် အိမ်ပြန်ရန် အခွင့်မရှိသော်လည်း ယန်ကျင်းဇီသည် တိတ်တဆိတ် အိမ်ပြန်သွားခဲ့သည်။

သူသည် ယခင်က စစ်ဌာနချုပ် အရေးကိစ္စများကို သိပ်မကိုင်တွယ်ခဲ့ဖူးပေ။ ၎င်းကို သူ နားမလည်ရာ သူသည် အိမ်အရင်ပြန်နှင့်ပြီး အရေးတစ်စုံတစ်ရာ ရှိလျှင် သူ့ကို ရှာရန် တပ်မှူးများကို ညွှန်ကြားခဲ့သည်။

ယန်ကျင်းဇီ အိမ်ပြန်ရောက်သော် မိုးလင်းလုနီးနေပြီဖြစ်သည်။

Allen သည် ရှမိသားစု၏ ဗီလာကို ပြန်လည်မွမ်းမံပြီးဖြစ်ကာ ရှမိသားစု၏ အိမ်တံခါးဝသို့ ယန်ကျင်းဇီ ရောက်ရောက်ချင်း တံခါးက အလိုအလျောက် ပွင့်လာသည်။ သူသည် တိတ်တဆိတ် ဝင်ရောက်ပြီး ရှဇီရှိူ့၏အခန်းသို့ တန်းသွားခဲ့သည်။

ရှဇီရှိူ့သည် မအိပ်ဘဲ ဆက်သွယ်ကိရိယာဖြင့် Star Network တွင် လိုက်လံကြည့်ရှုနေသည်။ ယန်ကျင်းဇီ၏စိတ်စွမ်းအင်က သူ့ကို လွှမ်းခြုံလာသောအခါ သူ၏စိတ်စွမ်းအင် အားလုံးသည် အထိန်းအကွပ်မဲ့စွာ ပြေးထွက်ပြီး ယန်ကျင်းဇီကို တင်းတင်းကြပ်ကြပ် ရစ်ပတ်လာသည်။ 

ဤစိတ်စွမ်းအင်များသည် ချဉ်သော အရသာကိုလည်း ပေးစွမ်းနေသည်။

ယန်ကျင်းဇီ မေးတော့မည်အပြုတွင် ရှဇီရှိူ့က သူ့ကို ကြည့်သည် : “ အခြေအနေ ဘယ်လိုလဲ? Zerg မျိုးနွယ် အန္တရာယ်များလား? ”

“ အန္တရာယ်မများဘူး။ ကိုယ်တို့ ကိုင်တွယ်နိုင်တယ်။ ” ယန်ကျင်းဇီက ရှဇီရှိူ့ကို မေးသည် : “ ဘာဖြစ်လို့လဲ? မပျော်ဘူးလား? ”

“ Star Network မှာ မင်းကို ဖွင့်ပြောနေတဲ့ လူတွေ အများကြီးပဲ၊ သူတို့ မင်းကို အရမ်းကြိုက်တယ်လို့ ပြောနေကြတယ်။ ” ရှဇီရှိူ့က ဆိုသည်။

“ ကိုယ် မင်းကိုပဲ ကြိုက်တယ်! ” ယန်ကျင်းဇီ ရှေ့တိုးကာ ရှဇီရှိူ့ကို နမ်းလိုက်ပြီး ရှဇီရှိူ့နှင့် သူ့ကိုယ်သူကို အတူတကွ ရစ်ပတ်၍ သူ့စိတ်စွမ်းအင်ဖြင့် ပိုးအိမ်ကြီးသဖွယ် ပုံစံဖွဲ့စည်းလိုက်သည်။ 

“ မင်း စိတ်လှုပ်ရှားသွားရုံပဲ။ ” ရှဇီရှိူ့ သူ့ကို ကိုက်လိုက်၏။

“ မင်း ကိုယ့်ကို မတရား စွပ်စွဲနေတာပဲ! ကိုယ် မြင်ဖူးတဲ့ အလှလေးတွေ ဘယ်လောက်တောင် ရှိလိုက်သလဲ? ကိုယ်က စိတ်လှုပ်ရှားမယ့် လူ မဟုတ်တာ သေချာတယ်! ” ယန်ကျင်းဇီက ဖြောင့်မှန်စွာ ပြောသည်။

“ ဒါဆို မင်း ဘာလို့ ငါ့ကို မြင်မြင်ချင်း ချစ်မိသွားတာလဲ? ” ရှဇီရှိူ့က မေးသည်။

“ မင်းရော၊ ဘာလို့ မင်း ကိုယ့်ကို မြင်မြင်ချင်း ချစ်မိသွားတာလဲ? မင်း ကိုယ့်ရဲ့ အဲ့ဒီစူးရှရှပုံစံကြီးကို မကြိုက်ဘူးမလား? ”  

ရှဇီရှိူ့ : “ … ”

ယန်ကျင်းဇီ : “ ကြည့်လေ၊ ကိုယ်တို့က အပေါ်ယံကြည့်တဲ့ လူတွေ မဟုတ်ပေမယ့် စုံတွဲဖြစ်ဖို့ မွေးဖွားလာတယ်။ ကိုယ်တို့က မြင်မြင်ချင်း ချစ်မိဖို့ ကံကြမ္မာဖန်ပြီးသား! ကိုယ်တို့ရဲ့ လိုက်ဖက်နှုန်းက တစ်ရာရာခိုင်နှုန်းအပြည့်! မင်းက ကိုယ့်ရဲ့ တစ်စိတ်တစ်ပိုင်းလို့ ကိုယ် ခံစားရတယ်။ ”

ရှဇီရှိူ့လည်း ထိုကဲ့သို့ ခံစားရသည်။

သို့ရာတွင် ယခုမူ... ရှဇီရှိူ့ ယန်ကျင်းဇီကို ကြည့်လိုက်သည် : “ မင်း ငါ့အဝတ်တွေကို ဘယ်တုန်းက ချွတ်လိုက်တာလဲ? ” သူ့အဝတ်တွေ ဘယ်မှာလဲ?!

ယန်ကျင်းဇီက ဆိုသည် : “ ကိုယ့်အချစ်၊ ကိုယ် မင်းကို အခုချက်ချင်း အဖော်ပြုပေးမှာပါ! ” သူကလည်း သူ့အဝတ်အစားများကို စချွတ်ခဲ့သည်။

ရှဇီရှိူ့ : “ ... ”

ထိုညတွင် ရှဝေချန်သည် စစ်ဌာနချုပ်၌ နေ့ရောညပါ ကုန်ဆုံးခဲ့ပြီး နောက်‌ဆုံးတွင် အိမ်ပြန်ရောက်လာခဲ့၏။ ဤအခါမှသာ မနက်စောစော ပြန်ရောက်သော ယန်ကျင်းဇီက အောက်ထပ်သို့ပင် မဆင်းခဲ့ကြောင်း သိလိုက်ရသည်။

ဒါ... မနာလိုစရာပဲ!

သူ့ဇနီးက သူ့ကို ‌စိတ်ဆိုးနေလို့ သူ့ကို ဒီည အတူတူ အိပ်ခွင့်ပေးမှာ မဟုတ်ဘူး!

အပေါ်ထပ်တွင် အလွန့်အလွန် ပင်ပန်းပြီးနောက် အိပ်ပျော်သွားသည့် ရှဇီရှိူ့သည် နောက်ဆုံးတွင် နိုးလာကာ သူ့ဆက်သွယ်ကိရိယာ၌ စာတိုများစွာကို တွေ့ရှိခဲ့သည်။

သူသည် ၎င်းကို လျင်မြန်စွာ ဝင်ကြည့်ကာ အံ့ဩသွားရသည်။

သူနဲ့ ယန်ကျင်းဇီရဲ့ ဘုံအကောင့်ထဲမှာ ငွေတွေ အများကြီးပဲ! အရမ်းများတယ်!

သူ ဒီသုညတွေကို မရေတွက်နိုင်ဘူး!

သူ တကယ်ပင် ဆင်းရဲကြောင်းကို ရှဇီရှိူ့ ရုတ်တရက် နားလည်လိုက်သည်။

မဟုတ်ဘူး၊ သူ မဆင်းရဲဘူး။ ယခု သူ့ပိုင်ဆိုင်မှုများမှာ ကြယ်မြို့တော်ရှိ အချမ်းသာဆုံးလူကို ကျော်လွန်သွားပြီဖြစ်သည်။

ယန်ကျင်းဇီက သူ့ကို ပိုက်ဆံအများကြီး တကယ် ပေးထားတယ်၊ သူ အကုန်သုံးပစ်မှာ မကြောက်ဘူးလား? ကောင်းပြီ၊ သူ အကုန်မသုံးနိုင်လောက်ဘူး...

“ အချစ်၊ ကိုယ်တို့မင်္ဂလာဆောင်စရိတ် တစ်သန်းက တကယ်ပဲ နည်းလွန်းတယ်။ ဆယ်ဘီလီယံလောက်ဆိုရင်ရော ဘယ်လိုလဲ? ” ယန်ကျင်းဇီ

က ချက်ချင်း ရောက်လာသည်။

ရှဇီရှိူ့ သူ့စိတ်စွမ်းအင်ကို သုံးကာ ယန်ကျင်းဇီ၏စိတ်စွမ်းအင်ကို ရိုက်နှက်ပစ်လိုက်သည် — ဒီလူက မင်္ဂလာဆောင်ပွဲအတွက် ၁၀ ဘီလီယံကို တကယ်ကြီး သုံးချင်နေတယ်! သူ လူချမ်းသာတွေကို မုန်းတယ်! 

____