အပိုင်း ၃၀
Viewers 882
Chapters 600

အခန်း(၃၀) - ပြည်တွင်း အာဏာရှင် ကြည့်ရှုသူ

 

“ကျွန်တော် ဒါအတွက် ပေးစရာမလိုဘူး”

 

လန်ကျားယီသည် အနည်းငယ် ရှက်ရွံ့သွားမိသည်။

 

 “သူမက ပိုက်ဆံအကြောင်း မပြောဘူး။ ကျွန်တော် ဒါကို အလကားယူလိုက်ရတာ တော်တော်လေး ရှက်စရာကောင်းတယ်။ ကျွန်တော် နောက်မှ သူမရဲ့ တိုက်ရိုက်ထုတ်လွှင့်မှုမှာ ဝင်ကြည့်ပြီး သူမကို လက်ဆောင်တွေ ပို့ပေးလိုက်မယ်”

 

လန်မင်ဟန်သည် အနည်းငယ် မျက်မှောင်ကြုတ်သွားပေမယ့် သူပြောတာကို လက်ခံလိုက်သည်။

 

 “မကောင်းတဲ့ အကြံအစည်တွေကို ဖုံးကွယ်ထားတဲ့သူလည်း ဖြစ်နေဦးမယ်”

 

“အစ်ကိုကြီး မင်း တစ်ယောက်ယောက်ကို အကောင်းမြင်စိတ်‌လေးများ မထားနိုင်ဘူးလား။ မနေ့က ကျွန်တော် အဲ့တာကို ပြန်ယူလာတုန်းကလည်း အဲ့တာကို စိတ်မချရဘူး။ မစားနဲ့...လို့ ပြောသေးတယ်။ ပြီးတော့ အဘွား ဒါကို စားပြီး အစာစားချင်စိတ် ပိုကောင်းလာပြီး တက်ကြွလာတယ်လေ။ အစ်ကို သတိထားတာက ကောင်းပေမယ့် တစ်ခါတလေ သတိအရမ်းကြီးနေဖို့ မလိုအပ်ဘူး”

 

လန်ကျားယီသည် ရိုးစင်းသောလူ တစ်ဦးဖြစ်ပြီး သူတွေ့ခဲ့ဖူးသမျှ လူတိုင်းကို အမြဲယုံကြည်ခဲ့သည်။

 

စုယန်ယန်က ဒီဟင်းလျာတွေက အစာစားချင်စိတ်ကို လှုံ့ဆော်ပေးပြီး သက်ကြီးရွယ်အိုများနှင့် သင့်တော်ကြောင်း ရှင်းပြသည်ကို နားထောင်ပြီးနောက် တရုတ်ဆေးဖက်ဝင် ဟင်းလျာနှစ်မျိုးကို စမ်းစားကြည့်သင့်တယ်လို့ ရိုးရှင်းစွာ တွေးခဲ့သည်။

 

သို့သော် သူ့အဘွားဖြစ်သူရဲ့ အစာစားချင်စိတ် တိုးမြင့်လာသည်ကို သူကိုယ်တိုင် မြင်တွေ့လိုက်ရသည်။ ရှန်းကျားနဲ့ ခရူးရှင်းငါးကြင်း စွပ်ပြုတ်ကို သောက်ပြီးချိန်တွင် သူမသည် နောက်ထပ် ထမင်းတစ်ပန်းကန်ကိုပင် ထပ်မံ စားသောက်လိုက်သေးသည်။ လန်ကျားယီသည် ထိုအချိန်မှစ၍ စုယန်ယန်ရဲ့ အမာခံပရိသတ် တစ်ယောက်ဖြစ်လာပြီး သူမကို အခြားသူများက အသေရေဖျက်ရန် ခွင့်မပြုတော့ပေ။

 

သို့သော် လန်မင်ဟန်က သဘောမတူချင်ပေ။ ကိစ္စအသေးအမွှားလေးတွေနဲ့ ပတ်သက်ပြီး အာရုံစိုက်တာက မှားယွင်းတယ်လို့ မထင်တဲ့အပြင် အမည်မသိ အစားအသောက် ပါဝင်ပစ္စည်းများကို လက်ခံရရှိသည့်အခါ သတိထားရန် ပြောဆိုသည်မှာ သာမာန်ပင်ဖြစ်သည်။

 

လန်ကျားယီသည် သူ့ရဲ့ ခေါင်းမာသော အစ်ကိုကြီးကိုကြည့်ပြီး တစ်စုံတစ်ခုကို တွေးမိလိုက်သလို သူ့အကြည့်တွေက အနည်းငယ် ပြောင်းလဲသွားပြီး အပြုံးလေးဖြင့် ပြောလိုက်သည်။

 

 “အစ်ကိုကြီး ဒီလိုလုပ်ကြည့်လိုက်လေ။ အဲ့ဒီတင်ဆက်သူက တကယ့်ကို ဗဟုသုတနဲ့ပြည့်စုံတယ်။ မရီးက အမြဲတမ်း ဓမ္မတာလာချိန်ကျရင် နာကျင်ကိုက်ခဲနေတတ်တယ် မဟုတ်လား။ ဒီနေ့ သူမ တိုက်ရိုက်ထုတ်လွှင့်မှာ မင်း ဒီအကြောင်းနဲ့ပတ်သက်ပြီး သူမကို မေးမြန်းကြည့်လို့ရတယ်။ မင်း သူမကို တရုတ်ဆေးဖက်ဝင်ဟင်းလျာ ဝေမျှတောင်းဆိုနိုင်ပြီး မရီးကို ပေးလို့ရတယ်လေ”

 

ထိုစကားကို ကြားလိုက်ရသောအခါတွင် လန်မင်ဟန်ရဲ့ နှလုံးသားက အနည်းငယ် ယိမ်းယိုင်သွားသည်။ လွန်ခဲ့သည့်နှစ်ရက်က သူ့ဇနီးသည် ဓမ္မတာလာခြင်းနှင့် ပတ်သက်ပြီး အော်ဟစ်ညည်းညူနေပုံကို ပြန်အမှတ်ရမိသွားသည်။

 

သူမ၏ဓမ္မတာလာချိန်တွင် နာကျင်ကိုက်ခဲနေခြင်းကို သက်သာစေရန် ဆေးဖက်ဆိုင်ရာ အကြံဉာဏ်များနှင့် ကွဲပြားခြားနားသော ကုထုံးများကို ရှာဖွေခဲ့လေသည်။

 

ဒီရက်ပိုင်းတွင် သူမ ဒီဝေဒနာကို အလွန်အမင်း ခံစားနေရပြီး သူမကို ကြည့်လိုက်တိုင်း စိုးရိမ်ပူပန်နေခဲ့ရသည်။ အဲ့တာက တကယ်ပဲ အလုပ်ဖြစ်နိုင်ရင်...

 

လန်မင်ဟန်၏ နှလုံးသားက လှုပ်ရှားသွားခဲ့သော်လည်း “မင်း ဘာကြည့်နေတာလဲ။ ငါက မင်းလို အားလပ်နေတယ်လို့များ ထင်နေလား။ ငါ အလုပ်သွားရတော့မယ်” လို့ မာဆတ်ဆတ်  ပြောလိုက်သည်။

 

လန်ကျားယီက ရှန်းကျားဘူးကို ပွေ့ပိုက်ထားရင်း ရေရွတ်လိုက်သည်။

 

 “မင်း မမေးရင် မမေးနဲ့ပေါ့။ အဲ့တာက ငါ့ပြဿနာမှ မဟုတ်တာ။ အားလပ်နေလို့ရော ဘာဖြစ်လဲ။ အပြင်မှာ လူဘယ်နှယောက်လောက်က အားလပ်ချိန်ရလို့ ငြူစူနေတာမျိုး ရှိဖူးလို့လဲ”

 

သူ့ဖာသာသူ ရေရွတ်ပြောဆိုနေပြီးနောက် ထိုဘူးကို ရေခဲသေတ္တာထဲသို့ ထည့်ထားလိုက်သည်။ သူက တိုက်ရိုက်ထုတ်လွှင့်မှု စောင့်ဆိုင်းခန်းထဲသို့ ဝင်ရောက်ကာ စုယန်ယန် တိုက်ရိုက်ထုတ်လွှင့်မှာကို စောင့်ဆိုင်းနေခဲ့သည်။

 

သူ့အစ်ကိုက ဒီတိုက်ရိုက်ထုတ်လွှင့်မှုကို မကြည့်ဘူးဆိုရင်တောင်မှ သူက လက်လွှတ်မှာ မဟုတ်ပေ။ နောင်အချိန်မှာ သူ့မှာ ချစ်သူရှိလာသည့်အခါ သူ့အပေါ် ပိုချစ်လာစေဖို့ ဒီအချက်ကို အားကိုးလို့ရနိုင်သည်။

 

သူက တကယ့်ကို လိမ္မာပါးနပ်တဲ့ လူတစ်ယောက်ပင် … ။

 

စုယန်ယန် သူမ၏ တိုက်ရိုက်ထုတ်လွှင့်မှုကို စတင်လိုက်ချိန်တွင် စောင့်ဆိုင်းခန်းမှာ လူဆယ်ယောက်ကျော်ရှိနေပြီး ဒါက သူမ ပထမဆုံးအကြိမ် တိုက်ရိုက်ထုတ်လွှင့်မှုနှင့် ယှဉ်လျှင် ကြီးမားသည့် ကွာခြားချက် တစ်ခုပင်ဖြစ်သည်။

 

ဒီနေ့ခေတ် လူအများစုဟာ တရုတ်ဆေးဖက်ဝင် ဟင်းလျာတွေအကြောင်း သိပ်မသိကြပါဘူး။ စုယန်ယန်၏ တိုက်ရိုက်ထုတ်လွှင့်မှုက သူတို့ကို စွဲဆောင်နိုင်သည့် အကြောင်းအရင်းကတော့ စုယန်ယန် ငါးကို ကောင်းကောင်းမွန်မွန် ကြော်တတ်ခြင်းကြောင့်ပင် ဖြစ်သည်။

 

[ဟေး... တင်ဆက်သူရေ နင် ဒီနေ့ ငါးကြော်ပြဦးမှာလား။ ငါ မနေ့တုန်းက နင့်ရဲ့ခရူးရှင်း ငါးကြင်းစွပ်ပြုတ် ချက်တာကိုကြည့်ပြီး ငါ ငါးတစ်ကောင်ဝယ်ပြီး အိမ်မှာချက်စားဖို့ လုပ်ခဲ့တယ်။ ရလဒ်ကတော့ မမျှော်လင့်ပဲ ငါးကြော်က တူးသွားတယ် QAQ!]

 

[ဟေး ငါလည်း ချက်စားသေးတယ်။ ငါ့ငါးကျတော့ မကျက်သွားဘူး။ ခဏလေးပဲကြော်ပြီး စွပ်ပြုတ်ထဲ ထည့်လိုက်တယ်။ ရလဒ်ကတော့ မျှော်လင့်ထားသည့်အတိုင်း ငါးညှီနံ့နံပြီး အသားတွေ ကွဲကြေသွားတယ်။ ငါ့ကိုယ့်ကိုယ်ကို နှိပ်စက်ညှင်းပန်းပြီး မျက်ရည်ဝဲဝဲနဲ့ စားခဲ့ရတယ်။]

 

လူတစ်စုသည် တိုက်ရိုက်ထုတ်လွှင့်မှုကို ကြည့်ရှုပြီးနောက် သူတို့၏ ပထမဆုံး ဟင်းချက်အတွေ့အကြုံကို အမျိုးမျိုး ပြောဆိုနေကြသော်လည်း ရုတ်တရက် ဆိုသလိုပင် အချိန်နှင့်တပြေးညီ မှတ်ချက်များကို ဖုံးအုပ်သွားစေသည့် ကြီးမားပြီး တလက်လက် တောက်ပနေသော စိန်လက်ဆောင်ထုပ်ကြီး တစ်ခု ထွက်ပေါ်လာသည်။

 

[ဂုဏ်ယူပါတယ်၊ တင်ဆက်သူ (ယန်ယန်ရဲ့ မီးဖိုချောင်) သည် ကြည့်ရှုသူ (တောင်တန်းပေါ်ကပိုးစာပင်)ထံမှ စိန်အလုံး 520ကို လက်‌ဆောင်အဖြစ် လက်ခံရရှိခဲ့ပါတယ်။ ကျေးဇူးပြုပြီး ဆက်လက်ကြိုးစားပေးပါ~]

 

***

Prev Next