Chapter 7

🧜 အခန်း ၇ 

အလွန်ကျွမ်းကျင်သော ပညာရှင်

နောက်ဆုံးပွဲစဉ် ၂ ပွဲပြီးနောက် ကျုံးမင်က ရလဒ်အား တစ်ချက်ကြည့်ကာ စိတ်ထဲမှ လှောင်ပြောင်လိုက်သည်။

“စွမ်းဆောင်ရည်က အားလုံးအဆင်ပြေတယ်... ပြဿနာမရှိဘူး...”

ယီနျိုက ကျုံးမင်အား မကြည့်သော်လည်း သူ၏နောက်စေ့၌ မျက်လုံးပါသယောင်ပင်။

“ပုံမှန်ပဲ ဟုတ်လား... ခင်ဗျား ဒေတာတွေကိုကော ဖတ်ရဲ့လား...”

ကျုံးမင်က တစ်ညလုံးနီးပါး စိတ်ထိန်းထားရခြင်းဖြစ်ကာ ယီနျို၏ ဒွိဟဖြစ်စေသော စကားများအား ကြားပြီးနောက် ဒေါသများ ပေါက်ကွဲလုနီးနီးပင်။ သို့သော် ယီနျိုအနီး၌ ယွဲ့ကျန့်ရှိနေသည်ကို အမှတ်ရနေဆဲ ဖြစ်သောကြောင့် သူ့ဒေါသများအား ဖိနှိပ်လိုက်ရသည်။ ခေတ္တမျှကြာပြီးနောက် တည်ငြိမ်စွာဖြင့် မေးလိုက်သည်။

“မင်းသားလေး တစ်ခုခု မြင်ထားလို့လား...”

ယီနျိုက ဖန်သားပြင်ပေါ်မှ ဒေတာ နှစ်ကြောင်းအား ညွှန်ပြလိုက်သည်။

“ဒီမှာလေ... ဒီကွာဟမှုက အရမ်းကြီးနေတယ်...”

ယီနျို၏ စကားများအား ကြားချိန်တွင် ယွဲ့ကျန့် မျက်ခုံးပင့်လိုက်မိသည်။ မမျှော်လင့်စွာဖြင့် မင်းသားလေးမှာ အချက်အလက်များအား နားလည်နိုင်စွမ်းရှိသလို သူတို့နှစ်ဦး၏ အတွေးများမှာလည်း တူညီနေသည်။ မင်းသားလေးမှာ အတော်များများ လေ့လာထားပုံရသည်။

ဂါဗင်က တိတ်ဆိတ်လျက်ရှိပြီး လှပကာ အပြုအမူကောင်းများရှိသော မင်းသားလေး၌ သန်မာသည့်စိတ်ဓာတ်ရှိကြောင်း တွေးမိလိုက်သည်။

ထို့အပြင် ကျုံးမင်အား သင်ခန်းစာပေးမည့်သူ ရှိလာသည့်အတွက် ပျော်ရွှင်လာလေသည်။ သို့သော် ယီနျို ညွှန်ပြသည့် ဒေတာနှစ်ကြောင်းအား ကြည့်ပြီးနောက် အနည်းငယ် စိတ်ပျက်သွားမိသည်။

ဂဏန်းများမှာ အတော်လေး မတည်ငြိမ်သော်လည်း လက်ခံနိုင်သည့် အမှားအယွင်းပမာဏအတွင်း ရှိနေဆဲဖြစ်သည်။ အများဆုံးအနေဖြင့် ကောင်းမွန်သည်နှင့် ထူးချွန်သည်ဟူသည့် ကွဲပြားချက်သာ ဖြစ်နေပြီး ပုံမှန်မဟုတ်သည့်အရာ မရှိချေ။

မဟုတ်သေးဘူးလေ… ငါဘာလို့ စိတ်ပျက်လက်ပျက် ဖြစ်သွားရတာလဲ…

မက်ခါများ၌ ပြဿနာရှိမနေပါက သူ့အနေဖြင့် ဝမ်းသာသင့်သည်။

ကျုံးမင်က ထိုအရာအား စောစီးစွာ သတိပြုမိထားပြီးဖြစ်ကြောင်း ထင်ရှားသည်။

“မင်းသားလေး အနေနဲ့ နားမလည်ဘူးဆိုရင်လည်း ပိုပြီးတော့ လေ့လာသင့်ပါတယ်... ဒါက ပုံမှန်အမှားအယွင်း ပမာဏပါ...”

ယီနျိုက ကျုံးမင်အား လှည့်ကြည့်ပြီးနောက် နားမလည်နိုင်စွာဖြင့် မေးလိုက်သည်။

“ခင်ဗျားကြည့်ရတာ ကျွန်တော့်ကို အတော်လေး ရန်လိုနေပုံပဲ...”

ကျုံးမင် : “…” 

သူ သိသွားတာလား..

ယီနျို ကျုံးမင်အား ကြည့်လိုက်သည်။ သူ၏ လှပသည့် မျက်ဝန်းများ၌ သံသယအရိပ်အယောင်များ ထင်ဟပ်လာသည်။

ခေတ္တမျှ ကြာပြီးနောက် ရုတ်တရက်ပြောသည်။

“အာ... ကျွန်တော်သိပြီ... ဒီမက်ခါ နှစ်စီးက ကျုံးမိသားစု လက်အောက်ခံ ကုမ္ပဏီကနေ ထုတ်ထားတာပဲ... ကျွန်တော်က ခင်ဗျားတို့ မိသားစုကို ပစ်မှတ်ထားနေတယ်လို့ သံသယရှိနေတာလား...”

ကျုံးမင်မှာ ဒေါသတကြီး ပေါက်ကွဲလုမတတ်ပင်။

မင်းက နည်းပညာဌာနမှာလည်း လာရှုပ်နေသေးတယ်... အခု ငါ့ကိုပါ မေးခွန်းထုတ်နေသေးတာလား...

သို့သော် မင်းသားလေးမှာ ‘မသိလို့မေးတာနော်’ ဟူသည့် အမူအရာဖြင့် ရှိနေသည်။ ထိုအကြောင်းနှင့် ပတ်သက်၍ ဂရုစိုက်ကြောင်း ဖော်ပြလိုက်ပါက ကျုံးမင်မှာ တွက်ကပ်တတ်သူ ဖြစ်သွားလိမ့်မည်။

ကျုံးမင် အသက်ပြင်းပြင်းရှိုက်ပြီးနောက် ယီနျိုအား လျစ်လျူရှုရန် ဆုံးဖြတ်လိုက်သည်။ ထို့နောက် ယွဲ့ကျန့်အား တိုက်ရိုက်ပြောသည်။

“ဗိုလ်ချုပ်ယွဲ့... ထွေထွေထူးထူး ကိစ္စမရှိဘူးဆိုရင် နည်းပညာဌာနကလူတွေကို အရင်ဆုံးပြန်ခိုင်းလိုက်ပါမယ်... လူတိုင်း ညလုံးပေါက် အလုပ်များထားတယ် ဆိုတော့လေ...”

တစ်ညလုံး ပင်ပန်းလွန်းလို့ သေတော့မယ် သိလား...

ကျုံးမင် အံကြိတ်ကာ တွေးလိုက်သည်။

သို့သော် ယွဲ့ကျန့် မဖြေခင်မှာပင် ယီနျိုက ဖြတ်ပြောသည်။

“အားနာပေမဲ့ အခုတော့ ပြန်လို့မရသေးဘူး... နည်းပညာဌာနက လူတွေအနေနဲ့ နည်းနည်းပိုပြီး အလုပ်ကြိုးစားပေးဖို့ လိုပါလိမ့်မယ်...”

ထိုသို့ပြောပြီးနောက် ယွဲ့ကျန့်ထံသို့လှည့်ကာ အကြံပြုသည်။

“ဒီအောက်မှာရှိတဲ့ မက်ခါနှစ်စီးကို နှစ်ကြိမ်လောက် ထပ်တိုက်ခိုင်းလို့ရမလား...”

ကျုံးမင် စိတ်ထဲမှ သရော်လိုက်သည်။

ဗိုလ်ချုပ်ယွဲ့က သဘောတူမှာမဟုတ်ဘူး.. နည်းပညာဌာနက လူတွေကို ဂရုမစိုက်ဘူး ဆိုရင်တောင် သူ့မက်ခါစစ်သည်တွေကို ဂရုမစိုက်ဘဲ နေမှာတဲ့လား... ဟမ့်…

သို့သော် နောက်တစ်စက္ကန့်မှာပင် ယွဲ့ကျန့် ခေါင်းညိတ်ပြသည်ကို မြင်လိုက်ရသည်။ ထိုမက်ခါနှစ်စီးမှာ အမှန်တကယ်ကိုပင် တစ်ခုခု မှားယွင်းနေပုံပင်။

ကျုံးမင် : “…” 

ဒီအရူးမင်းသားရဲ့ အသိစိတ်မှာ ပြဿနာရှိနေတာလား...

သို့သော် ထိုအချိန်မှာပင် ကျုံးမင်၏အနောက်တွင်ရှိသော နည်းပညာရှင်လူငယ်တစ်ဦးမှာ တုန်ယင်စွာဖြင့် လက်မြှောက်လာပြီးနောက် ခပ်တိုးတိုးဆိုသည်။

“ခေါင်းဆောင်... ကျွန်တော်လည်း ဒီဒေတာတချို့မှာ ပြဿနာရှိတယ်လို့ ထင်ပါတယ်... အောက်က မက်ခါ နှစ်စီးတင် မကပါဘူး...”

ကျုံးမင်၏ ဒေါသမှာ ပျောက်ကွယ်မသွားသေးချေ။ နည်းပညာရှင်၏ စကားကို ကြားသည့်အခါ ချက်ချင်းပင် လှည့်မေးလိုက်သည်။

“မင်းနာမည်ဘာလဲ... ဘယ်အဖွဲ့ကလဲ... ဒါက မင်း စကားဝင်ပြောရမယ့်နေရာလား...”

လူငယ်က မျက်မှန်ပင့်တင်ပြီးနောက် ခပ်တိုးတိုးပြောလာသည်။

“စမ်းသပ်အုပ်စု ၂ က ဟူယိချန်း ပါ...”

“ဟူယိချန်း လား...”

ယီနျိုက ကျုံးမင်နှင့် လူငယ်အကြားရှိ စကားအား စိတ်ဝင်စားခြင်းမရှိသော်လည်း ထိုအမည်အား ဤနေရာတွင် ကြားရလိမ့်မည်ဟု မျှော်လင့်မထားသဖြင့် အံ့အားတကြီး လှည့်ကြည့်မိလိုက်သည်။

[ဟူယိချန်း ဆိုတာက အနာဂတ် အင်ပါယာရဲ့ အတော်ဆုံးမက်ခါပညာရှင် မလား... ယွဲ့ကျန့်ပြီးတော့ သူက ‘ငါ့’ ရဲ့ နောက်ထပ် သားကောင်ဖြစ်ခဲ့တာလေ...]

ယွဲ့ကျန့် : ???

ထီးနန်းရရှိရေးအတွက် အလှအပတစ်ခုတည်းသာ အားကိုးရာရှိသော အာဏာမဲ့မင်းသားတစ်ပါးအနေဖြင့် ‘ယီနျို’ က ငါးတစ်ကောင်တည်းကိုသာ မွေးမြူရန် မဖြစ်နိုင်ပေ။

ဥများအား ခြင်းထောင်းတစ်ခုတည်းထည့်ရန် မဖြစ်နိုင်ကြောင်း ‘ယီနျို’ နားလည်ထားသည်။ ‘သူ’ က ယွဲ့ကျန့်အား ဖြားယောင်းခဲ့သည့်အပြင် သူ့အရှေ့၌ ရှိနေသော အနာဂတ်၏ မက်ခါပညာရှင်၊ ပြည်သူ့ရေးရာဝန်ကြီး၊ ဝန်ကြီးချုပ်၊ သိပ္ပံအကယ်ဒမီကျောင်းအုပ် စသည့်သူများနှင့်လည်း ဒွိဟဖြစ်စေသော ပတ်သက်မှုများ ရှိခဲ့သည်။ 

ပြောရလျှင် ထိုသူအားလုံးမှာ အာဏာရှိသူများ ဖြစ်ကြသည်။ သို့မဟုတ်လျှင် ‘သူ့’ အနေဖြင့် ဆိုးဆိုးဝါးဝါး အဆုံးသတ်သွားရမည် မဟုတ်ပေ။

သို့သော် ‘သူ’ ဧကရာဇ် ဖြစ်လာသည့်တိုင်အောင် ယွဲ့ကျန့် တစ်ဦးတည်းနှင့်သာ အစစ်အမှန် ပတ်သက်မှုရှိခဲ့သည်။ အဓိကအချက်မှာ ယွဲ့ကျန့်မှာ လွန်စွာ ‘သန်မာ’ နေပြီးဖြစ်သောကြောင့် ‘သူ့’ အတွက် ခံနိုင်ရည်ရှိဖို့ရန်ပင် ခဲယင်းလှသည်။

ထို့အပြင် ယွဲ့ကျန့်က ‘သူ့’ အား တင်းတင်းကြပ်ကြပ် ထိန်းချုပ်ထားပြီး အခြားသူတစ်ဦး၏ အိပ်ရာပေါ်သို့တက်ရန် အခွင့်အရေးတစ်ခုတစ်လေပင် မပေးချေ။ ယွဲ့ကျန့်က ‘သူ’ အခြားသူတစ်ဦးဦးနှင့် ပတ်သက်နေခြင်းအား ဖမ်းမိချိန်တိုင်းတွင် ထူးဆန်းသော လိင်အသားပေးဇာတ်ကွက်တစ်ခု ရှိလာလိမ့်မည်။

ထို့ကြောင့် ‘သူ့’ အနေဖြင့် ငါးများစွာ မွေးမြူထားခဲ့သော်ငြား ထိုငါးများနှင့် ပတ်သက်ရန် အခွင့်အရေးများစွာ မရရှိခဲ့ပေ။ ဟူယိချန်းပါဝင်သော ဇာတ်ဝင်ခန်းများမှာ ပို၍ပင် နည်းပါးသည်။ အကြောင်းမှာ ဟူယိချန်းသည် ‘သူ့’ အား ရူးရူးမူးမူး ချစ်မြတ်နိုးသူဖြစ်သောကြောင့် ယွဲ့ကျန့်၏ ရှင်းလင်းခြင်း ခံလိုက်ရသည်။

[အဟမ်း... တော်သင့်ပြီ... ဒီအကြောင်းကို စဉ်းစားရမယ့်အချိန် မဟုတ်ဘူး... လက်ရှိအခြေအနေကို အာရုံစိုက်ရမယ်...]

ယီနျို အလျင်စလိုပင် အာရုံပြောင်းလိုက်ပြီး စာအုပ်၏ ဇာတ်ကြောင်းကို ပြန်တွေးနေခြင်းအား ကြိုးစားရပ်တန့်လိုက်သည်။

ယီနျို၏ နံဘေးတွင်ရှိနေသော ယွဲ့ကျန့်က ရုပ်တုတစ်ခုနှယ် လှုပ်ရှားမှုမရှိ မတ်မတ်ထိုင်နေသည်။

မင်းသားလေး၏ အတွေးများအား နားထောင်ပြီးနောက် အနည်းငယ် ဆိုးလွန်းသည်ဟု ခံစားမိသည်။ တစ်ဖက်လူမှာ ရူးနှမ်းနေခြင်းများလားဟု သူ သံသယဝင်လာသည်။

အိပ်ရာပေါ်ရှိ ကိစ္စများအား သူနှင့်အတူ စိတ်ကူးယဉ်ခြင်းမှာ ကိစ္စသိပ်မရှိလှပေ။ သို့သော် အဆိုပါကောင်ငယ်လေးက ဝန်ကြီးချုပ်အပြင် ပြည်သူ့ရေးရာဝန်ကြီးနှင့်ပါ အဆိုပါ ကိစ္စများအား တွေးတောရဲသည်။ 

မင်းသားလေး၏ ဦးခေါင်းအား လှုပ်ခါကာ မည်သည့်အရာများ တွေးနေပါလဲဟု မေးပစ်လိုက်ချင်သည်။

ပြည်သူ့ရေးရာဝန်ကြီးက ယခုနှစ်တွင် အသက် ၂၀၀ နီးပါးရှိပြီဖြစ်သည်။ မင်းသားလေး အဖိုး၏ အဖိုးအရွယ်ပင်။ ဝန်ကြီးချုပ်မှာမူ သူ့အနေဖြင့် မည်သည့်မှတ်ချက်မျှ မပြုလိုသော်လည်း ထိုသူမှာ အမှန်ပင်ဆိုးသည်။ အလျင်အမြန် အိုမင်းလာနေသော သိပ္ပံအကယ်ဒမီကျောင်းအုပ်လည်း ပါနေသေးသည်။ 

ဟူယိချန်းမှာမူ...

ယွဲ့ကျန့်က လူငယ်ပညာရှင်အား အမှုမဲ့ ကြည့်လိုက်သည်။

—

ထိုသူ၏ သွင်ပြင်မှာ သိမ်မွေ့ခံ့ညားသော်လည်း အနည်းငယ် ထုံထိုင်းပုံရသည်။ ဖြစ်နိုင်သည်မှာ ကြာမြင့်သော နည်းပညာအလုပ်နှင့် အနက်ရောင်ဘောင်ကွပ်ထားသော မျက်မှန်ကြောင့် ဖြစ်ရမည်။

ယွဲ့ကျန့်၏ စိတ်အခြေအနေမှာ လွန်စွာရှုပ်ထွေးလာသည်။ မင်းသားလေးရဲ့ စိတ်ထဲက အကြောင်းတွေကြောင့် အဲလူတွေနဲ့ပတ်သက်ပြီး သဝန်တိုနေမိတာများလား… မဟုတ်ဘူး... မင်းသားလေးက အဲလူတွေကို တကယ်ပဲ သဘောကျတာလား… 

ရှင်းပြ၍ မရနိုင်သည်မှာ မင်းသားလေး၏ စိတ်ကူးထဲမှ အကြောင်းအရာများသာ ဖြစ်သော်လည်း ထိုမြင်ကွင်းမှာ အရည်ရွှမ်းရွှမ်း ဂေါ်ဖီထုပ် ဖြူဖြူလေးအား ဝက်တစ်ကောင်မှ တူးယူစားသောက်သွားသည်နှင့် တူသည်ဟု မြင်ယောင်လာမိပြီး သူသည်လည်း ထိုဝက်များထဲမှ တစ်ကောင်ဖြစ်နေသည်။

ပြည်သူ့ရေးရာဝန်ကြီး၊ ဝန်ကြီးချုပ်နှင့် သိပ္ပံအကယ်ဒမီကျောင်းအုပ် တို့၏ရှေ့၌ ‘အနာဂတ်’ ဟူသည့် စကားလုံး ပါနေခြင်းအား ယွဲ့ကျန့် မသိလိုက်ပေ။ ယီနျိုက ဝေးကွာသည့် အင်ပါယာမြို့တော်တွင်ရှိသော လူများအကြောင်း ပြောခြင်းမရှိချေ။

အခြားတစ်ဖက်၌ ကျုံးမင်က လူငယ်ပညာရှင်၏ ဖြတ်ရိုက်ခြင်းခံရပြီးနောက် သိသိသာသာ မပျော်ရွှင်တော့ချေ။ ထို့အပြင် ထိုလူငယ်ပညာရှင်၏ ရှုထောင့်မှာ ယီနျိုနှင့် တူညီနေသောကြောင့် ပို၍ မသက်မသာဖြစ်လာစေသည်။

“ဒေတာတွေက ဘာမှားနေလို့လဲ...”

ကျုံးမင် မေးလိုက်သည်။

မင်းသားလေးအား မကိုင်တွယ်နိုင်သော်လည်း သူ့လက်အောက်ရှိ ဤလူငယ်အား မကိုင်တွယ်နိုင်ဟု မဆိုလိုပေ။

ကျုံးမင်၏ အမေးအား ကြားသည့်အခါ ယီနျို ဟူယိချန်းအား လှည့်ကြည့်လိုက်ပြီး မည်သို့ ပြန်ဖြေမည်ကို စောင့်မျှော်နေလေသည်။

စာအုပ်အတွင်းရှိ ဟူယိချန်းမှာ ကနဦး၌ မထင်မရှား ပညာရှင်တစ်ဦးသာဖြစ်သည်။ သို့သော် သူက ထက်မြက်ကာ ကျွမ်းကျင်မှုရှိသည်။ ဈေးကွက်တွင် ရရှိနိုင်သည့် မက်ခါထုတ်လုပ်မှုစာအုပ်များအား ဖတ်ရှုကာ ကိုယ်တိုင်လေ့လာသင်ယူခဲ့ခြင်းဖြစ်သည်။ ထို့နောက် ပိုမိုလေ့လာနိုင်ရန်အတွက် အင်ပါယာတော်ဝင်အကယ်ဒမီသို့ ဝင်ရောက်ကာ များမကြာမီ မိုးထိ‌အောင် မြင့်မားလာပေလိမ့်မည်။

စာအုပ်၏ အချိန်ကာလအရ ဟူယိချန်းမှာ ယခုအခါတွင် အလွန်စွမ်းအားကြီးသူ ဖြစ်နေပြီ ဖြစ်သော်လည်း ပြသရန် အခွင့်မသာခဲ့ပေ။

စာအုပ်ထဲတွင် ဖော်ပြထားသည့်အတိုင်း လက်တွေ့၌ အမှန်တကယ် ဖြစ်နေမည်လား ယီနျို သိချင်မိသည်။

ဟူယိချန်းက ကျုံးမင်၏ သိသာသည့် လေသံအား ဂရုမထားဘဲ ဖန်သားပြင်ရှိရာသို့ လျှောက်လာသည်။ ယီနျိုနှင့် ယွဲ့ကျန့်အား ဦးညွတ်ပြီးနောက် ဒေတာအား ညွှန်ပြကာ ရှင်းလင်းမှုပြုသည်။

“ဒီဒေတာနှစ်ကြောင်းရဲ့ အတက်အကျက လက်ခံနိုင်တဲ့ အမှားအယွင်း ပမာဏအတွင်းမှာပဲ ရှိပါတယ်... ဒါပေမဲ့ ပြီးခဲ့တဲ့ စမ်းသပ်မှု ဒေတာတွေနဲ့ နှိုင်းယှဉ်မယ်ဆိုရင်တော့ အတက်အကျ ပမာဏက သိသိသာသာ ကြီးမားနေတာကို တွေ့ရပါလိမ့်မယ်... ဖြစ်ပွားနှုန်းကလည်း မြင့်ပါတယ်...”

“ပြီးတော့ ဒီအခြေအနေမှာ ရှိနေတာ ဒီမက်ခါ နှစ်စီးတည်းတင် မဟုတ်ပါဘူး... ကျန်တဲ့ Z စီးရီး မက်ခါတွေအားလုံးရဲ့ စမ်းသပ်မှု ရလဒ်တွေကလည်း တူညီနေပါတယ်... ဒါပေမဲ့ ဒီနှစ်ခုလောက် သိသာတာမျိုးမရှိ...”

“အဲဒီတော့... ဒါက ဘာကိုဆိုလိုတာလဲ.. Z စီးရီး မက်ခါတွေမှာ ပြဿနာရှိနေတယ်လို့ မင်းပြောချင်တာလား...”

ကျုံးမင်က စိတ်မရှည်စွာဖြင့် ကြားဖြတ်ပြောသည်။

ဟူယိချန်း၏ ရှင်းလင်းချက်အား ပျော်ရွှင်စွာဖြင့် နားထောင်နေသူ ယီနျို : “…”

ဤလူမှာ အလွန်စိတ်အနှောင့်အယှက်ဖြစ်စရာပင်။ မည်သည်ကြောင့် ဂါဗင်က ကျုံးမင်နှင့် အတူတွဲဖက် လုပ်ကိုင်ရသည်မှာ ခက်ခဲသည်ဟုဆိုကြောင်း အနည်းငယ် နားလည်လာပြီဖြစ်သည်။

ယွဲ့ကျန့်သည်လည်း မျက်မှောင်ကြုတ်မိလိုက်သည်။

ဟူယိချန်းက ကျုံးမင်အား ဂရုမထားဘဲနှင့် ဆက်လက်တင်ပြသည်။

“အကောင်းဆုံးလုပ်ဆောင်ချက် ကျဆင်းမှုအရေအတွက်ကလည်း သိသိသာသာ တိုးလာပါတယ်... ဘယ်လိုပဲ လက်ခံနိုင်တဲ့ အတိုင်းအတာအတွင်း ရှိနေတယ်ပြောပြော ဒါက ပြဿနာတစ်ခုခု ရှိနေတယ်လို့ ပြနေပါတယ်...”

ဟူယိချန်း၏ ရှုထောင့်မှာ ယွဲ့ကျန့်နှင့် ယီနျိုတို့၏ ရှုထောင့်နှင့် တူညီသဖြင့် နှစ်ဦးစလုံး ခေါင်းအသာညိတ်လိုက်သည်။

ကျုံးမင်မှာမူ ပြဿနာအား မမြင်ချေ။ ဟူယိချန်း တမင်ပြဿနာရှာနေခြင်းဟုသာ ခံစားနေရသည်။

လက်ခံနိုင်သည့် အတိုင်းအတာအတွင်း ရှိသည်ဟူသော အဓိပ္ပါယ်မှာ အရည်အသွေးပြည့်ဝသည်ဟု ဆိုလိုခြင်းပင်။ ဘာလို့ ပြဿနာအများကြီး ရှိနေနိုင်မှာလဲ…

ရာသီဥတု ပြောင်းလဲလျှင်လည်း ဒေတာအတက်အကျများ ဖြစ်စေနိုင်သည်။ သို့သော် ကွဲပြားမှုမှာ လက်ခံနိုင်သည့် ပမာဏအတွင်း ရှိနေသရွေ့ မက်ခါများအား အသုံးပြုရာတွင် သက်ရောက်မှုရှိမည် မဟုတ်ပေ။

“ဒါက မောင်းနှင်သူတွေရဲ့ အခြေအနေကြောင့်လေ... စစ်သည်တွေက မက်ခါကို အချိန်အကြာကြီး မောင်းနှင်နေရတော့ ပင်ပန်းနေကြပြီ...”

ကျုံးမင်က စိတ်ကူးတည့်ရာစကားများ ပြောတော့သည်။

“ဒီကွာဟမှု သေးသေးလေးက ပြဿနာရှိတယ်လို့ မဆိုလိုဘူး...”

ဟူယိချန်း ပြောလိုသည့်တိုင် ကျုံးမင်မှ စကားပြောခွင့်ပင် မပေးဘဲ မေးခွန်းထုတ်လေသည်။

“ဒါမှမဟုတ် မက်ခါရဲ့ အမှားအယွင်းကို မင်းရှာတွေ့ပြီးပြီလား...”

ဟူယိချန်း တစ်စုံတစ်ခု ပြောလိုဟန်ဖြင့် နှုတ်ခမ်းလှုပ်သွားသော်လည်း အဆုံးတွင် ခပ်တိုးတိုးသာ ဆိုလာသည်။

“မတွေ့သေးပါဘူး...”

ပြဿနာတစ်ခုခုရှိမှန်း သိနေသော်လည်း မည်သည့်နေရာ၌ ပြဿနာနေသည်ကိုမူ မသိသေးချေ။

ယီနျိုမှာ သူ၏ ရည်ရွယ်ချက် အောင်မြင်တော့မည်ကို မြင်သဖြင့် ရုတ်တရက် ယွဲ့ကျန့်ထံသို့လှည့်ကာ ပြောသည်။

“နောက်တစ်ကြိမ် စစ်ဆေးမှုမှာ မစ္စတာဟူ ကို တာဝန်ယူစေချင်တယ် ရမလား...”

ဟူယိချန်း၏ စွမ်းဆောင်ရည်အား အတည်ပြုပြီးဖြစ်သောကြောင့် ကျုံးမင်ပြောသမျှအား နားထောင်ရန် မလိုအပ်တော့ပေ။ 

ယီနျို၏ စကားအား ကြားသည့်အခါ ဟူယိချန်း၏မျက်လုံးများ အနည်းငယ် ပွင့်လာသည်။ သူ၏ မျက်လုံးထဲ၌ အံ့အားသင့်မှုနှင့် မျှော်လင့်ခြင်းများ ပြည့်နှက်နေပြီး အစစ်အမှန် မဟုတ်ဟုပင် ခံစားမိသည်။ ခေတ္တမျှ တုံ့ဆိုင်းပြီးနောက် ယီနျိုအား ခိုးကြည့်လိုက်သည်။

ယွဲ့ကျန့် : “…”

ကျုံးမင်၏ တုံ့ပြန်မှုမှာ ပို၍ပင် ကြီးမားသည်။ မင်းသားလေးက သူ့နေရာ၌ ဤမထင်ရှားသည့် ပညာရှင်နှင့် အစားထိုးလိမ့်မည်ဟု သူ မယုံကြည်နိုင်ပေ။ တစ်ဖက်လူ ဆော့ကစားနေခြင်းအား အဖော်ပြုပေးလိုစိတ် မရှိသော်ငြား... သူက…

ဘာလို့ မင်းသားလေးရဲ့ စကားတွေကို နာခံရမှာလဲ… မင်းသားလေးမှာက ဘာအရည်အချင်းတွေ ရှိနေလို့လဲ…

ဤနေရာမှာ ရှေ့တန်းဖြစ်သည်။ မျက်နှာသာပေးမခံရသော မင်းသားတစ်ပါးအနေဖြင့် ဆုံးဖြတ်ချက်ချနိုင်မည့်နေရာ မဟုတ်ချေ။

သို့သော် ကျုံးမင် မည်သည့်စကားမျှ မဆိုနိုင်ခင်မှာပင် ယွဲ့ကျန့်၏ အသံအား ကြားလိုက်ရသည်။

“ကောင်းပြီ...”

ကျုံးမင် : “…”

အဓိပ္ပါယ်မဲ့လွန်းသောကြောင့် ပြန်လည်ကာ ငြင်းခုန်ချင်မိသည်။

ရုတ်တရက်ဆိုသလို ယွဲ့ကျန့် သူ့ထံသို့ လှည့်ကာ အမူအရာမဲ့စွာဖြင့် ကြည့်လာသည်။

“ခေါင်းဆောင်ကျုံးက ပင်ပန်းနေပြီလို့ ပြောခဲ့တယ် မလား... ဆိုတော့ ပြန်နားလို့ ရပါပြီ...”

ထိုအချိန်တွင် ယွဲ့ကျန့်က သူ့အား ထာဝရ အနားပေးတော့မည်ဟု ကျုံးမင် မြင်ယောင်လာမိသည်။

ဤတစ်ကြိမ်တွင် ယီနျိုက ကျုံးမင်အား ဓားဖြင့်ထိုးလိုက်နိုင်သည်။ သူက ရိုးရှင်းသော အမူအရာ၊ ရိုးသားသော လေသံဖြင့်ပင် ပြောလိုက်သေးသည်။

“ဟုတ်ပါတယ် မစ္စတာကျုံး... မေးခွန်းထုတ်ရမယ့် မက်ခါတွေ အားလုံးက Z စီးရီးတွေပဲ ဖြစ်နေတာလေ... အဲဒါက ခင်ဗျားတို့ မိသားစုက ထုတ်တာမလား... ဆိုတော့ ခင်ဗျား ဒီမှာရှိနေရင်လည်း သိပ်ကောင်းမှာ မဟုတ်ဘူး...”

ယီနျို : ခုဏလေးတင် ငါ့ကို ထေ့သလို ငေါ့သလို ပြောထားတာမလား... ဟမ့် ငါ့အလှည့်ပဲ...

ကျုံးမင် : “…” 

ဘာကိစ္စနဲ့ အဲဒီအကြောင်းကို အစဖော်ရတာတုန်း...

ကျုံးမင် လက်သီးကျစ်ကျစ်ပါအောင် ဆုပ်ကာ တစ်ချိန်တည်းမှာပင် လွန်စွာရှက်ရွံ့နေမိသည်။ သူက နည်းပညာဌာန၏ ဂုဏ်သိက္ခာရှိသော ခေါင်းဆောင်တစ်ဦးဖြစ်သော်လည်း လူသစ်လေးနှစ်ဦး၏ ပြက်ရယ်ပြုခြင်း ခံလိုက်ရသည်။ ထိုသူနှစ်ဦးအား ဗိုလ်ချုပ်ယွဲ့မှ ထောက်ပံ့ပေးထားသည်။

ကန်းသွားတာများလား...

ဂါဗင်က ကျုံးမင်၏ ရှက်ရွံ့မှုအား သတိပြုမိသည်။ ထို့ကြောင့် သူ့ကိုယ်သူ ချုပ်ထိန်းကာ ကျုံးမင်အား ဖျောင်းဖျပြောဆိုသည်။

“အင်ဂျင်နီယာကျုံး... ခင်ဗျား အရင်ဆုံး ပြန်သွားသင့်တယ်... ဒီညကတော့ အလုပ်များမှာ အသေအချာပဲ...” 

ကျုံးမင်မှာ အထက်စီးဆန်ကာ မောက်မာပြီး စကားပြောဆိုရန် ခက်ခဲသည်ဟု ညည်းညူခဲ့သော်ငြား သူတို့နှစ်ဦး၌ ပုဂ္ဂိုလ်ရေး မကျေနပ်မှု မရှိပေ။ ထူးချွန်သည့် လူများ၌ မာန်မာနအချို့ရှိသည်မှာ ပုံမှန်ပင်ဖြစ်သည်ဟု ဆိုရမည်။

ကံမကောင်းစွာဖြင့် ကျုံးမင်က ဂါဗင်၏ ကြင်နာမှုအား လက်မခံချေ။ ခေတ္တမျှ တိတ်ဆိတ်နေပြီးနောက် သရော်ပြုံးပြုံးကာ ထွက်ခွာသွားသည်။

ဂါဗင် : “…” 

နောက်တစ်ခါ လျှာရှည်မိရင် ကိုယ့်ပါးကိုယ် ရိုက်ပစ်လိုက်မယ်... ဟုတ်ပြီလား...

ယီနျိုက လျင်မြန်စွာ ပြောသည်။

“ကောင်းပြီ... မြန်မြန်လေး စမ်းသပ်မှု ဆက်ကြမယ်...”

ယွဲ့ကျန့်က ကျုံးမင်၏ နောက်ကျောအား ကြည့်နေခြင်းမှ ရပ်လိုက်သည်။ အေးစက်ကာ အမှုမထားဟန် အမူအရာမှာလည်း ပြေလျော့သွားပြီးနောက် ခေါင်းညိတ်လိုက်ကာ ဂါဗင်အား အမိန့်ပေးလေသည်။

“စမယ်...”

ချက်ချင်းဆိုသလို ကျုံးမင်၏ ခြေလှမ်းများ ရပ်တန့်သွားသည်။ ခေတ္တမျှကြာပြီးနောက် ပိုမိုမြန်ဆန်စွာ ထွက်ခွာသွားလေသည်။

🧜🧜🧜