MM Story Teller

အပိုင်း (၅)

Viewers 80

ချွီးဟယ်ချင်းက ပြန်လည်သက်သာလာပြီဖြစ်ကာ လိန်ဖန်းဖန်းက အစီအစဥ်အားလုံး လုပ်ဆောင်ပြီးပြီကို သိပြီးနောက် သူက ချက်ချင်းပင် ဆေးရုံမှ ဆင်းရန် လုပ်ဆောင်လိုက်သည်။

ဆေးဖိုးငွေကုန်ကျစရိတ်ကို မြင်ပြီးနောက် အမြဲအကောင်းမြင်တတ်သည့် ချွီးဟယ်ချင်းသည်ပင် အနည်းငယ် စိတ်ဓာတ်ကျသလို ခံစားလိုက်ရသည်။

ကံကောင်းစွာဖြင့် လိန်ဖန်းဖန်းက သူ ယခင်က ငှားရမ်းထားသော ဇိမ်ခံတိုက်ခန်းကို သူ့ကိုယ်စား ပြန်လည်အပ်နှံလိုက်ပြီး ကြည့်ကောင်းရုံအပြင် အသုံးဝင်တာမရှိသည့် ဘရန်းပစ္စည်းများကိုလည်း ငွေကြေးနှင့် ပြန်လည်လဲလှယ်ပေးခဲ့သည်။ မဟုတ်လျှင် သူက အခု ငွေရေးကြေးရေး အကျပ်အတည်းကို ခံစားရတော့မည် ဖြစ်သည်။

မြင့်မားသော အဆောက်အဦးများကို တစ်ခုပြီးတစ်ခု ဖြတ်သန်းသွားပြီးနောက် ချွီးဟယ်ချင်းနှင့် လိန်ဖန်းဖန်းသည် နောက်ဆုံး၌ သူတို့ ရည်ရွယ်ထားသည့် နေရာသို့ ရောက်ရှိလာပြီး ပထမဆုံးအကြည့်တစ်ချက်တွင် အနည်းငယ် အိုဟောင်းပုံပေါ်ကာ ဒုတိယတစ်ကြိမ် ပြန်ကြည့်မိသည့်အခါမှာတော့ အလွန်အမင်း အိုဟောင်းနေပုံပေါ်သည့် အဆောက်အဦး သေးသေးလေးရှေ့သို့ ရောက်လာခဲ့သည်။

"ဒီနေရာပဲ။" လိန်ဖန်းဖန်းက ပြေုလိုက်သည်။ "ဒီအဆောက်အဦးရဲ့ အိုဟောင်းနေတဲ့ အပြင်ပိုင်းပုံစံကြောင့် အရူးလုပ်မခံရစေနဲ့။ အတွင်းပိုင်း အပြင်အဆင်က အတော်လေး ကောင်းတယ်။"

ချွီးဟယ်ချင်းတွင် နေထိုင်စရာနေရာအတွက် မြင့်မားသော လိုအပ်ချက်များ မရှိပေ။ မီးဖိုချောင်နှင့် ရေချိုး သန့်စင်ခန်း ရှိနေသရွေ့ အဆင်ပြေပေသည်။ ထို့ကြောင့် သူက ခရီးဆောင်သေတ္တာကို ဆွဲကာ အထဲသို့ လျှောက်ဝင်သွားသည်။

လိန်ဖန်းဖန်းက သူ့ကို မလိမ်ခဲ့ပေ။ အဆောက်အဦးအတွင်းတွင် အပြင်ဘက်ကထက် အများကြီး ပို၍ သန့်ရှင်းသပ်ရပ်ပေသည်။

ထို့ပြင် ၎င်းက အဆောက်အဦးအဟောင်း ဖြစ်သောကြောင့် လှေကားထစ် နှစ်ဖက်လုံးက အဖွင့်ပုံစံဖြစ်ပြီး အထပ်တစ်ထပ်စီတွင် မျက်နှာချင်းဆိုင် အခန်းတစ်ခန်းသာ ရှိကာ လုံခြုံရေးသည်လည်း ကောင်းမွန်ပေသည်။

ချွီးဟယ်ချင်းက ထိုအကြောင်းတွေးနေစဥ် လိန်ဖန်းဖန်းက လမ်းလျှောက်နေခြင်းအား ရပ်တန့်လိုက်သည်ကို မြင်လိုက်ရသည်။

"မင်းရဲ့ ရန်သူလေးက ဒီမှာ နေနေတာ လဝက်လောက် ရှိပြီ။" သူက မျက်စိတစ်ဖက်မှိတ်ကာ အသံကို နှိမ့်၍ ပြောလိုက်သည်။ "သူက မင်း ဒီမှာ လာနေမယ်လို့ စစချင်း ကြားတုန်းက သဘောမတူချင်ခဲ့ဘူး။ ငါ့ကြောင့်သာ နေခွင့်ပြုလိုက်တာ။"

ချွီးဟယ်ချင်းက ထိုစကားအသွားအလာကို နားလည်ပေသည်။

"လောင်လိန် ကျွန်တော် နားလည်ပါတယ်။" သူက ပြောလိုက်၏။ "ကျွန်တော် အရင်တုန်းက ဂရုမစိုက်ဘဲ နေမိတယ်။ စိတ်မပူပါနဲ့။ နောက်ပိုင်းကျ ကျွန်တော် သေချာပေါက် အဓိပ္ပါယ်မရှိတာတွေ မပြောတော့ပါဘူး။"

ထိုသို့ပြောပြီးနောက် သူက ပါးစပ်ကို လက်နှင့် အုပ်ကာ တင်းတင်းကျပ်ကျပ် ပိတ်ပစ်လိုက်သည့် အပြုအမူက လိန်ဖန်းဖန်းအား ရယ်မောမိလုနီးပါး ဖြစ်စေခဲ့သည်။

ဤကလေးသာ အစကတည်းက ထိုသို့ ပျော်ပျော်ရွှင်ရွှင် နေတတ်မည်ဆိုလျှင် ချီရှောင်နင်နှင့် ရန်သူတွေ ဖြစ်လာလိမ့်မည် မဟုတ်ဟု တွေးလိုက်မိကာ လိန်ဖန်းဖန်းက နောက်ဆုံးတွင် တံခါးဘဲလ်ကို တီးလိုက်သည်။

ချွီးဟယ်ချင်းက သူ့လက်များကို ပြန်ချလိုက်ကာ မူလပိုင်ရှင်နှင့် ချီရှောင်နင်တို့ ရန်သူများ ဖြစ်လာရသည့်အကြောင်းကို တိတ်တိတ်လေး တွေးနေခဲ့သည်။

အဓိကအကြောင်းရင်းက မူလပိုင်ရှင်ကြောင့် ဖြစ်သည်။ ချီရှောင်နင်က အဆိုတော်တစ်ယောက် ဖြစ်၏။ သူက မကျော်ကြားသော်လည်း အယ်လ်ဘမ်တစ်ခု ထုတ်ဝေနိုင်ခဲ့သည်။ နောက်ပိုင်းတွင် သူက သရုပ်ဆောင်လိုင်းကို ကူးပြောင်းခဲ့သော်လည်း သူက အဆိုတော်တစ်ယောက် ဖြစ်ခဲ့ရသည့်အပေါ် ဂုဏ်ယူနေဆဲ ဖြစ်သည်။

သို့သော် မူလပိုင်ရှင်က အပြောအဆို မတတ်ဘဲ ရိုက်ပေါက်ဖန်တီးကာ ချီရှောင်နင်၏ သီချင်းသီဆိုမှုက ဆိုးရွားလှကြောင်း ပြောခဲ့သည်။ ထိုစကားက ချီရှောင်နင်၏ နားသို့ ပြန်ကြားသောအခါ ထိုအချိန်မှစ၍ သူတို့နှစ်ယောက်က ရန်သူများ ဖြစ်လာကြလေသည်။

သူတို့ နှစ်ယောက်လုံးက လူငယ်လူရွယ်များ ဖြစ်ပြီး အာဃာတများ ဖြစ်လာပြီးနောက် မည်သူကမှ အလျှော့ပေးရန် စိတ်မကူးခဲ့ကြပေ။ ထို့အစား သူတို့က တစ်ယောက်နှင့် တစ်ယောက် ပိုပိုပြီး မနှစ်သက်ဖြစ်လာကြ၏။

ထို့ပြင် ချီရှောင်နင်က မူလပိုင်ရှင်၏ အတုအယောင် သရုပ်ဆောင်မှုများကို ရယ်မောခဲ့လေရာ ရလဒ်အနေနှင့် သူတို့နှစ်ယောက်က လုံးဝကို ရန်သူများ ဖြစ်သွားခဲ့တော့သည်။

သို့သော် သေချာပြန်စဥ်းစားပြီးနောက် ချွီးဟယ်ချင်းသည် တစ်ခုခုက မှားယွင်းနေသလို ခံစားလိုက်ရသည်။

သိသာစွာပင် အခြားတစ်ယောက်ယောက်က ချီရှောင်နင်ကို အရင် လှောင်ပြောင်ခဲ့ခြင်းဖြစ်ပြီး မူလပိုင်ရှင်က ဆွဲသွင်းခံရကာ သာမန်ကာလျှံကာ မှတ်ချက်တချို့ ပေးလိုက်ရုံသာ ဖြစ်သည်။ ထိုအဖြစ်က မည်သို့ဖြစ်၍ သူက ချီရှောင်နင်၏ သီချင်းဆိုစွမ်းရည်ကို အထင်အမြင်သေးနေသည်ဟု ဖြစ်သွားရပါသနည်း။

ကျစ်!! ကုမ္ပဏီသေးသေးလေးတွေက တကယ့်ကို ပြဿနာများတာပဲလို့ပဲ ပြောချင်တော့တယ်။

ထိုအချိန်တွင် မူလပိုင်ရှင်က သရုပ်ဆောင် လမ်းကြောင်းတွင် စတင်လျှောက်လှမ်းကာစ ဖြစ်ကာ ချီရှောင်နင်သည်လည်း အလုပ်လမ်းကြောင်း ပြောင်းလဲကာစ ဖြစ်သည်။ သူတို့နှစ်ယောက်က အခြားသူ၏ နယ်ရုပ်များအဖြစ် အသုံးချခံလိုက်ရခြင်း ဖြစ်သည်။ သူက ချင်ဖန့်ထျန်းကို စော်ကားမိ၍လား မည်သူ့ကို စော်ကားမိ၍လဲ မသေချာပေ။

သို့သော် မူလပိုင်ရှင်သည် ယခင်ကတည်းက အကြိမ်ပေါင်းများစွာ လှည့်စားခံရဖူးကြောင်း ခန့်မှန်းမိပေသည်။ မဟုတ်လျှင် ရိုက်ကူးရေးအဖွဲ့မှနေ၍ ချင်ဖန့်ထျန်း၏ ကန်ထုတ်ခြင်းကို ခံရပြီးနောက် ကူညီမည့်သူ မရှိဘဲ နေလိမ့်မည် မဟုတ်ပေ။

သို့သော် ဤသည်က ချွီးဟယ်ချင်းသည် ချီရှောင်နင်၏ စရိုက်ကို ခန့်မှန်းမိခဲ့သည်။ တံခါးဖွင့်လာသည့်အသံကို ကြားသည့်အခါ သူက ချက်ချင်းပင် အပြုံးတစ်ခုနှင့် မော့ကြည့်လိုက်သည်။

ပဋိပက္ခတွေရှိရင် ဖြေရှင်းလိုက်ရုံပဲ။ ဘယ်လိုပဲဖြစ်ဖြစ် သူက ဤကဲ့သို့ စျေးပေါသည့် အိမ်ကို လက်မလွှတ်နိုင်ခဲ့ပေ။

*******

တံခါးမဖွင့်ခင်ကတည်းက ချီရှောင်နင်၏ နှုတ်ခမ်းတို့က မဲ့ကျနေသည်။ လိန်ဖန်းဖန်းက သူ့ကို ဆက်သွယ်ထားတာ ကြာပြီဖြစ်ရာ ယခု အိမ်ရှေ့၌ ရောက်လာသည်က မည်သူဖြစ်ကြောင်း မခန့်မှန်းဘဲနှင့်ပင် သိနေပြီ ဖြစ်သည်။

ချွီးဟယ်ချင်း၏ ချောမောသော်လည်း စိတ်ရှုပ်စရာကောင်းသည့် မျက်နှာကို တွေးမိသည့်အခါ ချီရှောင်နင်က တံခါးဖွင့်ရမည်ကိုပင် တွန့်ဆုတ်နေသည်။

တံခါးပွင့်သွားသည်ကို မြင်သောအခါ ချွီးဟယ်ချင်းက လိန်ဖန်းဖန်း မိတ်ဆက်ပေးသည်ကို မစောင့်ဘဲ အပြုံးတစ်ပွင့်နှင့် မိတ်ဆက်လိုက်သည်။

"မတွေ့ရတာကြာပြီနော် ရှောင်နင်။" သူက သွားရှစ်ချောင်းလောက် ပေါ်သည်အထိ ပြီးပြည့်စုံသော အပြုံးတစ်ခုကို လှစ်ဟပြလိုက်၏။

ချီရှောင်နင်က သူ၏ အပြုံးကို မြင်သည့်အခါ လုံးဝကို ကြက်သေသေသွားတော့၏။

"မင်း... မင်း ဘာလုပ်ချင်လို့လဲ။"

ဒီကောင်က တစ်ခုခု မှားနေတာလား။ ဘာလို့ သူ့(ရှောင်နင်)ကို အရမ်းလှလွန်းတဲ့ အပြုံးမျိုးနဲ့ ပြုံးပြနေရတာလဲ။ သူ(ဟယ်ချင်း)က သူ့ကို ထိခိုက်နာကျင်အောင် တစ်ခုခု လုပ်ချင်နေတာလား။

ချီရှောင်နင်၏ ရှုပ်ပွနေသော ဆံပင်တို့ကို ကြည့်ပြီးနောက် ချွီးဟယ်ချင်းသည် ထိုကလေး နိုးလာသည်မှာ သိပ်မကြာသေးကြောင်း ခန့်မှန်းလိုက်မိသည်။

ချီရှောင်နင်၏ မျက်လုံးများက ရှည်လျားကျဥ်းမြောင်းသော်လည်း ယခုတွင် ခပ်ကျယ်ကျယ် ပွင့်ဟနေပြီး အနည်းငယ် ရယ်ချင်စရာ ကောင်းနေသည်။ ညဥ့်နက်အထိ နေတတ်သော လူငယ်သဘာဝကြောင့် ဖြစ်ပေါ်နေသည့် မျက်လုံးအောက်ခြေမှ အနက်ရောင်အကွင်းတို့ကို မြင်သည့်အခါ မောက်မာရိုင်းပျသည့် လူငယ်လေးက ချစ်စရာကောင်းသော အူကြောင်ကြောင်လူငယ်လေး အဖြစ် ရောက်ရှိသွားလေသည်။

ချီရှောင်နင်က ယခုနှစ်မှ ၂၂ နှစ်သာ ရှိသေးပြီး သူ၏ ယခင်ဘဝက အသက်ထက် သုံးနှစ်လောက် ငယ်ရွယ်ကြောင်း တွေးမိသည့်အခါ ချွီးဟယ်ချင်း၏ အပြုံးက အနည်းငယ် ပို၍ ဖော်ရွေစစ်မှန်လာသည်။

"မင်းကို အနှောက်အယှက်ပေးရတာ အားနာပါတယ်။ မင်း အရင် သွားပြန်အိပ်ချင် အိပ်လိုက်လေ။ ငါ ကိုယ့်ဘာသာ နေရာချလိုက်မယ်။" သူက ပြောလိုက်၏။

ချွီးဟယ်ချင်း လက်ဆွဲသေတ္တာနှင့် ဝင်လာသည်ကို မြင်သောအခါမှ နောက်ဆုံး၌ ချီရှောင်နင်၏ အသိစိတ်က ပြန်လည်ရောက်ရှိလာသည်။

"ခဏလေး..... မဟုတ်ဘူး...." ချီရှောင်နင်က သူ့ ခေါင်းကို သူ ကုတ်လိုက်ပြီး သူ့စိတ်ထဲမှာ တစ်ခုခု မှားနေသလို ခံစားနေရ၏။

အချိန်အတော်ကြာမှ သူက စကားတစ်ခွန်း ညှစ်ထုတ်လိုက်နိုင်သည်။ "မင်း ဘယ်လိုလုပ် ဒီလိုမျိုး ဖြစ်လာတာလဲ။"

ချီရှောင်နင်၏ အမူအရာက ဘဝကို သံသယဝင်နေပုံဖြစ်နေလေရာ လိန်ဖန်းဖန်းက သူ့ပခုံးကို ခပ်ဖွဖွ ပုတ်ကာ နှစ်သိမ့်ပေးလိုက်သည်။ "စိတ်မပူပါနဲ့။ ကောင်လေးက အခု ပိုပြီး ကောင်းမွန်လာပါပြီ။ သိပ်မကြောက်နဲ့တော့။"

ချီရှောင်နင် : “???”

သူ့အရပ်က 1.85 မီတာ ရှိတယ်လေ။ သူက ကြောက်နေစရာလား။ သူက အဲဒါကို ထူးဆန်းတယ်လို့ တွေးမိရုံပါနော် ဟုတ်ပြီလား။

**********

Prev Next