Chapter 2

🧜 အခန်း ၂ 

မင်းသားလေး : အဲဒါ ယွဲ့ကျန့်ပဲ... 

ဧကရာဇ်၏ ပြင်းပြင်းထန်ထန် တိုက်တွန်းမှုကြောင့် ယီနျို ညတွင်းချင်းပင် ထွက်ခွာခဲ့ရသည်။

စစ်သင်္ဘောပေါ်သို့ ရောက်ရှိပြီးနောက်တွင် ယီနျိုအနေဖြင့် စိတ်ပြင်ဆင်ထားခဲ့သည့်တိုင်အောင် နှစ်တန်းညီညီစီကာ ရပ်နေကြသော ကိုယ်စားလှယ်အဖွဲ့အား မြင်လိုက်ရသည့်အခါ နှုတ်ခမ်းထောင့်များပင် အနည်းငယ် တွန့်သွားမိသည်။

ဤကဲ့သို့သော လူပစ္စည်းအပြည့်အစုံမှာ ခေတ္တမျှအတွက်သာ မဟုတ်နိုင်ကြောင်း သိသာထင်ရှားလှသည်။ သူ၏ ခမည်းတော်မှာ ဤကိစ္စအား လွန်ခဲ့သော အချိန်များကတည်းက ပြင်ဆင်ထားခြင်းဖြစ်ကြောင်း ပြောဖို့ရန်ပင် မလိုအပ်ပေ။ ဆိုရလျှင် ယီနျို သဘော တူ၊ မတူ ဆိုရန်မှာ အရေးမပါချေ။

ယီနျိုက ပဋိသန္ဓာရစကားဆိုရန် ရှေ့တက်လာဟန်ပြင်နေသည့် ကိုယ်စားလှယ်အဖွဲ့ခေါင်းဆောင်အား တိုက်ရိုက်လျစ်လျူရှုလိုက်သည်။

“တိုက်ရိုက်ထုတ်လွှင့်တဲ့ ပစ္စည်းတွေ ယူမလာနဲ့...”

ထို့နောက် သူ၏ လူများအား ခေါ်ဆောင်ကာ ဖန်ပေါင်းချောင် (sleeping cabins)ပါဝင်သော အခန်းအချို့ ရွေးယူပြီးနောက် အနားယူရန် ပြင်သည်။

အင်ပါယာ၏ ဗဟိုချက်မှ ဂလက်ဆီ ၈ ၏ ပင်မကြယ်သို့ ဝမ်းဟိုး(wormhole) မှတစ်ဆင့် တစ်ဆက်တည်း သွားမည်ဆိုလျှင် ၂ ရက် တိတိကြာမြင့်သည်။ ထို့နောက်တွင် ရှေ့တန်းဌာနချုပ်သို့ရောက်ရန် နေ့တစ်ဝက်ခန့် ဆက်သွားရမည်ပင်။

ဤကဲ့သို့ ရှည်ကြာသော ခရီးစဉ်တွင် အင်တာနက်သုံးရန်နှင့် အိပ်စက်ရန်မှတစ်ပါး အခြားလုပ်နိုင်သည့်အရာ မရှိချေ။

ယီနျိုက ဖန်ပေါင်းချောင်အတွင်း၌ မျက်လုံးများမှိတ်ကာ လှဲနေရင်းဖြင့် စဉ်းစားခန်းဝင်နေမိသည်။ ရှေ့တန်းမှ အောင်ပွဲသတင်းအား ကြားသိပြီး များမကြာမီမှာပင် ခမည်းတော်မှ သူ့အား တော်ဝင်ကိုယ်စားလှယ်အဖွဲ့နှင့်အတူ ရှေ့တန်းသို့ ပို့လွှတ်လိုက်ခြင်းပင်။

မည်သို့ပင်ဆိုစေ စစ်မက်အခြေအနေမှာ မီးကဲ့သို့ပင် ပူပြင်းကာ အလျင်စလိုနိုင်သည်။ ခြေတစ်လှမ်းမျှ နောက်ကျသွားမည် ဆိုလျှင်ပင် စစ်ပွဲအဆုံးသတ်သွားနိုင်သဖြင့် တော်ဝင်မိသားစုအနေဖြင့် သူတို့၏ပုံရိပ်အား ကြွားဝါကာ မြှင့်တင်နိုင်တော့မည်မဟုတ်ပေ။

အထူးသဖြင့် ယွဲ့ကျန့်မှာ ရှေ့တန်း၌ တပ်မှူး (ဗျူဟာမှူး) အဖြစ် တာဝန်ထမ်းဆောင်နေပြီး သူ၏ အရှိန်အဟုန်ဖြင့် တိုက်ခိုက်သိမ်းပိုက် အောင်ပွဲခံမှုများမှာ နာမည်ကျော်လှသည်။ 

ယွဲ့ကျန့်အား အခြားသူများ မည်သို့ ရှုမြင်သည်ကို ယီနျို မသိသော်လည်း သူ၏ ခမည်းတော်မှာမူ သူနှင့် တူညီသော အတွေးအမြင်များ ရှိလိမ့်မည်ဟု ခံစားမိသည်။

ဤကဲ့သို့သော အခြင်းအရာမှာ ယခင်က မဖြစ်ပျက်ခဲ့ခြင်းမျိုး မဟုတ်ပေ။ လွန်ခဲ့သော နှစ်ဝက်ခန့်၌ ယွဲ့ကျန့်က တပ်ဖွဲ့တစ်ခုအား ဦးဆောင်ကာ ဆစ်ဇယ်ကြယ်ပေါ်ရှိ ကြယ်ဓားပြများနှင့် တိုက်ခိုက်ခဲ့ပြီး (၂) ရက် မပြည့်မီမှာပင် အခြေစိုက်ကြယ်သို့ ပြန်လည်ရောက်ရှိလာခဲ့သည်။ တော်ဝင်ကိုယ်စားလှယ်အဖွဲ့၏ယာဉ် ဆစ်ဇယ်ကြယ်သို့ ရောက်ရှိချိန်၌ ဝမ်းနည်းကြင်နာမှု ပြသရမည့်အစား ဒေသခံများအား နှုတ်ဆက်ကာ ရောက်၊ ပြန် ဖြစ်ခဲ့ရသည်။

ယင်းမှာ အမှန်တကယ် အားထုတ်မှုပြုခဲ့သော်ငြား အကျိုးရလဒ်မရှိခြင်းဟု ဆိုရပေမည်။ သမားရိုးကျ ဖြစ်ရပ်တစ်ခုပင်။

တော်ဝင်ကိုယ်စားလှယ်အဖွဲ့၏ ခရီးစဉ်မှာ အချည်းနှီးဖြစ်ခဲ့ရုံသာ မကဘဲ သူတို့က ဖြစ်စဉ်တစ်ခုလုံးအားလည်း တိုက်ရိုက်ထုတ်လွှင့်မှု ပြုခဲ့သည်။ သူတို့၏ ကတိစကားများအား ထိန်းသိမ်းရန် ကျရှုံးခဲ့ရုံသာ မကဘဲ အားနည်းချက်များကိုပါ ဧကရာဇ်အား သိရှိစေခဲ့သည်။ ထိုအခြင်းအရာမှာ မည်မျှ ရှက်ရွံ့ဖွယ်ကောင်းကြောင်း ဖော်ပြရန် နည်းလမ်းပင် မရှိချေ။

သို့သော်လည်း ဧကရာဇ်က မြင့်တက်လာသော ယွဲ့မိသားစုအား မျက်နှာသာပေးသည့်အနေဖြင့် ထိုအဖြစ်အပျက်အား မျက်ကွယ်ပြုထားရသည်။ ဂြိုဟ်များအား သီးသန့်အုပ်စိုးသူ အရှင်သခင်အချို့အား ဖိနှိပ်ရန်အတွက် သူတို့၏ (ယွဲ့များ၏) စွမ်းအားကို လိုအပ်သည်။ 

[Note : ရှုပ်သွားမှာ စိုးလို့ နည်းနည်းရှင်းလိုက်မယ်‌နော်.. ဒီမှာပြောချင်တာက ယွဲ့ကျန့်က တိုက်ပွဲကို ခပ်မြန်မြန်တိုက်ပြီး ပြီးသွားတော့ ဧကရာဇ်ရဲ့ ကိုယ်စားလှယ်အဖွဲ့က နေရာမယူလိုက်ရတဲ့အပြင် အရှက်ကွဲသွားတယ်.. ဒါကြောင့် သူမျက်နှာပျက်ရတယ်ပေါ့.. ဒါပေမဲ့ ယွဲ့ကျန့်တို့ကို လိုအပ်တဲ့အတွက် အမျက်မရှဘဲ နေလိုက်တယ် လို့ဆိုလိုတာပါ ]

တော်ဝင်မိသားစုဝင်တစ်ဦး အနေဖြင့် ယီနျိုက သူ၏မိသားစုဝင်အား ဤကဲ့သို့ မတွေးသင့်မှန်း သိရှိပါသော်လည်း ခမည်းတော်ဖြစ်သူမှာ ခပ်တုံးတုံး အရာအချို့အား ပြုလုပ်ခဲ့သည်ဟု ခံစားမိသည်။ မျက်နှာပျက်ရသည်ဟု ဆိုရမည့်အစား ထို့ထက်ပို၍ အရှက်တကွဲဖြစ်ရန် မရှိတော့ဟု ဆိုရပေမည်။

ယီနျိုအနေဖြင့် ဤတစ်ကြိမ်၌ ကိုယ်စားလှယ်အဖွဲ့မှာ အခြေအနေကိုလိုက်၍ ဆီလျော်စွာ ပြုမူတတ်ရန်သာ မျှော်လင့်မိတော့သည်။ ထိုလူတစ်စုအား တိုက်ရိုက်ထုတ်လွှင့်ရန် ခွင့်မပြုနိုင်ပေ။ အင်ပါယာတစ်ခုလုံးရှေ့၌ အရှက်ခွဲခံရသူ မဖြစ်လိုပေ။ ထို့အပြင် ယွဲ့ကျန့်၏ရှေ့၌ မည်သည့်အရှုပ်အထွေးကိုမျှ မလိုချင်ပေ။

ရွေးချယ်ရန် ရှိမည်ဆိုလျှင် အင်ပါယာမှ စီစဉ်ထားသော ကိုယ်စားလှယ်အဖွဲ့နှင့်သွားမည် မဟုတ်ပေ။ ထိုသို့တွေးနေရင်းနှင့် ယီနျို ဖန်‌ပေါင်းချောင်အတွင်း၌ တဖြည်းဖြည်း အိပ်ပျော်သွားလေသည်။

စစ်သင်္ဘောပေါ်မှ ဖန်ပေါင်းချောင်များမှာ သာမန်အနားယူခန်းများနှင့် ကွဲပြားမှုရှိပြီး ကြယ်တာရာခရီးရှည်များအတွက် ပြုလုပ်ထားခြင်း ဖြစ်သည်။ ထိုဖန်ပေါင်းချောင်များက လူတစ်ဦးအား အိပ်စက်ခြင်းအခြေနေသို့ လျင်မြန်စွာ ရောက်ရှိစေပြီး ခရီးစဉ်တစ်လျှောက် အိပ်စက်မှု၊ အိပ်မက်ရှည်များကြောင့် ပင်ပန်းနွမ်းလျမှုတို့ကိုလည်း ကင်းဝေးစေသည်။ လေး၊ ငါးရက် ကြာ ခရီးရှည်သွားရသူ အများစုမှာမူ တစ်‌ရေးအိပ်ရုံမျှသာဟု ခံစားကြရသည်။

သို့သော်လည်း ဤတစ်ကြိမ်တွင်မူ ယီနျို ထိုသို့မခံစားရပေ။ အိပ်ပျော်ပြီး မကြာမီမှာပင် အိပ်မက်မက်လေသည်။

အိပ်မက်ထဲ၌ ကောင်းကင်တစ်ခွင် ယမ်းငွေ့များ ပြည့်နေပြီး နေရာအနှံ့ မီးလောင်ကာ သွေးများ ပြန့်ကြဲနေသည်။ ရှက်ရွံ့ဖွယ်ကောင်းစွာ ပုလ္လင်မှ ဆွဲချခံရပြီး သရဖူမှာ မြေပြင်သို့ ပြုတ်ကျကာ ဧကရာဇ်၏ ကျိုင်းတောင်ဝှေးမှာလည်း လှေကားထစ်အောက်ခြေ၌ လဲလျောင်းလျက်ရှိသည်။

ထိုလူက ယီနျို၏မေးအား ဆွဲပင့်ကာ ကြမ်းတမ်းသော လက်ချောင်းထိပ်များဖြင့် အရေပြားအား ထိတွေ့နေသည်မှာ နာကျင်လှသည်။ ထိုလူက ယီနျိုအား စားပွဲပေါ်၌ ခပ်တင်းတင်းဖိထားပြီး မြင့်မြတ်သည့် တော်ဝင်ဝတ်စုံမှာလည်း သူ၏ စစ်ဖိနပ်အောက်တွင် နင်းခြေခံထားရသည်။ ယီနျိုမှာ ထိုလူထံမှ ခပ်ဖျော့ဖျော့သွေးနံ့ကိုပင် ရနေသည်။

ထို့နောက် နားနားကပ်ကာ ရဲရဲတောက်နေသော မျက်လုံးများ၊ ကြမ်းရှသောအသံဖြင့် ပြောလာသည်။

“နောင်တရနေပြီလား အရှင်မင်းကြီး..”

အ.. အရှင်မင်းကြီး ဟုတ်လား..

ယီနျို ထိတ်လန့်တကြား နိုးထလုနီးနီးပင်။ 

ငါဘာလို့ အရှင်မင်းကြီးလို့ အခေါ်ခံရဲမှာလဲ…

ထိုသည်မှာ လွန်စွာကြောက်မက်ဖွယ်ရာပင်။ ခမည်းတော်မှာ ယခုထိတိုင် ရှင်သန်နေဆဲ ဖြစ်သည်။

အဲဒါ စာအုပ်ထဲက ဇာတ်လမ်းကြီးမလား.. ယွဲ့ကျန့်က ပုန်ကန်ပြန်ပြီလား.. ငါ့နှယ် အခု ပုလ္လင်ပေါ်က ဆွဲချခံပြီးပြီဆိုတော့ နောက်ထပ်ဘာလဲ အခန်းကျဉ်းလေးထဲ ဖမ်းဆီးတော့မယ်ပေါ့..

ဘာကိစ္စနဲ့များ အဲဒါကို အိပ်မက်မက်ရပြန်တာလဲနော်.. မပြီးနိုင်တော့ဘူးလား.. ငါ့ကို ဒီတိုင်းလေး ထားလိုက်ပါတော့..

ယီနျို နိုးထရန် ကြိုးစားရုန်းကန်သည့်တိုင်အောင် ပင်လယ်ငှက်၏ ပါးစပ်အတွင်းသို့ ကျရောက်သည့် ငါးပမာ ဖိချခံနေရသည်။ မည်မျှပင် ခုန်တက်ပါသော်လည်း အသုံးမဝင်ချေ။ 

စိတ်လှုပ်ရှားမှုကြောင့် သူ၏ခြေထောက်များမှာ ငါးမြီးအဖြစ်သို့ ပြောင်းလဲသွားပြီး ယွဲ့ကျန့်၏ မျက်နှာအား အညှာအတာမဲ့စွာဖြင့် ရိုက်လိုက်သည်။ အဝေးမှ ကျယ်လောင်သည့်အသံတစ်ခု ထွက်ပေါ်လာပြီးနောက် ကမ္ဘာတစ်ခုလုံး တုန်ခါလာသည်။

အဆုံး၌ ယီနျို နိုးထလာခဲ့သည်။

မျက်လုံးများဖွင့်လိုက်ပြီးနောက် တုန်ခါနေသည်မှာ သူ၏ အိပ်မက်ကမ္ဘာမဟုတ်ဘဲ စီးနှင်လာသော စစ်သင်္ဘောဖြစ်နေကြောင်း သိလိုက်ရသည်။

တစ်ခုခုတော့ မှားနေပြီ..

မသိစိတ်မှ တွေးလိုက်မိသည်။

ဖန်ပေါင်းချောင်အား အလျင်စလို ဖွင့်ကာ ထထိုင်လိုက်သည်။ တစ်ချိန်တည်းမှာပင် တံခါးခေါက်သံ ထွက်ပေါ်လာသည်။ သူ အလျင်အမြန် မတ်တတ်ရပ်ကာ အဝတ်အစားများ ပြုပြင်လိုက်သည်။

“ဝင်လာပါ...”

ဝင်လာသူမှာ ယီနျို၏ ကိုယ်ရံတော်ခေါင်းဆောင် လုယာ ဖြစ်သည်။

လုယာမှာ မျက်နှာကြောသေနေသူဖြစ်သည်။ မည်မျှကြီးမားသည့် ပြဿနာနှင့် ရင်ဆိုင်ရစေကာမူ သစ်သားကဲ့သို့ မပြောင်းမလဲ မျက်နှာထားနှင့် ရှိတတ်သည်။ သို့သော်လည်း ဤတစ်ကြိမ်၌ ယီနျိုက သူ၏အမူအရာထဲ၌ လေးနက်မှုအချို့အား မြင်တွေ့နေရသည်။

“ဘာဖြစ်တာလဲ...”

ယီနျို မကောင်းသည့် ခံစားချက်များဖြင့် မေးလိုက်သည်။

“ပင်မယာဉ်က အမည်မသိယာဉ်စုရဲ့ တိုက်ခိုက်ခြင်း ခံရတာပါ... အစောင့်သင်္ဘောကလည်း ပြန်တိုက်နေပါတယ် မင်းသားလေး...”

လုယာ အလျင်အမြန် ပြန်ဖြေပြီး မျက်လုံးထဲ၌ စိုးရိမ်မှု အရိပ်အယောင်များ ရှိနေသည်။ ခေတ္တမျှ တုံ့ဆိုင်းနေပြီးနောက်၌ ဆက်ပြောလာသည်။

“မင်းသားလေးလည်း ပြင်ဆင်ထားသင့်ပါတယ်...”

မင်းသားလေး ငယ်စဉ်က ကြယ်တာရာအပျော်ခရီးထွက်ချိန်၌ ပြန်ပေးဆွဲခံခဲ့ရပြီး ပြင်းထန်သည့် စိတ်ဒဏ်ရာ ရရှိခဲ့ကြောင်း လုယာ မှတ်မိနေဆဲ ဖြစ်သည်။ ဤတစ်ကြိမ်၌ အလားတူ အဖြစ်အပျက်မျိုး ဖြစ်ပွားလာမည် ဆိုပါက...

ဆက်စပ်အခြင်းအရာမှာ ထိုစဉ်က မင်းသားလေးအား ကယ်တင်ခဲ့သူမှာ ယခု ရှေ့တန်း၌ တာဝန်ယူကွပ်ကဲနေသော ဗိုလ်ချုပ်ယွဲ့ ဖြစ်သည်။

သို့သော် ယီနျိုက ၎င်းကို မှတ်မိခြင်းမရှိသည်မှာ သိသာလှသည်။ သူ ထိုစဉ်က (၁၀) နှစ်ပင် မပြည့်သေးသည့်အပြင် ကယ်ဆယ်ပြီး‌နောက်၌ အလျင်စလိုပင် စိတ်ပိုင်းဆိုင်ရာ ကုသမှုများ ခံယူခဲ့ရပြီး ပြန်ပေးဆွဲမှုနှင့် ပတ်သက်သည့် မှတ်ဉာဏ်များအား ဆုံးရှုံးခဲ့ရသည်။

ယီနျိုက လုယာ ဆိုလိုသည်အား နားလည်မှု လွဲသွားကာ အဆိုးဆုံးအနေဖြင့် ဤနေရာ၌ သေဆုံးသွားနိုင်သောကြောင့် စိတ်ပြင်ဆင်ထားသင့်သည်ဟု အသိပေးခြင်းဖြစ်ကြောင်း ထင်မြင်နေလေသည်။

ယီနျို မသေလိုပေ။ သေဆုံးရမည့်အစား စာအုပ်ထဲမှ ‘သူ’ သာ ဖြစ်ချင်မိသည်။ 

အာ... မဟုတ်သေးပါဘူး...

ဆိုလိုသည်မှာ ဤအခြေအနေမျိုးတွင်ထိတ်ထိတ်ပြာပြာ ဖြစ်မနေလျှင် သူ့ကိုယ်သူ ကယ်တင်နိုင်ကောင်းသည်။

“ငါတို့အခု ဘယ်နေရာမှာလဲ.. တန်ပြန်တိုက်စစ်ဆင်တာကို ဘယ်သူအမိန့်ပေးနေလဲ..”

ယီနျို အပြင်သို့ ထွက်လာရင်း တည်ငြိမ်စွာမေးလိုက်သည်။

“MZ8 နက်ဗျူလာ အနီးမှာပါ.. ယာဉ်စုက ရွက်လွှင့်လာတာ ၂ ရက် ကျော်ပါပြီ မင်းသားလေး.. လွန်ခဲ့တဲ့ ၆ နာရီလောက်ကပဲ ဂလက်ဆီ ၈ ရဲ့ ပင်မကြယ်ကို ရောက်ခဲ့တာပါ..”

ယီနျို ကြောင်အသွားမိသည်။ 

၂ ရက်တောင် ကျော်သွားပြီလား... ငါ အခုလေးတင် အိပ်မက်မက်နေခဲ့တာလေ...

လုယာ၏ ပြောကြားချက်အရ သူတို့ယာဉ်စုက ပင်မကြယ်နှင့် ရှေ့တန်းအကြား၌ ချုံခိုတိုက်ခိုက်ခံရခြင်း ဖြစ်သည်။ မည်သည့်နေရာသို့ စစ်ကူတောင်းစေကာမူ အချိန်မီ မရောက်ရှိလာနိုင်ပေ။

သူတို့အဖွဲ့အား အာကာသအတွင်း အမှုန်အမွှားအဖြစ် ပြောင်းလဲပစ်ရန် ၆ နာရီဆိုသော အချိန်မှာ ရန်သူများအတွက် လုံလောက်ပေသည်။

အကောင်းဆုံးသော ရွေးချယ်မှုမှာ ပြန်လည်ခုခံကာ ထွက်ပြေးရင်းဖြင့် စစ်ကူတောင်းရန် ဖြစ်သည်။ ကံကောင်းစွာဖြင့် ၃ နာရီခန့် တောင့်ခံထားနိုင်မည် ဆိုပါလျှင် အချက်ပြမှု လက်ခံရရှိသည့် တစ်နေရာရာမှ စစ်ကူများ ရောက်ရှိလာနိုင်သည်။

ထို့ကြောင့် ရှေ့တန်းနှင့် ပင်မကြယ်အကြားတွင် တစ်ဖက်တည်းကိုသာ အကူအညီတောင်းခံနိုင်မည်ဖြစ်သည်။

“အရှင်မင်းကြီးရဲ့ အနီးကပ်အတွင်းဝန် မစ္စတာဟော် က အမိန့်ပေးနေတာပါ..”

လုယာက ယီနျိုနောက်မှ လိုက်ပါကာ ဆက်လက်တင်ပြလျက်ရှိသည်။

လုယာ၏စကားကို ကြားပြီးသည်နှင့် ယီနျို၏ ခေါင်းတစ်ခုလုံး ပေါက်ကွဲလုနီးနီးပင်။ ထို့နောက် ဒေါသတကြီး ဆိုလေသည်။

“သူ့လို အနီးကပ်အတွင်းဝန်က ဘာကိစ္စနဲ့ အမိန့်ပေးနေရတာလဲ... ခမည်တော်က သူနဲ့အတူ တပ်ဖွဲ့တစ်ခု မထည့်ပေးလိုက်ဘူးလား...”

လုယာသည်လည်း အဓိပ္ပါယ်မရှိဟု ခံစားမိပြီး ကူကယ်ရာမဲ့စွာဖြင့် ပြောလေသည်။

“ထည့်ပေးလိုက်ပါတယ်... ဒါပေမဲ့လည်း မစ္စတာဟော် က အရှင်မင်းကြီးရဲ့ အနီးကပ်လူ ဖြစ်ပြီးတော့ အခု တော်ဝင်ကိုယ်စားလှယ်အဖွဲ့ရဲ့ ခေါင်းဆောင်ပါ... ဒါကြောင့် သူ့မှာပိုပြီးတော့ အာဏာရှိပါတယ်... ကိုယ်စားလှယ်အဖွဲ့နဲ့ သက်ဆိုင်ရဲ့ အရေးကိစ္စမှန်သမျှက သူ့ရဲ့အမိန့်အောက်မှာပါ...”

ယီနျို : “…”

ဟုတ်ပါပြီ... ဒါကြီးက ရှေးဘုရင်တွေ စစ်တပ်ကို ကြီးကြပ်ဖို့ မိန်းမစိုးကို ရှေ့တန်းပို့တာနဲ့ ဘာမှကွာမနေပါဘူးနော်... စစ်သာမတိုက်ဖူးတယ် ဧကရာဇ်ကို ကိုယ်စားပြုတယ် ဆိုတာနဲ့ပဲ စစ်တပ်ထဲက လူတွေထက်တောင် ပိုပြီး အာဏာပါဝါ ပြနေလိုက်တာများ...

ယခုအခါတွင် ယွဲ့ကျန့်က ဧကရာဇ်မှ ရှေ့တန်းသို့ ကိုယ်စားလှယ်များ စေလွှတ်သည့် အခါတိုင်း၌ မုန်းတီးရသည့် အကြောင်းတရားကို နားလည်သွားပြီ ဖြစ်သည်။ ထိုသူများမှာ နေရာယူရုံသာ မကဘဲ စစ်ဘက်ရေးရာ ကိစ္စရပ်များကိုပင် ဝင်ရောက်စွက်ဖက်တတ်ကြသည်။

“ပြီးတော့ မစ္စတာဟော်က အကူအညီတောင်းဖို့အတွက် ဂလက်ဆီ ၈ ရဲ့ ပင်မကြယ်ကို ပြန်ဖို့ ဆုံးဖြတ်လိုက်ပါတယ်..”

လုယာ အသံခပ်နိမ့်နိမ့်ဖြင့် ဆက်လက်တင်ပြလေသည်။

ပင်မကြယ်ကို ပြန်မယ်ဟုတ်လား..

ပင်မကြယ်မှ ထွက်ခွာပြီး ၆ နာရီ အကြာမှာပင် တိုက်ခိုက်ခံရခြင်းဖြစ်သည်။ 

ငါတို့ရဲ့ ခရီးစဉ်အကြောင်း ဘယ်လိုသတင်းထွက်လာတာလဲ… ပြီးတော့ ဒီအမည်မသိ ယာဉ်စုက ဘယ်နေရာက ရောက်လာတာဖြစ်မလဲ…

ဖက်ဒရယ်စစ်တပ်ဟု ပြောဖို့ရန် မဖြစ်နိုင်ပေ။ ဖက်ဒရယ်စစ်တပ်မှာ ယခုအချိန်တွင် ဂလက်ဆီ ၈ ၏ အစွန်အဖျားရှိ ဂြိုဟ်ပတ်လမ်း၌ ပိတ်မိလျက်ရှိသည်။

ထို့ကြောင့် ရန်သူဘက်မှ သူလျှို သို့မဟုတ် စာအုပ်ထဲမှ သစ္စာဖောက် ယွဲ့ကျန့်သာ ဖြစ်ပေလိမ့်မည်။

သူ၏ သံသယမှာ မဖြစ်နိုင်ဟု ယီနျို ခံစားမိသည်။

ပထမဆုံး အနေဖြင့် စာအုပ်အတွင်းရှိ အရာများမှာ ယခုထိတိုင်အောင် အတည်မပြုရသေးပေ။ နောက်တစ်ချက်မှာ ယွဲ့ကျန့်ထံ၌ ထိုသို့ပြုလုပ်ရမည့်အကြောင်းတရား မရှိချေ။ စာအုပ်ထဲ၌ပင် သစ္စာဖောက် ယွဲ့ကျန့် ဖြစ်လာရခြင်းမှာ ‘သူ့’ ထံမှ နှစ်အနည်းငယ်ခန့် တွန်းအားပေးခံခဲ့ရသောကြောင့်ပင်။ 

အဟမ်း အဟမ်း...

ခေတ္တမျှ တွေးတောပြီးနောက် ယီနျို ဆုံးဖြတ်ချက်ချကာ လုယာအား တိုက်ရိုက်အမိန့်ပေးလိုက်သည်။

“ငါတို့လူတွေကို ခေါ်ပြီး မစ္စတာဟော်ကို ချုပ်ထား... ပြီးရင် ယာဉ်စုကို ထိန်းချုပ်ပြီး ရှေ့တန်းခံတပ်ကို အကူအညီတောင်းလိုက်...”

“ဟုတ်ကဲ့…”

လုယာ အလျင်စလို ပြန်ဖြေလိုက်သည်။ သူက လွန်ခဲ့သော အချိန်များကပင် ထိုသို့ပြုလုပ်ရန် မစောင့်နိုင်ပုံရသည်။

မစ္စတာဟော် အား ဖမ်းဆီးရန်မှာ မခက်ခဲလှပေ။ ဧကရာဇ်က ကိုယ်စားလှယ်အဖွဲ့အား စောင့်ရှောက်ရန် တပ်ဖွဲ့တစ်ဖွဲ့ တစ်ပါတည်း စေလွှတ်လိုက်သော်လည်း စစ်သားများမှာ မစ္စတာဟော်၏ မျက်ကန်းအမိန့်များအား လွန်စွာ စိတ်ပျက်နေကြပြီး ဖြစ်သည်။

မင်းသားလေး၏ လူများမှ မစ္စတာဟော်အား ဖမ်းဆီးလိုက်သည်ကို မြင်ပြီးနောက် အစောင့်တပ်ဖွဲ့မှာ ငြင်းဆန်ခြင်း မပြုချေ။ အဖွဲ့၏ ကပ္ပတိန်ဖြစ်သူ လော်ယွမ်ကျဲက ယီနျိုထံသို့လှည့်ကာ အခြေအနေအား တင်ပြရင်း အကြံပြုသည်။

“ကျွန်တော်တို့ ရှေ့တန်းခံတပ်ကို အကူအညီတောင်းသင့်တယ်လို့ ထင်ပါတယ် မင်းသားလေး... ပင်မကြယ်မှာ သူလျှို ရှိနေနိုင်တယ်...”

“အင်း...”

ယီနျို ခေါင်းညိတ်သည်။

ကပ္ပတိန်၏ အတွေးမှာ သူနှင့် လုယာတို့ စဉ်းစားထားသည်နှင့် တူပုံရသဖြင့် ယုံကြည်မှုရှိစွာ ဆိုလိုက်သည်။

“ဒီတိုက်ပွဲအတွက် မင်းနဲ့ လုယာကို အပြည့်အဝ တာဝန်ပေးလိုက်ပြီ...”

ယီနျို၏ စကားများအား ကြားသည့်အခါ လော်ယွမ်ကျဲ၏ မျက်လုံးများ အရောင်လက်လာပြီး စစ်တပ်ဟန်ဖြင့် အလေးပြုလေသည်။

“အမိန့်အတိုင်းပါ မင်းသားလေး...”

မစ္စတာဟော်ကဲ့သို့ မည်သည့်အရာကိုမျှ နားမလည်ဘဲနှင့် ပြဿနာသီးသန့်သာ ရှာတတ်သူအစား ဤကဲ့သို့သော အထက်အရာရှိကိုသာ လော်ယွမ်ကျဲ သ‌ဘောကျမိသည်။

နံဘေး၌ ချုပ်နှောင်ခံထားသော မစ္စတာဟော်က ထိုမြင်ကွင်းအား ကြည့်နေရင်း မျက်နှာတစ်ခုလုံး ဒေါသကြောင့် ပြာနှမ်းလာသည်။ သို့သော် မင်းသားလေးအား ဆန့်ကျင်စကား မဆိုဝံ့သည့်အတွက် လော်ယွမ်ကျဲကိုသာ ဒေါသတကြီး ပြောလေသည်။

“ဗိုလ်မှူးလော်... မင်းက အမိန့်တွေကို ချိုးဖောက်ပြီး အရှင်မင်းကြီးရဲ့ အစီအစဉ်တွေကို လျစ်လျူရှုနေတာပဲ... ငါက ဒီခရီးတစ်ခုလုံးရဲ့ တာဝန်ရှိသူဖြစ်သလို ကိုယ်စားလှယ်အဖွဲ့ရဲ့ ခေါင်းဆောင်ကွ...”

လော်ယွမ်ကျဲ ထိုသူအား ပါးစပ်ပိတ်သွားအောင် လုပ်ပစ်ချင်မိသည်။ ဧကရာဇ်၏ အနီးကပ်အတွင်းဝန် ဖြစ်၊ မဖြစ် ဆိုသည်ကိုပင် ဂရုပင်မစိုက်နိုင်တော့ချေ။ ထိုသူအား သူ၏ သည်းခံနိုင်မှု အတိုင်းအတာ ရောက်နေပြီ ဖြစ်သည်။

သို့သော် သူလှုပ်ရှားရန် မလိုအပ်ဘဲ လုယာက ယီနျို၏ မျက်စိရှေ့မှောက်၌ပင် မစ္စတာဟော်အား သေနတ်ဒင်ဖြင့် ထုနှက်လိုက်သဖြင့် မြေပြင်ပေါ်သို့ ပြုတ်ကျသွားလေသည်။

ယီနျိုက ကိုယ်ရံတော်၏ အမိန့်လိုက်နာနိုင်စွမ်းကြောင့် လွန်စွာကျေနပ်နေမိသည်။ မစ္စတာဟော်ထံသို့ ဖြည်းညင်းစွာ လျှောက်လှမ်းသွားပြီးနောက် သူ၏ စစ်ဖိနပ်များဖြင့် ထိုသူ၏ မျက်နှာအား ပင့်မလိုက်ကာ တည်ငြိမ်စွာဖြင့် ပြောလေသည်။

“ခင်ဗျားက လက်ထောက်တစ်ယောက်ပဲ... ကျုပ်ကမှ ခေါင်းဆောင်...”

ယီနျိုမှာ အမည်ခံ ခေါင်းဆောင်တစ်ဦးဖြစ်ပြီး ကိုယ်စားလှယ်အဖွဲ့၏ လာဘ်ကောင်နှင့် ပိုတူသည့်တိုင်အောင် အရေးမပါလှချေ။ ဧကရာဇ်၏အဝေးသို့ ရောက်နေခြင်းဖြစ်သဖြင့် သူ့အား မည်သူမှ မထိန်းချုပ်နိုင်ချေ။

မစ္စတာဟော်ကြောင့် ယခုထက်ပို နှောင့်နှေးစေမည်ဆိုပါလျှင် သူတို့အားလုံး အဆုံးသတ်သွားနိုင်သည်။

မစ္စတာဟော် မှာ ဧကရာဇ်၏ အနီးကပ်လူဖြစ်သည်။ သူက အပြင်ပန်းတွင် ယီနျိုအား လေးစားဟန်ရှိသော်လည်း နှလုံးသားထဲ၌မူ ဤမျက်နှာသာပေးခံရခြင်းမရှိသော မင်းသားလေးအား အရေးတယူ သတ်မှတ်မထားပေ။

ဤတစ်ကြိမ်တွင် မစ္စတာဟော် မှာ မြေပြင်ပေါ်၌ ဖိနှိပ်ခံထားရပြီး အရှက်ရနေမိသည်။ အပေါ်ယံ ရိုသေလေးစားမှုပင် မထားတော့ဘဲနှင့် တိုက်ရိုက်ခြိမ်းခြောက်လေသည်။

“မင်းသားလေး... အရှင်မင်းကြီး သိသွားမှာကို မကြောက်...”

ယီနျို ထိုသူအား ဆက်ပြောခွင့် မပေးချေ။

“မစ္စတာဟော်.. ပင်မကြယ်က တစ်ယောက်ယောက်က ကျုပ်တို့နေရာကို ထုတ်ဖော်လိုက်ပြီး ပင်မကြယ်ကို ပြန်ဆုတ်လာအောင် ရည်ရွယ်နေတယ်ဆိုတာ ခင်ဗျား သိရက်နဲ့... ခင်ဗျားက တော်ဝင်မိသားစုကို သူလျှိုလုပ်ပြီး ရန်သူနဲ့ ပူးပေါင်းထားတယ်လို့ ကျုပ်သံသယရှိတယ်...”

“ငါ...”

မစ္စတာဟော် ကြောင်အသွားပြီး မည်သို့ပြောရမည်ကိုပင် မသိတော့ချေ။ မင်းသားလေးက သူ၏ အပြစ်ကင်းစင်မှုအား စကားအနည်းငယ်မျှနှင့် ဆုတ်ဖြဲပစ်လိုက်သည်။

သို့သော် ယီနျိုက ထိုသူအား စကားပြောခွင့် အနည်းငယ်မျှပင် မပေးချေ။ ကျန်ကိုယ်စားလှယ်အဖွဲ့ဝင်များအား ခြိမ်းခြောက်အကြပ်ကိုင်ရန် မစ္စတာဟော်အား အသုံးပြုပြီးနောက် အပြင်သို့ ဆွဲခေါ်သွားစေသည်။

မစ္စတာဟော်အား ကိုင်တွယ်ပြီးနောက်၌ အဝတ်ဖုန်ခါလိုက်ပြီး နောက်သို့လှည့်ကာ မေးသည်။

“ရှေ့တန်းနဲ့ အဆက်အသွယ် ရပြီလား...”

ထိန်းချုပ်ခန်းမှာ တိတ်ဆိတ်လျက်ရှိပြီး မည်သူမျှ အသံတစ်သံ မပြုရဲကြချေ။

ယီနျို ထူးဆန်းစွာဖြင့် မော့ကြည့်လိုက်ချိန်၌ ထိန်းချုပ်ခန်းရှိ ဖန်သားပြင်မှာ ရှေ့တန်းဗျူဟာခန်းရှိ ဖန်သားပြင်နှင့် ချိတ်ဆက်လျက်သား ဖြစ်သည်ကို တွေ့လိုက်ရသည်။ ဖန်သားပြင်ထက်တွင် ဗိုလ်ချုပ်နှင့် ဗိုလ်မှူးကြီးများ မတ်တတ်ရပ်နေကြပြီး ထိုသူများ မည်သည့်အချိန်မှစကာ ကြည့်နေသည်ကို မသိခဲ့ချေ။

ယီနျို : “…”　　

အရမ်း... အရမ်းကို ရှက်ဖို့ကောင်းလိုက်တာနော်... ငါက အမြဲလိုလို အပြုအမူကောင်းလေးတွေနဲ့ ကြင်နာတတ်သူ တစ်ယောက်ပါနော်...

အခန်းတစ်ခုလုံး ခေတ္တမျှ တိတ်ဆိတ်သွားပြီး နှစ်စက္ကန့်မျှ ကြာပြီးနောက် ဗိုလ်ချုပ်တစ်ဦး၏အသံ ထွက်ပေါ်လာသည်။

“ဆက်ပြီး တောင့်ခံထားပေးပါ... စစ်ကူတွေ မကြာခင် ရောက်လာပါလိမ့်မယ်...”

ထိုသူ၏အသံမှာ တည်ငြိမ်ကာ အနည်းငယ် မထူးခြားဟန်ရှိသော်လည်း နား‌ထောင်ကောင်းလှသည်။

ယီနျို ထိုအသံအား မှတ်မိလေသည်။ ယင်းမှာ ယွဲ့ကျန့် ပင်။

သူ၏ အိပ်မက်ထဲမှ အသံနှင့် အနည်းငယ် ခြားနားသော်လည်း ဖော်ပြရန်မစွမ်းသာသည့် ရင်းနှီးကျွမ်းဝင်သော ခံစားချက်လည်း ပါဝင်နေလေသည်။

🧜🧜🧜