MM Story Teller

အပိုင်း (၂)

Viewers 85

"လောင်လိန် ကျွန်တော့်မှာ ပိုက်ဆံရှိဦးမယ်လို့ ခင်ဗျား ထင်လား။" ချွီးဟယ်ချင်းက တခဏမျှ စဥ်းစားပြီး ပြောလိုက်သည်။

"ပိုက်ဆံလား။" လိန်ဖန်းဖန်း၏ မျက်နှာက စက်ဆုပ်ရွံရှာမှုအပြည့် ဖြစ်သည်။ "မင်းရဲ့ ပိုက်ဆံအားလုံးကို အမြဲ သုံးပစ်နေတာ။ ဒါပေမယ့် ချင်ဖန့်ထျန်းက မင်းကို တစ်ချက်လေးတောင် လှည့်ကြည့်တာ မမြင်မိဘူး။"

လိန်ဖန်းဖန်းက ချွီးဟယ်ချင်း၏ ရမ်းကားသော အပြုအမူတို့ကို အမှန်တကယ် မကြိုက်သော်လည်း သူတို့ကို ခက်ခဲအောင် ပြုလုပ်နေသည် ချင်ဖန့်ထျန်းကို ပို၍ပင် အမြင်မကြည်လှပေ။

သူ့တွင် အနုပညာရှင်ဟူ၍ ချွီးဟယ်ချင်း တစ်ယောက်တည်းသာ ရှိသည်။ အကယ်၍ ချွီးဟယ်ချင်း အနားယူသွားလျှင် သူက ငတ်၍ သေရမည်လား။

သူ အလွန် ဒေါသထွက်နေသည်ကို မြင်ပြီး ချွီးဟယ်ချင်းက ရေတစ်ခွက် လောင်းထည့်ပေးလိုက်သည်။

"ဒေါသမထွက်ပါနဲ့။ ကျန်းမာရေးအတွက် မကောင်းဘူး။ လာ... စိတ်အေးသွားအောင် ရေအေးအေးလေးတစ်ခွက်လောက် သောက်လိုက်ပါဦး။ ပြဿနာတစ်ခုခုရှိရင် ကျွန်တော်တို့ အတူတူ အဖြေရှာကြတာပေါ့။"

မူလပိုင်ရှင်တွင် မကောင်းသည့် သူငယ်ချင်းများစွာ ဝန်းရံနေပြီး ဤ သိပ်မရင်းနှီးလှသော အေးဂျင့်သည်သာ လူကောင်းတစ်ယောက် ဖြစ်သည်။ သူက ဤကဲ့သို့ အေးဂျင့်ရှိနေသည့်အတွက် စိတ်သက်သာရာ ရမိသည်။

သူက ဇာတ်ညွှန်းရေးဆရာအဖြစ်မှ အေးဂျင့်အဖြစ်သို့ အလုပ်ပြောင်းလဲလိုက်ကတည်းက ကြီးမားသော ဖိအားအောက် ကျရောက်ခဲ့ရပြီး ယခု ချွီးဟယ်ချင်း၏ စကားက သူ့ငယ်ထိပ်သို့ သံရိုက်လိုက်သကဲ့သို့ပင်။

ကျန်းမာရေးက အရေးကြီးသည်မှာ အမှန်သာ ဖြစ်သည်။ လူသာ ကျန်းမာနေလျှင် ဖြေရှင်း၍ မရသည့် ပြဿနာ ဘယ်အရာရှိမည်နည်း။

"အိုး.. မင်း အရင်ကတည်းက နာခံတတ်ပြီး လိမ္မာရင် အရမ်းကောင်းမှာပဲ။" လိန်ဖန်းဖန်းက သက်ပြင်းချလိုက်သည်။

နေမကောင်းနေသောကြောင့် ဖြစ်မည်ထင်။ ချွီးဟယ်ချင်းက အရင်ကထက် ပို၍ မျက်စိပသာဒရှိလာပြီး ပြောလိုက်သည့် စကားကလည်း အရင်ကထက် ပိုနားဝင်ချိုသည်ဟု ခံစားရပေသည်။

လိန်ဖန်းဖန်းက ပြောလိုက်သည်။ "မင်းသာ အရင်ကတည်းက ဉာဏ်ကောင်းမယ်ဆိုရင် မင်းနာမည်တစ်လုံးရအောင် လုပ်နိုင်နေလောက်ပြီ။"

ချွီးဟယ်ချင်း၏ မျက်နှာအရည်အသွေးက အနုပညာလောကထဲမှာပင် ပြိုင်စံရှားပေသည်။ ကုမ္ပဏီက သူနှင့် လက်မှတ်ထိုးစဥ်တွင် သူက ကျော်ကြားလာလိမ့်မည်ဟု တွေးခဲ့သော်လည်း နောက်ပိုင်း၌ သူက ပိုပို၍ ဆိုးရွားလာလိမ့်မည်ဟု မည်သူက သိပါမည်နည်း။

လိန်ဖန်းဖန်းက စိတ်မကောင်းစွာ ကြည့်နေသော်လည်း ချွီးဟယ်ချင်းက သူ့ကိုယ်သူ ယုံကြည်ချက် ပိုရှိပေသည်။

"စိတ်မပူပါနဲ့ လောင်လိန်။ ကောင်းတဲ့အရာတွေရဖို့ အချိန်ယူရတယ်။ ကျွန်တော့်ကို ကြည့်။ ကျန်းမာရေးက အကောင်းကြီးပဲ။ အနှေးနဲ့အမြန် နာမည်ကြီးလာစေရမယ်။ အချိန်ကျလာရင် ခင်ဗျား ဘာအရသာရှိတဲ့ အစားအသောက်တွေ စားချင်သောက်ချင်လဲ ခင်ဗျားအတွက် အကုန် ဝယ်ပေးမယ်။"

သူသည် ယခင်ဘဝက လက်ဗလာနှင့်ပင် အနုပညာလောက၌ နာမည်ကျော်လာအောင် လုပ်ဆောင်နိုင်ခဲ့သည်။ ယခုဘဝ၌ မလုပ်နိုင်စရာ မည်သည့်အကြောင်း ရှိပါသနည်း။

လိန်ဖန်းဖန်းက စိတ်ခံစားချက်မကောင်း ဖြစ်နေသော်လည်း ချွီးဟယ်ချင်းက ရုတ်တရက် ထိုသို့ ပြောလာမည်ဟု ထင်မထားခဲ့ပေ။ သူက တံတွေးသီးကာ ချောင်းဆိုးမိတော့မလိုပင် ဖြစ်သွားသည်။

"အဟွတ်... အဟွတ်....! မင်းရဲ့ ကျန်းမာရေးအကြောင်း ဘာလို့ပြောတာလဲ။ ကျန်းမာရေးက ဘာအသုံးဝင်လို့လဲ။ တခြားလူတွေထက် တာရှည်ခံလို့လား။"

"လောင်လိန် ခင်ဗျား နားမလည်ပါဘူး။ ကျွန်တော်က တကယ်တော့ အရမ်းတော်တဲ့ သရုပ်ဆောင်လေ။" ချွီးဟယ်ချင်းက ပြောလိုက်သည်။

"ဟီးဟီး" လိန်ဖန်းဖန်းက ထိုစကားကို မယုံကြည်ပေ။ "မင်းရဲ့ သရုပ်ဆောင်စွမ်းရည်ကိုသာ ကောင်းတယ်လို့ ပြောရင် ငါက ရွှေတံဆိပ်ဆုရှင် ဇာတ်ညွှန်းရေးဆရာ အရင်ကတည်းက ဖြစ်နေလောက်ပြီ။"

သူ့ကို လာကြွားနေတာလား။ ချွီးဟယ်ချင်းက တကယ်ပဲ သူ့ကို လှိမ့်လို့ရမယ် ထင်နေတာလား။

"ဟမ့်!" ချွီးဟယ်ချင်းက စကားထပ်မပြောတော့ပေ။

အရင်ဘဝက သူ၏ သရုပ်ဆောင်စွမ်းရည်မှာ ထင်ရှားကျော်ကြားသော ဒါရိုက်တာများထံမှပင် ချီးမွမ်းခံရဖူးသည်။ သူသာ မတော်တဆမှုကြောင့် ဒုက္ခိတ ဖြစ်မသွားပါလျှင် သူ့အိပ်မက်ပန်းတိုင်ကို အရင်ကတည်းက အရောက်လှမ်းနိုင်ပြီးသား ဖြစ်ပေလိမ့်မည်။

သူက စိတ်ဆိုးဟန်ဖြင့် တစ်ဖက်သို့ ခေါင်းလှည့်သွားသည်ကို မြင်သည့်အခါ လိန်ဖန်းဖန်းက ရယ်မောလိုက်သည်။

သူက ယနေ့တွင် ဆေးရုံသို့ လာခဲ့သော်လည်း စိတ်အခြေအနေက မကောင်းလှပေ။ သို့သော် ချွီးဟယ်ချင်းနှင့် တွေ့ပြီးနောက် မထင်မှတ်ဘဲ သူ့ စိတ်ခံစားချက်က ပိုမိုကောင်းမွန်လာပေသည်။

"ဟုတ်ပါပြီ။ မင်း လုပ်နိုင်မယ်လို့ ငါ ယုံပါတယ်။" လိန်ဖန်းဖန်းက ချော့မော့လိုက်သည်။

သူက ထင်ယောင်ထင်မှား ဖြစ်နေသလားတော့ မသိပေမယ့် ချွီးဟယ်ချင်း ထိုကလေးက ပို၍ နှစ်သက်ဖွယ် ကောင်းလာသလို ခံစားရပြီး သူက အမှန်တကယ် နာမည်ကျော်ကြားလာအောင် လုပ်ဆောင်နိုင်တာလည်း ဖြစ်နိုင်ပေသည်။

**********

လိန်ဖန်းဖန်း ပြန်သွားပြီးနောက် ချွီးဟယ်ချင်းက သန့်စင်ခန်းသို့ သွားကာ သူ့ကိုယ်သူ ထပ်ကြည့်လိုက်သည်။

သူသည် အရင်ဘဝကတည်းက ရုပ်ရည်ချောမောကြောင်း သိရှိထားသည်။ သို့မဟုတ်လျှင် ဖြတ်လျှောက်ဇာတ်ကောင် အုပ်စုထဲမှ သူ့ကို ဒါရိုက်တာက ရွေးချယ်လိုက်လိမ့်မည် မဟုတ်ပေ။

သို့သော် ယခုတွင် သူ့အသက်က ၂၁ နှစ်သာ ရှိသေး၍ ဖြစ်နိုင်ပြီး မျက်နှာလေးက ကြည့်ရ လုံးဝန်းကာ ပါးပြင်၌ ကလေးအဆီလေးများ ကျန်နေသေးသည်။

သူ့ကို ကြည့်ရတာ မဝသော်လည်း အနည်းငယ် ပို၍ ချစ်စရာကောင်းပြီး သူ၏ အရင်ဘဝထက် ကောင်းချီး အနည်းငယ် ပိုရထားပုံရသည်။

ထို့ပြင် သူ၏ ကျန်းမာသော ခြေထောက်များမှာ ကျစ်လျစ်သော ကြွက်သားများရှိကာ ရှည်လျားသန်မာပြီး မည်သည့် နာကျင်မှုမှ မခံစားဖူးသလို အလွန် ပြီးပြည့်စုံနေပေသည်။

အိပ်ရာပေါ်တွင် ပြန်လှဲပြီးနောက် ချွီးဟယ်ချင်းက ဖုန်းကို ယူကာ ဟိုဟိုဒီဒီ ရှာဖွေကြည့်လိုက်ပြီး မူလပိုင်ရှင်မှာ အမှန်တကယ်ပင် အနုပညာလောကအတွင်း၌ မည်သူမှ မဟုတ်ကြောင်း သိလိုက်ရသည်။

သူ၏ ဤတစ်ကြိမ် ဆေးရုံတင်လိုက်ရခြင်းကို မည်သူမှ ဂရုမစိုက်ဘဲ သူ့ ဝေးပေါ်အကောင့်တွင် ရှိသည့် ဖန်ကလည်း ဒါဇင်လောက်သာ ဖြစ်သည်။ အခြားသော follower တစ်သိန်းလောက်မှာ သူ့အကောင့်၏ ရှက်ဖွယ်လိလိ ဆိုးရွားသော အခြေအနေကြောင့် ကုမ္ပဏီမှ ဝယ်ယူပေးထားသော အကောင့်သေများ ဖြစ်လေသည်။

သို့သော် သူ၏ ကြည့်ကောင်းလှသော အသွင်အပြင်ကြောင့် မူလပိုင်ရှင်မှာ အနုပညာလောကအတွင်း၌ အမှန်တကယ် လူမသိသူမသိ ဖြစ်နေခြင်းတော့ မဟုတ်ပေ။

သူသည် ယခင်က ကုန်ကျစရိတ် နည်းပါးသော တီဗွီစီးရီးအချို့တွင် သရုပ်ဆောင်ခဲ့ဖူးပြီး ၎င်းတို့အားလုံးက စတုတ္ထနေရာမှ မင်းသား၊ ပဥ္စမနေရာမှ မင်းသားကဲ့သို့ သေးငယ်သည့် အရန်လေးသာ ဖြစ်ကာ ရိုက်ကွက်နည်းသော်လည်း သူ့မျက်နှာကို သဘောကျသည့် ဖန်အနည်းငယ်ကို ဆွဲဆောင်နိုင်ဆဲ ဖြစ်သည်။

ကုမ္ပဏီက ၎င်းကို ရှာတွေ့ပြီးနောက် ချက်ချင်းပင် မူလပိုင်ရှင်ကို တီဗွီစီးရီးတစ်ခု၌ ဒုတိယမင်းသားနေရာမှ သရုပ်ဆောင်စေသည်။

အမှန်တွင် ၎င်းက မူလပိုင်ရှင်ကို ကျော်ကြားလာစေကာ တတိယတန်း သရုပ်ဆောင်အဖြစ်သို့ မြင့်တက်သွားစေနိုင်သော်လည်း မူလပိုင်ရှင်က ကောင်းကောင်းမွန်မွန် သရုပ်မဆောင်နိုင်သည်ကို မည်သူက သိပါမည်နည်း။

ထိုဇာတ်ကောင်အတွက် သူ၏ သရုပ်ဆောင်စွမ်းရည်က လိုက်မမီနိုင်ဘဲ ရှိခဲ့သည်။ သူ ယခင်က အသေးအမွှား အရန်ဇာတ်ကောင်များကို သရုပ်ဆောင်စဥ်က သိပ်မသိသာသော်လည်း ဒုတိယမင်းသာနေရာကို သရုပ်ဆောင်ရသည့်အခါ သူ၏ စွမ်းရည်မပြည့်ဝမှုက ထင်းနေအောင် ပေါ်ထွက်လာတော့သည်။

ထို့နောက်တွင် မူလပိုင်ရှင်က နာမည်ကျော်ကြားရန် ကျရှုံးသွားရုံကမျှမက ထိုဇာတ်လမ်းအတွင်းမှ အမျိုးသားဇာတ်လိုက်နှင့် အမျိုးသမီးဇာတ်လိုက်တို့၏ သရုပ်ဆောင်စွမ်းရည်ကလည်း ဆိုးရွားပေမယ့် မူလပိုင်ရှင်သည် သူ့ကြောင့်ဟု နာမည်တပ်ခံရကာ ထိုခေါင်းဆောင်မင်းသားမင်းသမီးတို့၏ ဖန်များက မူလပိုင်ရှင်ကို ဆူပူကြိမ်းမောင်းခဲ့ကြသည်။

ထိုအတင်းသတင်းများကို ဖတ်ပြီးနောက် ချွီးဟယ်ချင်းသည် ပို၍ အရေးကြီးသော ပြဿနာဖြစ်သည့် ပိုက်ဆံကိစ္စကို တွေးလိုက်မိသည်။

သူက တွက်ကပ်တတ်သည့် ကပ်စေးနဲတစ်ယောက် မဟုတ်သော်လည်း သူ့တွင် အကြွေးများစွာ ရှိနေလေရာ သူက စျေးကြီးသော ရပ်ကွက်အတွင်းမှ အိမ်ကို မငှားသင့်ပေ။ ဇိမ်ခံပစ္စည်း အသုံးအဆောင်များက မည်မျှ လှပနေပါစေ ၎င်းတို့ကို စား၍ မရနိုင်ချေ။ ၎င်းတို့ကို ငွေသားဖြင့် လဲလှယ်၍ ရလျှင် မြန်မြန်ဆန်ဆန် လဲလှယ်လိုက်သင့်သည်။

ဤအကြောင်းပြချက်ကြောင့် သူက ဝီချက်မက်ဆေ့ချ် တသီတတန်းကြီး ပို့လိုက်တော့သည်။

[လောင်လိန် ကျွန်တော့်ကို ကူညီပါဦး။ ကျွန်တော် မီးဖိုချောင်နဲ့ ရေချိုးခန်းပါတဲ့ စျေးပေါပေါ အိမ်တစ်လုံးလောက် လိုချင်တယ်။]

[သွားရေးလာရေး အဆင်ပြေတဲ့နေရာဆိုရင် ပိုကောင်းတယ်။]

[တစ်လကို နှစ်ထောင်အောက်ပဲ ပေးရတဲ့နေရာမျိုးဆိုရင်တော့ ပိုကောင်းတာပေါ့။]

[ကျွန်တော် အဲဒီလို နေရာမျိုးကို ရှာမတွေ့ဘူးဆိုရင် ခင်ဗျားနဲ့အတူတူ လာနေလို့ရလား လောင်လိန်။ (ကြယ်တွေပြည့်နေသော မျက်ဝန်း.jpg)]

တခဏကြာပြီးနောက် လိန်ဖန်းဖန်းထံမှ လိုရင်းတိုရှင်းရေးထားသော ဝီချက်မက်ဆေ့ချ်တစ်စောင် ဝင်လာသည်။ [ထွက်သွားစမ်း!]

ချွီးဟယ်ချင်းက ယခင်ကလောက် အသုံးမကျသည့်ပုံမပေါ်တော့သော်လည်း ပိုပိုပြီး အရေထူလာသလို ဘာလို့ ခံစားနေရတာလဲ။

ထားလိုက်ပါတော့။ ဒီကောင်လေး တုံးတုံးအအနဲ့ အသုံးမဝင်တာတွေ လျှောက်လုပ်မနေသရွေ့ သင့်တော်တဲ့ အိမ်တစ်လုံးလောက်ရှိမလား ရှာပေးကြည့်လိုက်ပါမယ်လေ။

**********

Prev Next