MM Story Teller

အပိုင်း (၄)

Viewers 83

ချွီးဟယ်ချင်းသည် ထိုသူက စိတ်ပိုင်းဆိုင်ရာ ထိခိုက်မှုမျိုး ခံစားနေရမည်ကို စိုးရိမ်သောကြောင့် သူ၏ ယခင်ဘဝမှ အတွေ့အကြုံကို ကိုးကား၍ ထိုသူ၏ ပခုံးကို ခပ်ဖွဖွ ပုတ်ကာ ထပ်မံ နှစ်သိမ့်လိုက်သည်။

ထိုအမျိုးသားက အနည်းငယ် ခုခံလိုစိတ်ရှိနေသည်ကို ခံစားရသောကြောင့် ချွီးဟယ်ချင်းက အမြန် ပြုံးပြလိုက်ပြီး အားပေးလိုက်၏။ "မကြောက်ပါနဲ့။ ကျွန်တော် သူ့ကို ဘယ်လို ကိုင်တွယ်မလဲ ခဏလောက် စောင့်ကြည့်နေလိုက်။"

ဝတ်စုံပြည့်နှင့်လူက ချွီးဟယ်ချင်း၏ စကားကို ကြားသည့်အခါ ချက်ချင်းပင် သူ့ဘေးနားမှ ချုံပုတ်ကို ကန်လိုက်သည်။

သူက ချွီးဟယ်ချင်းကို လက်ညှိုးထိုးရင်း ဆဲဆိုလိုက်၏။ "မင်း ရူးနေလား။ ငါ့အလုပ်ကို မင်းက ဘာဝင်ရှုပ်တာလဲ။ ငါ မင်းကို သေအောင် ကျိန်ဆဲပစ်မယ် ယုံလား။ မျက်နှာဖြူကောင်! မင်းက ငါနဲ့ ထိပ်တိုက်တွေ့ချင်တာလား။ သတိထားနေလိုက်။ မဟုတ်ရင် ငါ မင်းကို ပြားချပ်သွားအောင် ရိုက်ပစ်လိုက်မယ်။"

ချွီးဟယ်ချင်းက ထိုလူနှင့် ပြိုင်မငြင်းခဲ့ပေ။ သူက တည်ငြိမ်စွာ ပြောလိုက်၏။ "ကျွန်တော်က ခင်ဗျားနဲ့ ရန်ဖြစ်ချင်တယ်လို့ ဘယ်သူပြောလဲ။ ခင်ဗျားက ဦးနှောက် မသုံးနိုင်ပေမယ့် ကျွန်တော်က မသုံးနိုင်တာမို့လို့လား။"

ဝတ်စုံပြည့်နှင့်လူကို သရော်ပြီးနောက် သူက ဖုန်းကို ထုတ်ယူပြီး ပြောလိုက်သည်။ "ခင်ဗျားက စရိုက်မှာတင် ပြဿနာရှိနေတာ မဟုတ်ဘူး။ ဦးနှောက်အခြေအနေကလည်း စိုးရိမ်စရာပဲ။ ခင်ဗျားက ဥပဒေအကြောင်း သိပ်နားမလည်ဘူးလို့ ကျွန်တော် ထင်တယ်။ ခင်ဗျား လူတွေကို ကျိန်ဆဲရတာ ကြိုက်တယ်မလား။ ခင်ဗျား ကျိန်ဆဲနေတဲ့ ဗွီဒီယိုလေး မှတ်တမ်းတင်ထားဖို့ ကျွန်တော့်ကို ကူညီပေးစေချင်လား။ ခင်ဗျား ရင်ထဲက ကျိန်ဆဲ စကားတွေကို ရဲဌာနမှာ ဖွင့်ဟပြပေးဖို့လေ။"

"ဟမ့်! ငါ့ကို အဓိပ္ပါယ်မရှိတာတွေ လာပြောမနေနဲ့။" ဝတ်စုံပြည့်နှင့် အမျိုးသားက ဖုန်းကို ဆွဲလုရန် လက်ဆန့်ထုတ်လိုက်သော်လည်း ချွီးဟယ်ချင်းက ဆတ်ခနဲ ရှောင်တိမ်းလိုက်သည်။

ထိုလူက ဒေါသတကြီး ပြောလိုက်ရုံသာ တတ်နိုင်၏။ "ငါ ဘယ်သူလဲ မင်း သိလား။ မင်း ငါ့ကို ဆန့်ကျင်ရဲရင် ဒီ တုန်းချန် တစ်ခုလုံးမှာ ရှင်သန်စရာ နေရာမရှိတော့အောင် လုပ်ပစ်လိုက်မယ်...."

ချွီးဟယ်ချင်းက ယခင်ဘဝတွင် ဒရာမာများစွာ သရုပ်ဆောင်ခဲ့ဖူးပြီး တတိယအဆင့် လွှမ်းမိုးနိုင်သော စီအီးအို ဒရာမာမျိုးတွင် ထိုသို့သော စကားများအား မရေတွက်နိုင်အောင် ကြားခဲ့ဖူးသည့်အတွက် သူက နည်းနည်းလေးမှ ကြောက်မနေပေ။

"အိုး... ဘုရားရေ! ခင်ဗျားက အရမ်း မောက်မာတာပဲ။ ကျွန်တော်က ခင်ဗျား ကျွန်တော့်ကို ဒီတစ်နိုင်ငံလုံးမှာ ရှင်သန်ဖို့ မဖြစ်နိုင်တော့လောက်အောင် လုပ်နိုင်မယ်လို့ ထင်ထားတာ။ ဖြစ်ချင်တော့ ခင်ဗျားက တုန်းချန်လို မြို့သေးသေးလေးမှာပဲ လေကျယ်နိုင်တာကိုး။ ကျစ်...ကျစ်... ခင်ဗျားက အရမ်း ဝိတာပဲ~"

သူ့အသံက ကြည်လင်ကာ ပြတ်သားပြီး ယခင်က ရုပ်ရှင်ရိုက်ကူးခြင်းများတွင် မည်သည့်အခါမှ အသံသရုပ်ဆောင် ရှာရန် မလိုခဲ့ပေ။ သူ့ ဖန်များ အားလုံးက သူ့အသံကို အရမ်း သဘောကျကြသည်။

သို့သော် သူ့ရှေ့မှ ဝတ်စုံပြည့်နှင့်လူက သူ့အသံ မည်မျှကောင်းကြောင်း ခံစားမနေနိုင်သည်မှာ သိသာပေသည်။ ထိုလူ၏ မျက်ခုံးများက စုကျုံ့ကာ ဒေါသတကြီး ထခုန်လုနီးပါး ဖြစ်သွားသည်။

ထိုလူ ဒေါသထွက်လေ ချွီးဟယ်ချင်းက ပျော်လေ ဖြစ်သည်။ သူက ထိုအယုတ်တမာကောင်အား မည်သည့် ကောင်းမွန်သော စကားကိုမှ မဆိုနိုင်ပေ။ သူက ၎င်းတို့ကို ရင်ဆိုင်ရန် ညစ်ပတ်သော လှည့်ကွက်တို့ကိုသာ အသုံးပြုမည် ဖြစ်သည်။

သူက ဆက်ပြောရန် ပြင်လိုက်စဥ် 'ဟက်ခနဲ' ရယ်သံတစ်ခုကို ကြားလိုက်ရသဖြင့် လှည့်ကြည့်လိုက်သည့်အခါ ဝှီးလ်ချဲပေါ်မှ လူက မနေနိုင်ဘဲ ရယ်မောလိုက်ကြောင်း မြင်လိုက်ရ၏။

ချွီးဟယ်ချင်း လှည့်ကြည့်လာသည်ကို မြင်လိုက်ရသောအခါ ထိုသူ၏ မျက်နှာကြွက်သားတို့က ချက်ချင်း တောင့်တင်းသွားသော်လည်း သူ့မျက်လုံးများက အနည်းငယ် ကွေးညွှတ်နေဆဲဖြစ်ကာ အပြုံးအရိပ်အယောင်ကို ဖော်ပြနေသည်။

ဤသူက အမှန်တကယ် ကြည့်ကောင်းလှသည်။ ချွီးဟယ်ချင်းက သက်ပြင်းတစ်ချက်ချလိုက်မိပြီး သူ အခု ထိုကဲ့သို့ ပြောလိုက်မိသည်မှာ မှန်ကန်သည်ဟု ရုတ်တရက် ခံစားလိုက်ရသည်။

သူ၏ စကားက ထိုဝတ်စုံပြည့်နှင့်လူကို ဒေါသဖြင့် ဆွေ့ဆွေ့ခုန်သွားစေရုံမျှမက အနိုင်ကျင့်ခံခဲ့ရသည့် ဝှီးလ်ချဲနှင့် ကိုလူချောကိုလည်း ခံစားချက် ကောင်းမွန်လာစေသဖြင့် ၎င်းက ခဲတစ်လုံးတည်းနှင့် ငှက်နှစ်ကောင် သတ်လိုက်ခြင်း ဖြစ်လေသည်။

"မင်း... မင်း....." ဝတ်စုံပြည့်နှင့်လူသည် ချွီးဟယ်ချင်းက ထိုသို့ မောက်မာစွာ ပြန်ပြောလာမည်ဟု ထင်မှတ်မထားလေသောကြောင့် ပြန်လည် ပြောဆိုရန် စကားလုံးများပင် ပျောက်ဆုံးသွားခဲ့လေသည်။

"ယွိချုံ.... မင်း အဲဒီ မျက်နှာဖြူလေး နောက်မှာ ပုန်းနေတာ ဘာအဓိပ္ပါယ်လဲ။" ထိုလူက ချွီးဟယ်ချင်း အနောက်မှ ဝှီးလ်ချဲနှင့် လူကို ကျိန်ဆဲလေသည်။ "မင်း စောက်သုံးမကျတဲ့ အမှိုက်ကောင်! မင်းက ယောက်ျား မဟုတ်ဘူး!"

ထိုစကားလုံးများက အမှန်တကယ် လွန်ကျူးလှပြီး ထိခိုက်နာကျင်စေသည်။ ယွိချုံဟု အခေါ်ခံရသူမှာ ခြေထောက်များ မကောင်းသောကြောင့် အလွယ်တကူ လှုပ်ရှား၍ မရနိုင်ဘဲ ရှိနေပြီ ဖြစ်သော်လည်း ယခုတွင် ထိုလူက သူ့ကို ယောက်ျား ဟုတ်မဟုတ် မေးခွန်းထုတ်နေလေသည်။

ယခင်ကသာဆိုလျှင် ချွီးဟယ်ချင်းက ပြန်လည်ကျိန်ဆဲ၍ ကူညီလိုက်မည် ဖြစ်သော်လည်း ယွိချုံဟူသည့် လူချောလေးကို ပြန်ကြည့်မိသောအခါ သူ ပြောလိုက်သည့် စကားများက ဝှီးလ်ချဲနှင့် လူချောလေး၏ နာကျင်မှုကို ပိုမို ဆိုးရွားသွားစေမည်အား စိုးရိမ်နေမိပေသည်။

ယွိချုံ ဟု ခေါ်သော ဤလူတွင် သန်မာသော စိတ်နေစိတ်ထား မရှိလျှင် မည်သို့ လုပ်ရမည်နည်း။ ဤကဲ့သို့သော ကျိန်ဆဲမှုက သူ့ကို လက်ခံရန် ခက်ခဲသည်ဟု ခံစားမိလျှင် မည်သို့ လုပ်ရမည်နည်း။

သူ့ စိတ်ထဲမှ စကားအနည်းငယ်ကို ထုတ်ပြောပြီးနောက် ချွီးဟယ်ချင်းက သူ့နောက်တွင် ရှိနေသော ယွိချုံဘက်သို့ လှည့်လာပြီး ထိုစကားများကို အရမ်းနာကျင်ခံစား မနေဖို့ နှစ်သိမ့်ရန် ကြိုးစားလိုက်စဥ် ထိုလူက ပြောလာသည်ကို ကြားလိုက်ရ၏။ "စိတ်မပူပါနဲ့။ မင်း ငါ့ကို ကူညီဖို့ ကြိုးစားနေတယ်ဆိုတာ ငါ သိပါတယ်။"

ချွီးဟယ်ချင်းက နွေးထွေးသွားသလို ခံစားလိုက်ရသည်။ မျက်နှာဖြူလေးလို့ အခေါ်ခံရခြင်းက ဘာမှမဟုတ်ပေ။ သူ ယခင် သရုပ်ဆောင်စဥ်က ဤကဲ့သို့ စကားမျိုးနှင့် အကြိမ်များစွာ အဆူပူခံရဖူးသည်။ သူက ထိုစကားများကို စိတ်ထဲပင် ထည့်မထားတော့ပေ။

ယွိချုံဟု ခေါ်သည့် ဤလူတွင် ထိုမျှကောင်းမွန်သော စိတ်နေစိတ်ထား ရှိသည်။ သူ ကိုယ်တိုင်က ကြိမ်းမောင်းခံနေရသော်လည်း အခြားသူကို နှစ်သိမ့်ပေးချင်စိတ် ရှိနေသေးလေသည်။ သူသာ အမြဲ ဤကဲ့သို့ ပြုမူနေလျှင် လူ့အသိုင်းအဝိုင်းထဲ၌ ဆုံးရှုံးနစ်နာမှုများ လွယ်လွယ်ကူကူ ခံစားရပေလိမ့်မည်။

"တော်လောက်ပြီ။" ချွီးဟယ်ချင်းက ထပ်၍ သည်းမခံနိုင်တော့ဘဲ ဝတ်စုံပြည့်နှင့် လူအား ပိတ်ဟောက်လိုက်သည်။ "လူတွေကို ကျိန်ဆဲနေတာက ဥပဒေကို မဆန့်ကျင်ဘူးလို့ မထင်နဲ့။ အခု ခင်ဗျား ထွက်မသွားသေးဘူးဆိုရင် လုံခြုံရေးခေါ်လိုက်ပြီး ခင်ဗျားက ယောက်ျား ဟုတ်မဟုတ် သိရအောင် လူတိုင်းကို ဆုံးဖြတ်ခိုင်းလိုက်မယ်။"

"မင်း! နောက်တစ်ခါ သတိထားနေ!" ဝတ်စုံပြည့်နှင့်လူက ဒေါသထွက်သွားသော်လည်း ချွီးဟယ်ချင်းကို အချိန်အတိုင်းအတာတစ်ခုအတွင်း ဘာမှ မလုပ်နိုင်သေးလေရာ ဒေါသတကြီး ထွက်ခွာသွားရုံသာ တတ်နိုင်၏။

ထိုလူ အဝေးသို့ လျှောက်ထွက်သွားသည်ကို ကြည့်ပြီး နောက်ဆုံး၌ ချွီးဟယ်ချင်းက မနေနိုင်ဘဲ ရယ်မောလိုက်သည်။

"ခင်ဗျား အဆင်ပြေရဲ့လား။" သူက ဝှီးလ်ချဲနှင့် လူချောလေးကို မေးလိုက်သည်။ သူသည် ထိုအမျိုးသားက အခုတင် ဝှီးလ်ချဲ လက်ကိုင်တန်းအား အကြိမ်ပေါင်းများစွာ ဆုပ်ကိုင်ထားခဲ့သဖြင့် လက်ပေါ်မှ အကြောများ ထောင်နေသည်ကိုပင် မြင်လိုက်ရသည်။ ထိုအမျိုးသားက သူတို့၏ ရန်ပွဲကြောင့် ထိတ်လန့်ကြောက်ရွံ့သွားခြင်း ဖြစ်ရပေမည်။

ချွီးဟယ်ချင်းက နူးနူးညံ့ညံ့ ပြုံးရင်း ပြောလိုက်သည်။ "ခင်ဗျားက ဘယ်လူနာဆောင်ကလဲ။ ခင်ဗျား ကျွန်တော့်ကို လိုက်ပို့ပေးစေချင်လား။"

အမျိုးသားက ခေါင်းယမ်းလိုက်ရင်း သူ့ကို စိုက်ကြည့်နေသည်။ သူ၏ ဖြူဖျော့ဖျော့ မျက်နှာတွင် အရောင်တစ်လွှာ ပေါ်လာပုံရ၏။

"ကျေးဇူးတင်ပါတယ်။ ကိုယ့် နာမည်က ယွိချုံ ပါ။" သူက ပြောလိုက်သည်။

*******

ယွိချုံက နာလန်ထစလူနာအဆောင်၌ နေသည်ဖြစ်ရာ ချွီးဟယ်ချင်းက သူ့ကို ပြန်လိုက်ပို့ပေးခဲ့သည်။

သူတို့ ဓာတ်လှေကားကနေ ထွက်လာသည်နှင့် စိုးရိမ်ပူပန်နေသော မျက်နှာနှင့် လူများက သူတို့ထံ အပြေးအလွှား ရောက်လာကြသည်။

ချွီးဟယ်ချင်းသည် ထိုသူများက ယွိချုံ၏ မိတ်ဆွေ အပေါင်းအသင်းများ သို့မဟုတ် လူနာပြုစုစောင့်ရှောက်သူများ ဖြစ်လိမ့်မည်ဟု ခန့်မှန်းမိသောကြောင့် ယွိချုံအား ထိုလူတို့ထံ အပ်လိုက်ပြီး နှုတ်ဆက်ကာ ပြန်လှည့်ထွက်သွားလိုက်သည်။

သူတို့ထဲမှ တစ်ယောက်က ချွီးဟယ်ချင်းကို တံခါးအထိ ပြန်လိုက်ပို့ပေးပြီး ဆက်တိုက် ကျေးဇူးတင်စကား ပြောနေသည်။

ချွီးဟယ်ချင်းက ရှက်ရွံ့သလို ခံစားလိုက်ရပြီး ပြောလိုက်သည်။ "အရမ်း ယဥ်ကျေးနေစရာ မလိုပါဘူး။ ကျွန်တော် လုပ်သင့်တယ်ထင်လို့ လုပ်ပေးတာပါ။"

သို့ပေမယ့် သူက အခု ဖြစ်ပျက်ခဲ့သည်ကို တွေးပြီးနောက် မနေနိုင်တော့ဘဲ ပြောလိုက်သည်။ "ကျွန်တော် ထင်တာတော့ ခင်ဗျား လူနာစောင့်ရှောက်ပေးတဲ့လူကို ပိုပြီး ဂရုစိုက်ပေးဖို့ ပြောထားသင့်တယ်။ ဒီနေ့ ကျွန်တော်သာ မရှိရင် မစ္စတာယွိက အနိုင်ကျင့်ခံရတော့မှာ။"

ထိုစကားကို ကြားသည့်အခါ ထိုလူက အံ့သြမှင်တက်သွားလေသည်။ "အာ? အနိုင်ကျင့်ခံရမှာလား။"

ထိုလူက မယုံကြည်နိုင်ဟန် ဖြစ်နေသည်ကို မြင်သောအခါ ချွီးဟယ်ချင်းက စိတ်အားထက်သန်စွာ ပြောလိုက်သည်။ "မစ္စတာယွိက နေလည်း သိပ်ကောင်းတာ မဟုတ်ဘဲ ကြင်နာတတ်တဲ့ စိတ်နေစိတ်ထားမျိုး ရှိတာကြောင့် လူကောင်းတွေကို အနိုင်ကျင့်တတ်တဲ့ အယုတ်တမာတွေရဲ့ ပစ်မှတ် ဖြစ်လာနိုင်တယ်။ ခင်ဗျားတို့ နည်းနည်းလောက် ပိုပြီး ဂရုစိုက်ပေးရင် ပိုကောင်းမယ်။"

ထိုလူက သူ့စကားကို နားမထောင်မည်အား စိုးရိမ်သောကြောင့် ချွီးဟယ်ချင်းက နှစ်ကြိမ်တိုင်တိုင် တိုက်တွန်း ပြောဆိုလိုက်သည်။

ချွီးဟယ်ချင်း ထွက်သွားပြီးသည့်တိုင်အောင် ထိုလူက တွေဝေကြောင်အနေသော အကြည့်တစ်ခုနှင့် ရပ်နေဆဲ ဖြစ်လေသည်။

ချွီးဟယ်ချင်း၏ ပုံရိပ် လုံးဝ ပျောက်ကွယ်သွားသည်ကို ကြည့်နေပြီးမှ ယွိချုံ၏ အကြည့်တို့က လက်ရှိကို ပြန်လည်ရောက်ရှိခါပြီး သူ၏ သန့်ရှင်းသော လက်ချောင်းလေးများကို သုံး၍ စားပွဲကို ပေါ့ပါးစွာ ခေါက်လိုက်သည်။

အတွင်းရေးမှူး လီကျစ်က အချက်ပြမှုကို လက်ခံရရှိလိုက်ပြီး ချက်ချင်း အစီရင်ခံ တင်ပြလိုက်သည်။ "ဘော့စ်ယွိ အဲဒီအကြောင်း ရှာတွေ့ပါပြီ။ လင်ဖန်က ဆေးရုံကို မလာခင် ယွင်ရှင်းက ဘော့စ်လီနဲ့ တွေ့ခဲ့ပါတယ်။"

"ယွင်ရှင်းလား။ တစ်ယောက်ယောက်က သူတို့ရဲ့ ရှယ်ယာတွေကို ဝယ်ချင်နေတယ်ဆိုတာ ငါ မှတ်မိသလားလို့။"

၎င်းက ရိုးရှင်းသည့် မေးခွန်းလေးတစ်ခုသာ ဖြစ်သော်လည်း အခန်းထဲမှာ ရှိနေသည့်လူတိုင်း တုန်ယင်မသွားဘဲ မနေနိုင်ခဲ့ပေ။

လီကျစ်က သူ့ မျက်နှာမှ ချွေးများကို သုတ်ရန်ပင် အချိန်မရှိခဲ့ဘဲ သဘောတူညီမှုကို ပြသရန် ခေါင်းကို ချက်ချင်း ငုံ့လိုက်သည်။

"ဟုတ်ကဲ့။ ကျွန်တော် အခုချက်ချင်း ဒီကိစ္စကို ကိုင်တွယ်ဖို့ တစ်ယောက်ယောက်ကို ခိုင်းလိုက်ပါ့မယ်။"

လူနာခန်းအတွင်း၌ တိတ်ဆိတ်မှုက ကြီးစိုးနေသည်။ လီကျစ်သည် ချွီးဟယ်ချင်း ပြောသွားသည့် စကားကို မတော်တဆ ပြန်တွေးမိသွားသည်။

ကြင်နာတတ်ပြီး စိတ်ထားကောင်းတာလား။ သူက တကယ်ပဲ သူတို့ရဲ့ ဘော့စ်အကြောင်း ပြောသွားတာရော ဟုတ်ရဲ့လား။

ချွီးဟယ်ချင်းကပဲ မှားပြီး ပြောသွားတာလား။ သူပဲ မှားကြားမိတာလား မသိတော့ပေ။ သူ ထင်တာတော့ သူ အကြားမှားတာ ဖြစ်နိုင်ပေသည်။

********

ချွီးဟယ်ချင်းက သူ့ လူနာခန်းသို့ ပြန်ရောက်သည့်အခါမှ သူ ဘာမှ မစားရသေးသည်ကို သတိရသွားသည်။

ဆေးရုံမှ ကျွေးသော အစားအသောက်ကို ကတိုက်ကရိုက် စားသောက်ပြီးနောက် သူက ကိုယ်တိုင် ချက်ပြုတ် စားသောက်ခဲ့ရသော နေ့များကို ပိုမို လွမ်းဆွတ်လာမိကာ ချက်ချင်းပင် လိန်ဖန်းဖန်းထံသို့ ဝီချက်မှ မက်ဆေ့ချ် ပို့လိုက်သည်။

[လောင်လိန် ကျေးဇူးပြုလို့ ကလေးကို ကယ်တင်ပြီး အားချင်အတွက် အိမ်လေးတစ်လုံးပေးပါ။ (ကြောင်လေးငိုနေသည့်.jpg)]

ဤတစ်ကြိမ်၌ လိန်ဖန်းဖန်းက အလျင်အမြန် တုန့်ပြန်လာသည်။

[မငိုနဲ့တော့။ ငါ မင်းအတွက် အိမ်တစ်လုံး ရှာတွေ့ထားတယ်။ တစ်လကို ယွမ်ထောင့်နှစ်ရာကျပြီး အခြေအနေတွေ အားလုံး ကိုက်ညီတယ်။]

ချွီးဟယ်ချင်းက လျင်မြန်စွာ စာရိုက်လိုက်၏။ [တကယ်လား။ လောင်လိန် ခင်ဗျားက တကယ် အံ့သြစရာပဲ။ ခင်ဗျားက နတ်သမီးမေမေထက်တောင် ပိုကောင်းသေးတယ်။ ကျွန်တော် ဘယ်တော့ ပြောင်းလို့ရမလဲ။]

[နေဦး။ အရမ်း စိတ်မလှုပ်ရှားနဲ့။ ငါ မင်းကို ပြောရဦးမယ်။ အဲဒီမှာ အခြေအနေတစ်ခုရှိတယ်။ မင်း အဲဒီအိမ်ကို တခြားတစ်ယောက်နဲ့ မျှနေရမှာ။]

ချွီးဟယ်ချင်း : [ကိစ္စမရှိဘူး။ အခန်းဖော်ရှိတော့ ပိုပျော်စရာကောင်းတာပေါ့။]

သူ့ မက်ဆေ့ချ် ဝင်သွားပြီးနောက် အချိန်အတော်ကြာသည်အထိ တုန့်ပြန်မှု ရှိမလာပေ။

ချွီးဟယ်ချင်းက ထိုကိစ္စ ပြေလည်သွားပြီဟု တွေးလိုက်သည့် အချိန်မှ လိန်ဖန်းဖန်းက စာပြန်လာ၏။

[ကောင်းပြီ။ အဲဒါဆိုလည်း မင်းနဲ့ မင်းရဲ့ ရန်သူလေး ပျော်ပျော်ရွှင်ရွှင် နေနိုင်ပါစေလို့ ငါ ဆုတောင်းပေးပါတယ်။ (အပြုံး.jpg)]

ချွီးဟယ်ချင်း : "???"

*******

Prev Next