Chapter 16

👱‍♀️Chapter 16

ပိုက်ဆံအိတ်အလွတ်ကို သိမ်းလိုက်ရင်း လီမော့က စိတ်ဓာတ်ကို မောင်းတင်လိုက်ကာ ခေါင်းလှည့်ပြီး သူတို့အိမ်ဆောက်ရာတွင် ကူညီခဲ့ကြသူများကို နှုတ်ဆက်လိုက်သည်။

ယန်လန်ဟွာနှင့် လီရှောင်ဖုန်းတို့က လူများကို သူတို့၏ အိမ်သို့ လာရန်ပြောကြသည်။ လီမော့က သူတို့နောက်လိုက်သွားပြီး သူမ၏ နောက်တွင် တိတ်ဆိတ်နေသော စုန့်တရှန်က လိုက်ပါလာသည်။

"လီမော့… ကိုယ်... ကိုယ် တောင်းပန်ပါတယ်… စိတ်မပူပါနဲ့… အိမ်ပြင်ပြီးတာနဲ့ မြို့ထဲမှာ အလုပ်သွားရှာပြီး မင်းဆီက အကြွေးယူထားတဲ့ ပိုက်ဆံကို မကြာခင် ပြန်ဆပ်ပါ့မယ်…" 

ခဏအကြာတွင် စုန့်တရှန်က စကားစပြောလာလေသည်။

လီမော့က နှုတ်ခမ်းစေ့ကာ သက်ပြင်းချလိုက်သည်။

ဤကိစ္စနှင့်ပတ်သက်ပြီး သူမက စိတ်မဆိုးဘူးဟု ပြောရန် မဖြစ်နိုင်ပေ။ သူတို့မိသားစုတွင် ပိုက်ဆံလုံးဝမရှိပေ။ အိမ်ဆောက်ရန် ချေးထားသော ပိုက်ဆံအတွက် ဦးလေးကျောက်ကို ပြန်ဆပ်ရန် ပိုက်ဆံရှာခြင်းက ပိုကောင်းပေသည်။

နေ့စဉ်သုံးစွဲရန် ရည်ရွယ်ထားသည့် ငွေတစ်ဝက်က ကုန်သွားပြီ ဖြစ်သည်။ သူတို့က အကြွေးပင် တင်နေသေးသည်။ သို့သော် ဤခေတ်တွင် မိဘကို ရိုသေကိုင်းရှိုင်းမှုက အရေးကြီးဆုံးသာ ဖြစ်သည်။ သူ၏ အမေက လူအများကြီးရှေ့၌ သူ့ကို ဒူးထောက်ခဲ့သည်။ သဘောမတူရန်က မဖြစ်နိုင်ပေ။ ယခု ဤကဲ့သို့ ဖြစ်လာသည့်အခါ တစ်ယောက်ယောက်ကို အပြစ်တင်နေ၍လည်း သူတို့အတွက် အထောက်အကူမဖြစ်ပေ။ ပိုက်ဆံက ကုန်သွားပြီ ဖြစ်ပြီး ဖြည်းဖြည်းချင်း ပိုက်ဆံရှာရုံသာ ရှိတော့သည်။ အချိန်အနည်းငယ် ကြာသည့်အခါ အခက်အခဲများကို ကျော်လွှားသွားနိုင်မည် ဖြစ်လေသည်။

"ရှင့်ခြေထောက်ဒဏ်ရာက ပြင်းထန်တယ်… ဘာတွေ ထပ်ရှာနေမှာလဲ… ရှင့်ခြေထောက်က မကျိုးသေးဘူးလို့ ထင်နေတာလား… ပိုက်ဆံဘယ်လိုရှာရမလဲဆိုတာ ဖြည်းဖြည်းချင်း စဉ်းစားကြမယ်…" 

ဤခေတ်တွင် ကျေးလက်က အမျိုးသားများက မြို့ထဲတွင် ကြုံရာကျပန်းအလုပ်များ သွားရှာတတ်ကြသော်လည်း အများစုက အလုပ်ကြမ်းများသာ ဖြစ်ကြောင်းကို လီမော့က သိပေသည်။ သဲအိတ်များ သို့မဟုတ် ဆန်အိတ်များကို ထမ်းပိုးခြင်းက အားအင်အများကြီး လိုအပ်သည်။ လူအများစုက ယခုကဲ့သို့အလုပ်မျိုးကို မလုပ်နိုင်ကြပေ။ ခြေထောက်ဒဏ်ရာရထားသော စုန့်တရှန် ဆိုလျှင် ပြောစရာပင် မလိုတော့ပေ။

စုန့်တရှန်က မျက်မှောင်ကြုတ်လိုက်ပြီး ပြောသည်။

"ကိုယ့်ခြေထောက်တွေ မကောင်းပေမယ့် ကိုယ့်မှာ အားရှိတယ်… အလုပ်ကို မထိခိုက်ဘူး… ကိုယ် သွားလို့ရတယ်…"

စုန့်တရှန် စကားမဆုံးမီ လီမော့က ဖြတ်ပြောလိုက်သည်။

"ရှောင်ပေါင်နဲ့ ကျွန်မအတွက် ရှင့်ကို ကြုံရာကျပန်းအလုပ်တွေ လုပ်ဖို့ ကျွန်မ သဘောမတူဘူး… ရှင့်ကျန်းမာရေးကိုလည်း ဂရုစိုက်ရမယ်… လျှောက်မလုပ်နဲ့…" 

လီမော့၏ သဘောထားကို မြင်သည့်အခါ စုန့်တရှန်က မျက်မှောင်ကို ပြင်းပြင်းထန်ထန် ကြုတ်လိုက်ပြီး ပါးစပ်က ဘာမျှမပြောနိုင်တော့ပေ။

လီမော့က ယခုတစ်ကြိမ်တွင် သူ၏ ဆုံးဖြတ်ချက်ကို နားလည်နိုင်သော်လည်း သူမက သူတော်စင်တစ်ယောက် မဟုတ်သလို စုန့်မိသားစုကို သွေးစုပ်ဖုတ်ကောင်ကဲ့သို့ သူတို့၏သွေးကို စုပ်ယူခွင့်ပြုရန်လည်း မဖြစ်နိုင်ပေ။ အကယ်၍ စုန့်တရှန်က သူမနှင့် ရှောင်ပေါင်အပေါ် ရက်စက်နေဦးမည်ဆိုလျှင် သူမ၏ နောက်ထပ်ခြေလှမ်းကို စဉ်းစားရပေလိမ့်မည်။

သူမက သူနှင့် ဆက်နေနိုင်တော့မည် မဟုတ်ပေ။

ထို့ကြောင့် လီမော့က စုန့်တရှန်၏ ဝမ်းနည်းနေသော ခံစားချက်ကို လျစ်လျူရှုပြီး တိုက်ရိုက်ပြောလိုက်သည်။

"အစ်ကိုတရှန်… ဒါက နောက်ဆုံးအကြိမ်ဖြစ်ဖို့ ကျွန်မ မျှော်လင့်တယ်… ရှင်က သူတို့ကို မိသားစုလို သဘောထားပေမယ့် သူတို့က ရှင့်ကို မိသားစုလို သဘောမထားဘူး… ကျွန်မတို့နှစ်ယောက် ပိုက်ဆံရှာဖို့ ကြိုးစားပေမယ့် နောက်ဆုံးမှာ တခြားသူတွေရဲ့ အိတ်ထဲကို ရောက်သွားမယ်ဆိုရင် ဒီလိုဘဝမျိုးကို ဖြတ်သန်းဖို့ ယုံကြည်မှုရှိမယ် မထင်ဘူး… ဒါကြောင့် သူတို့အပေါ်ထားတဲ့ ရှင့်ရဲ့ သဘောထားကို ကျွန်မကို ရှင်းရှင်းလင်းလင်း ပြောပြနိုင်မယ်လို့ မျှော်လင့်ပါတယ်…"

စုန့်တရှန်က လီမော့၏ စကားများကို အံ့ဩမနေခဲ့‌ပေ။ သူမက မျက်စိအတွင်း သဲဝင်ခြင်းကို သည်းမခံနိုင်သော အမျိုးသမီးမျိုး ဖြစ်သည်။ (TN သူမက လိမ်လည်လှည့်ဖျား အမြတ်ထုတ်ခံရခြင်းကို သည်းမခံသူဟု ဆိုလိုသည်။) စုန့်တရှန်က ယင်းကို မြင်နိုင်ပါသည်။ သူက သူမနှင့် ဘဝကို ကောင်းမွန်စွာ ဖြတ်သန်းချင်ပြီး သူနှင့်အတူရှိနေချိန်တွင် သူမကို အမြဲတမ်း မှားယွင်းခံရစေရန် မလုပ်နိုင်ပေ။ ယနေ့ဖြစ်ရပ်များမှတစ်ဆင့် သူ၏ ဆွေမျိုးများအပေါ်ထားသော သူ၏ နောက်ဆုံးမျှော်လင့်ချက်များကလည်း ပျောက်ကွယ်သွားခဲ့ပြီ ဖြစ်သည်။ သူက သူတို့ကို အခွင့်အရေးယူခွင့်ပေးတော့မည် မဟုတ်ပေ။

"လီမော့… ကိုယ်ငယ်ငယ်က ကိုယ့်အဖေဆုံးသွားတယ်… ကိုယ့်အမေက ကိုယ်တို့ကို တစ်ယောက်တည်း ပြုစုစောင့်ရှောက်ခဲ့တယ်… ကိုယ်ငယ်ငယ်တုန်းက အနာဂတ်မှာ သူ့ကို အမြဲနာခံရမယ်လို့ မှတ်ယူခဲ့တယ်… ဒါပေမယ့် မင်း စိတ်ချနိုင်ပါတယ်… အနာဂတ်မှာ ကိုယ် စိတ်မပျော့တော့ဘူး… သားတစ်ယောက်ရဲ့ တာဝန်ကို ကိုယ် ကျေပွန်အောင် ထမ်းဆောင်မယ်… ကိုယ် ပေးသင့်တာမှန်သမျှ ပေးမယ်… ဒါပေမယ့် အပိုဘာမှ ပေးမှာမဟုတ်ဘူး…"

စုန့်တရှန်၏ စကားကြောင့် လီမော့က စိတ်သက်သာရာရသွားပြီး သက်ပြင်းချလိုက်သည်။

ဤဖြစ်ရပ်က လူတိုင်းကို အလွန်စိတ်မချမ်းမြေ့စေခဲ့သော်လည်း အလုပ်သမားများကမူ နေ့လယ်စာကို မြင်လိုက်ရသည့်အခါ မျက်လုံးများက အရောင်တောက်လာကြသည်။

ရွာအတွင်း၌ လူများကို အလုပ်လုပ်ရန် ယေဘုယျအားဖြင့် ဖိတ်ခေါ်လေ့ရှိကြသည်။ ပိုပြီးအခက်အခဲရှိ‌သောသူများကမူ ဆန်ကွဲပြုတ်လေးချက်ပြီး ဟင်းနှစ်မျိုးနှင့် ကျွေးမွေးကြသည်။ သို့သော် ယခုနှစ်တွင်မူ လူတိုင်းက စီးပွားရေးအဆင်မပြေလှပေ။ ဗိုက်ပြည့်သည်အထိ စားရသည်ကိုက တော်တော်လေး ကောင်းနေပြီ ဖြစ်သည်။ သူတို့က အပြစ်မတင်ကြသော်လည်း ယနေ့အစားအစာက ယခုလောက်ကောင်းလိမ့်မည်မှန်း မမျှော်လင့်ထားကြပေ။ လူတိုင်းက ပေါက်စီအကြီးကြီး နှစ်လုံးစီ စားနိုင်ကြသည်။ ယင်းက တစ်မနက်ခင်းလုံး အလုပ်လုပ်ခဲ့ကြသော လူများ၏ နှလုံးသားကို နွေးထွေးစေသည်။ ယခုအချိန်တွင်မူ သူတို့က ခေါင်းစိုက်ပြီး အားရပါးရ စားနေကြရုံသာ ဖြစ်ကြသည်။

ယခုလို ခမ်းနားသော နေ့လယ်စာကြောင့် စုန့်တရှန်နှင့် လီမော့အပေါ် အလုပ်သမားအမျိုးသားများ၏ အထင်အမြင်က အနည်းငယ် ပိုကောင်းလာသည်။ အချို့က ရွာတစ်ရွာတည်းသား အချင်းချင်း ချစ်ခင်မှုကြောင့် လာကူကြခြင်း ဖြစ်ကြသည်။ ယခုတွင်မူ လူတိုင်းက အမှန်တကယ်ကူညီပြီး ပို၍ကြိုးစားလုပ်ကိုင်ကြသည်။ ညနေစောင်းတော့မည့်အချိန်တွင် အမိုးတစ်ခုလုံးက ပြင်ပြီးသွားပြီ ဖြစ်သည်။ မီးဖိုချောင်ကိုမူ နောက်နေ့တွင် ဆောက်လုပ်မည် ဖြစ်သည်။

နှစ်ရက်အတွင်း၌ အိမ်ကို ပြင်ဆင်မှုပြီးစီးသွားပြီ ဖြစ်ပြီး မီးဖိုချောင်က မီးဖိုကိုလည်း ပြန်ဆောက်လိုက်ကြသည်။ ယခင်က ဒယ်အိုးက ကွဲသွားသဖြင့် အသစ်တစ်ခုဝယ်ပြီး အစားထိုးလိုက်သည်။ ထို့နောက် လီမော့တို့ မိသားစုသုံးယောက်က အိမ်ပြန်ပြောင်းလာလိုက်ကြသည်။

သူတို့ အိမ်ပြန်ပြောင်းလာသည့်အခါ ကူညီသူများကို အိမ်တွင် ကောင်းကောင်းမွန်မွန် ကျွေးမွေးရခြင်းက ထုံးစံဖြစ်သည်။ လီမော့က ယမန်နေ့က မြည်းလှည်းနှင့် မြို့ထဲသို့သွားပြီး ကျွေးမွေးရန် ဟင်းသီးဟင်းရွက်များ ဝယ်လာခဲ့သည်။ ယနေ့မနက်တွင်မူ သူမက ကျောက်မိသားစုအိမ်သို့ သွားခဲ့သည်။ ကျောက်မိသားစု၏ ချွေးမနှစ်ယောက်ကို ဦးဆောင်ရန် ဖိတ်ခေါ်ပြီး ကျောက်မိသားစုကို နေ့လယ်စာ လာစားရန် ပြောလိုက်သည်။

အစားအစာက လွန်ခဲ့‌သောနှစ်ရက်က အစားအစာများထက် ပိုကောင်းသည်။ ယခု သူတို့ထံ၌ ပိုက်ဆံမရှိသော်လည်း လီမော့က နှစ်ရက်လုံး အလကား ကူညီခဲ့ကြသော ရွာသားများကို ကျေးဇူးတင်နေခဲ့သည်။ သူမက သူတို့ကို မနှိမ့်ချလိုသည့်အတွက် အစားအစာအတွက် တွက်ကပ်မနေခဲ့ပေ။ ဤထမင်းတစ်နပ်ကို ချွေတာရန် မကြိုးစားဘဲ တတ်နိုင်သလောက် ပေါများစေချင်ခဲ့သည်။ လီမော့က ဝက်သားတင်မကဘဲ ငါးနှင့် ကြက်သားပါ ဝယ်ခဲ့သည်။ နေ့လယ်ပိုင်းတွင် ကျောက်မိသားစု၏ ချွေးမနှစ်ယောက်က ဝက်သားပေါင်း၊ ကြက်ပေါင်းတစ်ကောင် နှင့် ငါးကို တို့ဟူးနှင့် ချက်ပြုတ်ခဲ့သည်။ အာလူးနှင့် ဝက်သားကင်တစ်ပွဲ၊ ရာသီပေါ် ဟင်းသီးဟင်းရွက်အချို့နှင့် ထမင်းဖြူအိုးကြီးတစ်အိုးတို့ပါ ပါဝင်ခဲ့သည်။

စားပွဲတစ်လုံး၏ အစွန်၌ ဟင်းပွဲအနည်းငယ် ချထားပြီး ဖိတ်ကြားခံထားရသူများက မျက်လုံးပြူးကြည့်နေကြသည်။ တရုတ်နှစ်သစ်ကူး အစားအစာများထက် ပို၍ပေါများသော အစားအစာကို ကြည့်ရင်း သူတို့အားလုံးက တံတွေးမျိုချနေကြသည်။ လူကြီးများနောက် လိုက်လာသည့် ကလေးများက စားပွဲကို ပိုပြီး အာရုံစိုက်နေကြသည်။ သူတို့က ဟင်းပွဲများကို ကြည့်ရင်း မျက်လုံးမခွာနိုင်ဘဲ စားရန် မစောင့်နိုင်ကြတော့ပေ။

လီမော့က ကလေးများ၏ ချစ်စဖွယ်ပုံစံကို ကြည့်ပြီး ပြုံးလိုက်ကာ လူတိုင်းကို အားမနာဘဲ စားကြရန် ပြောလိုက်ပြီး ယခင်က မြို့ထဲက ဝယ်ခဲ့သော ဝိုင်အိုးနှစ်လုံးကို စားပွဲပေါ် တင်လိုက်သည်။

ယခုအချိန်တွင်မူ လူအားလုံးက စိတ်လှုပ်ရှားနေကြပြီ ဖြစ်သည်။ ဤလူများက များသောအားဖြင့် မည်သည့်ဝါသနာမျှ မရှိကြပေ။ သူတို့အများစုက ဝိုင်အနည်းငယ် သောက်ရသည်ကို ကြိုက်ကြသည်။ အမျိုးသားအချို့က အတူစု၊ အစာစားပြီး ဝိုင်လေးအနည်းငယ်နှင့် တွဲဖက်လိုက်ရလျှင် ယင်းက အဆုံးစွန်သော ပျော်ရွှင်မှုသာ ဖြစ်သည်။ ဝိုင်ဝယ်သောက်ရန်က မလွယ်ကူလှပေ။ ယခု အစားအစာကောင်းနှင့် ဝိုင်ရှိသည်ကို မြင်ရသည့်အခါ စိတ်မလှုပ်ရှားဘဲ မနေနိုင်ကြပေ။ ယခု စုန့်တရှန်ကို လက်မထောင်ပြလိုက်ကြသည်။

လီမော့ ဝိုင်ဝယ်ခဲ့ခြင်းကို စုန့်တရှန်က မသိခဲ့ပေ။ လူတိုင်း မည်မျှ ပျော်နေကြကြောင်း မြင်သည့်အခါ သူက ရယ်လိုက်သည်။ သူက ထရပ်ပြီး လူတိုင်းအတွက် ဝိုင်ငှဲ့ပေးလိုက်တယ်။ 

"လာကြ… လူတိုင်း တစ်ခွက်လောက် သောက်ကြ…"

ဤထမင်းတစ်နပ်ကို သူတို့က စည်စည်ကားကားနှင့် နှစ်နာရီကြာ စားသောက်ကြသည်။ နောက်ဖေးမီးဖိုချောင်တွင် ကူညီနေသော အမျိုးသမီးများက မီးဖိုချောင်အတွင်း၌ စားပြီးကြပြီ ဖြစ်သည်။ အရှေ့က အမျိုးသားများကမူ တစ်ခွက်ပြီး တစ်ခွက် သောက်နေကြဆဲ ဖြစ်သည်။ ယနေ့ သူတို့က ပျော်နေကြပြီး အမျိုးသမီးများကလည်း သူတို့၏ အမျိုးသားများကို ဂရုမစိုက်ကြပေ။ သူတို့က သောက်စားပျော်ပါးနေကြခြင်းကြောင့် စုန့်တရှန်မိသားစုက အလွန်စည်ကားနေခဲ့သည်။

လီမော့က လာကူညီသော အမျိုးသမီးအနည်းငယ်နှင့်အတူ မီးဖိုချောင်ကို သန့်ရှင်းရေးလုပ်လိုက်သည်။ အရာအားလုံးက အဆင်ပြေ‌နေသည်ကို မြင်သည့်အခါ သူမက အခန်းအတွင်းသွားပြီး ထိုင်စကားပြောရန် ပြောလိုက်သည်။

ထိုင်ပြီးသည့်နောက်တွင် အမျိုးသမီးတစ်ယောက်က ယန်လန်ဟွာကို စပ်စုပြီး မေးလိုက်သည်။ 

"လန်ဟွာ… ငါ ခုနက ချက်ပြုတ်နေတုန်းက နင့်ကို မေးချင်နေတာ… နင့်ခန္ဓာကိုယ်ကနေ မွှေးတဲ့အနံ့ ထွက်နေတယ်မဟုတ်လား… နင် ဘာလိမ်းထားတာလဲ…"

ယန်လန်ဟွာက ကြောင်သွားပြီးမှ ရယ်လိုက်သည်။ သူမက လီမော့ကို တစ်ချက်ကြည့်လိုက်ပြီး အမျိုးသမီး၏ နှာခေါင်းနားသို့ သူမ၏ လက်ကို စိတ်အားထက်သန်စွာ ဆန့်တန်းလိုက်သည်။ 

"ရှူကြည့်… မွှေးလား… ဒါက ရေမွှေးအဆီ…"

ထိုအမျိုးသမီးကို ချန်ရှန်းလျန်ဟု ခေါ်သည်။ သူမ၏ ယောက်ျားက လီမော့၏ မိသားစုကို နှစ်ရက်ကြာ ကူညီခဲ့သည်။ ယနေ့တွင် သူမကို လီမော့က သူမ၏ ယောက်ျားနှင့်အတူ ထမင်း လာစားရန် ဖိတ်ခေါ်ခဲ့ခြင်း ဖြစ်သည်။ သူမက ယန်လန်ဟွာနှင့် ပုံမှန်အားဖြင့် ဆက်ဆံရေးကောင်းသည်။ သူတို့နှစ်ယောက်၏ မိသားစုများက ရွာတစ်ရွာတည်းတွင် နေကြပြီး အိမ်ထောင်ကျပြီးနောက်တွင်လည်း သူမတို့က တစ်နေရာတည်းတွင်သာ နေကြခြင်း ဖြစ်သည်။ ထို့ကြောင့် သူတို့က အတူတူ စနောက်ရခြင်းကို ကြိုက်ကြသည်။ မည်သူပဲဖြစ်ဖြစ် ပစ္စည်းအသစ်ဝယ်လျှင် တစ်ယောက်နှင့် တစ်ယောက် ပြောကြသည်။

ယခု ယန်လန်ဟွာက ရေမွှေးအဆီဟု ပြောသည်ကိုကြားသည့်အခါ သူမ၏ မျက်လုံးများက ပြူးကျယ်သွားသည်။

"နင် ရေမွှေးအဆီကို ဘယ်တုန်းက ဝယ်တာလဲ… ဈေးမကြီးဘူးလား… နင် အဲ့လောက်တောင် သုံးရက်လား…"

ယန်လန်ဟွာက ဆက်ပြီး အချိန်မဆွဲတော့ဘဲ ရေမွှေးအဆီပိုင်ရှင်အဖြစ် လီမော့ကို တိုက်ရိုက် ထုတ်ဖော်ပြောလိုက်သည်။ ဤကိစ္စကို ပြောလိုက်သည့်အခါ အမျိုးသမီးများစွာက အံ့ဩသွားကြပြီး ချန်ရှန်းလျန်က လီမော့ကို ပြခိုင်းရန် မစောင့်နိုင်တော့ဘဲ သူမက ဝယ်ချင်နေခဲ့သည်။

လီမော့က စိတ်ဝင်စားနေကြသော အမျိုးသမီးများကို ကြည့်လိုက်သည်။ ထို့နောက် အစ်မလန်ဟွာက သူမကို မြှင့်တင်ပေးရန် အမှန်တကယ် သတိရသည်ဟု တွေးလိုက်မိသည်။

လီမော့က ကျန်နေသော ရေမွှေးအဆီဘူးများကို ထုတ်ပြီး အမျိုးသမီးများကို ပြလိုက်သည်။

အမျိုးသမီးများစွာက ယခုလောက်ကြီးသော အဆီဘူးကို မမြင်ဖူးကြပေ။ အရောင်က ကြည့်ကောင်းရုံသာမကဘဲ အနံ့ကလည်း အလွန်မွှေးသည်။ အလှကုန်ဆိုင်တွင် ရောင်းသည်များထက် မညံ့သလို တစ်ဘူးကို ၅ ယွမ်သာ ကျသင့်သည်။

ချန်ရှန်းလျန်၏ မိသားစုအခြေအနေက မဆိုးသည့်အတွက် သူမက အများကြီး မတွေဝေခဲ့ပေ။ သူမက ချက်ချင်းပင် ၅ ယွမ်နှင့် တစ်ဘူး ဝယ်လိုက်သည်။ ချန်ရှန်းလျန် ဝယ်သည်ကို မြင်သည့်အခါ စိတ်ယိုင်နေသော နောက်အမျိုးသမီးတစ်ယောက်ကလည်း ၅ ယွမ် ပေးလိုက်သည်။ ကျန်အမျိုးသမီးနှစ်ယောက်ကမူ ခဏကြာ တွေဝေနေသော်လည်း ဝယ်ရန် စိတ်မပါကြပေ။

လီမော့က ရေမွှေးအဆီဝယ်သွားသော အမျိုးသမီးနှစ်ယောက်၏ ပျော်ရွှင်မှုကို ကြည့်ရင်း လွန်ခဲ့သောနှစ်ရက်က သူမ၏ စိတ်အတွင်း၌ စဉ်းစားနေခဲ့သည်ကို သတိရပြီး ထိုအတိုင်း လုပ်ရန် အစီအစဉ်ဆွဲလိုက်သည်။

အမျိုးသားများက ဝိုင်သောက်ပြီးသည့်နောက်တွင် လီမော့နှင့် အမျိုးသမီးအနည်းငယ်က ပန်းကန်များနှင့် တူများကို သန့်ရှင်းရေးလုပ်ပြီး ငှားထားသော ပန်းကန်များနှင့် တူများကို တစ်ခုချင်းစီ ပြန်ပေးလိုက်သည်။ ထို့နောက်တွင် လီမော့က ကျောက်မိသားစု၏ ချွေးမနှစ်ယောက်နှင့် အတော်လေး စကားများသည့် ချန်ရှန်းလျန်ကို သီးသန့်နေကျန်ခိုင်းလိုက်သည်။

လီမော့က အမျိုးသမီးသုံးယောက်ကို သူမ၏ အစီအစဉ်များအကြောင်း တိုက်ရိုက်ပြောပြသည်။ 

"ယောက်မတို့… ကျွန်မ ရှင်တို့နဲ့အတူ အလုပ်လုပ်ပြီး စီးပွားရေးသေးသေးလေး လုပ်ချင်လို့ ရှင်တို့ကို နေခိုင်းတာပါ… ယောက်မတို့ စိတ်ဝင်စားမလားတော့ မသိဘူး…"

လီမော့က အစုစပ်လုပ်ငန်းအကြောင်း ပြောသည်ကိုကြားသည့်အခါ သူတို့က ဤစီးပွားရေးကို စိတ်မဝင်စားဘဲ မနေနိုင်ပေ။ သူတို့က ချက်ချင်းပင် လီမော့ကို ရှင်းပြပေးရန် တိုက်တွန်းကြသည်။

လီမော့က ပြုံးလိုက်ပြီး သူမ၏ အတွေးများကို ပြောပြသည်။

"ယောက်မတို့… ကျွန်မမှာ နည်းလမ်းရှိပြီး ဒီရေမွှေးအဆီကို လုပ်နိုင်တယ်ဆိုတာ ရှင်တို့လည်း သိပါတယ်… ဒီရေမွှေးအဆီကို ရှင်တို့ မြင်ဖူးကြပါတယ်… ဒီရေမွှေးအဆီကို ဒီရွာမှာ ရောင်းလို့ရတယ်ဆိုတာလည်း ရှင်တို့ သိကြမယ်ထင်တယ်… ဒါပေမယ့် ကျွန်မတစ်ယောက်တည်း မရောင်းနိုင်ဘူး… ပြီးတော့ ဒီအဆီကို တခြားသူတွေကို ညွှန်းဖို့ အချိန်အများကြီး မရှိဘူး… တခြားရွာတွေဆို ပိုဆိုးတာပေါ့… ဒါကြောင့် ကျွန်မစဉ်းစားမိတာက ရှင်တို့က ၅ ယွမ် ဒါမှမဟုတ် ၆ ယွမ်နဲ့ ရောင်းရင် ရှင်တို့က ညွှန်းပေးခအတွက် ၂ ယွမ် ယူပေါ့… သဘောတူလား…"

၎င်းကို ကြားသည့်အခါ သူတို့အားလုံးက စိတ်တွင်း၌ တွက်ချက်လိုက်ကြသည်။ ဘူးကို ရောင်းလိုက်လျှင် ကုန်ကျစရိတ်မရှိဘဲ တစ်ယွမ် သို့မဟုတ် နှစ်ယွမ် အမြတ်ရနိုင်သည်။ ၎င်းက ပါးစပ်စိုက်ရုံသက်သက်သာ ဖြစ်သည်။ ဤအရောင်းအဝယ်က ယခုထက်ပိုပြီး တွက်ခြေမကိုက်နိုင်တော့ပေ။ တစ်ခုတည်းသော စိုးရိမ်မှုကမူ မရောင်းရဘဲ သူတို့လက်ထဲတွင် ကျန်နေမည်ကိုသာ ဖြစ်သည်။

လီမော့က သူတို့စိတ်အတွင်းက စိုးရိမ်မှုများကို သိပုံရပြီး ချက်ချင်း ထပ်ဖြည့်ပြောလိုက်သည်။ 

"ယောက်မတို့… ဝယ်ပြီးမှ မရောင်းရမှာကို ကြောက်စရာမလိုပါဘူး… အရင်ရောင်းကြည့်ပါ… တစ်ဘူးရောင်းရရင် ကျွန်မဆီက တစ်ဘူးလာယူပြီးမှ ပိုက်ဆံပေးလို့ရတယ်…"

လီမော့၏ စကားကို နားထောင်ပြီး သူတို့က ချက်ချင်းပင် စီးပွားရေးလုပ်ရန် သဘောတူလိုက်ကြလေသည်။

👱‍♀️👱‍♀️