MM Story Teller

အပိုင်း (၈)

Viewers 86

ချွီးဟယ့်ချင်းက အစားမှားသွားခြင်း ဖြစ်နိုင်သည်။ သူက တကယ်ပဲ ကိုယ့်ကိုယ်ကိုယ် ပြန်သုံးသပ်နေတာလား။

အိုး... မဟုတ်သေးဘူး။ သူက ရှင်းရှင်းလင်းလင်းပင် ချွီးဟယ်ချင်းနှင့် ထိပ်တိုက်ရင်ဆိုင်ချင်သော်လည်း ယခု မည်သည့်အတွက်ကြောင့် ထူးထူးဆန်းဆန်း ခံစားနေရပါသနည်း။

ချွီးဟယ်ချင်းသည် အမှန်တကယ်ပင် မူလပိုင်ရှင်က အတိတ်တွင် လမ်းမှားကို လျှောက်ခဲ့သည်ဟု ခံစားမိပေသည်။ သူ၏ အရင် အေးဂျင့်မှာ မြှောက်ထိုးပင့်ကော် လုပ်တတ်ပြီး သူ့သူငယ်ချင်းများမှာလည်း ရိုးသားမှုမရှိပေ။

သက်မွေးဝမ်းကြောင်းအတွက် အလုပ်အကိုင် အစီအစဥ်က ပို၍ပင် ပြဿနာရှိနေသေးသည်။

ကျန်ရှိသည့် စိတ်ခံစားချက်ပိုင်းဆိုင်ရာ ကဏ္ဍများသည်တော့..... မေ့လိုက်ပါတော့။ သူက မည်သည့်အခါမှ ဆက်ဆံရေးတစ်ခု မထူထောင်ခဲ့ဖူးလေရာ ၎င်းကို မှတ်ချက်ပေးရန် အခွင့်မရှိပေ။ သူ ပြောနိုင်သည့် တစ်ခုတည်းသောအရာမှာ သူက မှားယွင်းသောလူကို ချစ်မိနေခြင်းဟုသာ ဆိုနိုင်ပေသည်။

သက်ပြင်းချလိုက်ပြီးနောက် ချွီးဟယ်ချင်းက ကုတ်နှစ်ဘူးဖွင့်လိုက်ကာ ချီရှောင်နင်ထံသို့ တစ်ဘူး လှမ်းပေးရင်း ပြောလိုက်သည်။ "ငါ အရက်ဖြတ်ထားတာမို့လို့ အရက်အစား ဒါပဲ သောက်ကြစို့။"

ချီရှောင်နင်က ကြောင်တောင်တောင်နှင့် ကုတ်ဘူးကို လှမ်းယူလိုက်ပြီး ကြောင်တောင်တောင်နှင့်ပင် ချွီးဟယ်ချင်းနှင့် ဘူးချင်းတိုက်လိုက်ကာ ဆက်လက်ကြောင်အနေလျက်သားနှင့် တစ်ငုံသောက်လိုက်သည်။ သူသည် သူ့ကိုယ်သူ ဖျားနေလား ရူးနေလားဟု တွေးလိုက်မိပေသည်။

ဘာလို့များ စားသောက်နေရာကနေ ရုတ်တရက်ကြီး အလေးအနက် ဖြစ်လာတာလဲ။

သူက ချွီးဟယ်ချင်းနဲ့ ရင်းနှီးလို့လား။ သူတို့က သိသိသာသာကို ရန်ဘက်တွေ မဟုတ်ဘူးလား။

ဘာလို့ သူနဲ့ ခွက်ချင်းတိုက်သင့်တာလဲ။ သူက စကားပြောဆိုရ အရမ်းလွယ်ကူနေပုံပေါ်လို့လား။

ကွမ်းတုန်းကျူ ဟော့ပေါ့က အရမ်းအရသာရှိ၍လား၊ ကုတ်အရသာကပဲ အလွန် ကောင်းမွန်နေလို့လား မသေချာသော်လည်း ချီရှောင်နင်က စိတ်ထဲမှာ ဟင်းခနဲ သက်ပြင်းချလိုက်ကာ ထပ်မံ၍ ချွီးဟယ်ချင်းနှင့် ဘူးချင်းတိုက်လိုက်သည်။

"မင်း ဆေးရုံတက်ရတယ်လို့ ကြားမိတယ်။ အခု ဘယ်လိုနေလဲ။" ချီရှောင်နင်က မေးလိုက်သည်။

ချွီးဟယ်ချင်းက အပြုံးနှင့် ပြောလိုက်၏။ "ဘာမှ ထွေထွေထူးထူး မဟုတ်ပါဘူး။ အခု အဆင်ပြေသွားပါပြီ။"

သူ ကြားခဲ့ရသည့် အတင်းအဖျင်း သတင်းကို တွေးမိပြီးနောက် ချီရှောင်နင်က ထပ်မေးလိုက်သည်။ "ရိုက်ကူးရေးအဖွဲ့ကရော ဘယ်လို ဖြစ်သွားပြီလား။ ပြန်သွားဦးမှာလား။"

ချွီးဟယ်ချင်းက သက်ပြင်းချလိုက်ပြီး ဖုံးကွယ်မထားခဲ့ပေ။ "မဖြစ်နိုင်တော့ဘူး။"

ချီရှောင်နင်သည် ထိုအတင်းအဖျင်းကို ကြားစဥ်က ပျော်ရွှင်ခဲ့သော်လည်း ယခု ချွီးဟယ်ချင်း သက်ပြင်းချသံကို ကြားသည့်အခါ အကြောင်းပြချက်တချို့ကြောင့် စိတ်မသက်မသာ ခံစားလိုက်ရပေသည်။

သူသည် ချွီးဟယ်ချင်း၏ ရူးအသော ပုံစံကို အမှန်တကယ် မုန်းတီးသော်လည်း ချင်ဖန့်ထျန်းမှာ အခြားသူများကို အနိုင်ကျင့်ရန် သူ၏ အာဏာကို အမှန်တကယ် အသုံးပြုခဲ့ပေသည်။ သို့ပေမယ့် ချွီးဟယ်ချင်းက ဥပဒေနှင့် ဆန့်ကျင်သော မည်သည့်အရာကိုမှ မလုပ်ဆောင်ခဲ့ပေ။

ထို့ပြင် ချွီးဟယ်ချင်းသည် ထိုဇာတ်ကောင်ကို ရရှိရန် ကိုယ်တိုင် တိုက်ခိုက်ယူခဲ့ရပြီး နောက်ကွယ်၌ မည်မျှ ကြိုးစား၍ အားစိုက်ထုတ်ခဲ့ရမည်ကို ချီရှောင်နင် မသိပေ။ သို့ပါသော်လည်း ချွီးဟယ်ချင်း၏ အားထုတ်မှုအားလုံးက ချင်ဖန့်ထျန်း၏ စကားတစ်ခွန်းကြောင့်နှင့် အလဟဿဖြစ်သွားရပေသည်။

သူ၏ ချောမွေ့ခြင်းမရှိတော့မည့် သရုပ်ဆောင် လမ်းကြောင်းကို တွေးမိသည့်အခါ ချီရှောင်နင်က ကုတ်ကိုသာ တစ်ကျိုက်မော့သောက်လိုက်တော့၏။

ချီရှောင်နင်၏ မျက်နှာထက်တွင် ခါးသီးမှုနှင့် မုန်းတီးမှုတို့ ပြည့်နှက်လာသည်ကို မြင်သည့်အခါ ချွီးဟယ်ချင်းသည် ချီရှောင်နင် ဘာတွေ ဖြစ်သွားလဲဆိုတာ မခန့်မှန်းနိုင်တော့ပေ။

သို့သော် ထိုအဖြစ်က သူ ကုတ်ဘူးကို ယူပြီး ချီရှောင်နင်၏ ဘူးနှင့် တိုက်လိုက်ခြင်းမှ မတားဆီးနိုင်ပေ။

"လာ... နောက်ထပ် သောက်လိုက်ကြမယ်။ ငါတို့တွေ သိပ်မကြာခင် နာမည်ကျော်လာလိမ့်မယ်လို့ မျှော်လင့်တယ်။"

"အိုခေ!" ချီရှောင်နင်က ကုတ်ဘူးကို ထပ်မံမော့သောက်လိုက်သည်။

သူက တစ်ငုံပြီး တစ်ငုံ သောက်နေပြီး မကြာခင်၌ ကုတ်နှစ်ဘူးလုံး ကုန်သွားလေသည်။

ချွီးဟယ်ချင်းက ထရပ်ကာ ပြောလိုက်သည်။ "သန့်ရှင်းရေး လုပ်ကြရအောင်။ ငါ အိုးသွားဆေးလိုက်မယ်။ မင်းက ပန်းကန်ဆေးလိုက်။ ငါတို့ ပြီးသွားရင် နားလို့ရပြီ။"

ပန်းကန်အားလုံး ဆေးပြီးသွားသည့်နောက်မှ ချီရှောင်နင်သည် ဘာတွေဖြစ်နေသလဲ သတိပြုမိသွားသည်။

သူ ဘာလို့ ချွီးဟယ်ချင်းက ပန်းကန်ဆေးခိုင်းတာနဲ့ ဆေးပေးလိုက်ရတာလဲ။

သူ အိမ်မှာ ရှိစဥ်က သူ့အမေ သူ့ကို ပန်းကန်ဆေးရန် ပြောသည့်အခါ သူ ဘယ်တော့မှ ခေါင်းမညိတ်ခဲ့ဖူးပေ။

သို့သော် ပန်းကန်များက ဆေးကြောပြီးသွားခဲ့ပြီ ဖြစ်သည်။ ငါ ကန့်ကွက်ကြောင်းပြဖို့ ညစ်ပတ်အောင် ပြန်လုပ်လိုက်ရမလား။

ချီရှောင်နင်က မျက်မှောင်ကြုတ်နေပြီး သူသည် အရေးကြီးသည့် ပြဿနာတစ်ခုကို ကြုံတွေ့နေရသလို ခံစားနေရသည်။

ထားလိုက်ပါတော့။ သူလည်း ဗိုက်ပြည့်အောင် စားခဲ့မိတာပဲ။

နောက်ပိုင်း၌ ချွီးဟယ်ချင်း သူ့ကို ထပ်ခေါ်ပါက သူ မကြားချင်ယောင်ဆောင်လိုက်တော့မည်။

ချီရှောင်နင်က ထိုအကြောင်းကို တွေးပြီးနောက် သူ့အခန်းသို့ ပြန်ကာ နားရန် ကြံလိုက်သည်။

ထိုအချိန်၌ သူသည် ချွီးဟယ်ချင်း ရုတ်တရက် ပြောလာသည်ကို ကြားလိုက်ရ၏။ "မင်း ကြက်အစပ် ကြိုက်လား။ ဒါပေမယ့် မီးဖိုချောင်မှာ ဒယ်အိုးစောက် မရှိဘူး။ ဒါမှမဟုတ် ငါတို့ ဒီည အော်ဒါမှာပြီးပဲ စားကြမလား။"

ချီရှောင်နင်၏ မျက်လုံးများက လက်ခနဲ ဖြစ်သွားသည်။ "မဟုတ်ဘူး။ ငါ ဒယ်အိုးစောက် သွားဝယ်လိုက်မယ်။"

ချီရှောင်နင် ထွက်သွားသည်ကို ကြည့်ပြီးနောက် ချွီးဟယ်ချင်းသည် သူ့အခန်းဆီသို့ ဖြေးညင်းစွာ လျှောက်သွားပြီး သက်သောင့်သက်သာရှိစွာ အကြောဆန့်လိုက်သည်။

ချီရှောင်နင်က စူပါမားကတ်သို့ အပြေးအလွှား သွားခဲ့ပြီး သူ့လက်ထဲမှ ဝယ်စရာ ပစ္စည်းများ စာရင်းကို ကြည့်ကာ ရုတ်တရက် အတွေးနက်သွားတော့သည်။

သူက ဘာလို့ ဒီလောက် အေးစက်နေတဲ့ နေ့မျိုးမှာ အပြင်ထွက်ပြီး ပစ္စည်းသွားဝယ်ဖို့ လိုလိုလားလား ကမ်းလှမ်းခဲ့မိတာပါလိမ့်။ အခန်းထဲမှာ စောင်နဲ့ ထွေးပြီး နွေးနွေးလေး ကွေးနေရတာ မကောင်းလို့လား။

*******

ချီရှောင်နင်ထံသို့ ပိုက်ဆံ လွှဲပေးပြီးနောက် ချွီးဟယ်ချင်း၏ ဖုန်းက အသံမြည်လာပြန်သည်။

၎င်းက ဘဏ်အကောင့်မှ ပိုက်ဆံဝင်လာသည့် မက်ဆေ့ချ် ဖြစ်ပြီး ကျန်သည့် ဇိမ်ခံပစ္စည်းများကို ပြန်အမ်းငွေ ထုတ်ယူခြင်းအတွက် မပေးရသေးသည့် ငွေကို နောက်ဆုံး၌ လွှဲပေးလိုက်ခြင်း ဖြစ်သည်။

သို့သော် အိမ်ငှားခနှင့် ဆေးရုံစရိတ် ပေးရခြင်းတို့ကြောင့် လက်ရှိ သူ့လက်ထဲ၌ ကျန်ရှိသည့် ငွေသားက အလွန် နည်းပါးသော ပမာဏသာ ဖြစ်လေသည်။

အဆုံးမှာတော့ မူလပိုင်ရှင်ကို ပိုက်ဆံချေးပေးခဲ့သူများက မည်သည့်အချိန် ပြန်တောင်းလာမည်ကို မသိတာကြောင့် တတ်နိုင်သမျှ အမြန်ဆုံး ငွေရှာပြီး လမ်းကြောင်းမှန်ပေါ် ရောက်နေရန် လိုပေသည်။

သို့ဆိုလျှင်....

"ငါ အစားအသောက် လိုက်ပို့မလို့။" ချွီးဟယ်ချင်းက ပြောလိုက်သည်။ "အားနင် ငါ ဘက်ထရီစက်ဘီးကို ဘယ်မှာ ငှားလို့ရမလဲ သိလား။"

ချီရှောင်နင်က ကြောင်အမှင်တက်သွား၏။ သူက ချွီးဟယ်ချင်းကို စိုက်ကြည့်ကာ ပြောလိုက်သည်။ "မင်း ရူးနေတာလား။ ဘာလို့ အစားအသောက် လိုက်ပို့မှာလဲ။"

ချွီးဟယ်ချင်း : "အစားအသောက် ပို့ဆောင်ပေးတဲ့ သူအတွက် လုပ်ခက မြင့်တယ်။ ပြီးတော့ အဲဒါက နေ့ချင်းရှင်းတာလေ။"

ချီရှောင်နင်က မျက်ဆံကို လှိမ့်လိုက်ပြီး မပျော်မရွှင် ပြောလိုက်သည်။ "မင်းက အစားအသောက် ပို့တာထက် စားဖိုမှူးလုပ်တာကမှ ပိုကောင်းဦးမယ်။"

"အဲဒီတော့ မင်းက ငါ ချက်တာကို အရသာရှိတယ်လို့ ထင်တယ်ပေါ့။" ချွီးဟယ်ချင်းက ပြောလိုက်သည်။

ချီရှောင်နင် : ".... မင်းက အရမ်း စိတ်ရှုပ်ဖို့ ကောင်းတာပဲ။"

ချီရှောင်နင် မျက်လုံးလှိမ့်လိုက်သည်အား မြင်သည့်အခါ ချွီးဟယ်ချင်းက စနောက်နေခြင်းအား ရပ်တန့်လိုက်သည်။

သူက ပြောလိုက်၏။ "ငါ့ကို အထင်မသေးနဲ့။ တချို့ ဒါရိုက်တာတွေက ငါ့လို ထူးခြားချောမောတဲ့ အစားအသောက် ပို့ဆောင်သူလေးကို သတိထားမိသွားတာလည်း ဖြစ်နိုင်တာပဲလေ။"

"လာစမ်းပါ။" ချီရှောင်နင်က ပြောလိုက်သည်။ "နှစ်တိုင်းပဲ ရုပ်ရှင်အကယ်ဒမီကနေ ဘွဲ့ရလာတဲ့သူတွေ အများကြီး ရှိတယ်။ ဒါရိုက်တာတွေက သူတို့အားလုံးကိုတောင် ရွေးတာ မဟုတ်ဘူး။ သူတို့က မင်းကို ဘယ်လိုလုပ် ရွေးမှာလဲ။"

"ရွေးခဲ့ရင်ရော။" ချွီးဟယ်ချင်းက ပခုံးတွန့်ပြီး ယုံကြည်ချက်ရှိရှိ ပြောလိုက်သည်။ "ငါက အရမ်း ကံကောင်းတဲ့ သူပါကွ။"

သူသည် ယခင်ဘဝ၌ ပရော်ဖက်ရှင်နင် သရုပ်ဆောင်တစ်ယောက် ဖြစ်သော်လည်း သူ၏ ခရီးလမ်း စတင်ခြင်းမှာ ရိုက်ကူးရေးအဖွဲ့ထဲသို့ နေ့လယ်စာဘူးများ ပို့ဆောင်ပေးရင်း အစပြုခဲ့ခြင်း ဖြစ်သောကြောင့် ဤဘဝ၌လည်း ထိုကဲ့သို့ စတင်လျှင် ဖြစ်နိုင်ချေ ရှိပေသည်။

ချီရှောင်နင် : “…”

သူ ဘာလို့ အရင်တုန်းက ချွီးဟယ်ချင်း ဒီလောက်ထိ အကောင်းမြင်စိတ် များလွန်းတာကို မသိခဲ့ရတာလဲ။

ကောင်းပြီလေ။ ချွီးဟယ်ချင်းက ဘယ်လို ကျွမ်းကျင်တဲ့ အစားအစာ ပို့ဆောင်သူ ဖြစ်လာမလဲဆိုတာ သူ ကြည့်ချင်မိပါသေးရဲ့။

********

Prev Next